I saanfa u dë tifeedi ku dee soni dee i abi ö?

1. Andi a kë taki u dë tifeedi?

I DA wan sëmbë di dë tifeedi ku dee soni dee i abi ö? Wan sëmbë di dë tifeedi ta dë waiwai, söseei a ta dë bööböö, u di a ta buta pakisei a dee soni dee Gadu dëën. Hati fëën an ta dë boonuboonu u di an abi so soni. Ma te i dë tifeedi, nöö an kë taki taa ja ta booko i hedi ku dee soni dee i abi fanöudu a di libi. Fëën mbei a dë wan bunu soni taa u ta suku u du möön soni da Jehovah (Lom. 12:1; 1 Tim. 3:1). Ma aluwasi ee de an da u wan wooko di u bi o kë du a di ölganisaasi, tökuseei woo ta dë waiwai.

2. Andi sa miti u ee wa dë tifeedi ku dee soni dee u abi?

² Ee wa dë tifeedi ku dee soni dee u abi, nöö u sa bigi ta du soni di an bunu. So sëmbë di an ta dë tifeedi möönsö, ta wooko pasa maaka u bai soni di de an abi fanöudu tuutuu. A tjali seei taa so Keesitu sëmbë bi fufuu möni ku woto soni di de bi kë abi. A kan taa de bi ta taki a deseei taa, ’Mi abi leti u tei ën’, nasö ’Mi wakiti longi tjika’ nasö ’Mi o tei di möni, nöö mi o pakëën baka’. Ma aluwasi na un fasi wan sëmbë fufuu wan soni, tökuseei di soni dë an ta kai ku Jehovah, söseei a ta poi di në fëën (Nöng. 30:9). Wotowan bi fii bookosaka gaanfa seei u di de an bi feni wan wooko di de bi kë du a di ölganisaasi, hën te u kaba fëën de disa u dini Jehovah (Gal. 6:9). Andi sa mbei wan dinima u Jehovah pakisei u du sö wan soni? Wë a kan taa di sëmbë dë an bi dë tifeedi möön ku dee soni dee a bi abi.

3. Andi u sa lei a Filipi 4:11, 12 di sa da u taanga?

³ Hii u tuu sa ko dë tifeedi ku dee soni dee u abi. Apösutu Paulosu bi taki taa: „Mi lei kaa u mi dë tifihedi hiniwan juu ku dee soni dee mi abi.” (Lesi Filipi 4:11, 12.) A bi taki di soni dë di a bi dë a dunguwosu. Hii fa a bi dë a dunguwosu, tökuseei a bi ta dë waiwai go dou. A bi saanfa u dë tifeedi ku dee soni dee a abi. Ee a ta taanga da u fuu dë tifeedi ku dee soni dee u abi, nöö di soni di Paulosu bi taki, ku di fasi fa soni bi dë dëën, sa heepi u fuu sa dë seiki taa u sa ko ta dë tifeedi tu. Wa musu ta hoi taa pikipiki woo ko ta dë tifeedi ku soni. Ma useei musu mbei möiti fuu ko dë sö. Unfa u sa du di soni dë? Boo taki u wantu fasi di o heepi u fuu ko sabi unfa u sa dë tifeedi ku dee soni dee u abi.

MBEI MÖITI FII KO TA TEI SONI U BIGI

4. Unfa di tei di woo ta tei soni u bigi, sa heepi u fuu ta dë tifeedi ku dee soni dee u abi? (1 Tesalonika 5:18)

⁴ Te u ta tei soni u bigi, nöö woo sa möön dë tifeedi ku dee soni dee u abi. (Lesi 1 Tesalonika 5:18.) Te u ta tei ën u bigi taa u abi dee soni dee u abi fanöudu, nöö wa o ta booko u hedi tumisi ku dee soni dee u kë, ma dee wa abi. Te u ta wai ku dee wooko dee u abi nöunöu a di ölganisaasi u Jehovah, nöö woo ta buta pakisei a di fa u sa du de möön bunu, ka fuu ta booko u hedi pasa maaka fuu sa feni wan njunjun wooko. Fëën mbei an ta bigi da u taa di Bëibel ta da u taanga fuu ta da Jehovah tangi te u ta begi ën. Te u ta tei soni u bigi, nöö woo ko abi „di kötöhati u Gadu di bigi pasa hii sëmbë fusutan”.​—Fil. 4:6, 7.

