Jehovah maun an sati poi

1. Unfa Mosesi bi lei taa a ta futoou Jehovah di a bi ta tja dee Isaëli sëmbë kumutu a Egepiti?

DI BUKU Hebelejën ta taki u sëmbë di bi ta buta futoou a Jehovah. Wan u dee sëmbë aki da Mosesi (Heb. 3:2-5; 11:23-25). A bi lei taa a bi abi biibi di a bi tja dee Isaëli sëmbë kumutu a Egepiti. An bi mbei di makiti Könu Falao ku dee sodati fëën tapëën. A bi ta futoou Jehovah te dou. Fëën mbei a bi tja dee sëmbë pasa di Bë Ze, hën bakaten a bi tja de go a di sabana (Heb. 11:27-29). Gaansë u dee Isaëli sëmbë an bi ta biibi möön taa Jehovah bi o da de dee soni dee de bi abi fanöudu, ma Mosesi hën a bi ta futoou di Gadu fëën go dou. Wan bunu soni seei a bi du dë, u di Jehovah bi da de soni u njan, ku wata u bebe a wan foombo fasi a di dëë sabana.a​—Ëki. 15:22-25; Ps. 78:23-25.

2. Faandi mbei Gadu bi hakisi Mosesi taa: „I si kuma Jehovah maun sati poi faa sa heepi de u?” (Nöbu 11:21-23)

² Hii fa Mosesi bi abi sö wan taanga biibi, tökuseei baka wan jaa di de kumutu a katibo a Egepiti, a bi ta hakisi hënseei ee Jehovah bi o sa da dee sëmbë fëën gbamba u njan kumafa a bi taki. Mosesi an bi sa kaba fusutan unfa Jehovah bi o sa da dee milionmilion Isaëli sëmbë dë gbamba u de njan tjika de, u di bëina soni u njan an bi dë u feni a di sabana. Fëën mbei Jehovah bi hakisi Mosesi taa: „I si kuma Jehovah maun sati poi faa sa heepi de u?” (Lesi Nöbu 11:21-23.) Dee wöutu „Jehovah maun” kë taki di santa jeje fëën, nasö di kaakiti fëën di a ta tei u du soni. Fuu taki ën, nöö Jehovah bi ta hakisi Mosesi taa: ’I ta si kuma ma o du andi mi taki taa mi o du nö?’

3. Faandi mbei a dë fanöudu fuu buta pakisei a di woto u Mosesi ku dee Isaëli sëmbë?

³ I bi hakisi iseei kaa ee Jehovah o da i, nasö dee sëmbë fii wosudendu dee soni di de abi fanöudu ö? Wë, boo luku di woto u Mosesi ku dee Isaëli sëmbë di na bi ta biibi möön taa Gadu bi sa da de dee soni di de bi abi fanöudu. Woo luku wantu Bëibel tëkisi di o heepi u fuu ko ta biibi möön gaanfa taa Jehovah maun an sati poi faa heepi u.

U SA LEI SONI A MOSESI KU DE ISAËLI SËMBË

4. Faandi mbei sömëni Isaëli sëmbë bi ta fëëë taa Jehovah an bi o sa sölugu de?

⁴ Faandi mbei sömëni Isaëli sëmbë bi ko ta si kuma Jehovah an bi o sa da de dee soni di de bi abi fanöudu? Dee Isaëli sëmbë ku „sömëni woto köndë sëmbë” bi dë makandi a di sabana wan hii pisiten, di de bi kumutu a Egepiti nango a di Paamusi Köndë (Ëki. 12:38; Deto. 8:15). Dee woto köndë sëmbë dë bi ko wei u njan di mana, nöö de ku sömëni u dee Isaëli sëmbë bi bigi ta kaagi (Nöb. 11:4-6). Dee Isaëli sëmbë bi kë njan dee soni di de bi ta feni a Egepiti. U di dee sëmbë bi ta ko ta kaagi da Mosesi, mbei a bi ta pakisei taa, hën bi musu suku gbamba da hii de tuu, nöö an sabi naasë a bi o feni ën.​—Nöb. 11:13, 14.

5-6. Andi u sa lei a di fasi fa dee woto köndë sëmbë bi mbei dee Isaëli sëmbë du soni?

