I sa’ u paati tuutuu soni ku mindimindi soni ö?

1. Unfa i ta si di tuutuu lei?

DEE sëmbë u Jehovah lobi dee lei u Bëibel. Dee soni dë da tuutuu soni, nöö de u ta biibi (Lom. 10:17). U ko dë seiki taa Jehovah seti di kemeente u Keesitu sëmbë buta kuma „wan posu ku wan soni di ta heepi u hoi di tuutuu lei gingin” (1 Tim. 3:15). Nöö u ta saka useei a „dee sëmbë dee ta tei fesi” basu ku piizii, u di de ta heepi u fuu ko fusutan dee lei u Bëibel, söseei u di de ta lei u unfa u sa du soni di ta kai ku Gadu.​—Heb. 13:17.

2. Andi sa pasa ku u te u ko sabi di tuutuu lei, kumafa Jakobosi 5:19 ta taki?

² Aluwasi u tei di tuutuu lei, söseei aluwasi u biibi taa u abi di tii u di ölganisaasi u Jehovah fanöudu, tökuseei soni sa puu a di pasi. (Lesi Jakobosi 5:19). Saatan bi o wai seei ee wa ko ta biibi di Bëibel möön, söseei ee wa ko ta futoou di ölganisaasi u Gadu möön.​—Ef. 4:14.

3. Faandi mbei a dë fanöudu fuu hoi useei gingin a di tuutuu lei? (Efeise 6:13, 14)

³ Lesi Efeise 6:13, 14. Abiti möön Saatan o mbei dee nasiönnasiön sëmbë u goonliba biibi mindimindi soni, sö taa de sa hopo fia ku Jehovah (Ako. 16:13, 14). U sa ta dë ku di mëni taa Saatan o mbei hii möiti u ganjan dee sëmbë u Jehovah tu (Ako. 12:9). Fëën mbei a dë fanöudu fuu mbei möiti fuu ko sa’ u paati di tuutuu lei ku dee mindimindi woto. Söseei a dë fanöudu fuu hoi useei gingin a di tuutuu lei (Lom. 6:17; 1 Pet. 1:22). Di soni dë hën o heepi u fuu sa pasa di gaan fuka libilibi!

4. Andi woo luku a di woto aki?

⁴ A di woto aki, woo taki u tu fasi di u musu abi, di o heepi u fuu sa ta sabi andi di Bëibel ta lei u tuutuu, söseei di o heepi u fuu sa ta du soni kumafa di ölganisaasi u Gadu ta lei u. Baka di dë, nöö woo taki u dii soni di o heepi u fuu sa hoi useei gingin a di tuutuu lei.

DEE FASI DEE O HEEPI U FUU SA SABI DI TUUTUU LEI

5. Unfa di gaan lesipeki di woo abi da Jehovah, sa heepi u fuu ko sa’ u paati tuutuu soni ku mindimindi soni?

⁵ U musu abi gaan lesipeki da Jehovah. Te u ko abi gaan lesipeki da Jehovah, nöö u ta lobi ën sö tee taa wa ta kë du na wan soni di o mbei a fii tjali. U ta kë sabi andi bunu ku andi an bunu, söseei u ta kë sa’ u paati tuutuu soni ku mindimindi soni, sö taa Jehovah sa wai ku u (Nöng. 2:3-6; Heb. 5:14). Nöiti u musu mbei di fëëë di u sa fëëë libisëmbë ko taanga möön di lobi di u lobi Jehovah, u di dee soni dee ta kai ku libisëmbë lo’ u dë soni di an ta kai ku Jehovah.

