JEREMIYA
1 Lawa ngemavi aJeremiya* indvodzana yaHilkiya. Hilkiya abengulomunye webaphristi base-Anathothi+ eveni lakaBhenjamini: 2 Jehova wakhuluma nami ngemnyaka wesi-13 wekubusa kwaJosaya+ inkhosi yakaJuda, lobekayindvodzana ya-Amoni.+ 3 Waphindze wakhuluma nami emalangeni aJehoyakimu+ inkhosi yakaJuda, lobekayindvodzana yaJosaya, kwaze kwaba sekupheleni kweminyaka lengu-11 yekubusa kwaSedekiya+ inkhosi yakaJuda, lobekayindvodzana yaJosaya, kwaze kwaba ngulapho iJerusalema incotjwa ngenyanga yesihlanu.+
4 Jehova watsi kimi:
5 “Mine ngakwati* ngisengakakubumbi esiswini samake wakho,+
Futsi ngaphambi kwekutsi utalwe* ngakukhetsa kutsi wente umsebenti longcwele.+
Ngakwenta umphrofethi etiveni.”
6 Kodvwa ngatsi: “Awu Nkhosi Lephakeme Jehova!
Mine angikwati kukhuluma,+ ngisengumfanyana*+ nje.”
7 Jehova wase utsi kimi:
“Ungasho utsi: ‘Ngisengumfanyana nje.’
Ngobe kufanele uye kubo bonkhe bantfu lengikutfuma kubo,
Futsi kufanele ukusho konkhe lengikutjela kona.+
9 Ngemuva kwaloko Jehova welula sandla sakhe watsintsa umlomo wami.+ Jehova watsi kimi: “Ngifake emavi ami emlonyeni wakho.+ 10 Lamuhla ngikunike ligunya etikwetive nasetikwemibuso, kutsi usiphule futsi udzilite, kutsi ubhubhise futsi uhhihlite, nekutsi wakhe futsi uhlanyele.”+
11 Jehova waphindze wakhuluma nami watsi: “Ubonani Jeremiya?” Mine ngatsi: “Ngibona ligala lesihlahla sema-alimondi.”*
12 Jehova watsi kimi: “Ubone kahle, ngobe ngihlale ngikuphaphamele kwenta livi lami lifezeke.”
13 Jehova waphindze wakhuluma nami watsi: “Ubonani?” Mine ngatsi: “Ngibona libhodo* lelibilako,* umlomo walo ufulatsele inyakatfo futsi utjekele ngaseningizimu.” 14 Jehova wabese utsi kimi:
“Kutawuta inhlekelele ichamuka enyakatfo,
Ihlasele bonkhe labahlala eveni.+
15 Ngobe mine Jehova ngitsi: ‘Ngibita tonkhe tive temibuso yasenyakatfo,+
Futsi titawuta, nemakhosi ato atawubeka tihlalo tawo tebukhosi
Emagedeni aseJerusalema,+
Titawuhlasela tindvonga tayo kuto tonkhe tinhlangotsi
Tihlasele nawo onkhe emadolobha akaJuda.+
16 Ngitawehlulela bantfu bami ngenca yabo bonkhe bubi lababentile,
Ngobe bangilahlile,+
Bashuncisela labanye bonkulunkulu imihlatjelo yekushiswa+
Futsi bakhotsamela tintfo labatente ngetandla tabo.’+
17 Wena-ke tilungiselele,*
Futsi kufanele usukume ubatjele konkhe lengikushito kuwe.
Ungabesabi,+
Kuze ngingakwenti ufikelwe kwesaba embikwabo.
18 Ngobe lamuhla ngikwente waba lidolobha lelivikelekile,
Ngikwente waba yinsika yensimbi, ngakwenta waba tindvonga telitfusi kuze umelane nalo lonkhe lelive,+
Kuze umelane nemakhosi akaJuda netindvuna takhona,
Futsi umelane nebaphristi bakhona kanye nebantfu bakhona.+
19 Nakanjani batawulwa nawe,
Kodvwa ngeke bakwehlule,*
Ngobe mine Jehova ngitsi: ‘Nginawe,+ futsi ngitakusindzisa.’”
2 Jehova watsi kimi: 2 “Hamba uyomemetela eJerusalema utsi: ‘Naku lokushiwo nguJehova:
“Ngiyikhumbula kahle indlela lobewutinikele* ngayo ngesikhatsi usemusha,+
Nelutsandvo lowangikhombisa lona ngesikhatsi setsembisene umshado.+
Ngikhumbula nendlela lobewungilandzela ngayo ehlane,
Eveni lelingakahlanyelwa lutfo.+
3 Israyeli bekangcwele kuJehova,+ atitselo tekucala tesivuno sakhe.”’
‘Umuntfu lomshwabadzelako abebekwa licala,
Futsi bekehlelwa yinhlekelele,’ kusho Jehova.”+
4 Wenandlu yaJakobe, lalela livi laJehova,
Nani nonkhe nine mindeni yendlu ya-Israyeli.
5 Naku lokushiwo nguJehova:
“Nguliphi liphutsa bokhokho benu labalitfola kimi,+
Kutsi bangaze baphambuke kangaka kimi,
Futsi balandzele tithico letingenamsebenti,+ nabo bagcine sebabantfu labangenamsebenti?+
6 Abazange babute batsi: ‘Uphi Jehova,
Loyo lowasikhipha eGibhithe,+
Wasihola ehlane,
Wasihola eveni lelilugwadvule+ naleligcwele imigodzi,
Eveni lelinesomiso+ nalelimnyama tsu,
Eveni lelingahanjwa ngumuntfu
Futsi lelingahlali muntfu?’
Kodvwa nafike nalingcolisa live lami;
Nalenta lenyanyeka lifa lami.+
8 Baphristi abazange babute batsi: ‘Uphi Jehova?’+
Labo labafundzisa uMtsetfo bebangangati,
Nebelusi bangivukela,+
Baphrofethi bebaphrofetha egameni laBhali,+
Futsi balandzela bonkulunkulu labangeke babasite ngalutfo.
9 Jehova utsi: ‘Ngitawuphindze nginibeke licala,+
Futsi ngitababeka licala bantfwana bebantfwana benu.’
10 ‘Yewelelani elugwini* loluhlala bantfu baseKhithimu+ futsi nibuke.
Tfumelani bantfu eKhedari+ futsi nicabangisise;
Nibuke kutsi intfo lenjena ike yenteka yini.
11 Kuke kwenteka yini kutsi sive sishiye bonkulunkulu baso sikhetse labanye bonkulunkulu?
Kodvwa bantfu bami badvumise tintfo letingenamsebenti kunekutsi badvumise mine.+
12 Nine mazulu, bukani loku futsi nimangale;
Chachateliswani kwesaba,’ kusho Jehova,
13 ‘Ngobe bantfu bami bente tintfo letimbili letimbi:
Bangishiyile, mine lengingumtfombo wemanti ekuphila,+
Babese batigubhela* imitfombo,
Lokuyimitfombo lete emanti.’
14 ‘Israyeli usisebenti yini? Usigcili lesitelwe endlini yemphatsi wakhe yini?
Kwentiwa yini-ke kutsi bantfu bamtfumbe?
15 Emabhubesi lanemandla ayambhodlela,+
Ahhonga kakhulu.
Live lakhe alente laba yintfo leyetfusako.
Emadolobha akhe ashiswe ngemlilo, futsi kute nalohlala kuwo.
16 Bantfu baseNofi*+ nebaseThaphanesi+ bacotfule inhloko yakho bakushiya unemphandla.
17 Akusuwe yini lotibangele loku
Ngekutsi ushiye Jehova Nkulunkulu wakho+
Ngesikhatsi akuhola endleleni?
Sewufunelani kubuyela e-Asiriya+
Uyonatsa emanti asemfuleni iYufrathe?
19 Kufanele ufundze etintfweni letimbi lotentile,
Futsi wekhutwe ngenca yekungetsembeki kwakho.
Kufanele wati uphindze ubone kutsi kubi kakhulu futsi kuletsa imiphumela lebuhlungu+
Kushiya Jehova Nkulunkulu wakho;
Awukakhombisi kutsi uyangesaba,’+ kusho Jehova wemabutfo, loyiNkhosi Lephakeme.
20 ‘Lijoka lakho ngalephula kadzeni+
Futsi ngadzabula tinketane takho.
Kodvwa wena watsi: “Angeke ngikukhonte,”
Ngobe kuwo onkhe emagcuma laphakeme nangephansi kwato tonkhe tihlahla letinkhulu letiluhlata+
Bewugenukile, ugwadla.+
21 Ngakuhlanyela usihlahla selikhetselo semagilebisi labovu,+ ngakuhlanyela ngenhlanyelo lesezingeni lelisetulu;
Manje sewungishintjele njani waba ngemahlumela lamabi esihlahla semagilebisi esiganga?’+
22 ‘Ngisho nobe bewungatishikisha futsi utigeze kahle,*
Bewutawuchubeka ungcolile embikwami ngenca yesono sakho,’+ kusho iNkhosi Lephakeme lenguJehova.
23 Ungasho njani utsi: ‘Angikatingcolisi.
Angikabalandzeli boBhali’?
Bukisisa indlela lebewutiphatsa ngayo ngesikhatsi usesihosheni.
Cabangisisa ngaloko lokwentile.
Ufana nelikamela lelincane lelisikati futsi lelinematubane,
Leligijima liye lena nalena ngekutsandza kwalo.
24 Ufana nembongolo yesiganga lejwayele lihlane,
Lehosha umoya naseyikhanuka inkunzi.
Ngubani nje longayivimba naseyifuna kwekhwelwa?
Tonkhe timbongolo letindvuna letiyifunako akudzingeki tikhatsateke.
Titayitfola ngesikhatsi seyifuna kwekhwelwa.*
25 Ungagijimi kakhulu ngobe kutawugcine sekute longakufaka etinyaweni
Nemphimbo wakho utawuze wome.
Kodvwa wena utsite: ‘Cha, kute litsemba!+
26 Njengalapho lisela lihlazeka naselibanjiwe,
Kanjalo-ke nendlu yaka-Israyeli ihlazekile,
Yona, emakhosi ayo, tindvuna tayo,
Baphristi bayo kanye nebaphrofethi bayo.+
27 Batsi esihlahleni: ‘Wena ungubabe wami,’+
Batsi etjeni: ‘Wena wangitala.’
Kunekutsi banginake, bangifulatsele.+
Kodvwa nasebehlelwe yinhlekelele batawutsi:
‘Phakama usisindzise!’+
28 Sebaphi nyalo labonkulunkulu bakho lebewutakhele bona?+
Abakusite nabangakhona kukusindzisa kulenhlekelele lekwehlele,
Awu Juda, bonkulunkulu bakho sebanyenti kakhulu, sebangangemadolobha akho.+
29 ‘Kungani nichubeka nilwa nami?
Kungani nonkhe ningivukela?’+ kusho Jehova.
30 Ngiwajezisile emadvodzana enu kodvwa akukasiti ngalutfo.+
Akasemukeli siyalo;+
Nibulele baphrofethi benu ngenkemba yenu,+
Kuhle kwelibhubesi leliyingoti lelifuna lelingamudla.
31 Wena situkulwane, cabangisisa ngelivi laJehova.
Senginjengelihlane yini ku-Israyeli
Nobe senginjengelive lelinebumnyama lobukhulu?
Bentiwa yini bantfu bami kutsi batsi: ‘Siya nobe ngukuphi lasifuna kuya khona.
Angeke siphindze site kuwe’?+
32 Intfombi ntfo ingayikhohlwa yini imihlobiso yayo,
Namakoti angalikhohlwa yini libhande latihlobisa ngalo?*
Kodvwa bantfu bami bangikhohlwe sikhatsi lesidze.+
33 Maye unemasu* ekufunana nelutsandvo!
Wente tindlela takho taba timbi kakhulu.+
34 Ngisho timphahla takho tifatwe yingati yalabaphuyile labangenacala,+
Nanobe ngingakase ngibabone bagcekeza endlini yakho,
Kodvwa ngayibona ingati yabo kuto tonkhe timphahla takho.+
35 Kepha wena utsite: ‘Anginacala.
Nkulunkulu angeke asangitfukutselela.’
Nyalo ngitakwehlulela
Ngobe utsi: ‘Angikoni.’
36 Kungani kungasho lutfo kuwe kushintjashintja tindlela takho?
37 Ngaleso sizatfu, utawuhamba wetfwele tandla enhloko,+
Ngobe Jehova ubalahlile labo lowetsembele kubo;
Angeke bakuphumelelise.”
3 Bantfu bavame kubuta batsi: “Nangabe indvodza icosha umfati wayo bese lomfati uyahamba uyoshada nalenye, kufanele yini lendvodza iphindze ibuyele kuye?”
Angitsi lelive selivele lonakele?+
“Senigwadle nebantfu labanyenti lenitsandzana nabo,+
Manje nyalo senicabanga kubuya kimi?” kusho Jehova.
2 “Phakamiselani emehlo enu emagcumeni futsi nibuke.
Ikhona yini indzawo leningakaze nilale kuyo nemadvodza?
Benihlala ngasemigwacweni nimele labo lenitsandzana nabo,
Kuhle kwemuntfu lozulazulako* losehlane.
Niyachubeka ningcolisa lelive
Ngebugwadla benu nangebubi lenibentako.+
3 Ngako timvula anisatitfoli,+
Futsi alisani nasentfwasahlobo.
4 Kodvwa nyalo senikhala kimi nitsi:
‘Babe, wena ungumngani wetfu kusukela sisebasha!+
5 Utasitfukutselela kuze kube phakadze yini,
Futsi utawuhlale usibambele emagcubu yini?’
Nguloko-ke lenikushoko,
Kodvwa nichubeka nenta tonkhe tintfo letimbi lenifuna kutenta.”+
6 Ngemalanga eNkhosi Josaya,+ Jehova watsi kimi: “‘Ubonile yini kutsi wenteni Israyeli longaketsembeki? Wenyukele kuto tonkhe tintsaba letiphakeme futsi waya ngephansi kwato tonkhe tihlahla letinkhulu letiluhlata kuze ayogwadla khona.+ 7 Kwatsi ngisho nalapho sekatente tonkhe letintfo, ngachubeka ngimtjela kutsi akabuye kimi,+ kodvwa akazange abuye; futsi Juda abesolo akubona loko lobekwentiwa ngudzadzewabo lokhohlakele.+ 8 Ngatsi nangikubona loku, ngamcosha Israyeli longaketsembeki ngenca yekuphinga kwakhe, ngamnika incwadzi yedivosi.+ Kodvwa Juda longudzadzewabo lokhohlakele, akazange esabe kujeziswa; naye wahamba wayogwadla.+ 9 Loko wakutsatsa* njengentfo lengasho lutfo, wachubeka angcolisa live futsi aphinga ngekukhonta ematje netihlahla.+ 10 Ngetulu kwako konkhe loku, Juda, longudzadzewabo lokhohlakele, akabuyanga kimi ngenhlitiyo yakhe yonkhe, abemane nje atentisa,’ kusho Jehova.”
11 Jehova wase utsi kimi: “Sono saJuda lokhohlakele sikhulu kakhulu kunesa-Israyeli longaketsembeki.+ 12 Hamba umemetele nankha emavi enyakatfo:+
“‘“Buya wena Israyeli losihlubuki,” kusho Jehova.’+ ‘“Angeke ngikuswacele,+ ngobe ngetsembekile,” kusho Jehova.’ ‘“Angeke ngihlale ngikutfukutselele kuze kube phakadze. 13 Mane nje uvume licala lakho, ngobe uvukele Jehova Nkulunkulu wakho. Bewusolo ulala nebantfu longabati* ngephansi kwato tonkhe tihlahla letinkhulu letiluhlata, wangalilaleli livi lami,” kusho Jehova.’”
14 “Buyani nine madvodzana latihlubuki,” kusho Jehova. “Ngobe sengingumphatsi* wenu sibili; futsi ngitanitsatsa, ngitsatse munye edolobheni, ngitsatse babili esiveni bese nginiletsa eSiyoni.+ 15 Ngitawubese ngininiketa belusi labenta intsandvo yami,*+ futsi batanenta nibe nelwati nekucondza. 16 Ngalawo malanga nitawuba banyenti futsi nandze eveni,” kusho Jehova.+ “Angeke niphindze nitsi: ‘Libhokisi lesivumelwane saJehova!’ Angeke lifike engcondvweni yenu, angeke nilikhumbule nobe nilifise, futsi angeke liphindze lakhiwe. 17 Ngaleso sikhatsi nitawubita iJerusalema ngekutsi sihlalo sebukhosi saJehova.+ Tonkhe tive titawuhlanganiswa eJerusalema kuze tidvumise libito laJehova,+ futsi angeke niphindze nichube inkhani nente loko lokufunwa tinhlitiyo tenu letikhohlakele.”
18 “Ngalawo malanga, bantfu bakaJuda nebantfu baka-Israyeli batawuhamba kanyekanye,+ futsi bonkhe batawuchamuka eveni lelisenyakatfo baye eveni lengalinika bokhokho benu kutsi libe lifa labo.+ 19 Ngacabanga ngatsi: ‘Maye bekungijabulisa kunitsatsa njengemadvodzana ami, ngaze nganinika nelive lelihle, nganinika lifa lelihle kakhulu emkhatsini wetive!’*+ Bengicabanga kutsi nitangibita nitsi, ‘Babe!’ ngicabanga nekutsi angeke niyekele kungilandzela. 20 ‘Njengobe nje umfati longaketsembeki ashiya indvodza* yakhe, kanjalo nani nine ma-Israyeli aniketsembeki kimi,’+ kusho Jehova.”
21 Kuvakala umsindvo emagcumeni,
Kuvakala bantfu baka-Israyeli bayakhala futsi bayancenga,
Ngobe baphambukile endleleni yabo;
Bamkhohliwe Jehova Nkulunkulu wabo.+
22 “Buyani madvodzana latihlubuki.
Ngitanelapha kulokuhlubuka kwenu.”+
“Naku sesikhona! Sesibuyile kuwe,
Ngobe wena Jehova unguNkulunkulu wetfu.+
23 Besitikhohlisa ngesikhatsi simemeta emagcumeni nasetintsabeni.+
Ngobe Jehova Nkulunkulu wetfu ungumsindzisi wema-Israyeli.+
24 Kusukela ebusheni betfu, lonkulunkulu longenamsebenti watsatsa tonkhe tintfo labatisebentela kamatima bokhokho betfu,+
Wadla imihlambi yabo yetimvu, yetimbuti neyetinkhomo,
Wadla emadvodzana abo nemadvodzakati abo.
25 Asilaleni phansi ngenca yekuhlazeka,
Futsi asidliwe ngemahloni,
Ngobe sonile kuJehova Nkulunkulu wetfu,+
Tsine kanye nabokhokho betfu, kusukela ebusheni betfu kuze kube ngulamuhla,+
Futsi asikalilaleli livi laJehova Nkulunkulu wetfu.”
4 Jehova utsi: “Awu Israyeli, nawungamane nje ubuye,
Nawungamane nje ubuye kimi
Futsi ususe tithico takho letenyanyekako embikwami,
Ngeke uzulazule.+
2 Nawungafunga,
Futsi ufunge ngeliciniso nangekulunga utsi: ‘Ngifunga Jehova Nkulunkulu lophilako!’
3 Ngobe naku lokushiwo nguJehova kubantfu bakaJuda nebaseJerusalema:
“Limani umhlaba longakalinywa,
Futsi niyekele kuhlanyela emanyeveni.+
4 Tisokeni embikwaJehova,
Sokani tinhlitiyo tenu+
Nine bantfu bakaJuda nebaseJerusalema,
Kuze intfukutselo yami ingasuki emalangabi njengemlilo
Futsi ingavutsi kube kute lotayicisha,
Ivutse ngenca yetento tenu letimbi.”+
5 Memetelani loku kaJuda, nikumemetele naseJerusalema.
Memetani futsi nishaye luphondvo kulo lonkhe lelive.+
Memetani nitsi: “Hlanganani ndzawonye,
Asibalekeleni emadolobheni lavikelekile.+
6 Phakamisani luphawu lolukhomba indlela leya eSiyoni.
Funani indzawo yekukhosela, futsi ningemi nje nigoce tandla,”
Ngobe ngiletsa inhlekelele lenkhulu, inhlekelele lebuya enyakatfo.+
7 Njengelibhubesi leliphuma etihlahleni lebelibhace kuto;+
Kanjalo-ke nembhubhisi wetive sewuphumile.+
Uphumile endzaweni yakhe kuze ente lelive lenu libe yindzawo leyetfusako.
Emadolobha enu atawuba tindzala futsi kute lotawusala kuwo.+
8 Ngako-ke gcokani tindvwangu temasaka,+
Nilile futsi nikhale kabuhlungu,
Ngobe intfukutselo yaJehova solo iyasivutsela.
9 Jehova utsi: “Ngalelolanga, inkhosi itawufikelwa kwesaba,+
Netindvuna titawesaba;
Baphristi batawuvevetela ngenca yekwesaba futsi baphrofethi batawumangala.”+
10 Ngabese ngitsi: “Awu, Nkhosi Lephakeme Jehova! Ubakhohlise mbamba bantfu bakaJuda+ nebaseJerusalema, watsi: ‘Nitawuba nekuthula,’+ kantsi sekusele kancane kutsi sibulawe ngenkemba.”*
11 Naku bantfu bakaJuda nebaseJerusalema labatawutjelwa kona ngaleso sikhatsi:
“Umoya loshisako losuka emagcumeni asehlane
Utawuphephula bantfu bami;*
Lomoya awusiwo wekwela nobe wekuhlunga.
12 Ngimi lolotsi lomoya lonemandla awute.
Manje sengimemetela sigwebo sami kubo.
13 Sitsa sita njengemafu laletsa imvula,
Futsi tincola taso tifana nesivunguvungu.+
Emahhashi aso agijima kakhulu kunetinsweti.+
Nine nitawutsi: ‘Maye tsine! Sekuphelile ngatsi!’
14 Awu Jerusalema, geza bubi lobusenhlitiyweni yakho kuze usindziswe.+
Kutawuze kube ngunini solo unemicabango lemibi?
15 Ngobe kunelivi lelimemetela ngendzawo yakaDani,+
Futsi limemetela ngenhlekelele letawenteka etintsabeni taka-Efrayimu.
16 Memetelani lomlayeto etiveni;
Niwumemetele eJerusalema.”
“Kuta tinhloli* letisuka eveni lelikhashane,
Futsi titawuhlaba umkhosi, timelane nemadolobha akaJuda.
17 Titawuhlasela iJerusalema kuto tonkhe tinhlangotsi kuhle kwabogadzi labagadze siganga,+
Tiyihlasele ngobe ingivukele,”+ kusho Jehova.
18 “Wena utawubhekana nemiphumela yekutiphatsa kwakho neyetento takho.+
Inhlekelele letakwehlela ibuhlungu kakhulu,
Itawufika ngisho nasenhlitiyweni!”
19 Maye ngicindzetelekile, ngicindzeteleke kakhulu!
Ngiva buhlungu lobukhulu enhlitiyweni,
Inhlitiyo yami ishaya ngemandla.
20 Kubikwa inhlekelele emvakwalenye,
Ngobe lonkhe lelive libhujisiwe.
Kutsite kusenjalo kwadzilitwa emathende ami,
Ngatsi ngingakagadzi kwadzilitwa tindvwangu telithende lami.+
21 Kutawuze kube ngunini ngibona luphawu lolukhombisa indlela leya eSiyoni,
Solo ngiva umsindvo wekukhala kweluphondvo?+
22 Nkulunkulu watsi: “Bantfu bami batilima,+
Abanendzaba nami.
Babantfwana labalibele, futsi bete kucondza.
Bahlakaniphele kwenta lokubi,
Kodvwa abakwati kwenta lokuhle.”
23 Ngatsi nangibuka live labo ngabona kutsi belingenalutfo, sekute nalohlala kulo.+
Ngabuka emazulwini futsi besekungasakhanyi lutfo.+
24 Ngatsi nangibuka tintsaba ngatibona titamatama,
Nemagcuma nawo atamatama.+
25 Ngatsi ngiyabuka, ngangaboni muntfu,
Netinyoni temazulu besetindize tonkhe, tabaleka.+
26 Ngatsi ngiyabuka, ngabona lelive lelivundzile selilihlane,
Nemadolobha alo besekadzilitwe onkhe.+
Loko kwentiwe nguJehova
Ngobe bekatfukutsele abilelana.
27 Ngobe Jehova utsi: “Kute umuntfu lotawuhlala kulo lonkhe lelive,+
Kodvwa angeke ngilibhubhise liphele nya.
29 Nakuvakala umsindvo walabagibele emahhashi newalabasebentisa butjoki,
Bonkhe bantfu labasedolobheni bayabaleka.+
Bangena emahlatsini,
Futsi babhace emadvwaleni.+
Onkhe emadolobha ashiywa angenamuntfu,
Futsi kute umuntfu lohlala kuwo.”
30 Sewutawenta njani nyalo njengobe sewubhujisiwe?
Bewuvame kugcoka timphahla letibovu,
Utihlobise ngemihlobiso yeligolide,
Futsi upende emehlo akho ngapende lomnyama.*
Kodvwa akukasiti ngalutfo kutihlobisa kwakho,+
Ngobe bakwalile labo lebebakukhanuka,
Nyalo sebafuna kukubulala.+
31 Ngobe ngive umsindvo lonjengewemfati logulako,
Ngeva bantfu bacuma kuhle kwamake nakabeleka umntfwana wekucala,
Ngeva nendvodzakati yaseSiyoni solo iphefumulela etulu.
Yelula tandla tayo itsi:+
“Maye mine kwami, sengiphelelwe ngemandla ngenca yalababulali!”
5 Hambahambani emigwacweni yaseJerusalema.
Calatani kuto tonkhe tindzawo futsi ninakisise.
Bukisisani kuto tonkhe timakethe takhona.
Naningatfola umuntfu lowenta tintfo letilungile,+
Futsi lohlala etsembekile,
Ngitawubese ngiyalicolela lelidolobha.
2 Ngisho nobe bantfu bakhona bangatsi: “Ngifunga Jehova Nkulunkulu lophilako!”
Kodvwa batawuchubeka bafunga emanga.+
3 Awu Jehova, angitsi wena ubuka bantfu labetsembekile?+
Wabajezisa bantfu bakho, kodvwa loko akuzange kubasite.*
Besekusele kancane kutsi ubabhubhise bonkhe, kodvwa ngisho kunjalo bachubeka nekungalaleli.+
4 Kodvwa ngatitjela ngatsi: “Laba bentiwa kutsi bayahlupheka futsi abakafundzi.
Benta tintfo letibulima ngobe abayati indlela yaJehova,
Abawati umtsetfo waNkulunkulu wabo.
5 Ngitawuhamba ngiyokhuluma nebantfu labahlonishwako,
Ngobe ngiyaciniseka kutsi bona bayayati indlela yaJehova,
Bayawati umtsetfo waNkulunkulu wabo.”+
Kodvwa bonkhe besebalephulile lijoka
Futsi batidzabula tintsambo talo.
6 Ngiko nje bahlaselwa libhubesi leliphuma ehlatsini,
Badzabudzabulwa yimphisi lephuma ehlane,
Futsi nengwe ibalalela endleleni emadolobheni abo.
Ibadzabudzabula bonkhe labaphuma kuwo,
Ngobe sebone kakhulu,
Futsi sekunyenti labakwentile lokukhombisa kutsi abaketsembeki.+
7 “Nginganicolela njani nje ngaloku lenikwentile?
Emadvodzana enu angishiyile,
Futsi awasafungi kuNkulunkulu.+
Bengiwanika konkhe lebekakudzinga,
Kodvwa wona achubeka nekuphinga,
Futsi atseleka ngebunyenti bawo endlini yengwadla.
8 Lamadvodzana anjengemahhashi lashiswa yinkhanuko,
Futsi onkhe ahawukela bafati balabanye bantfu.”+
9 Jehova utsi: “Ngingabajezisi yini ngenca yaloku labakwentile?
Ngingatiphindziseleli yini kulesive lesinje?”+
10 “Yanini etihlahleni temagilebisi taseJerusalema futsi nitibulale,
Kodvwa lelidolobha ningalibhubhisi liphele nya.+
Jubani emahlumela akhona,
Ngobe awasiwo aJehova.
11 Ngobe bantfu baka-Israyeli nebantfu bakaJuda
Abaketsembeki mbamba kimi,” kusho Jehova.+
12 “Bamphikile Jehova futsi bahlale batsi:
Angeke sehlelwe nayinhlekelele,
Futsi angeke sihlaselwe yimphi nobe indlala.’+
13 Baphrofethi bakhuluma lite,
Nelivi laNkulunkulu alikho kubo.
Shengatsi nabo bangaba lite njengemavi abo!”
14 Ngako naku lokushiwo nguJehova Nkulunkulu wemabutfo:
“Ngenca yekutsi labantfu basho loku,
Emavi ami ngiwenta afanane nemlilo emlonyeni wakho,+
Labantfu bona ngibenta bafanane netinkhuni,
Futsi lomlilo utabacotfula.”+
15 Jehova utsi: “Nine bantfu baka-Israyeli, nyalo ngitawuletsa sive lesibuya khashane sitokulwa nani.+
Lesive besisolo sikhona kusukela kadzeni.
Sisive sasemandvulo,
Sive lesikhuluma lulwimi leningalwati,
Futsi lesikhuluma lulwimi leningalucondzi.+
16 Sikhwama semicibisholo yabo sinjengelithuna lelivulekile;
Bonkhe bangemachawe emphi.
17 Batawushwabadzela sivuno senu nekudla kwenu.+
Batawubulala emadvodzana enu nemadvodzakati enu.
Babulale imihlambi yenu yetimvu, yetimbuti neyetinkhomo.
Batawucotfula tihlahla tenu temagilebisi netemakhiwa.
Batawabhubhisa ngenkemba emadolobha enu lavikelekile lenetsembele kuwo.”
18 Jehova utsi: “Ngisho nangalawo malanga angeke nginibhubhise niphele nya.+ 19 Nababuta batsi: ‘Jehova Nkulunkulu wetfu ukwenteleni konkhe loku kitsi?’ Kufanele ubaphendvule utsi: ‘Njengobe nje ningishiyile nakhonta lomunye nkulunkulu eveni lenu, ngako-ke nitawusebentela bantfu baletinye tive eveni lelingasilo lenu.’”+
20 Memetelani loku esitukulwaneni saJakobe,
Nikumemetele nakaJuda nitsi:
21 “Lalelani lana nine bantfu labatilima futsi labangenangcondvo,+
Labatsi banemehlo kodvwa babe bangaboni,+
Labatsi banetindlebe kodvwa babe bangeva.+
22 Jehova utsi: ‘Aningesabi yini?
Akukafaneli yini nichachateliswe kwesaba embikwami?
Ngimi lowenta sihlabatsi saba ngumncele welwandle,
Ngashaya umtsetfo waphakadze kuze lungawendluli umncele walo.
Ngisho nobe emagagasi alo angaya lena nalena, atawuphelela khona lapho;
Ngisho nobe angaba nemandla, kodvwa angeke awendlule lomncele.+
23 Kodvwa tinhlitiyo talabantfu tinenkhani futsi bayavukela;
Bangishiyile, bahamba ngetindlela tabo.+
24 Abakaze bacabange batsi:
“Nyalo asesabeni Jehova Nkulunkulu wetfu,
Losinika imvula ngesikhatsi sayo,
Losinika imvula nakungena busika nasentfwasahlobo,
Losenta siciniseke kutsi sikhatsi sekuvuna sitawufika.”+
25 Konkhe loku kuvinjwe kona kwenu;
Tono tenu tente kutsi ningatitfoli tintfo letinhle.+
26 Kunebantfu lababi emkhatsini webantfu bami.
Bahlale bagadzile njengemtsiyi wetinyoni locosheme.
Babeka titsiyo letiyingoti,
Futsi babamba bantfu.
27 Njengendlu yetinyoni legcwele tinyoni,
Kanjalo netindlu tabo tigcwele tintfo labatitfole ngebucili.+
Kungako banjingile futsi baneligunya.
28 Sebakhuluphele futsi bayamanyatela;
Tintfo letimbi labatentako setinyenti kakhulu.
Abatimeleli tintsandzane emacaleni,+
Kuze kutawuphumelela bona;
Futsi abamehluleli ngekulunga umuntfu loweswele.’”+
29 Jehova utsi: “Ngingabajezisi yini ngenca yaloku labakwentile?
Ngingatiphindziseleli yini kulesive lesinjena?
30 Kunentfo leshacisako futsi lembi kakhulu leyenteke kulelive:
31 Baphrofethi baphrofetha emanga,+
Nebaphristi basebentisa ligunya labo kuze bacindzetele labanye,
Futsi bantfu bami kuyabachaza loko.+
Kodvwa nitawenta njani-ke nasekufike kuphela?”
6 Balekani eJerusalema niyobhaca, nine madvodzana aBhenjamini.
Ngobe kuta inhlekelele lenkhulu, inhlekelele lechamuka enyakatfo.+
2 Lidolobha laseSiyoni* lifanana nemfati lomuhle futsi lotototiswako.+
3 Kutawufika belusi nemihlambi yabo.
4 “Tilungiseleleni* kuyokulwa neJerusalema!
Sukumani, asiyihlaseleni kusesemini!”
“Awu yehheni bo, naku nelilanga seliyashona,
Sekucala nekuba mnyama!”
5 “Sukumani, asiyihlaseleni ebusuku
Futsi sibhidlite imibhoshongo yayo levikelekile.”+
6 Ngobe Jehova wemabutfo utsi:
“Gawulani tihlahla futsi nimise indvundvuma kuze nivimbetele iJerusalema.+
Lelidolobha kufanele lijeziswe,
Ngobe kuyacindzetelwana nje kulo.+
7 Njengobe nje umtfombo ukhipha emanti lamnandzi,
Kanjalo nalelidolobha lingumtfombo webubi.
Kuvakala umsindvo wekulwa newembhubhiso;+
Futsi ngihlale ngibona bantfu labagulako kanye netinhlekelele.
8 Awu Jerusalema lalela, ngobe nawungenti njalo ngitakufulatsela ngenyanyile;+
Ngitawenta indzawo yakho ibe bete lutfo, kube bete nebantfu labahlala kuyo.”+
9 Naku lokushiwo nguJehova wemabutfo:
“Bantfu labasele ka-Israyeli bafanana nemagilebisi ekugcina lasele esihlahleni.
Kufanele uphindze ubabutsele ndzawonye kuhle kwemuntfu lokha emagilebisi ekugcina awafake ebhasikidini.”
10 “Ngubani lokufanele ngikhulume naye futsi ngimecwayise?
Ngubani lotawulalela?
Tindlebe tabo tivalekile,* ngako abakhoni kulalela.+
Sebayaledzelela livi laJehova,+
Futsi abalitsandzi.
11 Nami ngitfukutsele ngiyabilelana njengaJehova,
Futsi sengidziniwe kuthula.”+
“Tjela umntfwana losesitaladini indlela lengitfukutsele ngayo,+
Utjele emacembu emajaha lahlangene ndzawonye.
Utjele bonkhe bantfu, lokufaka ekhatsi indvodza nemfati wayo,
12 Tindlu tabo titawutsatfwa ngulabanye bantfu,
Kutsatfwe emasimu abo kanye nebafati babo.+
Ngobe ngitawelula sandla sami ngimelane nebantfu labahlala kulelive,” kusho Jehova.
13 “Bonkhe batizuzisa bona ngetindlela letingaketsembeki, kusukela kulophansi kuya kulohlonishwako;+
Baphrofethi nebaphristi nabo abaketsembeki.+
14 Betama kupholisa emanceba ebantfu bami ngekumane nje batsi:
‘Kunekuthula! Kunekuthula!’
Kantsi kute kuthula.+
15 Utsi banawo nje emahloni ngetintfo letenyanyekako labatentile?
Bete ngisho nalamancane!
Abati nekutsi kunjani kuhlazeka!+
Ngako batawubulawa njengalabanye lesebabulewe.
Batawudzayitela nasengibajezisa,” kusho Jehova.
16 Jehova utsi:
“Manini lapho kuhlangana khona tindlela futsi nibuke.
Butani ngetindlela takadzeni,
Butani kutsi nguyiphi indlela lekahle bese nihamba ngayo,+
Futsi nitawuphumula.”
Kodvwa bona batsi: “Angeke sihambe ngayo.”+
17 “Ngabeka bogadzi+ lebebatsi:
‘Lalelani umsindvo wekukhala kweluphondvo!’”+
Kodvwa bona batsi: “Angeke siwulalele.”+
18 “Ngako-ke lalelani nine tive!
Shengatsi nani nine bantfu ningakwati
Loko lokutakwenteka kubantfu baseJerusalema.
19 Lalelani lana nonkhe nine lenisemhlabeni!
Labantfu ngitabaletsela inhlekelele+
Ngenca yemicabango yabo lemibi,
Ngobe abakawalaleli emavi ami
Futsi bawalile nemtsetfo* wami.”
20 “Akusho lutfo kimi lokungiletsela lamakha esihlahla semphepho labuya eSheba
Kanye nalomhlanga* losuka eveni lelikhashane.
Angiyifuni iminikelo yenu yekushiswa lephelele,
Futsi imihlatjelo yenu iyangicansula.”+
21 Ngako-ke Jehova utsi:
“Labantfu ngitababekela tintfo letitabagila
Futsi batawugileka bawe,
Kutawugileka bobabe nemadvodzana abo,
Kugileke umuntfu nemngani wakhe,
Futsi bonkhe batawushabalala.”+
22 Jehova utsi:
“Lalelani la! Kuta bantfu labasuka eveni lasenyakatfo,
Kutawuchamuka sive lesikhulu lesisuka ekugcineni kwemhlaba.+
23 Batawuhloma ngebutjoki nangesikhali.
Abananhlitiyo futsi kute labatamvela.
Emavi abo atawufana nekubhodla kwelwandle,
Futsi batawube bagibele emahhashi.+
Beta njengelibutfo kuze banihlasele nine bantfu baseSiyoni.”*
25 Ningayi emasimini,
Futsi ningayi nasemgwacweni,
Ngobe lesitsa siphetse inkemba,
Yonkhe indzawo kuyesabeka.
Dzindzani sililo kube shengatsi nikhalela indvodzana lekuphela kwayo,+
Ngobe sitsa lesitosibhubhisa sitawufika singakasigadzi.+
27 “Ngikwente* wafana nemuntfu locwengisisa lisiliva
Ngobe kufanele ucwengisise bantfu bami,
Kufanele ubanakisise futsi utibukisise tintfo labatentako.
Balukhuni njengelitfusi nensimbi,
Futsi bonkhe bakhohlakele.
29 Umuntfu angetama kamatima kubacwengisisa ngemlilo, kuze kushe ngisho nemathulusi akhe.
Kodvwa baphuma solo banemthofi nje.
30 Bantfu batababita ngekutsi balisiliva lelingenamsebenti,
Ngobe Jehova ubalahlile.”+
7 Livi laJehova lefika kuJeremiya latsi: 2 “Mani egedeni lendlu yaJehova futsi umemetele nankha emavi: ‘Lalelani loko lokushiwo nguJehova, nonkhe nine bantfu bakaJuda leningena kulamagede kute nitokhonta Jehova. 3 Naku lokushiwo nguJehova wemabutfo, longuNkulunkulu wema-Israyeli: “Shintjani tindlela tenu futsi niyekele loku lenikwentako, mine ngitawubese ngiyanivumela kutsi nichubeke nihlala kulendzawo.+ 4 Ningawetsembi emavi langemanga, bese nani nitsi: ‘Leli* lithempeli laJehova, lithempeli laJehova, lithempeli laJehova!’+ 5 Ngako naningatishintja mbamba tindlela tenu futsi niyekele loku lenikwentako; nikhiphe sijubo lesikahle endzabeni letsintsa umuntfu namakhelwane wakhe;+ 6 ningabacindzeteli bantfu bekuhamba, tintsandzane* kanye nebafelokati;+ ningababulali bantfu labangenacala kulendzawo; ningatilimati nine ngekukhonta labanye bonkulunkulu;+ 7 mine-ke ngitanivumela kutsi nichubeke nihlala kulendzawo, lokulive lengalinika bokhokho benu kutsi libe ngelabo phakadze naphakadze.”’”
8 “Kodvwa nine netsemba emavi langemanga,+ futsi angeke anisite ngalutfo. 9 Kambe nine nicabanga kutsi ningeba,+ nibulale, niphinge, nifunge emanga,+ nentele Bhali imihlatjelo,*+ futsi nilandzele labanye bonkulunkulu leningabati, 10 bese nita kimi futsi nime embikwami kulendlu lebitwa ngelibito lami, nitsi: ‘Sitawusindza,’ nibe nente tonkhe letintfo letenyanyekako? 11 Lendlu lebitwa ngelibito lami seniyitsatsa njengendlu yetigebengu yini?+ Ngikubone konkhe loku lenikwentako,” kusho Jehova.
12 “‘Manje-ke, yanini endzaweni yami lengcwele leseShilo,+ lokuyindzawo yekucala lengabeka kuyo libito lami,+ nifike nibuke loko lengakwenta kuyo ngenca yebubi lobebentiwa bantfu bami, ema-Israyeli.+ 13 Kodvwa nine nachubeka nenta tonkhe letintfo letimbi, futsi anizange ningilalele ngisho nobe bengihlale ngikhuluma* nani.+ Bengisolo nginibita kodvwa ningasabeli,’ kusho Jehova.+ 14 ‘Ngako-ke, loko lengakwenta eShilo ngitakwenta nakulendlu lenetsembele kuyo futsi lebitwa ngelibito lami,+ ngikwente nakulendzawo lengayinika nine nabokhokho benu.+ 15 Ngitanicosha embikwami, njengobe nje ngabacosha bonkhe banakenu, lokungibo bonkhe bantfwana ba-Efrayimu.’+
16 “Ngako ungabathantazeli labantfu. Ungabakhaleli kimi, nobe ubathantazele nobe ungincenge kutsi ngibasite+ ngobe angeke ngikulalele.+ 17 Awuboni yini kutsi bentani emadolobheni akaJuda nasemigwacweni yaseJerusalema? 18 Bantfwana batfota tinkhuni, bobabe babase umlilo, bomake bona babhuce inhlama kuze bente sinkhwa lesitawuba ngumhlatjelo weNdlovukazi yeliZulu,*+ futsi batsatsa iminikelo yalokunatfwako bayitfululele labanye bonkulunkulu kuze nje ngive buhlungu.+ 19 Jehova utsi: ‘Bavisa mine yini buhlungu* ngaloku? Akusibo yini lalabalimalako, bagcine batihlaze bona?’+ 20 Ngako-ke iNkhosi Lephakeme Jehova itsi: ‘Ngitawehlisela intfukutselo yami nelulaka lwami kulendzawo,+ ngiyehlisele kubantfu nasetilwaneni, etihlahleni nakulokumila emhlabatsini; intfukutselo yami itawuvutsa njengemlilo futsi angeke icisheke.’+
21 “Jehova wemabutfo, longuNkulunkulu wema-Israyeli utsi: ‘Chubekani nekwenta iminikelo yenu yekushiswa lephelele, niyengete kuleleminye imihlatjelo yenu, futsi niyidle.+ 22 Ngobe ngesikhatsi ngikhipha bokhokho benu eGibhithe, angishongo lutfo kubo mayelana neminikelo yekushiswa lephelele kanye nemihlatjelo futsi angibayalanga kutsi bayente.+ 23 Kodvwa ngabayala ngatsi: “Lalelani livi lami, futsi mine ngitawuba nguNkulunkulu wenu, nine nibe bantfu bami.+ Nibohamba ngato tonkhe tindlela lengitsi nihambe ngato, kuze tintfo tinihambele kahle.”’+ 24 Kepha-ke abazange bangilalele nobe banginake,*+ esikhundleni saloko bakhetsa kuhamba ngetindlela letifunwa ngibo,* baba nenkhani futsi benta lokufunwa tinhlitiyo tabo letimbi,+ kunekutsi baye embili, bona bebaya emuva. 25 Kusukela ngelilanga bokhokho benu labaphuma ngalo eGibhithe kuze kube ngulamuhla bekusolo kunjalo.+ Ngako bengihlale ngibatfumelela* tinceku tami letibaphrofethi, ngibatfumelela tona onkhe malanga.+ 26 Kodvwa abangilalelanga futsi abazange banginake.*+ Kunaloko bacinisa tinhloko* tabo futsi benta lokubi kakhulu kunabokhokho babo.