⁵ Dee woto köndë sëmbë an bi ta tei dee soni dee Jehovah bi ta du da de u bigi, nöö dee Isaëli sëmbë bi waka a de baka. Di seei soni aki sa pasa ku u tu. Te woto sëmbë an ta tei dee soni dee Jehovah ta du da de u bigi, nöö useei sa ko ta si kuma dee soni dee Jehovah ta du da u an tjika. Di soni dë sa pasa ee u ta hangi u feni dee soni dee u bi abi fosu, nasö ee u ta haun ku wotowan. Ma woo sa dë ku möön piizii ee u dë tifeedi ku dee soni dee u abi.

⁶ Dee Isaëli sëmbë bi musu hoi a pakisei taa Gadu bi piki de taa te de bi dou a di köndë di a bi o da de, nöö a bi o da de hii dee soni di de bi abi fanöudu. Di soni di Jehovah bi paamusi de dë bi o pasa a di Paamusi Köndë, ma na a di ten di de bi dë a di sabana. Sö nöö, wa o feni wini fëën ee u ta buta pakisei tumisi a dee soni dee wa sa feni a di goonliba aki. U musu ta buta pakisei a dee soni dee Jehovah paamusi u taa a o da u a di njunjun goonliba, nöö woo dë waiwai. Boiti di dë, u sa kai pakisei a dee Bëibel tëkisi dee sa heepi u fuu ko ta futoou Jehovah möön gaanfa.

7. Faandi mbei u sa dë seiki taa di maun u Jehovah an sati poi u heepi u?

⁷ Ma kandë i sa hakisi iseei taa faandi mbei Gadu bi hakisi Mosesi taa: „I si kuma Jehovah maun sati poi faa sa heepi de u?” A kan taa Jehovah bi ta heepi Mosesi fu an buta pakisei a di taanga di maun fëën taanga nöö a kaba, ma a bi musu buta pakisei tu a di ka maun fëën bi sa dou. Gadu bi sa da dee Isaëli sëmbë gaan hia gbamba u de njan, hii fa de bi dë a di sabana. Jehovah bi lei taa a abi kaakiti u di a bi tëndë di taanga maun fëën u heepi de (Ps. 136:11, 12). Fëën mbei te u dë ku fuka, nöö wa musu fëëë taa Jehovah maun an o sa dou a hiniwan fuu apaiti, aluwasi naasë u dë.​—Ps. 138:6, 7.

8. Andi sa heepi u fu wa mbei di föutu di sömëni u dee Isaëli sëmbë bi mbei a di sabana? (Luku di peentje tu.)

⁸ Jehovah bi du andi a bi paamusi de. A bi manda gaan hia tookoo da dee sëmbë fëën. Ma dee Isaëli sëmbë an bi da Gadu tangi u di foombo soni aki. Sömëni u de bi ko abi langahati. Wan hii daka ku hafu de bi puu ta kisi te a hia u de fou aki ta lai a soni. Jehovah hati bi boonu gaanfa seei ku dee sëmbë dee bi abi langahati, hën a sitaafu de (Nöb. 11:31-34). Andi u sa lei a di woto aki? U musu mbei möiti fu wa ko abi langahati. Aluwasi u gudu nasö u pooti, u musu mbei möiti u „lai gudu a Masa Gadu Köndë ala”. Di fasi fa u sa du di soni dë, hën da te u ta mbei möiti fuu ku Jehovah ku Jesosi ko dë möön gaan mati (Mat. 6:19, 20; Luk. 16:9). Te u ta du di soni dë, nöö u sa dë seiki taa Jehovah o da u dee soni dee u abi fanöudu.

9. Andi u sa dë seiki taa Jehovah o du da u?

⁹ Jehovah ta tëndë hën maun u heepi dee sëmbë fëën a di ten aki. Ma di soni dë an kë taki taa nöiti wa o abi möni pena, nasö taa hangi an o kii u nöiti wan daka.b Ma nöiti Jehovah o disa u. A o da u di taanga di u abi fanöudu te u abi bookohedi. Boo luku tu soni di sa pasa ku u, ka u sa lei taa u ta biibi taa Jehovah o sa sölugu u. Di fosu soni, hën da te u abi möni fuka. Di u tu soni, hën da te u ta fëëë taa wa o abi möni tjika u sölugu useei te u ko gaandi.

