Oktober

Yu feni en muilek son leisi fu gi yesi? Kownu David ben feni en muilek son leisi fu gi yesi. Dati meki a begi Gado: „Yepi mi, so taki mi kan de klarklari fu gi yesi na yu” (Ps. 51:12). David ben lobi Yehovah. Ma tòg David ben feni en muilek son leisi fu gi yesi, èn son leisi a muilek gi wi tu fu gi yesi. Fu san ede? A fosi reide, na fu di wi kisi sondu meki a e psa makelek taki wi no wani gi yesi. A di fu tu reide, na taki Satan e pruberi fu meki wi opo wisrefi teige Gado, leki fa en ben du (2 Kor. 11:3). A di fu dri reide, na taki a yeye fu a grontapu disi „de na ini den sma di e trangayesi Gado” èn dati meki furu sma lobi opo densrefi teige Gado (Ef. 2:2). Fu dati ede wi musu du tranga muiti fu feti nanga wi sondu skin, nanga Didibri, èn nanga a grontapu disi fu man tan gi yesi na Yehovah nanga den sma di a poti fu teki fesi. w23.10 6 ¶1

San wi kan leri fu a wondru di Yesus du fu meki watra tron win? Wi e leri taki wi musu abi sakafasi. Yesus no ben meki bigi fu a wondru di a du. Fu taki en leti, noiti a meki bigi fu den sani di a ben du. Na presi fu dati, a ben abi sakafasi èn ibri leisi baka a gi en Papa ala glori nanga grani (Yoh. 5:19, 30; 8:28). Efu wi abi sakafasi neleki Yesus, dan wi no o denki tumsi furu fu wisrefi. Disi o meki taki wi no o meki bigi fu nowan sani di wi du. Wi no musu meki bigi fu den sani dati, ma wi musu meki bigi fu a makti Gado di wi mag anbegi (Yer. 9:23, 24). Wi musu gi en a grani di a musu kisi. Wi no man du noti efu Yehovah no e yepi wi (1 Kor. 1:26-31). Efu wi abi sakafasi, dan wi no abi fu meki sma kon sabi san wi du gi trawan. Wi breiti kba fu sabi taki Yehovah e si san wi du èn taki a e warderi den sani dati (Luku Mateyus 6:2-4; Hebr. 13:16.). A no de fu taki dati Yehovah o breiti nanga wi te wi e sori sakafasi neleki Yesus.​—1 Petr. 5:6. w23.04 4 ¶9; 5 ¶11-12

Nanga yepi fu a santa yeye, Gado meki na apostel Paulus gi den Kresten a dek’ati fu poti prakseri na den afersi fu trawan. Fa wi kan fiti a rai disi na den konmakandra? Na te wi e hori na prakseri taki trawan wani gi piki tu neleki wi. Prakseri a sani disi: Te yu e taki nanga den mati fu yu, dan yu ben o taki so furu dati den no ben o abi na okasi fu taki tu? Nôno, yu no ben o du dati. Yu wani den taki tu. Na so a de tu na den konmakandra. Wi wani gi so furu sma leki a kan na okasi fu gi piki. Fu taki en leti, wan fu den moro bun fasi fu gi wi brada nanga sisa dek’ati, na fu gi den na okasi fu taki fu a bribi fu den (1 Kor. 10:24). Efu wi e hori den piki fu wi syatu, dan ten o de so taki moro sma kan gi piki. Srefi efu yu gi wan syatu piki, sorgu taki yu no e taki fu ala den penti na ini yu piki. Efu yu e taki fu ala den penti na ini a paragraaf, dan furu no de gi trawan moro fu taki. w23.04 22-23 ¶11-13

Wi musu hori na prakseri o prenspari a de fu tan yepi trawan, spesrutu nanga yepi fu a preikiwroko. Wi musu man fiti wisrefi na ini a preikiwroko. Wi e miti sma fu difrenti bribi, di abi difrenti denki, èn di de fu difrenti presi nanga kulturu. Na apostel Paulus ben man fiti ensrefi èn wi kan leri fu na eksempre fu en. Yesus ben poti Paulus leki „wan apostel gi den trakondre sma” (Rom. 11:13). Dati meki Paulus ben preiki gi Dyu, Grikisma, konisma, pôtisma, tiriman, èn gi kownu. Fu di Paulus ben wani doro na ati fu den difrenti sma disi, meki a tron „ala sani gi ala sortu sma” (1 Kor. 9:19-22). Te a ben e taki nanga sma, dan a ben e hori na prakseri pe den ben e kmoto èn san den ben e bribi. Disi yepi en fu fiti ensrefi èn fu taki nanga ibri sma na wan fasi di ben o meki taki den wani sabi moro fu Gado. Wi o man preiki moro bun tu te wi e fiti wisrefi èn te wi e pruberi fu denki san na a moro bun fasi fu yepi ibri sma. w23.07 23 ¶11-12

