Unfa u sa da wotowan köni?

1. Ambë sa da wotowan köni? Booko ën a piki möni.

UNFA i ta fii te i musu da wotowan köni? Di soni aki an ta taanga da so sëmbë u de du. Ma so wan ta fëëë u du ën, nasö de ta fii wan fasi te de musu du ën. Hii fa u sa fii sö, tökuseei so juu a ta dë fanöudu fuu da wotowan köni. Faandi mbei? Wë u di a sö wan fasi u ta lei taa u lobi dee baaa ku dee sisa fuu. Jesosi bi taki taa u musu lei taa u lobi u na u, ee u kë dë bakama fëën (Joh. 13:35). Boiti di dë, di Bëibel ta taki taa te u ta da useei köni, nöö u ta ko dë möön gaan mati ku u na u.​—Nöng. 27:9.

2. Andi dee gaanwomi musu sa’ u du, nöö faandi mbei de musu sa’ u du ën? (Luku di pisi „Köni di u ta feni a dee mindiwiki komakandi”.)

² A dë fanöudu taa dee gaanwomi da wotowan köni di sa heepi de. Jehovah ku Jesosi buta dee womi aki u heepi di kemeente (1 Pet. 5:2, 3). Wan fasi fa de ta du ën, hën da te de ta tei di Bëibel u da u köni a dee taki dee de ta hoi. Boiti di dë, de ta da u köni apaiti te a dë fanöudu. Söseei de ta heepi dee sëmbë dee go disa Jehovah, u de sa ko dini ën baka. Unfa dee gaanwomi ku hiniwan fuu sa da wotowan köni, di o heepi de?

3. (a) Unfa u sa ko dë wan sëmbë di sa’ u da wotowan köni? (Jesaaja 9:6; luku di pisi „Djeesi Jesosi te i ta da wotowan köni”.) (b) Andi woo luku a di woto aki?

³ U sa ko dë wan sëmbë di sa’ u da wotowan köni, te u ta öndösuku woto u sëmbë a Bëibel di bi ta da wotowan köni. Wan u de da Jesosi. Wan u dee fasi fa sëmbë bi ta kai ën da „Gaan Laima”. (Lesi Jesaaja 9:6.) A di woto aki, woo taki andi u sa du, te sëmbë ko suku köni a u, söseei woo taki andi u sa du te wan sëmbë abi köni fanöudu, ma an hakisi u. Boiti di dë, woo luku faandi mbei a dë fanöudu fuu ta da wotowan köni a di soifi ten, söseei a wan soifi fasi.

TE SËMBË KO SUKU KÖNI A U

4-5. Andi u sa hakisi useei ee wan sëmbë ko suku köni a u? Konda wan woto.

⁴ Andi da di fosu soni di u musu du, te wotowan ko suku köni a u? Kandë u sa wai sö tee taa u kë heepi di sëmbë wantewante dë. Ma di fosu soni di u musu hakisi useei da: ’Mi abi öndöfeni a di soni di a hakisi mi dë tjika u mi dëën köni di sa heepi ën u?’ So juu di möön bunu fasi fa u sa heepi wan sëmbë, hën da te wa suku u dëën köni, ma te u mandëën go a wan sëmbë di abi öndöfeni tjika a di soni di a hakisi u dë, u sa heepi ën.

⁵ Buta pakisei a di woto aki. Boo taa wan gaan mati fii ko dë ku gaan suwaki. A piki i taa a bigi luku kaa un pei fasi u kula a sa feni, hën a hakisi i undi u dee fasi u kula dë, i si kuma bi o sa möön bunu. Wë kandë i bi o sa abi wan fasi fa ii bi o kë du soni, ma tökuseei ja ta du data wooko, söseei ja kisi lei u kula dee siki dë. Te a pasa sö, nöö di möön bunu fasi fa i sa heepi di sëmbë, hën da te i heepi ën faa feni wan sëmbë di abi öndöfeni u kula sëmbë.

6. Faandi mbei a bunu fuu wakiti pikisö ufö u da wotowan köni?

⁶ Aluwasi ee u ta si kuma u abi öndöfeni tjika a wan soni u da wotowan köni, tökuseei a bunu fuu wakiti pikisö möön, ufö u piki di sëmbë wan soni. Faandi mbei? Wë Nöngö 15:28 ta taki taa: „Di hati u di leti hati sëmbë ta pakisei fundu ufö a da wan piki.” Ma unfa a dë, ee u ta si kuma u sabi andi u musu piki di sëmbë wantewante dë? Tökuseei u sa tei u ten öndösuku soni, begi, söseei kai pakisei a di soni luku. A sö wan fasi, u sa dë seiki taa di soni di u piki di sëmbë, ta kai ku di fasi fa Jehovah ta pakisei u di soni dë. Luku di woto u di tjabukama de kai Naatan.