27 “Utawubatjela konkhe loku,+ kodvwa angeke bakulalele; utawubabita kodvwa angeke basabele. 28 Ngako utawukhuluma nabo utsi: ‘Lesive lesi asizange sililalele livi laJehova Nkulunkulu waso futsi asilalelanga nasiyalwa. Kute ngisho munye kubo lowetsembekile futsi angeke ubatfole bakhuluma liciniso.’*+
29 “Hhulani tinwele tenu letindze nitilahle, futsi nihlabele ingoma yekulila nisemagcumeni, ngobe Jehova usilahlile lesitukulwane futsi wasishiya ngenca yekutsi simtfukutselise kakhulu. 30 Jehova utsi: ‘Labantfu bakaJuda bente tintfo letimbi emehlweni ami. Bangcolise indlu lebitwa ngelibito lami ngekubeka tithico tabo letenyanyekako.+ 31 Bakhe tindzawo letiphakeme taseThofethi eSigodzini seNdvodzana yaHinomu,*+ kuze bashise emadvodzana abo nemadvodzakati abo emlilweni,+ intfo lengingazange ngitsi abayente futsi lengingazange sengiyicabange nekuyicabanga.’*+
32 “Jehova utsi: ‘Ngako-ke kutawufika sikhatsi lapho lendzawo ingeke isabitwa ngekutsi yiThofethi nobe Sigodzi seNdvodzana yaHinomu,* kodvwa itawubitwa ngekutsi Sigodzi Sekuhlatjwa. Batawungcwaba labafile eThofethi kuze kube bete indzawo.+ 33 Tinyoni telizulu netilwane tesiganga titatitika ngetidvumbu talabantfu, futsi kute lotaticosha.+ 34 Emadolobheni akaJuda nasetitaladini taseJerusalema ngitawucedza umsindvo wekujabula newentfokoto, ngicedze injabulo yemkhwenyane neyamakoti,+ ngobe lelive litawuba tindzala.’”+
8 Jehova utsi: “Ngaleso sikhatsi, ematsambo emakhosi akaJuda, etindvuna takaJuda, ebaphristi newebaphrofethi kanye newebantfu baseJerusalema atawukhishwa emathuneni. 2 Atawendlalwa ngephansi kwelilanga, ngephansi kwenyeti nangephansi kwato tonkhe tinkhanyeti,* lokutintfo lebebatitsandza, batikhonta, batilandzela, babuta kuto futsi batikhotsamela.+ Lamatsambo ngeke abutfwe nobe angcwatjwe. Atawuba njengemcuba emhlabatsini.”+
3 Jehova wemabutfo utsi: “Bonkhe bantfu balesive lesikhohlakele labatawusindza batawutsi nasebakuto tonkhe tindzawo lengitabasakatela kuto banconote kufa kunekuphila.”
4 “Ubotsi kubo: ‘Naku Jehova lakushoko:
“Batakuwa bangasavuki yini?
Nangabe lomunye wabo ashintja indlela lebekahamba ngayo, angeke yini lomunye naye ashintje?
5 Kwentiwa yini kutsi labantfu baseJerusalema bachubeke nekungetsembeki kimi?
Abehlukani nemanga,
Abafuni nekushintja tindlela tabo.+
6 Ngachubeka ngibalalelisisa, kodvwa konkhe lebebakukhuluma bekungemanga.
Kute ngisho namunye lowayekela kwenta lokubi, nobe lowatibuta watsi: ‘Yini lena lengiyentile?’+
Bonkhe bebachubeka nekuphila ngendlela labanye lebebaphila ngayo, kuhle kwelihhashi leligijimela emphini.
7 Ngisho nadvoye uyasati sikhatsi sakhe sekutfutsela kulenye indzawo.*
Lituba, inkonjane kanye naletinye tinyoni* tiyasati sikhatsi sato sekubuyela emuva.*
Kodvwa bantfu bami abati kutsi mine Jehova ngitabehlulela nini.”’+
8 ‘Ningasho kanjani-ke nitsi: “Sihlakaniphile futsi sinemtsetfo* waJehova”?
Kantsi babhali* labanemanga basebentisa lutsi lwabo lwekubhala*+ kuze babhale emanga kuphela.
9 Bantfu labahlakaniphile bahlazekile.+
Batawesaba kakhulu futsi babanjwe lugibe.
Abakalilaleli livi laJehova,
Ungatsi bahlakaniphile nje labantfu laba?
10 Ngako bafati babo ngitabanika lamanye emadvodza,
Nemasimu abo ngiwanike labanye bantfu;+
Ngobe bonkhe batizuzisa bona ngetindlela letingaketsembeki,+ kusukela kumuntfukatana kuya kumuntfu losesikhundleni lesiphakeme;
Baphrofethi nebaphristi nabo abaketsembeki.+
11 Betama kupholisa emanceba ebantfu bami* ngekumane nje batsi,
“Kunekuthula! Kunekuthula!”
Kantsi kute kuthula.+
12 Utsi banawo nje emahloni ngetintfo letenyanyekako labatentile?
Bete ngisho nalamancane!
Abati nekutsi kunjani kuhlazeka!+
Ngako batawubulawa njengalabanye lesebabulewe.
Batawudzayitela nasengibajezisa,’+ kusho Jehova.
13 Jehova utsi: ‘Ngemuva kwekubabutsa ngitababhubhisa,
Kutawuba bete emagilebisi latawusala esihlahleni sawo, kubebete nemakhiwa latawusala esihlahleni sawo, futsi emacembe ato atawubuna.
Batawulahlekelwa nanguloko lengabanika kona.’”
14 “Sihleti leni lana?
Asihlanganeni singene emadolobheni lavikelekile+ futsi sifele khona.
Ngobe Jehova Nkulunkulu wetfu utasicotfula,
Futsi usinatsisa emanti lanashevu,+
Ngobe sonile kuJehova.
15 Besilindzele kutsi kube nekuthula, kodvwa kute lokuhle lokwenteka,
Besilindzele kutsi selashwe, kodvwa esikhundleni saloko sesihlale sesaba!+
16 KaDani kuvakala kutsimula kwemahhashi etitsa.
Kutsi nakuvakala emahhashi lamadvuna akhala
Kutamatame lonkhe live.
Letitsa tiyefika futsi tibhubhise lelive nako konkhe lokukhona,
Tibhubhise lidolobha kanye nebantfu labahlala kulo.”
17 Jehova utsi: “Ngitanitfumelela tinyoka,
Lokutinyoka letiyingoti leningeke nikhone kutilawula ngisho nangemlingo,
Futsi nakanjani titaniluma.”
18 Kute likhambi kulolusizi lwami;
Inhlitiyo yami yephukile.
19 Kuvakala bantfu labaseveni lelikhashane bakhalela lusito
Kuvakala bantfu baseSiyoni* batsi:
“Jehova akekho yini eSiyoni?
Inkhosi yakhona ayikho yini lapho?”
“Bangitfukutseliseleni ngaletithico tabo letibatiwe,
Ngalabonkulunkulu babo labangenamsebenti bakuletinye tive?”
20 “Sesicedzile kuvuna, nelihlobo selengcile,
Kodvwa tsine solo asikasindziswa!”
21 Linceba lebantfu baseSiyoni* lingivisa buhlungu kakhulu;+
Umoya wami wephukile,
Futsi ngesaba kakhulu.
22 Kantsi kute yini ibhalisamu* kaGileyadi?+
Kute yini dokotela lapho?+
Kwentiwa yini kutsi kube bete lowelapha bantfu baseSiyoni?*+
9 Kube mane inhloko yami beyingaba ngumtfombo logcwele emanti,
Kuze emehlo ami ahlale ageleta tinyembeti,+
Bengitawukhala busuku nemini
Ngikhalele bantfu bakitsi lababulewe.
2 Kube mane bengati kutsi ngingayitfolaphi indzawo lengingahlala kuyo ehlane
Bengingahamba ngibashiye bantfu bakitsi,
Ngobe bonkhe batiphingi,+
Futsi bakhohlakele.
3 Bahlale balungele kukhuluma emanga, kuhle kwemuntfu logoba butjoki alungele kudubula.
Lelive ligcwele bantfu labanemanga, kute nalabetsembekile.+
“Bachubeka benta tintfo letimbi
Futsi abanendzaba nami,”+ kusho Jehova.
4 “Nguloyo naloyo akacaphele makhelwane wakhe,
Futsi ningetsembi ngisho nabomnakenu.
5 Nguloyo naloyo wenta makhelwane wakhe silima,
Futsi kute lokhuluma liciniso.
Lulwimi lwabo sebalujwayete kukhuluma emanga.+
Emandla abo aphelela ekwenteni lokubi.
6 Wena uphila emkhatsini webantfu labanemanga.
Bayakhohlisa, futsi abafuni kungati,” kusho Jehova.
7 Ngako naku lokushiwo nguJehova wemabutfo:
“Ngitabacwengisisa futsi ngibavivinye,+
Ngobe sengingabuye ngente njani nje ngebantfu bami?
8 Lulwimi lwabo lunjengemcibisholo loyingoti, luhlale lukhuluma emanga.
Umuntfu ukhuluma kahle namakhelwane wakhe,
Kodvwa ngenhlitiyo abe amcabangela lokubi.”
9 Jehova utsi: “Ngingabajezisi yini ngenca yaloku labakwentile?
Ngingatiphindziseleli yini kulesive lesinje?+
10 Ngitawukhala ngililele tintsaba
Ngitawulilela emadlelo asehlane,
Ngobe tintsaba tishile, nemadlelo ashile, futsi sekute lohamba khona,
Ngisho nemfuyo ayisevakali.
Tinyoni telizulu netilwane tesiganga setibalekile; tonkhe tihambile.+
11 IJerusalema ngitayenta ibe yindvundvuma yematje,+ ibe ngumhume wabojakalazi,+
Emadolobha akaJuda ngitawenta asale ete lutfo, kube bete bantfu labahlala kuwo.+
12 Ngubani lohlakaniphile longakucondza loku?
Jehova ukukhulume nabani loku, kuze loyo muntfu atotjela labanye ngako?
Kungani lelive libhujisiwe?
Kwentiwe yini kutsi lishe lize lifane nelihlane,
Futsi kubebete nalohamba khona?”
13 Jehova waphendvula watsi: “Kungenca yekutsi labantfu bawalile umtsetfo* wami lengabanika wona, abakawulaleli futsi nelivi lami abakalilaleli. 14 Esikhundleni saloko baba nenkhani, benta lokufunwa tinhlitiyo tabo,+ futsi bakhonta boBhali njengobe nje bokhokho babo babafundzisa.+ 15 Ngako-ke naku lokushiwo nguJehova wemabutfo, longuNkulunkulu wema-Israyeli: ‘Labantfu ngitabadlisa sihlahla lesibabako futsi ngibanatsise emanti lanashevu.+ 16 Ngitabasakatela etiveni bona nabokhokho babo labangatati,+ ngitfumele netitsa tabo kutsi tibacoshe ngenkemba ngize ngibacedze.’+
17 Jehova wemabutfo utsi:
‘Cabangisisani ngaloku lokwentekako.
Bitani bafati labahlabela tingoma tekulila,+
Nibite nebafati labanelikhono lekulila.
18 Abafike ngekushesha basihlabelele tingoma tekulila
Khona kutawuhushuka tinyembeti emehlweni etfu
Tehlele etihlatsini tetfu.+
19 Ngobe eSiyoni kuvakele bantfu balila batsi:+
“Saze sasala ebaleni bo!
Maye saze sahlazeka!
Kudzingeke kutsi silishiye lelive, nemakhaya etfu abhidlitiwe.”+
20 Nine bafati, asenive kutsi Jehova utsini.
Lalelani loko lakushoko.
Lengoma yekulila yifundziseni emadvodzakati enu,
Futsi nani nifundzisane yona.+
21 Ngobe kufa sekungene ngisho nangemafasitelo;
Kungene emibhoshongweni yetfu levikelekile
Kwabulala bantfwana emigwacweni
Kwabulala nemajaha etimakethe.’+
22 Khuluma utsi: ‘Naku lokushiwo nguJehova:
“Tidvumbu tebantfu titawube titse nja emhlabatsini kuhle kwemcuba,
Titawuba njengakolo loshiywe ngulovunako nakacedza kuwujuba emalayinini awo,
Futsi kwaba bete lowubutsako.”’”+
23 Jehova utsi:
“Umuntfu lohlakaniphile akangatigcabhi ngekuhlakanipha kwakhe;+
Umuntfu lonemandla akangatigcabhi ngemandla akhe;
Nenjinga ayingatigcabhi ngebunjinga bayo.”+
24 “Kepha lotigcabhako akatigcabhe
Ngekutsi unekucondza futsi uyangati,+
Nangekutsi uyati kutsi mine nginguJehova, nginguNkulunkulu lobaphatsa ngelutsandvo lolucotfo bantfu labasemhlabeni, ngibaphatsa ngekulunga nangekungakhetsi,+
Ngobe ngiyakutsandza loku,”+ kusho Jehova.
25 Jehova utsi: “Kutawufika emalanga lapho ngitawujezisa bonkhe labasoke enyameni kuphela,+ 26 ngijezise baseGibhithe,+ bakaJuda,+ baka-Edomu,+ baka-Amoni+ nebakaMowabi,+ nabo bonkhe labahlala ehlane labahhule tinwele tabo ngasemabuntini.+ Loku ngitakwenta ngenca yekutsi tonkhe letive atikasoki enhlitiyweni, nangenca yekutsi sonkhe sive sema-Israyeli asikasoki enhlitiyweni.”+
10 Awu nine bantfu baka-Israyeli, lalelani nali livi lelikhulunywe nguJehova lelimelene nani. 2 Jehova utsi:
“Ningawakopi emasiko aletinye tive,+
Futsi ningetfuswa timphawu lenitibona emazulwini
Ngobe letinye tive tiyetfuka natibona letimphawu.+
3 Emasiko alabantfu ayintfo lengenamsebenti.
Afana nesihlahla lesigawulwe ehlatsini,
Bese umbati sewakha sithico ngaso.+
5 Letithico atikhulumi, tinjengentfo yekutfusa tinyoni ensimini yemakhukhamba;+
Kufanele tetfwalwe, ngobe atikhoni kuhamba.+
Ningatesabi ngobe angeke tinilimate,
Futsi angeke tinisite ngalutfo.”+
6 Awu Jehova, kute lofana nawe.+
Libito lakho likhulu futsi unemandla lamakhulu.
7 Awu Nkhosi yetive, ngubani nje longeke akwesabe?+ Ngobe vele kufanele bantfu bakwesabe.
Kubo bonkhe bantfu labahlakaniphile labakuto tonkhe tive emhlabeni,
Kute ngisho namunye lofana nawe.+
8 Bonkhe abanangcondvo futsi balibele.+
Kute umuntfu longafundziswa sithico.+
9 Tindishi telisiliva letibuya eThashishi+ neteligolide letibuya e-Ufazi,
Tisetjentiswa ngumbati nemuntfu losebenta ngensimbi kuze bahlobise letithico.
Bantfu bahlobisa letithico ngentsambo leluhlata njengesibhakabhaka nangensontfo lebukhwebeletane.*
Tonkhe letithico tentiwa bantfu labanelikhono.
10 Kodvwa Jehova unguNkulunkulu sibili.
UnguNkulunkulu lophilako+ neNkhosi yaphakadze.+
Ngenca yentfukutselo yakhe umhlaba utawutamatama,+
Futsi kute sive lesitawukhona kubeketelela lulaka lwakhe.
11* Naku lokufanele ukusho kubo:
“Labonkulunkulu labangazange badale lizulu nemhlaba
Batawushabalala emhlabeni, bashabalale ngisho nangephansi kwemazulu.”+
12 Nkulunkulu wadala umhlaba ngemandla akhe,
Ngekuhlakanipha kwakhe wamisa umhlaba wacina+
Futsi wendlala emazulu ngekucondza kwakhe.+
13 Utsi nakamemeta,
Emanti lasemazulwini agubhutele,+
Wenta kutsi kukhuphuke emafu* asuka emikhawulweni yemhlaba.+
14 Bonkhe bantfu abanangcondvo futsi bete lwati.
Bonkhe labasebenta ngensimbi batawuhlazeka ngenca yetithico labatentako;+
Ngobe letithico tabo tensimbi tiyakhohlisa,
15 Atinamsebenti, tintfo tekuhlekwa nje.+
Titawushabalala nakufika lilanga lato lekubhujiswa.
16 Kodvwa Nkulunkulu waJakobe* akafani nato,
Ngobe nguye lowadala tonkhe tintfo,
Futsi Israyeli uyintfonga yebantfu labalifa lakhe.+
Libito lakhe nguJehova wemabutfo.+
17 Phakamisa umtfwalo wakho,
Wena mfati locindzetelekile.
18 Ngobe naku lokushiwo nguJehova:
“Nyalo ngiyabacosha labo labahlala eveni,+
Futsi ngitawenta kutsi bakhatsateke.”
19 Maye mine nganali linceba!+
Lelinceba alelapheki.
Futsi ngatitjela ngatsi: “Lesi sifo sami, futsi kufanele ngisibeketelele.
20 Lithende lami lidzilitiwe, netintsambo talo tidzatjulwe tonkhe.+
Bawatsetse emadvodzana ami futsi angeke asabuya.+
Sekute nalongangelulela lithende lami nobe alimise.
Kungako bente bulima,
Futsi imihlambi yabo ihlakatekile.”+
22 Lalelani! Nati tindzaba lesisandza kutiva!
Kunesiphitsiphitsi eveni lelisenyakatfo,+
Emabutfo alo ayeta, atawutsi nakefika ente emadolobha akaJuda asale akhala libhungane, abe yindzawo yabojakalazi.+
23 Awu Jehova, ngati kahle kutsi kute umuntfu longatiphatsela yena imphilo yakhe.
Akusiko kwemuntfu kutsi aticondzisele yena imphilo yakhe.+
24 Awu Jehova, ngicondzise ngendlela wena loyibona ilungile,
25 Tfululela intfukutselo yakho etikwetive letingafuni kukulalela+
Nasetikwemindeni lengalibiti libito lakho.
Ngobe tisihlasele situkulwane saJakobe,+
Tisihlasele taze tasicotfula,+
Futsi tashiya kungenamuntfu eveni lakhe.+
11 Leli livi lelefika kuJeremiya liphuma kuJehova litsi: 2 “Awu nine bantfu, lalelani emavi alesivumelwane lengasenta!
“Lamavi watjele* bantfu labahlala kaJuda nalabahlala eJerusalema 3 utsi kubo: ‘Naku lokushiwo nguJehova Nkulunkulu wema-Israyeli: “Ucalekisiwe umuntfu longawalaleli emavi alesivumelwane,+ 4 lengawasho kubokhokho benu ngelilanga lengabakhipha ngalo eveni laseGibhithe,+ lokulive lebebahlupheka kulo,*+ ngatsi: ‘Lalelani livi lami, futsi nente konkhe lenginiyala ngako, nanenta njalo nitawuba bantfu bami, mine ngibe nguNkulunkulu wenu,+ 5 kuze ngifeze sifungo lengasenta kubokhokho benu, sekubaniketa live leligeleta lubisi neluju,+ njengobe nje lesifungo sisasebenta nalamuhla.’”’”
Ngaphendvula ngatsi: “Awu Jehova, akube njalo.”*
6 Jehova wase utsi kimi: “Onkhe lamavi wamemetele emadolobheni akaJuda nasetitaladini taseJerusalema, utsi: ‘Lalelani emavi alesivumelwane futsi niwente. 7 Kusukela ngelilanga lengakhipha ngalo bokhokho benu eGibhithe bengisolo ngibecwayisa, futsi kuze kube ngulamuhla solo ngitsi:* “Lalelani livi lami.”+ 8 Kodvwa abazange bangilalele nobe banginake, esikhundleni saloko bachubeka benta tintfo letifunwa tinhlitiyo tabo letimbi.+ Bala kwenta loko lebengibayale kutsi bakwente, ngako ngabese ngikwenta konkhe loko lebengikushito kulesivumelwane.’”
9 Jehova wabese utsi kimi: “Bantfu bakaJuda nalabahlala eJerusalema bente licebo lelimelene nami. 10 Babuyele etonweni tabokhokho babo labangazange bawalalele emavi ami.+ Nabo balandzele labanye bonkulunkulu futsi babakhonta.+ Bantfu baka-Israyeli nebakaJuda bephule sivumelwane lengasenta nabokhokho babo.+ 11 Ngako naku lokushiwo nguJehova: ‘Ngitabaletsela inhlekelele+ labangeke bakhone kuyibalekela. Batawutsi nabakhalela lusito kimi, mine ngingabalaleli.+ 12 Bantfu bakaJuda nebaseJerusalema batawubese bayocela lusito kubonkulunkulu labenta kubo imihlatjelo,*+ kodvwa labonkulunkulu angeke babasite nasebehlelwa ngulenhlekelele. 13 Ngobe bonkulunkulu bakho wena Juda sebanyenti kakhulu, sebangangemadolobha akho futsi wakhe ema-al’thare lamanyenti aba ngangetitaladi taseJerusalema, wawakhela kunikelela Bhali, longunkulunkulu lolihlazo.’+
14 “Kodvwa wena* ungabathantazeli labantfu. Ungabakhaleli kimi nobe ubathantazele,+ ngobe nasebehlelwe yinhlekelele angeke ngilalele nabangibita.
15 Bantfu bami lengibatsandzako bafunani endlini yami
Babe benta tintfo letimbi?
Lenhlekelele lengitabaletsela yona bangayivimba yini ngekutsi bente imihlatjelo yetilwane?*
Batawujabula yini ngekutsi lenhlekelele ayikabehleli?
16 Jehova wake wanibita ngekutsi nisihlahla semncumo lesiluhlata,
Sihlahla lesihle lesinetitselo letinhle.
Kwaba nemsindvo lomkhulu, futsi Nkulunkulu walumeka lesihlahla ngemlilo,
Futsi titsa tephula emagala aso.
17 “Jehova wemabutfo lowakuhlanyela+ utsite wena Juda utawehlelwa yinhlekelele ngenca yebubi lowabenta ukanye nema-Israyeli, ngesikhatsi nimtfukutselisa ngekwentela Bhali imihlatjelo.”+
18 Awu Jehova, wena ungitjele loku kuze ngati;
Ngaleso sikhatsi wangenta ngakubona loko labakwentako.
19 Nganginjengemvu leyohlatjwa.
Bengingati kutsi benta lisu lelimelene nami, batsi:+
“Asisibulale lesihlahla kanye netitselo taso,
Asimbulaleni,
Kuze ligama lakhe lingaphindzi likhunjulwe.”
20 Kodvwa wena Jehova wemabutfo wehlulela ngekulunga;
Shengatsi ngingabona nawungiphindziselela kubo,
Ngobe lendzaba sengiyishiyela kuwe.
21 Ngako-ke naku lokushiwo nguJehova ngemadvodza ase-Anathothi+ lafuna kukubulala, futsi latsi kuwe: “Yekela lokuphrofetha ngelibito laJehova,+ ngale kwaloko sitakubulala”; 22 ngako Jehova wemabutfo utsi: “Ngitawubenta baphendvule ngaloku. Emajaha akhona atawubulawa ngenkemba,+ futsi emadvodzana abo nemadvodzakati abo atawubulawa yindlala.+ 23 Kute ngisho namunye lotawusala kubo, ngobe emadvodza ase-Anathothi+ ngitawenta ehlelwe yinhlekelele ngemnyaka lengitawajezisa ngawo.”
12 Awu Jehova, wena unguNkulunkulu lolungile,+ nangiletsa sikhalo sami kuwe
Futsi nangikhuluma ngetindzaba tekwehlulela kwakho, wena wenta ngekulunga.
Kodvwa kwentiwa yini kutsi lababi baphumelele?+
Futsi kwentiwa yini kutsi bantfu labakhohlakele kube bete labakhatsateka ngako?
2 Wena wabahlanyela futsi nyalo sebasimeme.
Sebakhule baze batsela titselo.
Bahlale bakhuluma ngawe, kepha etinhlitiyweni* tabo abanendzaba nawe.+
3 Kodvwa wena Jehova ungati kahle+ futsi uyangibona;
Uyihlolisisile inhlitiyo yami, wayitfola yetsembele kuwe.+
Behlukanise njengetimvu letiyohlatjwa,
Futsi ubabekele lilanga labatawubulawa ngalo.
4 Kutawuze kube ngunini solo lelive lihhohloka
Netjani lobusemasimini boma?+
Ngenca yebubi lobentiwa ngulabo labahlala emhlabeni,
Tilwane tesiganga kanye netinyoni setiphelile.
Ngobe batsite: “Akaboni kutsi kutakwentekani kitsi.”
Nangabe uva ulondzekile eveni lelinekuthula,
Kutawuba njalo yini nasewusemahlatsini lahlangene langaseJordane?
6 Ngisho nabomnakenu, labo lotalwa nabo,
Abaketsembeki kuwe.+
Bakufisele lokubi.
Ungacali ubetsembe,
Ngisho nome bakhuluma kahle nawe.
7 “Ngiyilahlile indlu yami;+ Ngibashiyile bantfu labalifa lami.+
Bantfu bami lengibatsandzako ngibanikele etitseni tabo.+
8 Bantfu labalifa lami sebafana nelibhubesi lelisehlatsini.
Sebayangibhodlela.
Kungako sengibenyanya.
9 Bantfu labalifa lami banjengelingce lelimabalabala,
Lamanye emangce ayalitungeleta futsi alihlasele.+
Wotani nonkhe nine tilwane tesiganga, nihlangane ndzawonye,
Wotani nitewudla lelingce.+
Lendzawo yami lenhle bayigucule yaba lihlane lelingenalutfo.
11 Nyalo seyigucuke yaba yindzawo lengenamsebenti.
Lonkhe lelive lishiywe lingenalutfo,
Kodvwa kute umuntfu lonendzaba nalo.+
12 Titsa letibhubhisako setifikile, tichamuke ngato tonkhe tindlela letidzabula ehlane,
Ngobe inkemba yaJehova ibhubhisa bantfu kusukela lakucala khona lelive kuze kuyofika ekugcineni kwalo.+
Kute lonekuthula.
13 Bahlanyele kolo, kodvwa bavune emanyeva.+
Basebente kamatima, kodvwa kute labakutfolile.
Sivuno sabo sitawubenta babe nemahloni
Ngobe Jehova ubatfukutselele kakhulu.”
14 Jehova utsi: “Bonkhe bomakhelwane bami lababi, lababhubhisa live lengalinika bantfu bami lokungema-Israyeli,+ ngitabasusa eveni labo,+ ngisuse nendlu yaJuda emkhatsini wabo. 15 Kodvwa nasengibasusile ngitawuphindze ngibe nemusa kubo futsi nguloyo naloyo ngimbuyisele endzaweni lelifa lakhe naseveni lakhe.”
16 “Nangabe batawufundza kutiphatsa njengebantfu bami futsi bafunge ngelibito lami batsi: ‘Ngifunga Jehova Nkulunkulu lophilako!’ njengobe nje nabo bake bafundzisa bantfu bami kufunga ngaBhali, batawubese bahlala nebantfu bami. 17 Kodvwa nangabe bala kulalela, ngitasisusa leso sive, ngisicedze siphele nya,” kusho Jehova.+
13 Jehova utsite kimi: “Hamba uyotsenga libhande lelineni futsi ulibophe elukhalo lwakho, kodvwa ungalenyi emantini.” 2 Ngako ngalitsenga lelibhande njengobe nje Jehova bekashito, futsi ngalibopha elukhalo. 3 Jehova waphindze wakhuluma nami watsi: 4 “Tsatsa lelibhande lolitsengile futsi lolibophe elukhalo, uhambe nalo uye eYufrathe, ufike ulifihle esikhaleni selidvwala lelichekekile.” 5 Ngako ngahamba ngayolifihla eYufrathe njengobe nje Jehova bekashito.
6 Kodvwa ngemuva kwemalanga lamanyenti Jehova watsi kimi: “Hamba uye eYufrathe ufike utsatse lelibhande lengatsi lifihle lapho.” 7 Ngako ngaya eYufrathe ngafike ngagubha, ngakhipha lelibhande lapho bengilifihle khona, futsi ngabona kutsi beselonakele; beseliyintfo nje lengenamsebenti.
8 Jehova wase utfumela livi kimi watsi: 9 “Naku lokushiwo nguJehova: ‘Kutikhukhumeta kwesive sakaJuda nekutikhukhumeta kwebantfu baseJerusalema kutawuba lite njengalelibhande.+ 10 Labantfu lababi batawuba njengalelibhande leseliyintfo lengenamsebenti. Abafuni kulalela emavi ami,+ benta loko lokufunwa tinhlitiyo tabo,+ balandzela labanye bonkulunkulu, babakhonte futsi babakhotsamele.’ 11 Jehova utsi: ‘Njengobe nje libhande liboshwa elukhalo lwemuntfu, nami ngababophela kimi bantfu baka-Israyeli nebakaJuda, kuze babe bantfu bami,+ batsandzeke kimi,+ ngitfole inkhatimulo ngabo, futsi ngitfole ludvumo ngabo. Kepha-ke abazange bangilalele.’+
12 “Naku lokunye lokufanele ubatjele kona: ‘Jehova Nkulunkulu wema-Israyeli utsi: “Nibotigcwalisa ngeliwayini tonkhe timbita letinkhulu.”’ Bona batakuphendvula batsi: ‘Kantsi tsine asati yini kutsi tonkhe timbita letinkhulu kufanele tigcwaliswe ngeliwayini?’ 13 Ubobese utsi kubo: ‘Jehova utsi: “Ngitawunatsisa bonkhe bantfu bakulelive liwayini baze badzakwe,+ ngilinatsise emakhosi lahlala esihlalweni sebukhosi saDavide, baphristi, baphrofethi nabo bonkhe bantfu baseJerusalema. 14 Ngitabenta balimatane bodvwa, bobabe balimatane nemadvodzana abo.+ Angeke ngibakhalele nobe ngibavele buhlungu nobe ngibentele umusa. Kute nalokutangivimba kutsi ngibacotfule,” kusho Jehova.’+
15 Lalelani futsi ninakisise.
Ningatikhukhumeti ngobe Jehova sewukhulumile.
16 Dvumisani Jehova Nkulunkulu wenu
Ngaphambi kwekutsi ente kube mnyama
Ngaphambi kwekutsi nigileke etintsabeni nasekuhwalele.
17 Nangabe ningafuni kulalela,
Ngitawukhala emasitseleni ngenca yekutigcabha kwenu.
18 Ubotjela inkhosi nendlovukazi+ utsi: ‘Yehlani etihlalweni tenu tebukhosi,
Ngobe imichele yenu lemihle itawudzilika etinhloko tenu.’
19 Emadolobha aseningizimu avaliwe,* futsi kute nalongawavula.
Bonkhe bantfu bakaJuda batfunjiwe, kwangasali ngisho namunye.+
20 Phakamisa emehlo akho* ubuke labo labachamuka enyakatfo.+
Uphi lomhlambi lowaniketwa wona, lokutimvu takho letinhle?+
21 Utawenta njani-ke nase ujeziswa
Ngulabo lebebasolo babangani bakho labakhulu?+
Angeke yini uve buhlungu lobukhulu, njengalobo lobuviwa ngumfati nakabeleka?+
22 Nakwenteka utibuta utsi: ‘Tingehlele leni letintfo?’+
Ubokwati kutsi tono takho letinyenti ngito letente kutsi ukhunyulwe tidvwaba takho,+
Tenta nekutsi ufutselwe titsendze takho.
23 UmTopiya* angalishintja yini libala lesikhumba sakhe, nengwe ingawashintja yini emabala ayo?+
Nakungatsiwa loku kuyenteka, nani ningakwenta lokuhle
Nine lenejwayele kwenta lokubi.
24 Ngako-ke ngitanisakata njengetinhlanga letipheshulwa ngumoya wasehlane.”+
25 Jehova utsi: “Nguloku-ke lokutakwenteka kuwe, lokusabelo lengikunika sona
Ngenca yekutsi ungikhohliwe+ futsi wetsemba tintfo letingemanga.+
26 Ngitawugwabula tidvwaba takho tibuye ebusweni,
Kuze kubonakale bungcunu bakho,+
27 Kubonakale kuphinga+ kwakho nekushiswa kwakho yinkhanuko,
Kanye nebugwadla bakho lobushwacisa lugogo.*
Emagcumeni nasetigangeni,
Ngikubonile kutiphatsa kwakho lokwenyanyekako.+
Awu wena Jerusalema!
Utawuhlale ungcolile kuze kube kunini?”+
14 Naku Jehova lakutjela Jeremiya mayelana nesomiso:+
2 Bantfu bakaJuda bayalila,+ nemagede akhona awile.
Emagede akhona awele phansi,
Nebantfu baseJerusalema bayakhala.
3 Baphatsi batfuma tisebenti tabo kutsi tiyokha emanti.
Kodvwa titsi natiya emitfonjeni* tingawatfoli.
Tibese tibuya netimbita letingenalutfo.
Tidliwa ngemahloni, tijabhe,
Futsi timbonye netinhloko tato.
4 Umhlabatsi sewugatukile,
Ngobe litulu alini kulelive.+
Ngako balimi bakhatsatekile futsi bambonye tinhloko tabo.
5 Ngisho nenyamatane lesesigangeni ishiya lizinyane layo lelisandza kutalwa,
Ngobe kute tjani.
6 Timbongolo* tima emagcumeni,
Tihefutele njengabojakalazi.
Emehlo ato sekaze adziniwe ngobe solo tifuna tjani kodvwa atibutfoli.+
7 Nanobe tono tetfu tisilahla,
Kodvwa wena Jehova sicela usisite ngenca yelibito lakho.+
Ngobe kunyenti lesikwentile lokukhombisa kutsi asiketsembeki kuwe,+
Futsi sonile nakuwe.
8 Awu Nkulunkulu lolitsemba lema-Israyeli, wena longuMsindzisi+ wawo ngetikhatsi tekuhlupheka,
Utentelani nje sihambi kulelive,
Ulingise sihambi lesihlala busuku bunye?
9 Wentani nje ulingisa umuntfu lomangele?
Ulilingiselani lichawe lelingakhoni kusindzisa bantfu balo?
Sicela ungasilahli.
10 Naku Jehova lakushoko ngalabantfu: “Abahlaliseki;+ bayehluleka kutibamba, baya nobe ngukuphi.+ Ngako mine Jehova angijabuli ngabo.+ Ngitawakhumbula emaphutsa abo futsi ngibajezise ngenca yetono tabo.”+
11 Jehova wabese utsi kimi: “Ungathantazeli kutsi tintfo tibahambele kahle labantfu.+ 12 Nabazila kudla, angikulaleli kukhala kwabo.+ Ngisho nobe benta iminikelo yekushiswa lephelele neminikelo yalokutinhlavu angijabuli ngayo.+ Esikhundleni saloko ngitababulala ngenkemba, ngibabulale ngendlala nangesifo lesibulalako.”+
13 Nangiva loko ngatsi: “Awu Nkhosi Lephakeme Jehova! Baphrofethi batsi kulabantfu: ‘Angeke nihlaselwe yimphi nendlala, kodvwa Nkulunkulu utawunenta nibe nekuthula mbamba kulendzawo.’”+
14 Jehova wabese utsi kimi: “Labaphrofethi baphrofetha tintfo letingemanga ngelibito lami.+ Angikabatfumi, futsi angikake sengikhulume nabo kutsi basho loku labakushoko.+ Baphrofetha imibono lengemanga netintfo letilite labatibona nabaphengula, futsi baphrofetha nangetindzaba labaticambele tona.+ 15 Ngako Jehova utsi: ‘Labaphrofethi ngitababulala ngenkemba nangendlala. Baphrofetha ngelibito lami ngisho nobe ngingakabatfumi futsi batsi lelive ngeke lihlaselwe yimphi nobe indlala.+ 16 Nalabantfu labaphrofetha kubo batawubulawa yindlala kanye nemphi futsi tidvumbu tabo titawujikwa etitaladini taseJerusalema. Kutawuba bete lotawubangcwaba,+ nobe angcwabe bafati babo, emadvodzana abo kanye nemadvodzakati abo, ngobe mine ngitabehlisela inhlekelele, lokuyintfo lebafanele.’+
17 “Kufanele utsi kubo:
‘Shengatsi emehlo ami angageleta tinyembeti busuku nemini, tihushuke siphelane,+
Ngobe bantfu bami* bashaywe kabuhlungu,+
Futsi linceba labo liyesabeka.
18 Nangiphumela ngephandle kwelidolobha bese ngiphonsa emehlo,
Ngibona bantfu lababulewe ngenkemba.+
Nangingena ngekhatsi edolobheni,
Ngibona bantfu labahlaselwe yindlala.+
Baphrofethi nebaphristi baye eveni labangalati.’”+
19 Awu Nkulunkulu, sewubalahle mbamba yini bantfu bakaJuda, futsi iSiyoni seyiyenyanyeka yini kuwe?+
Usishayeleni? Nyalo sekute nalokungaselapha.+
Besilindzele kutsi kube nekuthula, kodvwa kute lokuhle lokwenteka,
Besilindzele kutsi selashwe, kodvwa esikhundleni saloko sesihlale sesaba!+
20 Awu Jehova, siyavuma kutsi sente tintfo letimbi,
Siyativuma netono tabokhokho betfu.
Sonile kuwe.+
21 Ungasilahli, sale nje wentela libito lakho,+
Ungasibukeli phansi sihlalo sakho sebukhosi lesikhatimulako.
Khumbula sivumelwane lowasenta natsi, futsi ungasephuli.+
22 Kulabonkulunkulu labangenamsebenti betive, ukhona yini longaletsa imvula?
Kungenteka yini kutsi emazulu asukeleke nje ehlise imvula?
Awu Jehova Nkulunkulu wetfu, nguwe kuphela longakwenta loku.+
Tsine setsembele kuwe,
Ngobe nguwe kuphela lowente tonkhe letintfo.
15 Jehova wabese utsi kimi: “Ngisho nobe boMosi naSamuweli bebangema embikwami,+ bengingeke ngibentele umusa labantfu. Basuse lambikwami. Abahambe. 2 Nabakubuta batsi: ‘Sihambe siyephi?’ ubotsi kubo: ‘Jehova utsi:
“Nobe ngubani lofanelwe kubulawa sifo lesingumshayabhuce, asimbulale.
Nobe ngubani lofanelwe kufa ngenkemba, akabulawe ngayo.+
Nobe ngubani lofanelwe kubulawa yindlala, ayimbulale,
Futsi nobe ngubani lofanelwe kutfunjwa, akatfunjwe.”’+
3 “Jehova utsi: ‘Ngitawubangela kutsi behlelwe tintfo letine letimbi.*+ Batawubulawa ngenkemba, tidvumbu tabo titawuhudvulwa tinja, futsi tinyoni temazulu netilwane tesiganga titawubadla tibacedze.+ 4 Ngitawenta yonkhe imibuso lesemhlabeni yesabe nayibabona.+ Loku ngitakwenta ngenca yaloko Manase indvodzana yaHezekiya, inkhosi yakaJuda lakwenta eJerusalema.+
5 Awu Jerusalema, ngubani nje lotakuhawukela,
Ngubani lotakuvela,
Futsi ngubani lotawutsi nakendlula abute kutsi unjani?’
Ngako ngitawelula sandla sami ngimelane nabo futsi ngibabhubhise.+
Sengidziniwe kubavela buhlungu.*
7 Ngitabahlunga njenganakweliwa kolo emagedeni akulelive.
Ngitawubulala bantfwana babo.+
Ngitababhubhisa bantfu bami
Ngobe abafuni kuyekela imikhuba yabo.+
8 Ngitakwenta kutsi bafelokati bakulelive babe banyenti kakhulu kunesihlabatsi saselwandle.
Emini ngitawuletsa sitsa lesitobhubhisa kuze sihlasele bomake nemajaha.
Ngekushesha nje ngitawenta kutsi bakhatsateke futsi besabe kakhulu.
9 Umfati lonebantfwana labangu-7 sewuphelelwe ngemandla;
Sewuphefumula kabuhlungu.
Nanobe kusesemini, yena ubona ngatsi sekumnyama,
Uhlazekile futsi udliwa ngemahloni.*
Bantfu labambalwa labasele
Ngitabanikela etitseni tabo kuze tibabulale ngenkemba,’ kusho Jehova.”+
10 Maye waze wangenta make ngekungitala,+
Bonkhe bantfu bahlale nje bacabana nami futsi bangilwisa.
Kute intfo lengike ngayiboleka kumuntfu nobe ngabolekisa ngayo;
Kodvwa bonkhe bayangicalekisa.
11 Jehova watsi: “Nakanjani ngitakwentela lokuhle;
Ngitakusita ngesikhatsi senhlekelele,
Ngikusite nawucindzetelekile kuze sitsa singakuhlaseli.
12 Ukhona yini umuntfu longephula insimbi ibe ticucu,
Ephule insimbi lephuma enyakatfo, ephule nelitfusi?
13 Titsa tenu ngitatinika tintfo tenu letiligugu nemcebo wenu,+
Ngitatinika mahhala, ngenca yato tonkhe tono lenitentile kulo lonkhe lelive.
14 Letintfo ngitatinika titsa tenu
Kuze tihambe nato tiye eveni leningalati.+
Ngobe intfukutselo yami yente kwavutsa umlilo,
Futsi nyalo uyanishisa.”+
15 Awu Jehova, wena uyakwati kuhlupheka kwami,
Ngikhumbule futsi unginake.
Ngiphindziselele kulabo labangihluphako.+
Mane ungababeketeleli sikhatsi lesidze ngobe ngitawuze ngife.
Khumbula kutsi ngihlushwa ngenca yelibito lakho.+
16 Emavi akho atsi nakefika kimi ngawafaka enhlitiyweni,*+
Enta inhlitiyo yami yajabula kakhulu futsi yatfokota,
Ngobe ngibitwa ngelibito lakho, wena Jehova Nkulunkulu wemabutfo.
17 Angihlali nebantfu labatsandza emadzili futsi angijabuli kanye nabo.+
Ngitihlalela ngedvwa ngobe nguwe longicondzisako,
Futsi nami tiyangitfukutselisa letintfo letimbi labatentile.*+
18 Kwentiwa yini kutsi buhlungu bami bungapheli nelinceba lami lingapholi?
Alelapheki.
Utangifananela nemtfombo wemanti lowomile yini,
Futsi lengingeke ngiwetsembe?
