’Hoi gingin, na disa möönsö’

1-2. Na un futu wan Keesitu sëmbë dë kuma wan hei wosu di abi sömëni södö? (1 Kolenti 15:58)

A DI jaa 1970, hën de mbei wan gaan hei wosu ku sömëni södö a Tokyo, a di köndë Japan. Dee sëmbë dee bi ta si di wosu dë bi ta hakisi deseei ee unfa a bi o du hoi a pë, u di di goon bi lo’ u seki a di foto dë. Andi dee sëmbë dee mbei di wosu dë bi du faa bi sa hoi a pë te goon bi o seki. Wë de bi mbei ën a sö wan fasi taa a sa hoi gingin, söseei faa sa ta buli pikisö te goon ta seki, söndö faa kai. Wë Keesitu sëmbë dë kuma di wosu dë. Na un futu?

² Wan Keesitu sëmbë musu dë gingin a di biibi, ma an musu ta du soni pasa maaka. Hii juu seei a musu ta dë kabakaba u hoi dee wëti u Jehovah. (Lesi 1 Kolenti 15:58.) An musu „abi taangajesi”, söseei an musu ta pasa Gadu buka u di soni ta taanga dëën. Boiti di dë, an musu „ta suku fini a soni poi”, ma a musu sa’ u bia du soni woto fasi te a dë fanöudu (Jak. 3:17). Wan Keesitu sëmbë di abi dee fasi aki an o ta suku fini a sëmbë poi, ma an o dë wan sëmbë di an ta booko hën hedi ku soni tu. A di woto aki, woo taki unfa u sa hoi gingin a dee soni dee u sabi. Söseei woo taki u feifi soni di Saatan ta du u mbei a taanga da u fuu hoi useei a Jehovah, nöö woo luku andi u sa du be an wini u.

UNFA U SA DU FUU HOI GINGIN

3. Un wëti u di Möön Hei Butawëtima, sikifi a Tjabukama 15:28, 29?

³ Jehovah da di Möön Hei Butawëtima, nöö hii juu a ta da dee sëmbë fëën wëti di an taanga u fusutan (Jes. 33:22). Di tii kulupu u di ten u dee fesiten Keesitu sëmbë, bi taki u dii fasi fa Keesitu sëmbë musu hoi gingin a dee soni di de sabi: Di fosu soni, hën da de an musu dini poipoi gadu, ma de musu dini Jehovah wanwan. Di u tu soni, hën da de musu ta si buuu kuma wan santa soni. Nöö di u dii soni, hën da de musu ta libi kumafa di Bëibel ta taki, a di së u manu ku mujëë soni. (Lesi Tjabukama 15:28, 29.) Unfa Keesitu sëmbë sa piki Jehovah buka a dee dii soni aki.

4. Unfa u ta lei taa Jehovah wanwan nöö u ta dini? (Akoalimbo 4:11)

⁴ Wa ta dini poipoi gadu, Jehovah wanwan nöö u ta dini. Jehovah bi piki dee Isaëli sëmbë taa hën wanwan nöö de musu dini (Deto. 5:6-10). Di Didibi bi ko pooba Jesosi, hën Jesosi bi taki gbelin taa Jehovah wanwan u musu dini (Mat. 4:8-10). Fëën mbei wa ta dini poipoi gadu. Boiti di dë, wa ta dini libisëmbë aluwasi ee de dë hedima u keiki, politikima, nasö nëbai sëmbë di dë kandama, sportma, nasö fëlonma. Wa ta si de kuma gadu. U ta hoi useei a Jehovah, söseei hën wanwan tö u ta dini. Hën da di Sëmbë di „mbei hii soni u mundu tuu”.​—Lesi Akoalimbo 4:11.