Wan sma di abi safr’ati, tranga. A no swaki. Yu musu tranga fu man hori yusrefi te wan trawan e tyari yu na dorai. Safr’ati na wan fu „den fasi di a yeye e meki sma kisi” (Gal. 5:22, 23). Sma ben e gebroiki a Griki wortu di vertaal nanga „safr’ati” te den ben e taki fu wan wildri asi di sma tém. Pruberi fu si dati na yu fesi. Awinsi wan asi tém, dati no wani taki dati a kon swaki. Sobun fa wi kan kon abi safr’ati, aladi na a srefi ten wi tranga? Wi kan kon abi a fasi disi, ma no nanga wi eigi krakti. Wan prenspari sani di kan yepi wi na begi. Wi musu aksi Gado fu gi wi en santa yeye so taki a kan yepi wi fu kon abi a moi fasi disi. Ondrofenitori e sori taki disi kan. Furu Kotoigi sori safr’ati di sma suku fu hartaki nanga den. Disi meki taki son sma bigin denki bun fu Kotoigi.​—2 Tim. 2:24, 25. w23.09 15 ¶3

Na ini wan fisyun di ben ferwondru na apostel Yohanes, a ben si 24 owruman na ini hemel di ben e anbegi Yehovah. Den ben prèise Gado èn den ben taki dati a warti fu kisi ’ glori, grani nanga makti’ (Openb. 4:10, 11). Getrow engel abi furu reide tu fu gi Yehovah grani. Den de na ini hemel nanga en èn den kon sabi en bun. Na ini den sani di a e du, den man si fa a de. Te den e si den sani di Yehovah e du, dan dati e naki den ati fu prèise en (Yob 38:4-7). Wi musu prèise Yehovah tu na ini den begi fu wi. Wi kan ferteri en san wi lobi fu en èn fu san ede wi e lespeki en. Te yu e leisi èn e studeri Bijbel, pruberi fu si den fasi fu Yehovah di yu feni moi (Yob 37:23; Rom. 11:33). Dan ferteri Yehovah san yu feni fu den fasi dati. Wi kan prèise Yehovah tu fu di a e yepi wi nanga ala wi Kresten brada nanga sisa.​—1 Sam. 2:1, 2. w23.05 3-4 ¶6-7

Na ini 1919, Babilon a Bigiwan no ben abi krakti moro tapu a pipel fu Gado. A yari dati wan „koni srafu di de fu fertrow”, bigin seti sani so taki moro ret’ati sma ben kan waka tapu „a Pasi fu Santafasi” (Mat. 24:45-47; Yes. 35:8). A wroko di den man ben du fu sreka na agersi pasi na ini a ten di psa, yepi sma di bigin waka tapu a pasi fu leri moro fu Yehovah nanga a wani fu en (Odo 4:18). Boiti dati den sma disi ben kan tyari kenki kon so taki den ben kan libi soleki fa Yehovah wani. Yehovah no ben ferwakti taki en pipel ben musu tyari ala den kenki kon na ini wán leisi. Na presi fu dati, a yepi en pipel safsafri fu tyari den kenki dati kon. Wi o breiti srefsrefi na ini a ten di e kon te wi o man plisi Yehovah na ini ala san wi e du. Efu sma wani taki wan pasi tan bun, dan den musu tan wroko na a pasi. Sensi 1919, sma tan wroko tapu „a Pasi fu Santafasi” so taki moro sma ben kan kmoto na ini Babilon a Bigiwan. w23.05 17 ¶15; 19 ¶16

A Tiri Skin srefi e train brada di e yepi nanga a wroko fu den difrenti komte fu a Tiri Skin. Nownow kba, den yepiman disi e tyari hebi frantwortu na wan getrow fasi. Wi kan de seiker taki den brada o man tan sorgu gi den skapu fu Krestes. Te den lasti salfuwan opo go na hemel na a kba fu a bigi banawtu, dan a pipel fu Yehovah dyaso na grontapu o tan anbegi en na wan getrow fasi. Noiti den o tapu fu du dati. A tru taki na a ten dati wan grupu fu kondre di Bijbel e kari Gok fu Magok, o kon feti nanga wi (Esek. 38:18-20). Ma a feti disi o de fu wan syatu pisi ten nomo, èn a no o abi bun bakapisi. Boiti dati, a no o man tapu a pipel fu Yehovah fu tan anbegi en. Yehovah o ferlusu den seiker! Na ini wan fisyun, na apostel Yohanes ben si a „bigi ipi” fu den tra skapu fu Krestes. Na engel ben taigi Yohanes taki a „bigi ipi” disi e kmoto „na ini a bigi banawtu” (Openb. 7:9, 14). Sobun, wi kan de seiker taki Yehovah o kibri den. w24.02 5-6 ¶13-14