19 Ngako-ke Jehova utsi:
“Nawubuya kimi, ngitawuphindze ngikwemukele,
Futsi utawuchubeka ungisebentela,*
Nawukhona kwehlukanisa tintfo letiligugu kuletilite,
Ngitawusebentisa wena kuze ungikhulumele.
Kutawuba kubo kutsi bayafuna yini kuhambisana nawe,
Kodvwa wena ngeke uhambisane nabo.”
20 “Ngikwenta kutsi ube lubondza kulabantfu, lubondza lolucinile lwelitfusi.+
Batakulwa nawe,
Ngobe mine nginawe, ngitakusindzisa futsi ngikukhulule,” kusho Jehova.
21 “Ngitakukhulula kubantfu lababi
Ngikusindzise kulabo labatidlova.”
16 Jehova waphindze wakhuluma nami watsi: 2 “Ungacali utsatse umfati, futsi ungabi nemadvodzana nemadvodzakati kulendzawo. 3 Ngobe naku lokushiwo nguJehova mayelana nemadvodzana nemadvodzakati latalwa kulendzawo nangabomake bawo nabobabe bawo: 4 ‘Batawubulawa tifo letibulalako,+ kodvwa kute lotabalilela nobe abangcwabe. Batawufanana namanyolo emhlabatsini.+ Batawubulawa ngenkemba, babulawe nayindlala,+ futsi tidvumbu tabo titawuba kudla kwetinyoni telizulu nekwetilwane tesiganga.’
5 Ngobe naku lokushiwo nguJehova:
‘Ungangeni endlini lakulilwa khona,
Futsi ungayi kuyokhala nobe uyobalilela.’+
Jehova utsi: ‘Angiphindzi ngibente babe nekuthula labantfu,
Futsi angeke ngisabatsandza ngelutsandvo lolucotfo nobe ngibentele umusa.+
6 Bantfukatana netikhulu batawufela kulelive.
7 Kute nalotawubaletsela kudla labo labalilako,
Kuze abadvudvute kulolusizi lwekufelwa;
Kute nalotabanika liwayini lelitabadvudvuta,
Labangalinatsa njengobe bafelwe bobabe babo nobe bomake babo.
8 Ungangeni nasendlini lakwentiwe khona lidzili,
Kuze uhlale phansi nabo udle futsi unatse nabo.’
9 “Ngobe Jehova wemabutfo longuNkulunkulu wema-Israyeli utsi: ‘Ngitawucedza umsindvo wekujabula newekutfokota, ngicedze nenjabulo yemkhwenyane neyamakoti. Konkhe loku ngitakwenta kulendzawo, ngikwente nisaphila futsi nitatibonela ngewenu.’+
10 “Utawutsi nawutjela labantfu konkhe loku bakubute batsi: ‘Kungani Jehova atsite utasehlisela konkhe lokuhlupheka lokungaka? Soneni, futsi nguliphi liphutsa lesilentile kuJehova Nkulunkulu wetfu?’+ 11 Ubotsi kubo: ‘Jehova utsi: “Kungenca yekutsi bokhokho benu bangilahla.+ Bachubeka balandzela labanye bonkulunkulu, babakhonta futsi babakhotsamela.+ Kodvwa mine bangishiya, nemtsetfo wami abazange bawugcine.+ 12 Nine senenta lokubi kakhulu kwendlula bokhokho benu,+ futsi nonkhe ninenkhani, nenta lokufunwa tinhlitiyo tenu letimbi kunekutsi ningilalele.+ 13 Ngako ngitanicosha kulelive nginiyise eveni nine nabokhokho benu leningalati,+ futsi nasenilapho nitawukhonta labanye bonkulunkulu busuku nemini,+ ngobe ngeke nginentele umusa.”’
14 “Jehova utsi: ‘Kutawufika emalanga lapho bantfu bangeke basatsi: “Sifunga Jehova Nkulunkulu lophilako lowakhipha ema-Israyeli eGibhithe!”+ 15 kunaloko batawutsi: “Sifunga Jehova Nkulunkulu lophilako lowakhipha bantfu baka-Israyeli eveni lasenyakatfo, wabakhipha kuwo onkhe emave lebekabasakatele kuwo!” futsi mine ngitababuyisela eveni labo lebengilinike bokhokho babo.’+
16 Jehova utsi: ‘Ngibita badwebi labanyenti,
Futsi batabafuna baze bababambe.
Ngemuva kwaloko ngitawubita batingeli labanyenti,
Batawubatingela kuto tonkhe tintsaba nakuwo onkhe emagcuma
Babatingele nasetikhaleni temadvwala lachekekile.
17 Ngobe emehlo ami akubona konkhe labakwentako.*
Kute labangangifihlela kona,
Nemaphutsa abo ngiwabona onkhe.
18 Kodvwa ngisengakababuyisi, ngitawucale ngibajezisele onkhe emaphutsa abo netono tabo,+
Ngobe balingcolisile live lami ngetithico tabo letenyanyekako futsi letingaphili,*
Lifa lami baligcwalise ngetintfo letenyanyekako.’”+
19 Awu Jehova, wena ungemandla ami futsi ngiphephela kuwe,
Uyindzawo lengingakhosela kuyo nangicindzetelekile.+
Tive titakuta kuwe tisuka emikhawulweni yemhlaba,
Futsi titawutsi: “Bokhokho betfu bebasolo bakhonta bonkulunkulu bemanga kusukela kulesinye situkulwane kuye kulesinye,
Bakhonta tintfo letilite naletingenamsebenti.”+
20 Umuntfu angatakhela yini bonkulunkulu?
Loko latakhela kona akusibo nje bonkulunkulu.+
21 “Ngako-ke ngitawubenta bati,
Ngaleso sikhatsi ngitawubenta bawati emandla ami nebukhulu bami,
Futsi batawubese bayati kutsi libito lami nguJehova.”
17 “Sono sebantfu bakaJuda sibhalwe phansi ngelutsi lwekubhala.
Sibhalwe etinhlitiyweni tabo ngesihloko sedayimane
Sabhalwa nasetimphondvweni tema-al’thare abo.
2 Ngisho nemadvodzana abo akhumbula ema-al’thare netinsika tabo letingcwele,*+
Letiseceleni kwesihlahla lesikhulu lesiluhlata, emagcumeni laphakeme,+
3 Kanye nasetintsabeni letisesigangeni.
Awu nine bantfu bakaJuda, titsa tenu ngitatinika wonkhe umcebo wenu nato tonkhe tintfo tenu letiligugu,+
Ngitinike netindzawo tenu letiphakeme ngenca yato tonkhe tono lenitentile kulelive.+
4 Lifa lenganinika lona nitawuvele nililahle ningakaphocelelwa ngumuntfu.+
Ngitawenta nekutsi nisebentele titsa tenu eveni leningalati,+
Futsi itawuvutsa siphelane.”
5 Jehova utsi:
“Ucalekisiwe umuntfu* lowetsembela kubantfu,+
Abeke litsemba lakhe emandleni ebantfu,*+
Futsi ashiye Jehova.
6 Utawufana nesihlahla lesitimele sodvwa elugwadvule.
Angeke atibone netintfo letinhle,
Kodvwa utawuhlala etindzaweni letome kheshe letisehlane,
Eveni lelineluswayi, lapho kute umuntfu longaphila khona.
8 Utawuba njengesihlahla lesihlanyelwe ngasemfuleni,
Lesenabisela timphandze taso kuwo.
Angeke eve ngisho nobe lilanga lishisa kakhulu,
Nemacembe akhe atawuhlale amahle.+
Angeke akhatsateke nangemnyaka wesomiso,
Futsi utawuhlale atsela titselo.
9 Inhlitiyo ikhohlakele* kwengca tonkhe tintfo futsi ingenta nobe ngabe yini lembi.*+
Ngubani nje longayicondza?
10 Mine Jehova ngiphenya inhlitiyo,+
Ngihlolisise imicabango lejulile,*
Kuze wonkhe umuntfu ngimnike lokumfanele, kuye ngetindlela takhe
Nangemisebenti yakhe.+
11 Njengentsendzele lefukamela emacandza lengakawataleli,
Utawutsi nakasekhatsi nemphilo yakhe, lomcebo umphelele,
Futsi ekugcineni utawubonakala angenangcondvo.”
12 Sihlalo sebukhosi lesikhatimulako saphakanyiswa kusukela ekucaleni,
Futsi siyindzawo yetfu lengcwele.+
13 Awu Jehova, wena ulitsemba lema-Israyeli,
Bonkhe labakulahlako batawuhlazeka.
Emagama alabo labakuhlubukako* atawubhalwa elutfulini,+
Ngobe bamlahlile Jehova, longumtfombo wemanti ekuphila.+
14 Awu Jehova ngelaphe, futsi ngitawelapheka.
Ngisindzise futsi ngitawusindza,+
Ngobe ngidvumisa wena.
15 Kunebantfu labatsi kimi:
“Kungani solo lingafezeki livi laJehova?+
Alimane lifezeke bo!”
16 Kodvwa mine angizange ngiyekele kukulandzela nekuba ngumelusi,
Nobe ngilangatelele lilanga lenhlekelele.
Wena ukwati kahle konkhe lengakukhuluma ngemlomo wami;
Konkhe kwenteka embikwakho.
17 Ungangesabisi.
Wena usiphephelo sami ngesikhatsi senhlekelele.
18 Shengatsi labo labangihluphako bangahlazeka,+
Kodvwa mine ungangenti ngihlazeke.
Shengatsi bangafikelwa kwesaba,
Kodvwa mine ungangenti ngesabe.
Baletsele inhlekelele,+
Ubafihlite futsi ubabhubhise baphele nya.
19 Jehova watsi kimi: “Hamba ume egedeni lelikhulu* lelisetjentiswa ngemakhosi akaJuda nawangena futsi aphuma, ume nakuwo onkhe emagede aseJerusalema.+ 20 Ubotsi kubo: ‘Lalelani nali livi laJehova nine makhosi akaJuda, nani nonkhe nine bantfu bakaJuda, kanye nani nonkhe lenihlala eJerusalema futsi leningena kulamagede. 21 Jehova utsi: “Nibotigadza, ningawetfwali umtfwalo ngeliSabatha nobe niwungenise emagedeni aseJerusalema.+ 22 Ningacali nikhiphe imitfwalo emitini yenu ngeliSabatha; ningasebenti nje kwasanhlobo.+ Lilanga leliSabatha niboligcina lingcwele, njengobe nje ngayala bokhokho benu.+ 23 Kodvwa abazange bangilalele* nobe banginake, futsi bala ngemabomu* kungihlonipha nekulalela nabayalwa.”’+
24 “‘Jehova utsi: “Kodvwa nangabe nitangilalela mbamba, kube bete imitfwalo leniyingenisa kulamagede alelidolobha ngeliSabatha, futsi nelilanga leliSabatha niligcine lingcwele ngekutsi ningasebenti ngalelilanga,+ 25 emakhosi lahlala esihlalweni sebukhosi saDavide+ atawungena ngemagede alelidolobha akanye netindvuna tawo. Wona kanye netindvuna tawo batawuta bagibele tincola nemahhashi, baphekeletelwa bantfu bakaJuda nebaseJerusalema;+ futsi kutawuhlale kunebantfu kulelidolobha phakadze naphakadze. 26 Bantfu batawuchamuka emadolobheni akaJuda, etindzaweni letitungelete iJerusalema, eveni lakaBhenjamini,+ bachamuke endzaweni lebekile,+ esifundzeni setintsaba kanye naseNegebhu,* baletse iminikelo yekushiswa lephelele,+ imihlatjelo,+ iminikelo yalokutinhlavu,+ emakha esihlahla semphepho, kanye nemihlatjelo yekubonga, konkhe loku bakuletse endlini yaJehova.+
27 “‘“Kodvwa nangabe ningangilaleli futsi liSabatha ningaligcini lingcwele, netfwale nemitfwalo futsi niyingenise emagedeni aseJerusalema ngelilanga leliSabatha, mine-ke ngitawulumeka emasango alelidolobha ngemlilo, lomlilo utawushisa imibhoshongo levikelekile yaseJerusalema+ futsi angeke ucimeke.”’”+
18 Jehova watsi kuJeremiya: 2 “Yehlela endlini yembumbi,+ futsi nasewulapho ngitawukhuluma nawe.”
3 Ngako ngehlela kulendlu yembumbi futsi ngamkhandza abumba ludziwo.* 4 Kodvwa loludziwo lebekalubumba ngelubumba lonakala esandleni sakhe. Ngako lombumbi wabese ubumba lolunye ludziwo, walubumba ngendlela lebekafuna ngayo.*
5 Jehova wase utfumela livi kimi watsi: 6 “Naku lokushiwo nguJehova: ‘Awu nine bantfu baka-Israyeli, ngingehluleka yini kukwenta kini loku lokwentiwe ngulombumbi? Njengelubumba lolusesandleni sembumbi, nani ninjalo esandleni sami, nine bantfu baka-Israyeli.+ 7 Nobe nini nangitsi ngitawusiphula umbuso nobe sive, ngisibhidlite futsi ngisibhubhise,+ 8 kodvwa lesive sibuyekele lobubi lebengisekhute ngabo, mine-ke ngitawushintja ingcondvo yami* ngingasasehliseli lenhlekelele lebengitimisele kusiletsela yona.+ 9 Kodvwa nakwenteka ngitsi ngitawakha umbuso nobe sive futsi ngisente sisime, 10 kepha sona sente lokubi emehlweni ami, singalilaleli livi lami, ngitawubese ngishintja ingcondvo yami,* ngingasasenteli lokuhle lebengifuna kusentela kona.’
11 “Nyalo-ke ngicela ukhulume nebantfu bakaJuda nebaseJerusalema utsi kubo: ‘Jehova utsi: “Ngihlela kunehlisela inhlekelele futsi nginentela lisu kuze ngimelane nani. Ngicela niyekele kwenta lokubi, nishintje tindlela tenu netento tenu.”’”+
12 Kodvwa bona batsite: “Akusiti ngalutfo!+ Ngobe sitawenta loko lesikucabangako, futsi sonkhe sitakwenta ngenkhani loko lokufunwa tinhlitiyo tetfu letimbi.”+
13 Ngako-ke Jehova utsi:
“Ngicela nibute letinye tive.
Ngubani nje loke weva intfo lenjena?
Bantfu baka-Israyeli* bente intfo leyenyanyeka kakhulu.+
14 Siyancibilika yini sitfwatfwa saseLebanoni lesisetindzaweni letiphakeme letinemadvwala?
Emanti lapholile lachamuka etindzaweni letikhashane ake ashe yini?
15 Kodvwa bantfu bami bangikhohliwe.+
Benta imihlatjelo,* bayentele intfo lengenamsebenti.+
Bantfu bami bagila labanye endleleni lebebahamba ngayo kusukela kadzeni+
Futsi babente bahamba ngaleminye imigwaco lemibi, lengakakhiwa kahle.
Bonkhe labendlula ngakulo batalibuka bamangele, banikine netinhloko tabo.+
17 Ngitabasakata embikwetitsa, kuhle kwemoya wasemphumalanga nawusakata tinhlanga.
Ngitabafulatsela* nasebehlelwa yinhlekelele.”+
18 Bona batsi: “Asakheni lisu kuze simelane naJeremiya,+ ngobe baphristi betfu ngibo labatawuchubeka basichazela umtsetfo,* bantfu labahlakaniphile ngibo labatawuchubeka baseluleka futsi baphrofethi ngibo labatawuchubeka basitjela livi laNkulunkulu. Buyani simkhulume kabi futsi singakulaleli loko lakushoko.”
19 Awu Jehova, ngicela unginake,
Futsi ulalele loku lokushiwo ngulabantfu labamelene nami.
20 Lokuhle kufanele kubuyiselwe ngalokubi yini?
Ngobe sebangigubhele umgodzi kuze bangibulale.+
Khumbula kutsi kukanyenti kangakanani ngita embikwakho ngibakhulumela kahle,
Kuze ungasabatfukutseleli.
21 Ngako yenta emadvodzana abo abulawe yindlala,
Futsi ubente bafe ngenkemba.+
Shengatsi bafati bangafelwa bantfwana futsi babe bafelokati.+
Shengatsi emadvodza angabulawa sifo lesingumshayabhuce,
Nemajaha abulawe ngenkemba emphini.+
22 Shengatsi kungevakala sililo etindlini tabo
Nawutfumela tigebengu kutsi tibahlasele bangakagadzi.
Ngobe bangigubhele umgodzi kuze bangibambe,
Baze bangibekela netintfo tekungitsiya.+
23 Kodvwa wena Jehova
Uwati kahle onkhe emasu abo ekungibulala.+
Ungabacoleli,
Futsi ungasisuli sono labasentile.
19 Jehova watsi: “Hamba uye kumbumbi uyotsenga lijeke lelakhiwe ngelubumba.+ Tsatsa lamanye emadvodza lamadzala alesive kanye nalabanye baphristi labaholako, 2 uye nabo ekungeneni kweLigede Lembumbi, leliseSigodzini seNdvodzana yaHinomu.+ Nawufika lapho ubomemetela naku lengikutjela kona. 3 Ubotsi: ‘Lalelani nali livi laJehova nine makhosi akaJuda nani nine lenihlala eJerusalema. Jehova wemabutfo longuNkulunkulu wema-Israyeli utsi:
“‘“Sekusedvute kutsi ngehlise inhlekelele kulendzawo, futsi bonkhe bantfu batawutsi nabeva ngayo bamangale.* 4 Ngobe ningishiyile+ futsi lendzawo niyishintjile ngaze ngangasayiboni kutsi ngiyo.+ Kulendzawo nenta imihlatjelo, niyentela bonkulunkulu leningabati, nine nabokhokho benu kanye nemakhosi akaJuda. Nibulele nebantfu labanyenti labangenacala kulendzawo.+ 5 Nakhe tindzawo letiphakeme tekukhonta Bhali kuze nishise emadvodzana enu emlilweni abe ngumnikelo wekushiswa lophelele lowentelwa Bhali,+ lokuyintfo lengingazange ngitsi niyente nobe ngiyisho futsi lengingazange sengiyicabange nekuyicabanga.”’*+
6 “‘Jehova utsi: “Ngako-ke bukani la! Kutawufika sikhatsi lapho lendzawo ingeke isabitwa ngekutsi yiThofethi nobe Sigodzi seNdvodzana yaHinomu, kodvwa itawubitwa ngekutsi Sigodzi Sekuhlatjwa.+ 7 Kulendzawo ngitawenta angaphumeleli emacebo ebantfu bakaJuda nebaseJerusalema, futsi ngitawenta kutsi titsa tabo letifuna kubabulala tibabulale ngenkemba. Ngitawenta nekutsi tidvumbu tabo tibe kudla kwetinyoni telizulu nekwetilwane tesiganga.+ 8 Lelidolobha ngitalenta libe yindzawo leyetfusako futsi libe yinhlekisa.* Bonkhe labendlula ngakulo batalibuka bamangele futsi bashaye inkwela nababona tonkhe tinhlupheko letilehlele.+ 9 Ngitabenta badle emadvodzana abo nemadvodzakati abo, futsi bantfu batawudlana bodvwa, ngobe nasebavinjetelwe titsa tabo letifuna kubabulala batawuvaleleka futsi bacindzeteleke.”’+
10 “Ubobese uphihlita lelijeke embikwalamadvodza lohamba nawo, 11 futsi utsi kuwo: ‘Jehova wemabutfo utsi: “Ngitabaphihlita ngalendlela labantfu kanye nalelidolobha, kuhle kwemuntfu nakaphihlita ludziwo lwembumbi, futsi aluphihlitele kutsi lungasalungiseki. Batawungcwaba labafile eThofethi kuze kube bete indzawo.”’+
12 “Jehova utsi: ‘Nguloko kanye lengitakwenta kulendzawo nakulabo labahlala kuyo, kuze ngente lelidolobha libe njengeThofethi. 13 Tindlu taseJerusalema netemakhosi akaJuda titawufana nalendzawo lengcolile yaseThofethi,+ ngobe labantfu bente imihlatjelo eluphahleni lwetindlu tabo, bayinikelela lonkhe libutfo lasezulwini*+ baphindze batfulula neminikelo yalokunatfwako, bayitfululela labanye bonkulunkulu.’”+
14 Ngemuva kwekutsi Jeremiya abuye eThofethi, lapho Jehova bekamtfume khona kutsi ayophrofetha, wema ebaleni lendlu yaJehova futsi wakhuluma nabo bonkhe labantfu watsi: 15 “Jehova wemabutfo longuNkulunkulu wema-Israyeli utsi: ‘Lelidolobha ngitalehlisela yonkhe lenhlekelele lengitsite ngitayiletsa, ngiyehlisele nakuwo onkhe emadolobha lakhelene nalo, ngobe bantfu bakhona banenkhani futsi abafuni* kulalela emavi ami.’”+
20 Bekunemphristi lokutsiwa nguPhashuri lobekayindvodzana ya-Imeri futsi ayindvuna lenkhulu endlini yaJehova. Abelalele ngalesikhatsi Jeremiya aphrofetha ngaletintfo. 2 Phashuri wabese ushaya umphrofethi Jeremiya futsi wamfaka esitokisini*+ lebesiseGedeni LakaBhenjamini Lelisetulu. Leligede belingasendlini yaJehova. 3 Kodvwa ngesikhatsi Phashuri akhulula Jeremiya esitokisini ngelilanga lelilandzelako, Jeremiya watsi kuye:
“Jehova sewulishintjile libito lakho, nyalo sewunguMagorimisabibi, hhayi Phashuri.+ 4 Ngobe Jehova utsi: ‘Ngitawenta kutsi wena nebangani bakho nesabe kakhulu, futsi titsa tabo titababulala ngenkemba ubukile.+ Onkhe emaJuda ngitawanikela enkhosini yaseBhabhulona, itawatfumbela eBhabhulona futsi iwabulale ngenkemba.+ 5 Titsa tawo ngitatinika wonkhe umcebo wakulelidolobha, ngitinike tonkhe tintfo takhona, nako konkhe kwalo lokuligugu kanye nawo wonkhe umcebo wemakhosi akaJuda.+ Titatitsatsela wona, tinemuke futsi tiye nawo eBhabhulona.+ 6 Wena-ke Phashuri, utawutfunjwa nabo bonkhe labahlala endlini yakho. Utawuya eBhabhulona ufike ufele khona, futsi wena kanye nabo bonkhe labangani bakho nitawungcwatjwa khona, ngobe bewuphrofetha emanga kubo.’”+
7 Awu Jehova, ungimangalisile, nanyalo ngisemangele.
Ukhombisile kutsi unemandla kunami, futsi ungehlulile.+
Sengiyintfo nje yekuhlekwa malanga onkhe;
Bonkhe bantfu bahlekisa ngami.+
8 Ngobe njalo nangikhuluma ngiyakhala futsi ngimemetele
Ngebudlova nangembhubhiso.
Livi laJehova ngilo lelente kutsi ngetfukwe, futsi ngibe yinhlekisa malanga onkhe.+
Kodvwa enhlitiyweni yami, livi lakhe laba njengemlilo lovutsako lovalelwe ematsanjeni ami,
Futsi bengingasakhoni kulivalela ngekhatsi kimi;
Bekungasavumi kutsi ngithule.+
10 Ngeva tintfo letinyenti letimbi;
Ngase ngiyesaba.+
Bantfu bebatsi: “Mcebe, asimcebe!”
Bonkhe lebebenta shengatsi bayangitsandza bebagadze kutsi ngente lokubi.+ Bebatsi:
“Mhlawumbe utawenta intfo lelibele,
Bese siyamncoba futsi sitiphindziselele kuye.”
11 Kodvwa Jehova bekanami, bekanjengelisotja lelesabekako.+
Kungako labo labangihluphako batawugileka futsi angeke bancobe.+
Batawuhlazeka kakhulu ngobe angeke baphumelele.
Batawudliwa ngemahloni kuze kube phakadze futsi kute lotakukhohlwa loko.+
12 Kodvwa wena Jehova wemabutfo uyamhlolisisa lolungile;
13 Hlabelelani Jehova! Dvumisani Jehova!
Ngobe yena ukhulule loweswele kubantfu lababi.
14 Alicalekiswe lilanga lengatalwa ngalo!
Alingabusiswa lilanga lengatalwa ngalo ngumake!+
15 Akacalekiswe umuntfu lowatjela babe tindzaba letimnandzi, watsi:
“Utalelwe indvodzana!”
Loko lakusho kwamjabulisa kakhulu babe.
16 Shengatsi lomuntfu angafana nemadolobha labhujiswe nguJehova wangawaveli ngisho nebuhlungu.
Shengatsi angeva sililo ekuseni, eve nenhlabamkhosi emini.
17 Kungani angazange angibulale esiswini samake,
Kuze sisu samake sibe lithuna lami
Futsi angangibeleki?+
18 Kungani nje ngaphuma esiswini samake?
Ngaphumela kutobona kuhlupheka nelusizi yini,
Nekutsi ngize ngife solo ngihlazekile?+
21 Livi laJehova lefika kuJeremiya ngesikhatsi iNkhosi Sedekiya+ itfumela Phashuri+ loyindvodzana yaMalkhiya kanye nemphristi Zefaniya+ loyindvodzana yaMaseya, kutsi baye kuJeremiya bafike batsi: 2 “Sicela usibutele kuJehova ngobe Nebukhadnezari* inkhosi yaseBhabhulona ulwa natsi.+ Mhlawumbe Jehova angasentela simangaliso kuze lenkhosi iyekele kusihlasela.”+
3 Jeremiya watsi kubo: “Nibotsi kuSedekiya: 4 ‘Jehova Nkulunkulu wema-Israyeli utsi: “Letikhali temphi letisetandleni tenu lenilwa ngato nenkhosi yaseBhabhulona+ kanye nemaKhaledi lanivimbetele ngephandle kwelubondza, ngitatigucula tigwaze nine.* Ngitatibutsisa ndzawonye ekhatsi nalelidolobha. 5 Mine matfupha ngitakulwa nani+ ngesandla sami nangemandla ami. Ngitakulwa nani ngikwatile, nginelulaka futsi ngitfukutsele kakhulu.+ 6 Ngitawubulala labo labahlala kulelidolobha, ngibulale bantfu netilwane. Konkhe kutawubulawa sifo lesibulalako.”’*+
7 “‘Jehova utsi: “Ngemuva kwaloko ngitawutsatsa iNkhosi Sedekiya yakaJuda, netinceku tayo, kanye nebantfu labahlala kulelidolobha, lokungulabo labangakabulawa ngulesifo lesibulalako, labangakabulawa yinkemba kanye nendlala, ngibanikele kuNebukhadnezari* inkhosi yaseBhabhulona.+ Ngitabanikela nasetitseni tabo nakulabo labafuna kubabulala. Yena utababulala ngenkemba, futsi angeke abavele buhlungu, abahawukele nobe abentele umusa.”’+
8 “Nibokhuluma kulabantfu nitsi: ‘Naku lokushiwo nguJehova: “Kukini kutsi nikhetsa indlela leya ekuphileni nobe indlela leya ekufeni. 9 Labo labatawusala kulelidolobha batawubulawa ngenkemba, babulawe yindlala kanye nesifo lesibulalako. Kodvwa nobe ngubani lotawuphumela ngephandle atinikele kumaKhaledi lanivimbetele utawuchubeka aphila, futsi utawuphephisa kuphila kwakhe.”’+
10 “‘Jehova utsi: “Lelidolobha sengililahlile futsi litawehlelwa yinhlekelele, angeke kusalihambela kahle.+ Litawunikelwa enkhosini yaseBhabhulona+ futsi italishisa ngemlilo.”+
11 “‘Nine lenihlala endlini yenkhosi yakaJuda, lalelani livi laJehova. 12 Awu nine bendlu yaDavide, Jehova utsi:
“Nibowehlulela ngekulunga malanga onkhe,
Futsi umuntfu lotsatselwe tintfo takhe nibomkhulula etigebengwini,+
Kuze intfukutselo yami ingasuki emalangabi njengemlilo+
Futsi ingavutsi kube kute lotayicisha,
Ivutse ngenca yetento tenu letimbi.”’+
13 ‘Ngimelene nani nine lenihlala edolobheni lelisesihosheni,*
Nine lenihlala edolobheni lelakhiwe etikwelidvwala,’ kusho Jehova.
‘Nine lenitsi: “Ngubani lotawumelana natsi?
Futsi ngubani lotawuhlasela indzawo lesihlala kuyo?” Nibowati kutsi
14 Ngitanijezisa
Ngendlela lefanelana netono tenu,’+ kusho Jehova.
‘Lihlatsi lenu ngitalishisa ngemlilo,
Futsi utawucotfula yonkhe intfo leseceleni kwenu.’”+
22 Jehova utsi: “Yehlela esigodlweni* senkhosi yakaJuda ufike usho nangu umlayeto. 2 Ubotsi: ‘Wena nkhosi yakaJuda lesesihlalweni sebukhosi saDavide, lalela livi laJehova, wena netinceku takho kanye nabo bonkhe bantfu bakho, lokungulabo labangena kulamagede. 3 Jehova utsi: “Nibowehlulela kahle futsi nente tintfo ngekulunga. Loyo lotsatselwe tintfo takhe nibomlamulela etigebengwini. Ningamphatsi kabi umuntfu losihambi futsi ningakwenti lokubi kumntfwana loyintsandzane* nobe kumfelokati.+ Ningacali nibulale umuntfu longenacala kulendzawo.+ 4 Ngobe nangabe nitakwenta loko lengikushoko, emakhosi lahlala esihlalweni sebukhosi saDavide+ atawungena ngemagede alesigodlo agibele tinkalishi nemahhashi futsi aphekeletelwa tinceku tawo kanye nebantfu bawo.”’+
5 “Jehova utsi: ‘Ngitifunga mine kutsi nangabe ningeke niwalalele lamavi, lesigodlo sitawuba tindzala.’+
6 “Ngobe naku Jehova lakushoko mayelana nesigodlo senkhosi yakaJuda:
‘Kimi ufana neGileyadi,
Ufanana nesicongo saseLebanoni.
Kodvwa ngitakwenta ufane nelihlane;
Futsi onkhe emadolobha akho atawusala angenamuntfu.+
Titawugawula tihlahla takho temisedari telikhetselo,
Titijike emlilweni.+
8 “‘Tive letinyenti titawengca ngakulelidolobha futsi tibutane titsi: “Jehova ukwenteleni loku kulelidolobha lelibaluleke kangaka?”+ 9 Bantfu batawuphendvula batsi: “Kungobe bantfu bakulelidolobha abakasigcini sivumelwane labasenta naJehova Nkulunkulu wabo, kodvwa bakhotsamele labanye bonkulunkulu futsi babakhonta.”’+
10 Ningayikhaleli lenkhosi lefile,
Futsi ningayilileli.
Kodvwa mkhaleleni kakhulu loyo loyotfunjwa,
Ngobe angeke aphindze alibone live latalelwa kulo.
11 “Mayelana naShalumi*+ indvodzana yaJosaya, lowalandzela babe wakhe waba yinkhosi yakaJuda+ kodvwa losahambile kulelive, Jehova utsi: ‘Angeke aphindze abuye. 12 Ngobe utawufela kulendzawo latawutfunjelwa kuyo, futsi akayuphindze alibone lelive.’+
13 Maye kuloyo* lowakha indlu yakhe ngetindlela letingakalungi
Akhe emakamelo akhe lasetulu ngetindlela letingaketsembeki,
Ente nekutsi bantfu bamsebentele kodvwa basebentele lite,
Futsi angabaholeli;+
14 Loyo lotsi: ‘Ngitawutakhela indlu lenkhulu
Indlu lenemakamelo lamakhulu lasetulu.
Ngitayifaka emafasitelo,
Ngihlobise lubondza lwayo ngemsedari futsi ngiyipende ngapende lobovu.’
15 Ucabanga kutsi lokusebentisa kwakho imisedari leminyenti kunalabanye kutakwenta uchubeke ubusa yini?
Babe wakho naye bekadla futsi anatsa,
Kodvwa bekehlulela ngekulunga nangekungakhetsi,+
Kungako tintfo tamhambela kahle.
16 Bekabakhulumela labahluphekile nalabeswele emacaleni lebebabekwe wona,
Ngako tintfo tahamba kahle.
‘Nguloku-ke kwati mine,’ kusho Jehova.
17 ‘Kodvwa inhlitiyo yakho ihlale ifuna tindlela tekutfola tintfo ngekungetsembeki,
Tindlela tekubulala bantfu labangenacala,
Kukhwabanisa kanye nekwemuka bantfu tintfo tabo.’
18 “Ngako naku Jehova lakushoko mayelana naJehoyakimu+ inkhosi yakaJuda loyindvodzana yaJosaya:
‘Bantfu bavame kukhalela labafile batsi:
“Awu mnaketfu! Awu dzadzewetfu!”
Kodvwa Jehoyakimu ngeke bamlilele batsi:
“Awu nkhosi!” “Bukhatikhati bakhe sebushabalele.”
19 Njengobe nembongolo ingangcwatjwa nayifile, naye angeke angcwatjwe,+
Kodvwa sidvumbu sakhe sitawuhudvulwa futsi silahlwe
Ngephandle kwemagede aseJerusalema.’+
20 Yenyuka* uye eLebanoni ufike umemete,
Memeta kakhulu eBhashani,
Umemete use-Abarimu+
Ngobe bonkhe lebebakutsandza kakhulu sebabhujisiwe.+
21 Ngakhuluma nawe ngesikhatsi usativa uphephile.
Kodvwa wena watsi: ‘Angeke ngilalele.’+
Bewusolo wenta njalo kusukela ebusheni bakho,
Bewungalilaleli livi+ lami.
Ngemuva kwaloko utawudliwa ngemahloni futsi uhlazeke ngenca yalenhlekelele letakwehlela.
23 Wena lohlala eLebanoni,+
Futsi lotitfukuse emkhatsini wemisedari,+
Utawukhala kakhulu nase usetinhlungwini,
24 “Jehova Nkulunkulu lophilako utsi: ‘Ngitifunga mine, kutsi nobe bekungatsiwa wena Khoniya*+ loyindvodzana yaJehoyakimu,+ naloyinkhosi yakaJuda bewuyindandatho yesiciniseko esandleni sami sangasekudla, bengitakukhipha lapho! 25 Ngitakunikela esandleni salabo labafuna kukubulala, ngikunikele kulabo lobesabako, nakuNebukhadnezari* inkhosi yaseBhabhulona kanye nakumaKhaledi.+ 26 Wena kanye namake wakho lokutalako ngitanicosha nginiyise kulelinye live leningatalelwanga kulo, futsi nitawufike nifele lapho. 27 Angeke niphindze nibuyele kulelive lenifise kubuyela kulo.+
28 Lendvodza lenguKhoniya ifana nelibhodo lelingatsandvwa futsi lelephukile yini,
Nobe injengeludziwo lolungafunwa ngumuntfu?
Kwentiwa yini kutsi yena nebantfwana bakhe balahlwe,
Futsi bacoshwe bayiswe eveni labangalati?’+
29 Awu nine bantfu labahlala emhlabeni,* lalelani livi laJehova.
30 Naku Jehova lakushoko:
‘Lendvodza yibhale njengalete bantfwana,
Nanjengendvodza lengeke iphumelele kuphila kwayo konkhe,*
Ngobe kute kubantfwabayo lotayilandzela
Ahlale esihlalweni sebukhosi saDavide, aphindze abuse kaJuda.’”+
23 Jehova utsi: “Maye kubelusi lababulala timvu letisemadlelweni ami futsi batihlakate!”+
2 Naku-ke lokushiwo nguJehova Nkulunkulu wema-Israyeli mayelana nebelusi labelusa bantfu bakhe: “Nitihlakatile timvu tami, natiyekela tagcwala yonkhe indzawo futsi nangatinakekeli.”+
“Ngako-ke ngitanijezisa ngenca yetintfo letimbi lenitentile,” kusho Jehova.
3 “Ngemuva kwaloko, timvu tami letisele ngitatigcogca kuwo onkhe lamave lengitihlakatele kuwo,+ futsi ngitatibuyisela emadlelweni ato.+ Titawandza tigcine titinyenti kakhulu.+ 4 Ngitawubeka belusi labatawutelusa kahle.+ Angeke tiphindze tesabe nobe tetfuke, futsi kute ngisho nayinye letawulahleka,” kusho Jehova.
5 Jehova utsi: “Kutawufika sikhatsi lapho ngitawubeka khona indlalifa* lelungile esihlalweni sebukhosi saDavide.+ Itawuba yinkhosi,+ ibuse ngekucondza, futsi yehlulele live ngekulunga nangekungakhetsi.+ 6 Ngemalanga ayo, bantfu bakaJuda batawusindziswa+ futsi ema-Israyeli atawuhlala aphephile.+ Ligama letawubitwa ngalo litsi: Jehova Ungumtfombo Wekulunga.”+
7 Jehova utsi: “Kutawufika emalanga lapho bantfu bangeke basatsi: ‘Sifunga Jehova Nkulunkulu lophilako lowakhipha ema-Israyeli eGibhithe!’+ 8 kunaloko batawutsi: ‘Sifunga Jehova Nkulunkulu lophilako lowakhipha bantfwana ba-Israyeli eveni lasenyakatfo, nakuwo onkhe emave lebekabasakatele kuwo futsi wababuyisa.’ Nyalo sebatawuhlala eveni labo.”+
9 Nangu umlayeto loya kubaphrofethi:
Inhlitiyo yami yephukile.
Onkhe ematsambo ami ayachachatela.
Ngibe njengemuntfu lodzakiwe
Ngaba njengemuntfu lodzakwe liwayini
Ngesikhatsi ngiva emavi langcwele aJehova.
10 Ngobe lelive ligcwele bantfu labaphingako,*+
Liyalila ngobe licalekisiwe+
Nemadlelo lasehlane ashile.+
Bantfu bakhona benta tintfo letimbi futsi balisebentisa kabi ligunya labo.
11 “Baphrofethi nebaphristi sebakhohlakele.*+
Tintfo letimbi labatentako ngitibone ngisho nasendlini yami,”+ kusho Jehova.
12 “Ngako kutawushelela lapho bahamba khona futsi kube mnyama,+
Ngitawubafuca futsi batakuwa.
Ngobe ngitabehlisela inhlekelele
Ngemnyaka labatawujeziswa ngawo,” kusho Jehova.
13 “Ngitibonile tintfo letenyanyekako letentiwa baphrofethi baseSamariya.+
Baphrofetha egameni laBhali,
Futsi badukisa bantfu bami, lokungema-Israyeli.
14 Ngitibonile tintfo letenyanyekako letentiwa baphrofethi baseJerusalema.
Bayaphinga*+ futsi bakhuluma emanga,+
Bakhutsata* bantfu labenta lokubi kutsi bachubeke,
Futsi ababuyekeli bubi lababentako.
15 Ngako naku lokushiwo nguJehova wemabutfo mayelana nalabaphrofethi:
“Ngitawubenta badle sihlahla lesibabako
Futsi ngitabanatsisa emanti lanashevu.+
Ngobe baphrofethi baseJerusalema bente kutsi lonkhe lelive lihlubuke.”
16 Jehova wemabutfo utsi:
“Ningatilaleli letiphrofetho lenititjelwa ngulabaphrofethi.+
Bayaniyenga.*
17 Bachubeka bakhuluma nebantfu labangangihloniphi batsi:
‘Jehova utsite: “Nitawuba nekuthula.”’+
Futsi bakhuluma nawo wonkhe umuntfu lolalela inhlitiyo yakhe lenenkhani batsi:
‘Kute inhlekelele letanehlela.’+
18 Ngubani lome emkhatsini webantfu labasondzelene naJehova
Kuze alicondze livi lakhe futsi alive?
Ngubani lonakisise livi lakhe ngobe afuna kuliva?
19 Jehova utawutfukutsela kube shengatsi kusuka sivunguvungu;
Intfukutselo yakhe itawehlela etinhloko talababi njengesiphepho lesinemandla.+
20 Lentfukutselo yaJehova angeke ibohle
Kuze kube ngulapho akufeza loko lokufunwa yinhlitiyo yakhe.
Nitakucondza kahle loku emalangeni ekugcina.
21 Labaphrofethi angizange ngibatfume, kodvwa bona basuka emagonso.
Kute lengakusho kubo, kodvwa bona baphrofetha.+
22 Kantsi kube bema emkhatsini webantfu labasondzelene nami,
Bebatawenta kutsi bantfu bami bawalalele emavi ami
Futsi bebatabenta bayekele tindlela tabo letimbi netento tabo letimbi.”+
23 Jehova utsi: “Ngigcina ngekuba nguNkulunkulu nangidvutane nani yini? Angisuye yini Nkulunkulu ngisho nalapho ngikhashane nani?”
24 Jehova utsi: “Ukhona yini umuntfu longabhaca endzaweni lefihlekile langingeke ngimbone khona?”+
“Angikuboni yini konkhe lokusezulwini nasemhlabeni?”+ kusho Jehova.
25 “Ngibavile labaphrofethi labaphrofetha emanga egameni lami batsi: ‘Ngiphuphile! Ngiphuphile!’+ 26 Kutawuze kube ngunini labaphrofethi bachubeka bakhuluma emanga? Baphrofetha emanga lasuka etinhlitiyweni tabo.+ 27 Bacocelana emaphupho babe bahlose kwenta bantfu bami balikhohlwe libito lami, njengobe nje nabokhokho babo balikhohlwa ngenca yaBhali.+ 28 Umphrofethi lobe neliphupho akasho liphupho lakhe, kodvwa loyo lonemavi ami akawasho ngekwetsembeka.”
“Luhlanga luyafana yini nenhlavu yakolo?” kusho Jehova.
29 “Livi lami alifani yini nemlilo,+ futsi alifani yini nesandvo lesicheketa lidvwala?” kusho Jehova.+
30 “Ngako ngitabajezisa baphrofethi labeba emavi ami lengiwatjele labanye baphrofethi,” kusho Jehova.+
31 Jehova utsi: “Ngitabajezisa baphrofethi labakhuluma tintfo tabo batsi: ‘Naku lokushiwo nguNkulunkulu!’”+
32 “Ngitabajezisa baphrofethi labasho emaphupho langemanga futsi badukise bantfu bami ngenca yemanga abo nekutigcabha kwabo,” kusho Jehova.+
“Angikabatfumi futsi angikabatjeli kutsi bakhulume. Ngako labaphrofethi angeke babasite ngalutfo labantfu,”+ kusho Jehova.
33 “Nakwenteka labantfu bakubuta nobe ubutwa ngumphristi nobe umphrofethi atsi: ‘Utsini umlayeto* lovela kuJehova?’ ubophendvula utsi: ‘Naku lokushiwo nguJehova: “Nine ningumtfwalo! Futsi ngitanicosha.”’+ 34 Nangabe kunemphrofethi, umphristi nobe bantfu labatsi: ‘Nangu umlayeto* lovela kuJehova!’ mine-ke ngitamjezisa loyo muntfu kanye nemndeni wakhe. 35 Nguloyo naloyo kini ukhuluma nemngani wakhe nemnakabo atsi: ‘Uphendvule watsini Jehova? Utsiteni Jehova?’ 36 Kodvwa ningasakhulumi ngisho nekukhuluma ngemlayeto* lovela kuJehova, ngobe nguloyo naloyo kini uchaza lomlayeto* ngendlela yakhe, futsi seniwashintjile emavi aNkulunkulu lophilako, Jehova wemabutfo, longuNkulunkulu wetfu.