6. Unfa di fëëë di teni Isaëli womi bi ta fëëë libisëmbë, bi mbei taa de an bi taki soni kumafa a dë?

⁶ Ee di fëëë di u abi da libisëmbë taanga möön di lobi di u abi da Gadu, nöö di soni dë sa puu u a di tuutuu lei. Luku andi bi pasa ku dee 12 womi, dee bi go tjubi luku di köndë di Jehovah bi paamusi dee Isaëli sëmbë taa a bi o da de. Di fëëë di teni u dee womi dë bi ta fëëë dee sëmbë u Kaana, bi taanga möön di lobi di de bi lobi Jehovah. De bi piki dee woto Isaëli sëmbë taa: „Wa dë a fa u go feti ku dee sëmbë aki, biga de taanga möön u” (Nöb. 13:27-31). Wë te i luku ën a libisëmbë fasi, nöö a dë sö tuu taa dee sëmbë u Kaana bi taanga möön dee Isaëli sëmbë. Ma na tuu taa dee Isaëli sëmbë an bi o sa feti wini de, biga Jehovah bi dë ku dee Isaëli sëmbë. Dee teni womi dë bi musu buta pakisei a di soni di Jehovah bi kë taa dee Isaëli sëmbë bi musu du. De bi musu kai pakisei tu a dee soni dee Jehovah bi du da de kölö sö ufö di ten dë. Di soni dë bi o heepi de u de si taa dee sëmbë u Kaana an bi sa du na wan hojo soni, te i bi tei de maaka ku Jehovah. Josua ku Kaalëpu an bi dë kuma dee womi dë. De de bi kë u Jehovah feni de u bunu. De bi piki dee sëmbë taa: „Ee Jehovah feni ën u bunu, nöö a o tja u go a di köndë dë, nöö a o da u ën.”​—Nöb. 14:6-9.

7. Unfa u sa ko abi möön gaan lesipeki da Jehovah? (Luku di peentje tu.)

⁷ Ee u kë ko abi möön gaan lesipeki da Jehovah, nöö u musu mbei möiti fuu ta hoi Jehovah a pakisei a hii soni di u ta du (Ps. 16:8). Te i ta lesi dee woto dee dë a di Bëibel, nöö i musu ta hakisi iseei taa: ’Andi mi bi o du ee mi bi dë a di sëmbë aki kamian?’ Pakisei taa i bi sai dë ta haika fa dee teni Isaëli womi bi ta taki taa dee Isaëli sëmbë an bi o sa feti tei di köndë Kaana. I bi o biibi de nöö i bigi fëëë u? Naa di lobi di i lobi Jehovah ku di piki di i kë piki hën buka bi o heepi i fu ja fëëë? Gaansë u dee Isaëli sëmbë u di ten dë an bi biibi taa tuutuu soni Josua ku Kaalëpu bi ta taki. Di soni dë bi mbei taa Gadu an bi da de pasi u de denda go a di Paamusi Köndë möön.​—Nöb. 14:10, 22, 23.

8. Un fasi u musu mbei hii möiti fuu ko abi, nöö faandi mbei u musu mbei möiti fuu ko abi ën?

⁸ U musu abi sakafasi. Jehovah ta mbei dee sëmbë dee abi sakafasi ko sabi di tuu (Mat. 11:25). U di u abi sakafasi, mbei u ta da sëmbë pasi u de heepi u fuu ko sabi di tuu (Tjab. 8:30, 31). Ma u musu ta köni be wa ko abi gaanfasi. Ee u abi gaanfasi, nöö u sa ko ta si kuma di fasi fa u ta si soni bunu leti kuma dee mama wëti u Bëibel, nasö kuma dee soni di di ölganisaasi u Jehovah ta piki u.

9. Unfa u sa abi sakafasi go dou?

⁹ Ee u kë abi sakafasi go dou, nöö u musu mbei möiti fu wa fëëkëtë taa wa dë wan hojo soni te u tei useei maaka ku Jehovah (Ps. 8:3, 4). U sa begi Jehovah tu faa heepi u fuu ko abi möön sakafasi, söseei fuu ta kë möön da wotowan pasi u de lei u soni. Jehovah o tei di Wöutu fëën ku di ölganisaasi fëën u heepi u fuu ko ta si soni kumafa a ta si soni. Te i ta lesi di Bëibel, nöö mbei möiti fii ko si unfa Jehovah lobi sakafasi tjika, ku unfa a ta buuse gaanfasi ku di fii di sëmbë ta fii deseei tjika. Nöö mbei hii möiti fii sa abi sakafasi go dou, ee i feni wan gaandi di ta da i taki a wotowan liba.

UNFA U SA HOI USEEI GINGIN A DI TUUTUU LEI?