San wi kan du fu kisi santa yeye? Wi kan begi fu kisi en, wi kan studeri a Wortu fu Gado di skrifi nanga yepi fu santa yeye èn wi kan horbaka gi na organisâsi fu en di a santa yeye e tiri. Te wi e du den sani disi, dan dati o yepi wi fu kon abi „den fasi di a yeye e meki sma kisi” (Gal. 5:22, 23). Gado e gi sma a yeye fu en soso te den e prakseri sani di krin èn te den e tyari densrefi na wan krin fasi. A no o gi wi en yeye moro efu wi e prakseri sani di no krin èn efu wi e du den sani dati (1 Tes. 4:7, 8). Efu wi wani tan kisi a yeye fu Gado, dan wi no musu „si den profeititori leki soso sani” (1 Tes. 5:20). Dyaso a wortu „profeititori” abi fu du nanga den boskopu di Gado e gi wi nanga yepi fu en santa yeye. Wan tu fu den boskopu disi abi fu du nanga a dei fu Yehovah èn a kba fu a grontapu disi di de krosbei. Wi no e denki taki a dei fu Yehovah, noso Armagedon, no o kon na ini a ten disi. Na presi fu dati, wi e ferwakti taki a dei dati o kon heri esi èn wi e tan hori en na prakseri. Dati meki wi e tan tyari wisrefi na wan fasi di fiti èn ibri dei wi e ’du sani di e sori taki wi e dini Gado fayafaya’.​—2 Petr. 3:11, 12. w23.06 12 ¶13-14

San wi leki Kresten musu du efu wantronso wan seks prenki de fu si tapu wi telefon noso tablet? Wi musu puru en wantewante. A o moro makelek gi wi fu du dati te wi e hori na prakseri taki a matifasi di wi abi nanga Yehovah na a moro prenspari sani gi wi. Fu taki en leti, son prenki di sma no e si leki porno, kan wiki den seksfiri fu wi. Fu san ede wi musu luku bun tu nanga den sortu prenki dati? Fu di wi no wani prakseri srefi fu du wan sani di kan meki taki wi fadon go na ini hurudu (Mat. 5:28, 29). David, wan owruman na ini Thailand, e taki: „Mi e aksi misrefi: ’Awinsi den prenki a no porno, Yehovah o breiti nanga mi efu mi e tan luku den?’ Te mi e aksi misrefi a sani disi, dan dati e yepi mi fu du san Yehovah feni bun.” Te wi e leri fu abi bigi lespeki gi Yehovah, dan dati e yepi wi fu no du sani di Gado no feni bun. Bigi lespeki gi Gado „na a bigin fu koni”. w23.06 23 ¶12-13

Kande den „kamra” abi fu du nanga den gemeente fu wi. Te a bigi banawtu doro, Yehovah pramisi taki a o kibri wi te wi e tan dini en makandra nanga wi brada nanga sisa. Fu dati ede a no sari fu de bun nomo nanga wi brada nanga sisa, ma wi musu du tranga muiti nownow fu abi bigi lobi gi den. Kande na dati o meki taki wi o man tan na libi! „A bigi dei fu Yehovah” o de wan muilek ten gi libisma (Sef. 1:14, 15). A pipel fu Yehovah o abi en muilek tu. Ma efu wi sreka wisrefi now, dan wi no o bruya èn wi o man yepi makandra. Wi o man hordoro awinsi sortu problema e miti wi. Te wi brada nanga sisa abi en muilek, dan fu di wi abi sar’ati gi den wi o du muiti fu yepi den nanga san den abi fanowdu. Èn efu wi leri fu sori lobi gi wi brada nanga sisa, dan wi o man tan lobi den na ini a ten di e kon. Te wi e du dati, dan Yehovah o blesi wi nanga têgo libi na ini wan grontapu pe wi o fergiti ala rampu nanga banawtu di ben miti wi.​—Yes. 65:17. w23.07 7 ¶16-17