37 “Ubotsi kulomphrofethi: ‘Ukuphendvule watsini Jehova? Utsiteni Jehova? 38 Nanitawuchubeka nitsi: “Nangu umlayeto* lovela kuJehova!” naku-ke Jehova lakushoko: “Njengobe nichubeka nitsi: ‘Emavi lesiwashoko angumlayeto* waJehova,’ ngisho nobe senginitjelile kutsi ningacali nitsi: “Nangu umlayeto* lovela kuJehova!” 39 Ngitanitsatsa nginijikijele khashane nami, futsi ngitawenta njalo nakulelidolobha lengalinika nine nabokhokho benu. 40 Ngitanenta nibe nemahloni kuze kube phakadze, futsi lihlazo lenu litawuhlale likhunjulwa.”’”+
24 Jehova wase sewungitjengisa bobhasikidi lababili lebebanemakhiwa lebebabekwe embikwelithempeli laJehova. Loku kwenteka ngemuva kwekutsi Nebukhadnezari* inkhosi yaseBhabhulona atfumbe Jekhoniya*+ indvodzana yaJehoyakimu+ inkhosi yakaJuda, netindvuna takaJuda, tisebenti letinelikhono kanye nalabasebenta ngensimbi,* abasusa eJerusalema abayisa eBhabhulona.+ 2 Lomunye walabobhasikidi bewunemakhiwa lamahle kakhulu, afanana nemakhiwa lavutfwa kucala, kodvwa lolomunye bhasikidi bewunemakhiwa lamabi kakhulu kangangekutsi bekangeke adleke.
3 Jehova wase uyangibuta utsi: “Jeremiya, ubonani?” Ngako ngatsi: “Ngibona emakhiwa; lawa lamahle mahle kakhulu, kantsi lawa lamabi mabi kakhulu kangangekutsi angeke adleke.”+
4 Jehova wase ukhuluma nami utsi: 5 “Naku lokushiwo nguJehova Nkulunkulu wema-Israyeli: ‘Ngitabentela lokuhle bantfu bakaJuda labatfunjiwe, lokungulabo lengibahambisile kulendzawo ngabayisa eveni lemaKhaledi, batawufanana nalamakhiwa lamahle. 6 Ngitawuhlale ngibabukile kuze ngibentele lokuhle, futsi ngitawenta kutsi babuye kulelive.+ Angeke ngibabhidlite kodvwa ngitabakha; angeke ngibazuphune kodvwa ngitabahlanyela.+ 7 Ngitawenta inhlitiyo yabo ibe nesifiso sekwati kutsi mine nginguJehova.+ Batawuba bantfu bami, mine ngibe nguNkulunkulu wabo+ ngobe batawubuya kimi ngenhlitiyo yabo yonkhe.+
8 “‘Kodvwa mayelana nalamakhiwa lamabi kakhulu futsi langadleki,+ Jehova utsi: “Angeke ngimentele lokuhle Sedekiya+ inkhosi yakaJuda, netindvuna takhe, kanye nabo bonkhe labasindzile baseJerusalema, lokufaka ekhatsi labo labasele kulelive nalabo labaseGibhithe.+ 9 Ngitawenta kutsi tonkhe tive temhlaba+ tesabe natibona inhlekelele lengitabaletsela yona. Bantfu batawuhlekisa ngabo, babekise ngabo nabakhuluma ngebantfu labehlelwe yinhlekelele,+ babedzelele futsi babacalekise kuto tonkhe tindzawo lengitabahlakatela kuto.+ 10 Ngitawenta nekutsi babulawe ngenkemba,+ babulawe yindlala kanye nesifo lesibulalako,+ kuze kube ngulapho baphela bonkhe kulelive lengalinika bona nabokhokho babo.”’”
25 Nkulunkulu wakhuluma naJeremiya mayelana nabo bonkhe bantfu bakaJuda emnyakeni wesine wekubusa kwaJehoyakimu+ indvodzana yaJosaya, inkhosi yakaJuda. Lona bekungumnyaka wekucala wekubusa kwaNebukhadnezari,* inkhosi yaseBhabhulona. 2 Ngako umphrofethi Jeremiya wakhuluma nabo* bonkhe bantfu bakaJuda kanye nabo bonkhe labahlala eJerusalema watsi:
3 “Jehova bekasolo akhuluma nami kuleminyaka lengu-23, kusukela ngemnyaka wesi-13 wekubusa kwaJosaya+ indvodzana ya-Amoni, inkhosi yakaJuda, kuze kube ngulamuhla, futsi nami bengihlale ngikhuluma* nani kodvwa anizange nilalele.+ 4 Jehova watfumela kini tonkhe tinceku takhe letibaphrofethi, abetitfumela njalo nje,* kodvwa nine anizange nilalele nobe nikunake* loko betikusho.+ 5 Betitsi: ‘Yekelani letindlela tenu letimbi netento tenu letimbi;+ kuze niphile sikhatsi lesidze kulelive Jehova lalinika nine nabokhokho benu kusukela kadzeni. 6 Ningabalandzeli labanye bonkulunkulu nobe nibakhonte nobe nibakhotsamele. Ningamcansuli ngetintfo lenitakhe ngetandla tenu, ngale kwaloko utanehlisela inhlekelele.’
7 “Jehova utsi: ‘Kodvwa anizange ningilalele, kunaloko nangicansula ngaletintfo lenitakhe ngetandla tenu, ngekwenta njalo natiletsela inhlekelele.’+
8 “Ngako Jehova wemabutfo utsi: ‘“Njengobe ningakawalaleli emavi ami, 9 ngibita tonkhe tive tasenyakatfo+ kanye naNebukhadnezari* inkhosi yaseBhabhulona, loyinceku yami,+ futsi ngitabaletsa kuze bahlasele lelive nabo bonkhe labahlala kulo,+ bahlasele nato tonkhe tive letakhelene nani.+ Lelive ngitalibhubhisa, ngilente libe yindzawo leyetfusako, libe yinhlekisa* futsi libe tindzala kuze kube phakadze. Ngitawenta lokufanako nangato tonkhe leletinye tive,” kusho Jehova. 10 “Ngitawucedza umsindvo wabo wekujabula+ newentfokoto, ngicedze injabulo yemkhwenyane neyamakoti,+ ngicedze nemsindvo welitje lekusila futsi ngicishe nesibane. 11 Lonkhe lelive litawuba tindzala, libe nayindzawo leyetfusako, futsi letive titawuphoceleleka kutsi tisebentele inkhosi yaseBhabhulona iminyaka lengu-70.”’+
12 “Jehova utsi: ‘Kodvwa kutawutsi kungaphela leminyaka lengu-70,+ ngijezise inkhosi yaseBhabhulona kanye naso sonkhe lesive ngenca yetono tabo,+ futsi live lemaKhaledi ngitalenta libe yindzawo lengenalutfo nalengenamsebenti kuze kube phakadze.+ 13 Lelive ngitalenta lehlelwe ngiko konkhe lengitsite kutalehlela, ngilente lehlelwe ngiko konkhe lokubhalwe kulencwadzi, lokwaphrofethwa nguJeremiya mayelana nato tonkhe letive. 14 Ngobe tive letinyenti nemakhosi lanemandla+ atabagcilata bantfu+ baseBhabhulona futsi ngitatiphindziselela kubo, kuye ngemisebenti yabo nangaloko labakwentile.’”+
15 Ngobe Jehova Nkulunkulu wema-Israyeli utsite kimi: “Tsatsa lendzebe lesesandleni sami legcwele intfukutselo yami, unatsise tonkhe tive lengitakutfuma kuto. 16 Titawunatsa kuyo, tiyendze futsi kube ngatsi tiyahlanya nasengitfumele titsa tato kutsi titihlasele ngenkemba.”+
17 Ngako ngayitsatsa lendzebe esandleni saJehova futsi nganatsisa tonkhe letive Jehova labengitfume kuto,+ 18 ngacale ngaya eJerusalema, nasemadolobheni akaJuda,+ ngaya emakhosini akhona nasetindvuneni takhona, kuze babhujiswe. Bantfu batawuhlekisa ngabo futsi babekise ngabo nabakhuluma ngebantfu labacalekisiwe,+ ngobe batawumangala kakhulu nababona loko lokwentekile, futsi nalamuhla solo kunjalo; 19 ngabese ngiya kuFaro inkhosi yaseGibhithe, ngaya nasetincekwini takhe, etindvuneni takhe nakubo bonkhe bantfu bakhe,+ 20 nakubo bonkhe bantfu bekuhamba lebebahlala lapho; ngaya nakuwo onkhe emakhosi ase-Uzi; kuwo onkhe emakhosi aseveni lemaFilisti,+ e-Ashkeloni,+ eGaza, e-Ekroni nakulabo labasele base-Ashdodi; 21 ngaya ka-Edomu,+ kumaMowabi+ nakuma-Amoni;+ 22 ngaya kuwo onkhe emakhosi aseThire, kuwo onkhe emakhosi aseSidoni,+ nasemakhosini lasesichingini lesiselwandle; 23 ngaya eDedani,+ eThema, eBuzi, nakubo bonkhe labahhule tinwele tabo ngasemabuntini;+ 24 ngaya kuwo onkhe emakhosi ase-Arabiya,+ nakuwo onkhe emakhosi ebantfu bekuhamba labahlala ehlane; 25 nakuwo onkhe emakhosi aseZimri, nakuwo onkhe emakhosi ase-Elamu,+ nakuwo onkhe emakhosi aseMediya;+ 26 ngaya nakuwo onkhe emakhosi asenyakatfo, ladvute nalakhashane, ngekulandzelana kwawo, ngaya nakuyo yonkhe leminye imibuso lesemhlabeni. Inkhosi yaseSheshaki*+ yona itawunatsa ekugcineni.
27 “Ubotsi kubo: ‘Jehova wemabutfo longuNkulunkulu wema-Israyeli utsi: “Natsani, nidzakwe, nihlante futsi niwe ningavuki.+ Ngobe ngitawutfumela titsa tenu kutsi tinihlasele.”’ 28 Kodvwa nangabe bangafuni kutsatsa lendzebe lesesandleni sakho kuze banatse, ubotsi kubo: ‘Jehova wemabutfo utsi: “Kufanele ninatse! 29 Ngobe bukani la! Nangabe inhlekelele ngitawucale ngiyiletsele lidolobha lelibitwa ngelibito lami,+ nine-ke nginganiyekelelani nginganijezisi?”’+
“‘Ngeke nihlale ningajeziswa, ngobe ngitawenta kutsi bonkhe bantfu labahlala emhlabeni babulawe ngenkemba,’ kusho Jehova wemabutfo.
30 “Kufanele uwaphrofethe kubo onkhe lamavi, utsi:
‘Jehova utawubhodla asendzaweni lephakeme,
Futsi utawuphakamisa livi lakhe asendzaweni yakhe lengcwele.
Utawubhodla kakhulu amelane nendzawo lahlala kuyo emhlabeni.
Utawumemeta njengalabo labagcobagcoba emagilebisi etjeni lekuhlutela liwayini,
Ahlabele ajabulile ngenca yekuncoba bonkhe bantfu labasemhlabeni.’
31 ‘Kutawuvakala umsindvo emikhawulweni yemhlaba,
Ngobe Jehova utibeke licala tive.
Bonkhe bantfu batawehlulelwa nguye matfupha,+
Futsi utababulala ngenkemba bantfu lababi,’ kusho Jehova.
32 Jehova wemabutfo utsi:
‘Kunenhlekelele letawusuka kulesinye sive iye kulesinye,+
Futsi kutawutfunyelwa sivunguvungu lesinemandla lesisuka etindzaweni letikhashane temhlaba.+
33 “‘Tidvumbu talabo labatawube babulewe nguJehova ngalelolanga titawugcwala wonkhe umhlaba, kusuka ngala kwawo kuye ngale kwawo. Angeke balilelwe nobe babutfwe nobe bangcwatjwe. Batawuba njengemcuba emhlabatsini.’
34 Khalani nine belusi, futsi nilile!
Gicikani elutfulini nine baholi bebantfu,*
Ngobe sikhatsi sekuhlatjwa kwenu nesekusakatwa kwenu sesifikile,
Futsi nitakuwa niphihlike njengesitja selubumba lesiligugu.
35 Kute indzawo labangabalekela kuyo labelusi,
Futsi labaholi bebantfu angeke baphunyule.
36 Lalelani kukhala kwebelusi
Kanye nekulila kwebaholi bebantfu,
Ngobe Jehova ucotfula emadlelo abo.
37 Ngisho netindzawo lebetinekuthula setikhala libhungane
Ngenca yentfukutselo yaJehova levutsako.
38 Yena uphume emhumeni wakhe njengelibhubesi,+
Futsi live labo selibe yindzawo leyetfusako
Ngenca yekutsi ubulele bantfu labanyenti ngenkemba
Nangenca yentfukutselo yakhe levutsako.”
26 Ngesikhatsi Jehoyakimu+ indvodzana yaJosaya, inkhosi yakaJuda acala kubusa, Jehova watfumela nali livi kuJeremiya, watsi: 2 “Jehova utsi: ‘Mani emabaleni endlu yaJehova, ukhulume nabo* bonkhe bantfu labahlala emadolobheni akaJuda futsi labeta kutewukhonta* endlini yaJehova. Ubobatjela konkhe lengitakusho kuwe, ungashiyi ngisho nakunye. 3 Mhlawumbe batawulalela futsi bashiye tindlela tabo letimbi. Nabatawenta njalo, mine ngitawushintja ingcondvo,* ngingasabehliseli lenhlekelele bengitsite ngitabehlisela yona ngenca yetintfo letimbi labatentako.+ 4 Ubotsi kubo: “Naku lokushiwo nguJehova: ‘Nangabe ningeke ningilalele futsi ningayigcini imitsetfo lengininike yona, 5 ningawalaleli nemavi etinceku tami letibaphrofethi lebengihlale* ngititfumela kini,+ 6 ngitawenta lendlu ibe njengeShilo,+ futsi tonkhe tive temhlaba titawubekisa ngalelidolobha natikhuluma ngendzawo lecalekisiwe.’”’”+
7 Baphristi nebaphrofethi kanye nabo bonkhe labantfu bamuva Jeremiya ngesikhatsi akhuluma lamavi endlini yaJehova.+ 8 Ngesikhatsi Jeremiya acedza kukusho konkhe loku Jehova bekatsite abatjele kona, labaphristi nebaphrofethi kanye nabo bonkhe labantfu bambamba futsi batsi: “Nakanjani wena utakufa. 9 Uphrofethe leni egameni laJehova watsi: ‘Lendlu itawufanana neShilo, nalelidolobha litawuba tindzala futsi lisale likhala libhungane’?” Ngako bonkhe labantfu batselekela Jeremiya endlini yaJehova.
10 Kwatsi lapho tindvuna takaJuda tiva lamavi, tesuka esigodlweni* senkhosi taya endlini yaJehova tafike tahlala ekungeneni kwelisango lelisha lendlu yaJehova.+ 11 Baphristi nebaphrofethi bakhuluma netindvuna nabo bonkhe labantfu batsi: “Lendvodza ifanelwe sigwebo sekufa,+ ngobe iphrofethe kutsi lelidolobha litawehlelwa yinhlekelele, njengobe nje nani niyivile ngetindlebe tenu.”+
12 Jeremiya wabese ukhuluma nato tonkhe letindvuna nabo bonkhe labantfu watsi: “NguJehova longitfume kutsi ngiphrofethe onkhe lamavi leniwevile lamayelana nenhlekelele letawehlela lendlu nalelidolobha.+ 13 Ngako nyalo shintjani tindlela tenu netento tenu futsi nilalele livi laJehova Nkulunkulu wenu. Nanenta njalo, Jehova utawushintja ingcondvo* mayelana nalenhlekelele latsite utaniletsela yona.+ 14 Kodvwa mine ngisesandleni senu. Ningangenta nobe yini leniyibona ikahle emehlweni enu. 15 Kodvwa kufanele nati kutsi naningibulala, nine nalelidolobha kanye nalabantfu labahlala kulo, nitawuba nelicala lekubulala umuntfu lomsulwa, ngobe ecinisweni ngitfunywe nguJehova kutsi nginitjele onkhe lamavi kuze niweve.”
16 Letindvuna nabo bonkhe labantfu base bakhuluma nebaphristi nebaphrofethi batsi: “Lendvodza akukafaneli itfole sigwebo sekufa ngobe ikhulume natsi egameni laJehova Nkulunkulu wetfu.”
17 Ngetulu kwaloko, lamanye emadvodza lamadzala alelive asukuma futsi akhuluma nabo bonkhe labantfu lebebahlangene atsi: 18 “Mikha+ waseMoreshethi waphrofetha ngesikhatsi sekubusa kwaHezekiya+ inkhosi yakaJuda, futsi wakhuluma nabo bonkhe bantfu bakaJuda watsi: ‘Naku lokushiwo nguJehova wemabutfo:
“ISiyoni itawulinywa kuhle kwensimu,
IJerusalema itawuba tindzala,+
Futsi intsaba yelithempeli* itawufanana netindzawo letiphakeme letisehlatsini.”’*+
19 “Hezekiya inkhosi yakaJuda kanye nabo bonkhe bantfu bakulelo live bambulala yini Mikha? Lenkhosi beyesaba Jehova futsi yancenga Jehova kutsi ayentele umusa, kungako nje Jehova ashintja ingcondvo* mayelana nalenhlekelele bekatsite utayehlisela lesive.+ Ngako sitatiletsela inhlekelele ngalentfo lesesifuna kuyenta.
20 “Bekukhona nalenye indvodza leyaphrofetha egameni laJehova, libito layo bekungu-Urija indvodzana yaShemaya waseKhiriyathi-jeyarimu.+ Siphrofetho sayo besifana nesaJeremiya, sekutsi lelidolobha kanye nalelive litawehlelwa yinhlekelele. 21 INkhosi Jehoyakimu+ nawo onkhe emachawe ayo emphi nato tonkhe tindvuna baweva lamavi a-Urija, futsi lenkhosi yafuna kumbulala.+ Watsi Urija nakeva ngaloku wesaba kakhulu, futsi wabaleka waya eGibhithe. 22 INkhosi Jehoyakimu yabese itfumela Elnathani+ indvodzana ya-Akbori kanye nalamanye emadvodza kutsi baye eGibhithe. 23 Lamadvodza abuya na-Urija futsi ammikisa enkhosini Jehoyakimu, leyabese ibulala Urija ngenkemba+ futsi sidvumbu sakhe yasijikijela emathuneni ebantfukatana.”
24 Kodvwa Ahikamu+ indvodzana yaShafani+ wamvikela Jeremiya, ngako akazange aniketwe labantfu kutsi bambulale.+
27 Ekucaleni kwekubusa kwaJehoyakimu* indvodzana yaJosaya inkhosi yakaJuda, kwefika livi kuJeremiya livela kuJehova. 2 Jehova watsi: “Yeluka tintsambo, wakhe nemajoka, bese uwabeka entsanyeni yakho. 3 Ubobese utfuma titfunywa letite eJerusalema kuSedekiya inkhosi yakaJuda kutsi tiwamikise enkhosini yaka-Edomu,+ enkhosini yakaMowabi,+ enkhosini yema-Amoni,+ nasenkhosini yaseThire+ kanye nasenkhosini yaseSidoni.+ 4 Uboniketa letitfunywa nangu umyalo lokufanele tiwendlulisele emakhosini ato:
“‘“Naku lokushiwo nguJehova wemabutfo longuNkulunkulu wema-Israyeli, lokufanele nikutjele emakhosi enu: 5 ‘Ngimi lowadala umhlaba, bantfu kanye netilwane letikuwo ngemandla ami lamakhulu nangesandla sami lesinemandla; futsi lomhlaba ngiwunika nome ngubani lengimtsandzako.*+ 6 Nyalo onkhe lamave sengiwabeke esandleni saNebukhadnezari loyinceku yami,+ inkhosi yaseBhabhulona; sengente nekutsi tilwane tesiganga timtfobele. 7 Tonkhe tive titawuphoceleleka kutsi titfobele yena nendvodzana yakhe kanye nemtukulu wakhe, kuze kube ngulapho live lakhe liwa,+ futsi ngaleso sikhatsi utawuba sigcili setive letinyenti nesemakhosi lanemandla.’+
8 “‘Jehova utsi: “‘Nangabe kutawuba khona umbuso nobe sive lesitawala kutfobela Nebukhadnezari inkhosi yaseBhabhulona, sale nekwetfwala lijoka lenkhosi yaseBhabhulona, mine-ke ngitasijezisa ngendlala, ngenkemba+ nangesifo lesibulalako, kuze kube ngulapho ngisicotfula ngesandla sakhe.’
9 “‘“‘Ngako-ke ningabalaleli baphrofethi benu, tangoma tenu, labaphuphako, labenta imilingo kanye nebatsakatsi benu labatsi kini: “Angeke kudzingeke kutsi nitfobele inkhosi yaseBhabhulona.” 10 Baphrofetha emanga kini, ngako nangabe nitabalalela nitawutsatfwa kulelive lenu niyiswe eveni lelikhashane, futsi ngitanihlakata nize niphele nya.
11 “‘“Jehova utsi: ‘Kodvwa sive lesitawetfwala lijoka lenkhosi yaseBhabhulona futsi siyitfobele, ngitasivumela kutsi sichubeke* siseveni laso, silime futsi sihlale kulo.’”’”
12 NaSedekiya inkhosi+ yakaJuda ngamtjela emavi lafanako ngatsi: “Tfwalani lijoka lenkhosi yaseBhabhulona futsi nibe tigcili tayo netebantfu bayo, kuze nichubeke niphila.+ 13 Sikuphi nje sidzingo sekutsi wena kanye nebantfu bakho nibulawe ngenkemba+ nayindlala,+ nibulawe nasifo lesibulalako,+ njengobe nje Jehova atsi kutawenteka esiveni lesitawala kutfobela inkhosi yaseBhabhulona? 14 Ningawalaleli emavi ebaphrofethi labatsi kini: ‘Angeke kudzingeke kutsi nitfobele inkhosi yaseBhabhulona,’+ ngobe bayaniyenga.+
15 “Jehova utsi: ‘Angikabatfumi, kodvwa bona baphrofetha emanga egameni lami. Ngako nanibalalela, ngitanihlakata nize niphele nya, nine nalabaphrofethi benu.’”+
16 Ngabese ngikhuluma nebaphristi nabo bonkhe labantfu ngatsi: “Naku lokushiwo nguJehova: ‘Ningawalaleli lamavi alabaphrofethi labaphrofetha kini batsi: “Madvutane nje tintfo tasendlini yaJehova titawubuyiswa tisuka eBhabhulona!”+ ngobe bayaniyenga.+ 17 Ningabalaleli. Tfobelani inkhosi yaseBhabhulona kuze nichubeke niphila.+ Ngale kwaloko lelidolobha litawubhujiswa. 18 Kodvwa nangabe babaphrofethi futsi bakhuluma livi laJehova, abancenge Jehova wemabutfo kuze tingayiswa eBhabhulona letintfo letisele endlini yaJehova, naletisele esigodlweni* senkhosi yakaJuda kanye naseJerusalema.’
19 “Ngobe naku lokushiwo nguJehova wemabutfo mayelana netinsika,+ nelibhavu lelikhulu lelitfusi,+ netincola+ kanye naletinye tintfo letisele kulelidolobha, 20 leto Nebukhadnezari inkhosi yaseBhabhulona langazange atitsatse ngesikhatsi atfumba Jekhoniya indvodzana yaJehoyakimu, inkhosi yakaJuda, kanye nato tonkhe tindvuna takaJuda netaseJerusalema, abatsatsa eJerusalema abayisa eBhabhulona;+ 21 naku Jehova wemabutfo longuNkulunkulu wema-Israyeli lakushoko mayelana netintfo letisele letisendlini yaJehova naletisele esigodlweni* senkhosi yakaJuda naseJerusalema: 22 ‘“Titawutsatfwa tiyiswe eBhabhulona,+ futsi titawuhlala lapho kuze kufike sikhatsi sekutsi ngitikhumbule. Ngitawubese ngiyatilandza ngitibuyise kulendzawo,”’ kusho Jehova.”+
28 Ngenyanga yesihlanu kuwo lowo mnyaka, ngemnyaka wesine, ekucaleni nje kwekubusa kwaSedekiya inkhosi+ yakaJuda, umphrofethi Hananiya loyindvodzana ya-Azuri waseGibeyoni,+ wakhuluma nami endlini yaJehova embikwebaphristi, nasembikwabo bonkhe labantfu watsi: 2 “Jehova wemabutfo longuNkulunkulu wema-Israyeli utsi: ‘Ngitalephula lijoka lenkhosi yaseBhabhulona.+ 3 Tonkhe tintfo tendlu yaJehova letatsatfwa nguNebukhadnezari inkhosi yaseBhabhulona watiyisa eveni lakhe, ngitatibuyisa kulendzawo kungakapheli iminyaka lemibili.+ 4 NaJekhoniya+ indvodzana yaJehoyakimu,+ inkhosi yakaJuda, ngitambuyisa kulendzawo, ngibuyise nabo bonkhe bantfu bakaJuda labatfunjwe eBhabhulona,+ ngobe ngitalephula lijoka lenkhosi yaseBhabhulona,’ kusho Jehova.”
5 Umphrofethi Jeremiya wabese ukhuluma nemphrofethi Hananiya embikwebaphristi nasembikwabo bonkhe bantfu lebebeme endlini yaJehova. 6 Umphrofethi Jeremiya watsi: “Amen!* Shengatsi Jehova angenta njalo! Shengatsi Jehova angakwenta kugcwaliseke loko lokuphrofethile, atibuyise letintfo tasendlini yaJehova letayiswa eBhabhulona, abuyise nabo bonkhe labantfu labatfunjiwe! 7 Kodvwa ngicela ulalele naku lengikusho kuwe nakubo bonkhe labantfu. 8 Kadzeni, baphrofethi lebebakhona ngaphambi kwetfu bebavame kuphrofetha mayelana nemave lamanyenti nemibuso lenemandla, batsi itawuhlaselwa timphi, yinhlekelele kanye nesifo lesibulalako. 9 Kodvwa nangabe umphrofethi aphrofetha kutsi kutawuba nekuthula, futsi loko kwenteke, kutawubese kuyabonakala kutsi vele utfunywe nguJehova.”
10 Umphrofethi Hananiya watsi nakeva loko, watsatsa lelijoka lebelisentsanyeni yemphrofethi Jeremiya walephula.+ 11 Hananiya wase ukhuluma embikwabo bonkhe labantfu watsi: “Naku Jehova lakushoko: ‘Ngitalephula kanjalo-ke lelijoka laNebukhadnezari inkhosi yaseBhabhulona lelisentsanyeni yato tonkhe tive, ngilephule kungakapheli neminyaka lemibili.’”+ Ngako Jeremiya wesuka wahamba.
12 Ngemuva kwekutsi umphrofethi Hananiya ephule lelijoka lelisentsanyeni yemphrofethi Jeremiya, kwefika livi laJehova kuJeremiya latsi: 13 “Hamba uye kuHananiya ufike utsi: ‘Naku Jehova lakushoko: “Wena wephule lijoka lelakhiwe ngesigodvo,+ kepha esikhundleni salo utawakha lijoka lensimbi.” 14 Ngobe naku lokushiwo nguJehova wemabutfo, longuNkulunkulu wema-Israyeli: “Ngitawubeka lijoka lensimbi entsanyeni yato tonkhe letive, kuze tiphoceleleke kutsi titfobele Nebukhadnezari inkhosi yaseBhabhulona, futsi timsebentele.+ Ngisho netilwane tesiganga titamtfobela.”’”+
15 Umphrofethi Jeremiya wabese ukhuluma nemphrofethi Hananiya+ watsi: “Ngicela ungilalele Hananiya! Wena awukatfunywa nguJehova, kodvwa wente labantfu betsemba intfo lengemanga.+ 16 Ngako naku Jehova lakushoko: ‘Ngitawucedza ngawe. Kulomnyaka utawufa ngobe ukhutsate bantfu kutsi bahlubuke Jehova.’”+
17 Ngako umphrofethi Hananiya wafa ngenyanga yesi-7 kuwo lowo mnyaka.
29 Lena yincwadzi umphrofethi Jeremiya layitfumela aseJerusalema, wayitfumelela emadvodza lamadzala labekanye nalabo labatfunjiwe, wayitfumelela nebaphristi, baphrofethi kanye nabo bonkhe bantfu, lokungulabo Nebukhadnezari labatsatsa eJerusalema wayobatfumba eBhabhulona. 2 Ngaleso sikhatsi, iNkhosi Jekhoniya,+ indlovukazi,+ tiphatsimandla, tindvuna takaJuda netaseJerusalema, tisebenti letinelikhono kanye nalabasebenta ngensimbi* besebahambile eJerusalema.+ 3 Lencwadzi wayitfumela eBhabhulona, wayiphatsisa Elasa indvodzana yaShafani+ naGemariya indvodzana yaHilkiya, lebebatfunywe nguSedekiya inkhosi+ yakaJuda kutsi baye kuNebukhadnezari inkhosi yaseBhabhulona. Lencwadzi beyitsi:
4 “Naku Jehova wemabutfo longuNkulunkulu wema-Israyeli lakushoko kubo bonkhe bantfu labatfunjiwe, labo labatsatfwa eJerusalema bayotfunjwa eBhabhulona: 5 ‘Yakhani tindlu nihlale kuto. Limani tingadze, nidle netitselo tato. 6 Tsatsani bafati futsi nibe nemadvodzana nemadvodzakati; nitsatsele emadvodzana enu bafati, nishadise nemadvodzakati enu, kuze nawo abe nebantfwana. Talanani nandze, nelinani lenu linganciphi. 7 Funani kuthula nekuphumelela kulelodolobha lenganitfumbela kulo, futsi nilithantazele kuJehova, ngobe nangabe linekuthula nani nitawuba nekuthula.+ 8 Jehova wemabutfo longuNkulunkulu wema-Israyeli utsi: “Ningacali niyengwe tangoma tenu nebaphrofethi benu,+ ningabalaleli nalabo labanitjela ngemaphupho labawaphuphile. 9 Ngobe ‘baphrofetha emanga egameni lami futsi angikabatfumi,’+ kusho Jehova.”’”
10 “Jehova utsi: ‘Itawutsi ingaphela iminyaka lengu-70 niseBhabhulona, ngitawubese ngiyanikhumbula,+ futsi ngitasifeza setsembiso sami nginibuyise kulendzawo.’+
11 “Jehova utsi: ‘Ngikwati kahle loko lengitanentela kona, ngitanenta nibe nekuthula, ningehlelwa yinhlekelele,+ kuze nibe nelikusasa lelihle kanye nelitsemba.+ 12 Nitangibita, nithantaze kimi, futsi mine ngitanilalela.’+
13 “‘Nitangifuna futsi ningitfole,+ ngobe nitangifunisisa ngenhlitiyo yenu yonkhe.+ 14 Ngitawenta kutsi ningitfole,’+ kusho Jehova. ‘Ngitanibuyisa lapho benitfunjwe khona futsi nginibutsise ndzawonye, nginikhiphe kuto tonkhe tive netindzawo lebenginihlakatele kuto.+ Ngitanilandza kulendzawo lebenitfunjwe kuyo,’ kusho Jehova.+
15 “Kodvwa nine nitsite: ‘Jehova usinikete baphrofethi eBhabhulona.’
16 “Naku Jehova lakushoko mayelana nenkhosi lehleti esihlalweni sebukhosi saDavide,+ nangabo bonkhe bantfu labahlala eJerusalema, lokubomnakenu labangazange bahambe nani naniyotfunjwa, 17 ‘Jehova wemabutfo utsi: “Ngitawenta kutsi babulawe ngenkemba, babulawe yindlala kanye nesifo lesibulalako,+ futsi ngitabenta bafanane nemakhiwa labolile,* labole kangangekutsi angeke adleke.”’+
18 “‘Ngitabagijimisa, ngibahlasele ngenkemba,+ ngendlala nangesifo lesibulalako, futsi ngitabenta besabeke kuyo yonkhe imibuso lesemhlabeni,+ ngibente bacalekiswe, nebantfu bamangale nabababona, ngibente babe yinhlekisa,*+ nayintfo lelihlazo emkhatsini wetive lengibahlakatele kuto,+ 19 ngobe abakawalaleli emavi ami lebengihlale ngibatfumelela* wona ngetinceku tami letibaphrofethi,’ kusho Jehova.+
“‘Kodvwa nani anikalaleli,’+ kusho Jehova.
20 “Ngako-ke lalelani livi laJehova nonkhe nine lenitfunjiwe, lenginisuse eJerusalema nganiyisa eBhabhulona. 21 Naku lokushiwo nguJehova wemabutfo, longuNkulunkulu wema-Israyeli mayelana na-Ahabi indvodzana yaKholaya naSedekiya indvodzana yaMaseya labaphrofetha emanga egameni lami:+ ‘Ngibanikela kuNebukhadnezari* inkhosi yaseBhabhulona futsi utababulala embikwenu. 22 Onkhe emaJuda latfunjwe eBhabhulona atawusebentisa loko lokwenteke kubo nakacalekisa labanye, atawutsi: “Shengatsi Jehova angakwenta ufanane naSedekiya na-Ahabi, labo inkhosi yaseBhabhulona leyabashisa emlilweni!” 23 ngobe bente tintfo letilihlazo ka-Israyeli,+ baphinga nebafati babomakhelwane babo, bakhuluma nemanga egameni lami, basho tintfo lengingakabatfumi tona.+
“‘“Mine ngikwati kahle loko futsi ngingufakazi wako,”+ kusho Jehova.’”
24 “Ubokhuluma naShemaya+ waseNehelamu utsi: 25 ‘Naku lokushiwo nguJehova wemabutfo, longuNkulunkulu wema-Israyeli: “Ngenca yekutsi utfumelele bonkhe bantfu labaseJerusalema tincwadzi letivela kuwe, watitfumelela nemphristi Zefaniya+ loyindvodzana yaMaseya, kanye nabo bonkhe baphristi, watsi: 26 ‘Jehova ukwente kutsi ube ngumphristi esikhundleni saJehoyada kuze wengamele indlu yaJehova, ubophe nome ngubani lohlanyako lowenta ngatsi ungumphrofethi futsi umfake esitokisini.*+ 27 Manje-ke awukamekhuti ngani loJeremiya wase-Anathothi+ lotishaya umphrofethi embikwakho?+ 28 Ngobe wasitfumelela umlayeto siseBhabhulona watsi: “Nitawutfunjwa sikhatsi lesidze! Yakhani tindlu nihlale kuto. Limani tingadze, nidle netitselo tato.”’”’”+
29 Ngesikhatsi umphristi Zefaniya+ afundzela umphrofethi Jeremiya lencwadzi, 30 Jehova wakhuluma naJeremiya watsi: 31 “Tfumela umlayeto kubo bonkhe labantfu labatfunjiwe utsi: ‘Naku lokushiwo nguJehova mayelana naShemaya waseNehelamu: “Ngenca yekutsi Shemaya uphrofethe kini nanobe ngingakamtfumi, futsi wetama kunenta kutsi netsembe emanga,+ 32 Jehova utsi: ‘Ngitamjezisa Shemaya waseNehelamu, ngijezise nebantfwana bakhe. Kute ngisho namunye umuntfu emndenini wakhe lotawusindza, futsi angeke akubone lokuhle lengitakwentela bantfu bami, ngobe wente kutsi bavukele Jehova,’ kusho Jehova.”’”
30 Jehova wakhuluma naJeremiya watsi: 2 “Naku lokushiwo nguJehova Nkulunkulu wema-Israyeli: ‘Wabhale encwadzini onkhe lamavi lengitawakhuluma kuwe. 3 Ngobe Jehova utsi: “Ayeta emalanga lapho ngitawubutsisa khona bantfu bami labatfunjiwe, lokungema-Israyeli nemaJuda.+ Ngitababuyisa eveni lengalinika bokhokho babo futsi batawuphindze bahlale kulo,” kusho Jehova.’”+
4 Lawa ngemavi Jehova lawasho kuma-Israyeli nakumaJuda.
5 Naku Jehova lakushoko:
“Kuvakele bantfu bakhala ngenca yekwesaba;
Kunekwesaba lokukhulu, futsi kute kuthula.
6 Ngicela nibute kutsi indvodza ingabeleka yini.
Kwentiwa yini-ke kutsi ngibone onkhe emadvodza lanemandla abambe tisu* tawo
Kuhle kwemfati lobelekako?+
Kwentiwa yini kutsi aze ashintje ebusweni ngenca yekwesaba?
7 Maye liyesabeka* lelolanga!+
Kute lelifana nalo,
Kutawuba sikhatsi sekucindzeteleka kuJakobe.
Kodvwa utawusindziswa kuso.”
8 Jehova wemabutfo utsi: “Ngalelolanga ngitalephula lijoka lelisetintsanyeni tabo futsi ngidzabule tintsambo tabo. Angeke baphindze* bagcilatwe bantfu bekuhamba.* 9 Batawukhonta Jehova Nkulunkulu wabo nenkhosi yabo Davide, leyo lengitabavusela yona.”+
10 Jehova utsi: “Wena nceku yami Jakobe ungesabi,
Awu Israyeli, ungetfuki.+
Ngobe ngitakusindzisa useveni lelikhashane
Ngisindzise bantfwana bakho eveni labatfunjwe kulo.+
Jakobe utawubuya abe nekuthula futsi angahlushwa ngulutfo,
Kute lotamesabisa.”+
11 Jehova utsi: “Ngobe mine nginawe kuze ngikusindzise.
12 Ngobe Jehova utsi:
“Linceba lenu angeke lelapheke.+
Silondza senu angeke siphole.
13 Kute ngisho namunye longanincengela kulelicala lenu,
Kute nalokungaphotisa lesilondza senu.
Kute lokunganelapha.
14 Bonkhe labo lebeniphinga nabo lebebanitsandza kakhulu sebanikhohliwe.+
Abasanifuni nalapho nihambe khona.
Nginishaye njengesitsa,+
Nganijezisa kuhle kwemuntfu lonelulaka,
Ngobe licala lenu likhulu netono tenu tinyenti.+
15 Manje-ke selinikhaliselani lelinceba lenu?
Buhlungu benu abupheli!
Njengobe licala lenu lilikhulu netono tenu titinyenti+
Kungako ngente loku kini.
Labo labanigebengako nabo batawugetjengwa,
Futsi ngitawenta kutsi bonkhe labo labanemuka tintfo tenu nabo bemukwe tintfo tabo.”+
17 Jehova utsi: “Mine ngitaniphilisa futsi ngelaphe linceba lenu,+
Ngisho nobe bebangafuni kunemukela futsi banibita ngekutsi:
‘ISiyoni yindzawo lengafunwa ngumuntfu.’”+
18 Naku lokushiwo nguJehova:
“Ngitababutsisa ndzawonye bantfwana baJakobe labatfunjiwe,+
Futsi ngitatihawukela tindzawo labahlala kuto.
Lelidolobha litawuphindze lakhiwe etindzaleni talo,+
Nembhoshongo lovikelekile utawuphindze ume endzaweni yawo lefanele.
19 Batawuhlabela tingoma tekubonga futsi bamemete bajabulile.+
Ngitabandzisa, nelinani labo angeke linciphe;+
Ngitabenta babe banyenti kakhulu,*
Futsi angeke babe mbalwa.+
20 Emadvodzana aJakobe atawuphumelela njengobe bekunjalo kadzeni,
Futsi ngitawenta abe sive lesinemandla embikwami.+
Ngitabajezisa bonkhe lebebawacindzetela.+
21 Umbusi wema-Israyeli kutawuba ngulomunye wesive sawo,
Loyo lotawahola utawuvela emkhatsini wawo.
Ngitamsondzeta kimi futsi naye utawusondzela.”
“Ngobe ngubani nje longaba nesibindzi* sekusondzela kimi?” kusho Jehova.
22 “Nine nitawuba bantfu bami,+ mine ngibe nguNkulunkulu wenu.”+
23 Jehova utawutfukutsela kube ngatsi kusuka sivunguvungu,+
Intfukutselo yakhe itawehlela etinhloko talababi njengesiphepho lesinemandla.
24 Lentfukutselo yaJehova levutsako angeke ibohle
Kuze kube ngulapho akufeza loko lokufunwa yinhlitiyo yakhe.+
Nitakucondza kahle loku emalangeni ekugcina.+
31 Jehova utsi: “Ngaleso sikhatsi ngitawuba nguNkulunkulu waso sonkhe sive sema-Israyeli, futsi sona sitawuba bantfu bami.”+
2 Jehova utsi:
“Labo labangazange babulawe ngenkemba bentelwa umusa ehlane,
Ngesikhatsi ema-Israyeli aya endzaweni latawuphumula kuyo.”
3 Jehova wabonakala kimi ngikhashane futsi watsi:
“Nginitsandze ngelutsandvo lwaphakadze.
Bengisolo ngetsembekile* kini futsi nganidvonsela kimi.+
4 Ngitawuphindze nginakhe futsi nitakwakheka kabusha.+
Nitawuphindze nitsatse emathamborine enu nine bantfu baka-Israyeli,*
5 Nitawuphindze nihlanyele tihlahla temagilebisi etintsabeni taseSamariya;+
Labo labahlanyele letihlahla batawudla titselo tato.+
6 Ngobe kutawufika lilanga lapho bogadzi labasetintsabeni taka-Efrayimu batawumemeta batsi:
‘Wotani, asenyukeleni eSiyoni, siye kuJehova Nkulunkulu wetfu.’”+
7 Ngobe Jehova utsi:
“Hlabelelani Jakobe ngenjabulo.
Memetani nijabulile ngobe ningetulu kwaletinye tive.+
Memetelani lomlayeto; dvumisani Nkulunkulu futsi nitsi:
‘Awu Jehova, sindzisa bantfu bakho, lokungema-Israyeli lasele.’+
8 Ngitabalandza eveni lelisenyakatfo.+
Ngitabalandza emikhawulweni yemhlaba ngibagcogcele ndzawonye.+
Emkhatsini wabo kutawuba nalabangaboni nalabachutako,+
Kube nemfati lotetfwele kanye nalosaphetfwe ngumhelo.
Batawubuya balicembu lelikhulu.+
9 Batawuta bakhala.+
Batawutsi basangincenga, mine ngibe ngibahola.
Ngitawubaholela emitfonjeni yemanti,+
Futsi ngibente bahambe endleleni lebekile kuze bangagileki.
Ngobe mine nginguBabe wema-Israyeli, futsi Efrayimu litibulo lami.”+
10 Vanini nali livi laJehova nine tive,
Futsi nilimemetele etichingini letikhashane nitsi:+
“Loyo lohlakate ema-Israyeli utawabutsisa ndzawonye.
Utawelusa njengemelusi nakeluse umhlambi wakhe.+
12 Labantfu batawuta esicongweni seSiyoni futsi bamemete bajabulile,+
Batawujabula kakhulu ngenca yetintfo letinhle* letivela kuJehova,
Bajatjuliswe ngukolo, neliwayini lelisha,+ nemafutsa,
Nemazinyane etimvu newetimbuti kanye nematfole etinkhomo.+
13 “Ngaleso sikhatsi tintfombi ntfo titawudansa tijabulile,
Kudanse emajaha nebantfu labakhulile.+
Kulila kwabo ngitakushintja kube yintfokoto.+
Ngitabadvudvuta futsi ngibente bajabule esikhundleni sekutsi babe lusizi.+
14 Baphristi ngitabapha kudla lokunyenti kakhulu,*
Futsi bantfu bami batawenetiswa tintfo letinhle lengitabapha tona,”+ kusho Jehova.