5. Andi da dee soni di dee Isaëli sëmbë bi sa tei u bigi? (Luku di peentje tu.)

⁵ Luku andi bi pasa ku dee Isaëli sëmbë. Sömëni pasi seei de bi ta kaagi da Jehovah taa de an bi abi dee soni u njan dee de bi ta feni a Egepiti (Nöb. 11:4-6). A dë sö tuu taa di libi bi taanga a di sabana. Andi bi sa heepi de u de dë tifeedi ku dee soni dee de bi abi? De bi musu kai pakisei a dee soni dee Jehovah bi du da de, nöö de bi musu tei dee soni dë u bigi. Di de bi dë saafu a Egepiti, nöö sëmbë bi ta libi hogi ku de. Fëën mbei Jehovah bi tja teni sitaafu ko a dee Egepiti sëmbë u puu de a Egepiti. Di de bi ta kumutu a Egepiti, hën ’de bi tei’ hii di soofu, ku di goutu, ku dee soni u bisi u dee Egepiti sëmbë (Ëki. 12:35, 36). Di dee sodati u Falao bi ta ko u ko kii de, di de bi dë zuntu ku di Bë Ze, hën Jehovah bi paati di ze a wan foombo fasi, u de bi sa waka pasa. Boiti di dë, di de bi dë a di sabana, hën Jehovah bi ta da de mana hiniwan daka u de njan. Wë nöö faandi mbei de bi ta kaagi u njanjan hedi? Dee Isaëli sëmbë an bi dë tifeedi ku dee soni dee de bi abi. De an bi dë sö u di de an bi abi soni u njan, ma u di de an bi ta tei dee soni dee de bi abi u bigi.

6. Andi sa heepi u fuu sa ko dë sëmbë di ta tei soni u bigi?

⁶ Andi sa heepi i fii sa ko dë wan sëmbë di ta tei soni u bigi? Di fosu soni di i sa du, hën da i sa ta tei ten hiniwan daka fii ta buta pakisei a dee bunu soni dee ta mbei i ta wai. I sa sikifi tu, nasö dii soni di i ta tei u bigi (Këë. 3:22, 23). Di u tu soni di i sa du, hën da i sa ta lei taa i ta tei soni u bigi. A bunu fii ta tei ten u da wotowan tangi u dee soni dee de ta du da i. Ma di möön fanöudu soni, hën da i musu ta da Jehovah tangi hiniwan daka (Ps. 75:1). Di u dii soni di i sa du, hën da i sa mbei möiti fii ko abi mati di ta tei soni u bigi. Sëmbë di ta tei soni u bigi sa heepi wotowan u de ko dë sö tu, nöö sö nöö sëmbë di an ta dë tifeedi ku soni, sa mbei wotowan ko dë kuma de tu (Deto. 1:26-28; 2 Tim. 3:1, 2, 5). Te u ta buta pakisei a di lei di u musu ta lei taa u ta tei soni u bigi, nöö di soni dë sa heepi u fu wa ko dë sëmbë di an ta dë tifeedi ku soni.

7. Andi bi heepi Aci faa ko dë tifeedi?

⁷ Luku andi bi pasa ku wan sisa de kai Aci, di ta libi a di köndë Indonesia. A bi taki taa: „A di pisiten di di kolona siki bi ta paaja, mi bi bigi ta tei di fasi fa soni bi dë da mi, maaka ku di fasi fa soni bi dë da dee baaa ku dee sisa u mi. Di soni dë bi mbei taa ma bi ko ta dë tifeedi ku soni möön” (Gal. 6:4). Andi bi heepi ën faa tooka di fasi fa a bi ta pakisei? Aci bi taki taa: „Mi bi bigi ta konda dee bunu dee mi bi ta feni hiniwan daka, söseei mi bi ta kai pakisei a dee bunu soni dee mi bi ta feni, u di mi dë wan sëmbë u di ölganisaasi u Gadu. Baka di dë, nöö mi bi ta da Jehovah tangi. Di soni aki bi mbei taa mi bi ko dë tifeedi.” Ee a dë sö taa pakisei ta möön i, nöö kandë i sa du dee seei soni aki fii ko ta dë tifeedi baka.

