Keesitu ta lei u fa Gadu taanga tjika

1. Faandi mbei Paulosu bi taki taa „a Keesitu u ta si fa Gadu taanga tjika”?

JEHOVAH bi lei taa a abi makiti ku dee foombo wooko dee a bi mbei Jesosi Keesitu ta du. Di Jesosi bi dë a goonliba, a bi ta du foombo wooko. U sa lesi soni u wan tu u de a di Bëibel, di sa mbei di biibi fuu ko möön taanga (Mateosi 9:35; Lukasi 9:11). Awa, Jehovah da Jesosi makiti seei. Fëën mbei Paulosu bi sa taki taa: „A Keesitu u ta si fa Gadu taanga tjika” (1 Kolenti 1:24, NW). Ma un wini u sa feni te u luku dee foombo wooko dee Jesosi du?

2. Andi u sa lei u dee foombo wooko dee Jesosi bi ta du?

² Apösutu Petuisi bi taki taa Jesosi bi ta du „foombofoombo soni” (Tjabukama 2:22). Andi dee foombofoombo soni dee Jesosi bi ta du, ta lei u? De ta lei u andi Jesosi o du a di pisiten u di Dusu Jaa Tii. A di ten dë, a o du möön hia soni seei di o tja wini ko da hii libisëmbë a goonliba. Dee foombo wooko dee a bi ta du ta heepi u tu fuu ko fusutan dee fasi di hën ku ën Tata abi. A di woto aki, woo taki u dii foombo wooko di Jesosi bi du. Woo si tu unfa de sa heepi u a di ten aki, söseei a di ten di ta ko.

DI FOOMBO WOOKO DI JESOSI DU TA LEI U FUU TA DA SËMBË SONI

3. (a) Faandi mbei Jesosi bi du di fosu foombo wooko fëën? (b) Unfa Jesosi bi lei a Kana taa a lo’ u da sëmbë soni?

³ Jesosi du di fosu foombo wooko fëën di a bi dë a wan toou a Kana di dë a di pisiwata u Galilea. Wa sabi andi bi pasa, ma baka wan pisiten, win an bi dë möön da hii dee sëmbë dee bi ko a di toou. Di soni dë bi sa dë wan gaan sen soni da dee sëmbë dee toou dë, u di de bi musu seeka soni da dee sëmbë dee bi ko a de. Di mama u Jesosi de kai Malia bi dë wan u dee sëmbë dee bi ko a di toou. Ma i si kuma Malia bi hakisi Jesosi u du wan foombo wooko u di a bi sabi taa Jesosi bi abi di makiti u du ën? Wë Malia bi musu u pakisei fundu u hii dee tjabukama woto dee nama ku di womi mii fëën, nöö a bi sabi tu taa de bi o kai ën „di Mii u di möön hei Gadu a liba” (Lukasi 1:30-32; 2:52). Di soni di u sabi, hën da Malia ku Jesosi tuu bi kë heepi dee tu sëmbë dee bi toou. Fëën mbei a wan foombo fasi Jesosi mbei 380 liti wata ko toon win (Lesi Johanisi 2:3, 6-11). Jesosi bi musu u du di foombo wooko dë u? Wë nönö. Ma a bi du ën u di a bi ta booko hën hedi ku sëmbë, nöö a bi ta djeesi hën Tata, di lo’ u da sëmbë soni.

4, 5. (a) Andi u ta lei u di fosu foombo wooko di Jesosi bi du? (b) Andi di foombo wooko di Jesosi bi du a Kana ta lei u u di ten di ta ko?

⁴ A wan foombo fasi Jesosi bi da dee sëmbë win, nöö a bi hia tjika u sömëni sëmbë feni. I ta si andi u ta lei u di foombo soni di Jesosi bi du aki ö? Wë u ta lei taa Jehovah ku Jesosi an giii, ma de lo’ u da sëmbë soni. Di foombo soni bi du aki ta lei gbelingbelin taa hën ku hën Tata ta booko de hedi ku sëmbë tuutuu. A ta lei u tu taa a hii kamian ka woo libi a di njunjun goonliba, Jehovah o wooko ku di makiti fëën faa da u njanjan te a hia.​—Lesi Jesaaja 25:6.