15 “Jehova utsi:
‘Kuvakele sililo nekukhala kabuhlungu eRama:+
16 Naku lokushiwo nguJehova:
“‘Tibambe ungakhali, netinyembeti atingaphumi emehlweni akho,
Ngobe ngitakunika umvuzo ngenca yemsebenti wakho,’ kusho Jehova.
‘Emadvodzana akho atawubuya eveni lesitsa.’+
17 Jehova utsi: ‘Likusasa lakho lisakhanya.+
Emadvodzana akho atawubuyela eveni lawo.’”+
18 “Ngibevile bantfu baka-Efrayimu bakhala batsi:
‘Wena usekhutile, tsine sakulalela,
Wasekhuta njenganakwekhutwa litfole lelingakaceceshelwa kutfwala lijoka.
Sicela usibuyise, tsine sitimisele kuphendvuka,
Ngobe wena unguJehova Nkulunkulu wetfu.
19 Ngatisola futsi ngaphendvuka.+
Ngatsi nasengikucondza loko, ngatishaya etsangeni ngilusizi.
Bengitiva ngihlazekile futsi ngidliwa ngemahloni+
Ngenca yaloko lengakwenta nangisemusha.’”
20 “Efrayimu akasiyo yini indvodzana yami leligugu, nemntfwana lengimtsandzako?+
Ngisho nobe ngivamise kumekhuta, kodvwa ngisamkhumbula.
Ngiko nje ngimvela buhlungu enhlitiyweni* yami.+
Futsi ngitamhawukela,” kusho Jehova.+
21 “Tibekeleni timphawu letikhomba indlela,
Nimise netinsika tematje.+
Bukisisani umgwaco lomkhulu, lokungumgwaco lokufanele nihambe ngawo.+
Buyani emadolobheni enu, nine bantfu baka-Israyeli.*
22 Kutawuze kube ngunini solo niya lena nalena, nine bantfu labangaketsembeki?
Jehova wente intfo lensha emhlabeni:
Umfati utayifuna ngekutimisela indvodza yakhe.”*
23 Jehova wemabutfo longuNkulunkulu wema-Israyeli utsi: “Mhlazana ngibuyisa labo lebebatfunjiwe, bantfu batawuphindze basho nankha emavi eveni lakaJuda nasemadolobheni akhona. Batawutsi: ‘Shengatsi Jehova angakubusisa ngobe uyindzawo lenebantfu labenta lokulungile,+ futsi uyintsaba lengcwele.’+ 24 Kutawuba nebantfu labahlala kaJuda nakuwo onkhe emadolobha akhona, futsi balimi kanye nebelusi nabo batawuhlala khona.+ 25 Ngobe ngitabaniketa emandla labo labadziniwe futsi ngibacinise labo labaphelelwe ngemandla.”+
26 Ngako ngavuka ngacalata yonkhe indzawo, futsi butfongo bami bebumnandzi.
27 Jehova utsi: “Kutawufika emalanga lapho ngitabandzisa khona bantfu bendlu ya-Israyeli nebendlu yaJuda, futsi ngandzise nemfuyo yabo.”+
28 Jehova utsi: “Njengobe bengihlale ngibabukile kuze ngibaziphune, ngibahhihlite, ngibabhidlite, ngibabhubhise, futsi ngibalimate,+ ngendlela lefanako ngitawuhlale ngibabukile kuze ngibakhe futsi ngibahlanyele.+ 29 Ngalawo malanga angeke basakhuluma batsi: ‘Bobabe badle emagilebisi lamunyu, kodvwa ngemadvodzana laphatinyelwe ngematinyo.’+ 30 Kodvwa nguloyo naloyo utawufela sono sakhe. Nobe ngubani lodla emagilebisi lamunyu nguye lotawuphatinyelwa ngematinyo.”
31 Jehova utsi: “Kutawufika emalanga lapho ngitawenta khona sivumelwane lesisha nebantfu baka-Israyeli kanye nebantfu bakaJuda.+ 32 Lesivumelwane angeke sifanane naleso lengasenta nabakhokho babo ngesikhatsi ngibabamba ngesandla ngibakhipha eveni laseGibhithe,+ ‘lokusivumelwane labasephula+ nanobe bengiyinkhosi yabo mbamba,’* kusho Jehova.”
33 Jehova utsi: “Nasi sivumelwane lengitasenta nebantfu baka-Israyeli ngemuva kwalawo malanga: Ngitawufaka umtsetfo wami ngekhatsi kubo,+ futsi ngiwubhale etinhlitiyweni tabo.+ Ngitawuba nguNkulunkulu wabo, bona babe bantfu bami.”+
34 “Kute loyawuphindze afundzise makhelwane wakhe nobe umnakabo atsi: ‘Yati Jehova!’+ Ngobe bonkhe batawungati, kusukela kumuntfukatana kuya kumuntfu losesikhundleni lesiphakeme.+ Ngitabatsetselela emaphutsa abo, nesono sabo angeke ngiphindze ngisikhumbule,” kusho Jehova.+
35 Naku lokushiwo nguJehova,
Lowadala lilanga kuze likhanyise emini,
Wasungula nemitsetfo yekutsi inyeti netinkhanyeti kukhanyise ebusuku,
Futsi lonyakatisa lwandle, ente nemagagasi alo atfukutsele,
Libito lakhe lokunguJehova wemabutfo:+
36 “Jehova utsi: ‘Njengobe nje lemitsetfo itawuhlale ikhona,
Nentalelwane ya-Israyeli nayo itawuhlale isive embikwami.’”+
37 Naku Jehova lakushoko: “‘Njengobe nje emazulu angeke akalwe netisekelo temhlaba tingeke tiphenywe, nami-ke angeke ngiyilahle intalelwane ya-Israyeli ngenca yaloko lekwentile,’ kusho Jehova.”+
38 Jehova utsi: “Kutawufika emalanga lapho lelidolobha litawuphindze lakhelwe+ Jehova, kusukela eMbhoshongweni waHananeli+ kuze kuyofika eGedeni Lelisekoneni.+ 39 Nentsambo yekukala+ itaweluleka ize ifike egcumeni laseGarebi, bese iyajika icondze eGowa. 40 Sonkhe sihosha* setidvumbu nesemlotsa* kanye nawo onkhe emasimu kuyofika eSihosheni saseKhidroni,+ kuchubeke kuze kuyofika ekoneni leLigede Lelihhashi+ ngasemphumalanga, kuyawuba ngcwele kuJehova.+ Angeke siphindze siziphunwe nobe sidzilitwe.”
32 Jehova wakhuluma naJeremiya ngemnyaka wesi-10 wekubusa kwaSedekiya inkhosi yakaJuda, lobekungumnyaka wesi-18 wekubusa kwaNebukhadnezari.*+ 2 Ngaleso sikhatsi emabutfo enkhosi yaseBhabhulona abevimbetele iJerusalema, futsi umphrofethi Jeremiya bekavalelwe eBaleni Labogadzi+ lebelisesigodlweni* senkhosi yakaJuda. 3 Sedekiya inkhosi yakaJuda abemvalele lapho,+ atsi: “Uphrofethelani tintfo letinje? Utsite: ‘Naku Jehova lakushoko: “Lelidolobha ngitalinikela enkhosini yaseBhabhulona futsi italincoba,+ 4 naSedekiya inkhosi yakaJuda angeke aphunyule kumaKhaledi, ngobe utawunikelwa enkhosini yaseBhabhulona. Utawukhuluma nayo buso nebuso.”’+ 5 ‘Lenkhosi itawutsatsa Sedekiya imyise eBhabhulona, futsi utawuhlala lapho ngize ngincume kutsi ngentani ngaye,’ kusho Jehova. ‘Ngisho nobe nichubeka nilwa nemaKhaledi angeke niphumelele.’”+
6 Jeremiya watsi: “Jehova ukhulume nami watsi: 7 ‘Kutawufika Hanameli indvodzana yaShalumi longubabe wakho lomkhulu,* atsi kuwe: “Tsenga insimu yami lese-Anathothi+ ngobe nguwe lonelilungelo lelikhulu lekuyitsenga.”’”*+
8 Hanameli indvodzana yababe lomkhulu weta kimi eBaleni Labogadzi njengobe nje Jehova abeshito. Wafike watsi: “Ngicela utsenge insimu yami lese-Anathothi eveni lakaBhenjamini ngobe nguwe lonelilungelo lekuyitsenga nelekuyitsatsa ibe yakho. Ngako-ke yitsenge.” Ngatsi nangiva loku ngavele ngati kutsi leli bekulivi laJehova.
9 Ngako lensimu lebeyise-Anathothi ngayitsenga kuHanameli indvodzana yababe lomkhulu. Ngamkalela imali yayo,+ kwaba tinhlavu telisiliva letingu-10 naletinye letingemagremu langu-80.* 10 Ngemuva kwaloko ngabhala litayitela,+ ngaligocota ngase ngilibeka luphawu, ngabita nabofakazi,+ futsi ngakala nalemali etikalini. 11 Ngabese ngitsatsa lelitayitela, lelo lebeligocotiwe futsi labekwa luphawu ngalokusemtsetfweni nangekuvumelana nemiyalo lebekiwe, nalelo lebelingakagocotwa, 12 ngalinika Bharuki+ indvodzana yaNeriya+ loyindvodzana yaMahaseya, embikwaHanameli indvodzana yababe lomkhulu, nasembikwabofakazi lebebalisayinile kanye nawo onkhe emaJuda labehleti eBaleni Labogadzi.+
13 Ngabese ngikhuluma naBharuki embikwabo ngatsi: 14 “Naku lokushiwo nguJehova wemabutfo longuNkulunkulu wema-Israyeli: ‘Tsatsa lamatayitela, lokungulelitayitela leligocotiwe labekwa luphawu kanye nalelo lelingakagocotwa, uwafake esitjeni selubumba kuze atawuhlala sikhatsi lesidze.’ 15 Ngobe naku lokushiwo nguJehova wemabutfo, longuNkulunkulu wema-Israyeli: ‘Kulelive kutawuphindze kutsengwe emasimu, tindlu kanye nemasimu emagilebisi.’”+
16 Ngemuva kwekunika Bharuki indvodzana yaNeriya lelitayitela, ngathantaza kuJehova ngatsi: 17 “Awu Nkhosi Lephakeme Jehova! Wena wente emazulu nemhlaba ngemandla akho lamakhulu+ nangesandla sakho lesinemandla. Kute lokungakwehlula. 18 Wentela bantfu labatinkhulungwane umusa,* kodvwa wente kutsi emadvodzana atfole imiphumela yetono tabobabe bawo.*+ Wena unguNkulunkulu weliciniso, unemandla futsi umkhulu, libito lakho nguJehova wemabutfo. 19 Tinjongo* takho tiphakeme futsi imisebenti yakho mikhulu,+ emehlo akho abuka tonkhe tintfo letentiwa bantfu,+ kuze wonkhe umuntfu umnike lokumfanele kuye ngetento takhe nemisebenti yakhe.+ 20 Wenta tibonakaliso netimangaliso eveni laseGibhithe, nalamuhla solo tiyatiwa futsi ngaloko wenta kutsi libito lakho latiwe kuma-Israyeli nasemkhatsini wabo bonkhe bantfu,+ njengobe nje nalamuhla lisatiwa. 21 Wabakhipha eGibhithe bantfu bakho lokungema-Israyeli, wabakhipha ngetibonakaliso, ngetimangaliso, ngesandla sakho lesinemandla nangetento takho letesabekako.+
22 “Ngemuva kwesikhatsi, wabanika lelive lebewufunge kutsi utalinika bokhokho babo,+ lokulive leligeleta lubisi neluju.+ 23 Befike bahlala kulo, kodvwa abazange balilalele livi lakho nobe balandzele umtsetfo wakho. Kute ngisho nakunye labakwenta kuloko lobewubayale kutsi bakwente, ngako wabehlisela yonkhe lenhlekelele.+ 24 Kufike emadvodza kulelidolobha futsi akha lutsango kuze alivimbetele.+ Ngako litawunikelwa esandleni semaKhaledi lalwa nalo. Bantfu batawufa babulawe yinkemba,+ yindlala nesifo lesibulalako.+ Sekwenteke konkhe loko lowakusho, njengobe nje nawe ubona. 25 Ngisho nobe lelidolobha litawunikelwa esandleni semaKhaledi, kodvwa wena Nkhosi Lephakeme Jehova ukhulume nami watsi: ‘Titsengele lensimu futsi ubite bofakazi.’”
26 Ngemuva kwaloko Jehova wakhuluma naJeremiya watsi: 27 “Mine nginguJehova Nkulunkulu wabo bonkhe bantfu. Ikhona yini intfo lengangehlula? 28 Ngako naku lokushiwo nguJehova: ‘Lelidolobha ngilinikela kumaKhaledi nasesandleni saNebukhadnezari* inkhosi yaseBhabhulona futsi utalincoba.+ 29 EmaKhaledi lahlasela lelidolobha atawuta afike alilumeke ngemlilo futsi lishe lingcongce,+ kushe netindlu lapho labantfu bebentela khona Bhali imihlatjelo eluphahleni lwato, futsi batfulula neminikelo yalokunatfwako, bayitfululela labanye bonkulunkulu kuze bangicansule.’+
30 “Jehova utsi: ‘Kusukela ebusheni babo, bantfu bakaJuda nebaka-Israyeli bebasolo nje benta lokubi emehlweni ami;+ bantfu baka-Israyeli bahlale bangicansula ngetintfo labatentako. 31 Ngobe kusukela ngelilanga lelidolobha lelakhiwa ngalo kuze kube ngulamuhla, belisolo lingikwatisa futsi lingitfukutselisa.+ Loku kutangenta ngilisuse embikwami,+ 32 ngenca yabo bonkhe lobubi lobentiwe bantfu baka-Israyeli nebakaJuda. Bonkhe bangitfukutselisile, lokufaka ekhatsi emakhosi,+ tindvuna,+ baphristi, baphrofethi+ kanye nebantfu bakaJuda nebaseJerusalema. 33 Kunekutsi banginake, bangifulatsela;+ nanobe bengihlale ngetama kubafundzisa* kodvwa kute ngisho namunye kubo lowangilalela nangimyala.+ 34 Babeka tithico tabo letenyanyekako endlini lebitwa ngelibito lami futsi bayingcolisa.+ 35 Ngetulu kwaloko, bakhela Bhali tindzawo letiphakeme eSigodzini seNdvodzana yaHinomu,*+ kuze bashise emadvodzana abo nemadvodzakati abo emlilweni, bentela Moleki umhlatjelo,+ intfo lengingazange ngitsi abayente.+ Angizange sengikucabange nekukucabanga* kutsi ngibacele bente intfo leyenyanyeka kangaka. Ngekwenta loku, emaJuda ona kakhulu.’
36 “Ngako-ke naku lokushiwo nguJehova Nkulunkulu wema-Israyeli mayelana nalelidolobha lenitsi litawunikelwa enkhosini yaseBhabhulona, ilihlasele ngenkemba, lihlaselwe nayindlala kanye nesifo lesibulalako: 37 ‘Ngitabagcogca ndzawonye ngibalandze kuwo onkhe emave lengibahlakatele kuwo ngesikhatsi ngikwatile, nginelulaka futsi ngitfukutsele kakhulu.+ Ngitababuyisa kulendzawo, ngibente bahlale ngekuthula.+ 38 Ngitawuba nguNkulunkulu wabo, bona babe bantfu bami.+ 39 Ngitabenta babe nenhlitiyo yinye+ futsi batiphatse ngendlela lefanako kuze bahlale bangesaba, ngobe loko kutawusita bona kanye nebantfwababo.+ 40 Ngitawenta nabo sivumelwane saphakadze,+ sekutsi angeke ngiyekele kubentela lokuhle;+ futsi tinhlitiyo tabo ngitatenta tingesabe, kuze bangangishiyi.+ 41 Kutangijabulisa kubentela lokuhle,+ futsi ngenhlitiyo yami yonkhe nangemphefumulo* wami wonkhe ngitawenta kutsi bachubeke bahleli kulelive.’”+
42 “Ngobe Jehova utsi: ‘Njengobe nje labantfu ngibente behlelwa ngiyo yonkhe lenhlekelele, nyalo ngitabentela tonkhe letintfo letinhle lengibetsembise tona.+ 43 Kutawuphindze kutsengwe emasimu kulelive+ lenikhuluma ngalo nitsi: “Lendzawo ayinamsebenti, kute umuntfu nobe silwane lesihlala kuyo, futsi inikelwe kumaKhaledi.”’
44 “Jehova utsi: ‘Kutawutsengwa emasimu, kubhalwe ematayitela futsi agocotwe abekwe luphawu, kutawubitwa nabofakazi bete eveni lakaBhenjamini,+ bete etindzaweni letiseceleni kweJerusalema, emadolobheni akaJuda,+ emadolobheni lasesifundzeni setintsaba, emadolobheni lasendzaweni lebekile,+ kanye nasemadolobheni laseningizimu, ngobe ngitababuyisa bantfu labatfunjiwe.’”+
33 Ngesikhatsi Jeremiya asevalelwe eBaleni Labogadzi,+ Jehova waphindze wakhuluma naye kwesibili watsi: 2 “Jehova lowadala umhlaba, Jehova lowawubumba futsi wawusimisa; libito lakhe lokunguJehova, utsi: 3 ‘Ngibite, ngitakuphendvula futsi ngitakutjela tintfo letinkhulu naletingacondzakali, lokutintfo longatati.’”+
4 “Ngobe naku mine Jehova Nkulunkulu wema-Israyeli lengikushoko mayelana netindlu takulelidolobha kanye netigodlo temakhosi akaJuda letidzilitiwe kuze tisetjentiselwe kutivikela kulolutsango lolwakhiwe sitsa kanye nasenkembeni yaso,+ 5 namayelana nebantfu labeta kutokulwa nemaKhaledi nangetindzawo letigcwele tidvumbu tebantfu lengibabulele ngitfukutsele futsi ngikwatile, lokubantfu labente tintfo letimbi kakhulu ngaze ngangasalinaki lelidolobha, 6 ngitsi: ‘Ngitawenta kutsi lelidolobha lelulame futsi liphile.+ Ngitabaphilisa bantfu labahlala kulo futsi ngibente babe nekuthula lokukhulu kanye neliciniso.+ 7 Ngitababuyisa bantfu bakaJuda kanye nebaka-Israyeli lebebatfunjiwe,+ futsi ngitababusisa njengasekucaleni.+ 8 Ngitabageza, ngibente bative bete licala letono labatente kimi,+ futsi ngitabatsetselela tonkhe tono tabo nemaphutsa labawente kimi.+ 9 Ligama lalelidolobha litangijabulisa. Lelidolobha litawenta kutsi tonkhe tive temhlaba tingidvumise futsi tingihloniphe nativa ngalokuhle lengikwentele bantfu bami.+ Titawesaba kakhulu futsi tichachatele+ ngenca yetintfo letinhle lengitalentela tona kanye nekuthula lengitalinika kona.’”+
10 “Jehova utsi: ‘Kulo kanye lelive lenitsi alisenamsebenti, alisenamuntfu futsi alisenamfuyo, nakulamadolobha akaJuda nasetitaladini taseJerusalema lesetikhala libhungane, lesetite imfuyo nobe bantfu labahlala khona, kutawuphindze kuvakale 11 umsindvo wekujabula newentfokoto.+ Kutawuvakala nelivi lemkhwenyane nelamakoti, kanye nemavi alabo labatsi: “Bongani Jehova wemabutfo ngobe Jehova muhle;+ lutsandvo lwakhe lolucotfo luhlala kuze kube phakadze!”’+
“‘Batawuletsa iminikelo yekubonga endlini yaJehova,+ ngobe ngitababuyisa bantfu labatfunjiwe bakulelive, kube njengobe bekunjalo ekucaleni,’ kusho Jehova.”
12 “Naku lokushiwo nguJehova wemabutfo: ‘Kulelive lelingenamsebenti, lelite bantfu nobe imfuyo, kanye nakuwo onkhe emadolobha alo, kutawuphindze kube nemadlelo lapho imihlambi yebelusi itawuphumula khona.’+
13 “Jehova utsi: ‘Belusi batawuphindze babale imihlambi yabo emadolobheni lasesifundzeni lesinetintsaba, emadolobheni lasendzaweni lebekile, emadolobheni laseningizimu, eveni lakaBhenjamini, etindzaweni letiseceleni kweJerusalema+ kanye nasemadolobheni akaJuda.’”+
14 “Jehova utsi: ‘Kutawufika emalanga lapho ngitasifeza khona setsembiso lesihle lengasenta mayelana nebantfu baka-Israyeli nebakaJuda.+ 15 Ngalawo malanga nangaleso sikhatsi ngitawubeka indlalifa*+ lelungile esihlalweni sebukhosi saDavide, futsi itawehlulela live ngekulunga nangekungakhetsi.+ 16 Ngalawo malanga Juda utawusindziswa+ futsi iJerusalema itawuhlala iphephile.+ Lelidolobha litawubitwa ngeligama lelitsi: Jehova Ungumtfombo Wekulunga.’”+
17 “Ngobe Jehova utsi: ‘Angeke kuze kwenteke kungabi nendvodza levela emndenini waDavide letawuhlala esihlalweni sebukhosi saka-Israyeli,+ 18 futsi emkhatsini webaphristi labangemaLevi itawuhlale ikhona indvodza letawuma embikwami kuze yente iminikelo yekushiswa lephelele, iminikelo yalokutinhlavu nemihlatjelo.’”
19 Jehova waphindze wakhuluma naJeremiya watsi: 20 “Naku lokushiwo nguJehova: ‘Njengobe ningeke nikhone kuwephula umtsetfo* wami lomayelana nemini nebusuku, angeke nente nekutsi lilanga nenyeti kungaveli ngesikhatsi lesifanele,+ 21 ngendlela lefanako, kute lokungephula sivumelwane lengasenta naDavide inceku yami,+ sekutsi kutawuhlale kunendvodzana yakhe letawubusa esihlalweni sakhe sebukhosi,+ futsi kute nalokutawephula sivumelwane lengasenta netinceku tami, lokubaphristi labangemaLevi.+ 22 Njengobe nje bantfu bangeke bakhone kubala tinkhanyeti letisesibhakabhakeni,* futsi bangeke bakhone kukala sihlabatsi lesiselwandle, nami-ke ngitayandzisa intalelwane* yenceku yami Davide, ngandzise nemaLevi lenta umsebenti wami.’”
23 Jehova waphindze wakhuluma naJeremiya watsi: 24 “Awukabeva yini labantfu nabatsi: ‘Jehova utayishiya lemindeni lemibili layikhetsa’? Ngako bayabedzelela bantfu bami futsi abasabatsatsi njengesive.
25 “Jehova utsi: ‘Njengobe nje ngibeke umtsetfo* lomayelana nemini nebusuku,+ nemitsetfo lemayelana nelizulu nemhlaba,+ 26 kanjalo-ke angeke ngiyilahle intalelwane* yaJakobe nentalelwane yaDavide inceku yami, futsi ngitawukhetsa babusi kubantfwana* baDavide, babuse intalelwane* ya-Abrahama, ya-Isaka neyaJakobe. Ngobe ngitababuyisa labo labatfunjiwe+ futsi ngitabahawukele.’”+
34 Ngesikhatsi Nebukhadnezari* inkhosi yaseBhabhulona alwa neJerusalema nawo onkhe emadolobha akhona, akanye nalo lonkhe libutfo lakhe, nayo yonkhe imibuso lesemhlabeni lengephansi kwakhe kanye nabo bonkhe bantfu lababuswa nguye, Jehova wakhuluma naJeremiya watsi:+
2 “Naku Jehova Nkulunkulu wema-Israyeli lakushoko: ‘Hamba uyokhuluma naSedekiya+ inkhosi yakaJuda, ufike utsi kuye: “Naku lokushiwo nguJehova: ‘Lelidolobha ngilinikela enkhosini yaseBhabhulona, futsi italishisa ngemlilo.+ 3 Angeke uphunyule esandleni sayo, ngobe batakubamba bakumikise kuyo.+ Utawukhuluma nenkhosi yaseBhabhulona buso nebuso futsi utawutsatfwa uyiswe eBhabhulona.’+ 4 Kodvwa wena Sedekiya, nkhosi yakaJuda, lalela naku lokushiwo nguJehova: ‘Jehova utsi kuwe: “Angeke ubulawe ngenkemba. 5 Utawufa ngekuthula,+ futsi kutawushiswa emakha nawungcwatjwa njengobe kwentiwa nakubokhokho bakho, lokungemakhosi labusa ngaphambi kwakho. Bantfu batakulilela batsi: ‘Awu nkhosi!’ Ngobe Jehova utsi: ‘Mine sengikhulumile.’”’”’”
6 Umphrofethi Jeremiya wabese sewutjela Sedekiya inkhosi yakaJuda onkhe lamavi ngesikhatsi aseJerusalema. 7 Ngaleso sikhatsi emabutfo enkhosi yaseBhabhulona abehlasela iJerusalema nawo onkhe emadolobha akaJuda lebekasele,+ lobekuyiLakhishi+ ne-Azekha,+ ngobe ngiwo kuphela emadolobha lebekavikelekile labesengakancotjwa.
8 Jehova wakhuluma naJeremiya ngemuva kwekutsi iNkhosi Sedekiya yente sivumelwane nabo bonkhe bantfu baseJerusalema, sekutsi bakhulule tigcili tabo.+ 9 Wonkhe umuntfu bekufanele akhulule tigcili netigcilikati takhe letingemaHebheru, kuze angabi khona umuntfu lochubeka enta umJuda wakubo sigcili sakhe. 10 Ngako tonkhe tindvuna talalela, nabo bonkhe bantfu balalela. Bonkhe bebasentile lesivumelwane sekutsi nguloyo naloyo kufanele akhulule tigcili netigcilikati takhe, futsi tiyekele kuba tigcili. Ngako balalela futsi batikhulula. 11 Kodvwa ngekuhamba kwesikhatsi batilandza letigcili netigcilikati lebebatikhululile, baphindze batenta tigcili tabo ngenkhani. 12 Ngako Jehova wakhuluma naJeremiya. Jehova watsi:
13 “Naku lokushiwo nguJehova, Nkulunkulu wema-Israyeli: ‘Ngatsi nangikhipha bokhokho benu+ eGibhithe, lokulive lebebagcilatwa kulo,+ ngenta sivumelwane nabo, ngatsi: 14 “Nakuphela iminyaka lengu-7, ngamunye wenu kufanele akhulule umHebheru wakubo lamtsenga futsi losekamsebentele iminyaka lesitfupha; kufanele amyekele ahambe.”+ Kodvwa bokhokho benu abazange bangilalele nobe banginake. 15 Akukapheli malanga mangakhi* nine nishintje tindlela tenu, futsi nenta lokuhle kimi ngekukhulula tigcili tenu, naze nenta nesivumelwane embikwami, endlini lebitwa ngelibito lami. 16 Kodvwa seniphindze nashintja futsi nangalihloniphi libito lami,+ nabuyisa tigcili netigcilikati tenu lebesenitikhululile kutsi tihambe tiye lapho tifuna kuya khona, natiphocelela kutsi tiphindze tibe tigcili tenu.’
17 “Ngako naku Jehova lakushoko: ‘Anikangilaleli, anikabakhululi bomnakenu.+ Nayi-ke indlela mine lengitanikhulula ngayo: nitawubulawa ngenkemba, nibulawe nasifo lesibulalako kanye nendlala+ futsi ngitakwenta kutsi yonkhe imibuso lesemhlabeni+ yesabe nayinibona,’ kusho Jehova. 18 ‘Naku lokutakwenteka kubantfu labephule sivumelwane sami, labangakasigcini lesivumelwane labasenta embikwami ngesikhatsi bahlahlela litfole ekhatsi futsi bendlula emkhatsini waletincenye talo letimbili,+ 19 labantfu bafaka ekhatsi tindvuna takaJuda, tindvuna taseJerusalema, tiphatsimandla, baphristi kanye nabo bonkhe bantfu bakulelive labendlule emkhatsini waletincenye letimbili talelitfole: 20 Ngitabanikela etitseni tabo nakulabo labafuna kubabulala, futsi tidvumbu tabo titawuba kudla kwetinyoni telizulu nekwetilwane tesiganga.+ 21 Ngitawunikela Sedekiya inkhosi yakaJuda netindvuna takhe etitseni tabo, ngibanikele esandleni salabo labafuna kubabulala kanye nasemabutfweni enkhosi yaseBhabhulona,+ lasayekele kunivimbetela.’+
22 “Jehova utsi: ‘Ngitawukhipha umyalo futsi ngitawabuyisa kulelidolobha, atawulwa nalo, alincobe futsi alishise ngemlilo.+ Emadolobha akaJuda ngitawenta abe tindzala, kube bete lohlala kuwo.’”+
35 Emalangeni aJehoyakimu+ indvodzana yaJosaya, inkhosi yakaJuda, Jehova wakhuluma naJeremiya watsi: 2 “Hamba uyokhuluma nebantfu basemndenini wemaRekhabi+ futsi ubaletse endlini yaJehova. Ubobangenisa kulenye yetindlu tekudlela,* bese ubanika liwayini kuze banatse.”
3 Ngako ngatsatsa Jazaniya indvodzana yaJeremiya loyindvodzana yaHabasiniya, ngatsatsa nabomnakabo, nawo onkhe emadvodzana akhe kanye nabo bonkhe bantfu basemndenini wemaRekhabi, 4 ngaya nabo endlini yaJehova. Ngabangenisa endlini yekudlela yemadvodzana aHanana indvodzana ya-Igdaliya, inceku yaNkulunkulu weliciniso, lebeyiseceleni kwendlu yekudlela yetindvuna. Lendlu yekudlela yetindvuna beyingetulu kwendlu yekudlela yaMaseya indvodzana yaShalumi logadza emnyango. 5 Ngabese ngitsatsa tinkomishi letineliwayini kanye netindzebe letigcwele liwayini ngatibeka embikwemadvodza langemaRekhabi, futsi ngatsi: “Natsani leliwayini.”
6 Kodvwa wona atsi: “Angeke silinatse leliwayini, ngoba Jehonadabi*+ indvodzana yaRekhabi longukhokho wetfu wasiyala watsi: ‘Nine nemadvodzana enu ningacali ninatse liwayini. 7 Ningacali nakhe tindlu, nobe nihlanyele inhlanyelo, nobe nihlanyele tihlahla temagilebisi nobe tibe ngetenu. Kunaloko kufanele nichubeke nihleli emathendeni, kuze niphile sikhatsi lesidze kulelive lenitihambi kulo.’ 8 Ngako solo sisakulalela konkhe loko Jehonadabi indvodzana yakhokho wetfu Rekhabi lasiyala ngako. Tsine, bafati betfu, emadvodzana etfu nemadvodzakati etfu asikaze silinatse liwayini. 9 Asitakhi netindlu kuze sihlale kuto, futsi site tihlahla temagilebisi nobe emasimu nobe inhlanyelo. 10 Solo sihleli emathendeni futsi sikulalela konkhe loko khokho wetfu Jehonadabi* lasiyala ngako. 11 Kodvwa kwatsi lapho Nebukhadnezari* inkhosi yaseBhabhulona ahlasela lelive,+ satsi: ‘Asambeni siye eJerusalema kuze sibalekele libutfo lemaKhaledi nelemaSiriya.’ Kungako nyalo sesihlala eJerusalema.”
12 Jehova wabese ukhuluma naJeremiya watsi: 13 “Naku lokushiwo nguJehova wemabutfo longuNkulunkulu wema-Israyeli: ‘Hamba uye kubantfu bakaJuda nakulabo labahlala eJerusalema ufike utsi kubo: “Benginganincengi yini onkhe malanga kutsi nilalele emavi ami?”+ kusho Jehova. 14 “Jehonadabi indvodzana yaRekhabi wayala bonkhe bantfwana bakhe kutsi bangalinatsi liwayini, futsi bamlalela ngobe kuze kube ngulamuhla abalinatsi liwayini, ngaleyondlela bakhombisa kutsi bayamlalela khokho wabo.+ Kodvwa mine bengihlale ngikhuluma nani,* kepha anikangilaleli.+ 15 Bengihlale nginitfumelela tonkhe tinceku tami letibaphrofethi, ngititfumela njalo nje,*+ ngitsi: ‘Ngicela niyekele tindlela tenu letimbi+ futsi nente lokuhle! Ningabalandzeli labanye bonkulunkulu futsi ningabakhonti. Nanenta njalo nitawuchubeka nihleti kulelive lengalinika nine nabokhokho benu.’+ Kodvwa anizange ninginake* nobe ningilalele. 16 Bantfwana baJehonadabi indvodzana yaRekhabi bakulalela loko khokho wabo labatjela kona.+ Kodvwa labantfu laba abangilaleli.”’”
17 “Ngako-ke naku lokushiwo nguJehova Nkulunkulu wemabutfo, longuNkulunkulu wema-Israyeli: ‘Bantfu bakaJuda nabo bonkhe bantfu baseJerusalema ngitabenta behlelwe ngiyo yonkhe lenhlekelele lengibecwayise ngayo.+ Ngobe mine ngikhulume nabo kodvwa bangangilaleli, ngachubeka ngibabita kodvwa bangasabeli.’”+
18 Jeremiya wakhuluma nemndeni wemaRekhabi watsi: “Jehova wemabutfo longuNkulunkulu wema-Israyeli utsi: ‘Njengobe nje niwulalele umyalo wakhokho wenu Jehonadabi futsi nichubeka nikugcina konkhe laniyala ngako, nikwenta njengobe nje asho, 19 ngako-ke naku lokushiwo nguJehova wemabutfo longuNkulunkulu wema-Israyeli: “Emndenini waJehonadabi* indvodzana yaRekhabi, utawuhlale akhona umuntfu lotangisebentela.”’”
36 Ngemnyaka wesine wekubusa kwaJehoyakimu+ indvodzana yaJosaya, inkhosi yakaJuda, Jehova wakhuluma naJeremiya watsi: 2 “Tsatsa umculu* ubhale kuwo onkhe emavi lengiwakhulume kuwe mayelana na-Israyeli naJuda+ kanye nato tonkhe tive,+ kusukela kuloko lengakusho ngelilanga lengacala ngalo kukhuluma nawe emalangeni aJosaya kuze kube ngulamuhla.+ 3 Mhlawumbe labantfu bendlu yakaJuda batawutsi nabeva ngalenhlekelele lengihlose kuyiletsa etikwabo batiyekele tindlela tabo letimbi, mine ngitawubese ngiyabatsetselela emaphutsa abo kanye netono tabo.”+
4 Jeremiya wabese ubita Bharuki+ indvodzana yaNeriya futsi wamtjela onkhe emavi Jehova lebekawakhulume kuye. Bharuki wawabhala kulomculu.*+ 5 Ngemuva kwaloko Jeremiya wakhuluma naBharuki watsi: “Angikavumeleki kungena endlini yaJehova. 6 Ngako nguwe lokufanele uye khona futsi ufike uwafundze ngelivi lelivakalako lamavi aJehova lengikutjele kutsi uwabhale kulomculu. Wafundze embikwebantfu labasendlini yaJehova ngelilanga lekuzila kudla; uwafundzele bonkhe bantfu bakaJuda labetile basuka emadolobheni abo. 7 Mhlawumbe Jehova utabeva nabacela kwentelwa umusa futsi nguloyo naloyo ashiye tindlela takhe letimbi, ngobe Jehova umemetele kutsi labantfu utabavutsela ngentfukutselo yakhe nangelulaka lwakhe lolukhulu.”
8 Ngako Bharuki indvodzana yaNeriya wakwenta konkhe loko umphrofethi Jeremiya lebekamtjele kutsi akwente; emavi aJehova lebekabhalwe kulomculu* wawafundza ngelivi lelivakalako endlini yaJehova.+
9 Ngenyanga yesi-9, emnyakeni wesihlanu wekubusa kwaJehoyakimu+ indvodzana yaJosaya, inkhosi yakaJuda, bonkhe bantfu baseJerusalema nabo bonkhe bantfu labeta eJerusalema bavela emadolobheni akaJuda bacala kuzila kudla embikwaJehova.+ 10 Bharuki wabese ufundzela bonkhe labantfu lebebasendlini yaJehova emavi aJeremiya lebekabhalwe kulomculu,* wawafundza ngelivi lelivakalako. Bharuki abesekamelweni* laGemariya+ indvodzana yaShafani+ umbhali, ebaleni lelingenhla kwelithempeli, ngasekungeneni kweligede lelisha lendlu yaJehova.+
11 Ngesikhatsi Mikhaya indvodzana yaGemariya loyindvodzana yaShafani eva onkhe lamavi aJehova lebekabhalwe kulomculu,* 12 waya ekamelweni lamabhalane lelisesigodlweni* senkhosi. Tonkhe tindvuna* betihleti lapho: Bekuna-Elishama+ longumabhalane, naDelaya indvodzana yaShemaya, na-Elnathani+ indvodzana ya-Akbori,+ naGemariya indvodzana yaShafani, naSedekiya indvodzana yaHananiya kanye nato tonkhe letinye tindvuna. 13 Mikhaya wabatjela onkhe emavi lebekawevile ngesikhatsi Bharuki afundzela labantfu emavi lakulomculu.*
14 Ngemuva kwaloko tonkhe letindvuna tatfuma Jehudi indvodzana yaNethaniya indvodzana yaShelemiya indvodzana yaKushi tatsi akayokhuluma naBharuki atsi: “Wota nalomculu lowufundzele labantfu.” Bharuki indvodzana yaNeriya watsatsa lomculu waya nawo kuto. 15 Tatsi kuye: “Sicela uhlale phansi futsi usifundzele wona ngelivi lelivakalako.” Ngako Bharuki watifundzela lomculu.
16 Tatsi nje nasetikuve konkhe lobekubhalwe kulomculu, tabukana todvwa tetfukile futsi tatsi kuBharuki: “Onkhe lamavi kufanele siwatjele inkhosi.” 17 Tabuta Bharuki tatsi: “Asewusitjele, kwenteke kanjani kutsi ubhale konkhe loku? Ukutjelwe nguJeremiya yini?” 18 Bharuki waphendvula letindvuna watsi: “Yebo, ungitjele onkhe lamavi, mine ngibese ngiwabhala kulomculu* nge-inki.” 19 Letindvuna tatsi kuBharuki: “Wena naJeremiya hambani niyobhaca futsi ningatjeli muntfu kutsi nikuphi.”+
20 Ngemuva kwaloko tabeka lomculu ekamelweni la-Elishama longumabhalane, futsi taya ebaleni lapho bekunenkhosi khona, tafike tayitjela konkhe letikuvile.
21 Ngako inkhosi yatfuma Jehudi+ kutsi alandze lomculu, futsi wawulandza ekamelweni la-Elishama longumabhalane. Jehudi wabese uyawufundza embikwenkhosi nasembikwato tonkhe tindvuna lebetime eceleni kwenkhosi. 22 Inkhosi beyihleti endlini lehlala kuyo ebusika. Bekuyinyanga yesi-9* futsi bekubaswe imbawula embikwayo. 23 Jehudi bekatsi nakacedza kufundza tincenye letintsatfu nobe letine telikhasi lalomculu, inkhosi ititsatse itijube ngemukhwa wamabhalane bese itijika kulembawula. Wonkhe lomculu wagcine uphelele kulembawula. 24 Inkhosi kanye nato tonkhe tinceku tayo leteva lamavi abazange besabe ngisho nakancane futsi abazange batidzabule timphahla tabo. 25 Ngisho nobe Elnathani,+ naDelaya+ kanye naGemariya+ bebancenga inkhosi kutsi ingawushisi lomculu, kepha ayizange ibalalele. 26 Ngetulu kwaloko, inkhosi yatfuma Jerameli indvodzana yenkhosi, naSeraya indvodzana ya-Azriyeli kanye naShelemiya indvodzana ya-Abdeyeli kutsi bayobamba umphrofethi Jeremiya kanye naBharuki longumabhalane, kodvwa Jehova wabafihla.+
27 Ngemuva kwekutsi inkhosi ishise lomculu lobewunemavi labhalwe nguBharuki awatjelwe nguJeremiya,+ Jehova waphindze wakhuluma naJeremiya watsi: 28 “Tsatsa lomunye umculu uphindze ubhale onkhe lamavi lebekakulomculu wekucala loshiswe nguJehoyakimu inkhosi yakaJuda.+ 29 Ubokhuluma naJehoyakimu inkhosi yakaJuda utsi: ‘Naku Jehova lakushoko: “Wena uwushisile lomculu futsi watsi: ‘Ubhaleleni kutsi inkhosi yaseBhabhulona itawufika ibhubhise lelive futsi icotfule bantfu kanye netilwane?’+ 30 Ngako naku lokushiwo nguJehova mayelana naJehoyakimu inkhosi yakaJuda: ‘Kute ngisho namunye kubantfwana bakhe lotawusala ahlale esihlalweni sebukhosi saDavide,+ nesidvumbu sakhe sitawushiswa lilanga emini futsi silale sitfwatfwa ebusuku.+ 31 Ngitatiphindziselela kuye nakubantfwana* bakhe nasetincekwini takhe ngenca yetono labatentile, futsi ngitabehlisela yonkhe lenhlekelele lengitsite ngitayiletsa kubo nakubantfu baseJerusalema kanye nakubantfu bakaJuda,+ ngobe abazange bangilalele.’”’”+
32 Ngemuva kwaloko, Jeremiya watsatsa lomunye umculu wawunika Bharuki lobekangumabhalane+ futsi ayindvodzana yaNeriya. Bharuki wawabhala onkhe emavi lawatjelwa nguJeremiya, lokungemavi labekakulomculu* lowashiswa nguJehoyakimu inkhosi yakaJuda,+ futsi kwangetwa emavi lamanyenti lafana nalawo.
37 Sedekiya+ indvodzana yaJosaya wabekwa kutsi abe yinkhosi yakaJuda, abekwa nguNebukhadnezari* inkhosi yaseBhabhulona. Wabusa esikhundleni saKhoniya*+ indvodzana yaJehoyakimu. 2 Kodvwa Sedekiya netinceku takhe kanye nebantfu bakulelive abazange bawalalele emavi aJehova lawasho asebentisa umphrofethi Jeremiya.
3 INkhosi Sedekiya yatfuma Jukhali+ indvodzana yaShelemiya kanye naZefaniya+ indvodzana yaMaseya umphristi kutsi baye kumphrofethi Jeremiya, bafike batsi: “Sicela usithantazele kuJehova Nkulunkulu wetfu.” 4 Jeremiya bekahamba akhululekile emkhatsini webantfu, ngobe bekasengakavalelwa ejele.+ 5 Ngaleso sikhatsi, emaKhaledi bekavimbetele iJerusalema, kodvwa ayekela kuyihlasela nakeva kutsi libutfo laFaro liyeta lisuka eGibhithe.+ 6 Ngemuva kwaloko, Jehova wakhuluma nemphrofethi Jeremiya watsi: 7 “Jehova Nkulunkulu wema-Israyeli utsi: ‘Nine titfunywa tenkhosi yakaJuda, naku lokufanele niyitjele kona inkhosi yenu njengobe initfume kutsi nitobuta kimi: “Libutfo laFaro lelitonisita litawujika libuyele eveni lalo, eGibhithe.+ 8 EmaKhaledi atawubuya ahlasele lelidolobha, alincobe futsi alishise ngemlilo.”+ 9 Naku Jehova lakushoko: “Ningatiyengi nitsi: ‘EmaKhaledi ngeke asabuya,’ ngobe angeke ahlale angabuyi. 10 Ngisho nobe bekungatsiwa niyalehlula lonkhe lelibutfo lemaKhaledi lelilwa nani futsi kusale emasotja lalimele nje kuphela, bekatawuphuma emathendeni awo ashise lelidolobha ngemlilo.”’”+
11 Ngesikhatsi libutfo lemaKhaledi seliyekele kuhlasela iJerusalema ngenca yelibutfo laFaro,+ 12 Jeremiya wasuka eJerusalema waya eveni lakaBhenjamini+ kuze ayotfola sabelo sakhe emkhatsini webantfu bakubo. 13 Kodvwa watsi umphrofethi Jeremiya nakefika eGedeni lakaBhenjamini, umphatsi wabogadzi lobekutsiwa nguJiriya indvodzana yaShelemiya indvodzana yaHananiya, wambamba futsi watsi: “Wena uyasihlamuka, uya kumaKhaledi!” 14 Kepha Jeremiya watsi: “Cha, akusinjalo! Anginihlamuki, futsi angiyi kumaKhaledi.” Kodvwa Jiriya akazange amlalele. Esikhundleni saloko, wambopha futsi wamyisa etindvuneni. 15 Letindvuna tamtfukutselela kakhulu Jeremiya,+ ngako tamshaya futsi tamvalela*+ endlini yaJehonathani longumabhalane, lebeseyentiwe lijele. 16 Jeremiya wafakwa ejele lelisemgodzini,* wavalelwa esitokisini futsi wahlala lapho emalanga lamanyenti.