5. Faandi mbei u ta hoi di wëti u Jehovah di ta taki taa buuu ku libi da santa soni?

⁵ U ta hoi di wëti u Jehovah di ta taki taa buuu ku libi da santa soni. Faandi mbei? Wë u di Jehovah ta piki u taa buuu da libi, nöö di libi da wan dii soni (Leif. 17:14). Di Jehovah bi da libisëmbë pasi u de bigi njan mbeti, hën a bi piki de taa de an bi musu njan buuu (Ken. 9:4). A bi toona piki dee Isaëli sëmbë di soni dë di a bi da de di Wëti (Leif. 17:10). Boiti di dë, a bi mbei di tii kulupu u fesiten, piki dee fesiten Keesitu sëmbë, taa ’be de an njan soni buuu’ (Tjab. 15:28, 29). Te u ta luku unfa u kë u data kula u, nöö wa ta pasa di wëti dë.b

6. Un möiti u ta mbei fuu sa libi kumafa Jehovah kë a di së u manu ku mujëë soni?

⁶ U ta libi kumafa Jehovah kë a di së u manu ku mujëë soni (Heb. 13:4). Paulosu bi taki taa u musu kaba ku dee taku libi u di goonliba aki. Hën da u musu mbei hii möiti u duwengi useei, fu wa go du soni di an bunu. Wa ta luku soni nasö du soni di sa mbei u go libi fanafiti a di së u manu ku mujëë (Kol. 3:5; Jöpu 31:1). Te u ta fii u du wan soni di an bunu, nöö wantewante u ta mbei möiti fu wa pakisei soni, nasö du soni di sa mbei u ku Gadu poi.

7. Andi u musu buta taa woo du, nöö faandi mbei u musu buta taa woo du ën?

⁷ Jehovah kë fuu ta ’piki hën buka’ „ku hii u hati” (Lom. 6:17). Dee soni dee a ta piki u fuu du ta bunu da u hii juu, nöö wa sa tooka dee wëti fëën (Jes. 48:17, 18; 1 Kol. 6:9, 10). U ta mbei hii möiti u piki Jehovah buka, söseei u du soni kuma di psalöm sikifima di bi taki taa: „Mi buta taa mi o ta hoi dee wëti fii hii mi libi longi, awa, fu te mi dëdë” (Ps. 119:112). Ma Saatan o suku u tapa u fu wa hoi useei a Jehovah. Unfa a ta suku u du di soni dë?

UNFA SAATAN TA SUKU U TAPA U FU WA HOI USEEI A JEHOVAH?

8. Unfa Saatan ta mbei sëmbë du ku u, u tapa u fu wa hoi useei a Jehovah?

⁸ A ta mbei sëmbë du ku u. Saatan ta mbei sëmbë du hogi ku u, söseei a ta mbei de duwengi u fu wa hoi useei a Jehovah möön. A kë ’tënë u pisipisi njan’. Awa, a kë fuu ku Jehovah poi (1 Pet. 5:8). Sëmbë bi ta piki dee Keesitu sëmbë u di ten di pasa taa de bi o du soni ku de. Söseei de bi ta fon de, ta kii de, u di biibi u de hedi (Tjab. 5:27, 28, 40; 7:54-60). Saatan ta mbei sëmbë ta du ku u a di ten aki tu. U ta si di soni dë, te u luku fa sëmbë ta du ku dee baaa ku dee sisa fuu a Losiaköndë ku dee woto köndë. U ta si ën tu te u luku fa sëmbë ta du ku u.

9. Konda faandi mbei u musu ta köni u Saatan an ganjan u kisi.

⁹ A ta suku u mbei u du soni di an bunu. Na du nöö Saatan ta mbei sëmbë du ku u, ma a ta suku u kisi u tu „ku dee hogi köni fëën a ta boi” (Ef. 6:11). Luku andi bi pasa ku wan baaa de kai Bob. De bi hoi di baaa aki a hatiwosu, u di de bi o du wan gaan opalasi dëën. A bi piki dee data taa an bi o sa tei buuu seei gbelin. Hën di data di bi o opalasi ën piki ën taa de bi o du soni kumafa a taki. Ma di ndeti di de bi o opalasi ën, hën di data di bi o duumi ën u de opalasi ën, ko fan ku ën di dee famii fëën go. A bi piki Bob taa de an bi o dëën buuu, ma de bi o dë ku buuu a zuntu dë, sö taa de sa dëën ee a ko dë taa a ko abi ën fanöudu. Kandë di data bi mëni taa Bob bi o piki woto fasi, u di dee sëmbë fëën an bi sai dë. Ma Bob bi hoi gingin. A bi piki di data taa de an bi musu dëën buuu, aluwasi andi bi o pasa.