10. Ambë Jehovah bi tei u tii dee sëmbë fëën?

¹⁰ I musu ta futoou di ölganisaasi u Jehovah nöömö. A di ten di pasa, Jehovah bi tei Mosesi ku Josua u piki dee sëmbë fëën unfa de musu du soni (Jos. 1:16, 17). Dee Isaëli sëmbë bi ta feni gaan bunu, te de bi ta si dee womi aki kuma sëmbë di Jehovah bi buta u ta tei fesi. Höndöhöndö jaa baka di dë, di de bi seti di Keesitu kemeente, nöö dee 12 apösutu u Jesosi de bi ta tei fesi (Tjab. 8:14, 15). Bakaten woto gaanwomi u Jelusalen seei bi ko ta tei fesi makandi ku dee apösutu tu. Te dee baaa ku dee sisa bi ta du dee soni di dee womi aki bi ta piki de, nöö ’di soni dë bi ta mbei di biibi u di kemeente ko möön taanga. Nöö hiniwan daka, möön hia sëmbë bi ta piki di buka ta ko ta nama ku de’ (Tjab. 16:4, 5). A di ten aki, useei ta feni gaan bunu te u ta du dee soni di di ölganisaasi u Jehovah ta piki u. Ma unfa Jehovah bi o fii ee wa kë saka useei a dee sëmbë dee a buta u tei fesi basu? U sa piki di hakisi aki te u ta buta pakisei a di fasi fa soni bi waka da dee Isaëli sëmbë di de bi nango a di Paamusi Köndë.

11. Andi bi pasa ku dee Isaëli sëmbë, dee an bi kë lesipeki di buta di Gadu bi buta Mosesi faa tei fesi? (Luku di peentje tu.)

¹¹ Di dee Isaëli sëmbë bi nango a di Paamusi Köndë, hën wanlö womi di bi abi taki a wotowan liba, bi hopo fia ku Mosesi u di hën Jehovah bi buta u tii dee sëmbë fëën. De bi taki taa: „Hii dee sëmbë u Jehovah dë santa [na Mosesi wanwan], nöö Jehovah dë ku de” (Nöb. 16:1-3). Hii fa a bi dë sö tuu taa „hii dee sëmbë u Jehovah” bi dë santa nëën wojo, tökuseei a bi tei Mosesi u tii de (Nöb. 16:28). Hën da Jehovah dee womi dë bi ta kuutu, di de bi ta kuutu Mosesi. De an bi buta pakisei a di soni di Jehovah bi kë. Ma de bi ta buta pakisei a di soni di de bi kë. De bi kë ko abi möön taki a wotowan liba. Gadu bi kii dee womi dë, ku dusudusu woto sëmbë di bi tei di së u de (Nöb. 16:30-35, 41, 49). A di ten aki, u sa dë seiki taa Jehovah an lobi te wa ta lesipeki di fasi fa a seti soni a di ölganisaasi fëën.

12. Faandi mbei u sa futoou di ölganisaasi u Jehovah go dou?

¹² U sa futoou di ölganisaasi u Jehovah go dou. Te a ko dë gbelingbelin u si taa wan soni musu tooka a di fasi fa u ta si wan u dee lei u Bëibel, nasö a di fasi faa u ta du di wooko u di Könuköndë, nöö dee baaa dee ta tei fesi ta dë kabakaba u tooka soni (Nöng. 4:18). De ta du di soni dë, u di de ta kë du soni di ta kai ku Jehovah. Di soni dë da di möön fanöudu soni da de. De ta mbei hii möiti tu, u ta du soni di ta kai ku di Wöutu u Gadu, u di ku dee soifi lei dee dë nëën hii dee sëmbë u Jehovah musu ta libi.

13. Andi da „di soifi lei”, nöö andi u musu ta du ku ën?

¹³ „I musu ta libi go dou ku di soifi lei” (2 Tim. 1:13). „Di soifi lei” dë, da dee lei u Jesosi dee sikifi a di Bëibel (Joh. 17:17). Dee lei dë da di goonsei u dee soni dee u ta biibi. Di ölganisaasi u Jehovah ta heepi u fuu sa ta hoi useei a dee lei dë. Woo feni gaan bunu seei solanga u ta du sö.

