’Di Wöutu u Gadu abi kaakiti’

1. Andi ta mbei i biibi taa di Wöutu u Gadu abi kaakiti? (Luku di peentje a bigi u di woto.)

DEE sëmbë u Jehovah ta biibi taa di Wöutu fëën, nasö di bosikopu di a manda da libisëmbë, abi „kaakiti ku libi” (Hebelejën 4:12). U si unfa di Bëibel bi heepi u a di libi fuu, söseei u si unfa a heepi wotowan tu. Ufö u ko dë Kotoigi, nöö so fuu bi ta fufuu, so fuu bi ta hai taku tabaku, söseei so fuu bi ta libi fanafiti a di së u manu ku mujëë soni. So fuu bi dë gaan nëbai sëmbë, nasö u bi abi hia möni. Ma tökuseei u bi ta fii kuma wan soni ta makei a di libi fuu (Peleikima 2:3-11). Sömëni sëmbë an bi sabi andi de musu du ku de libi, ma nöunöu de ko sabi andi de musu du, söseei de ko sabi taa soni o waka bunu da de a di ten di ta ko. U bi lesi sömëni woto u sëmbë a di pisi di dë a di Waktitoren fuu de kai „Bijbel e kenki sma libi”. Ma aluwasi wan sëmbë ko dë Keesitu sëmbë seei, tökuseei a musu ta mbei di Bëibel heepi ën fu hën ku Jehovah ko dë möön gaan mati.

2. Unfa di kaakiti u di Wöutu u Gadu bi heepi sëmbë a di ten u dee fesiten Keesitu sëmbë?

² An ta bigi da u taa sömëni sëmbë ta tooka de libi te de ko sabi dee tuutuu lei u Bëibel. A di pisiten u dee fesiten Keesitu sëmbë, dee baaa ku dee sisa dee bi o go libi a Gadu köndë ala seei bi tooka soni a de libi tu (Lesi 1 Kolenti 6:9-11.) Paulosu bi taki u sëmbë di an o dë a di tii u Gadu basu, nöö a bi taki taa: „Sö so fuunu bi dë a fesi tu e.” Di Wöutu u Gadu, ku di santa jeje fëën, hën bi heepi dee sëmbë aki u de bia de libi. Ma hii fa de bi ko dë Keesitu sëmbë, tökuseei so u de bi mbei gaan föutu, di bi mbei de ku Jehovah an bi dë gaan mati möön. Di Bëibel bi taki u wan salufu baaa di de bi puu a di kemeente. Bakaten, hën a bi tooka soni nëën libi, sö taa de bi sa tei ën a di kemeente baka (1 Kolenti 5:1-5; 2 Kolenti 2:5-8). A ta da u taanga seei te u ta si taa dee baaa ku dee sisa fuu bi tooka sömëni soni a de libi, u di di kaakiti u di Wöutu u Gadu bi heepi de.

3. Fu un soni woo taki a di woto aki?

³ Di Wöutu u Gadu abi kaakiti seei. U di Jehovah hën da u ën, mbei u kë wooko ku ën a wan bunu fasi (2 Timoteo 2:15). A di woto aki woo taki u soni di u sa du, sö taa u mbei di kaakiti u di Wöutu u Gadu heepi u (1) a di libi fuu (2) a di peleikiwooko, ku (3) te u ta lei wotowan soni a dee komakandi. Dee soni dee woo luku o heepi u fuu lei taa u lobi di Tata fuu di dë a liba ala, söseei u lei taa u ta tei dee soni dee a ta taki da u u bigi. A dë wan Gadu di ta lei u soni sö taa u sa feni wini.​—Jesaaja 48:17.

DI LIBI FUU

4. (a) Andi u musu du sö taa di Wöutu u Gadu sa heepi u? (b) Unfa i ta seeka soni fii sa ta lesi di Bëibel?

⁴ Ee u kë taa di Wöutu u Gadu heepi u, nöö u musu ta lesi ën hii juu. U musu mbei möiti fuu ta lesi ën hiniwan daka (Josua 1:8). Gaansë fuu abi sömëni soni u du, ma wa musu mbei na wan soni tapa u fuu lesi di Bëibel. Na dee faantiwöutu fuu seei u musu mbei tapa u fuu du ën. (Lesi Efeise 5:15, 16.) Kandë u sa ta lesi ën a fuuku mamate, nasö a didia, nasö a ndeti. U ta fii kumafa di psalöm sikifima bi ta fii. A bi taki taa: „Mi lobi di wëti fii gaanfa seei! Hii di daka mi ta pakisei ën.”​—Psalöm 119:97.

5, 6. (a) Faandi mbei u musu ta pakisei fundu te u ta lesi di Bëibel? (b) Unfa u sa feni wini u di pakisei di u ta pakisei fundu? (c) Unfa di pakisei di i ta pakisei fundu u dee soni dee i ta lesi a di Bëibel bi heepi i?

