WOTO 40
Unfa u sa dë limbolimbo a Gadu wojo?
Pakisei wan mama di ta seeka di womi mii fëën faa go a siköö. Di mama ta sölugu taa di mii fëën wasi, dee lai fëën dee a o bisi dë bumbuu, söseei taa de dë limbolimbo. Di soni aki ta mbei taa di mii dë gösöntu, söseei woto sëmbë ta si taa hën mama ku hën tata ta sölugu ën bunu. Sö nöö di lobihati tata fuu Jehovah, kë fuu ta dë limbolimbo tu. U sinkii ku dee soni fuu dee u abi musu ta dë limbolimbo, söseei di fasi fa u ta libi musu dë limbolimbo nëën wojo. Te u dë limbolimbo, nöö useei ta feni wini fëën, söseei woo tja gafa ko da Jehovah.
1. Andi ku andi u sa du fuu sa dë limbolimbo?
Jehovah ta piki u taa: „U musu dë santa” (1 Petuisi 1:16). Ee u kë dë santa, nöö u sinkii ku hii woto soni fuu musu ta dë limbolimbo, söseei di fasi fa u ta libi musu ta kai ku Gadu. Woo ta dë limbolimbo te u ta wasi hii juu, te u ta bisi limbolimbo lai, te u ta seeka di kamian ka u ta libi, söseei te u ta seeka di wagi fuu. U sa ta heepi seeka di Könuköndë zali fuu faa ta dë limbolimbo tu. Te u ta mbei möiti u ta dë limbolimbo hii juu, nöö u ta tja gafa ko da Jehovah.—2 Kolenti 6:3, 4.
2. Un guwenti u musu disa fuu sa dë limbolimbo a Gadu wojo?
Di Bëibel ta da u taanga fuu „disa dee soni dee ta poi u hati ku . . . u sinkii” (2 Kolenti 7:1). Fëën mbei u ta mbei möiti u disa hiniwan soni di sa poi u sinkii ku u pakisei. U di dee soni dee u ta pakisei musu ta kai ku Jehovah, mbei u musu mbei hii möiti fu wa ta pakisei soni di an bunu (Psalöm 104:34). U ta mbei möiti tu, fu wa ta taki soni di an ta kai ku Gadu.—Lesi Kolosën 3:8.
Andi da woto soni di sa mbei wa dë limbolimbo a Gadu wojo möön? So soni dë di an bunu da u sinkii dendu. Fëën mbei u ta köni ku soni kuma tabaku, di hai di sëmbë ta hai dodoba nasö woto pei taku tabaku. Te u ta köni ku dee soni aki, nöö woo dë gösöntu, söseei woo lei taa u ta si di libi di Gadu da u u gaan soni. Boiti di dë, u ta mbei möiti fuu dë limbolimbo a Gadu wojo tu, te u ta koti pasi da guwenti di an bunu. Kuma di pëë di sëmbë ta pëë ku de sen kamian, nasö di luku di sëmbë ta luku fanafiti soni u womi ku mujëë (Psalöm 119:37; Efeise 5:5). A sa taanga da u fuu disa dee lö guwenti aki, ma Jehovah sa heepi u fuu disa de.—Lesi Jesaaja 41:13.
WOTO SONI DI I SA LEI
Woo luku unfa di seeka di u ta seeka u sinkii, ku dee soni fuu dee u abi u de ta dë limbolimbo ta tja gafa ko da Jehovah, söseei woo luku unfa u sa disa guwenti di an bunu.
3. Te u ta seeka useei fuu ta dë limbolimbo, nöö u ta tja gafa ko da Jehovah
Te u ta lesi dee wëti di Jehovah bi da dee Isaëli sëmbë, nöö de ta heepi u fuu ko si taa di dë di wan sëmbë musu ta dë limbolimbo da wan gaan fanöudu soni a Jehovah wojo. Lesi Ëkisodesi 19:10 ku 30:17-19, nöö piki dee hakisi aki:
Te u luku dee tëkisi aki, nöö unfa Jehovah ta si di dë di wan sëmbë musu ta dë limbolimbo?
Andi ku andi i sa du fii ta dë limbolimbo hii juu?
U musu mbei taanga möiti fuu ta dë limbolimbo hii juu. Nöö di soni aki ta tei ten. Aantoobi naasë u ta libi, nasö ee u gudu nasö pooti, ma hii u tuu sa mbei möiti fuu ta dë limbolimbo. Pëë di FËLÖN, nöö piki di hakisi aki.
Unfa di dë di woo ta dë limbolimbo o heepi dee sëmbë dee u ta peleiki da, u de kë haika di bosikopu di u ta tja?
4. Disa guwenti di an bunu
Jehovah sa heepi u fuu disa guwenti di an bunu
Ee i ta sumuku nasö ee i ta hai tabaku, nöö kandë i ta fusutan unfa a taanga tjika u disa di guwenti dë. Andi sa heepi i? Pakisei andi di soni dë ta du ku i. Lesi Mateosi 22:37-39, nöö taki unfa di sumuku di sëmbë ta sumuku tabaku nasö taku tabaku . . .
sa poi di dë di wan sëmbë dë mati ku Jehovah.
sa poi wan sëmbë ku dee famii fëën nasö woto sëmbë.