⁵ Pakisei di soni aki! Abiti möön Jehovah o da u hii soni di u abi fanöudu tuutuu. Hiniwan sëmbë o abi wan hanse wosu, söseei de o ta njan bunu. U ta dë ku tangi a hati seei te u ta pakisei hii dee gaan bunu soni dee Jehovah o da u a di Paladëisi a goonliba.

6. Unfa Jesosi bi ta wooko ku di makiti fëën, nöö unfa u sa djeesi ën?

⁶ Nöiti Jesosi bi wooko ku di makiti fëën u tja wini ko da hënseei. Pakisei di Didibi bi ko pooba Jesosi di a piki ën faa mbei dee sitonu ko toon bëëë. Jesosi an bi wooko ku di makiti fëën faa tja wini ko da hënseei (Mateosi 4:2-4). Ma a bi dë kabakaba u wooko ku di makiti fëën u heepi wotowan. Unfa u sa djeesi Jesosi a di fasi aki? Jesosi bi taki taa u musu „ta da sëmbë soni” (Lukasi 6:38). Useei sa ta da sëmbë soni te u ta kai de ko njan a u pisi. U sa du ën tu, te u ta fika pikisö möön longi baka komakandi u heepi dee baaa ku sisa fuu. Kandë u sa tei u ten haika fa wan baaa ta lei u fa a o hoi wan taki. Nasö u sa heepi wotowan u de sa du di peleikiwooko möön bunu. Te u ta dë kabakaba u heepi wotowan hii juu, nöö u ta lei taa u ta djeesi Jesosi a di da di a bi lo’ u da sëmbë soni.

„DE NJAN TEEFA BËË U DE FUU”

7. Andi o ta dë hii juu solanga u dë a di goonliba u Saatan?

⁷ Na tide jaa hangi pena dë a goonliba. Jehovah bi piki dee Isaëli sëmbë taa ’hii juu pooti sëmbë bi o ta dë a di köndë’ (Detolonomi 15:11). Höndöhöndö jaa baka di dë, Jesosi bi taki taa: „Dee pootima o dë aki nöömö fuun ta sölugu” (Mateosi 26:11). Ma kë Jesosi bi kë taki taa pooti sëmbë o ta dë a goonliba aki u nöömö u? Wë nönö. Di soni di a bi kë taki hën da solanga u ta libi a di goonliba u Saatan, sëmbë o ta pena. Na piki tooka soni o tooka te woo dë a di njunjun goonliba! A di ten dë, pena an o dë möön. Hii sëmbë o ta abi soni u njan te a hia, söseei hii sëmbë o ta njan te bëë u de fuu!

8, 9. (a) Faandi mbei Jesosi bi da dusudusu sëmbë njanjan? (b) Unfa i ta feni di foombo soni di a bi du aki?

⁸ Di psalöm sikifima bi taki da Jehovah taa: „I ta jabi i maun, nöö i ta da hiniwan libilibi soni di soni di hën hati fii taa a kë” (Psalöm 145:16). Di Jesosi bi dë a goonliba aki, a bi ta du soni kuma hën Tata, nöö a bi ta heepi wotowan. An bi ta du ën u lei taa a abi makiti, ma a bi ta du ën u di a bi ta booko hën hedi ku sëmbë tuutuu. Boo taki u dee soni dee sikifi a Mateosi 14:14-21 (Lesi ën). Sëmbë u peipei köndë bi booko gililii go a Jesosi baka (Mateosi 14:13). U di ndeti bi ta ko, mbei dee bakama u Jesosi bi ta booko de hedi ku dee sëmbë. Dee sëmbë bi wei, nöö hangi bi ta kii de. Fëën mbei de hakisi Jesosi faa manda dee sëmbë u de go suku soni bai njan. Andi Jesosi bi o du?

⁹ Jesosi bi tei feifi bëëë ku tu fisi paati da 5000 womi, te kisi dee mujëë ku dee mii dee bi sai naandë. Faandi mbei Jesosi du di foombo wooko aki? U di a bi lobi sëmbë tuutuu, söseei u di a bi ta booko hën hedi ku de. Di njanjan di Jesosi bi da de, bi musu u hia biga dee sëmbë bi „njan teefa bëë u de fuu”. Di njanjan di de bi njan dë, hën bi o da de di kaakiti di de bi abi fanöudu u de toona waka di longi go a de pisi (Lukasi 9:10-17). Di de njan te de kaba, hën dee bakama u Jesosi fuu 12 manda ku di njanjan di bi fika!