10. Faandi mbei di fasi fa libisëmbë ta si soni dë kuma wan taapu? (1 Kolenti 3:19, 20)

¹⁰ A ta suku u tooka di pakisei fuu. Ee u luku a dee sëmbë dee na ta piki Jehovah buka, nöö useei sa bia baka da Jehovah ku dee wëti fëën tu. (Lesi 1 Kolenti 3:19, 20.) „Di köni u di goonliba aki” lo’ u ganjan sëmbë puu a Gadu pasi. Wantu Keesitu sëmbë u di foto Peegamu ku di foto Tiatila, bi ko ta si soni kuma dee sëmbë u dee foto dë. De an bi ko ta si fanafiti libi ku di dini di sëmbë bi ta dini poipoi gadu, kuma hogi soni möön. Jesosi bi manda sëmbë go bai de, u di de an bi ta si fanafiti libi kuma hogi soni (Ako. 2:14, 20). A di ten aki, sëmbë ta suku u mbei u ko ta si soni a wan fasi di an bunu. Dee famii fuu ku dee sëmbë dee u sabi, sa suku u mbei u pasa Gadu buka. De sa piki u taa wa a’ fu tei di biibi hebi sö. De sa taki tu taa aan toobi ee u du andi hati fuu ta manda u fuu du, söseei de sa taki tu taa dee soni dee sikifi a di Bëibel an dë da di tën fuu aki möön.

11. Ku andi u musu ta köni, te u ta hoi useei gingin a di biibi?

¹¹ So juu u sa ta si kuma Jehovah an ta piki u so soni gbelingbelin tjika, nasö u sa fii fuu ’tei woto wëti möön leki dee wëti dee a da u’ (1 Kol. 4:6). Di soni dë dee hedima u keiki u di ten u Jesosi bi ta du. De bi ta buta u deseei wëti ko a dee u Gadu dendu, nöö di soni dë bi ta mbei di Wëti bi ta hebi da dee sëmbë (Mat. 23:4). Jehovah ta tei di Wöutu fëën ku di ölganisaasi fëën u piki u gbelingbelin andi u musu du. Fëën mbei wa musu buta woto soni ko a liba (Nöng. 3:5-7). Fuu taki ën, nöö wa ta buta woto wëti möön leki dee wëti dee sikifi a di Bëibel, söseei wa ta buta wëti a soni da dee baaa ku dee sisa fuu ee di Bëibel an buta wëti a de.

12. Unfa Saatan ta suku u mbei sëmbë ko ta biibi „dee sösö lei u di goonliba aki”?

¹² A ta suku u ganjan u. Saatan ta suku u ganjan u „ku dee sösö lei u di goonliba aki”, söseei a ta suku u ganjan u ku soni di kumutu a „dee makiti dee ta tii goonliba” (Kol. 2:8). A di ten di pasa, dee soni aki bi dë fasi u si soni, lei di an bi sikifi a di Wöutu u Gadu, ku di lei di sëmbë bi ta lei wotowan taa Keesitu sëmbë musu hoi di Wëti u Mosesi. Dee soni dë bi dë ganjanganjan soni, u di de bi ta puu sëmbë pakisei a Jehovah, di Sëmbë ka tuutuu köni ta kumutu. A di ten aki, Saatan ta wooko ku Internet, söseei ku soni kuma teefei ku ladio, u mbei sëmbë biibi taa dee tiima nasö woto ölganisaasi, de ta mbei so soni ta pasa. U bi si di soni dë sömëni pasi a di pisiten di di kolona siki bi ta paaja.c Dee baaa ku dee sisa dee bi du soni kumafa di ölganisaasi u Jehovah bi ta piki de, an bi ta booko de hedi kuma dee sëmbë dee bi ta haika ganjanganjan soni.​—Mat. 24:45.