ABI SAKAFASI, NÖÖ BUTA PAKISEI A DI SONI DI I TA DU

8. Andi bi pasa ku Baluku?

⁸ Wan pisiten, di sikifibiifima u Jelemia de kai Baluku an bi ko dë tifeedi ku dee soni dee a bi abi möön. Baluku bi ta du wan taanga wooko. A bi musu heepi Jelemia u piki dee Isaëli sëmbë andi bi o pasa ku de, u di de bi pasa Jehovah buka. Wan pisiten Baluku an bi ta buta pakisei a di soni di a bi ta du möön. Ka faa bi ta buta pakisei a di soni di Jehovah bi kë faa du, hën a bigi ta buta pakisei nëën seei, ku dee soni dee a bi kë du. Jehovah bi mbei Jelemia piki Baluku taa: „I ta suku gaan soni da iseei. Na suku de möön” (Jel. 45:3-5). Fuu taki ën kumafa a dë, nöö Jehovah bi piki ën taa: „Dë tifeedi ku dee soni dee i abi nöunöu.” Baluku bi haika Jehovah, hën de dë mati go dou.

9. Andi u ta lei a 1 Kolenti 4:6, 7? (Luku dee peentje.)

⁹ So juu, wan Keesitu sëmbë sa fii kuma a abi leti u feni wan gaandi, a di dini di u ta dini Jehovah. A kan taa a sa’ u du so soni bunu, taa a ta wooko taanga, nasö taa a abi öndöfeni. Nasö kandë a abi hii dee dii soni dë tuu. Ma kandë woto sëmbë feni di wooko di a bi kë naandë. Andi sa heepi ën u hati fëën an boonu? Wë a sa kai pakisei a di soni di apösutu Paulosu bi taki a 1 Kolenti 4:6, 7. (Lesi ën.) Jehovah hën ta da u hii dee gaandi dee u ta feni, söseei hën ta mbei u sa du hii dee soni dee u sa’ u du. Jehovah an ta da u dee soni aki u di u bunu möön wotowan. Ma a ta da u de u di a lobi u, söseei u di a abi bunuhati.​—Lom. 12:3, 6; Ef. 2:8, 9.

10. Unfa u sa ko abi sakafasi?

¹⁰ U sa ko abi sakafasi, te u ta kai pakisei a di fasi fa Jesosi bi du soni. Luku andi bi pasa a di ndeti di Jesosi bi wasi dee apösutu fëën futu. Apösutu Johanisi bi taki taa: ’Masa Jesosi bi sabi taa [1] hën Tata bi dëën taki a hii soni liba kaa. A bi sabi taa [2] a Gadu a bi kumutu nöö [3] a Gadu a o toona go baka. . . . Nöö hën a ta wasi u futu ta lontu’ (Joh. 13:3-5). Jesosi bi sa fii kuma dee apösutu fëën, de bi musu wasi hën futu. Ma nöiti a bi ta si kuma a bi musu ko gudu, nasö taa a bi musu abi wan bunu libi a goonliba aki (Luk. 9:58). Jesosi bi abi sakafasi, söseei a bi dë tifeedi ku dee soni dee a bi abi. A lei u wan bunu soni fuu sa waka nëën baka.​—Joh. 13:15.