10. Andi o pasa ku di pena di sëmbë ta pena a di ten di ta ko?

¹⁰ U di dee tiima u di goonliba aki giii, söseei u di de abi langahati u möni, mbei milionmilion sëmbë ta pena. So u dee baaa ku sisa fuu seei an ta feni soni tjika u de njan. Ma abiti möön dee sëmbë dee ta piki Jehovah buka o libi a wan goonliba ka sëmbë an o abi langahati u möni möön, nöö de an o ta pena möön tu. Jehovah da di möön makiti Gadu u mundu. A abi di makiti u da hii sëmbë dee soni de abi fanöudu, nöö a kë du ën tu. A paamusi u taa abiti möön a o puu fuka a goonliba!​—Lesi Psalöm 72:16.

11. Faandi mbei i dë seiki taa Keesitu o wooko ku di makiti fëën faa du soni a hii di goonliba? Andi i kë du, u di i sabi sö kaa?

¹¹ A dii jaa ku hafu dendu nöö Jesosi bi du dee foombo wooko fëën di a bi dë a goonliba aki, söseei a wan tu kamian nöö a bi du de (Mateosi 15:24). Ma te di Könu Jesosi o tii di goonliba wan dusu jaa longi, nöö a o heepi hii libisëmbë (Psalöm 72:8). Dee foombo wooko dee Jesosi bi ta du ta lei taa a kë wooko ku di makiti fëën faa du bunu soni da u. A dë sö tuu taa wa abi di makiti u du foombo soni. Ma andi u sa du? U sa tei di ten ku di kaakiti fuu u konda da wotowan andi ku andi di Bëibel paamusi u taa o pasa a di ten di ta ko. Di faantiwöutu dë u kuma Jehovah Kotoigi abi (Loomë 1:14, 15). Te u ta pakisei fundu u dee soni dee Jesosi o du abiti möön, nöö woo dë fajafaja u konda dee soni aki da wotowan.​—Psalöm 45:1; 49:3.

JEHOVAH KU JESOSI TA BASI SONI VENTU KUMA KU WATA

12. Faandi mbei u sa dë seiki taa Jesosi sabi bumbuu unfa di goonliba seti?

¹² Di Gadu bi mbei di goonliba ku dee soni dee dë nëën, nöö Jesosi bi dë „nëën bandja kuma di möön bunu wookoma” (Nöngö 8:22, 30, 31; Kolosën 1:15-17, NW). Fëën mbei u sa taki taa Jesosi sabi bumbuu fa di goonliba seti. A sabi unfa a musu wooko ku dee soni kuma ventu ku wata, söseei a sabi unfa a musu basi de.

13, 14. Konda wan woto di ta lei taa Keesitu sa basi soni kuma ventu ku wata.

¹³ Di Jesosi bi dë a goonliba, a bi ta lei taa a bi abi di makiti u Gadu u di a bi ta basi dee soni kuma ventu ku wata. Pakisei di tapa di Jesosi bi tapa wan gaan ventu (Lesi Maikusi 4:37-39). Wan sëmbë di sabi soni u Bëibel bi taki taa di Giiki wöutu di de puu ko „gaan ventu” di sikifi a di buku Maikusi, da wan gaan ventu di sa kii sëmbë. Te sö wan ventu ta ko, nöö kamian ta dungu piii, gaangadu ta bai ta koti faja, söseei gaan tjuba ta kai. Te a pasa, nöö hii soni ta booko kaba a sösö. Apösutu Mateosi bi kai di ventu aki ’wan gaan ventu di bigi möön hii soni’.​—Mateosi 8:24.

¹⁴ Pakisei di soni aki: Di wata ta seki di boto nango ta ko, ta tuwë wata nango a di boto dendu nöömö. Hii fa dee soni dë bi ta pasa, Jesosi bi dë piii a di boto dendu ta duumi u di a bi wei. Ma dee bakama fëën bi ta fëëë seei. Fëën mbei de bi go weki Jesosi, hën de piki ën taa: „Heepi u o! Woo kaba a wata!” (Mateosi 8:25). Wë andi Jesosi bi du? Jesosi ko hopo, hën a bai di ventu ku di ze. A taa: „Un tan pii e!” (Maikusi 4:39). Hën wantewante dë di ventu ku di ze „tan piii”. Di soni di Jesosi du aki ta lei u a wan foombo fasi seei taa a abi di makiti u basi soni kuma ventu ku wata!

