Buta da iseei ambë joo dini

1. Andi u musu du ee u kë dë waiwai tuutuu, nöö faandi mbei? (Jesaaja 48:17, 18)

DI TATA fuu di dë a liba ala lobi u gaanfa seei, nöö a kë fuu ta piizii u di libi nöunöu kaa, ku di ten di ta ko (Peleik. 3:12, 13). A mbei u a wan fasi taa u sa du wantu apaiti soni, ma an mbei u fuu sa ta tii useei, nasö fuu sa ta taki da useei andi bunu ku andi an bunu (Peleik. 8:9; Jel. 10:23). A sabi taa di wan kodo fasi fa u sa ta dë waiwai tuutuu, hën da te u ta dini ën ta piki hën buka.​—Lesi Jesaaja 48:17, 18.

2. Andi Saatan kë fuu biibi, nöö andi Jehovah du u lei taa Saatan ta mindi soni?

² Saatan kë fuu biibi taa u sa dë waiwai söndö Jehovah, söseei taa libisëmbë sa tii deseei a wan bunu fasi (Ken. 3:4, 5). Jehovah ta disa libisëmbë u tii deseei u wan pisiten nöö, u lei taa Saatan da wan mindisonima. Dee tjali soni dee ta pasa u di libisëmbë ta tii deseei dë limbolimbo u si. A dë limbolimbo u si taa libisëmbë an sa tii deseei. Ma hii fa a dë sö, tökuseei di Bëibel abi woto u sömëni womi ku mujëë di bi dë waiwai u di de bi ta dini Jehovah. Nöö Jesosi Keesitu bi dë wan u de. Woo luku fosu faandi mbei Jesosi bi buta taa a o dini Jehovah. Baka di dë, nöö woo luku faandi mbei a fiti taa u ta dini di Tata fuu di dë a liba ala. Te u kaba fëën, nöö woo luku faandi mbei u buta taa woo dini Jehovah.

FAANDI MBEI JESOSI BUTA TAA A O DINI JEHOVAH?

3. Andi Saatan bi kë da Jesosi, nöö andi Jesosi du?

³ Di Jesosi bi dë a goonliba aki, nöö a bi musu luku ambë a bi o dini. Kölö sö baka di a dopu, hën Saatan bi piki ën taa a o dëën hii dee Könuköndë u goonliba aki, ee a dini ën wan pasi nöö. Hën Jesosi piki ën taa: „Hetji pasa kumutu a mi fesi aki, ju didibi Saatan! Biga di Buku u Gadu taki taa ja musu begi na wan oto soni a mundu möön leki Gadu i Masa. Hën tö nöö i musu ta dini”(Mat. 4:8-10). Wë boo luku faandi mbei Jesosi an bi kë haika Saatan.

4-5. Andi da wantu soni di mbei Jesosi buta taa a o dini Jehovah?

⁴ Di möön gaan soni di mbei taa Jesosi buta taa a o dini Jehovah, hën da u di a lobi ën gaanfa seei, nöö di lobi dë an o kaba nëën möönsö (Joh. 14:31). Boiti di dë, a ta dini Jehovah u di di soni dë da di möön bunu soni u du (Joh. 8:28, 29; Ako. 4:11). A sabi taa Jehovah hën da u libi, taa a dë u futoou, söseei taa a da u gaan hia bunu soni (Ps. 33:4; 36:9; Jak. 1:17). Hii juu Jehovah ta konda di tuu da Jesosi, nöö hën dëën hii dee soni dee a abi (Joh. 1:14). Ma Saatan tooka gaanfa seei ku Jehovah, u di a ta mbei libisëmbë ta du zöndu, nöö te u kaba fëën de ta dëdë. Saatan da wan mindisonima, di abi langawojo, nöö a ta pakisei hënseei nöö (Joh. 8:44). U di Jesosi sabi Jehovah ku Saatan bumbuu, mbei nöiti a bi o kë dë kuma Saatan di ta hopo fia ku Jehovah.​—Fil. 2:5-8.

⁵ Di woto soni di mbei taa Jesosi buta taa a o dini Jehovah, hën da a bi ta luku go a fesi a dee bunu soni dee bi o pasa, ee a hoi dou (Heb. 12:2). A bi sabi taa ee a hoi dou, nöö a bi o mbei di në fëën Tata ko limbo, söseei a bi o puu di sitaafu di Didibi mbei libisëmbë ta tja.

FAANDI MBEI A FITI FUU DINI JEHOVAH

6-7. Faandi mbei sömëni sëmbë a di ten aki an ta dini Jehovah, nöö faandi mbei a fiti fuu dini ën?