11. Andi bi heepi Dennis faa ko dë tifeedi ku dee soni dee a abi?

¹¹ Wan baaa de kai Dennis, di ta libi a Holansiköndë, bi ta mbei möiti faa ko abi sakafasi kuma Jesosi, ma di soni dë an bi dë wan kösökösö soni u du. A taki taa: „Te wan sëmbë feni wan gaandi di mi kë, nöö so juu hati u mi ta boonu, u di mi ta si kuma mi hën bi musu feni di gaandi dë. Te sö wan soni pasa, nöö mi nango lesi soni di ta taki u sakafasi. Mi seti soni a di JW Library^® app u mi a sö wan fasi, sö taa a sa ta heepi mi u mi sa feni so Bëibel tëkisi lesi hesihesi. Mi download so taki di ta taki soni u sakafasi buta a di tëlëfön u mi, nöö mi lo’ u haika de.a Mi bi lei taa hii dee soni dee u ta du, u ta du de u tja gafa ko da Jehovah, ma na u tja gafa ko da useei. Hii u tuu ta du wan piki soni u mbei di wooko u Jehovah go a fesi.” Ee i bigi si kuma ja ko ta dë waiwai möön u di ja feni wan gaandi a di ölganisaasi, nöö mbei möiti fii ko abi möön sakafasi. Di soni aki o heepi i fii ku Jehovah ko dë möön gaan mati, söseei a o heepi i fii sa dë tifeedi ku dee soni dee i abi.​—Jak. 4:6, 8.

KAI PAKISEI A DEE SONI DEE JEHOVAH PAAMUSI U

12. Andi Jehovah paamusi u da di ten di ta ko, di sa heepi u fuu dë tifeedi? (Jesaaja 65:21-25)

¹² U ta ko dë möön tifeedi ku soni, te u ta kai pakisei a dee soni dee Jehovah paamusi u da di ten di ta ko. Jehovah bi mbei di tjabukama de kai Jesaaja taki unfa di libi bi o taanga a di ten aki tjika, söseei a bi mbei a heepi u fuu ko dë seiki taa a o puu hii dee bookohedi aki. (Lesi Jesaaja 65:21-25.) Woo ta libi a bumbuu wosu. Woo ta du wooko di ta da u piizii, söseei woo ta njan sutisuti soni di bunu da u. Nöiti möön woo ta booko u hedi taa sëmbë o du hogi ku u, nasö ku dee mii fuu (Jes. 32:17, 18; Eze. 34:25). U sa dë seiki taa na piki suti di libi o suti a di ten di ta ko.

13. Na un ten a sa dë fanöudu seei fuu buta pakisei a dee soni dee Jehovah paamusi u?

¹³ A dë fanöudu seei a di ten aki fuu ta buta pakisei a dee soni dee Jehovah paamusi u. Faandi mbei? Wë u di u ta libi a dee „lasiti daka u di goonliba aki”, nöö u abi bookohedi di ta hebi u tja (2 Tim. 3:1). Jehovah ta heepi u hiniwan daka fuu sa hoi dou, u di a ta tii u, söseei u di a ta da u kaakiti (Ps. 145:14). Boiti di dë, dee soni dee Jehovah paamusi u sa heepi u te soni ta taanga da u. Kandë a ta taanga da i fii sölugu di wosudendu fii. Di soni aki kë taki taa sö nöö soni o dë kaa u nöömö u? Wë nönö, na seei! Jehovah paamusi i taa a o da i dee soni dee i abi fanöudu a di ten aki, nöö a o da i möön soni seei a di Paladëisi (Ps. 9:18; 72:12-14). A kan taa sinkii fii ta hati i hiniwan daka, nasö taa i abi wan hedi dendu siki, nasö taa i abi wan taku siki. Di soni aki kë taki taa sö nöö soni o dë da i u nöömö u? Kwetikweti. Siki ku dëdë an o dë möön a di njunjun goonliba u Gadu (Ako. 21:3, 4). Dee soni dee Jehovah paamusi u aki ta heepi u, u hati fuu an ta dë boonuboonu u di soni ta miti u a di ten aki. U sa dë waiwai go dou aluwasi ee sëmbë ta libi hogi ku u, aluwasi ee wan sëmbë fuu dëdë, nasö aluwasi ee wan woto soni ta miti u. Faandi mbei? Wë biga aluwasi fa dee bookohedi fuu bigi tjika a di ten aki, tökuseei u sabi taa „u wan pisiten nöö de dë”, söseei u sabi taa abiti möön di njunjun goonliba o tja bööböö libi ko u teego.​—2 Kol. 4:17, 18.