Nofo tron te Gado Wortu e taki fu man di e dini Yehovah getrow, dan a e sori taki den ben de tranga dek’ati man. Ma tòg den man disi no ben e firi so ala ten. Fu eksempre, son leisi Kownu David no ben e frede noti èn a ben e „tnapu steifi”. Ma tra leisi baka a ben e „bruya srefsrefi” (Ps. 30:7). Aladi Simson ben tranga srefsrefi di Gado en yeye ben e wroko na en tapu, tòg a kon si taki efu a no ben kisi krakti fu Gado, a ben o ’kon swaki èn a ben o de neleki ala tra libisma’ (Krut. 14:5, 6; 16:17). Den getrow man disi ben tranga fu di Yehovah ben e gi den krakti. Na apostel Paulus ben sabi taki en srefi ben abi krakti fanowdu fu Yehovah (2 Kor. 12:9, 10). A ben e abi problema nanga a gosontu fu en (Gal. 4:13, 14). Ten na ten a ben muilek tu gi en fu du san bun (Rom. 7:18, 19). Èn son leisi a ben e frede san ben o psa nanga en (2 Kor. 1:8, 9). Ma tòg a de so taki di Paulus ben swaki, a kon tranga. Fa a du dati? Yehovah gi Paulus a krakti di a ben abi fanowdu fu hordoro di a ben e kisi tesi. w23.10 12 ¶1-2

Efu son leisi wi e firi leki wi no warti noti, a bun fu hori na prakseri taki na Yehovah srefi hari wi kon na en (Yoh. 6:44). A e si a bun na ini wi, srefi efu wi no e si dati èn a sabi wi moro bun leki fa wi sabi wisrefi (2 Kron. 6:30). Sobun, wi kan bribi en te a e taki dati wi warti gi en (1 Yoh. 3:19, 20). Den sani di sonwan fu wi du fosi wi kon leri sabi waarheid, kan meki taki wi e firi sari ete (1 Petr. 4:3). Srefi getrow Kresten e feti nanga den swakifasi fu den. Fa a de nanga yu? Yu e firi son leisi leki Yehovah no man gi yu pardon? Efu na so yu e firi, dan a o gi yu dek’ati fu sabi taki getrow futuboi fu Yehovah ben firi so tu son leisi. Fu eksempre, na apostel Paulus ben e firi brokosaka te a ben e prakseri den sondu di a ben du (Rom. 7:24). A no de fu taki dati Paulus ben sori berow fu den sondu fu en èn a teki dopu. Tòg a ben e si ensrefi leki „a moro pkinwan fu den apostel” èn leki a „a moro bigiwan fu den” sondari.​—1 Kor. 15:9; 1 Tim. 1:15. w24.03 27 ¶5-6

Wan sani di wi kan leri fu a don besroiti di Kownu Yoas ben teki, na taki wi musu suku mati di lobi Yehovah èn di wani prisiri en ati. Den sortu mati disi o yepi wi fu du bun sani. Wi kan de mati fu sma di moro owru noso moro yongu leki wi. Hori na prakseri taki Yoas ben yongu moro en mati Yoyada. Sobun, te a abi fu du nanga den mati di yu e suku, dan aksi yusrefi: ’Den e yepi mi fu tranga mi bribi na ini Yehovah? Den e gi yesi na Gado èn den e gi mi dek’ati fu du a srefi tu? Den e taki fu Yehovah èn fu den sani di den e leri fu Bijbel? Den e taigi mi san mi wani yere noso den no e frede fu gi mi rai te mi abi dati fanowdu?’ (Odo 27:5, 6, 17) Eigenlijk, efu den mati fu yu no lobi Yehovah, dan yu no abi den fanowdu. Ma efu yu abi mati di lobi Yehovah, dan tai hori na den fu di den o yepi yu ala ten.​—Odo 13:20. w23.09 9-10 ¶6-7

Alfa na a fosi letter fu a Griki alfabet èn omega na a lasti letter. Te Yehovah e taki dati en „na a Alfa nanga na Omega”, dan na so a e meki wi ferstan taki te a e bigin nanga wan sani, dan a e klari en tu. Baka di Yehovah meki Adam nanga Eva, a ben taigi den san a wani gi libisma nanga grontapu. Bijbel e taki: „Gado blesi den. Dan a taigi den: ’Meki pkin èn kon furu, teleki unu kon lai na grontapu èn basi ala sani na grontapu” (Gen. 1:28). Na a momenti dati, Yehovah ben taki krin san a ben abi na prakseri gi libisma nanga grontapu. Dati ben de a bigin noso na „Alfa”. Te ala sani kon tru precies soleki fa Gado abi na prakseri èn den pkin fu Adam nanga Eva di e gi yesi na En kon lai na grontapu èn den meki grontapu tron wan paradijs, dan dati o de na „Omega”. Baka di Yehovah meki „hemel, grontapu, nanga ala den sani na hemel èn na grontapu”, dan a taki wan sani fu sori taki a o du trutru san a abi na prakseri. Yehovah ben taki dati ala sani di a abi na prakseri gi libisma nanga grontapu, o kon tru na a kba fu a di fu seibi dei.​—Gen. 2:1-3. w23.11 5 ¶13-14