⁶ Sömëni sëmbë a di ten aki an ta dini Jehovah, u di de an sabi jeti taa a abi bunu fasi, söseei de an sabi taa a du sömëni bunu soni da de. De dë di seei kuma dee sëmbë dee Paulosu bi peleiki da a di foto Atene, u di deseei an bi sabi Gadu.​—Tjab. 17:19, 20, 30, 34.

⁷ Paulosu bi mbei dee sëmbë u Atene ko fusutan taa di tuutuu Gadu ’hënseei ta da hii sëmbë libi. Hën ta da u böö, a ta da u hii soni’. A taki tu taa: „Hën ta da u libi, mbei u ta dë ta buli.” Gadu hën mbei hii soni, nöö a „seti ku wan kodo sëmbë tö, nöö di wan sëmbë dë böngö paaja dou goonliba tefa i si hii dee peipei sëmbë ko fika a goonliba aki”. Fëën mbei a fiti fuu dini ën.​—Tjab. 17:25, 26, 28.

8. Andi Jehovah an o du nöiti? Booko ën a piki möni.

⁸ Jehovah bi sa duwengi sëmbë u dini ën u di hën mbei hii soni, söseei hën da di Kaba Heiwan u mundu. Ma hii fa a dë sö, tökuseei Jehovah an o du di soni dë nöiti. Di soni di a du, hën da a mbei u ko sabi taa a dë tuutuu, söseei taa a lobi hiniwan fuu gaanfa seei. A kë taa gaan hia sëmbë ko dë mati fëën u teego (1 Tim. 2:3, 4). Fëën mbei Jehovah ta lei u unfa u sa heepi sëmbë u ko sabi dee bunu soni dee a o du da libisëmbë, söseei u lei de unfa a o du ën (Mat. 10:11-13; 28:19, 20). A seeka soni sö taa kemeente sa dë fuu sa go dini ën, söseei taa dee gaanwomi sa ta heepi u.​—Tjab. 20:28.

9. Na un fasi Jehovah ta lei taa a lobi hii sëmbë?

⁹ Jehovah ta lei taa a lobi libisëmbë, u di a ta libi bunu seei ku dee sëmbë dee na kë biibi taa a dë tuutuu. Pakisei di soni aki: Dusudusu jaa kaa sömëni sëmbë ta buta da deseei andi bunu u du ku andi na bunu u du. Ma hii fa a dë sö, tökuseei Jehovah ta da de andi de abi fanöudu u de sa dë a libi, söseei u de sa piizii u di libi (Mat. 5:44, 45; Tjab. 14:16, 17). Jehovah hën ta mbei taa de sa abi mati, taa de sa abi famii di lobi de, taa de sa pai miii, söseei taa de sa wooko taanga ta piizii u di libi (Ps. 127:3; Peleik. 2:24). Fëën mbei a dë limbolimbo u fusutan taa di Tata fuu di dë a liba ala lobi hii sëmbë (Ëki. 34:6). Boo buta pakisei nöunöu a di soni di bi mbei taa u buta taa woo dini Jehovah, söseei boo luku unfa a ta mbei dee sëmbë dee ta dini ën feni gaan bunu.

FAANDI MBEI U BUTA TAA WOO DINI JEHOVAH?

10. (a) Andi da di möön fanöudu soni di mbei u ta dini Jehovah? (Mateosi 22:37) (b) Unfa u ta feni wini u di fasi fa Jehovah ta hoi pasensi ku u? (Psalöm 103:13, 14)

¹⁰ Di möön fanöudu soni di mbei u ta dini Jehovah, hën da u di u lobi ën gaanfa seei, nöö di lobi dë an o kaba a u möönsö, leti kumafa Jesosi lobi ën. (Lesi Mateosi 22:37.) Te u ko sabi dee fasi u Jehovah, nöö u ta fii u ko möön zuntu ku ën. Wan u dee fasi fëën, da di hoi di a ta hoi pasensi ku u. Di dee Isaëli sëmbë an bi ta piki ën buka, hën a bi ta begi de taa: „Gaantangi, un disa dee hogi soni dee un ta du, nöö un bia ko ta du bunu soni” (Jel. 18:11). Jehovah ta hoi a pakisei taa u da zöndu libisëmbë, nöö a sabi taa ku doti u mbei. (Lesi Psalöm 103:13, 14.) Wë ja ta fii u dini Jehovah u nöömö, te i kai pakisei a di pasensi fëën, ku dee woto waiti fasi dee a abi ö?

