Mbei di libi fii kai ku di nëbai begi u Masa Jesosi​—Pisi 1

1. Unfa u ta lei sëmbë soni ku dee soni dee sikifi a di begi u Masa Jesosi di sikifi a Mateosi 6:9-13?

SÖMËNI sëmbë sabi dee soni dee Jesosi bi taki a di begi di sikifi a Mateosi 6:9-13. U lo’ u kai dee wöutu u di begi aki te u ta peleiki, u lei sëmbë taa di Könuköndë da di tii u Gadu di o mbei di goonliba aki ko toon wan paladëisi. Söseei u lo’ u taki dee wöutu „be di në fii ko santa”, u lei taa Gadu abi wan në, di u musu ta si kuma wan santa soni.​—Mateosi 6:9.

2. Unfa u du sabi taa Jesosi an bi kë fuu ta taki dee seei soni hiniwan juu te u ta begi?

² Jesosi bi kë fuu ta taki dee seei soni hiniwan juu te u ta begi ö? Wë nönö. A bi taki taa: „Te joo begi, nöö ja musu ta taki dee seei soni hiniwan juu” (Mateosi 6:7). Wan woto pasi di Jesosi bi ta lei dee bakama fëën unfa de musu begi, hën a bi taki di wan seei begi baka, ma an bi kai dee seei wöutu (Lukasi 11:1-4). A sö wan fasi Jesosi bi lei u ku di begi dë, fu un pei soni u musu ta begi da.

3. Andi i sa hakisi iseei te woo taki u di nëbai begi u Masa Jesosi?

³ A di woto aki ku di woto di ta ko, woo taki finifini u di begi u Masa Jesosi. Te woo taki u di begi aki, nöö hakisi iseei: ’Unfa di begi aki sa heepi mi u begi möön bunu?’ Wan woto fanöudu soni di i sa hakisi iseei da: ’Mi ta libi a wan fasi di ta kai ku di nëbai begi u Masa Jesosi ö?’

„U TATA A LIBA”

4. Na un soni dee wöutu „u Tata” ta mbei u ko buta mëni?

⁴ Jesosi bi bigi di begi fëën ku dee wöutu: „U Tata”. Dee wöutu aki ta mbei u ko buta mëni taa Jehovah da di Tata u hii dee baaa ku sisa fuu a hii së u goonliba (1 Petuisi 2:17). Dee sëmbë dee Jehovah tei u go libi a Gadu Köndë ala da sëmbë di a tei kuma miii fëën. Fëën mbei u sa taki taa a dë di Tata u de a wan apaiti fasi (Loomë 8:15-17). Dee sëmbë dee o libi u teego a goonliba seei sa kai ën „Tata” tu. Jehovah hën da de libi, nöö a ta da de andi de abi fanöudu u di a lobi de. Dee sëmbë dë o ko dë „mii u Gadu” te de ko dë sëmbë di an abi zöndu möön, söseei te de hoi deseei a Jehovah a di lasiti tesi di o miti libisëmbë.​—Loomë 8:21, NW; Akoalimbo 20:7, 8.

5, 6. Andi da di möön bunu kado di mama ku tata sa da dee mii u de, nöö andi hiniwan mii musu du ku di kado dë? (Luku di peentje a bigi u di woto.)