13. Faandi mbei u musu ta köni ku soni di sa puu u pakisei a Jehovah?

¹³ A ta suku u puu u pakisei a Jehovah. Wa musu ta puu mëni a „dee möön fanöudu soni” (Fil. 1:9, 10). Te u ta buta pakisei a soni di an dë fanöudu, nöö u sa lasi hia ten ku kaakiti. Soni di u guwenti u du, sa puu u pakisei a Jehovah ee u ta buta pakisei a de gaanfa poi. Dee soni dë sa dë soni kuma wooko, di piizii di u ta piizii, nasö di njan di u ta njan ta bebe (Luk. 21:34, 35). Boiti di dë, hiniwan daka u ta jei fa sëmbë ta hopo ta ligei, nasö fa politikima ta fia ku deseei. Wa musu mbei dee soni dë puu u pakisei a Jehovah. Ee nasö u sa bigi tei sëmbë së a u hati ku u fusutan. Saatan ta wooko ku hii dee soni dee u taki u de a di woto aki, u tapa u fu wa du soni kumafa u musu du soni. Boo luku andi u sa du fuu sa hoi gingin, be an feni u ganjan.

UNFA U SA DU FUU HOI GINGIN A DI BIIBI?

14. Andi da wan soni di sa heepi u fuu hoi gingin a Jehovah së?

¹⁴ Pakisei di buta di i buta i libi a Jehovah maun, hën i dopu. I du dee soni dë, u di i bi kë dë a Jehovah së. Mëni andi bi heepi i fii bi ko dë seiki taa i feni di tuutuu lei. I bi lei soni u Jehovah, hën i ko lobi ën, i ko ta lesipeki ën, söseei i ko ta si ën kuma di Tata fii di dë a liba ala. I bi ko abi biibi, hën i bi kë du soni woto fasi. I bi disa dee soni dee Jehovah an lobi, hën i bigi du soni di ta kai ku ën. I bi wai seei di i bi ko si taa Jehovah Gadu bi da i paadon (Ps. 32:1, 2). I bi ko nango a dee komakandi, hën i bigi konda dee soni dee i bi ta lei da wotowan. Bakaten i bi buta i libi a Gadu maun, hën i dopu. Nöunöu i ta waka a di pasi di ta mbei sëmbë feni libi, nöö ja kë na wan soni puu i a di pasi aki.​—Mat. 7:13, 14.

15. Faandi mbei u ta feni wini te u ta öndösuku soni, ta kai pakisei a de?

¹⁵ Öndösuku di Wöutu u Gadu, nöö i kai pakisei nëën. Leti kumafa wan pau sa hoi a pë ee dee lutu fëën go fundu a goonbasu, sö nöö u sa hoi gingin ee u abi wan taanga biibi. Te wan pau ta göö, nöö dee lutu fëën ta paaja nango, söseei de nango möön fundu a goonbasu. Te u ta öndösuku di Wöutu u Gadu, ta kai pakisei nëën, nöö di biibi fuu ta ko möön taanga, söseei u ta ko dë möön seiki taa a dë fanöudu fuu du soni kumafa Gadu kë (Kol. 2:6, 7). Pakisei fa dee soni dee Jehovah bi taki, bi heepi dee dinima fëën a di ten di pasa. Di Ezekiëli bi si wan wojolimbo sunjan ka wan ëngëli bi ta maaka di Wosu u Gadu, hën a bi buta hii hën pakisei a di soni dë. Di wojolimbo sunjan dë bi da Ezekiëli taanga, nöö a ta lei u unfa u sa dini Jehovah a wan limbolimbo fasi kumafa a këd (Eze. 40:1-4; 43:10-12). Useei ta feni wini tu te u ta tei ten ta öndösuku di Wöutu u Gadu, ta kai pakisei a dee woto dee taanga u fusutan.

