Wan gaan hanse djai

LUKU di goonliba aki! Hii soni hanse seei! Luku dee ahun, dee pau, dee folo ku hii dee mbeti. I sa lei ka di zaun ku dee lëun dë u?

Unfa di gaan hanse djai aki du ko? Wë, boo go luku unfa Gadu seeka di goonliba da u.

A di fosu kamian, Gadu mbei guuun ahun göö tapa di goondoti. Hën a mbei hii pei uwii, hii pei pau, nöö a mbei matu tu. Dee soni aki di ta göö, ta mbei di goonliba ko hanse. Ma na di dë nöö. Gaansë u dee soni dë ta da u njanjan di suti u njan seei.

Baka di dë, Gadu mbei fisi u libi a wata ku dee fou u buwa a liba. A mbei dagu, pusipusi ku hasi, gaan mbeti ku piki mbeti. Un pei mbeti ta libi a di pisi ka i ta dë? Wa musu wai taa Gadu mbei hii dee soni aki da u ö?

Te u kaba fëën, Gadu mbei wan pisi u di goonliba ko toon wan gaan hanse kamian. Hën a kai di kamian dë, di djai u Eden. Na wan soni bi ta makei a di djai dë. Hii soni fëën bi hanse seei. Nöö Gadu bi kë taa hii di goonliba bi musu ko dë kuma di hanse djai dë.

Ma luku di peentje möön. I saandi Gadu bi si taa makei nëën u? Boo go luku andi.