Soni miti Dina

I TA si ambë Dina nango luku ö? A nango luku so u dee mujëë mii dee ta libi a di köndë Kaana. Hën tata Jakopu bi o lobi di soni dë u? Fii sa piki di hakisi aki, nöö pooba u mëni unfa Abahamu ku Isaki bi ta pakisei u dee mujëë u Kaana.

Abahamu bi kë taa di womi mii fëën Isaki toou ku wan Kaana mujëë u? Nönö, an bi kë. Isaki ku Lebeka bi kë taa di womi mii u de Jakopu toou ku wan Kaana mujëë u? Wë nönö. I sa’ faandi mbei ö?

Wë u di dee sëmbë u Kaana bi ta dini taku gadu. De an bi dë bumbuu sëmbë u tei kuma manu nasö mujëë, nöö de an bi dë bumbuu sëmbë u tei kuma gaan mati tu. Fëën mbei u sa dë seiki taa Jakopu an bi o feni ën bunu taa di mujëë mii fëën tei mati ku dee Kaana mujëë mii aki.

Aan misi taa soni bi o miti Dina. I ta si di Kaana womi a di peentje di ta luku Dina diin sö u? Hën në da Sikëmi. Wan daka di Dina go luku dee mujëë mii, hën Sikëmi kisi Dina, hën a duwengi ën faa kandi ku ën. Di soni di a du dë an bi dë wan bunu soni, biga womi ku mujëë di toou nöö sa kandi ku deseei. Di hogi di Sikëmi du ku Dina aki tja gaan toobi ko.

Di dee baaa u Dina jei di woto, hati u de boonu te na soni. Tu u de, Simion ku Leifi, hati boonu sö tee taa de tei ufangi, hën de denda go a di köndë dendu söndö u sëmbë bi dë ku de mëni. De ku dee baaa u de kii Sikëmi ku hii dee woto womi u di köndë. Jakopu hati boonu seei u di dee womi mii fëën du di gaan hogi dë.

Ma unfa hii di toobi aki bigi? Wë u di Dina bi tei mati ku sëmbë di an ta hoi dee wëti u Gadu. Wa bi o kë abi dee lö pei mati dë, na sö nö?