I sa feni wini u dee piki lëtë dee dë a di Bëibel

Dee piki lëtë dee ta dë a kaba u so wöutu a di Nyun-Grontapuvertaling, ta heepi i fii si unfa dee pisipisi u Bëibel ta kai ku deseei tjika. De ta heepi i fii ko sabi dee tëkisi dee ta taki möön soni u di soni di i ta lesi dë. A dee Bëibel dee i abi a pampia, te i si wan piki lëtë a kaba u wan wöutu, nöö i musu suku di seei lëtë dë a di pisi di ta dë a mindi u di seei bladsëidë dë. Te i dë a jw.org nasö a di JW Library^® app, nöö i sa zin di lëtë di dë a kaba u di wöutu, faa sa tja i go a dee tëkisi dee ta taki möön soni u di soni di i ta lesi dë.

Dee piki lëtë dee ta dë a kaba u wan wöutu sa heepi i fii ko sabi dee soni aki, ku woto soni jeti:

Di seei woto: Di piki lëtë ta heepi i fii ko sabi na un pisi u Bëibel i sa feni di seei woto dë. Fii sa fusutan di soni aki, nöö i sa luku 2 Samuëli 24:1 ku 1 Kloniki 21:1.

Wan soni di de bi taki a fesi: Di piki lëtë ta heepi i fii ko sabi naasë di soni di i ta lesi dë kumutu. Fii sa fusutan di soni aki, nöö i sa luku Mateosi 4:4 ku Detolonomi 8:3.

Wan tjabukama woto di bi pasa tuutuu: Di piki lëtë ta heepi i fii ko sabi unfa wan tjabukama woto bi pasa tuutuu. Fii sa fusutan di soni aki, nöö i sa luku Mateosi 21:5 ku Sakalia 9:9.