17 INkhosi Sedekiya yabese itsi akalandvwe, futsi yambuta imibuto ngasense esigodlweni*+ sayo, yatsi: “Kukhona yini Jehova lakushito?” Jeremiya watsi: “Yebo kukhona!” futsi wachubeka watsi: “Wena utawunikelwa esandleni senkhosi yaseBhabhulona!”+
18 Jeremiya wakhuluma neNkhosi Sedekiya watsi: “Kukhona yini lokubi lengikwentile kuwe nasetincekwini takho kanye nakulabantfu, kutsi ungaze ungifake ejele? 19 Nyalo sebaphi labaphrofethi bakho lebebaphrofetha kuwe batsi: ‘Inkhosi yaseBhabhulona angeke ikuhlasele futsi nalelive angeke ilihlasele’?+ 20 Awu nkhosi yami, mane ungilalele nkhosi. Ngicela umane ulalele nasi sicelo sami: Ungangibuyiseli endlini yaJehonathani+ longumabhalane, ngobe ngitawufela lapho.”+ 21 Ngako iNkhosi Sedekiya yakhipha umyalo wekutsi Jeremiya akagcinwe eBaleni Labogadzi,+ futsi onkhe malanga bekanikwa sinkhwa lesiyindingilizi lebesilandvwa esitaladini sebabhaki,+ kwaze kwaba ngulapho sekute sinkhwa edolobheni.+ Jeremiya wachubeka ahleli eBaleni Labogadzi.
38 BoShefathiya indvodzana yaMathani, naGedaliya indvodzana yaPhashuri, naJukhali+ indvodzana yaShelemiya kanye naPhashuri+ indvodzana yaMalkhiya beva ngalesikhatsi Jeremiya akhuluma nabo bonkhe bantfu, atsi: 2 “Naku Jehova lakushoko: ‘Umuntfu lotawuhlala kulelidolobha utawubulawa ngenkemba, abulawe yindlala kanye nesifo lesibulalako.+ Kodvwa loyo lotatinikela* kumaKhaledi utawuchubeka aphila, aphephise nekuphila kwakhe.’+ 3 Jehova utsi: ‘Lelidolobha litawunikelwa ebutfweni lenkhosi yaseBhabhulona futsi italincoba.’”+
4 Tindvuna takhuluma nenkhosi Sedekiya tatsi: “Sicela ubulale lomuntfu,+ ngobe letintfo latishoko tiwacedza emandla* emasotja lasele kulelidolobha, futsi tibacedza emandla bonkhe labantfu. Lomuntfu akasifuneli lokuhle lesive, kepha ufuna sehlelwe yinhlekelele.” 5 INkhosi Sedekiya yaphendvula yatsi: “Bonani kutsi nimenta njani, ngobe kute inkhosi lengakwenta kuze inivimbe.”
6 Ngako batsatsa Jeremiya bamfaka emtfonjeni waMalkhiya indvodzana yenkhosi, futsi bamehlisa ngetintsambo. Lomtfombo bewuseBaleni Labogadzi.+ Bekute emanti kuwo kodvwa bekuneludzaka kuphela, ngako Jeremiya wabisha.
7 Ebedi-meleki+ lobekangumTopiya futsi ayindvuna* esigodlweni* senkhosi weva kutsi bebafake Jeremiya emtfonjeni. Ngaleso sikhatsi inkhosi beyihleti eGedeni lakaBhenjamini,+ 8 ngako Ebedi-meleki waphuma esigodlweni* wayokhuluma nenkhosi, wafike watsi: 9 “Awu nkhosi yami, lamadvodza ente intfo lembi kakhulu kumphrofethi Jeremiya! Amjikijele emtfonjeni futsi utawubulawa yindlala ngobe sekute sinkhwa kulelidolobha.”+
10 Ngako inkhosi yabese ikhuluma na-Ebedi-meleki umTopiya yatsi: “Tsatsa emadvodza langu-30 futsi nihambe niyokhipha umphrofethi Jeremiya kulomtfombo asengakafi.” 11 Ebedi-meleki watsatsa lamadvodza waya nawo esigodlweni* senkhosi, endzaweni lengephansi kwalapho kugcinwa khona umcebo.+ Bafike batsatsa emanikiniki kanye netidvwedvwe, futsi bakwehlisela kulomtfombo ngetintsambo kwaya kuJeremiya. 12 Ngemuva kwaloko, Ebedi-meleki umTopiya wakhuluma naJeremiya watsi: “Ngicela ufake lamanikiniki naletidvwedvwe emakhwapheni akho kuze letintsambo tingakulimati.” Jeremiya wenta kanjalo, 13 futsi bamdvonsa ngaletintsambo, bamkhipha kulomtfombo. Jeremiya wachubeka ahleli eBaleni Labogadzi.+
14 INkhosi Sedekiya yatsi akulandvwe umphrofethi Jeremiya ete kuyo egedeni lesitsatfu lelisendlini yaJehova. Inkhosi yase ikhuluma naJeremiya itsi: “Kunentfo lengifuna kukubuta yona. Ngicela ungangifihleli lutfo.” 15 Jeremiya wabese ukhuluma naSedekiya watsi: “Nangingakhuluma, wena utangibulala. Nangingakweluleka, wena angeke ungilalele.” 16 Ngako iNkhosi Sedekiya yafunga kuJeremiya ngasense yatsi: “Ngifunga Jehova Nkulunkulu lophilako, loyo losinike kuphila. Angeke ngikubulale futsi angeke ngikunikele esandleni salamadvodza lafuna kukubulala.”
17 Jeremiya wabese ukhuluma naSedekiya watsi: “Naku lokushiwo nguJehova Nkulunkulu wemabutfo, longuNkulunkulu wema-Israyeli: ‘Nangabe utinikela* etindvuneni tenkhosi yaseBhabhulona angeke ubulawe, nalelidolobha angeke lishiswe futsi wena kanye nemndeni wakho nitawuchubeka niphila.+ 18 Kodvwa nangabe ungatinikeli* etindvuneni tenkhosi yaseBhabhulona, lelidolobha litawunikelwa kumaKhaledi, atalishisa ngemlilo+ futsi wena angeke uphunyule esandleni sawo.’”+
19 INkhosi Sedekiya yabese itsi kuJeremiya: “Ngesaba emaJuda langihlamukile aya kumaKhaledi, ngobe nakungenteka nginikelwe kuwo angangiphatsa kabi.” 20 Kodvwa Jeremiya watsi: “Angeke unikelwe kuwo. Ngicela ulalele lelivi laJehova lengikutjela lona, nawenta njalo tintfo titakuhambela kahle futsi utawuchubeka uphila. 21 Kodvwa nangabe ungeke utinikele,* kutawenteka naku Jehova langikhombise kona: 22 Bonkhe bafati labasele esigodlweni* senkhosi yakaJuda batawuletfwa etindvuneni tenkhosi yaseBhabhulona,+ futsi batsi:
‘Lamadvodza lowetsembile* akukhohlisile futsi akwehlulile.+
Ente kutsi ubishe eludzakeni.
Nyalo sewakushiyile.’
23 “Bonkhe bafati bakho nemadvodzana akho batawumikiswa kumaKhaledi, futsi nawe angeke uphunyule kuwo, kodvwa utawutsatfwa yinkhosi yaseBhabhulona,+ nalelidolobha litawushiswa ngemlilo ngenca yakho.”+
24 Sedekiya wabese utsi kuJeremiya: “Ungatjeli muntfu ngaloku lebesikhuluma ngako, ngale kwaloko utawufa. 25 Nakwenteka letindvuna tiva kutsi ngikhulume nawe futsi tite kuwe tifike titsi: ‘Sicela usitjele kutsi utsiteni enkhosini. Ungasifihleli lutfo, futsi angeke sikubulale.+ Itsiteni inkhosi kuwe?’ 26 ubotiphendvula utsi: ‘Bengicela inkhosi kutsi ingangibuyiseli endlini yaJehonathani kuze ngingafeli khona.’”+
27 Ngekuhamba kwesikhatsi, tonkhe letindvuna teta kuJeremiya futsi tamhloma imibuto. Watitjela konkhe loko inkhosi beyitsite akusho. Letindvuna tabese tiyayekela kumbuta ngobe kute ngisho namunye lobekevile ngesikhatsi Jeremiya akhuluma nenkhosi. 28 Jeremiya wachubeka ahleli eBaleni Labogadzi+ kwaze kwaba lilanga iJerusalema leyancotjwa ngalo; abesolo akhona lapho ngesikhatsi iJerusalema incotjwa.+
39 Nebukhadnezari* inkhosi yaseBhabhulona kanye nalo lonkhe libutfo lakhe befika eJerusalema futsi bayivimbetela ngenyanga yesi-10, emnyakeni wesi-9 wekubusa kweNkhosi Sedekiya yakaJuda.+
2 Ngelilanga lesi-9 enyangeni yesine, emnyakeni wesi-11 wekubusa kwaSedekiya, lelibutfo labhidlita lubondza langena ngekhatsi kulelidolobha.+ 3 Tonkhe tindvuna tenkhosi yaseBhabhulona tangena ngekhatsi futsi tahlala eGedeni Lelisekhatsi Nendzawo.+ Letindvuna bekuboNegali-sareseri umSamgari, naNebo-Sasekhimi umRabusarisi,* naNegali-sareseri umRabumagi,* kanye nato tonkhe letinye tindvuna tenkhosi yaseBhabhulona.
4 Ngesikhatsi Sedekiya inkhosi yakaJuda nawo onkhe emasotja akhe batibona, babaleka,+ futsi baphuma kulelidolobha ebusuku babaleka babheka ngasengadzeni yenkhosi. Baphuma ngeligede lelisemkhatsini wetindvonga letimbili futsi bachubeka babaleka ngendlela leya e-Arabha.+ 5 Kodvwa libutfo lemaKhaledi labagijimisa futsi lakhandza Sedekiya endzaweni lelugwadvule yaseJerikho.+ Lelibutfo lambamba futsi lamyisa eNkhosini Nebukhadnezari* yaseBhabhulona eRibla,+ eveni laseHamathi,+ lapho yakhipha khona sigwebo sakhe. 6 Khona lapho eRibla, inkhosi yaseBhabhulona yabulala emadvodzana aSedekiya embikwakhe, yaphindze yabulala nabo bonkhe bantfu bakaJuda labahloniphekile.+ 7 Ngemuva kwaloko yakupuluta emehlo aSedekiya, yabese imbopha ngetinketane telitfusi kuze imyise eBhabhulona.+
8 EmaKhaledi abese ashisa sigodlo* senkhosi kanye netindlu tebantfu,+ futsi abhidlita lubondza lwaseJerusalema.+ 9 Nebuzaradani+ loyindvuna yabogadzi watsatsa bantfu lebebasele kulelidolobha wayobatfumba eBhabhulona, watsatsa nalabo lebebatinikele kuye, kanye nanobe ngubani lobekasele.
10 Kodvwa Nebuzaradani loyindvuna yabogadzi wabashiya kaJuda labanye bantfu lebebaphuye kakhulu, lokungulabo lebebete lutfo. Ngalelolanga wabanika emasimu emagilebisi kanye nendzawo labatayilima.*+
11 Nebukhadnezari* inkhosi yaseBhabhulona wanika Nebuzaradani indvuna yabogadzi nangu umyalo macondzana naJeremiya: 12 “Mtsatse umnakekele, ungacali umlimate, futsi ubomnika nobe yini layicelako.”+
13 Ngako Nebuzaradani indvuna yabogadzi, naNebushazbani umRabusarisi,* naNegali-sareseri umRabumagi* kanye nato tonkhe tikhulu tenkhosi yaseBhabhulona, tatfuma emadvodza 14 kutsi ayolandza Jeremiya eBaleni Labogadzi+ futsi ammikise kuGedaliya+ indvodzana ya-Ahikamu+ indvodzana yaShafani+ kuze ahlale endlini yakhe. Ngako Jeremiya wahlala emkhatsini webantfu bakubo.
15 Ngalesikhatsi Jeremiya asevalelwe eBaleni Labogadzi,+ Jehova wakhuluma naye watsi: 16 “Hamba uye ku-Ebedi-meleki+ umTopiya ufike utsi kuye: ‘Naku lokushiwo nguJehova wemabutfo longuNkulunkulu wema-Israyeli: “Sengiyakwenta loko lengatsi ngitakwenta kulelidolobha, ngesikhatsi ngitsi ngitaliletsela inhlekelele hhayi lokuhle, futsi loko utakubona ngalelolanga.”’
17 “‘Kodvwa ngalelolanga ngitakukhulula futsi angeke unikelwe kulamadvodza lowesabako,’ kusho Jehova.”
18 “‘Ngitakuphephisa futsi angeke ubulawe ngenkemba. Utawusindza+ ngobe wetsembela kimi,’+ kusho Jehova.”
40 Jehova wakhuluma naJeremiya ngemuva kwekutsi Nebuzaradani+ indvuna yabogadzi amkhulule eRama.+ Nebuzaradani abemtsetse wamyisa lapho aboshwe tandla ngetinketane, futsi Jeremiya bekanabo bonkhe bantfu baseJerusalema nebakaJuda lebebayotfunjwa eBhabhulona. 2 Ngemuva kwaloko, lendvuna yabogadzi yabitela Jeremiya eceleni futsi yatsi kuye: “Jehova Nkulunkulu wakho wakhuluma ngalenhlekelele leyehlele lelive, 3 futsi Jehova uyiletsile njengobe nje asho, ngobe nona kuJehova nangalilaleli livi lakhe. Kungako nehlelwe nguloku.+ 4 Nyalo ngiyatichacha letinketane letibophe tandla takho. Nawufuna ungahamba nami siye eBhabhulona, futsi mine ngitakunakekela. Kodvwa nangabe ungafuni kuya eBhabhulona ungasala. Asewubuke nje, lonkhe lelive lisembikwakho. Hamba uye nobe ngukuphi lapho ufuna kuya khona.”+
5 Kwatsi Jeremiya asengakahambi, Nebuzaradani watsi kuye: “Buyela emuva kuGedaliya+ indvodzana ya-Ahikamu+ indvodzana yaShafani,+ lobekwe yinkhosi yaseBhabhulona kutsi aphatse emadolobha akaJuda, futsi ufike uhlale naye emkhatsini webantfu bakini, nobe-ke uye lawufuna kuya khona.”
Lendvuna yabogadzi yabese imupha kudla kanye nesipho, futsi yamkhulula wahamba. 6 Ngako Jeremiya wahamba waya kuGedaliya indvodzana ya-Ahikamu eMispa,+ wafike wahlala naye emkhatsini webantfu lebebasele kulelive.
7 Ngekuhamba kwesikhatsi, tonkhe tindvuna temphi lebetikulelive kanye nemadvodza labehamba nato beva kutsi inkhosi yaseBhabhulona ibeke Gedaliya indvodzana ya-Ahikamu kutsi aphatse lelive futsi engamele bantfu labaphuyile bakulelive labangakayiswa eBhabhulona, lokungemadvodza nebafati kanye nebantfwana.+ 8 Ngako letindvuna teta kuGedaliya eMispa.+ Bekungu-Ishmayeli+ indvodzana yaNethaniya, Johanani+ naJonathani labangemadvodzana aKhareya, Seraya indvodzana yaThanhumethi, nemadvodzana a-Efayi umNethofa, naJezaniya+ indvodzana yemMakhathi kanye nemadvodza lebetihamba nawo. 9 Gedaliya indvodzana ya-Ahikamu indvodzana yaShafani wafunga kuletindvuna nakulamadvodza lebetihamba nawo watsi: “Ningesabi kusebentela emaKhaledi. Chubekani nihleli kulelive futsi nisebentele inkhosi yaseBhabhulona, nanenta njalo tintfo titanihambela kahle.+ 10 Mine ngitawuhlala lapha eMispa nginimelele kumaKhaledi* latawufika. Kodvwa nine kufanele nikhe titselo tasehlobo, nente liwayini kanye nemafutsa bese nikufaka etitjeni tenu tekubeka tintfo, futsi nihlale kulamadolobha leseniwatsetse.”+
11 Onkhe emaJuda lebekaseveni lakaMowabi, laka-Amoni nelaka-Edomu, nalawo lebekakuwo onkhe lamanye emave, eva kutsi inkhosi yaseBhabhulona ishiye labanye bantfu kaJuda, nekutsi ibeke Gedaliya indvodzana ya-Ahikamu indvodzana yaShafani kutsi abengamele. 12 Ngako onkhe emaJuda acala kubuya asuka kuto tonkhe letindzawo lebekahlakatekele kuto, futsi eta kuGedaliya eMispa, eveni lakaJuda. Akha titselo tasehlobo letinyenti kakhulu futsi enta neliwayini lelinyenti.
13 Johanani indvodzana yaKhareya kanye nato tonkhe tindvuna temphi lebetikulelive beta kuGedaliya eMispa. 14 Bafike batsi kuye: “Uyati yini kutsi Bhalisi loyinkhosi yema-Amoni+ utfumele Ishmayeli indvodzana yaNethaniya kutsi akubulale?”+ Kodvwa Gedaliya indvodzana ya-Ahikamu akazange abakholwe.
15 Johanani indvodzana yaKhareya wabese ukhuluma naGedaliya eMispa ngasense watsi: “Ngivumele kutsi ngiyobulala Ishmayeli indvodzana yaNethaniya futsi kute ngisho namunye lotakwati ngako. Kudzingeke ngani nje kutsi aze akubulale, futsi kungani kufanele bahlakateke bonkhe labantfu bakaJuda lababutsene lakuwe? Kungani labantfu bakaJuda labasele kufanele bashabalale?” 16 Kodvwa Gedaliya+ indvodzana ya-Ahikamu watsi kuJohanani indvodzana yaKhareya: “Ungacali uyente leyontfo, ngobe loku lokushoko nga-Ishmayeli akusilo liciniso.”
41 Ngenyanga yesi-7, Ishmayeli+ indvodzana yaNethaniya indvodzana ya-Elishama, lobekatalwa ebukhosini* futsi angulenye yetindvuna tenkhosi, weta kuGedaliya indvodzana ya-Ahikamu eMispa+ ahamba nemadvodza langu-10. Batsi basadla ndzawonye khona lapho eMispa, 2 Ishmayeli indvodzana yaNethaniya kanye nalamadvodza langu-10 labehamba nawo, basukuma batsatsa tinkemba tabo babulala Gedaliya indvodzana ya-Ahikamu indvodzana yaShafani. Ishmayeli wambulala kanjalo-ke loyo bekabekwe yinkhosi yaseBhabhulona kutsi aphatse lelive. 3 Wabulala nawo onkhe emaJuda lebekanaGedaliya eMispa, wabulala nemasotja langemaKhaledi lebekalapho.
4 Ngelilanga lelalandzela kubulawa kwaGedaliya, futsi kusete nalowatiko kutsi kwentekeni, 5 kwefika emadvodza langu-80 lebekasuka eShekhemu,+ eShilo+ naseSamariya.+ Abehhule tilevu tawo, adzabule timphahla tawo, atisike emtimbeni+ futsi aphetse iminikelo yalokutinhlavu, nemakha esihlahla semphepho,+ ayonikela ngako endlini yaJehova. 6 Ishmayeli indvodzana yaNethaniya wesuka eMispa wayowahlangabeta, futsi abehamba akhala. Nakefika kuwo watsi: “Wotani kuGedaliya indvodzana ya-Ahikamu.” 7 Kodvwa atsi lamadvodza nakefika kulelidolobha, Ishmayeli indvodzana yaNethaniya nalabo lebekahamba nabo bawabulala base bawajikijela emtfonjeni.
8 Kodvwa emkhatsini walamadvodza bekunalangu-10 lakhuluma na-Ishmayeli atsi: “Ungasibulali, ngobe sinekudla lesikufihle esigangeni. Kunakolo, ibhali, emafutsa kanye neluju.” Ngako akazange awabulale lamadvodza ngesikhatsi abulala lawa lamanye. 9 Tonkhe tidvumbu talamadvodza labekawabulele watijika emtfonjeni lomkhulu, lokungumtfombo lowagujwa yiNkhosi Asa ngesikhatsi ilwa neNkhosi Bhasha yaka-Israyeli.+ Ishmayeli indvodzana yaNethaniya watigcwalisa kuloyo mtfombo letidvumbu talamadvodza labekawabulele.
10 Ishmayeli wabatfumba bonkhe bantfu lebebaseMispa+ lokufaka ekhatsi emadvodzakati enkhosi kanye nabo bonkhe labantfu labebasele eMispa, labo lebebenganyelwe nguGedaliya+ indvodzana ya-Ahikamu, lobekabekwe nguNebuzaradani indvuna yabogadzi. Ishmayeli indvodzana yaNethaniya wabatfumba futsi wahamba nabo bawelela eveni lema-Amoni.+
11 Ngesikhatsi Johanani+ indvodzana yaKhareya kanye nato tonkhe tindvuna temphi lebetinaye beva ngalentfo lembi leyentiwe ngu-Ishmayeli indvodzana yaNethaniya, 12 batsatsa onkhe emadvodza bahamba bayokulwa na-Ishmayeli indvodzana yaNethaniya. Bamkhandza ngasemantini lamanyenti* aseGibeyoni.
13 Bonkhe labantfu lebebatfunjwe ngu-Ishmayeli bajabula ngesikhatsi babona Johanani indvodzana yaKhareya akanye nato tonkhe letindvuna temphi lebekahamba nato. 14 Ngemuva kwaloko bonkhe labantfu lebebatfunjwe ngu-Ishmayeli abasusa eMispa,+ bamshiya futsi bahamba naJohanani indvodzana yaKhareya. 15 Kodvwa Ishmayeli indvodzana yaNethaniya kanye nemadvodza langu-8 lebekanawo baphunyula kuJohanani futsi babaleka baya ka-Amoni.
16 Johanani indvodzana yaKhareya kanye nato tonkhe tindvuna temphi lebetikanye naye, bahamba nabo bonkhe labantfu baseMispa, lebebabakhulule ku-Ishmayeli indvodzana yaNethaniya. Loku kwenteka ngemuva kwekutsi Ishmayeli abulale Gedaliya+ indvodzana ya-Ahikamu. Babuya nemadvodza, emasotja, tiphatsimandla, bafati, kanye nebantfwana lebebabatsetse eGibeyoni. 17 Bahamba baya endzaweni yekuhlala yaKhimhamu leseceleni kweBhetlehema,+ futsi bebafuna kuya eGibhithe+ 18 babalekele emaKhaledi. Besebawesaba, ngobe Ishmayeli indvodzana yaNethaniya bekabulele Gedaliya indvodzana ya-Ahikamu, loyo lobekabekwe yinkhosi yaseBhabhulona kutsi engamele lelive.+
42 Ngemuva kwaloko kwefika tonkhe tindvuna temphi, lokufaka ekhatsi Johanani+ indvodzana yaKhareya, naJezaniya indvodzana yaHoshaya kanye nabo bonkhe bantfu, labancane nalabadzala, labanjingile nalabaphuyile, 2 futsi bakhuluma nemphrofethi Jeremiya batsi: “Sicela umane usentele umusa futsi usithantazele kuJehova Nkulunkulu wakho, uthantazele bonkhe labantfu labasele, ngobe nje nawe uyatibonela kutsi sekusele bantfu labambalwa kakhulu.+ 3 Shengatsi Jehova Nkulunkulu wakho angasitjela kutsi nguyiphi indlela lokufanele sihambe ngayo nekutsi yini lokufanele siyente.”
4 Umphrofethi Jeremiya wabaphendvula watsi: “Senginivile, futsi njengobe nicelile ngitawuthantaza kuJehova Nkulunkulu wenu; ngitanitjela konkhe loko Jehova latakusho. Kute lengitanifihlela kona.”
5 Baphendvula Jeremiya batsi: “Shengatsi Jehova angaba ngufakazi locinisile nalowetsembekile, futsi shengatsi angasijezisa nasingete sakwenta konkhe loko Jehova Nkulunkulu wakho latawutsi usitjele kona. 6 Loko lokutawushiwo nguJehova Nkulunkulu wetfu lesikutfuma kuye sitakulalela, sitsandza nobe singatsandzi, kuze tintfo tisihambele kahle, ngobe sitalilalela livi laJehova Nkulunkulu wetfu.”
7 Jehova wakhuluma naJeremiya ngemuva kwemalanga langu-10. 8 Ngako Jeremiya wabita Johanani indvodzana yaKhareya, wabita nato tonkhe letindvuna temphi lebetikanye naye, kanye nabo bonkhe labantfu, labancane nalabadzala, labanjingile nalabaphuyile.+ 9 Watsi kubo: “Jehova Nkulunkulu wema-Israyeli, loyo lebeningitfume kutsi ngiyokwetfula sicelo senu kuye, utsi: 10 ‘Nangabe nitawuhlala kulelive, mine ngitawunakha futsi angeke nginidzilite, ngitanihlanyela nginganizuphuni, ngobe ngitatisola* ngalenhlekelele lenginehlisele yona.+ 11 Ningetfuswa ngulenkhosi yaseBhabhulona leniyesabako.’+
“Jehova utsi: ‘Ningayesabi ngobe mine nginani, futsi ngitanisindzisa, nginikhulule esandleni sayo. 12 Ngitanentela umusa,+ futsi nayo itanentela umusa inibuyisele eveni lenu.
13 “‘Kodvwa nangabe nitawutsi: “Cha, angeke sihlale kulelive!” futsi ningalilaleli livi laJehova Nkulunkulu wenu 14 ngekutsi nitsi: “Sitawuhamba siye eGibhithe,+ lapho singeke siyibone khona imphi nobe sive umsindvo wekukhala kweluphondvo nobe siphatfwe yindlala; futsi sitawufike sihlale khona,” 15 lalelani naku Jehova lakushoko kini, nine bantfu labasele bakaJuda. Jehova wemabutfo longuNkulunkulu wema-Israyeli utsi: “Nangabe nitimisele ngekuya eGibhithe futsi nangabe nitawufike nihlale lapho,* 16 lenkemba leniyesabako itanitfola khona lapho, nalendlala leniyesabako itanilandzela nize niyofika eGibhithe, futsi nitawufela khona.+ 17 Bonkhe labantfu labatimisele kuyohlala eGibhithe batawubulawa ngenkemba, babulawe yindlala kanye nesifo lesibulalako. Kute ngisho namunye lotawusindza nobe aphunyule kulenhlekelele lengitabaletsela yona.”’
18 “Ngobe Jehova wemabutfo longuNkulunkulu wema-Israyeli utsi: ‘Njengobe nje intfukutselo yami nelulaka lwami kwabavutsela bantfu baseJerusalema,+ nani-ke nangabe nitawuya eGibhithe, intfukutselo yami itawuba setikwenu. Bantfu batanicalekisa, bamangale nabanibona, bakhulume kabi ngani futsi banedzelele,+ kantsi nalendzawo aniyuphindze niyibone.’
19 “Awu nine bantfu labasele bakaJuda, Jehova sewukhulumile nani wanitjela kutsi ningayi eGibhithe. Nibowati-ke kutsi mine nginecwayisile lamuhla 20 kutsi nitawufa ngalentfo lembi leniyentako. Ngobe ningitfume kuJehova Nkulunkulu wenu natsi: ‘Sithantazele kuJehova Nkulunkulu wetfu futsi usitjele konkhe lokushiwo nguJehova Nkulunkulu wetfu, tsine sitakwenta.’+ 21 Lamuhla nginitjelile kutsi Nkulunkulu utsiteni, kodvwa nine angeke nililalele livi laJehova Nkulunkulu wenu, futsi angeke nikwente loko latsite nginitjele kona.+ 22 Nibowati-ke kutsi nitawufike nife kulendzawo lenifuna kuyohlala kuyo,+ nibulawe ngenkemba, nibulawe yindlala kanye nesifo lesibulalako.”
43 Ngemuva kwekutsi Jeremiya sekacedzile kutjela bonkhe labantfu onkhe emavi lavela kuJehova Nkulunkulu wabo, asabatjele konkhe loko Jehova Nkulunkulu wabo lebekatsite akusho kubo, 2 bo-Azariya indvodzana yaHoshaya naJohanani+ indvodzana yaKhareya kanye nawo onkhe emadvodza latigabatisako, bakhuluma naJeremiya batsi: “Unemanga! Jehova Nkulunkulu wetfu akakutfumi kutsi ukhulume natsi utsi: ‘Ningayi kuyohlala eGibhithe.’ 3 Kodvwa nguBharuki+ indvodzana yaNeriya lona lokufake umoya lomubi ngobe ufuna sinikelwe kumaKhaledi, kuze asibulale nobe asitsatse ayositfumba eBhabhulona.”+
4 Ngako Johanani indvodzana yaKhareya nato tonkhe tindvuna temphi, kanye nabo bonkhe labantfu abazange bamlalele Jehova nakatsi abahlale kaJuda. 5 Esikhundleni saloko, Johanani indvodzana yaKhareya nato tonkhe tindvuna temphi bahamba nabo bonkhe bantfu lebebasele kaJuda, lokungulabo lebebabuyile batohlala kaJuda basuka kuto tonkhe tive lebebahlakatekele kuto.+ 6 Bahamba nemadvodza, bafati, bantfwana, emadvodzakati enkhosi kanye nabo bonkhe bantfu lebebashiywe nguNebuzaradani+ indvuna yabogadzi, kutsi benganyelwe nguGedaliya+ indvodzana ya-Ahikamu+ loyindvodzana yaShafani.+ Batsatsa nemphrofethi Jeremiya kanye naBharuki indvodzana yaNeriya bahamba nabo. 7 Ngako bangena eGibhithe, futsi bahamba baze bayofika eThaphanesi,+ ngekwenta njalo bangamlaleli Jehova.
8 Ngemuva kwaloko Jehova wakhuluma naJeremiya eThaphanesi watsi: 9 “Tsatsa ematje lamakhulu uwafihle etitinini letisekungeneni kwesigodlo saFaro lesiseThaphanesi, bese uwavala ngeludzaka, futsi loku ukwente emaJuda akubukile. 10 Ubobese utsi kuwo: ‘Naku Jehova wemabutfo longuNkulunkulu wema-Israyeli lakushoko: “Ngitawubita Nebukhadnezari* inkhosi yaseBhabhulona loyinceku yami,+ ngibeke sihlalo sakhe sebukhosi ngetulu kwalamatje lengiwafihlile, futsi utawelulela lithende lakhe lebukhosi etikwawo.+ 11 Utawufike ahlasele lelive laseGibhithe.+ Loyo lofanelwe kubulawa sifo lesingumshayabhuce, utawubulawa ngiso, nobe ngubani lofanelwe kutfunjwa, utawutfunjwa, futsi nobe ngubani lofanelwe kufa ngenkemba, utawubulawa ngayo.+ 12 Ngitatilumeka ngemlilo+ tindlu* tabonkulunkulu baseGibhithe, futsi lenkhosi itawushisa letindlu bese itfumba labonkulunkulu. Itawutsatsa lelive laseGibhithe itigocotele ngalo, kuhle kwemelusi nakatigocota ngelijazi lakhe, futsi itawuphuma lapho ngekuthula.* 13 Itatibhidlita tibe ticucu tinsika taseBhethi-shemeshi* letiseveni laseGibhithe, futsi itatishisa ngemlilo tindlu* tabonkulunkulu baseGibhithe.”’”
44 Nkulunkulu wakhuluma naJeremiya mayelana nawo onkhe emaJuda lebekaseGibhithe,+ ahlala eMigdoli,+ eThaphanesi,+ eNofi*+ nasePhathrosi,+ watsi: 2 “Naku lokushiwo nguJehova wemabutfo, longuNkulunkulu wema-Israyeli: ‘Niyibonile inhlekelele lengiyiletsele iJerusalema+ kanye nawo onkhe emadolobha akaJuda, futsi lamuhla letindzawo setitindzala, atisahlali muntfu.+ 3 Loku kwenteke ngenca yekutsi ningicansulile ngetintfo letimbi lenitentile, nihambe nayokwentela labanye bonkulunkulu imihlatjelo+ futsi nabakhonta, lokubonkulunkulu nine nabokhokho benu lebeningabati.+ 4 Bengihlale nginitfumelela tinceku tami letibaphrofethi, ngititfumela njalo nje* ngitsi: “Lentfo leniyentako ngiyayenyanya, ngicela niyiyekele.”+ 5 Kodvwa anizange ningilalele nobe ninginake* nangitsi yiyekeleni lentfo lembi leniyentako yekunikelela labanye bonkulunkulu imihlatjelo.+ 6 Ngako ngatfulula lulaka lwami nentfukutselo yami futsi yavutsa njengemlilo emadolobheni akaJuda nasetitaladini taseJerusalema. Letindzawo taba tindzala futsi tasala tingenamsebenti, njengobe nje kusenjalo nalamuhla.’+
7 “Jehova Nkulunkulu wemabutfo, longuNkulunkulu wema-Israyeli utsi: ‘Nitibangelelani lenhlekelele lengaka? Nitawuphela nya kaJuda, kuphele onkhe emadvodza, bafati, bantfwana kanye netinswane, kungasali ngisho namunye umuntfu. 8 Ningicansulelani ngekwentela labanye bonkulunkulu imihlatjelo kulelive laseGibhithe lesenihleti kulo? Nitawuphela nya, nicalekiswe ngito tonkhe tive letisemhlabeni, futsi tihlekise ngani.+ 9 Senitikhohliwe yini tintfo letimbi letentiwa bokhokho benu, naletentiwa ngemakhosi akaJuda+ nebafati bawo,+ kanye naleto letentiwa ngini nebafati benu+ eveni lakaJuda nasetitaladini taseJerusalema? 10 Kuze kube ngulamuhla anikatitfobi* futsi anikakhombisi kutsi niyangesaba.+ Anikayilaleli imitsetfo yami nemiyalo yami lengayinika nine nabokhokho benu.’+
11 “Naku lokushiwo nguJehova wemabutfo, longuNkulunkulu wema-Israyeli: ‘Ngitimisele kuniletsela inhlekelele, ngilibhubhise lonkhe live lakaJuda. 12 Ngitawenta kutsi bonkhe labantfu labasele bakaJuda lebebatimisele ngekuyohlala eGibhithe baphele nya kulelo live.+ Batawubulawa ngenkemba futsi babulawe nayindlala; labancane nalabadzala, labanjingile nalabaphuyile batawubulawa ngenkemba futsi babulawe nayindlala. Bantfu batabacalekisa, bamangale nabababona, bakhulume kabi ngabo futsi babedzelele.+ 13 Njengobe nje ngayijezisa iJerusalema, ngitabajezisa nalabo labahlala eGibhithe, ngibajezise ngenkemba, ngendlala nangesifo lesibulalako.+ 14 Bantfu bakaJuda labasele labaye kuyohlala eGibhithe angeke baphunyule nobe basindze bese babuyela eveni lakaJuda. Batawufisa kubuyela emuva kodvwa angeke bakhone, ngaphandle kwalabambalwa labatawubaleka.’”
15 Bonkhe bantfu lebebahlala ePhathrosi, eveni laseGibhithe,+ nesicumbi lesikhulu lebesifaka ekhatsi onkhe emadvodza labekati kutsi bafati bawo bebentela labanye bonkulunkulu imihlatjelo, kanye nabo bonkhe bafati bawo lebebeme lapho, baphendvula Jeremiya batsi: 16 “Angeke sikulalele loko lokukhulume kitsi egameni laJehova. 17 Kunaloko sitawukwenta konkhe lesikushito, sitawentela iNdlovukazi yeliZulu* imihlatjelo futsi siyitfululele iminikelo yalokunatfwako,+ sente njengobe besenta, nanjengobe bebenta bokhokho betfu, emakhosi etfu kanye netindvuna tetfu emadolobheni akaJuda nasetitaladini taseJerusalema ngesikhatsi sisenekudla lokunyenti, netintfo tisasihambela kahle, futsi bekute ngisho nenhlekelele lebeyisehlela. 18 Kodvwa satsi nasiyekela kwentela iNdlovukazi yeliZulu* imihlatjelo futsi siyekela kuyitfululela iminikelo yalokunatfwako, sasala singenalutfo futsi sabulawa ngenkemba, sabulawa nayindlala.”
19 Labafati nabo batsi: “Ngesikhatsi sentela iNdlovukazi yeliZulu* imihlatjelo futsi siyitfululela iminikelo yalokunatfwako, besingakavunyelwa yini ngemadvodza etfu kutsi sibhake tinkhwa temhlatjelo letifanana nayo futsi siyitfululele iminikelo yalokunatfwako?”
20 Ngemuva kwaloko Jeremiya wakhuluma nabo bonkhe labantfu, lebebafaka ekhatsi lamadvodza nebafati bawo kanye nabo bonkhe labo lebebakhuluma naye, watsi: 21 “Jehova wayikhumbula lemihlatjelo lebeniyenta, nalebeyentiwa bokhokho benu, emakhosi enu, tindvuna tenu kanye nebantfu bakulelive, niyenta emadolobheni akaJuda nasetitaladini taseJerusalema,+ futsi akazange ayikhohlwe.* 22 Ekugcineni Jehova wehluleka kuyibeketelela lemikhuba yenu lemibi kanye naletintfo letenyanyekako lebenitenta, ngako live lenu laba tindzala, laba yindzawo leyetfusako nalecalekisiwe, kwasala kute nalohlala khona, futsi nalamuhla solo kunjalo.+ 23 Lenhlekelele inehlele ngobe nente lemihlatjelo futsi nona kuJehova ngekungalilaleli livi laJehova nangekungawugcini umtsetfo wakhe, netimiso takhe kanye naloko bekanikhumbuta kona, njengobe solo kusenjalo nalamuhla.”+
24 Jeremiya wachubeka akhuluma nabo bonkhe labantfu kanye nabo bonkhe labafati watsi: “Nonkhe nine bantfu bakaJuda lenihlala eGibhithe, lalelani nali livi laJehova. 25 Jehova wemabutfo longuNkulunkulu wema-Israyeli utsi: ‘Nikwentile loko nine nebafati benu lenitsite nitakwenta, ngobe nitsite: “Sitatifeza tifungo tetfu, sentele iNdlovukazi yeliZulu* imihlatjelo, siyitfululele neminikelo yalokunatfwako.”+ Nakanjani nitatigcina tifungo tenu, nente loko nine nebafati benu lenakwetsembisa.’
26 “Ngako-ke nonkhe nine bantfu bakaJuda+ lenihlala eGibhithe lalelani nali livi laJehova: ‘Jehova utsi: “Ngifunga ngelibito lami leliphakeme kutsi kute ngisho namunye umuntfu wakaJuda lohlala eGibhithe loyawuphindze afunge ngelibito lami atsi: ‘Ngifunga Jehova Nkulunkulu lophilako loyiNkhosi Lephakeme!’+ 27 Nyalo ngitimisele kubaletsela inhlekelele hhayi lokuhle.+ Bonkhe bantfu bakaJuda labaseGibhithe batawubulawa ngenkemba, babulawe nayindlala, baze baphele nya.+ 28 Bambalwa labatawusindza enkembeni futsi babuyele kaJuda+ basuka eGibhithe. Ngemuva kwaloko bonkhe bantfu bakaJuda lebebasele, futsi labafike bahlala eGibhithe batawati kutsi ngubani lokhulume liciniso emkhatsini wami nabo!”’”
29 “Jehova utsi: ‘Naku lokutawuba luphawu kini lwekutsi ngitanijezisa kulendzawo, kuze nati kutsi atawugcwaliseka emavi ami lengawasho kini ngesikhatsi ngitsi ngitaniletsela inhlekelele. 30 Naku lokushiwo nguJehova: “Faro Hofra loyinkhosi yaseGibhithe ngimnikela etitseni takhe nakulabo labafuna kumbulala, njengobe nje nganikela Sedekiya inkhosi yakaJuda esandleni saNebukhadnezari* inkhosi yaseBhabhulona, lobekasitsa sakhe futsi afuna kumbulala.”’”+
45 Ngemnyaka wesine wekubusa kwaJehoyakimu+ indvodzana yaJosaya, inkhosi yakaJuda, naku umphrofethi Jeremiya lakusho kuBharuki+ indvodzana yaNeriya ngesikhatsi Bharuki awabhala encwadzini legocotwako emavi lebekawatjelwe nguJeremiya:+
2 “Naku Jehova Nkulunkulu wema-Israyeli lakushoko kuwe Bharuki: 3 ‘Wena utsite: “Maye mine kwami, Jehova ungengetele tinsizi etikwetinsizi! Sengidziniwe kukhala futsi nekuphumula angikutfoli.”’
4 Nkulunkulu watsi: “Ubotjela Bharuki utsi: ‘Naku Jehova lakushoko: “Loko lebengikwakhile sengiyakubhidlita, naloko lebengikuhlanyele sengiyakuzuphuna futsi loku ngitakwenta kulo lonkhe lelive.+ 5 Kodvwa wena utifunela* tintfo letinkhulu. Yekela kufuna letintfo.”’
“‘Ngobe sekusele kancane kutsi ngehlisele bonkhe bantfu* inhlekelele,+ kepha ngisho nobe ungaya kuphi, mine ngitakuphephisa kuphila kwakho,’+ kusho Jehova.”
46 Jehova wakhuluma nemphrofethi Jeremiya macondzana netive:+ 2 Wakhuluma ngeGibhithe+ macondzana nelibutfo laFaro Nekho+ loyinkhosi yaseGibhithe, lobekangaseMfuleni iYufrathe futsi lowancotjwa nguNebukhadnezari* inkhosi yaseBhabhulona eKhakhemishi, ngemnyaka wesine wekubusa kwaJehoyakimu+ indvodzana yaJosaya, inkhosi yakaJuda. Wakhuluma watsi:
3 “Lungisani emahawu enu lamancane* nalamakhulu,
Nihambe niye emphini.
4 Awu nine bagibeli bemahhashi, lungisani emahhashi enu futsi niwagibele.
Manini etindzaweni tenu, nifake netigcoko tenu tekutivikela.
Lolani tikhali tenu futsi nigcoke emajazi enu ensimbi.
5 ‘Yini ngatsi bayesaba nje?
Bayabaleka, nemasotja abo ehluliwe.
Bagijime bashiya inyosi ngenca yekwesaba, nemasotja abo awabuki ngisho nasemuva.
