February

Jesu bekabatsandza futsi abakhatsalela labanye bantfu. Bantfu bebayibona indlela lebekabatsandza ngayo futsi loku bekubenta bawulalelisise umlayeto weMbuso lebekawashumayela. Ngendlela lefanako, natsi singabatsandza bantfu futsi sibakhatsalele njengaJesu futsi loku kutawusenta siphumelele emsebentini wekushumayela. Yini lesingayenta kute sikhombise kutsi siyabavela labo lesibashumayelako? Sifuna kutibeka esimeni sabo, futsi sibaphatse ngendlela natsi lesingatsandza kuphatfwa ngayo. (Mat. 7:12) Cabanga ngetidzingo temuntfu ngamunye. Akukafaneli sisebentise indlela yinye yekushumayela kubo bonkhe bantfu lesihlangana nabo ensimini. Esikhundleni saloko, sicabanga ngetimo temuntfu ngamunye kanye nemibono yakhe. Buta imibuto ngekuhlakanipha letamenta akhulume. (Taga 20:5) Nasibabuta lemibuto, sisuke sibenta bakhululeke kusitjela kutsi kungani batidzinga tindzaba letimnandzi. Nasesikwati loko, bese siyakhona kukhombisa kutsi siyabavela ngetidzingo tabo letitsite futsi sibasite njengobe Jesu enta.—Catsanisa na-1 Khorinte 9:19-23. w19.03 20 ¶2; 22 ¶8-9

Bo-Adamu na-Eva bakhombisa kutsi bebangabongi ngato tonkhe tintfo letinhle Jehova lebekabentele tona. Sonkhe sinelitfuba lekukhombisa kutsi asivumelani nesincumo labasenta. Nasibhajatiswa, sikhombisa Jehova kutsi siyakholwa kutsi nguye loneligunya lekusibekela timiso letimayelana nalokulungile nalokungakalungi. Sikhombisa kutsi siyamtsandza Babe wetfu futsi siyametsemba. Ngemuva kwekubhajatiswa, kufanele sichubeke sente loko lokufunwa nguJehova, hhayi lokufunwa ngitsi. Tigidzi tetinceku taNkulunkulu tenta intsandvo yakhe. Nawe ungakhona kuyenta nangabe utfutfukisa indlela lolicondza ngayo liVi laNkulunkulu, utihlanganisa nebazalwane nabodzadze ngaso sonkhe sikhatsi, futsi utimisela ekutjeleni bantfu ngaloko lokufundzile ngaBabe wakho lokutsandzako. (Heb. 10:24, 25) Nawenta tincumo, lalela seluleko Jehova lakunika sona asebentisa liVi lakhe kanye nenhlangano yakhe. (Isa. 30:21) Nawenta njalo utawuphumelela kuko konkhe lokwentako.—Taga 16:3, 20. w19.03 7 ¶17-18

Jehova usinikete imfundvo lenyenti lemayelana naye. Sibonelo saloko kutsi sitfola ticondziso letilusito emihlanganweni yebuKhristu, kubomagazini kanye naku-website yetfu. Kwake kwenteka yini kutsi walalela inkhulumo letsite, wafundza sihloko lesitsite, noma wabukela luhlelo lwe-Broadcast wase utsi, ‘Nguloko kanye lebengikudzinga’? Singakhombisa njani kutsi siyambonga Jehova? (Khol. 3:15) Lenye indlela kutsi njalo nasithantaza simbonge ngetintfo letinhle lasipha tona. Sikhombisa kutsi siyambonga Jehova ngekutsi sigcine indzawo lesikhontela kuyo ihlantekile futsi icocekile. Sibakhona njalo nakuhlantwa liHholwa leMbuso, noma nangabe lilungiswa futsi bazalwane labasebentisa imishini ye-sound noma yekudlala ema-video bayiphatsa kahle. Nangabe siwanakekela emaHholwa eMbuso atawuhlala sikhatsi lesidze futsi angeke kube nesidzingo lesikhulu sekuwalungisa. Loko kutawusita kutsi kwakhiwe lamanye emaHholwa eMbuso emhlabeni wonkhe futsi alungiswe. w19.02 18 ¶17-18