A pasi fu Babilon go na Israel ben o teki sowan fo mun èn a no ben makelek fu waka a pasi dati. Ma Yehovah ben pramisi den Dyu taki a ben o puru iniwan sani na tapu a pasi di ben kan meki en muilek gi den fu doro a kondre fu den. Den Dyu di ben lobi Yehovah ben sabi taki den blesi di den ben o kisi te den ben o drai go baka na Israel ben o bigi moro iniwan sani di den ben o libi na baka. A moro bigi blesi di den ben o kisi na taki den ben o man anbegi Yehovah drape. Nowan tempel fu Yehovah ben de na ini Babilon. Nowan altari ben de pe den Israelsma ben kan tyari den ofrandi soleki fa a Wet fu Moses ben sori èn nowan seti fu den priester ben de di ben musu tyari den ofrandi dati. Boiti dati bun furu sma na den lontu ben e anbegi falsi gado èn den no ben abi lespeki gi Yehovah nanga den wet fu en. Sobun dusundusun Dyu di ben lobi Yehovah no ben man wakti fu drai go baka na den kondre pe den ben kan seti a tru anbegi baka. w23.05 14-15 ¶3-4

Wi abi a yepi fanowdu fu Gado en santa yeye so taki wi kan tan tyari wisrefi leki „pkin fu a leti”. Fu san ede? Fu di a no makelek srefsrefi fu tan krin na ini a grontapu disi pe furu sma e tyari densrefi na wan fasi di no fiti kwetkweti (1 Tes. 4:3-5, 7, 8). Santa yeye kan yepi wi fu kakafutu gi a denki fu den sma na ini a grontapu disi di no e si sani soleki fa Yehovah e si sani. Santa yeye kan yepi wi tu fu tan waka na ini a leti fu di „a bakapisi fu a leti na ala sortu bun, retidu, nanga sani di tru” (Ef. 5:9). Wan fasi fa wi kan kisi santa yeye, na te wi e begi fu kisi en. Yesus ben taki dati Yehovah o „gi santa yeye na den sma di e aksi en” (Luk. 11:13). Èn te wi e prèise Yehovah na den Kresten konmakandra, dan wi e kisi santa yeye tu (Ef. 5:19, 20). A bun krakti di Gado en santa yeye abi na wi tapu o yepi wi fu libi na wan fasi di Gado feni bun. w24.03 23-24 ¶13-15

Yu abi moro pasensi fanowdu? Dan begi fu dati. Pasensi na wan fu den fasi di a yeye e meki sma kisi (Gal. 5:22, 23). Sobun, wi kan begi Yehovah fu gi wi en santa yeye èn wi kan aksi en fu yepi wi fu kweki a fasi disi. Efu wi kon de na ini wan situwâsi di kan meki wi lasi pasensi, dan wi kan „tan aksi” fu kisi a santa yeye di kan yepi wi fu abi pasensi (Luk. 11:13). Wi kan aksi Yehovah tu fu yepi wi fu si a situwâsi soleki fa en e si en. Baka te wi begi kba, wi musu du muiti fu abi pasensi ala dei. O moro wi e begi fu abi pasensi èn o moro wi e du muiti fu sori a fasi dati, o moro Yehovah o yepi wi fu abi pasensi, awinsi wi no ben de so fosi. A bun tu fu denki dipi fu Bijbel eksempre. Bijbel abi furu eksempre fu sma di ben abi pasensi. Te wi e denki dipi fu den eksempre dati, dan wi kan leri fa fu abi pasensi tu. w23.08 22 ¶10-11

Yesus ben taigi na apostel Petrus taki Yehovah ben o sorgu gi en. Baka di Yesus opo baka, a du ete wan wondru pe a meki Petrus nanga den tra apostel fanga furu fisi baka (Yoh. 21:4-6). A no de fu taki dati a wondru disi ben gi Petrus a dyaranti taki a de wan makelek sani gi Yehovah fu gi en san a abi fanowdu. Kande na apostel ben memre den wortu fu Yesus taki Yehovah ben o sorgu den wan di e tan ’suku a Kownukondre fosi’ (Mat. 6:33). Ala den sani disi yepi Petrus fu no poti a fisi bisnis tapu a fosi presi, ma a preikiwroko. Sondro fu frede a preiki tapu a dei fu a Pinksterfesa fu a yari 33, èn dati yepi dusundusun sma fu teki a bun nyunsu (Tori 2:14, 37-41). Baka dati a yepi den Samariasma nanga sma di no ben de Dyu fu tron bakaman fu Krestes (Tori 8:14-17; 10:44-48). A de krin taki Yehovah gebroiki Petrus na wan tumsi moi fasi fu tyari ala sortu sma kon na ini a gemeente. w23.09 20 ¶1; 23 ¶11