16. Unfa di buta di Baaa Bob bi buta nëën hati taa a bi o hoi dou, bi heepi ën? (Psalöm 112:7)

¹⁶ Buta a i hati taa joo hoi dou. Könu Dafiti bi lei unfa a lobi Jehovah tjika. A bi taki a wan kanda taa: „Gadu o, mi o ta lobi i go dou ku hii mi hati” (Ps. 57:7). Useei sa buta a u hati taa woo hoi dou, te u ta futoou Jehovah ku hii u hati. (Lesi Psalöm 112:7.) Boo luku unfa di soni dë bi heepi Baaa Bob, di u bi taki soni fëën a fesi. Di de bi piki ën taa de bi o dë ku buuu a zuntu dë, fu ee hën de ko abi ën fanöudu, hën a bi piki de wantewante taa ee de o kë dëën buuu, nöö a bi o kumutu a di hatiwosu wantewante dë. Bakaten Bob bi taki taa: „Mi bi sabi kaa andi mi bi o du, nöö ma bi ta booko mi hedi ku andi bi sa pasa.”

17. Andi u sa lei a di woto u Baaa Bob? (Luku di peentje tu.)

¹⁷ Baaa Bob bi hoi gingin di a bi go a hatiwosu, u di a bi buta da hënseei kaa andi a bi o du. Di fosu soni, hën da a bi kë mbei Jehovah wai. Di u tu soni, hën da a bi tei ten öndösuku di Bëibel ku de woto buku dee ta taki taa buuu ku libi da santa soni. Di u dii soni, hën da a bi dë seiki taa ee a bi hoi di wëti u Jehovah, nöö Jehovah bi o mbei a feni gaan bunu. Useei sa hoi gingin a di biibi, aluwasi un pei tesi ta miti u.

18. Unfa di woto u Balaki ta lei u taa u musu ta futoou Jehovah? (Luku di peentje u di kafiti.)

¹⁸ Futoou Jehovah. Luku fa soni bi waka bunu da di dinima u Gadu de kai Balaki, u di a bi futoou Jehovah. A di ten dë, na wan fetilai bi dë a Isaëli. Ma Jehovah bi manda Balaki faa go feti ku di hedima u dee sodati u Kaana. Di hedima dë, de bi ta kai Sisela, nöö dee sodati fëën bi abi sömëni fetilai (Kuutm. 5:8). Di mujëë tjabukama u Gadu de kai Debola, bi piki Balaki faa saka kumutu a dee kuun hedi go feti ku Sisela a palala goon. Sisela bi dë ku 900 fetiwagi. Hii fa a bi o möön taanga da dee Isaëli sëmbë u de feti ku dee Kaana sëmbë ee dee fetiwagi u de bi dë a palala goon, tökuseei Balaki bi du soni kumafa de piki ën. Di dee sodati u Isaëli bi ta saka di kuun de kai Taboli, hën Jehovah mbei wan gaan tjuba kai. Dee fetiwagi u Sisela bi peka a pötöpötö, hën Jehovah mbei Balaki wini di feti (Kuutm. 4:1-7, 10, 13-16). Wë sö nöö Jehovah o mbei u wini ee u futoou ën, nöö u du dee soni di di ölganisaasi fëën ta piki u.​—Deto. 31:6.

MBEI MÖITI BE JA DISA MÖÖNSÖ

19. Faandi mbei i kë hoi gingin a di biibi?

¹⁹ Solanga u dë a di goonliba aki, a o dë fanöudu fuu ta mbei möiti be wa disa (1 Tim. 6:11, 12; 2 Pet. 3:17). Boo mbei möiti fuu hoi dou te sëmbë ta du ku u, te de ta suku u mbei u du soni di an bunu, te de ta suku u tooka di pakisei fuu, te de ta suku u ganjan u, söseei te de ta suku u puu u pakisei a Jehovah (Ef. 4:14). Boo mbei möiti fuu hoi gingin a di biibi. Be wa disa Jehovah ku dee wëti fëën möönsö. Boiti di dë, u kë mbei möiti fu wa ta suku fini a soni poi. A di woto di ta ko, woo taki u soni di ta lei gbelingbelin, taa Jehovah ku Jesosi an ta suku fini a soni poi.