Jobe bekatinika sikhatsi sekucabangisisa ngendalo yaNkulunkulu lemangalisako. (Jobe 26:7, 8) Ngisho nome betitincane tintfo labetati ngendalo yaNkulunkulu, Jobe wamangala nakacabanga ngemhlaba, sibhakabhaka, emafu kanye nekudvuma kwelitulu. Bekawatsandza emavi lavela kuNkulunkulu. Mayelana nemavi aNkulunkulu Jobe watsi: “Emavi emlomo wakhe ngiwente aba ligugu.” (Jobe 23:12) Jobe bekajabula ngaJehova futsi amhlonipha ngalokujulile. Bekamtsandza Babe wakhe futsi afuna kumjabulisa. Loko kwabangela Jobe kutsi atimisele kakhulu kuhlala acotfo. Natsi kufanele sente lokufanako. Kunyenti kakhulu lesikwatiko ngendalo yaJehova lemangalisako kwendlula loko lebekwatiwa bantfu bangesikhatsi saJobe. LiBhayibheli liphindze lisisite simati Jehova. Tonkhe tintfo lesitifundzako tisenta simesabe Nkulunkulu. Sitamtsandza kakhulu Jehova futsi sitamlalela nangabe simesaba futsi simhlonipha. Loko kutawusenta sitimisele kuhlala sicotfo.—Jobe 28:28. w19.02 5 ¶12

Kuwo wonkhe umlandvo, bantfu lababaholi bebasolo bacindzetela bantfu baNkulunkulu. Bangahle basimangalele ngemacala lehlukahlukene, ngesizatfu sekutsi ‘silalela Nkulunkulu njengobe angumbusi kunekutsi silalele bantfu.’ (Imis. 5:29) Bangahle bahlekise ngatsi, basifake emajele, noma basihlukumete. Nanobe kunjalo, Jehova utasisita, angeke siphindzisele, kodvwa sitawuchubeka sitfobekile kulo lonkhe luvivinyo lesihlangabetana nalo. Cabanga ngesibonelo lesihle boHananiya, Mishayeli, na-Azariya emaHebheru lamatsatfu labetfunjiwe lasibekela sona. Ngekutfobeka, bachazela inkhosi kutsi kungani bebangeke basikhotsamele lesitfombe lebeyisentile. Bebatimisele kwemukela noma ngabe yini Jehova layivumelako kutsi yenteke. (Dan. 3:1, 8-28) Singawalingisa njani lamaHebheru lamatsatfu nangabe kwetsembeka kwetfu kuJehova kuvivinywa? Kufanele sitfobeke futsi setsembe kutsi Jehova utasinakekela. (Hla. 118:7) Kufanele sibaphendvule ngemusa futsi sibahloniphe labo labasisola kutsi sente lokubi. (1 Phet. 3:15) Asifuni kwenta noma ngabe yini lengalimata buhlobo betfu naBabe wetfu lositsandzako. w19.02 10-11 ¶11-13

Singaba nesibindzi nangabe sicabanga ngematsemba lesinawo ngenca yenhlawulo yaJesu. (Joh. 3:16; Ef. 1:7) Nasekusele emaviki lambalwa kufike Sikhumbuto, siba nelitfuba lelikhetsekile lekukhombisa kubonga ngenhlawulo yaJesu. Ngako hambisana nekufundvwa kweliBhayibheli kwemalanga eSikhumbuto, thantaza futsi uzindle ngalokwenteka ngaphambi kwekufa kwaJesu nangemuva kwako. Nasesisemkhosini weSidlo SeNkhosi Sakusihlwa, sitawucabangisisa ngekubaluleka kwesinkhwa neliwayini nekutsi kuwumelela njani umhlatjelo waJesu loligugu. Nasikucondza loko Jehova naJesu labasentele kona nendlela tsine kanye nebantfu lesibatsandzako lesizuza ngayo, kukholwa kwetfu kuyacina futsi loko kusenta sichubeke sicinisela kuze kube sekupheleni. (Heb. 12:3) Sijabula kakhulu ngekutsi Jesu uyachubeka analobuntfu njengobe angumPhristi wetfu Lophakeme losincengelako kuNkulunkulu. (Heb. 7:24, 25) Kute sikhombise kubonga kwetfu lokusuka enhlitiyweni, kufanele sikukhumbule ngekwetsembeka kufa kwaJesu njengoba asiyala.—Luk. 22:19, 20. w19.01 22 ¶8; 23-24 ¶10-11