11. Faandi mbei u buta taa woo dini di Tata fuu di dë a liba ala?

¹¹ U kë dini Jehovah u di di soni dë da di möön bunu soni u du (Mat. 4:10). Boiti di dë, u sabi taa ee u hoi dou, nöö sömëni bunu soni o pasa. Di hoi di woo hoi dou, o mbei di në u Jehovah ko limbo, nöö woo lei taa Saatan da wan gaan mindisonima, söseei woo mbei Jehovah hati piizii. Ee u buta taa woo dini Jehovah nöunöu aki kaa, nöö woo sa dini ën u teego!​—Joh. 17:3.

12-13. Andi u ta lei a di woto u Jane ku Pam?

¹² Te u njönku gaanfa jeti, nöö u sa ko lobi Jehovah gaanfa seei, nöö di lobi aki o ko möön taanga te u ta göö ko bigi. Di soni aki bi dë sö da tu sisa de kai Jane ku Pam.a Di de bigi lei soni u Bëibel, nöö Jane bi abi 11 jaa, nöö Pam bi abi 10 jaa. Dee gaansëmbë u de an bi kë lei soni u Bëibel, ma de bi da Jane ku Pam pasi u lei soni u Bëibel ku dee Jehovah Kotoigi, so langa de bi o nango a keiki jeti ku dee famii u de. Jane bi taki taa: „Dee soni di dee Kotoigi bi lei mi a Bëibel bi heepi mi u ma ta hai taku tabaku ta libi fanafiti a di së u manu ku mujëë soni, kumafa dee woto siköö mii bi ta du.”

¹³ Baka wantu jaa, hën dee tu mujëë mii aki ko dë peleikima. Bakaten, hën de bigi du di pioniliwooko, hii fa de bi ta luku dee gaansëmbë u de, di bi ko gaandi kaa. Jane bi konda unfa a bi ta si hii dee soni dee Jehovah du da de. A bi taki taa: „Mi si taa Jehovah ta heepi dee mati fëën hii juu, söseei taa ’a sabi ambë da dee sëmbë fëën’, kumafa 2 Timoteo 2:19 ta taki.” A dë limbolimbo u si taa hii juu Jehovah ta heepi dee sëmbë dee lobi ën, söseei dee ta dini ën!

14. Unfa u sa hopo taki da Jehovah? (Luku dee peentje tu.)

¹⁴ U kë taa hii sëmbë ko sabi fa Jehovah dë tuutuu. Pakisei di soni aki luku: I abi wan mati di abi suti fasi, di lo’ u da sëmbë paadon, söseei a ta da sëmbë soni. Wan daka, hën i jei de ta taki taa di mati fii aki abi hogihati, söseei taa an ta du soni ku wan limbohati. Andi i bi o du? Wë i bi o hopo taki dëën. Sö nöö a dë tu taa te Saatan ku dee sëmbë dee ta waka nëën baka ta poi di në u Jehovah ku dee mindimindi woto u de, nöö u ta hopo taki da Jehovah, te u ta piki sëmbë unfa soni dë tuutuu (Ps. 34:1; Jes. 43:10). U ta lei ku dee soni dee u ta taki, söseei ku dee soni dee u ta du, taa u kë dini Jehovah ku hii u hati.

15. Unfa apösutu Paulosu bi feni wini u di a bi tooka soni a di libi fëën, sö taa a bi sa dini Jehovah? (Filipi 3:7, 8)

¹⁵ U dë kabakaba u tooka soni a u libi sö taa u sa dini Jehovah a wan bunu fasi, nasö taa u sa du möön soni dëën. Apösutu Paulosu bi dë wan nëbai sëmbë a di Dju biibi, ma a bi disa di nëbai dë ko dë bakama u Jesosi, ta dini Jehovah (Gal. 1:14). Fëën mbei a bi abi wan bunu libi, söseei a abi di gaandi u tii makandi ku Jesosi a liba ala. Nöiti a bai sabisö u di a bi ta dini Jehovah, nöö nöiti useei o bai sabisö tu.​—Lesi Filipi 3:7, 8.