⁵ Te dee mama ku dee tata ta heepi dee mii u de u ko fusutan taa Jehovah da di Tata u de di dë a liba ala, söseei te de ta lei de unfa de musu ta begi ën, nöö a sö wan fasi de ta da de wan dii kado. Wan baaa di ta du di keling-wooko a Zuid-Afiikan ta taki taa: „Sensi di daka di u pai dee mujëë mii fuu, mi bi ta begi ku de hiniwan ndeti, boiti ee ma bi dë a wosu. Dee mujëë mii fuu lo’ u taki taa de an sabi möön andi ku andi mi bi ta taki a dee begi dë. Ma de sabi unfa de bi ta fii a di juu dë te u bi ta fan a wan lesipeki fasi ku di Tata fuu, Jehovah. Wë di de ko bigi tjika u de sa begi, hën mi piki de taa de musu ta begi be mi jei andi de ta piki Jehovah. A sö wan fasi mi bi sa sabi unfa de ta pakisei, söseei unfa de ta fii. Di soni aki bi dë wan bunu fasi fa mi bi sa sabi andi dë a de hati. A sö wan fasi mi bi sa heepi de pikipiki u de taki u dee fanöudu soni dee dë a di nëbai begi u Masa Jesosi, te de bi ta begi.”

⁶ Di soni dë bi mbei dee mujëë mii u di keling-gaanwomi bi ta ko zuntu ku Jehovah tefa de ko bigi. Nöunöu de toou, nöö de ku dee manu u de ta du di hii-ten diniwooko u dini Jehovah. Di möön bunu kado di mama ku tata sa da dee mii u de, hën da te de lei de taa Jehovah da wan tuutuu sëmbë di de ku ën sa ko dë gaan mati. Fëën mbei hiniwan mii musu ta mbei möiti u dë mati ku Jehovah hii juu.​—Psalöm 5:11, 12; 91:14.

„BE DI NË FII KO SANTA”

7. Un gaandi u abi, nöö andi u musu du?

⁷ A dë wan gaandi taa u sabi di në u Gadu, söseei taa u dë „sëmbë di ta tja di në fëën” (Tjabukama 15:14, NW; Jesaaja 43:10). U lo’ u begi Gadu taa: „Be di në fii ko santa.” Te u ta begi sö, nöö u ta hakisi Jehovah faa heepi u u na du soni nasö taki soni di o poi di në fëën. Wa musu dë kuma so sëmbë u di fosu jaahöndö di an bi ta du dee soni de bi ta lei woto sëmbë. Paulosu bi sikifi taa: „Fu un dee Dju sëmbë i si aki hedi mbei dee oto köndë sëmbë ta kosi Gadu në.”​—Loomë 2:21-24.

8, 9. Konda wan woto di ta lei fa Jehovah ta heepi dee sëmbë dee kë mbei di në fëën ko santa.

⁸ U ta du hii soni di u sa du u tja gafa ko da di në u Jehovah. Wan sisa di ta libi a di köndë Noluweiki, manu bi ko dëdë. A bi fika hën wanwan ku di womi mii fëën di abi tu jaa. A taki taa: „A bi dë wan taanga pisiten a mi libi seei. Mi bi ta begi hiniwan daka, bëina hiniwan juu, u hakisi Gadu faa da m’ kaakiti u hoi miseei, u na mbei mi go du wan soni di sa mbei Saatan feni wan soni a mi u mbei Jehovah fa. Mi bi kë mbei di në u Jehovah ko santa, nöö mi bi kë taa di womi mii u mi si hën tata a di Paladëisi.”​—Nöngö 27:11.

⁹ Jehovah bi piki dee begi u di sisa u? Aai. Wë u di a bi ta dë ku dee baaa ku sisa hii juu, mbei a kisi degihati. Feifi jaa baka di dë, hën a toou ku wan baaa di dë gaanwomi u kemeente. Di womi mii fëën abi 20 jaa nöunöu, nöö a tei dopu. Di sisa taki taa: „Mi ta wai seei taa mi manu bi heepi mi u kiijëën.”

10. Unfa Gadu o mbei di në fëën ko santa te dou?

¹⁰ Jehovah o mbei di në fëën ko santa te dou, te a o puu hii dee sëmbë dee ta poi di në fëën, di an kë ën kuma Tiima u de (Lesi Ezekiëli 38:22, 23). A di ten dë libisëmbë o ko dë telutelu söndö föutu, nöö hii sëmbë a liba ala ku goonliba aki tuu o ta dini Jehovah, nöö de o ta tja gafa ko da di santa në fëën tu. Te u kaba fëën di lobihati Tata fuu o ko „dë hii soni da hii sëmbë”.​—1 Kolenti 15:28.