Sonkhe Jehova usinikete lilungelo lekumdvumisa. Kuphendvula emihlanganweni kuyincenye yemihlatjelo yetfu futsi kute lomunye longasentela kona. (Heb. 13:15) Jehova ufuna sinikele ngemihlatjelo lefanako yini nobe sisho timphendvulo letifanako? Cha! Imihlangano yelibandla yitsatse njengekudla lenikudla ndzawonye nebangani bakho. Nasi sibonelo, cabanga kutsi ungativa njani nangabe bangani bakho bakumema kutsi uyodla nabo futsi bakucela kutsi ulungise kudla lokumelula labatakudla? Ungativa wetfukile, kodvwa ungatimisela kutsi ulungiselele kudla labatakujabulela. Nasisemihlanganweni, Jehova usuke asilungiselele kudla lokumnandzi lesitakujabulela. (Hla. 23:5; Mat. 24:45) Uyajabula nangabe sinikela ngalokuncono kakhulu kulesinako. Ngako lungiselela kahle, futsi wetame kuphendvula kanyenti. Nawenta njalo utayijabulela imfundvo Jehova lasilungiselele yona futsi utawubakhutsata labanye. w19.01 8 ¶3; 13 ¶20

Ngetikhatsi tekubhalwa kweliBhayibheli kukhonta kwemanga bekufaka ekhatsi kutiphatsa kabi ngekwelicasi. (Hos. 4:13, 14) Bantfu labanyenti labasenkholweni yemanga bebakutsandza kutiphatsa lokubi, kodvwa bekubenta bangajabuli. Davide watsi: ‘Tinkhatsato titakwandziswa kulabo labanikela kulabanye bonkulunkulu.’ Bantfu labanjalo bebaze banikele ngebantfwana babo kubonkulunkulu bemanga. (Isa. 57:5) Jehova bekawenyanya lomkhuba. (Jer. 7:31) Nalamuhla, tinkholo temanga tiyakuvumela kutiphatsa kabi ngekwelicasi ngisho nebutabani imbala. Loku kungenta bantfu bative bakhululekile kodvwa ecinisweni bandzisa tinkhatsato tabo futsi kungenteka nawe uyakubona loko. (1 Khor. 6:18, 19) Ngako, nine labasha lalelani Babe wenu wasezulwini. Cinisekani kutsi kulalela Nkulunkulu kuzuzisa nine. Cabangisisani ngemiphumela lebuhlungu lebangelwa kutiphatsa kabi. Loko kutanenta nibone kutsi injabulo yesikhashana yekwenta sono ilite nayicatsaniswa nemiphumela lebuhlungu yekusenta.—Gal. 6:8. w18.12 27-28 ¶16-18

Nangabe umKhristu loshadile atiphatsa kabi ngekwelicasi, loyo lashade naye kungadzingeka ente sincumo. Jesu watsi utawuba nesizatfu lesicinile sekutsi adivose futsi ukhululekile kutsi aphindze ashade. (Mat. 19:9) Kodvwa angaphindze akhetse kutsi amcolele umuntfu lashade naye. Loko kuyintfo lenhle. Hoseya wamcolela Gomeri. Ngesikhatsi Gomeri sekabuyele kuHoseya, bekungakafaneli aphindze alale nalenye indvodza. Kwaphela sikhashana lesitsite Hoseya angayi ecasini naGomeri. (Hos. 3:1-3) Kodvwa ngekuhamba kwesikhatsi, kungenteka Hoseya waphindze waya ecasini nemkakhe. Loko kusikhombisa kutsi Jehova ukulungele kucolela bantfu bakhe aphindze abanakekele. (Hos. 1:11; 3:4, 5) Loku kubafundzisani bantfu labashadile lamuhla? Nangabe umlingani wemshado lowetsembekile akhetsa kungamdivosi umlingani wakhe longaketsembeki futsi achubeke aya naye ecasini, kusho kutsi sewumcolele. (1 Khor. 7:3, 5) Ngekwenta kanjalo sewute sizatfu lesisekelwe emiBhalweni sekudivosa. Ngemuva kwaloko bobabili kufanele balwele kuba nembono waNkulunkulu ngemshado. w18.12 13 ¶13

