Gaan hogi soni ta pasa te feti ta feti
Feti ta du gaan hogi ku sëmbë. A hii së u goonliba, dee sodati ku dee sëmbë dee ta libi a dee köndë ka feti ta feti, sabi unfa di soni dë hogi tjika.
DEE SODATI
„Peipei hogi soni ta pasa a i bandja. Sëmbë ta kisi gaan makei, söseei sëmbë ta dëdë. Hii juu seei i ta dë pantapanta.”—Gary, Ingisiköndë.
„Gonilai bi kisi mi a mi baka ku mi fesi tuu, söseei mi bi si fa de kii sömëni sëmbë, pikimii ku gaansëmbë tuu. Feti ta mbei taa ja ko a’ toobi ku hogidu ku dëdë möön.”—Wilmar, Kolombia.
„Te de suti wan sëmbë a i fesi, nöö ja sa ta fëëkëtë di soni dë möön. I ta jei di wolo ku di djëmë u di sëmbë a i fusutan nöömö. Ja ta fëëkëtë di sëmbë dë nöiti möön.”—Zafirah, Amëëkanköndë.
DEE SËMBË U DI KÖNDË
„Mi bi ta si kuma nöiti möön mi bi o sa dë waiwai. I ta fëëë taa i sa lasi i libi, ma boiti di dë, i ta fëëë taa dee famii fii ku dee mati fii seei sa lasi de libi tu.”—Oleksandra, Ukalaini.
„A 2 juu mamate te go miti 11 juu ndeti, nöö u bi ta taanpu ta wakiti fuu feni soni u njan, nöö u bi ta fëëë te na soni, u di wa bi sabi ee wan gonilai bi sa kisi u.”—Daler, Tajikistan.
„Feti mbei ma abi mama ku tata möön. Ma abi na wan sëmbë u luku mi möön.”—Marie, Luwanda.
Hii fa feti ta du gaan hogi ku sëmbë, tökuseei dee sëmbë dee u taki soni u de a aki, ko ta dë bööböö. Boiti di dë, de ko dë seiki taa abiti möön feti an o dë möön seei. Di Hei Wakitimawosu aki o tja di Bëibel ko a limbo da u, u heepi u fuu ko fusutan unfa di soni dë o pasa.