15. Unfa Jehovah bi lei taa a sa basi soni kuma ventu ku wata?

¹⁵ Jehovah hën da Jesosi di makiti di a abi, nöö fëën mbei u sabi taa di Makiti Gadu u mundu sa basi soni kuma ventu ku wata. Leti kumafa u sabi, nöö ufö di Gaan Wata bi ko, Jehovah bi taa: „Seibi daka fika möön, nöö mi o mbei tjuba kai a goonliba föteni daka, ndeti ku didia” (Kenesesi 7:4). Söseei a Ëkisodesi 14:21 u ta lesi taa: „Jehovah mbei wan gaan ventu kumutu a di së u sonu kumutu, ta böö ta hai di wata hii di ndeti.” A Jona 1:4 a sikifi söseei taa: „Jehovah mbei wan gaan ventu böö di ze, hën di wata bigi ta seki te na soni. A fika piki nöö di boto bi singi.” U ta fii bunu seei u di u sabi taa a di njunjun goonliba Jehovah o basi hii dee soni aki.

16. Faandi mbei a ta da u kötöhati u sabi taa Jehovah ku Jesosi abi di makiti u basi soni kuma ventu ku wata?

¹⁶ A ta da u kötöhati seei u di u sabi taa Jehovah ku Jesosi abi di makiti u basi soni kuma ventu ku wata. A di pisiten u di Dusu Jaa Tii u Keesitu, na wan sëmbë a goonliba o ta fëëë möön taa hogi o miti de. Na wan sëmbë o kisi makei nasö dëdë a gaan ventu nasö a gaan wata, nasö te goon ta siki latja kamian. Wa a’ fu fëëë na wan u dee soni aki, u di „Masa Gadu o ta libi ku libisëmbë awaa!” (Akoalimbo 21:3, 4). U sa dë seiki taa Jehovah o da Jesosi di makiti u basi soni kuma ventu ku wata a pisiten u di Dusu Jaa Tii.

DJEESI GADU KU KEESITU NÖUNÖU KAA

17. Na un fasi u sa djeesi Gadu ku Keesitu nöunöu kaa?

¹⁷ A dë sö tuu taa wa sa tapa soni kuma ventu ku wata u de an ko booko wan kamian, ma Jehovah ku Jesosi nöö sa du ën. Tökuseei wan soni dë di u sa du. U sa du di soni di sikifi a Nöngö 3:27 (Lesi ën). Te dee baaa ku sisa fuu dë ku fuka, nöö u sa heepi de ku soni di de abi fanöudu, söseei u sa kötö de hati (Nöngö 17:17). U sa ta heepi de te soni kuma ventu nasö wata ko booko di kamian ka de ta libi. Wan sisa di manu fëën dëdë kaa wosu bi booko di wan gaan ventu bi ko a di kamian ka a ta libi. A bi taki taa: „Mi ta da di ölganisaasi u Jehovah tangi seei. Na u di dee baaa ku sisa bi da m’ soni nöö, ma söseei u di de bi da m’ taanga ku di Bëibel.” Wan sisa di an toou jeti an bi saandi a bi musu du di wan gaan ventu ko booko di wosu fëën. Baka di dee baaa ku sisa ko heepi ën mbei di wosu baka, hën a taa: „Di soni bigi da mi seei, ma sa piki i fa mi ta fii! A bi taki söseei taa: „Gaantangi fii, Jehovah!” U dë ku tangi a hati seei u di dee baaa ku sisa fuu ta booko de hedi tuutuu ku wotowan. Boiti di dë, u dë ku tangi a hati seei taa Jehovah ku Jesosi Keesitu ta booko de hedi tuutuu ku u.

18. Andi ta bigi da i te i luku faandi mbei Jesosi bi ta du foombo wooko?

¹⁸ Di Jesosi bi ta du di diniwooko fëën a goonliba aki, a bi lei taa nëën sëmbë sa si „fa Gadu taanga tjika”. Ma nöiti a bi wooko ku di makiti fëën u lei wotowan fa a taanga tjika, nasö faa suku wini da hënseei. Jesosi bi ta wooko ku di makiti fëën faa du foombo wooko u di a bi lobi sëmbë tuutuu. A di woto di ta ko woo taki u di soni aki go dou.