TE U ABI MÖNI FUKA

10. Andi sa mbei u ko abi möni fuka?

¹⁰ Möön di kaba u di goonliba aki ta zuntu, möön u sa dë ku di mëni taa soni o ko möön taanga a möni së. Te feti ta feti, te politiki soni an ta waka bunu, te wan gaan hogi ko pasa ka u dë, nasö ee wan njunjun siki toona paaja a hii së u goonliba, nöö a sa pasa taa u lasi wooko, dee gudu dee u abi, nasö taa u musu foloisi kumutu ka u ta dë. Dee soni dë sa mbei a taanga da u gaanfa seei fuu feni dee soni dee u abi fanöudu. Kandë a o dë fuu suku wan woto wooko ka u foloisi go, nasö kandë u sa pakisei u foloisi ku dee sëmbë u di wosudendu fuu go a wan kamian ka an o taanga da u sö u sölugu de. Andi sa heepi u fuu buta futoou a Jehovah te woo luku andi woo du?

11. Andi sa heepi i te i abi möni fuka? (Lukasi 12:29-31)

¹¹ Di möön bunu soni di i sa du, hën da fii konda di bookohedi fii da Jehovah (Nöng. 16:3). Hakisi ën faa da i di köni di i abi fanöudu u du wan bunu soni, söseei faa heepi i fu ja „kai dee soni naandë gaan soni poi”. (Lesi Lukasi 12:29-31.) Ta begi ta hakisi ën nöömö faa heepi i fii dë tifeedi ku dee soni dee i abi fanöudu tuutuu u dë a libi (1 Tim. 6:7, 8). Suku woto a dee buku fuu di sa heepi i fii sabi andi i musu du, te i abi möni fuka. Sömëni sëmbë bi taki taa de bi feni heepi di de luku dee fëlön, ku dee woto a jw.org di ta taki u möni fuka.

12. Andi sa heepi wan Keesitu sëmbë faa du soni di o tja wini ko da dee sëmbë fëën wosudendu?

¹² So sëmbë bi tei wooko di bi mbei taa de bi nango disa dee sëmbë u di wosudendu u de. Ma sömëni u de ko si taa an bi dë wan bunu soni u du. Te joo tei wan njunjun wooko, nöö na luku un mëni möni joo kisi nöö a kaba, ma luku tu ee di wooko dë o mbei ju ku dee sëmbë fii wosudendu dë mati ku Jehovah go dou (Luk. 14:28). I sa hakisi iseei taa: ’Andi sa pasa ku di tööu libi u mi ee mi go disa di sëmbë di mi ku ën tööu u wan pisiten? Mi o sa nango a hii dee komakandi ku di peleikiwooko u? Mi o sa ta dë makandi ku dee baaa ku sisa u mi ö?’ Ee i abi miii, nöö i sa hakisi iseei di soni aki: ’Unfa mi o sa kiija dee mii u mi „a wan leti fasi ta lei de kumafa Masa Gadu kë u de musu libi” ee ma dë makandi ku de?’ (Ef. 6:4) Te i ta pakisei luku andi joo du, nöö wooko ku di fasi fa Jehovah ta si soni, ma na ku dee soni di dee mati fii ku dee famii fii, di na ta libi ku dee mama wëti u Bëibel ta piki i.c Wan baaa di ta liba a Asia de kai Tony bi feni sömëni okasi u go wooko a woto köndë, nöö a bi o kisi gaan hia möni. Ma baka di a begi u di soni aki, söseei di a fan ku di mujëë fëën, hën a buta taa an o tei na wan u dee wooko aki. Ma de o mbei möiti u libi ku möön biti möni. Nöunöu aki Tony ta taki taa: „Mi bi abi di gaandi u heepi sömëni sëmbë u ko sabi Jehovah, söseei dee mii fuu lobi di tuutuu lei. Dee sëmbë u di wosudendu u mi ko si taa solanga u ta wooko ku di soni di sikifi a Mateosi 6:33, nöö Jehovah o ta da u dee soni dee u abi fanöudu.”

TE U TA FËËË TAA WA O ABI MÖNI TJIKA U SÖLUGU USEEI TE U KO GAANDI

13. Andi da wantu soni di u sa du nöunöu kaa, sö taa u sa abi möni tjika u luku useei te u ko gaandi?

¹³ U sa lei tu taa u ta futoou Jehovah, te u ta luku unfa soni sa dë da u te u ko gaandi. Di Bëibel ta piki u fuu wooko taanga sö taa u sa abi dee soni dee u abi fanöudu a di ten di ta ko (Nöng. 6:6-11). Ee u sa, nöö an föutu fuu buta wan piki möni a wan së da di ten di ta ko. Fuu taki ën kumafa a dë, nöö möni ta tjubi sëmbë (Peleik. 7:12). Ma wa kë möni ko dë di möön fanöudu soni a di libi fuu.