14. Unfa so Keesitu sëmbë bi koti kumutu a di së u „di soifi lei”?

¹⁴ Andi sa pasa ee u bia disa „di soifi lei”? Buta pakisei a di soni aki. A di ten u dee fesiten Keesitu sëmbë, so baaa ku sisa bi ta paaja wan bosikopu taa di daka u Jehovah dou. A kan taa wan biifi de bi kisi, nöö de bi ta mëni taa apösutu Paulosu hën bi sikifi ën. So u dee Keesitu sëmbë u Tesalonika bi biibi di soni di bi sikifi a di biifi, söseei de bi bigi paajëën söndö u de tei ten öndösuku luku ee a dë sö tuu. Sëmbë an bi o feni de ganjan ee de bi toona mëni dee soni dee Paulosu bi lei de, di a bi dë makandi ku de (2 Tes. 2:1-5). Paulosu bi da dee baaa ku dee sisa fëën taanga u de an biibi hii soni di de jei. Nöö u di Paulosu bi kë heepi de u sëmbë an feni de ganjan möön, mbei a bi sikifi wan soni da de a kaba u di u tu biifi di a bi manda da de. A bi taki taa: „Mi Paulosu ta sikifi di lasiti pisi u di biifi aki ku miseei maun, manda gaan odi da unu. Hën da di maaka fuun sa sabi dee biifi u mi taa a mi de kumutu tuu.”​—2 Tes. 3:17.

15. Unfa u sa köni be sëmbë an feni u ganjan ku soni di ta djei tuutuu soni? Konda wan woto. (Luku dee peentje tu.)

¹⁵ Andi u sa lei a di soni di Paulosu bi piki dee baaa ku dee sisa u Tesalonika? Te u jei wan soni di an ta kai ku dee soni dee u lei a Bëibel, nasö te u jei wan soni di ta bigi da u, nöö u musu du soni ku köni. A di ten di pasa, sëmbë u di Sovyet-Unie bi da dee baaa wan biifi, di bi ta djei kuma dee baaa u di hedikantoo hën bi sikifi ën. Di biifi bi ta da so u dee baaa taanga u de ko makandi, nöö de koti paati ku di ölganisaasi u Jehovah, nöö de seti wan wotowan ka deseei bi o ta tei fesi. Di biifi bi ta djei wan tuutuu biifi di dee baaa u di hedikantoo bi sikifi. Ma dee baaa dee bi ta hoi deseei a Jehovah an bi mbei di soni dë ganjan de puu a di pasi u Jehovah. De bi fusutan taa di soni di bi sikifi a di biifi an bi ta kai ku dee soni dee de bi lei. A di ten aki, dee sëmbë dee an lobi di tuutuu lei ta pooba u wooko ku computer soni u ganjan u, söseei u paati u. Ma wa musu dë sëmbë di wotowan sa feni „ganjan” hesi. U sa köni u sëmbë an feni u ganjan, te u ta tei ten öndösuku luku ee di soni di u jei, nasö di soni di u lesi ta kai ku dee soni dee u bi lei.​—2 Tes. 2:2; 1 Joh. 4:1.

16. Andi u musu du ee so sëmbë ta koti kumutu a di së u di tuutuu lei, te u luku Loomë 16:17, 18?

¹⁶ Na paati ku dee sëmbë dee ta hoi deseei a Jehovah. Gadu kë fuu ku dee baaa ku dee sisa fuu ta dini ën makandi. Woo sa dini ën makandi go dou, solanga u ta hoi useei a di tuutuu lei. Hiniwan sëmbë di ta paaja bosikopu di an ta kai ku di tuutuu lei, ta paati dee sëmbë u di kemeente. Fëën mbei Gadu ta bai u fu wa „hulu de”. Ee nasö, useei sa bigi ta koti kumutu a di tuutuu lei pikipiki.​—Lesi Loomë 16:17, 18.

17. Un wini u ta feni te u sa’ u paati tuutuu soni ku mindimindi soni, söseei te u ta hoi useei a di tuutuu lei?

¹⁷ Te u sa’ u paati tuutuu soni ku mindimindi soni, söseei te u ta hoi useei a di tuutuu lei, nöö u ku Jehovah o dë mati go dou, söseei di biibi fuu an o ko suwaki (Ef. 4:15, 16). Saatan an o sa feni u ganjan, nöö Jehovah o heepi u fuu pasa di gaan fuka libilibi. Hoi iseei gingin go dou a di tuutuu lei, nöö ’di Gadu di ta da sëmbë bööböö libi o dë ku i’.​—Fil. 4:8, 9.