Sifundvo 10
Imikhuba Nkulunkulu Layitondzako
Kufanele utitsatse kanjani tintfo Nkulunkulu latsi timbi? (1)
Ngutiphi tindlela tekuya ecansini letingakalungi? (2)
UmKhristu kufanele akutsatse kanjani kukhuluma emanga? (3) kugembula? (3) kweba? (3) budlova? (4) kuchumana nemimoya? (5) kudzakwa? (6)
Umuntfu angaphunyula kanjani emikhubeni lemibi? (7)
1. Tinceku taNkulunkulu titsandza lokulungile. Kufanele tifundze nekutondza lokubi. (Tihlabelelo 97:10) Loko kusho kubalekela leminye yemikhuba letondvwa nguNkulunkulu. Ngumiphi leminye yayo?
2. Bugwadla: Kuya ecansini ungakashadi, kuphinga, kulala nesilwane, kulala nesihlobo, nekulalana kwemadvodza odvwana nebafati bodvwana: konkhe kutono letisindzako kuNkulunkulu. (Levithikhusi 18:6; Roma 1:26, 27; 1 Khorinte 6:9, 10) Nangabe titsandzani tihlala ndzawonye tibe tingakatsatsani, kufanele tehlukane nome titsatsane ngekwemtsetfo.—Hebheru 13:4.
3. Kukhuluma emanga, kugembula, kweba: Nkulunkulu Jehova akanakuwacala emanga. (Thithusi 1:2) Bantfu labafuna kwemukeleka kuye kufanele bakubalekele kukhuluma emanga. (Taga 6:16-19; Kholose 3:9, 10) Tonkhe tinhlobo tekugembula toniwe bugovu. Ngaloko-ke, emaKhristu awangeneli nome nguluphi luhlobo lwekugembula, njengema-lotto, kubhejela emahhashi, negembula ngemishini. (Efesu 5:3-5) Futsi emaKhristu awebi. Awatitsengi tintfo latiko kutsi tebiwe nome atsatse tintfo ngephandle kwemvume.—Eksodusi 20:15; Efesu 4:28.
4. Tento tentfukutselo, budlova: Lulaka lolwendlulele lungaphumela ekwenteni budlova. (Genesisi 4:5-8) Umuntfu losidlova ngeke abe ngumngani waNkulunkulu. Kuphindzisela nangabe labanye basiphatsa kabi akukalungi.—Taga 24:29, Roma 12:17-21.
5. Kuloya nekuchumana nemimoya: Labanye bantfu betama kwelapha kugula ngekucela lusito lwemadloti. Labanye baloya titsa tabo kute tigule nobe tife.Emandla laphumelelisa yonkhe lemikhuba avela kuSathane. Ngiko emaKhristu kungafanele ente nome ngumiphi yayo. (Dutheronomi 18:9-13) Kuhlala edvute naJehova kusivikelo lesingcono kakhulu ekuloyweni.—Taga 18:10.
6. Kudzakwa: Kunatsa kancane liwayini, bhiya, nobe lesinye sinatfo lesidzakanako akusiyo intfo lembi. (Tihlabelelo 104:15; 1 Thimothi 5:23) Kepha kunatsa kakhulu nekudzakwa, akukalungi emehlweni aNkulunkulu. (1 Khorinte 5:11-13; 1 Thimothi 3:8) Kunatsa kakhulu kungalimata imphilo yakho futsi kutsikamete nemndeni wakho. Kungaphindze kukwente uwele kuletinye tilingo melula.—Taga 23:20, 21, 29-35.
7. Bantfu labenta loko Nkulunkulu latsi kubi “bangeke balidle lifa lembuso waNkulunkulu.” (Galathiya 5:19-21) Nangabe umtsandza sibili Nkulunkulu, futsi ufuna kumjabulisa, ungaphunyula kulemikhuba. (1 Johane 5:3) Fundza kutondza loko Nkulunkulu latsi kubi. (Roma 12:9) Tayelana nebantfu labanemikhuba yekuhlonipha Nkulunkulu. (Taga 13:20) EmaKhristu lavutsiwe angaba lusito. (Jakobe 5:14) Ngetulu kwako konkhe, tsembela kuNkulunkulu ngemthandazo.—Filiphi 4:6, 7, 13.
[Titfombe ekhasini 20, 21]
Nkulunkulu uyakutondza kudzakwa, kweba, kugembula, netento tebudlova