„BE DI KÖNUKÖNDË FII KO”

11, 12. Andi Jehovah bi heepi dee sëmbë fëën u ko fusutan a di jaa 1876?

¹¹ Ufö Jesosi toona go a Gadu Köndë, dee bakama fëën bi hakisi ën taa: „Wë Masa, joo toona seti di könuköndë da Isaëli a di ten aki baka nö?” Jesosi bi piki de taa di juu an bi dou jeti u de sabi na un ten di Könuköndë u Gadu bi o bigi tii. A bi piki dee bakama fëën taa de bi musu buta pakisei a di peleikiwooko di dë di möön fanöudu wooko di de musu du (Lesi Tjabukama 1:6-8, NW). Ma a bi lei de tu u de begi be di Könuköndë u Gadu ko, söseei u de ta wakiti u di ten dë dou. Fëën mbei u ta begi be di Könuköndë ko.

¹² Di di ten bi ta zuntu u Jesosi bigi tii a Gadu Köndë, hën Jehovah bi heepi dee sëmbë fëën u de ko fusutan na un ten di soni dë bi o pasa. A di jaa 1876, Charles Taze Russell bi sikifi di woto „Na un ten di ten u dee döösë sëmbë o kaba?” A lei taa dee „seibi ten” u di tjabukama woto u Daniëli da di wan seei ten kuma ’di ten Masa Gadu bi buta da dee döösë sëmbë’ u di tjabukama woto u Jesosi. Di woto di a bi sikifi bi ta taki taa dee ten dë bi o kaba a di jaa 1914.a (Luku di pisi a basu.)​—Daniëli 4:16; Lukasi 21:24.

13. Andi bi pasa a di jaa 1914, nöö andi dee soni dee ta pasa a goonliba sensi di jaa 1914, ta lei u?

¹³ A di jaa 1914, wan gaan feti bi bigi a Europa, nöö hesihesi seei di feti bi ko dë a hii di goonliba. Di feti aki bi mbei taa gaan hangi pena bi ko dë a goonliba. Nöö a kaba u di jaa 1918, wan taku siki bi ko a goonliba ko kii möön hia sëmbë möön di feti dë seei. Hii dee soni aki bi dë wan pisi u „di maaka” di Jesosi bi taki. Di maaka bi lei taa Jesosi bi toon Könu a di jaa 1914 (Mateosi 24:3-8; Lukasi 21:10, 11). A di jaa dë, a go „kuma wan gaan winima faa go wini feti” (Akoalimbo 6:2). Jesosi bi puu Saatan ku dee taku jeje a liba ala vinde ko a goonliba aki. Baka di dë, hën di tjabukama woto bi ko ta pasa kumafa di Bëibel bi taki. A taa: „Helu u di goonliba ku di ze, biga di didibi saka ko a unu awaa. Nöö fa a saka ko dë, a ko ku taanga hatiboonu, biga a sabi taa ten fëën ko sati.”​—Akoalimbo 12:7-12.

14. (a) Faandi mbei u ta begi jeti be di Könuköndë u Gadu ko? (b) Un fanöudu wooko u musu du a di ten aki?

¹⁴ Di tjabukama woto dë di sikifi a kapitel 12 u di buku Akoalimbo, ta heepi u fuu fusutan faandi mbei gaan hogi bigi pasa a goonliba a di ten di Jesosi toon Könu u di Könuköndë u Gadu. Jesosi ta tii a Gadu Köndë ala, ma Saatan hën a ta tii goonliba aki. Abiti möön Jesosi o ’wini di feti’ te a o puu hogidu a goonliba. U musu ta begi nöömö be di Könuköndë u Gadu ko, nöö u musu ta paaja di bunu buka u di Könuköndë fajafaja. Di peleiki di u ta peleiki ta mbei di tjabukama woto u Jesosi pasa tuutuu. A bi taki taa: „Di bunu buka u di Njunjun Tii [Könuköndë] u Gadu musu paaja te dou hii goonliba e, be hii föluku musu jei. Nöö baka u di dë ufö di ten u dë aki o kaba.”​—Mateosi 24:14.