7. Andi i lei a di woto u di tjabukama de kai Naatan?

⁷ Könu Dafiti bi piki Naatan taa a bi kë mbei wan wosu da Jehovah. Hën Naatan piki ën wantewante dë taa a sa du ën. Ma Naatan bi musu tei ten fan ku Jehovah ufö a taki wan soni. Faandi mbei? Wë u di Jehovah an bi kë u Dafiti mbei wosu dëën (1 Klon. 17:1-4). Di soni aki ta lei taa te wan sëmbë ko suku köni a u, nöö di möön bunu soni di u sa du ’hën da wa musu hesi u taki soni tumisi’.​—Jak. 1:19.

8. Andi da wan woto soni di mbei u musu ta pakisei bunu ufö u da wotowan köni?

⁸ Boo luku wan woto soni di mbei u musu ta pakisei bunu ufö u da wan sëmbë köni: Ee u da wan sëmbë taanga faa du wan soni, hën bakaten di soni tja hogi ko dëën, nöö a sa dë taa u abi wan maun a dendu. Awa, a dë fanöudu seei fuu ta pakisei bunu ufö u da wan sëmbë köni.

TE WAN SËMBË ABI KÖNI FANÖUDU, MA AN HAKISI U FUU HEEPI ËN

9. Fuun soni dee gaanwomi musu dë seiki ufö de da wotowan köni? (Galasia 6:1)

⁹ So juu a ta dë fanöudu u dee gaanwomi fan ku wan baaa nasö wan sisa, di bigi waka a wan pasi di an bunu. (Lesi Galasia 6:1.) Wan sëmbë sa ta du so soni di sa mbei taa a go du gaan zöndu bakaten. Di soni di dee gaanwomi kë, hën da de kë heepi di sëmbë faa sa fika a di pasi di ta tja sëmbë go a teego libi (Jak. 5:19, 20). Ma ee de kë u di sëmbë feni heepi u di fan di de o go fan ku ën dë, nöö a dë fanöudu u de tei ten wegi luku ee tuutuu di sëmbë bigi waka a wan pasi di an bunu. Jehovah ta da hiniwan fuu pasi fuu mbei di háti fuu tii u (Lom. 14:1-4). Ma nöö unfa a dë ee dee gaanwomi ko si taa de musu fan ku wan baaa di du wan soni di sa mbei hën ku Jehovah poi?

10-12. Unfa dee gaanwomi sa du soni te de o fan ku wan sëmbë söndö u di sëmbë hakisi de u de ko nëën? Konda wan woto. (Luku dee peentje.)

¹⁰ An ta dë wan kösökösö soni da dee gaanwomi u fan ku wan sëmbë di an bi hakisi de u de heepi ën. Faandi mbei u taki sö? Apösutu Paulosu bi taki taa wan sëmbë sa bigi waka a wan pasi di an bunu, söndö faa buta mëni. Fëën mbei di fosu soni di dee gaanwomi musu du, hën da de musu bigi seeka di sëmbë a fesi, ufö de fan ku ën.

¹¹ Te i musu go fan ku wan sëmbë di an bi ko suku heepi a i, nöö a sa dë kuma te i ta mbei möiti u paandi soni a wan doti di taanga. Ufö wan goonma bigi paandi soni, nöö a ta bia di doti. Di soni aki ta mbei di doti ko dë a fa fii sa paandi soni nëën. Baka di dë, nöö a ta paandi di sii. Te u kaba fëën, nöö a ta munjan di sii faa sa göö. Wë sö nöö ufö wan gaanwomi fan ku wan sëmbë di an bi hakisi ën faa heepi ën, nöö a musu seeka di sëmbë a fesi faa sa kë tei di fan fëën. Kandë a sa wakiti te a feni wan bunu okasi faa fan ku di sëmbë, nöö a sa mbei di sëmbë ko sabi taa a kë u soni waka bunu dëën. Ee sëmbë sabi di sëmbë di ta da wotowan köni kuma wan sëmbë di lobi wotowan, söseei di abi bunu fasi, nöö an o taanga da de sö u de tei di fan fëën.

¹² Te di gaanwomi ta fan ku di sëmbë, nöö a sa ta heepi di sëmbë jeti faa tei di fan fëën, te a ta mbei a ko fusutan taa hii sëmbë ta mbei föutu, nöö u ta abi heepi fanöudu so juu (Lom. 3:23). Di gaanwomi sa fan ku ën a wan saapi fasi, söseei a wan lesipeki fasi u lei ën gbelingbelin ku di Bëibel taa di pasi di a tei sa tja hogi ko dëën. Te di sëmbë tei taa a mbei wan föutu tuu, nöö di gaanwomi sa konda dëën awaa andi a musu du u soni sa ko bunu baka. A sö wan fasi a o dë kuma a ta „paandi di sii”. Te u kaba fëën, nöö di gaanwomi sa gafa di sëmbë u dee bunu soni dee a ta du, nöö a begi ku ën. A sö wan fasi a ta „munjan” di sii.​—Jak. 5:15.