Luku andi i sa du fii disa wan guwenti di an bunu.a Pëë di FËLÖN.
Lesi Filipi 4:13, nöö piki di hakisi aki:
Unfa di begi di wan sëmbë o ta begi, di lei di a o ta lei soni u Bëibel, ku di go di a o nango a dee komakandi hii juu, sa heepi ën u disa wan guwenti di an bunu?
5. Mbei möiti u na pakisei soni di an bunu, söseei u na du soni di an bunu
Lesi Kolosën 3:5, nöö piki dee hakisi aki:
Unfa u du sabi taa Jehovah an lobi di luku di sëmbë ta luku fanafiti soni u manu ku mujëë, di manda di sëmbë ta manda pënëpënë footoo u de da wotowan, ku di pëë di sëmbë ta pëë ku de sen kamian?
I si kuma woo sa libi a wan fasi di ta kai ku Jehovah kumafa a kë u? Faandi mbei i taki sö?
A di fëlön aki, joo si andi sa heepi i u na pakisei soni di an bunu. Pëë di FËLÖN.
Jesosi bi konda wan woto u lei u andi ku andi u musu dë kabakaba u du fuu sa dë limbolimbo a Gadu wojo. Lesi Mateosi 5:29, 30, nöö piki di hakisi aki:
Jesosi an piki u fuu da useei makei tuutuu, ma a bi kë lei u taa u musu koti pasi da soni di sa tja hogi ko miti u. Andi wan sëmbë sa du fu an ta pakisei soni di an bunu?b
Jehovah ta tei ën u bigi seei taa i ta mbei möiti u na pakisei soni di an bunu. Lesi Psalöm 103:13, 14, nöö piki di hakisi aki:
Ee i ta mbei möiti u disa wan guwenti di an bunu, nöö unfa di tëkisi aki ta da i taanga fii mbei möiti go dou?
Go dou, na disa!
Ee i ta mbei möiti u disa wan guwenti di an bunu, hën i toona du ën baka, nöö kandë i sa pakisei taa: ’Mi wei kaa e, mi o disa.’ Ma pakisei di soni aki: Ee wan sëmbë di ta kule wan fia kule kai, nöö di soni dë an kë taki taa a lasi di fia kule, nasö taa a musu toona go bigi baka. So nöö a dë te i ta mbei möiti u disa wan guwenti di an bunu. A sa pasa taa i toona misi du ën baka, ma di soni dë an kë taki taa ja o sa disëën möönsö nasö taa ja o sa tooka. Söseei an kë taki tu taa hii dee möiti dee i bi ta mbei bi dë u sösö. Dee soni aki lo’ u pasa te i ta mbei möiti u disa wan guwenti di an bunu. Na ko wei! Jehovah o heepi i fii disa di guwenti dë di an bunu.
SO SËMBË TA TAKI TAA: „Sö mi dë kaa. A dë wan guwenti di mi abi, nöö ma sa disëën.”
Un tëkisi i sa lesi da di sëmbë u lei ën taa Jehovah sa heepi ën faa disa di guwenti dë di an bunu?
ANDI I LEI?
Te u ta seeka useei fuu ta dë limbolimbo, te u ta pakisei soni di bunu, ku te u ta tja useei a wan fasi di fiti, nöö libi fuu o ta kai ku Jehovah.
Andi i bi o piki?
Faandi mbei a dë fanöudu fuu ta dë limbolimbo?
Andi ku andi u sa du fuu sa ta dë limbolimbo?
Andi i sa du fii ta pakisei soni di bunu, söseei fii ta tja iseei a wan fasi di fiti?
WOTO SONI DI I SA LUKU
Luku di fëlön aki fii si andi ku andi i sa du fii ta dë limbolimbo aluwasi i da wan pooti sëmbë.
Lesi di woto aki fii si andi ku andi i sa du fii sa disa sumuku.
„Fa yu kan tapu nanga smoko” (Ontwaakt!, u sebitaa-liba 2010)
Lesi di woto aki fii si faandi mbei an bunu u luku fanafiti soni u womi ku mujëë.
„Porno—a ogri trutru?” (A Waktitoren, 1 u tanvuuwata-liba 2013)
Luku andi bi heepi wan womi u tapa ku di guwenti u luku fanafiti soni u womi ku mujëë.
„Mi fadon furu leisi, fosi mi wini a strei” (A Waktitoren Nö. 4 2016)
a A di pisi „Woto soni di i sa luku” i sa feni di woto „Fa yu kan tapu nanga smoko”. Di woto aki o heepi i fii si andi ku andi i sa du u disa sumuku.
b Lesi di woto aki „Fa mi kan tapu nanga a gwenti fu prei nanga mi syenpresi?” di dë a woto 25 u di buku Sani di yongusma e aksi—Piki di kan yepi den, Pisi 1, fii si andi sa heepi i fii duwengi iseei u na pëë ku i sen kamian.