Tu yari baka di den Babilonsma pori Yerusalem, Kownu Nebukadnesar fu Babilon ben kisi wan dren fu wan bun bigi popki, di ben meki a frede srefsrefi. A kownu ben taki dati a ben o kiri ala den koniman, sosrefi Danièl, efu den no ben man taigi en san a ben dren èn san a dren ben wani taki (Dan. 2:3-5). Danièl ben musu du wan sani es’esi noso furu sma ben o dede. A „go aksi Kownu efu a ben kan gi en ten, so taki a ben kan sori en san a dren ben wani taki” (Dan. 2:16). Danièl ben musu abi dek’ati nanga bribi fu man du so wan sani. Fu san ede? Fu di Bijbel no e taki dati Danièl ben tyari dren kon na krin kba. A aksi den mati fu en fu begi „a Gado fu hemel fu abi sar’ati nanga den èn fu tyari a kibritori disi kon na krin” (Dan. 2:18). Yehovah piki den begi fu den. Gado yepi Danièl fu ferklari gi Nebukadnesar san a dren fu en ben wani taki. Na so Danièl nanga den mati fu en no dede. w23.08 2 ¶4

Prakseri den wini di wi o kisi te wi abi pasensi. Te wi abi pasensi, dan wi o de moro koloku èn moro rustig. Sobun, pasensi kan yepi wi fu abi wan moro bun gosontu. Te wi abi pasensi nanga trawan, dan wi o man libi moro switi nanga den. Disi o meki taki wánfasi de na ini wi gemeente. Efu wan sma kosi wi èn wi no e atibron esi, dan wi no o meki a problema kon moro bigi (Ps. 37:8; Odo 14:29). Ma san moro prenspari, na taki wi e teki na eksempre fu wi hemel Papa èn wi o kon moro krosbei na en. Pasensi na trutru wan moi fasi di e tyari wini kon gi wi. Aladi a no makelek ala ten fu abi pasensi, tòg wi kan tan meki muiti fu abi moro pasensi te Yehovah yepi wi nanga dati. Èn aladi wi e wakti a nyun grontapu, wi kan de seiker taki „Yehovah e poti prakseri na den sma di e lespeki en. A e poti prakseri na den wan di e wakti fu a sori den bun-ati” (Ps. 33:18). Meki a de so taki wi alamala e du muiti fu abi pasensi. w23.08 22 ¶7; 25 ¶16-17

Yakobus e sori taki wan man kan taki dati a abi bribi, ma den sani di a du no e sori taki a abi bribi (Yak. 2:1-5, 9). Yakobus e taki tu fu wan sma di si taki wan brada noso wan sisa fu en no abi krosi noso n’nyan, ma dan a no e du noti fu yepi en. Srefi efu a sma dati taki dati a abi bribi, tòg den sani di a e du no e sori dati (Yak. 2:14-16). Yakobus gebroiki na eksempre fu Rakab di sori nanga den sani di a du taki a abi bribi (Yak. 2:25, 26). Rakab ben yere fu Yehovah èn a kon ferstan taki Yehovah ben e horbaka gi den Israelsma (Yos. 2:9-11). Den sani di Rakab du ben e sori taki a ben abi bribi. A kibri tu Israel man di sma ben wani kiri fu di den ben kon luku a kondre. Dati meki Gado ben si na uma disi leki wan ret’ati sma, aladi a ben abi sondu èn a no ben de wan Israelsma. Na so a ben de tu nanga Abraham. Na eksempre fu Rakab e sori wi taki a de tumsi prenspari fu du sani fu sori taki wi abi bribi. w23.12 5-6 ¶12-13

Wi leki Kresten no wani ferstan soso den makelek sani fu Bijbel. Wi wani kon sabi „srefi den dipi sani fu Gado” èn wi kan du dati nanga yepi fu a santa yeye (1 Kor. 2:9, 10). Efu yu wani tron wan moro bun mati fu Yehovah, dan kande yu kan studeri wan spesrutu penti finfini. Fu eksempre, yu kan ondrosuku fa a sori lobi gi den futuboi fu en na ini owruten èn fa dati e sori taki a lobi yu tu. Yu kan studeri fa Yehovah seti sani so taki den Israelsma ben kan anbegi en èn yu kan agersi dati nanga den sani di a seti na ini a ten disi so taki yu kan anbegi en. Noso kande yu kan studeri den profeititori finfini di kon tru na a ten fu Yesus en libi nanga en diniwroko na grontapu. Yu o lobi fu studeri den tori dati te yu e gebroiki a buku Ondrosuku Bijbel moro fini​—Gi Yehovah Kotoigi. Te yu e studeri Bijbel finfini, dan dati kan tranga yu bribi èn „yu o kon leri sabi Gado”.​—Odo 2:4, 5. w23.10 18-19 ¶3-5