Kunekwesaba yonkhe indzawo,’ kusho Jehova.
6 ‘Labanematubane abakhoni kubaleka, nemasotja awakhoni kuphunyula.
Nabasenyakatfo, ngaselusentseni lweMfula iYufrathe
Bagileka futsi bawa.’+
7 Ngubani lona lota ngemandla kuhle kweMfula iNayili,
Lota kuhle kwemfula lonemanti lagubhutelako?
8 IGibhithe ita ngemandla kuhle kweMfula iNayili,+
Ita kuhle kwemfula lonemanti lagubhutelako,
Itsi: ‘Ngitawuhamba ngiyombonya umhlaba.
Ngitawubhubhisa lidolobha kanye nalabahlala kulo.’
9 Khuphukani nine mahhashi!
Nine tincola, gijimani kube shengatsi niyahlanya!
Yanini embili nine masotja,
Nine maKushe nemaPhuthi laphatsa emahawu,+
Kanye nani nine maLudi+ lakwati kugoba* butjoki nekubusebentisa.+
10 “Lelo lilanga laJehova wemabutfo, loyiNkhosi Lephakeme, kutawuba lilanga lekutsi atiphindziselele etitseni takhe. Inkemba itawudla yesutse futsi inatse ingati yato ize yenele, ngobe Jehova wemabutfo loyiNkhosi Lephakeme utawenta umhlatjelo* eveni lelisenyakatfo eceleni kweMfula iYufrathe.+
Senetame tindlela letinyenti tekutelapha kepha tanganisiti,
Ngobe angeke nize nelapheke.+
12 Tive tivile ngekuhlazeka kwenu,+
Nekukhala kwenu kuvakele kulo lonkhe lelive.
Ngobe emasotja agilana odvwa
Futsi awa kanye kanye.”
13 Jehova wakhuluma nemphrofethi Jeremiya ngekutsi Nebukhadnezari* inkhosi yaseBhabhulona utakuta ahlasele iGibhithe,+ watsi:
Ubotsi: ‘Manini etindzaweni tenu futsi nitilungiselele,
Ngobe inkemba itawudla konkhe lokuseceleni kwenu.
15 Kubangelwe yini kutsi emasotja enu lanemandla akhukhuleke?
Ehlulekile kutilwela,
Ngobe Jehova uwalahlele phansi.
16 Emasotja lamanyenti kakhulu ayagileka futsi ayawa.
Akhuluma odvwa atsi:
“Sukumani, asibuyeleni kubantfu bakitsi naseveni letfu,
Ngobe lenkemba lecotfulako seyifikile.”’
17 Kuleyo ndzawo amemetele atsi:
18 ‘Ngitifunga mine,’ kusho iNkhosi, libito layo lokunguJehova wemabutfo,
‘Utawufika* abe njengeThabori+ lebonakala emkhatsini wetintsaba,
Abe njengeKhameli+ lebonakala ngaselwandle.
19 Pakishani tintfo tenu nilungele kuyotfunjwa,
Nine lenihlala eGibhithe.*
20 IGibhithe injengelitfokati lelihle,
Kodvwa itawuhlaselwa timbuzulwane letichamuka enyakatfo.
21 Ngisho nemasotja ayo lacashiwe anjengematfole londlekile,
Kodvwa nawo ajikile futsi abaleka kanyekanye.
22 ‘Umsindvo wayo unjengewenyoka lebalekako,
Ngobe titsa letinemandla tiyigijimisa tiphetse emazembe,
Kuhle kwebantfu labagawula tihlahla.’*
23 Jehova utsi: ‘Titaligawula lihlatsi layo nanobe belibonakala lihlangene litse ngci.
Ngobe letitsa tinyenti kakhulu kunesikhonyane, futsi kute longakhona kutibala.
24 Bantfu baseGibhithe* batawuhlazeka.
Batawunikelwa kubantfu basenyakatfo.’+
25 “Jehova wemabutfo longuNkulunkulu wema-Israyeli utsi: ‘Nyalo sengitawujezisa Amoni+ longunkulunkulu waseNo,*+ ngijezise Faro, iGibhithe, bonkulunkulu bayo+ kanye nemakhosi ayo. Ngitawujezisa Faro nabo bonkhe labetsembele kuye.’+
26 “‘Ngitabanikela kulabo labafuna kubabulala, ngibanikele kuNebukhadnezari* inkhosi yaseBhabhulona+ kanye nasetincekwini takhe. Kodvwa ngemuva kwaloko bantfu batawuphindze bahlale eGibhithe njengakadzeni,’ kusho Jehova.+
27 ‘Kodvwa wena nceku yami Jakobe ungesabi,
Awu Israyeli,+ ungetfuki.
Jakobe utawubuya abe nekuthula futsi angahlushwa ngulutfo,
Kute nalotamesabisa.’+
28 Jehova utsi: ‘Ngako ungesabi nceku yami Jakobe, ngobe mine nginawe.
47 Ngaphambi kwekutsi Faro ancobe iGaza, Jehova wakhuluma nemphrofethi Jeremiya mayelana nemaFilisti.+ 2 Jehova utsi:
“Kunemanti lachamuka enyakatfo.
Atawufika asikhukhula lesinemandla kakhulu.
Atawukhukhula lelive kanye nako konkhe lokukulo,
Akhukhule lelidolobha kanye nebantfu labahlala kulo.
Emadvodza atawukhala,
Futsi bonkhe bantfu labahlala kulelive batawulila.
3 Kutawutsi nakuvakala emahhashi esitsa agabadvula,
Nalapho kuvakala bukhehlekhehle betinkalishi temphi,
Kanye nemsindvo wemasondvo ato,
Bobabe angeke bagucuke kuze basite emadvodzana abo,
Ngenca yekutsi batawube sebesaba kakhulu,
4 Ngobe liyeta lilanga lapho atawubhujiswa khona onkhe emaFilisti;+
Jehova utawabhubhisa emaFilisti,
LokungemaFilisti lasesele kulawo laphuma esichingini saseKhaftori.*+
5 Bantfu baseGaza batawuba netimphandla.*
I-Ashkeloni seyibhujisiwe.+
6 Awu wena nkemba yaJehova!+
Kutawuze kube ngunini solo ugalela?
Buyela emgodleni wakho.
Sale uphumula, uyekele kugalela.
7 Ingakuyekela kanjani kugalela
Ibe itfunywe nguJehova kutsi yente njalo?
Itawuhlasela i-Ashkeloni nelugu lwelwandle,+
Ngobe ngulapho ayitfume khona.”
48 Naku Jehova wemabutfo longuNkulunkulu wema-Israyeli lakushoko ngelive lakaMowabi:+
“Maye ngeNebo+ ngobe seyibhujisiwe!
IKhiriyathayimu+ ihlazekile futsi yancotjwa.
Indzawo yekukhosela levikelekile* ihlazekile futsi yabhidlitwa.+
2 Live lakaMowabi alisadvunyiswa.
EHeshboni+ titsa tilakhele licebo lekulibhubhisa, tatsi:
‘Wotani, asilibhubhiseni lonkhe lelive.’
Nawe Madmeni, bindza,
Ngobe inkemba iyakulandzela.
3 Kuvakala umsindvo wekukhala eHoronayimu,+
Ngobe lelidolobha litawubhujiswa futsi lidzilike lonkhe.
4 Live lakaMowabi selibhujisiwe.
Nebantfwana labancane bayakhala.
5 Bantfu bayakhala njengobe bakhuphukela eLuhithi.
Nabehla basuka eHoronayimu kuvakala bantfu bakhala ngenca yalenhlekelele.+
6 Balekani niphephise kuphila kwenu!
Banini njengesihlahla semjunipha ehlane.
7 Njengobe netsembele etentweni tenu nasebunjingeni benu,
Nani-ke nitawuncotjwa.
Nankulunkulu wenu Khemoshi+ utawutfunjwa
Kanye nebaphristi bakhe netindvuna takhe.
8 Sitsa lesibhubhisako sitawahlasela onkhe emadolobha,
Futsi kute ngisho nalinye lelitawusindza.+
9 Bekelani sive sakaMowabi luphawu lolukhomba indlela,
Ngobe bantfu bakhona batawubaleka nasekubhujiswa lelive,
Emadolobha akhona atawuba yintfo leyetfusako,
Futsi kute lotawuhlala kuwo.+
10 Ucalekisiwe loyo longawenti ngenhlitiyo yonkhe umsebenti waJehova!
Ucalekisiwe umuntfu longabulali ngenkemba yakhe!
11 Bantfu bakaMowabi bebasolo bangahlushwa ngulutfo kusukela ebusheni babo,
Banjengeliwayini lelihleli nje langakhuhlutiswa.
Abakake batfululwe kulesinye sitja batselwe kulesinye,
Futsi abakake batfunjwe.
Kungako solo banambitseka njengobe bebanjalo,
Neliphunga labo alikashintji.
12 “Jehova utsi: ‘Emalanga ayeta lapho ngitawutfumela khona emadvodza kutsi atobabhubhisa. Atawubatfulula futsi atfulule titja tabo, aphihlite netimbita tabo letinkhulu tibe ticucu. 13 Bantfu bakaMowabi batawuba nemahloni ngaKhemoshi, njengobe nje nebantfu baka-Israyeli banemahloni ngeBetheli lebebatsembele kuyo.+
14 Nisitsatsaphi sibindzi sekutsi: “Tsine silibutfo lelinemandla futsi siyilungele imphi”?’+
15 ‘Live lakaMowabi libhujisiwe,
Emadolobha akhona ahlaselwe,+
Emajaha akhona lanemandla kakhulu abulewe,’+
Kusho iNkhosi, libito layo lokunguJehova wemabutfo.+
16 Inhlekelele letawehlela bantfu bakaMowabi seyiyasondzela,
Futsi kuwa kwabo sekusemnyango.+
17 Bonkhe labasedvute nabo batabavela buhlungu,
Lokungibo bonkhe lebebati kutsi badvume ngani.*
Batawutsi kubo: ‘Awu yaze yephuka indvuku lenemandla, yaze yephuka indvuku lenhle!’
18 Yehlani esikhundleni senu lesikhatimulako,
Nihlale phansi ningenalutfo,* nine bantfu baseDiboni,*+
Ngobe sesifikile sitsa lesitawuhlasela live lakaMowabi,
Futsi sitawubhubhisa tindzawo tenu letivikelekile.+
19 Nine lenihlala e-Aroyeri,+ manini ngasemgwacweni nibukele.
Butani indvodza lebalekako nemfati lobalekako nitsi: ‘Kwentekeni?’
20 Live lakaMowabi lihlazekile futsi lesaba kakhulu.
Khalani futsi nilile,
Nimemetele e-Anoni+ kutsi live lakaMowabi selibhujisiwe.
21 “Nkulunkulu sewulehlulele live lelibekile,*+ wehlulela iHoloni, iJahasi+ neMefathi;+ 22 iDiboni,+ iNebo,+ neBhethi-diblathayimu; 23 iKhiriyathayimu,+ iBhethi-gamuli neBhethi-meyoni;+ 24 iKheriyothi,+ neBhosra; kanye nawo onkhe emadolobha akaMowabi lasedvute nalakhashane.
25 ‘Live lakaMowabi licedvwe emandla;*
Nemkhono walo wephuliwe,’ kusho Jehova.
26 ‘Linatsiseni lize lidzakwe,+ ngobe litiphakamisile, latenta ncono kunaJehova.+
Live lakaMowabi litigicita emahlanteni alo,
Futsi seliyinhlekisa.
27 Israyeli bekangasiyo yini intfo yenu lenihlekisa ngayo?+
Kantsi namkhandza emkhatsini wetigebengu yini,
Kutsi ningaze ninikine tinhloko futsi nikhulume kabi ngaye?
28 Nine bantfu bakaMowabi, shiyani emadolobha enu niyohlala emadvwaleni,
Nibe njengelituba lelihlala ngasemaweni.’”
29 “Sivile ngekutigabatisa kwebantfu bakaMowabi, abatigcabhi nje ngumhlolo,
Sivile nekutsi bayatiphakamisa, bayatati, bayatikhukhumeta futsi bayatigcabha.”+
30 “Jehova utsi: ‘Ngiyati kutsi basheshe batfukutsele,
Kodvwa emavi abo lalite atawuphelela eteni.
Futsi kute nalabatakufeza.
31 Kungako ngitalililela live lakaMowabi,
Ngikhalele bonkhe bantfu bakaMowabi,
Futsi ngikhalele nemadvodza aseKhiri-heresi.+
Emagala akho lahlumako asakhule aze aya ngale kwelwandle.
Ahambe ayofika elwandle, aze afika ngisho naseJazeri.
Sitselo sakho sasehlobo kanye nemagilebisi lowavunile
Ahlaselwe sitsa lesibhubhisako.+
33 Kutfokota nenjabulo kususiwe ensimini yetitselo
Naseveni lakaMowabi.+
Ngente kutsi liwayini lingasageleti etjeni lekuhlutela liwayini.
Kute nalotawumemeta ajabulile nakagcobagcoba emagilebisi.
Nanobe bantfu batawumemeta kodvwa angeke kube kumemeta kwenjabulo.’”+
34 “‘Kunemsindvo wekukhala eHeshboni+ lovakala nase-Eleyale.+
Bakhala kakhulu kuvakale ngisho naseJahasi,+
Bakhala eSowari bavakale ngisho naseHoronayimu+ kuze kuyofika nase-Eglathi-shelishiya.
Kutawukoma ngisho nemanti aseNimrimu.’+
35 Jehova utsi: ‘Ngitamsusa kaMowabi
Loyo lonikela umnikelo etindzaweni letiphakeme
Naloyo lowentela bonkulunkulu bakhe imihlatjelo.
36 Kungako inhlitiyo yami itawukhala* njengemntjingo,* ikhalele live lakaMowabi,+
Futsi itawukhala* njengemntjingo,* ikhalele emadvodza aseKhiri-heresi.
Ngobe umcebo labawucongelele utawushabalala.
37 Bonkhe bantfu banetimphandla,+
Nato tonkhe tilevu tihhuliwe.
38 “‘Kulo lonkhe luphahla lwetindlu takaMowabi
Nakuto tonkhe timakethe takhona,
Kuyalilwa nje kuphela.
Ngobe ngilephulile live lakaMowabi
Kuhle kweludziwo lolulahliwe,’ kusho Jehova.
39 ‘Maye lelive liyesaba! Lilani nine bantfu bakaMowabi!
Lelive lakaMowabi libalekile futsi lahlazeka!
Selibe yinhlekisa,
Futsi bonkhe labadvutane nalo bafikelwa kwesaba nabalibuka.’”
40 “Naku Jehova lakushoko:
41 Emadolobha atawuncotjwa,
Netindzawo talelive letivikelekile titawutsatfwa ngenkhani.
Ngalelolanga tinhlitiyo temasotja akaMowabi
Titawuba njengenhlitiyo yemfati lobelekako.’”
42 “‘Live lakaMowabi litawubhujiswa lingabe lisaba sive,+
Ngobe litiphakamisile, latenta ncono kunaJehova.+
43 Nihlalelwe kwesaba, ngumgodzi kanye nelugibe,
Nine lenihlala kaMowabi,’ kusho Jehova.
44 ‘Nobe ngubani lobalekela kwesaba utawugcumkela emgodzini,
Futsi nobe ngubani lophuma kulomgodzi utawubanjwa lugibe.’
‘Ngobe uyeta umnyaka lapho ngitalijezisa khona live lakaMowabi,’ kusho Jehova.
45 ‘Labo lababalekako batawuma esitfuntini saseHeshboni futsi batawube bete emandla.
Ngobe kutawuchamuka umlilo eHeshboni
Kuchamuke nelilangabi ekhatsi neSihoni.+
Lomlilo utawushisa emabunti akaMowabi
Nesikobho semasotja lanebudlova.’+
46 ‘Maye kini, nine bantfu bakaMowabi!
Bantfu lebebakhonta Khemoshi+ bashabalele.
Emadvodzana akaMowabi atfunjiwe,
Nemadvodzakati akhona atfunjiwe.+
47 Kodvwa encenyeni yekugcina yemalanga ngitababutsisa ndzawonye bantfu bakaMowabi labatfunjiwe,’ kusho Jehova.
‘Uphela lapha-ke umlayeto lomayelana nekwehlulelwa kwelive lakaMowabi.’”+
49 Naku lokushiwo nguJehova ngelive lema-Amoni:+
“Kantsi Israyeli ute yini emadvodzana?
Ute yini indlalifa?
Kwentiwa yini-ke kutsi Malkhamu*+ atsatse indzawo yakaGadi?+
Kwentiwa yini nekutsi bantfu bakhe bahlale emadolobheni aka-Israyeli?”
2 “Jehova utsi: ‘Emalanga ayeta
Lapho ngitawenta kutsi kuvakale bantfu bahlaba umkhosi wemphi* eRabha,+ lokulidolobha lema-Amoni.+
Lelidolobha litawusala litindzala futsi lingenamuntfu,
Nemadolobha laseceleni* kwalo atawulunyekwa ngemlilo.’
‘Ema-Israyeli atawuphindze ayitsatse indzawo yawo kulabo lebebawemukile,’+ kusho Jehova.
3 ‘Awu Heshboni, khala ngobe i-Ayi seyibhujisiwe!
Khalani kakhulu nine madolobha laseceleni kweRabha.
Gcokani indvwangu yelisaka.
Khalani kakhulu futsi nihambahambe ekhatsi etibayeni tetimvu,*
Ngobe Malkhamu utawutfunjwa
Kanye nebaphristi bakhe netindvuna takhe.+
4 Nitigabatiselani ngetihosha tenu,
Nangelitsafa lenu lelivundzile, nine bantfu labangaketsembeki?
Nine netsembe umcebo wenu
Futsi nitsi: “Ngubani nje longasihlasela?”’”
5 “Jehova wemabutfo loyiNkhosi Lephakeme utsi: ‘Nyalo nginiletsela intfo letanesabisa
Letawuchamuka kubo bonkhe lenakhelene nabo.
Nitawuhlakateka niye kuto tonkhe tindzawo,
Futsi kute lotawubutsisa labo labatawubaleka.’”
6 “‘Kodvwa ngemuva kwaloko ngitababutsisa ndzawonye bantfu baka-Amoni lebebatfunjiwe,’ kusho Jehova.”
7 Naku lokushiwo nguJehova wemabutfo ngelive laka-Edomu:
“Sekwaba bete yini kuhlakanipha eThemani?+
Labo labahlakaniphile sebaba bete yini seluleko lesinengcondvo?
Nekuhlakanipha kwabo utsi kusasita nje?
8 Jikani nibaleke!
Hambani niyobhaca emajukujukwini nine bantfu baseDedani!+
Ngobe Esawu ngitamletsela inhlekelele
Nasekufike sikhatsi sekutsi ngimjezise.
9 Kube bantfu labavuna emagilebisi bebangeta kuwe,
Bebangeke yini bakushiyele longawabutsa?
Kube bekungafika tigebengu ebusuku,
Betingatsatsa loko nje letikutele.+
10 Kodvwa Esawu ngitamshiya angenalutfo.
Ngitativeta ebaleni tindzawo labhaca kuto,
Kuze angakhoni kubhaca.
11 Tishiyeni kimi tintsandzane tenu,
Futsi mine ngitawulondvolota kuphila kwato,
Nebafelokati benu batawetsembela kimi.”
12 Jehova utsi: “Nine ningasala njani ningajeziswa nangabe labo labangazange banikwe sigwebo sekunatsa kulendzebe yentfukutselo kufanele banatse kuyo? Angeke nihlale ningajeziswa, ngobe kufanele ninatse kulendzebe.”+
13 Jehova utsi: “Ngobe ngitifunge mine kutsi iBhosra itawuba yindzawo leyetfusako,+ ibe lihlazo, ibhujiswe, futsi icalekiswe. Onkhe emadolobha akhona atawuba tindzala kuze kube phakadze.”+
14 Ngitfole umbiko lovela kuJehova,
Kunesitfunywa lesitfunyelwe etiveni, futsi sitsi:
“Butsanani ndzawonye nihlasele live laka-Edomu;
Lungelani kuya emphini.”+
15 “Nginente naba sive lesibukelwa phansi,
Ngabangela nekutsi bantfu banedzelele.+
16 Nitikhohlise nine ngekwenta kutsi bantfu banesabe,
Nangekutetsemba kakhulu,
Nitikhohlisile, nine lenihlala ekhatsi emadvwaleni,
Futsi lenihlala esicongweni sentsaba.
Ngisho nobe ningakha sidleke senu etulu kuhle kwelusweti,
Mine ngitanilandza khona lapho,” kusho Jehova.
17 “Live laka-Edomu litawuba yindzawo leyetfusako.+ Bonkhe bantfu labendlula ngakhona batawetfuka nabalibona, futsi batawuhlekisa* ngalelive nababona tonkhe tinhlupheko letilehlele.” 18 Jehova utsi: “Njengobe nje kwaba njalo nakubhujiswa iSodoma neGomora kanye nemadolobha labomakhelwane,+ kutawuba njalo nange-Edomu. Kute umuntfu lotawuhlala khona futsi kute nalotawakha khona.+
19 “Kunemuntfu lotawufika kuhle kwelibhubesi+ liphuma emahlatsini langaseJordane, futsi utawuhlasela emadlelo lavikelekile aka-Edomu. Kodvwa ngekushesha nje ngitawenta kutsi bantfu bakhona babaleke kulelive. Ngitawubeka naloyo lengimkhetsile kutsi abe ngumholi walo. Ngobe ngubani nje lofanana nami, futsi ngubani longangivimba? Ukhona yini umelusi longaphikisana nami?+ 20 Ngako-ke lalelani naku Jehova lasancume* kukwenta ngelive laka-Edomu nangebantfu labahlala eThemani:+
Emazinyane etimvu atawuhudvulwa ayiswe le nale.
Emadlelo awo atawusala ete lutfo ngenca yalabantfu.+
21 Batsite nababhujiswa kwaba nemsindvo lomkhulu lowente kutsi umhlaba utamatame.
Kukhalwa siyoyoyo!
Lomsindvo uvakala ngisho naseLwandle Lolubovu.+
22 Njengelusweti lolundiza luye etulu bese luyantjweza luye phansi,+
Nesitsa sitawelula emaphiko aso etikwelidolobha laseBhosra.+
Ngalelolanga tinhlitiyo temasotja aka-Edomu
Titawuba njengenhlitiyo yamake lobelekako.”
23 Nangu umlayeto lomayelana neDamaseko:+
“IHamathi+ ne-Aphadi ihlazekile,
Ngobe itfole umbiko lomubi.
Bantfu bakhona bayachachatela ngenca yekwesaba.
Lwandle lutfukutsele futsi alubohli.
24 Bantfu baseDamaseko sebaphelelwe ngemandla.
Bajikile babaleka, kepha solo bayesaba.
Bacindzetelekile futsi basebuhlungwini
Kuhle kwemfati lobelekako.
25 Kungani bantfu bangakabaleki balishiya lelidolobha lelikhatimulako,
Lokulidolobha leligcwele injabulo?
26 Ngobe emajaha akhona atawufela etimakethe takulelidolobha,
Futsi ngalelolanga onkhe emasotja atawubhujiswa,” kusho Jehova wemabutfo.
27 “Ngitalilumeka ngemlilo lubondza lwaseDamaseko,
Futsi lomlilo utawushisa imibhoshongo levikelekile yaBheni-hadadi.”+
28 Naku lokushiwo nguJehova ngeKhedari+ nangemibuso yaseHasori, leyo leyancotjwa nguNebukhadnezari* inkhosi yaseBhabhulona:
“Sukumani niyohlasela iKhedari,
Futsi nibhubhise bantfu baseMphumalanga.
29 Kutawutsatfwa emathende abo nemihlambi yabo,
Kutsatfwe netindvwangu temathende abo kanye nato tonkhe tintfo tabo.
Emakamela abo nawo atawutsatfwa,
Futsi bantfu batawumemeta, batsi kubo: ‘Kunekwesaba kuyo yonkhe indzawo!’”
30 “Balekani niye khashane!
Hambani niyobhaca emajukujukwini nine bantfu baseHasori,” kusho Jehova.
“Ngobe Nebukhadnezari* inkhosi yaseBhabhulona sewunakhele lisu,
Futsi sewuhlele kuniletsela inhlekelele.”
31 “Khuphukani niyohlasela lesive lesikhululekile,
Futsi lesihleli ngekuthula,” kusho Jehova.
“Sihlala sodvwa; site ngisho netivalo kanye nemishudo.
32 Emakamela abo atawutfunjwa,
Nemihlambi yabo lemikhulu itawetjiwa.
Ngitabahlakatela kuyo yonkhe indzawo*
Labo labahhula tinwele tabo ngasemabunti,+
Futsi ngitabaletsela inhlekelele ichamuke kuyo yonkhe indzawo,” kusho Jehova.
33 “IHasori itawuba ngumhume wabojakalazi,
Itawukhala libhungane kuze kube phakadze.
Kute lotawuhlala khona,
Futsi kute nalotawakha khona.”
34 Ekucaleni kwekubusa kwaSedekiya inkhosi yakaJuda, Jehova wakhuluma nemphrofethi Jeremiya mayelana ne-Elamu+ watsi: 35 “Naku lokushiwo nguJehova wemabutfo: ‘Ngitabephula butjoki base-Elamu,+ lokungubona betsembele kubo.* 36 Ngitawutfumela e-Elamu imimoya lemine levela emagumbini lamane emhlaba, futsi bantfu bakhona ngitabahlakatela kuyo yonkhe indzawo.* Labantfu labahlakatekile batawuya kuto tonkhe tive.’”
37 “Ngitawenta kutsi bantfu base-Elamu besabe titsa tabo nalabo labafuna kubabulala, futsi ngitabaletsela inhlekelele, ngibaletsele intfukutselo yami levutsako. Ngitabacosha ngenkemba ngize ngibabhubhise bonkhe,” kusho Jehova.
38 “Ngitawubeka sihlalo sami sebukhosi e-Elamu,+ ngibulale nenkhosi yakhona netindvuna tayo,” kusho Jehova.
39 “Kodvwa emalangeni ekugcina, ngitababutsa bantfu base-Elamu labatfunjiwe,” kusho Jehova.
50 Jehova wakhuluma nemphrofethi Jeremiya mayelana neBhabhulona,+ wakhuluma mayelana nelive lemaKhaledi watsi:
2 “Tjela tive lomlayeto futsi uwumemetele kuto.
Phakamisa luphawu, umemetele lomlayeto.
Akube bete lokufihlako!
Ubotsi: ‘IBhabhulona seyincotjiwe.+
Merodaki wetfuke kakhulu.
Tithico letingumfanekiso wakhe tihlazekile,
Letithico letenyanyekako* tetfukile.’
3 Ngobe kunesive lesivela enyakatfo+ lesite kutoyihlasela.
Sente lelidolobha laba yindzawo leyetfusako;
Futsi kute lohlala kulo.
Bantfu babalekile, netilwane tibalekile;
Konkhe kubalekile.”
4 Jehova utsi: “Ngalawo malanga nangaleso sikhatsi, bantfu baka-Israyeli nebakaJuda batawuhlangana ndzawonye.+ Batawuhamba bakhala+ futsi bonkhe batawufuna Jehova Nkulunkulu wabo.+ 5 Batawubuta indlela leya eSiyoni babe babuke khona,+ futsi batawutsi: ‘Wotani, asilaleleni Jehova futsi sigcine lesivumelwane saphakadze lesitawuhlale sikhunjulwa.’+ 6 Bantfu bami sebabe njengemhlambi wetimvu lolahlekile.+ Belusi babo babadukisile.+ Babalahlele etintsabeni, benta kutsi bazulazule etintsabeni nasemagcumeni, baze bayikhohlwa nendzawo labaphumula kuyo. 7 Wonkhe umuntfu lobatfolako uyabacotfula,+ netitsa tabo titsi: ‘Site licala ngobe labantfu bonile kuJehova. Bone kuJehova longumtfombo wekulunga nalolitsemba labokhokho babo.’”
8 “Balekani eBhabhulona,
Phumani eveni lemaKhaledi,+
Nibe njengetimvu letindvuna netimbuti letindvuna letihola umhlambi.
9 Ngobe nyalo iBhabhulona ngiyiletsela
Licembu letive letinemandla letivela enyakatfo.+
Letive titatihlela tibe libutfo kuze tiyihlasele;
Futsi titayincoba.
10 EmaKhaledi atawemukwa konkhe lanako.+
Bonkhe labatawutsatsa tintfo tawo batawutitapela baze benele,”+ kusho Jehova.
Benigcumagcuma njengelitfokati etjanini,
Futsi benikhala njengemahhashi lamadvuna.
12 Make wenu sewuhlazekile.+
Loyo lowanitala ujabhile.
Yena ungulophansi kuto tonkhe tive,
Ulihlane lelomile nalelilugwadvule.+
13 Kute losetawuphindze ahlale eBhabhulona ngobe Jehova uyitfukutselele;+
Itawusala ikhala libhungane.+
Bonkhe bantfu labendlula ngakhona batawetfuka nabayibona,
Futsi batawuhlekisa* ngayo nababona konkhe kuhlupheka lokuyehlele.+
14 Tihleleni nibe libutfo, nihlasele iBhabhulona kuto tonkhe tinhlangotsi,
Nonkhe nine lenisebentisa butjoki.
15 Hlabani umkhosi wemphi, niyihlasele kuto tonkhe tinhlangotsi.
IBhabhulona seyitinikele.*
Nani tiphindziseleleni kuyo.
Yenteni loko leyakwenta kulabanye.+
16 Bulalani umhlanyeli eBhabhulona
Kanye naloyo lophatsa lisikela ngesikhatsi sekuvuna.+
Ngenca yekutsi inkemba seyibulele bantfu labanyenti, nguloyo naloyo utawubuyela kubantfu bakubo,
Futsi nguloyo naloyo utawubalekela eveni lakhe.+
17 “Bantfu baka-Israyeli banjengetimvu letihlakatekile.+ Emabhubesi abahlakatile.+ Bacale badzabudzabulwa yinkhosi yase-Asiriya,+ kwabese kulandzela Nebukhadnezari* inkhosi yaseBhabhulona, lowabhasha ematsambo abo.+ 18 Ngako naku lokushiwo nguJehova wemabutfo longuNkulunkulu wema-Israyeli: ‘Njengobe nje ngayijezisa inkhosi yase-Asiriya, ngitayijezisa nenkhosi yaseBhabhulona nelive layo.+ 19 Israyeli ngitambuyisela edlelweni lakhe,+ futsi utawudla esutse eKhameli, eBhashani+ kanye nasetintsabeni taka-Efrayimu+ netakaGileyadi.’”+
20 Jehova utsi: “Ngalawo malanga nangaleso sikhatsi,
Kutawufunwa licala lema-Israyeli
Kodvwa angeke litfolakale,
Netono temaJuda angeke titfolakale,
Ngobe ngitabatsetselela labo lengabavumela kutsi basale.”+
21 “Khuphuka uyohlasela iMerathayimu kanye nalabo labahlala ePhekodi.+
Shengatsi ungababulala futsi ubabhubhise baphele nya,”* kusho Jehova.
“Ubokwenta konkhe lengikutjele kona.
22 Kuvakala umsindvo wemphi kulendzawo,
Umsindvo wenhlekelele lenkhulu.
23 Asenibuke nje, sandvo lebesifihlita tive temhlaba wonkhe sesephulwe saba ticucu!+
IBhabhulona seyiyindzawo leyetfusako emkhatsini wetive!+
24 Ngikubekele lugibe wena Bhabhulona, futsi wabanjwa,
Ubanjwe ungakagadzi.
Utfolakele futsi wancotjwa,+
Ngobe bewumelene naJehova.
25 Jehova uvule incolobane yakhe,
Wakhipha tikhali latisebentisa nakatfukutsele.+
Ngobe Jehova wemabutfo loyiNkhosi Lephakeme unemsebenti
Lokufanele awente eveni lemaKhaledi.
26 Nine lenisuka khashane, buyani nitohlasela lelive.+
Vulani tincolobane talo.+
Tibekeni ndzawonye tintfo lenititsetse kulelive, kube shengatsi yindvundvuma yakolo.
Babhubhiseni baphele nya* bantfu bakulelive.+
Shengatsi kungaba bete ngisho namunye losalako.
27 Bulalani tonkhe tinkunzana letikulelive;+
Tehliseni tonkhe tiyohlatjwa.
Maye ngaletinkunzana! Selifikile lilanga lato,
Lokusikhatsi sekutsi tibhujiswe!
28 Kuvakala umsindvo webantfu lababalekako
Baphuma eBhabhulona,
Labantfu bayomemetela eSiyoni kutsi Jehova Nkulunkulu utiphindziselele,
Utiphindziselele ngenca yelithempeli lakhe.+
Litungeleteleni lelidolobha, ningavumeli muntfu kutsi aphunyule.
Tiphindziseleleni ngenca yetento talo.+
Lenteni loko lelakwenta kulabanye.+
Ngobe ledzelele Jehova,
Ledzelele Longcwele waka-Israyeli.+
30 Ngako emajaha akhona atawufela etimakethe takulelidolobha,+
Futsi ngalelolanga onkhe emasotja akhona atawushabalala,”* kusho Jehova.
31 Jehova wemabutfo loyiNkhosi Lephakeme utsi: “Awu wena lonenkhani, ngimelene nawe,+
Lilanga lakho litawufika, sitawufika sikhatsi sekutsi ujeziswe.
32 Awu wena lonenkhani, utawugileka futsi uwe,
Kube bete nalotakuvusa.+
Emadolobha akho ngitawalumeka ngemlilo,
Futsi lomlilo utawucotfula konkhe lokukutungeletile.”
33 Jehova wemabutfo utsi:
“Bantfu baka-Israyeli nebakaJuda bacindzetelekile,
Bonkhe lababatfumba babankonkoshele,+
Abafuni kubakhulula.+
34 Kodvwa uMhlengi wabo unemandla.+
Libito lakhe nguJehova wemabutfo.+
Utawubamelela ecaleni lababekwe lona,+
Kuze ente live labo libe nekuthula+
Futsi atfukutselise bantfu labahlala eBhabhulona.”+
35 Jehova utsi: “Kunenkemba letawucotfula emaKhaledi,
Itawucotfula bantfu labahlala eBhabhulona, netindvuna takulelidolobha kanye nebantfu bakhona labahlakaniphile.+
36 Kunenkemba letawucotfula bantfu labakhuluma lite,* futsi batakwenta tintfo letibulima.
Lenkemba itawucotfula emasotja akhona, futsi atawesaba kakhulu.+
37 Kunenkemba letawucotfula emahhashi akhona netinkalishi temphi,
Itawucotfula bonkhe bantfu bekuhamba labahlala khona,
Futsi batawuba njengebafati labesabako.+
Kunenkemba letawucotfula umcebo wakhona futsi utawutsatfwa.+
38 Maye ngemanti aseBhabhulona, ngobe atawukoma.+
IBhabhulona igcwele tithico letibatiwe,+
Nebantfu bakhona babona imibono leyetfusako, bese kuba ngatsi bayahlanya.
39 Tilwane taselugwadvule titawuhlala netilwane letishaya umkhulungwane,
Kute umuntfu lotawuphindze ahlale khona
Nobe akhe khona kuto tonkhe titukulwane.”+
40 “Njengobe nje kwaba njalo ngesikhatsi Nkulunkulu abhubhisa iSodoma neGomora+ kanye nemadolobha labomakhelwane,+ kutawuba njalo nangeBhabhulona. Kute umuntfu lotawuhlala khona futsi kute nalotawakha khona,”+ kusho Jehova.
41 “Kunebantfu labachamuka enyakatfo.
42 Bahlome ngebutjoki nangetikhali.+
Abanamusa futsi kute labatamhawukela.+
Umsindvo wekuta kwabo ungatsi lwandle lolunemagagasi,+
Njengobe beta bagibele emahhashi abo.
Batatihlela babe libutfo, futsi batakuta bamunye kuze bakuhlasele wena Bhabhulona.*+
Icindzeteleke kakhulu,
Futsi iva buhlungu lobufana nebemfati nakabeleka.
44 “Kunemuntfu lotawufika kuhle kwelibhubesi liphuma emahlatsini langaseJordane, futsi utawuhlasela emadlelo lavikelekile aseBhabhulona. Kodvwa ngekushesha nje ngitawenta kutsi bantfu bakhona babaleke kulelidolobha. Ngitawubeka loyo lengimkhetsile kutsi abe ngumholi walo.+ Ngobe ngubani nje lofanana nami, futsi ngubani longangivimba? Ukhona yini umelusi longaphikisana nami?+ 45 Ngako-ke lalelani naku Jehova lasancume* kukwenta ngeBhabhulona+ nangelive lemaKhaledi:
Emazinyane etimvu atawuhudvulwa ayiswe le nale.
Emadlelo awo atawusala ete lutfo ngenca yalabantfu.+
46 Kutawutsi nakuncotjwa iBhabhulona kube nemsindvo lomkhulu lotawenta kutsi umhlaba utamatame,
Futsi tive titawukhala siyoyoyo.”+
51 Jehova utsi:
2 Ngitawutfumela bantfu eBhabhulona,
Batayitsanyela kuhle kwemoya nawuphephula tinhlanga futsi batayishiya ikhala libhungane;
Ngelilanga lenhlekelele, batayihlasela kuto tonkhe tinhlangotsi.+
3 Bantfu baseBhabhulona labasebentisa butjoki angeke babusebentise.
Nemasotja akhona angeke ahlome ngetikhali.
Ningawaveli emajaha akulelidolobha.+
Bulalani onkhe emasotja akhona.
4 Atawufela eveni lemaKhaledi,
Afe alimele kamatima etitaladini takhona.+
5 Ema-Israyeli nemaJuda awakashiywa* nguJehova wemabutfo longuNkulunkulu wawo.+
Kodvwa lelive lemaKhaledi linemacala lamanyenti kuLongcwele waka-Israyeli.
6 Phumani nibaleke eBhabhulona,
Niphephise kuphila kwenu.+
Ningashabalali ngenca yetono tayo.
Ngobe sesikhatsi sekutsi Jehova atiphindziselele kuyo.
Sewenta kutsi yehlelwe nguloko lebeyikwenta kulabanye.+
7 IBhabhulona beyinjengendzebe yeligolide esandleni saJehova;
Yente wonkhe umhlaba wadzakwa.
8 Iwe kungakalindzeleki futsi yaphihlika.+
Yikhaleleni!+
Hambani niyofuna ibhalisamu nitopholisa buhlungu bayo; mhlawumbe nje ingelapheka.”
9 “Setamile kuyelapha iBhabhulona kodvwa ayikelapheki.
Asiyiyekeleni sihambe, nguloyo naloyo akaye eveni lakubo.+
Ngobe tono tayo tifike emazulwini;
Tinyenti kakhulu, tize tifika ngisho nasemafini.+
10 Jehova usiphetse ngekulunga.+
Asambeni siye eSiyoni, sifike sikhulume ngemisebenti yaJehova Nkulunkulu wetfu.”+
11 “Lolani imicibisholo,+ nitsatse nemahawu.*
Jehova utsintse emakhosi aseMediya+ kutsi ahlasele iBhabhulona
Ngobe ufuna kuyibhubhisa.
Jehova utatiphindziselela, utatiphindziselela ngenca yelithempeli lakhe.
12 Phakamisani luphawu,+ nihlasele lubondza lwaseBhabhulona.
Yengetani bogadzi, nimise kahle balindzi.
Hlelani labo labatawubalalela endleleni bantfu baseBhabhulona.
Ngobe Jehova wente licebo,
Futsi utakufeza loko lakukhulumile ngebantfu labahlala eBhabhulona.”+
14 Jehova wemabutfo utifunge yena watsi:
‘Ngitawubangela kutsi utselekelwe ngemadvodza, atawuba manyenti ngangesikhonyane,
Futsi atawumemeta ajabulile ngenca yekukuncoba.’+
15 Nkulunkulu wadala umhlaba ngemandla akhe,
Ngekuhlakanipha kwakhe wamisa umhlaba wacina+
Futsi wendlala emazulu ngekucondza kwakhe.+
16 Utsi nakamemeta,
Emanti lasemazulwini agubhutele,
Wenta kutsi kukhuphuke emafu* asuka emikhawulweni yemhlaba.
17 Bonkhe bantfu abanangcondvo futsi bete lwati.
Bonkhe labasebenta ngensimbi batawuhlazeka ngenca yetithico labatentako;+
Ngobe letithico tabo tensimbi tiyakhohlisa,
18 Atinamsebenti,+ tintfo tekuhlekwa nje.
Titawushabalala nakufika lilanga lato lekubhujiswa.
19 Kodvwa Nkulunkulu waJakobe* akafanani nato,
Ngobe nguye lowadala tonkhe tintfo,
Libito lakhe nguJehova wemabutfo.”+
20 “Wena usicwayi sami lengilwa ngaso, usikhali sami semphi,
Ngobe ngawe ngitawuphihlita tive.
Ngawe ngitawubhubhisa imibuso.
21 Ngawe ngitawuphihlita lihhashi naloyo loligibele.
Ngawe ngitawuphihlita inkalishi yemphi naloyo loyigibele.
22 Ngawe ngitawuphihlita indvodza nemfati.
Ngawe ngitawuphihlita umuntfu lokhulile nemfana.
Ngawe ngitawuphihlita lijaha nentfombi.
23 Ngawe ngitawuphihlita umelusi nemhlambi wakhe.
Ngawe ngitawuphihlita umlimi netilwane lalima ngato.
Ngawe ngitawuphihlita babusi nemasekela abo.
24 Ngitayijezisa iBhabhulona nabo bonkhe labahlala eveni lemaKhaledi
Ngenca yako konkhe lokubi labakwente kini eSiyoni,”+ kusho Jehova.
Ngitawelula sandla sami ngimelane nawe, futsi ngikugicite ngikususe emadvwaleni,
Ngikwente ube yintsaba leshe yangcongca.”
26 “Kute litje lelitawutsatfwa kuwe libe lekusimisa nobe libe lesisekelo,
Ngobe wena utawusala ungenalutfo kuze kube phakadze,”+ kusho Jehova.
27 “Phakamisani luphawu kulendzawo.+
Shayani luphondvo emkhatsini wetive.
Khetsani* tive letitayihlasela.
Bitani imibuso yase-Ararathi,+ yaseMini neyase-Ashkenazi+ kutsi itewulwa nayo.
Tfumelani lisotja lelitawukhetsa lamanye latayihlasela.
Khuphulani emahhashi achamuke kube shengatsi libulo letintsentse.
28 Bitani* tive letitayihlasela,
Nibite emakhosi aseMediya,+ babusi bakhona nawo onkhe emasekela abo
Kanye nato tonkhe tindzawo labatibusako.
29 Umhlaba utawutamatama futsi uzizitele,
Ngobe Jehova utakwenta loko latsite utakwehlisela iBhabhulona
Ngekutsi ayente ibe yindzawo leyetfusako, futsi isale ikhala libhungane.+
30 Emasotja aseBhabhulona sekayekele kulwa.
Asahleti etindzaweni tawo letivikelekile.
Emakhaya aseBhabhulona sekalunyekwe ngemlilo,
Nemishudo yasemasangweni akhona seyephuliwe.+
31 Kufika umgijimi emuva kwalomunye,
Kufike nesitfunywa emuva kwalesinye, bonkhe bayagijima
Batobikela inkhosi yaseBhabhulona kutsi lidolobha layo selivinjetelwe kuto tonkhe tinhlangotsi,+
32 Batoyibikela kutsi ematubuko sekavinjiwe,+
Kutsi imikhumbi leyakhiwe ngephaphira* seyishisiwe,
Nekutsi emasotja esaba kakhulu.”
