Isaki feni wan bumbuu mujëë

I SA’ ambë da di mujëë a di peentje aki ö? Në fëën da Lebeka. Di womi di a ta waka go miti da Isaki. Lebeka o toon di mujëë u Isaki. Unfa di soni aki bi pasa?

Wë Isaki tata, Abahamu bi kë taa di womi mii fëën feni wan bumbuu mujëë. An bi kë taa Isaki toou ku Kaana mujëë, biga dee sëmbë dë bi ta dini taku gadu. Fëën mbei Abahamu kai wan futuboi fëën, hën a piki ën taa: ’Mi kë fii go a dee famii u mi a Halan, nöö suku wan mujëë da di womi mii u mi Isaki.’

Wantewante di futuboi u Abahamu tei teni mbeti de kai kamëli, hën a tei di langa pasi nango a Halan. Di a dou zuntu u di kamian teka dee famii u Abahamu ta libi, hën a sindo böö a wan baaku wata bandja. A bi dë sapate buka kaa, nöö a di juu dë dee mujëë u di köndë bi lo’ u go kisi wata a baaku. Hën wë di futuboi u Abahamu begi Jehovah taa: ’Jehovah o, be a dë sö taa di mujëë di o kisi wata da mi ku dee kamëli u mi, toon di mujëë u Isaki e.’

Te wan pisi Lebeka ko kisi wata. Di futuboi hakisi ën wata u bebe, hën a dëën. Baka di dë a kisi wata da hii dee kamëli, biga dëëwata bi ta kii de. Gaan wooko wë di dë, biga kamëli ta bebe gaan hia wata.

Di Lebeka kaba, hën di futuboi u Abahamu hakisi ën unfa hën tata në. A hakisi ën tu ee a sa duumi a de wosu. Lebeka piki ën taa: ’Mi tata da Betuëli, nöö u abi kamian da i fii duumi.’ Di futuboi u Abahamu bi sabi taa Abahamu baaa Naako hën bi pai Betuëli. Hën wë a tjökö kini a goon da Jehovah tangi u di a tjëën dou a dee famii u Abahamu.

Di ndeti dë, di futuboi u Abahamu piki Betuëli ku Laban, di baaa u Lebeka, andi da di ko fëën. A bi kai ku de taa Lebeka bi sa go toou ku Isaki. Andi Lebeka piki di de hakisi ën ee a kë go? A piki de ’Aai, mi kë’. Hën wë debooko fëën de subi a dee kamëli liba, tei di langa pasi nango baka a Kaana.

Di de dou, nöö ndeti bi dë kaa. Lebeka si wan womi ta waka a di sabana. A bi dë Isaki. A bi wai seei di a si Lebeka. Isaki mama, Sala, bi dëdë dii jaa kaa, nöö Isaki bi dë ku tjali jeti. Ma fa Isaki si Lebeka dë, a ko lobi ën seei, nöö an bi dë ku tjali möön, a bi dë ku piizii baka.