⁵ Ma na lesi nöö u musu ta lesi di Bëibel. U musu ta pakisei fundu u dee soni dee u ta lesi tu (Psalöm 1:1-3). Te u ta du di soni aki ufö woo sa libi ku dee köni lai dee dë a di Bëibel. Fëën mbei aluwasi u ta lesi di Bëibel a tëlëfön nasö a woto soni, tökuseei u kë u di Wöutu u Gadu tooka di libi fuu, söseei u kë faa da u taanga u dini Gadu.

⁶ Unfa u sa feni wini u di pakisei di u ta pakisei fundu u di Wöutu u Gadu? Wë te u ta lesi di Bëibel, nöö u musu ta hakisi useei dee soni aki: ’Andi di soni aki ta lei mi u Jehovah? Undi u dee soni di mi ta lesi aki mi ta du kaa? Un soni mi musu tooka jeti?’ Te u ta pakisei fundu u di Wöutu u Gadu, söseei te u ta begi ën faa heepi u fuu fusutan dee soni dee u ta lesi, nöö woo kë du dee soni dee u ta lesi. Te u du sö, nöö nëën ufö woo ko sabi unfa di Wöutu u Gadu abi kaakiti tjika.​—2 Kolenti 10:4, 5.

DI PELEIKIWOOKO

7. Unfa u sa wooko ku di Wöutu u Gadu te u dë a di peleikiwooko?

⁷ Hii juu u musu ta wooko ku di Wöutu u Gadu te u ta du di peleikiwooko, söseei te u ta lei sëmbë soni u Bëibel. Wan baaa bi taki taa: „Ee ju ku Jehovah hën bi go peleiki a sëmbë pisi, nöö i wanwan bi o ta fan u, naa i bi o mbei Jehovah hën fan?” Te u ta lesi soni a Bëibel da wan sëmbë, nöö u ta mbei Jehovah fan ku ën. Di tëkisi di woo lesi da di sëmbë bunu möön hiniwan woto soni di u bi o taki (1 Tesalonika 2:13). I abi di guwenti u ta lesi Bëibel tëkisi da sëmbë te i dë a di peleikiwooko u?

8. Faandi mbei na lesi nöö u musu ta lesi Bëibel tëkisi da sëmbë a di peleikiwooko?

⁸ Ma na lesi nöö u musu ta lesi Bëibel tëkisi da dee sëmbë dee u ta peleiki da. Gaansë u sëmbë an ta fusutan andi dee soni dee sikifi a di Bëibel kë taki. Di soni aki bi dë sö a di ten u dee fesiten Keesitu sëmbë, nöö sö a dë a di ten fuu aki tu (Loomë 10:2). Wa musu ta hoi nöö taa di sëmbë fusutan di tëkisi di u lesi dëën. U sa heepi di sëmbë faa fusutan di tëkisi, te u ta toona taki dee fanöudu soni u di tëkisi dëën, nöö u konda dëën andi dee soni dë kë taki. Te u ta du sö, nöö sëmbë o fusutan di Wöutu u Gadu, nöö a o dou de hati.​—Lesi Lukasi 24:32.

9. Andi u sa taki da wan sëmbë u heepi ën faa ko abi lesipeki da di Bëibel, ufö u lesi wan Bëibel tëkisi dëën?

⁹ Dee soni dee woo taki ufö u lesi di Bëibel tëkisi da wan sëmbë, sa heepi ën faa ko abi lesipeki da di Bëibel tu. Kandë u sa taki taa: „Boo luku andi di Gadu di mbei u ta taki u di soni aki.” Nasö ee u ta fan ku wan sëmbë di an ta biibi a Jesosi, nöö u sa taki taa: „Boo luku andi wan santa Buku ta taki.” Ee u miti wan sëmbë di an ta pena booko hën hedi ku keiki soni seei, nöö u sa hakisi ën taa: „I bi jei di fan aki wan daka kaa u?” Ee u ta hoi a pakisei taa hiniwan sëmbë abi hën guwenti, ku soni di a ta biibi, nöö woo du hii soni di u sa du, sö taa u sa hai di sëmbë pakisei.​—1 Kolenti 9:22, 23.

10. (a) Unfa soni bi waka da wan baaa? (b) I bi si unfa di kaakiti u di Wöutu u Gadu bi heepi sëmbë a di peleikiwooko kaa u?

¹⁰ Sömëni peleikima ko si taa te de ta wooko ku di Wöutu u Gadu a di peleikiwooko, nöö a ta heepi dee sëmbë gaanfa seei. Wan baaa bi go luku wan tata di ta lesi dee buku fuu sömëni jaa kaa. Wan daka, di di baaa bi go luku ën, hën a lesi wan Bëibel tëkisi dëën, ka faa dëën di buku nöö. A bi lesi 2 Kolenti 1: 3, 4, di ta taki taa: ’Gadu seei da u Tata, nöö a abi tjalihati fuu. Nëën hii kötöhati ta kumutu . . . nöö hën ta heepi u fuu feni kötöhati.’ Di tëkisi bi dou di tata hati seei, hën a hakisi di baaa faa toona lesi di tëkisi dëën baka. Hën di tata taki taa hën ku hën mujëë bi abi kötöhati fanöudu tuutuu. Di tëkisi aki mbei di tata bi kë ko sabi möön soni u Bëibel. Te u ta wooko ku di Wöutu u Gadu a di peleikiwooko, nöö a ta dou sëmbë hati seei!​—Tjabukama 19:20.

