Faandi mbei u ta gaandi ta dëdë?

Gadu bi piki Adam taa: „Di daka di joo njan di njanjan fëën, joo dëdë.” (Kenesesi 2:17) Ee Gadu bi mbei Adam faa ko gaandi, söseei faa dëdë, nöö an bi o dë faa piki ën di soni aki. Adam bi sabi taa ee an bi njan di fuuta, nöö an bi o dëdë.

Adam ku Eva an bi abi di fuuta fanöudu u dë a libi, u di di djai u Eden bi abi gaan hia fuuta pau (Kenesesi 2:9). Ee Adam ku Eva an bi njan di fuuta u di pau, nöö de bi o lei taa de ta haika di Sëmbë di da de libi. De bi o lei tu taa de ta si Gadu kuma di sëmbë di abi di leti u piki de andi de musu du.

FAANDI MBEI ADAM KU EVA DËDË?

Ee u kë fusutan faandi mbei Adam ku Eva dëdë, nöö u musu go luku wan woto di nama ku hii u tuu. Saatan Didibi bi tei wan sindeki u ganjan Eva. Di Bëibel ta taki taa: „U hii dee mbeti u matu di Jehovah Gadu bi mbei, di sindeki bi dë di mbeti di bi ta möön köni ku soni. Nöö hën a hakisi di mujëë taa: ’Mujëë o, a dë sö tuutuu taa Gadu taa wan musu njan dee fuuta u hii dee pau u di djai ö?’”​—Kenesesi 3:1.

Hën Eva piki ën taa: „Wë u sa njan dee fuuta u dee pau u di djai. Ma dee fuuta u di pau di dë a mindi u di djai, Gadu taa: ’Wan musu njan de kwetikweti, wan musu panjan di pau seei, nasö woon dëdë.’” Hën di sindeki piki ën taa: „Wan o dëdë seei. Biga Gadu sabi taa di daka di woon njan di pau njanjan dë, di daka dë seei wojo fuunu o limbo, nöö woon dë kuma Gadu seei, woon sabi andi da bunu ku hogi.” Ku di soni aki Saatan taki taa Jehovah bi ta ganjan Adam ku Eva, u di an bi kë u de feni bunu.​—Kenesesi 3:2-5.

Eva bi biibi di soni di a bi jei. A bi bigi ta luku di pau nöömö. A bi kai ku hën wojo seei! A tëndë maun, hën a booko wan fuuta tei, hën a bigi njan. Di Bëibel ta taki taa: „Bakaten, di hën manu ko dë ku ën, a dëën faa njan tu. Hën wë hën manu seei bia njan tu.”​—Kenesesi 3:6.

Gadu bi musu u ta tjali di a si taa dee mii fëën dee a bi lobi, pasa hën buka! Andi a du? Jehovah bi piki Adam taa: „Joo . . . dëdë toona go baka a goondoti, biga a doti i bi kumutu. Doti mi bi tei mbei i, nöö a goondoti joo toona go baka” (Kenesesi 3:17-19). Di soni aki mbei „Adam libi dou 930 jaa, hën a dëdë” (Kenesesi 5:5). Adam an bi go a Gadu a liba ala, söseei an bi go libi a wan woto kamian di dë kuma Gadu köndë. Adam an bi dë a na wan kamian ufö Jehovah bi mbei ën ku di goondoti. Fëën mbei di a dëdë, nöö a bi ko toon doti baka. Soni fëën bi kaba a mundu. Wan tjali soni seei hën miti ën dë!

FAANDI MBEI WA DË TELUTELU SÖNDÖ FÖUTU?

U di Adam ku Eva pasa Gadu buka ku deseei kë, mbei de lasi di telutelu libi u de ku di libi di de bi sa libi u teego. De an bi abi wan telutelu sinkii söndö föutu möön. De bi ko toon zöndu libisëmbë. Ma di de pasa Gadu buka, nöö na de wanwan bi fii ën. Hii dee mii u de seei bi o kisi zöndu tu. Loomë 5:12 ta taki taa: „Adam hën tja hogi du [zöndu] ko da hii sëmbë a goonliba aki e, nöö di hogi du [zöndu] tja dëdë ko. Hën wë mbei dëdë ko ta kii hii sëmbë te kisi tide, biga hii sëmbë tuu ta du hogi.”

Di Bëibel ta taki taa zöndu ku dëdë dë kuma ’wan gaan koosu di ta tapa hii sëmbë, söseei wan koosu di de nai tapa hii dee nasiön sëmbë u goonliba’ (Jesaaja 25:7). Di koosu aki dë kuma wan soni di ja sa tjubi da. A dë sö tuu taa „hii sëmbë musu dëdë fu di de da bakamii u Adam” (1 Kolenti 15:22). Leti kuma apösutu Paulosu, u ta hakisi useei: „Unfa seei mi o du te mi kumutu a di fuka aki basu? Ambë seei o puu mi?” Wan sëmbë sa puu u ö?​—Loomë 7:24.