Na apostel Petrus taki dati wi musu lobi makandra ’nanga wi heri ati’. A lasti pisi fu a vers e sori san wi o du te wi lobi makandra na so wan fasi. Lobi e tapu den sondu fu wi brada nanga s’sa. Luku na eksempre disi: Kow taki dati yu abi wan tafra nanga omeni flaka nanga krabkrabu. Yu kan teki wan tafraduku fu tapu den flaka nanga den krabkrabu. Yu no o tapu wán noso tu nomo, ma yu o tapu alamala. Na so a de tu taki te wi lobi wi brada nanga s’sa nanga wi heri ati, dan nanga lobi wi o tapu den sondu fu den. Sobun, wi o gi den pardon. A no gi wán noso tu sondu nomo, ma gi „bun furu sondu”. A lobi di wi abi gi wi brada nanga s’sa musu tranga nofo so taki wi man gi den pardon fu den fowtu fu den. Wi musu du dati, awinsi a muilek son leisi (Kol. 3:13). Te wi e gi trawan pardon, dan wi e sori taki a lobi fu wi tranga èn Yehovah o breiti nanga wi. w23.11 11-12 ¶13-15

Di Kownu Yosia ben abi 26 yari, a bigin seti a tempel kon bun baka. Na a ten di den ben e du a wroko dati, sma feni „a wetbuku di Yehovah ben meki Moses skrifi”. Di den leisi a buku disi gi a kownu, a sani dati naki en ati so te taki wantewante a du san ben skrifi na ini a buku èn a tyari kenki kon (2 Kron. 34:14, 19-21). Yu ben o wani leisi Bijbel ibri dei? Kande yu e pruberi fu dati kba. Fa yu feni en? Yu lobi en? Yu e skrifi den tekst di kan yepi yu? Di Yosia ben abi sowan 39 yari, a meki wan fowtu di meki taki a dede. A fertrow tapu ensrefi na presi fu suku rai na Yehovah (2 Kron. 35:20-25). Wi kan leri wan sani fu disi. Awinsi o owru wi de noso awinsi o langa wi studeri Bijbel kba, wi musu tan du muiti fu kon krosbei na Yehovah. Disi wani taki dati wi musu abi a gwenti fu begi, fu studeri Bijbel, èn fu arki a rai fu lepi Kresten. Dan a no o psa so makelek taki yu meki bigi fowtu èn yu o de moro koloku.​—Yak. 1:25. w23.09 12 ¶15-16

Bijbel e taki fu furu uma di ben lobi Yehovah èn di ben e dini en. Den uma disi no ben e „du sani psa marki” èn den ben e ’sori na ala fasi taki den ben e gi yesi na Gado’ (1 Tim. 3:11). Boiti dati, den sisa kan luku na eksempre fu lepi Kresten uma na ini den eigi gemeente èn den kan leri furu fu den. Un yongu s’sa, un sabi wan tu lepi Kresten uma di de bun eksempre gi unu? Poti prakseri na den moi fasi fu den. Baka dati, luku fa yu kan sori den fasi dati. Efu wi wani de lepi Kresten, dan wi musu abi sakafasi. Efu wan uma abi sakafasi, dan a o de bun mati fu Yehovah èn fu trawan. Fu eksempre, wan uma di lobi Yehovah de klarklari fu gi yesi na a rai di skrifi na ini 1 Korentesma 11:3. A tekst disi e sori suma Yehovah gi a frantwortu fu teki fesi na ini a gemeente èn na ini na osofamiri. w23.12 18-19 ¶3-5

Yehovah e ferwakti taki wan masra lobi en wefi, taki a e sorgu gi en, taki a de wan bun mati fu en, èn taki a e yepi en fu tan krosbei fu Yehovah. Yu o man de wan bun masra te yu e leri fu gebroiki yu ferstan, te yu e lespeki umasma, èn te yu de fu fertrow. Baka te yu trow, dan kande yu o kisi pkin. San yu kan leri fu Yehovah efu yu wani de wan bun papa? (Ef. 6:4). Yehovah ben taigi en Manpkin Yesus na fesi ala sma taki a lobi en èn taki a feni en bun (Mat. 3:17). Efu yu tron wan papa, dan sorgu taki yu abi a gwenti fu taigi yu pkin taki yu lobi den. Prèise den furu tron gi den bun sani di den e du. Papa di e teki na eksempre fu Yehovah e yepi den pkin fu gro kon tron lepi Kresten man nanga uma. Nownow kba yu kan sreka yusrefi gi a frantwortu dati te yu e sorgu na wan lob’ati fasi gi den sma na ini yu famiri èn gi a gemeente. Wan tra fasi fa yu kan sreka yusrefi, na te yu e leri fu taigi den taki yu lobi den èn taki yu e warderi den.​—Yoh. 15:9. w23.12 28-29 ¶17-18