TE U TA LEI WOTOWAN SONI A DEE KOMAKANDI

11. Un faantiwöutu dee baaa dee ta lei wotowan soni a dee komakandi fuu abi?

¹¹ U lobi dee komakandi fuu, söseei u lobi dee keling komakandi ku dee könklësi tu. Di möön gaan soni mbei u nango a dee komakandi aki, hën da fuu dini Jehovah. U ta feni wini a dee soni dee u ta lei tu. Fëën mbei dee baaa dee ta lei wotowan soni a dee komakandi aki abi wan gaandi, ma de abi wan gaan faantiwöutu tu (Jakobosi 3:1). Dee soni di de ta lei wotowan musu kumutu a di Wöutu u Gadu. Ee i abi di gaandi aki tu, nöö unfa i sa wooko ku di kaakiti u di Wöutu u Gadu u dou sëmbë hati?

12. Andi wan baaa sa du sö taa di taki fëën kumutu a di Wöutu u Gadu?

¹² Te wan baaa ta hoi wan taki, nöö ku di Wöutu u Gadu a musu ta wooko möön gaanfa (Johanisi 7:16). Fëën mbei i musu ta köni be dee woto dee i ta konda a di taki fii an hai sëmbë pakisei möön gaanfa möön di Bëibel. Nöö hoi a pakisei taa te i ta lesi wan tëkisi a di Bëibel da sëmbë, nëën da i ta lei sëmbë soni ku di Bëibel. Wë biga ee i ta lesi hia tëkisi poi, nöö gaansë u sëmbë an o sa toona mëni de. Fëën mbei i musu luku un tëkisi joo lesi. Tei ten u lesi de, nöö i puu de da dee haikama. Konda wan woto u heepi de u de fusutan de, söseei piki de unfa de sa du dee soni dee sikifi a dee tëkisi (Nehemia 8:8). Ee di taki fii dë a pampia, nöö lesi ën bunu, nöö i luku hii dee tëkisi dee sikifi a di pampia. Mbei möiti fii ko fusutan unfa dee tëkisi nama ku di taki fii. Lesi wantu u dee tëkisi aki di o sa heepi dee sëmbë u de fusutan di taki fii. (I sa feni lai a woto 21, 22 ku 23 u di buku Kisi wini fu a Theokrasia Diniwroko-skoro.) Ma di möön fanöudu soni, hën da i musu begi Jehovah faa heepi i fii lei wotowan dee gudu dee dë a di Wöutu fëën.​—Lesi Ësala 7:10; Nöngö 3:13, 14.

13. (a) Unfa wan sisa bi fii di de bi lesi wan tëkisi a komakandi? (b) Unfa wan tëkisi di de bi lesi a wan komakandi bi heepi i?

¹³ Wan sisa di ta libi a Ösutualia bi miti sömëni soni nëën libi di a bi dë miii, nöö hii fa a bi ko sabi Jehovah bakaten, tökuseei an bi sa kaba biibi taa Jehovah lobi ën tuutuu. Di di sisa aki bi dë a wan komakandi, hën de bi lesi wan tëkisi di bi dou hën hati. A bi go pakisei fundu fëën, nöö a bi go öndösuku di tëkisi. Di soni aki bi mbei a bi go lesi woto Bëibel tëkisi tu. A bi ko si taa Jehovah lobi ën tuutuu.a (Luku di pisi a basu.) I bi jei wan tëkisi a wan komakandi, nasö a wan keling komakandi, nasö a wan könklësi, di bi dou i hati sö tu ö?​—Nehemia 8:12.

14. Unfa u sa lei taa u lobi di Wöutu u Jehovah, söseei taa u ta tei ën u bigi?

¹⁴ U dë ku tangi a hati seei taa Jehovah da u di Wöutu fëën, di Bëibel. A bi paamusi u taa di Wöutu fëën o dë u nöömö, nöö a du ën tu (1 Petuisi 1:24, 25). Fëën mbei u musu ta lesi di Bëibel hiniwan daka, u musu ta du dee soni dee u ta lesi nëën, söseei u musu ta tei ën u heepi wotowan. Te u ta du sö, nöö u ta lei taa u lobi di gudu di Jehovah da u aki, söseei taa u ta tei ën u bigi. Boiti di dë, u ta lei taa u lobi Jehovah Gadu tu, söseei taa u ta tei dee soni dee a ta du da u u bigi.