„BE DI KË FII PASA . . . A GOONLIBA”

15, 16. A tjika taa u ta begi Gadu be di kë fëën pasa a goonliba u? Konda faandi mbei.

¹⁵ Söwan 6000 jaa pasa, di kë u Gadu bi ta pasa a goonliba. Fëën mbei Jehovah bi taki taa hii soni bi „bunu seei” (Kenesesi 1:31). Bakaten Saatan hopo fia ku Gadu, hën sensi di ten dë gaansë u sëmbë an ta du di kë u Gadu möön. Ma söwan aiti milion sëmbë ta dini Jehovah a di ten aki. De ta begi be di kë u Gadu pasa a goonliba, nöö de ta du di kë u Gadu tu. De ta libi a wan fasi di ta kai ku Gadu, söseei de ta lei sëmbë soni u di Könuköndë fajafaja.

¹⁶ Wan sisa di dopu a di jaa 1948, di abi 80 jaa, nöö di bi dë sëndëlengi na Afiikan, taki taa: „Mi lo’ u begi fuu sa miti hii sëmbë di dë kuma sikapu u de ko sabi Jehovah ufö a lati. Te mi o peleiki da wan sëmbë, nöö mi ta hakisi Gadu faa da mi di köni u mi sa dou di sëmbë hati. Nöö te u feni sëmbë di dë kuma sikapu kaa, nöö mi ta begi Jehovah faa dë ku u fuu sa heepi dee sëmbë dë.” Di sisa aki bi heepi sömëni sëmbë u de ko sabi Jehovah. I sabi woto baaa ku sisa di gaandi kaa, di ta du di kë u Jehovah fajafaja tu ö?​—Lesi Filipi 2:17.

17. Unfa i feni dee soni di Jehovah o du da libisëmbë ku di goonliba a di ten di ta ko?

¹⁷ Solanga Jehovah an puu dee felantima fëën a goonliba, woo ta begi be di kë fëën pasa a goonliba. Baka di dë, di goonliba o ko toon wan paladëisi, nöö Gadu o weki dusudusu milion sëmbë puu a dëdë. Jesosi bi taki taa „wan juu o dou, nöö hii dëdë sëmbë tuu o jei mi di Mii u Gadu aki ta kai de . . . nöö de tuu o weki kumutu a geebi toona ko ku libi baka” (Johanisi 5:28, 29). Pakisei fa woo wai u si dee lobiwan fuu dee bi dëdë! Gadu „o feki hiniwan u de wojowata puu” (Akoalimbo 21:4). Gaansë u dee sëmbë dee o ko a libi baka o dë ’sëmbë di an bi libi bunu a Gadu wojo’, di an bi lei soni u Jehovah ku Jesosi wan daka. Woo lei de andi da di kë u Gadu u de sa feni „di libi u teego”.​—Tjabukama 24:15; Johanisi 17:3.

18. Andi libisëmbë abi möön fanöudu?

¹⁸ Te di Könuköndë u Gadu dou, a o mbei di në u Gadu ko santa, nöö hii sëmbë a goonliba aki ku liba ala tuu u ta dini Jehovah kuma wan famii. Awa, Gadu o da libisëmbë dee soni de abi möön fanöudu te a o piki dee dii fosu soni dee u ta hakisi ën, di Jesosi bi taki a di nëbai begi fëën. A di woto di ta ko, woo taki u woto fanöudu soni di Jesosi bi lei u taa u musu ta begi da.