14. Unfa Hebelejën 13:5 sa heepi u fu wa ta booko u hedi gaanfa poi?

¹⁴ Jesosi bi konda wan woto di ta lei taa wan sëmbë di ta tjubi möni u ko gudu, ma an ta ’suku u libi kumafa Masa Gadu kë, faa feni gudu nëën ala’ da wan don sëmbë (Luk. 12:16-21). Na wan sëmbë sabi andi amanjan o tja ko (Nöng. 23:4, 5; Jak. 4:13-15). U ta tja wan apaiti sitaafu u di u da bakama u Jesosi. Jesosi bi taki taa ee u kë dë bakama fëën, nöö u musu dë kabakaba u „disa” dee gudu fuu a baka (Luk. 14:33). Dee fesiten Keesitu sëmbë dee bi dë a Judea, bi dë kabakaba u disa dee gudu u de a baka ku wai (Heb. 10:34). A di ten aki, sömëni baaa ku sisa lasi dee gudu di de bi abi u di de an bi kë nama ku politiki soni (Ako. 13:16, 17). Andi bi heepi de u de du di soni dë? De bi dë seiki u di soni di Jehovah paamusi u. Jehovah bi taki taa: „Ma o disa i seepi, kwetikweti. Na wan juu mi o disa i wanwan möönsö.” (Lesi Hebelejën 13:5.) Awa, u ta mbei möiti sö taa u sa abi dee soni dee woo abi fanöudu te u ko gaandi, ma ee wan soni ko pasa di wa bi dë ku ën mëni, nöö u sa abi di futoou taa Jehovah o heepi u.

15. Unfa dee mama ku dee tata dee dë Keesitu sëmbë musu si dee mii u de? (Luku di peentje tu.)

¹⁵ A so kamian, a dë sö taa i musu pai miii u dee mii fii sa wooko sölugu i te i ko gaandi. Di Bëibel ta lei taa mama ku tata musu da dee mii u de dee soni dee de abi fanöudu (2 Kol. 12:14). Tuu taa dee miii musu heepi de mama ku tata a soni te de ta ko gaandi, nöö sömëni mii ta wai u du ën tu (1 Tim. 5:4). Ma dee mama ku dee tata dee dë Keesitu sëmbë ta fusutan taa na te de kiija dee mii u de sö taa dee mii sa heepi de bakaten hën o mbei de dë ku piizii, ma te de ta heepi dee mii u de u de ko dë dinima u Jehovah.​—3 Joh. 4.

16. Unfa mama ku tata sa heepi dee mii u de, u de sa sölugu deseei te de ko bigi? (Efeise 4:28)

¹⁶ Te i ta lei dee mii fii unfa de sa sölugu deseei te de ko bigi, nöö lei de taa i ta buta futoou a Jehovah. Te de njönku jeti, nöö lei de taa a bunu u de ta wooko taanga. (Nöng. 29:21; lesi Efeise 4:28.) Te de ta göö ko bigi, nöö heepi de u de lei a siköö. Mama ku tata sa öndösuku soni a dee buku fuu, sö taa de sa feni mama wëti di sa heepi dee mii u de, u du wan bunu soni te de o luku un siköö lei de o tei. Di soni aki o heepi dee mii u de u de sa sölugu deseei te de ko bigi, söseei u de sa abi ten u peleiki möön hia, nasö u du di pioniliwooko.

17. Fuun soni u sa dë seiki?

¹⁷ Dee dinima u Jehovah dee ta hoi deseei nëën, sa dë seiki taa Jehovah sa heepi de, söseei taa a kë da de andi de abi fanöudu u dë a libi. Möön u ta zuntu ku di kaba u di goonliba aki, möön u musu ta buta futoou a Jehovah. Boo dë kabakaba u futoou taa Jehovah abi di kaakiti u da u andi u abi fanöudu, aluwasi andi ta pasa. U sa dë seiki taa di taanga maun u Jehovah an sati poi u dou a u.