16. Andi u ta lei a di woto u Julia? (Luku dee peentje.)

¹⁶ Ee di dini di u ta dini Jehovah ko dë di möön fanöudu soni a u libi, nöö woo abi wan bunu libi nöunöu kaa, söseei a di ten di ta ko. Boo luku wan woto u wan sisa de kai Julia. Di Julia bi dë miii, nöö a bi ta kanda a keiki. A bi sa’ u kanda sö bunu sö te taa wan sëmbë bi ta lei ën kanda opera möön bunu, sö taa a bi sa ko dë wan gaan kandama. An bi tei longi seei, hën Julia bi ko abi nëbai, söseei a bi ta kanda a nëbai kamian. Di a bi nango a wan nëbai siköö ka i ta lei pëë poku, hën wan sëmbë di hën ku ën bi ta sindo a wan kalasi bi bigi ta konda soni u Gadu dëën. A bi piki ën taa Gadu në da Jehovah. An bi tei longi baka di dë, hën Julia bigi lei soni u Bëibel tu pasi a wan wiki. Te u kaba fëën, hën a buta taa a o bia ko ta dini Jehovah ka faa go dou ku di kanda di a bi ta kanda. Di soni dë an bi dë wan kösökösö soni dëën u du. A bi taki taa: „Sömëni sëmbë bi ta piki mi taa mi ta poi di bumbuu kado di mi abi, ma mim bi kë dini Jehovah ku hii mi libi.” Wë, nöunöu a ta dini Jehovah möön leki 30 jaa kaa. Nöö unfa a ta fii u di a du soni a di fasi dë? A bi taki taa: „Mi ta wai seei taa mi ta dini Jehovah, nöö mi sabi taa Jehovah o da mi andi mi hati kë a di ten di ta ko.”​—Ps. 145:16.

DINI JEHOVAH GO DOU!

17. Andi dee sëmbë dee ta dini Jehovah ku dee sëmbë dee an ta dini ën jeti musu du, u di an o tei longi möön ufö di kaba dou?

¹⁷ Di kaba u di goonliba aki zuntu seei. Apösutu Paulosu bi taki taa: ’Fa u dë aki an o dë longi möön, nöö di soni de bi sikifi a Gadu Buku o ko pasa, taa: Di sëmbë di bi taa a o ko, nöö a o ko tuu e, a di leti ten fëën. An o lati’ (Heb. 10:37). Andi di soni aki kë taki da u? Wë ten an fika hia möön u sëmbë ko dini Jehovah (1 Kol. 7:29). Ee u buta taa woo dini Gadu nöunöu kaa, nöö u sabi taa u musu ta hoi dou te tesi ta miti u, ma u sabi tu taa an o ’tei longi möön’ ufö di kaba dou.

18. Andi Jesosi ku Jehovah kë fuu du?

¹⁸ Jesosi bi da dee bakama fëën taanga u ta waka nëën baka nöömö (Mat. 16:24). Ee u ta dini Jehovah sömëni jaa kaa, nöö wa musu ko wei. Boo dë kabakaba u ta dini ën u nöömö. U musu mbei taanga möiti u ta dini Jehovah go dou. Tuu taa an o dë wan kösökösö soni, ma woo dë waiwai, söseei woo feni gaan bunu te u ta dini Jehovah nöunöu kaa!​—Ps. 35:27.

19. Andi u ta lei a di woto u Gene?

¹⁹ So sëmbë ta si kuma ee de ko dini Jehovah, nöö de an o ta piizii u di libi möön. A dë sö taa i ta fii kuma a o taanga da i poi fii dini Jehovah u? Wan njönku baaa de kai Gene bi taki taa: „Mi bi ta fii kuma te wan sëmbë dë wan Jehovah Kotoigi, nöö an sa ta du soni u piizii. A bi ta djei kuma dee pei u mi bi ta du sömëni soni u piizii. De bi nango a baja wosu, de bi ta du manu ku mujëë soni, de bi ta pëë feti game, nöö a dee ten dë mim bi musu nango a peleikiwooko ku komakandi.” Andi bi ko pasa u di Gene bi ta si soni a di lö fasi dë? A bi taki taa: „Mi bi bigi ta du soni di an bunu tjubitjubi, nöö a bi suti u wan pisiten. Ma ma bi ta dë waiwai tuutuu. Mi bi bigi ta pakisei dee wini dee mi o feni te mi ta du andi di Bëibel ta taki, hën mi buta taa mi o dini Jehovah ku hii mi hati. Sensi di ten dë, a bi djei kuma Jehovah bi ta piki hiniwan u dee begi u mi.”

20. Andi u musu dë kabakaba u du?

²⁰ Wan Psalöm sikifima bi taki da Jehovah a wan kanda taa: „Di sëmbë di i ta tei tja ko a di djai fii dendu ta feni bunu” (Ps. 65:4). Boo dë kabakaba u dini Jehovah go dou, leti kuma Josua. A bi taki taa: „Ma mi ku mi wosudendu u woo dini Jehovah.”​—Jos. 24:15.