14. Unfa u sa ko ta möön biibi dee soni dee Jehovah paamusi u?

¹⁴ Dee soni dee Jehovah paamusi u ta heepi u fuu dë tifeedi. Wë nöö unfa u sa ko ta möön biibi dee soni dë? Leti kumafa a sa dë fanöudu u wan sëmbë bisi beei faa sa si wan soni di dë a longi, sö nöö a sa dë fanöudu fuu du so soni fuu sa ko ta si useei a di Paladëisi. Te u ta booko u hedi u di u dë ku möni pena, nöö u sa pakisei luku fa di libi fuu o dë, te möni ku paima an o dë möön, söseei te sëmbë an o dë möön di pooti möön wotowan. Ee u ta booko u hedi u di wa feni wan gaandi jeti di u bi o kë feni a di ölganisaasi, nöö u sa pakisei luku fa dee soni dë an o dë apaiti soni möön, te i tei de maaka ku di fa libi o dë te wa abi zöndu möön (1 Tim. 6:19). U ta booko u hedi ku sömëni soni a di ten aki, nöö di soni dë sa mbei a ta taanga da u fuu pakisei dee soni dee woo feni a di ten di ta ko. Ma te u guwenti u buta pakisei a dee soni dee Jehovah paamusi u, nöö an o ta taanga da u fuu buta pakisei a de, te u abi bookohedi.

15. Andi i ta lei a di soni di Christa bi taki?

¹⁵ Luku unfa dee soni dee Jehovah paamusi u bi heepi wan sisa de kai Christa. Di sisa aki da di mujëë u Baaa Dennis, di u bi taki soni fëën a fesi. A bi taki taa: „Mi abi wan siki di ta mbei dee sinkii tatai u mi ta hati mi. Ma sa waka. A suwakima sutuu mi ta dë, söseei kandikandi mi ta dë gaansë u di daka. Hii daka seei sinkii ta hati mi. Di di data di bi ta kula mi piki mi taa ma o ko bëtë, hën mi pakisei wantewante dë taa ’an ta si soni kumafa mi ta si soni’. Mi ta buta pakisei a dee soni dee Jehovah paamusi u, nöö di soni dë ta da mi kötöhati. Mi abi sömëni bookohedi di mi musu libi ku de a di ten aki, ma mi o abi wan suti libi a di njunjun goonliba!”

„DEE SËMBË DEE TA LESIPEKI ËN AN TA MAKEI NA WAN SONI”

16. Faandi mbei Könu Dafiti bi sa taki taa dee sëmbë dee ta lesipeki Jehovah „an ta makei na wan soni”?

¹⁶ Wan dinima u Jehovah di ta dë tifeedi ta abi bookohedi tu. A kan taa möön leki dii u dee womi mii u Könu Dafiti bi dëdë, nöö di soni aki bi mbei a tja sitaafu. Sëmbë bi mindi soni dëën taa a du hogi, so mati fëën bi bia baka dëën, söseei sëmbë bi ta suku ën u kii sömëni jaa longi. Hii fa dee soni aki bi ta miti ën, tökuseei a bi taki wan soni u dee dinima u Jehovah. A bi taki taa: „Dee sëmbë dee ta lesipeki ën an ta makei na wan soni” (Ps. 34:9, 10). Faandi mbei a bi sa taki sö wan soni? Wë biga hii fa u dee dinima u Jehovah sabi taa woo ta abi bookohedi, tökuseei u dë seiki taa nöiti woo makei dee soni dee u abi fanöudu tuutuu (Ps. 145:16). Nöö u sa dë seiki taa hii juu Jehovah o ta heepi u te u abi bookohedi. U sa ta dë waiwai, söseei u sa ta dë bööböö aluwasi fa soni dë da u.

17. Faandi mbei i dë kabakaba u mbei möiti fii ko sabi unfa i sa dë tifeedi ku dee soni dee i abi?

¹⁷ Jehovah kë fii ta dë tifeedi ku soni (Ps. 131:1, 2). Fëën mbei a bunu fii mbei möiti fii ko sabi unfa i sa dë tifeedi ku dee soni dee i abi. Ee i ta mbei hii möiti fii ta tei soni u bigi, fii sa abi sakafasi go dou, söseei fii sa ta buta pakisei a dee soni dee Jehovah paamusi u, nöö joo sa taki taa: „Awa, mi ta wai ku dee soni dee mi abi.”​—Ps. 16:5, 6.