Aladi wi na getrow futuboi fu Yehovah, tòg wi e kisi problema èn wi e siki neleki ala tra sma. Boiti dati, a kan taki sma di de teige wi e gens wi noso den e ferfolgu wi. Yehovah no e kibri wi gi ala den problema disi, ma a pramisi taki a o yepi wi (Yes. 41:10). A o yepi wi fu tan de koloku, fu teki bun besroiti, èn fu tai hori na en, srefi te wi de na ini muilek situwâsi. Yehovah e pramisi fu gi wi wan sani di Bijbel e kari „a freide fu Gado” (Fil. 4:6, 7). A freide disi na a korostu firi di wi abi fu di wi na bun mati fu en. A freide disi „bigi moro iniwan sani di libisma man ferstan”. A e meki wi firi so bun taki wi no man bribi dati. Oiti a psa nanga yu taki yu ben firi korostu wantronso baka di yu begi Yehovah fayafaya? A korostu firi dati na „a freide fu Gado”. w24.01 20 ¶2; 21 ¶4

Den sma di lobi Yehovah wani prèise en nen nanga den heri ati. Kownu David ben sabi taki te wi e prèise a nen fu Yehovah, dan dati na a srefi leki te wi e gi grani na Yehovah. Te wi e yere a nen fu Yehovah, dan wi e prakseri a sma di a de, wi e prakseri ala den moi fasi fu en èn den moi sani di a du. David ben wani lespeki a santa nen fu en Papa èn a ben wani prèise a nen dati. A ben wani du dati nanga „ala sani na ini” en, noso nanga en heri ati. Den Leifisma ben abi a frantwortu tu fu prèise Yehovah. Den ben agri taki den sani di den ben e taki noiti ben kan gi nofo grani na a santa nen fu Yehovah (Neh. 9:5). A no de fu taki dati Yehovah ben e prisiri srefsrefi te den Leifisma ben e prèise en na a fasi dati. w24.02 9 ¶6

Yehovah no o denki takru fu yu efu yu no ben man doro wan marki di ben muilek tumsi gi yu fu doro (2 Kor. 8:12). Te yu no man doro a marki fu yu, dan a bun fu leri fu dati. Prakseri den marki di yu doro kba. Bijbel e taki dati „Gado no e du sani di no reti. Dati meki a no o fergiti a wroko di unu du” (Hebr. 6:10). Yu no musu fergiti dati tu. Prakseri den marki di yu doro kba. Kande yu tron wan bun mati fu Yehovah, kande yu e ferteri trawan fu en, noso kande yu teki dopu. Neleki fa yu go na fesi èn doro den marki di yu ben poti fosi, na so yu kan tan go na fesi fu doro den marki di yu poti now. Te Yehovah yepi yu, dan yu o man doro a marki fu yu. Yu kan prisiri tu te yu e pruberi fu si fa Yehovah e yepi yu te yu e meki muiti fu doro a marki fu yu (2 Kor. 4:7). Efu yu e tan meki muiti, dan yu o kisi moro bigi blesi.​—Gal. 6:9. w23.05 31 ¶16-18

Yehovah e suku fasi fu sori en pipel taki a lobi den èn taki a feni den bun. Bijbel e taki fu tu okasi pe Yehovah sori taki Yesus na en lobi Manpkin èn taki a feni en bun (Mat. 3:17; 17:5). Yu ben o wani yere fa Yehovah e taki kmoto fu hemel taki a feni yu bun? Yehovah no e taki nanga wi kmoto fu hemel, ma a e taki nanga wi nanga yepi fu Bijbel. Te wi e leisi fa Yesus e taki na wan lob’ati fasi nanga den disipel fu en, dan a de neleki wi kan yere fa Yehovah e taigi wi den sani dati. Nowan sma sori den fasi fu Yehovah leki fa Yesus du dati. Sobun, te wi e leisi taki Yesus ben taigi den bakaman fu en taki a lobi den, aladi den ben de sondu sma, dan a de leki Yehovah e taigi wi a sani dati (Yoh. 15:9, 15). Te wi e kisi tesi, dan wi no musu denki taki Yehovah no feni wi bun moro. Na presi fu dati den tesi disi e gi wi okasi fu sori o furu wi lobi Yehovah èn efu wi e fertrow na en tapu.​—Yak. 1:12. w24.03 28 ¶10-11