13. Unfa dee gaanwomi sa heepi di sëmbë faa fusutan di soni di de piki ën?

¹³ So juu di soni di di sëmbë di ta da di köni ta taki, nëën di sëmbë di a ta da di köni ta fusutan. Andi dee gaanwomi sa du u soni an pasa sö? Wë dee gaanwomi sa hakisi di sëmbë soni a wan lesipeki fasi u de ko sabi ee di sëmbë fusutan di soni di de piki ën, söseei ee a sabi andi a sa du u tooka soni.​—Peleik. 12:11.

DA WOTOWAN KÖNI A DI SOIFI TEN, SÖSEEI A WAN SOIFI FASI

14. Faandi mbei wa musu da sëmbë köni te hati fuu boonu? Booko ën a piki möni.

¹⁴ Hii u tuu da zöndu libisëmbë, nöö so juu u ta du soni nasö u ta taki soni di ta hati wotowan (Kol. 3:13). Di Wöutu u Gadu seei ta taki taa so juu u ta du soni di sa mbei wotowan hati boonu (Ef. 4:26). Ma u musu mbei möiti fu wa da wotowan köni te hati fuu boonu. Faandi mbei? Wë u di ’di hatiboonu u wan libisëmbë an ta heepi ën faa libi di leti libi di Gadu kë’ (Jak. 1:20). Ee u da sëmbë köni te hati fuu boonu, nöö u sa mbei soni ko möön hogi. Di soni aki an kë taki taa nöiti wa musu piki di sëmbë di mbei hati fuu boonu unfa u ta fii, nasö unfa u ta pakisei. Ma woo sa fan möön bunu ee u wakiti u te hati fuu kötö. Buta pakisei a di fasi fa Elihu bi fan ku Jöpu.

15. Andi u ta lei u di fasi fa Elihu bi du soni? (Luku di peentje tu.)

¹⁵ Elihu bi puu sömëni daka longi ta haika unfa Jöpu bi ta piki dee mati fëën dee bi ta du kuma de bi ta dëën kötöhati. Tjali u Jöpu bi kisi Elihu. Ma Elihu hati bi ko boonu ku Jöpu tu, u di Jöpu bi taki soni u Jehovah di an bi dë tuu, di a bi kë lei taa an bi du hogi. Hii fa soni bi dë sö, tökuseei Elihu bi wakiti u dee wotowan fan te de kaba, hën a fan ku Jöpu a wan saapi fasi, söseei a wan lesipeki fasi, u dëën kötöhati (Jöpu 32:2; 33:1-7). U ta lei wan fanöudu soni a di fasi fa Elihu bi du soni. U ta lei taa a ta möön bunu u da wotowan köni a di soifi ten, söseei a wan soifi fasi. Hën da u musu du ën ku lesipeki ku lobi.​—Peleik. 3:1, 7.

DA WOTOWAN KÖNI GO DOU, NÖÖ I TEI KÖNI A WOTOWAN GO DOU

16. Andi i lei a Psalöm 32:8?

¹⁶ Di tëkisi u di woto aki ta taki taa ’Jehovah ta lei u unfa u musu du soni, nöö a ta luku u’. (Lesi Psalöm 32:8.) Di soni aki ta lei taa hii juu seei Jehovah ta heepi u. An ta da u köni nöö a kaba, ma a ta heepi u fuu sa libi ku de tu. U sa djeesi Jehovah a di fasi fa a ta du soni! Te u abi di gaandi u da wotowan köni, nöö boo ta mbei möiti u djeesi Jehovah a di fasi fa a ta da wotowan köni. Boo ta luku de, ta heepi de kumafa u sa, u soni sa waka bunu da de.

17. Unfa dee gaanwomi ta mbei u fii te de ta tei di Bëibel u da u köni? Booko ën a piki möni. (Jesaaja 32:1, 2)

¹⁷ A di ten aki, a dë fanöudu seei fuu ta da sëmbë köni di bunu da de, söseei fuu ta tei dee köni dee wotowan ta da u (2 Tim. 3:1). Dee gaanwomi dee ta tei di Bëibel u da sëmbë köni di dë gbelingbelin u fusutan, „dë kuma wan lio di ta kule a wan kamian ka wata an dë”. (Lesi Jesaaja 32:1, 2.) Dee mati fuu dee sabi andi u ta kë jei, ma tökuseei de ta piki u andi dë fanöudu fuu jei, ta da u wan kado di dë kuma „goutu apa a wan soofu paabi dendu” (Nöng. 25:11). Be hii u tuu ta mbei möiti go dou fuu ko abi di köni di dë fanöudu, fuu sa ta da wotowan köni di bunu da de, söseei fuu sa ta tei dee köni dee de ta da u.