33 Jehova wemabutfo longuNkulunkulu wema-Israyeli utsi:
“IBhabhulona* ifana nelibala lekubhulela.
Sesikhatsi sekutsi igcotjwagcotjwe ize ingcingceke.
Sesisedvute kakhulu sikhatsi sekutsi ivunwe.”
Ungente ngafana nesitja lesite lutfo.
Ungimite kuhle kwenyoka lenkhulu;+
Sisu sakhe usigcwalise ngetintfo tami letinhle,
Futsi ungilahlele le khashane.*
35 Loyo lohlala eSiyoni utsi: ‘Shengatsi lobudlova lobentiwe kimi nasemtimbeni wami bungehlela iBhabhulona.’+
‘Shengatsi ingati yami ingehlela kubantfu labahlala eveni lemaKhaledi,’ kusho iJerusalema.”
36 Ngako Jehova utsi:
Ngitawomisa lwandle lwaseBhabhulona, ngomise nemitfombo yakhona.+
38 Bonkhe bantfu bakhona batawubhodla njengemabhubesi lanemandla.
Batawuhhonga njengebadlwane bemabhubesi.”
39 “Batawutsi nasebatsakasile, ngibentele lidzili futsi ngibente badzakwe,
Kuze batojabula kakhulu;+
Ngemuva kwaloko batawulala siphelane,
Bangaphindze bavuke,”+ kusho Jehova.
40 “Ngitabehlisa kuhle kwetimvu letiyohlatjwa,
Kuhle kwetimbuti netimvu letindvuna.”
41 “Bukani nje, iSheshaki* seyincotjiwe,+
Asenibuke nje, lelidolobha lebelidvunyiswa ngibo bonkhe bantfu selincotjiwe!+
IBhabhulona seyiyindzawo leyetfusako emkhatsini wetive!
42 Lwandle luyimbonyile iBhabhulona.
Luyimbonye ngemagagasi alo lamakhulu.
43 Emadolobha akhona sekayindzawo leyetfusako, alugwadvule futsi ete nemanti.
Kute umuntfu lotawuhlala khona nobe engce khona.+
Tive angeke tiphindze titseleke ngetinkhani tiye kuye,
Futsi lubondza lwaseBhabhulona lutawudzilika.+
45 Phumani eBhabhulona bantfu bami!+
Phephisani kuphila kwenu,+ nibalekele intfukutselo levutsako yaJehova!+
46 Unganetfusi lombiko lenitawuva kulendzawo futsi unganesabisi.
Kutawufika umbiko kulomunye umnyaka,
Nasemnyakeni lolandzelako kufike lomunye umbiko
Wekutsi kunebudlova kulelive nekutsi umbusi ulwa nalomunye umbusi.
47 Ngako-ke kutawufika emalanga
Lengitawujezisa ngawo tithico letibatiwe taseBhabhulona.
Yonkhe lendzawo itawuhlazeka,
Bonkhe lababulewe batawulala batsi nja kulelidolobha.+
48 Emazulu nemhlaba kanye nako konkhe lokukuwo
Kutawumemeta kujabulile nayibhujiswa iBhabhulona,+
Ngobe titsa letibhubhisako titayihlasela tichamuka enyakatfo,”+ kusho Jehova.
49 “IBhabhulona ayikabulali nje ema-Israyeli kuphela+
Kodvwa ibulele nebantfu basemhlabeni wonkhe, bafela khona lapho.
50 Nine lenisindze enkembeni, chubekani nibaleka, ningemi!+
Nine lenikhashane, khumbulani Jehova,
Shengatsi ningayikhumbula neJerusalema.”+
51 “Sihlazekile, ngobe sive bantfu bakhuluma emavi ekwedzelela.
52 Jehova utsi: “Ngako-ke kutawufika emalanga
Lengitawujezisa ngawo tithico letibatiwe taseBhabhulona,
Futsi bantfu labalimele batawube bacuma kuyo yonkhe lendzawo.”+
53 “Ngisho nobe iBhabhulona ingaphakama ize ifike emazulwini,+
Nobe icinise tindzawo tayo letiphakeme futsi letivikelekile,
Mine ngitayiletsela titsa letitayibhubhisa,”+ kusho Jehova.
54 “Asenilalele! Kuvakala bantfu bayakhala eBhabhulona,+
Kuvakala umsindvo wenhlekelele lenkhulu eveni lemaKhaledi,+
55 Ngobe Jehova ubhubhisa iBhabhulona,
Utayithulisa kulomsindvo wayo lomkhulu,
Futsi umsindvo wetitsa tayo utawufanana nemagagasi elwandle.
Nemavi ato atawuvakala.
56 Sitsa lesibhubhisako sitayihlasela iBhabhulona;+
Emasotja akhona atawutfunjwa,+
Nebutjoki bawo butawephulwa bube ticucu,
Ngobe Jehova unguNkulunkulu lotiphindziselelako.+
Ngeke ahlale angatiphindziseleli.+
57 Ngitawenta kutsi tindvuna takhona nebantfu labahlakaniphile badzakwe,+
Ngente nekutsi kudzakwe babusi bakhona, nemasekela abo kanye nemasotja,
Ngemuva kwaloko batawulala siphelane,
Bangaphindze bavuke,”+ kusho iNkhosi, libito layo lokunguJehova wemabutfo.
58 Jehova wemabutfo utsi:
“Nanobe lubondza lwaseBhabhulona lucinile, lutawubhidlitwa lonkhe,+
Futsi nanobe emagede akhona amadze, atawulunyekwa ngemlilo.
Bantfu batawusebentela lite;
Tive titawusebenta kamatima, tisebentele intfo letawuphetsela emlilweni.”+
59 Lona ngumlayeto umphrofethi Jeremiya lawutjela Seraya indvodzana yaNeriya+ indvodzana yaMahaseya, ngesikhatsi Seraya ahamba naSedekiya inkhosi yakaJuda baya eBhabhulona ngemnyaka wesine wekubusa kwakhe. Seraya abenakekela tintfo tenkhosi. 60 Jeremiya wabhala ngayo yonkhe lenhlekelele lebeyitawehlela iBhabhulona, wayibhala encwadzini yinye legocotwako. Wabhala onkhe lamavi lamelene neBhabhulona. 61 Ngetulu kwaloko, Jeremiya watsi kuSeraya: “Ubotsi nawufika eBhabhulona uwafundze ngelivi lelisetulu onkhe lamavi. 62 Ngemuva kwaloko ubokhuluma utsi: ‘Awu Jehova, wena utsite utayibhubhisa lendzawo futsi uyishiye ikhala libhungane, ushiye kute bantfu kanye netilwane, futsi utsite itawusala ingenalutfo kuze kube phakadze.’+ 63 Ubotsi nawucedza kufundza lencwadzi, ubophele litje kuyo futsi uyijike ekhatsi nekhatsi kwemfula iYufrathe. 64 Ngemuva kwaloko ubotsi: ‘Itawucwila kanjalo-ke neBhabhulona, futsi angeke iphindze ibonakale+ ngenca yenhlekelele letayiletselwa nguNkulunkulu. Nebantfu labahlala khona batawuphelelwa ngemandla.’”+
Aphela lapha-ke emavi aJeremiya.
52 Sedekiya+ bekaneminyaka lengu-21 budzala nakaba yinkhosi, futsi wabusa eJerusalema iminyaka lengu-11. Libito lamake wakhe bekunguHamutali+ indvodzakati yaJeremiya waseLibna. 2 Sedekiya wachubeka enta lokubi emehlweni aJehova, walingisa konkhe lebekwentiwe nguJehoyakimu.+ 3 Letintfo tenteka eJerusalema nakaJuda ngenca yentfukutselo yaJehova, kwaze kwaba ngulapho abasusa emehlweni akhe.+ Sedekiya wavukela inkhosi yaseBhabhulona.+ 4 Ngemnyaka wesi-9 wekubusa kwaSedekiya, ngelilanga lesi-10 enyangeni yesi-10, iNkhosi Nebukhadnezari* yaseBhabhulona yeta nalo lonkhe libutfo layo yatohlasela iJerusalema. Bemisa khona emathende futsi bakha lubondza lwekuyivimbetela lolwayitungeleta.+ 5 Lelidolobha lavinjetelwa kwaze kwaba ngumnyaka wesi-11 wekubusa kweNkhosi Sedekiya.
6 Ngelilanga lesi-9 enyangeni yesine,+ indlala yaba matima kakhulu kulelidolobha futsi bantfu bakhona besebete kudla.+ 7 Ekugcineni lubondza lwalelidolobha lwabhidlitwa, futsi ngesikhatsi emaKhaledi atungeleta lelidolobha, onkhe emasotja abaleka, aphuma ebusuku ngeligede lelisemkhatsini wetibondza letimbili ngasengadzeni yenkhosi; lamasotja abaleka ngendlela leya e-Arabha.+ 8 Kodvwa libutfo lemaKhaledi lagijimisa Sedekiya+ futsi lamkhandza endzaweni lebekile lelugwadvule yaseJerikho. Onkhe emasotja akhe abaleka amshiya. 9 Lelibutfo labese liyayibamba lenkhosi futsi layiyisa enkhosini yaseBhabhulona lebeyiseRibla, eveni laseHamathi, lapho yakhipha khona sigwebo sayo. 10 Khona lapho eRibla, inkhosi yaseBhabhulona yabulala emadvodzana aSedekiya embikwemehlo akhe, yaphindze yabulala nato tonkhe tindvuna takaJuda. 11 Ngemuva kwaloko yakupuluta emehlo aSedekiya,+ yabese imbopha ngetinketane telitfusi, futsi yamyisa eBhabhulona, yamvalela ejele kwaze kwaba lilanga lafa ngalo.
12 Ngelilanga lesi-10 enyangeni yesihlanu, ngemnyaka wesi-19 wekubusa kwaNebukhadnezari* inkhosi yaseBhabhulona, Nebuzaradani lobekayindvuna yabogadzi futsi asisebenti senkhosi yaseBhabhulona wangena eJerusalema.+ 13 Washisa indlu yaJehova,+ washisa indlu* yenkhosi kanye nato tonkhe tindlu taseJerusalema; washisa netindlu tabo bonkhe bantfu labahloniphekile. 14 Lonkhe libutfo lemaKhaledi lebelikanye nendvuna yabogadzi ladzilita lubondza lobelutungelete iJerusalema.+
15 Nebuzaradani indvuna yabogadzi watfumba labanye bebantfu lebebahluphekile kanye nabo bonkhe bantfu lebebasele kulelidolobha. Watsatsa nalabo lebebashiye live labo batinikela enkhosini yaseBhabhulona, kanye nato tonkhe tisebenti letinelikhono.+ 16 Kodvwa Nebuzaradani indvuna yabogadzi wabashiya labanye bebantfu lebebaphuye kakhulu kulelive kuze basebente emasimini emagilebisi futsi babe tigcili.+
17 EmaKhaledi aphihlita tinsika telitfusi+ lebetisendlini yaJehova, netincola+ kanye nelibhavu lelikhulu lelitfusi lokutsiwa Lwandle,+ futsi konkhe loku bekusendlini yaJehova. Atsatsa lonkhe lelitfusi aya nalo eBhabhulona.+ 18 Atsatsa netikotela, emafosholo, tintfo tekucima umlilo, titja,+ tindzebe,+ kanye nato tonkhe tintfo telitfusi lebetisetjentiselwa kwenta imisebenti yasethempelini. 19 Indvuna yabogadzi yatsatsa tindishi,+ titja tekufaka emalahle, titja tekufafata, tikotela, tintsi tetibane,+ tindzebe, kanye naletinye titja. Konkhe loku bekwakhiwe ngeligolide lelingakahlanganiswa nalutfo nelisiliva lelingakahlanganiswa nalutfo.+ 20 Letinsika letimbili, nalelibhavu lelikhulu lokutsiwa Lwandle, naletinkunzi letingu-12 telitfusi+ lebetingephansi kwalelibhavu kanye naletincola iNkhosi Solomoni lebeyitentele indlu yaJehova, bekwakhiwe ngelitfusi lelinyenti kakhulu lelingakaleki.
21 Insika ngayinye yelitfusi beyingemamitha langaba ngu-8* kuphakama, beyingatungeletwa yintsambo lengemamitha langaba sihlanu.*+ Bubanti balelitfusi bebungemasentimitha langaba ngu-7* futsi letinsika betingumhume ekhatsi. 22 Lensika beyinengcongwane leyentiwe ngelitfusi; ingcongwane yekucala beyingemamitha langaba mabili*+ kuphakama; futsi umhlobiso nemahananandza* labekatungelete lengcongwane bekwentiwe ngelitfusi. Insika yesibili beyifana nalena yekucala, nemahananandza lebekakuyo bekafana nalawa lakulena yekucala. 23 Bekunemahananandza langu-96 emaceleni; kulomhlobiso bekunemahananandza langu-100.+
24 Lendvuna yabogadzi yaphindze yatsatsa Seraya+ umphristi lomkhulu, Zefaniya+ umphristi wesibili kanye nabogadzi basemnyango labatsatfu.+ 25 Kulelidolobha yatsatsa indvuna yesigodlo lebeyiphetse emasotja, yatsatsa bantfu labangu-7 lebebasondzelene kakhulu nenkhosi leyabatfola kulelidolobha, namabhalane wendvuna yelibutfo, lobekabita bantfu balelo live kuze bahlangane, kanye nemadvodza langu-60 kubantfu balelive lebebasekhona kulelidolobha. 26 Nebuzaradani indvuna yabogadzi wabatsatsa wabamikisa enkhosini yaseBhabhulona eRibla. 27 Inkhosi yaseBhabhulona yabahlasela futsi yababulalela eRibla+ eveni laseHamathi. Ngaleyondlela, sive sakaJuda satsatfwa eveni laso, satfunjwa.+
28 Leli linani lebantfu labatfunjwa nguNebukhadnezari:* Ngemnyaka wesi-7 wekubusa kwakhe watfumba emaJuda langu-3 023.+
29 Ngemnyaka wesi-18 wekubusa kwaNebukhadnezari,*+ kwatsatfwa bantfu labangu-832 eJerusalema.
30 Ngemnyaka wesi-23 wekubusa kwaNebukhadnezari,* Nebuzaradani indvuna yabogadzi watfumba emaJuda langu-745.+
Sebabonkhe bantfu labatfunjwa bebangu-4 600.
31 Ngemnyaka Evili-merodaki inkhosi yaseBhabhulona lacala ngawo kubusa, wakhulula* Jehoyakhini+ inkhosi yakaJuda ejele. Lona bekungumnyaka wesi-37 wekutfunjwa kwaJehoyakhini inkhosi yakaJuda, ngenyanga yesi-12 ngelilanga lesi-25 laleyo nyanga.+ 32 Evili-merodaki wakhuluma naye ngemusa futsi wamphakamisa wambeka esikhundleni lesisetulu kunalalamanye emakhosi lebekanawo eBhabhulona. 33 Ngako Jehoyakhini wakhumula tembatfo takhe tasejele futsi bekahlale adla nalenkhosi, onkhe emalanga ekuphila kwakhe. 34 Bekahlale anikwa kudla lokuvela enkhosini yaseBhabhulona lilanga nelilanga, onkhe emalanga ekuphila kwakhe, kwaze kwaba ngulapho afa.
Kungenteka kusho kutsi “Jehova Uyaphakamisana.”
Nobe “ngakukhetsa.”
NgesiHebheru kutsi, “usengakaphumi esiswini.”
Nobe “ngisemncane.”
NgesiHebheru kutsi, “lophapheme.”
Nobe “libhodo lelikhulu.”
NgesiHebheru kutsi, “lelivutselwako,” lokuveta kutsi bekunemlilo ngephansi kwalo.
NgesiHebheru kutsi, “Khwica tingubo takho utibophele etingculwini.”
Nobe “bakuncobe.”
Nobe “lutsandvo lolucotfo.”
Nobe “eveni leligcwele tihlahla tetitselo.”
Nobe “etichingini.”
Nobe “bembile,” lokungenteka kusho kumba emadvwaleni.
Nobe “baseMemfisi.”
Lokusho, umfudlana losuka eMfuleni iNayili.
NgesiHebheru kutsi, “beningageza ngesoda nangensipho lenyenti.”
NgesiHebheru kutsi, “ngenyanga yayo.”
Nobe “nabonkulunkulu baletinye tive.”
Nobe “libhande lalibopha ngelilanga lemshado.”
Lapha kukhulunywa ngeJerusalema nobe iSiyoni.
NgesiHebheru kutsi, “longum-Arabu.”
NgesiHebheru kutsi, “Libunti lenu linjengelemfati.”
Kungenteka kusho Israyeli.
Nobe “nabonkulunkulu baletinye tive.”
Kungaphindze kubekwe ngekutsi, “sengiyindvodza yenu.”
NgesiHebheru kutsi, “lokufunwa yinhlitiyo yami.”
NgesiHebheru kutsi, “wemabutfo etive.”
NgesiHebheru kutsi, “umngani.”
Nobe “tiyatibusisa,” lokusho kutsi kufanele tente lokutsite kuze tibusiswe.
Nobe “inkemba isemiphinjeni yetfu.”
NgesiHebheru kutsi, “indvodzakati yebantfu bami.” Lesi simuntfutiso lesiyinkondlo, lokungenteka siyindlela yekuveta luvelo.
Nobe “bogadzi.”
Kungaphindze kubekwe ngekutsi, “umsindvo wekumemeta kwebantfu emphini.”
Nobe “ngitisole.”
Nobe “kwekupenda emehlo.”
NgesiHebheru kutsi, “abazange babuve buhlungu.”
NgesiHebheru kutsi, “buso.”
Kungaphindze kubekwe ngekutsi, “Akekho.”
NgesiHebheru kutsi, “Indvodzakati yaseSiyoni.”
NgesiHebheru kutsi, “Tingcweliseni.”
NgesiHebheru kutsi, “atikasokwa.”
NgesiHebheru kutsi, “lasebanemalanga baphila.”
Nobe “nesicondziso.”
Lona ngumhlanga lonukelela kahle.
NgesiHebheru kutsi, “indvodzakati yaseSiyoni.”
NgesiHebheru kutsi, “Umhelo.”
NgesiHebheru kutsi, “ndvodzakati yebantfu bami.”
Lokusho, Jeremiya.
NgesiHebheru kutsi, “Letakhiwo,” lokusho tonkhe takhiwo letihambisana nelithempeli.
Nobe “bantfwana labete bobabe.”
Nobe “nishuncise iminikelo yekushiswa.”
NgesiHebheru kutsi, “bengivuka lokwa ekuseni futsi ngikhulume.”
Lesi sicu sankulunkulukati lebekakhontwa ngema-Israyeli lahlubukile; kungenteka lona ngunkulunkulukati wentalo.
Nobe “Bacansula mine yini; Bachukuluta mine yini.”
NgesiHebheru kutsi, “basondzete tindlebe tabo.”
Nobe “ngendlela labacabanga ngayo.”
NgesiHebheru kutsi, “onkhe malanga bengivuka lokwa ekuseni futsi nginitfumelele.”
NgesiHebheru kutsi, “basondzete tindlebe tabo.”
NgesiHebheru kutsi, “tintsamo.”
NgesiHebheru kutsi, “kute liciniso emilonyeni yabo.”
Fundza Tinchazelo Temagama, ubuke ligama lelitsi “IGehena.”
Nobe “lengazange seyifike enhlitiyweni yami.”
Fundza Tinchazelo Temagama, ubuke ligama lelitsi “IGehena.”
NgesiHebheru kutsi, “libutfo lasezulwini.”
Nobe “tikhatsi letibekiwe.”
Kungaphindze kubekwe ngekutsi, “nagilonki.”
Nobe “sekutfutsa.”
Nobe “sinesicondziso.”
Nobe “bomabhalane.”
Nobe “ipheni.”
NgesiHebheru kutsi, “endvodzakati yebantfu bami.”
NgesiHebheru kutsi, “indvodzakati yebantfu bami.”
NgesiHebheru kutsi, “indvodzakati yebantfu bami.”
Nobe “emafutsa ekupholisa buhlungu.”
NgesiHebheru kutsi, “indvodzakati yebantfu bami.”
Nobe “sicondziso.”
NgesiNgisi kutsi “purple.”
Ekucaleni vesi 11 bekabhalwe ngesi-Aramu.
Nobe “tinkhungu.”
Kungaphindze kubekwe ngekutsi, “imvula lenkhulu.”
Nobe “atiphefumuli.”
NgesiHebheru kutsi, “Loyo Losabelo saJakobe.”
Kungenteka bekukhulunywa naJeremiya.
Nobe “emlilweni lomkhulu wekuncibilikisa insimbi.”
Nobe “Amen ngesiHebheru.”
NgesiHebheru kutsi, “bengivuka lokwa ekuseni nginiyale.”
Nobe “lababashuncisela imihlatjelo.”
Lokusho, Jeremiya.
Lokusho, imihlatjelo leyentiwa ethempelini.
Nobe “imiva yami lejulile.” NgesiHebheru kutsi, “tinso.”
Nobe “imiva lejulile.” NgesiHebheru kutsi, “tinso.”
Kungaphindze kubekwe ngekutsi, “Seyiyalila.”
Nobe “avinjetelwe.”
Lapha kungenteka kushiwo iJerusalema.
Nobe “UmKushe.”
Nobe “lobulihlazo.”
Nobe “eticojeni.”
Nobe “Timbongolo tesiganga.” Loluhlobo lwembongolo alufuywa futsi luhlala esigangeni.
NgesiHebheru kutsi, “indvodzakati yebantfu bami leyintfombi ntfo.”
Kungaphindze kubekwe ngekutsi, “tehlulelo letine.”
Kungaphindze kubekwe ngekutsi, “nekungifulatsela.”
Nobe “kubahawukela.”
Kungaphindze kubekwe ngekutsi, “Lilanga lihlazekile futsi lidliwa ngemahloni.”
NgesiHebheru kutsi, “Emavi akho ngawatfola futsi ngawadla.”
Nobe “ungiphatsise umlayeto wenhlekelele.”
NgesiHebheru kutsi, “ume embikwami.”
Nobe “bakuncobe.”
Kungenteka ema-Israyeli labesahlubukile besekalandzela lamasiko ekulila ebantfu labangamkhonti Nkulunkulu.
NgesiHebheru kutsi, “atibona tonkhe tindlela tabo.”
NgesiHebheru kutsi, “letitidvumbu.”
Fundza Tinchazelo Temagama.
Kungaphindze kubekwe ngekutsi, “Intfukutselo yami itawunenta nivutse njengemlilo.”
Nobe “umuntfu lonemandla.”
NgesiHebheru kutsi, “Lowenta inyama ibe ngumkhono wakhe.”
Nobe “umuntfu lonemandla.”
Nobe “iyayengana.”
Nobe “ihlale ifuna kwenta lokubi; iyingoti.”
Nobe “imiva lejulile.” NgesiHebheru kutsi, “tinso.”
Nobe “ngetindlela letingakalungi.”
NgesiHebheru kutsi, “labangihlubukako,” kungenteka kutsi kukhulunywa ngaJehova.
NgesiHebheru kutsi, “egedeni lemadvodzana ebantfu.”
NgesiHebheru kutsi, “basondzete tindlebe tabo.”
NgesiHebheru kutsi, “bacinisa tintsamo tabo.”
Nobe “naseningizimu.”
Nobe “asebenta esondvweni lekubumba.”
NgesiHebheru kutsi, “ngendlela lebekayibona ikahle.”
Nobe “ngitatisola.”
Nobe “ngiyatisola.”
NgesiHebheru kutsi, “Intfombi ntfo yaka-Israyeli.”
Nobe “Bashuncisa iminikelo yekushiswa.”
NgesiHebheru kutsi, “bantfu batawutsi nabalibuka bashaye inkwela.”
NgesiHebheru kutsi, “Ngeke babubone buso bami kodvwa batawubona umhlane wami.”
Nobe “umyalo.”
NgesiHebheru kutsi, “tindlebe tabo titawuluma.”
Nobe “lengazange seyifike enhlitiyweni yami.”
NgesiHebheru kutsi, “bantfu batawutsi nabalibuka bashaye inkwela.”
Loku kusho tonkhe tintfo letisesibhakabhakeni.
NgesiHebheru kutsi, “bacinisa tintsamo tabo.”
Ligama lesiHebheru lelichaza sitokisi lisho tingodvo lebetisetjentiselwa kubopha tandla, tinyawo kanye nentsamo yemuntfu.
Nobe “imiva lejulile.” NgesiHebheru kutsi, “tinso.”
NgesiHebheru kutsi, “Nebukhadrezari,” lena ngulenye indlela yekubhala lelibito.
Nobe “ngitatijikisa tibuye kini.”
Nobe “sifo lesibi.”
NgesiHebheru kutsi, “Nebukhadrezari,” lena ngulenye indlela yekubhala lelibito.
Nobe “lelisetsafeni.”
Nobe “endlini.”
Nobe “lote babe.”
NgesiHebheru kutsi, “Ngitawutenta tibe ngcwele.”
Uphindze abitwe ngekutsi nguJehoyahazi.
Evesini 13-17 kukhulunywa ngaJehoyakimu, inkhosi yakaJuda.
Kungenteka kutsi lamavi acondziswe eJerusalema.
NgesiHebheru kutsi, “Umoya utawelusa bonkhe belusi bakho.”
NgesiHebheru kutsi, “ngumhelo.”
Uphindze abitwe ngekutsi nguJehoyakhini nobe Jekhoniya.
NgesiHebheru kutsi, “Nebukhadrezari,” lena ngulenye indlela yekubhala lelibito.
NgesiHebheru kutsi, “Awu mhlaba, mhlaba, mhlaba.”
NgesiHebheru kutsi, “emalangeni ayo.”
NgesiHebheru kutsi, “lihlumela.”
Nobe “Lelive ligcwele bantfu labangaketsembeki kuNkulunkulu.”
Nobe “sebatihlubuki.”
Nobe “Abaketsembeki kuNkulunkulu.”
NgesiHebheru kutsi, “Babacinisa tandla.”
Nobe “Baninika litsemba lelingekho.”
Nobe “umlayeto longumtfwalo.” Leligama lesiHebheru lisho nati tintfo letimbili: “simemetelo lesimatima lesivela kuNkulunkulu” nobe “intfo lengumtfwalo.”
Nobe “umlayeto longumtfwalo.”
Nobe “umlayeto longumtfwalo.”
Nobe “umlayeto longumtfwalo.”
Nobe “umlayeto longumtfwalo.”
Nobe “umlayeto longumtfwalo.”
Nobe “umlayeto longumtfwalo.”
NgesiHebheru kutsi, “Nebukhadrezari,” lena ngulenye indlela yekubhala lelibito.
Uphindze abitwe ngekutsi nguJehoyakhini nobe Khoniya.
Kungaphindze kubekwe ngekutsi, “nalabo labakha tindvonga leticinile tekuvikela.”
NgesiHebheru kutsi, “Nebukhadrezari,” lena ngulenye indlela yekubhala lelibito.
Nobe “mayelana nabo.”
NgesiHebheru kutsi, “bengivuka lokwa ekuseni futsi ngikhulume.”
NgesiHebheru kutsi, “abevuka lokwa ekuseni futsi anitfumelele.”
NgesiHebheru kutsi, “nisondzete tindlebe tenu.”
NgesiHebheru kutsi, “Nebukhadrezari,” lena ngulenye indlela yekubhala lelibito.
NgesiHebheru kutsi, “bantfu batawutsi nabalibuka bashaye inkwela.”
Lena kubonakala shengatsi ngulenye indlela lebeyibitwa ngayo iBhabheli (iBhabhulona).
NgesiHebheru kutsi, “bemhlambi.”
Nobe “mayelana nabo.”
Nobe “kutawukhotsama.”
Nobe “ngitatisola.”
NgesiHebheru kutsi, “bengivuka lokwa ekuseni futsi nginitfumelele.”
NgesiHebheru kutsi, “endlini.”
Nobe “utatisola.”
NgesiHebheru kutsi, “yeNdlu.”
Nobe “nemagcuma lanetihlahla letinyenti.”
Nobe “atisola.”
Nobe “Sedekiya,” ngekusho kwaletinye tincwadzi tasendvulo letibhalwe ngesandla.
NgesiHebheru kutsi, “lengikubona kukahle kutsi ngingamnika.”
NgesiHebheru kutsi, “siphumule.”
Nobe “endlini.”
Nobe “endlini.”
Nobe “Akube njalo!”
Kungaphindze kubekwe ngekutsi, “nalabo labakha tindvonga leticinile tekuvikela.”
Kungaphindze kubekwe ngekutsi, “laphuhlukile.”
NgesiHebheru kutsi, “bantfu batawutsi nabababuka bashaye inkwela.”
NgesiHebheru kutsi, “bengivuka lokwa ekuseni futsi ngibatfumelele.”
NgesiHebheru kutsi, “Nebukhadrezari,” lena ngulenye indlela yekubhala lelibito.
Ngelulwimi lwekucala kwasetjentiswa emagama lamabili. Kubonakala ngatsi linye lawo lisho ‘sitokisi sekubopha tinyawo,’ kantsi lelelinye lisho ‘sitokisi sekubopha tandla nenhloko.’
Nobe “lukhalo.”
NgesiHebheru kutsi, “likhulu.”
Nobe “aphindze.”
Nobe “bakuletinye tive.”
Nobe “Ngitakucondzisa ngelizinga lelifanele.”
Kungaphindze kubekwe ngekutsi, “bahlonipheke.”
NgesiHebheru kutsi, “longanikela ngenhlitiyo yakhe ibe sibambiso.”
Nobe “Ngakutsandza ngelutsandvo lolucotfo.”
NgesiHebheru kutsi, “wena ntfombi ntfo yaka-Israyeli.”
Nobe “njengalabo labahlekako.”
Nobe “utasikhulula.”
Nobe “yebuhle.”
NgesiHebheru kutsi, “tibiliboco.”
Nobe “bantfwana.”
NgesiHebheru kutsi, “ematfunjini.”
NgesiHebheru kutsi, “wena ntfombi ntfo yaka-Israyeli.”
NgesiHebheru kutsi, “Umfati utayifuna ngekutimisela indvodza.”
Kungaphindze kubekwe ngekutsi, “bengiyindvodza yabo.”
Nobe “litsafa.”
Nobe “nesemlotsa lonemafutsa,” lokusho umlotsa lonemafutsa etilwane lebetentiwa umhlatjelo.
NgesiHebheru kutsi, “Nebukhadrezari,” lena ngulenye indlela yekubhala lelibito.
Nobe “lebelisendlini.”
Nobe “longubabe wakho lomncane.”
NgesiHebheru kutsi, “lekuphindze uyitsenge.”
NgesiHebheru kutsi, “nemashekeli langu-7.” Lishekeli lilinye belinesisindvo lesingemagremu langu-11.4. Fundza Sandzisanchazo B14.
Nobe “lutsandvo lolucotfo.”
NgesiHebheru kutsi, “tono tabobabe tehlele esifubeni semadvodzana abo.”
NgesiHebheru kutsi, “Ticondziso.”
NgesiHebheru kutsi, “Nebukhadrezari,” lena ngulenye indlela yekubhala lelibito.
NgesiHebheru kutsi, “bengivuka lokwa ekuseni futsi ngibafundzise.”
Fundza Tinchazelo Temagama, ubuke ligama lelitsi “IGehena.”
Nobe “intfo lengazange seyifike enhlitiyweni yami.”
Fundza Tinchazelo Temagama.
NgesiHebheru kutsi, “lihlumela.”
NgesiHebheru kutsi, “sivumelwane.”
NgesiHebheru kutsi, “libutfo lasezulwini.”
NgesiHebheru kutsi, “inhlanyelo.”
NgesiHebheru kutsi, “sivumelwane.”
NgesiHebheru kutsi, “inhlanyelo.”
NgesiHebheru kutsi, “inhlanyelo.”
NgesiHebheru kutsi, “inhlanyelo.”
NgesiHebheru kutsi, “Nebukhadrezari,” lena ngulenye indlela yekubhala lelibito.
NgesiHebheru kutsi, “Lamuhla.”
Nobe “kulelinye lemakamelo.”
NgesiHebheru kutsi, “Jonadabi,” lesi sifishaniso selibito lelitsi Jehonadabi.
NgesiHebheru kutsi, “Jonadabi,” lesi sifishaniso selibito lelitsi Jehonadabi.
NgesiHebheru kutsi, “Nebukhadrezari,” lena ngulenye indlela yekubhala lelibito.
NgesiHebheru kutsi, “bengivuka lokwa ekuseni futsi ngikhulume.”
NgesiHebheru kutsi, “bengivuka lokwa ekuseni futsi nginitfumelele.”
NgesiHebheru kutsi, “nisondzete tindlebe tenu.”
NgesiHebheru kutsi, “Jonadabi,” lesi sifishaniso selibito lelitsi Jehonadabi.
NgesiHebheru kutsi, “incwadzi legocotwako.”
NgesiHebheru kutsi, “kulencwadzi legocotwako.”
Nobe “kulencwadzi.”
Nobe “kulencwadzi.”
Nobe “abesendlini yekudlela.”
Nobe “kulencwadzi.”
Nobe “lelisendlini.”
Nobe “tiphatsimandla.”
Nobe “kulencwadzi.”
Nobe “kulencwadzi.”
Lena yinyanga lecala emkhatsini waNovember iphele emkhatsini waDecember. Fundza Sandzisanchazo B15.
NgesiHebheru kutsi, “nasenhlanyelweni.”
Nobe “labekakulencwadzi.”
NgesiHebheru kutsi, “Nebukhadrezari,” lena ngulenye indlela yekubhala lelibito.
Uphindze abitwe ngekutsi nguJehoyakhini nobe Jekhoniya.
NgesiHebheru kutsi, “tamfaka endlini lenetinketane.”
NgesiHebheru kutsi, “endlini lenemgodzi.”
Nobe “endlini.”
NgesiHebheru kutsi, “lotakuya.”
NgesiHebheru kutsi, “tenta tandla tibe butsakatsaka.”
NgesiHebheru kutsi, “angumtsenwa.” Fundza Tinchazelo Temagama.
Nobe “endlini.”
Nobe “endlini.”
Nobe “endlini.”
NgesiHebheru kutsi, “uya.”
NgesiHebheru kutsi, “ungeke uye.”
NgesiHebheru kutsi, “uye.”
Nobe “endlini.”
NgesiHebheru kutsi, “Lamadvodza lonekuthula nawo.”
NgesiHebheru kutsi, “Nebukhadrezari,” lena ngulenye indlela yekubhala lelibito.
Letinye tincwadzi tesiHebheru tiwehlukanisa ngalendlela lamabito “Negali-sareseri, Samgari-nebo, Sasekhimi, Rabusarisi.”
Nobe “umenti wemilingo lohamba embili (lophengula ngekufundza tinkhanyeti).”
NgesiHebheru kutsi, “Nebukhadrezari,” lena ngulenye indlela yekubhala lelibito.
Nobe “indlu.”
Kungaphindze kubekwe ngekutsi, “nemsebenti lebebaphoceleleke kutsi bawente.”
NgesiHebheru kutsi, “Nebukhadrezari,” lena ngulenye indlela yekubhala lelibito.
Nobe “indvuna lenkhulu yesigodlo.”
Nobe “umenti wemilingo lohamba embili (lophengula ngekufundza tinkhanyeti).”
NgesiHebheru kutsi, “ngime embikwemaKhaledi.”
NgesiHebheru kutsi, “inhlanyelo yasebukhosini.”
Kungaphindze kubekwe ngekutsi, “ngasesitibeni lesikhulu.”
Nobe “ngitawuva buhlungu.”
Nobe “nihlale sikhashana.”
NgesiHebheru kutsi, “Nebukhadrezari,” lena ngulenye indlela yekubhala lelibito.
Nobe “emathempeli.”
Nobe “ingenamyocu.”
Nobe “Indlu (Lithempeli) Yelilanga,” lokusho iHeliyopholisi.
Nobe “emathempeli.”
Nobe “eMemfisi.”
NgesiHebheru kutsi, “bengivuka lokwa ekuseni futsi ngititfumelele.”
NgesiHebheru kutsi, “nisondzete tindlebe tenu.”
Nobe “anikabuva buhlungu.”
Lesi sicu sankulunkulukati lebekakhontwa ngema-Israyeli lahlubukile; kungenteka lona ngunkulunkulukati wentalo.
Lesi sicu sankulunkulukati lebekakhontwa ngema-Israyeli lahlubukile; kungenteka lona ngunkulunkulukati wentalo.
Lesi sicu sankulunkulukati lebekakhontwa ngema-Israyeli lahlubukile; kungenteka lona ngunkulunkulukati wentalo.
NgesiHebheru kutsi, “yefika enhlitiyweni yakhe.”
Lesi sicu sankulunkulukati lebekakhontwa ngema-Israyeli lahlubukile; kungenteka lona ngunkulunkulukati wentalo.
NgesiHebheru kutsi, “Nebukhadrezari,” lena ngulenye indlela yekubhala lelibito.
Nobe “ulindzele.”
NgesiHebheru kutsi, “yonkhe inyama.”
NgesiHebheru kutsi, “Nebukhadrezari,” lena ngulenye indlela yekubhala lelibito.
Lamahawu bekavame kuphatfwa ngemasotja lasebentisa butjoki.
NgesiHebheru kutsi, “kusebentisa lunyawo kuze agobe.”
Nobe “utawuhlaba.”
NgesiHebheru kutsi, “Wena ndvodzakati yaseGibhithe leyintfombi ntfo.”
NgesiHebheru kutsi, “Nebukhadrezari,” lena ngulenye indlela yekubhala lelibito.
Nobe “eMemfisi.”
NgesiHebheru kutsi, “ngesikhatsi lesibekiwe.”
Lokusho, loyo lotawuncoba iGibhithe.
NgesiHebheru kutsi, “Wena ndvodzakati lehlala eGibhithe.”
Nobe “iMemfisi.”
Kungaphindze kubekwe ngekutsi, “Itawuba yindzawo lengenamsebenti.”
Nobe “labatfotako.”
NgesiHebheru kutsi, “Indvodzakati yaseGibhithe.”
Lokusho, eThebesi.
NgesiHebheru kutsi, “Nebukhadrezari,” lena ngulenye indlela yekubhala lelibito.
NgesiHebheru kutsi, “inhlanyelo.”
Nobe “Ngitakucondzisa ngelizinga lelifanele.”
Lokusho, iKhrethe.
Lokusho, kuhhula tinhloko tabo ngenca yekutsi bayalila futsi bahlazekile.
Nobe “etsafeni.”
Nobe “Indzawo lephakeme levikelekile.”
Nobe “Litsafa.”
Nobe “Indzawo lephakeme lebekile.”
NgesiHebheru kutsi, “ligama labo.”
Kungaphindze kubekwe ngekutsi, “emhlabatsini lowomile.”
NgesiHebheru kutsi, “wena ndvodzakati lehlala eDiboni.”
Nobe “indzawo lephakeme lebekile.”
NgesiHebheru kutsi, “Luphondvo lwakaMowabi lwephuliwe.”
Nobe “itawuhholola.”
Lokusho, umntjingo lodlalwa emngcwabeni nakulilwa.
Nobe “itawuhholola.”
Lokusho, umntjingo lodlalwa emngcwabeni nakulilwa.
Fundza Tinchazelo Temagama.
Kungaphindze kubekwe ngekutsi, “umsindvo wekumemeta kwebantfu emphini.”
Nobe “lakhelene.”
Nobe “etibayeni letakhiwe ngematje.”
NgesiHebheru kutsi, “batawushaya inkwela.”
Nobe “lafuna.”
NgesiHebheru kutsi, “Nebukhadrezari,” lena ngulenye indlela yekubhala lelibito.
NgesiHebheru kutsi, “Nebukhadrezari,” lena ngulenye indlela yekubhala lelibito.
NgesiHebheru kutsi, “emoyeni.”
NgesiHebheru kutsi, “lobusicalo semandla ayo.”
NgesiHebheru kutsi, “emoyeni.”
Fundza Tinchazelo Temagama, ubuke ligama lelitsi “Merodaki.”
Leligama lesiHebheru kungenteka lihlobene neligama lelisho “bulongo” futsi lisetjentiswa nakukhulunywa ngendzelelo.
NgesiHebheru kutsi, “batawushaya inkwela.”
NgesiHebheru kutsi, “seyiphakamise tandla.”
NgesiHebheru kutsi, “Nebukhadrezari,” lena ngulenye indlela yekubhala lelibito.
Nobe “ubacotfule.”
Nobe “Bacotfuleni.”
NgesiHebheru kutsi, “labasebentisa lunyawo kuze bagobe.”
NgesiHebheru kutsi, “atawuthuliswa.”
Nobe “baphrofethi bemanga.”
NgesiNgisi kutsiwa yi-Ostrich.
NgesiHebheru kutsi, “ndvodzakati yaseBhabhulona.”
Nobe “lafuna.”
Lena kubonakala shengatsi ngulenye indlela lebelibitwa ngayo live lemaKhaledi.
NgesiHebheru kutsi, “akakafelwa.”
Kungaphindze kubekwe ngekutsi, “nigcwalise tikhwama temicibisholo.”
NgesiHebheru kutsi, “sewufike ekugcineni.”
Nobe “tinkhungu.”
Kungaphindze kubekwe ngekutsi, “imvula lenkhulu.”
Nobe “atiphefumuli.”
NgesiHebheru kutsi, “Loyo Losabelo saJakobe.”
Kungaphindze kubekwe ngekutsi, “nguye lowadala intfonga yebantfu labalifa lakhe.”
NgesiHebheru kutsi, “Ngcwelisani.”
NgesiHebheru kutsi, “Ngcwelisani.”
Fundza Tinchazelo Temagama.
NgesiHebheru kutsi, “Indvodzakati yaseBhabhulona.”
Jeremiya ukhuluma ngatsi umelela iJerusalema naJuda.
NgesiHebheru kutsi, “Nebukhadrezari,” lena ngulenye indlela yekubhala lelibito.
Nobe “Futsi ungikhukhule ngemanti.”
NgesiHebheru kutsi, “bantfu batawutsi nabayibuka bashaye inkwela.”
Lena kubonakala shengatsi ngulenye indlela lebeyibitwa ngayo iBhabheli (iBhabhulona).
Nobe “labangatiwa.”
NgesiHebheru kutsi, “Nebukhadrezari,” lena ngulenye indlela yekubhala lelibito.
NgesiHebheru kutsi, “Nebukhadrezari,” lena ngulenye indlela yekubhala lelibito.
Nobe “sigodlo.”
NgesiHebheru kutsi, “beyingemakhyubhitha langu-18.” Fundza Sandzisanchazo B14.
NgesiHebheru kutsi, “lengemakhyubhitha langu-12.” Fundza Sandzisanchazo B14.
NgesiHebheru kutsi, “bebungangeminwe lemine.” Fundza Sandzisanchazo B14.
NgesiHebheru kutsi, “beyingemakhyubhitha lasihlanu.” Fundza Sandzisanchazo B14.
Nobe “nemaphomegranathi.”
NgesiHebheru kutsi, “Nebukhadrezari,” lena ngulenye indlela yekubhala lelibito.
NgesiHebheru kutsi, “Nebukhadrezari,” lena ngulenye indlela yekubhala lelibito.
NgesiHebheru kutsi, “Nebukhadrezari,” lena ngulenye indlela yekubhala lelibito.
NgesiHebheru kutsi, “waphakamisa inhloko.”