Nasidadisha, kufanele sicabange ngembono waJehova etindzabeni letitsite, loko kutasisita sente tincumo letikahle esikhatsini lesitako. Nasenta kanjalo, sitakulungela kwenta tincumo letikahle nakufika simo lesidzinga sente tincumo ngekushesha. Ngekutsi Josefa angavumi ngesikhatsi umkaPhotifari amncenga kutsi alale naye, wakhombisa kutsi abezindla ngembono waJehova mayelana nekwetsembeka kuloshade naye. (Gen. 39:8, 9) Ngetulu kwaloko, Josefa wakhombisa kutsi abecabanga njengaNkulunkulu. Watsi: “Ngingabenta kanjani lobubi lobungaka, ngone kuNkulunkulu?” Kutsiwani ngatsi? Ase sitsi umuntfu losebenta naye ucala kwenta tento letikhombisa kutsi uyakutsandza. Yini lotayenta nangabe utfola umlayeto lokhuluma ngetindzaba tekuya ecasini noma sitfombe semuntfu longakagcoki? Kumelula kakhulu kuhlala setsembekile kuJehova nangabe siwati umbono wakhe, siwemukela futsi sesikwati loko lesitakwenta. w18.11 25 ¶13-14

Letinye tati ticabanga kutsi emavi aHabakhuki lasevesini 18 asho kutsi, “Ngiyawugcumagcuma ngenjabulo enkhosini yami; Ngitfokote ngaNkulunkulu wami.” Lesi sifundvo lesihle kakhulu kitsi sonkhe. Jehova akagcini ngekusetsembisa tintfo letinhle, kodvwa uyasicinisekisa kutsi uyakulangatelela kutifeza. Asingabati kutsi umlayeto lobalulekile losencwadzini yaHabakhuki usisita kutsi setsembele kuJehova. (Hab. 2:4) Singametsemba Jehova nangabe sicinisa buhlobo betfu naye ngekutsi (1) sithantaze njalo kuJehova simtjele ngato tonkhe tinkinga tetfu netintfo letisikhatsatako; (2) sikunakisise loko Jehova lasitjela kona eVini lakhe liBhayibheli neticondziso lesititfola enhlanganweni yakhe, futsi (3) silindzele Jehova ngekubeketela nangekwetsembeka. Habakhuki wenta lokufanako. Ngisho noma ekucaleni kwencwadzi yakhe bekaselusizini, wagcine ametsemba Jehova futsi ajabula. Shengatsi singasilingisa lesibonelo lesiseBhayibhelini futsi sitfole indvudvuto levela kuJehova. Ikhona yini indvudvuto lenkhulu lesingayitfola kulelive? w18.11 17 ¶18-19

Kunalesinye sizatfu lesisenta sati kutsi Jehova uyasitsandza. LiBhayibheli litsi: “Nkulunkulu walitsandza kakhulu live kangangekutsi waze wanikela ngeNdvodzana yakhe lekuphela kwayo, kuze wonkhe umuntfu lokholwa ngiyo angabhubhi, kodvwa atfole kuphila lokuphakadze.” (Joh. 3:16) Loko kusikhombisa kutsi naJesu uyasitsandza futsi loku kuyasicinisa. LiBhayibheli litsi, ngisho ‘nekuhlupheka, noma kucindzeteleka’ ngeke ‘kusehlukanise nelutsandvo lwaKhristu.’ (Rom. 8:35, 38, 39) Ngalesinye sikhatsi, tinkinga tingasenta siphelelwe ngemandla futsi sidvumale, noma tisente siphelelwe yinjabulo ekukhonteni Jehova. (2 Khor. 5:14) Ngisho noma singabhekana netinhlekelele, kuphikiswa, kudvumateka kanye nekukhatsateka, angeke silahle litsemba ngoba siyati kutsi Jesu uyasitsandza. w18.09 14 ¶8-9

Kute sihambe ecinisweni, kufanele semukele tonkhe timfundziso taJehova futsi siphile ngato. Liciniso kufanele silitsatse njengalelibaluleke kakhulu ekuphileni kwetfu futsi siphile ngekuvumelana nalo. NjengaDavide, kufanele sitimisele kuchubeka sihamba ecinisweni. Nangabe singakatimiseli, singacala kucabanga ngetintfo lesatidzela bese sifuna kuphindze sibuyele kuto. Kunaloko, sibambelela ecinisweni. Kodvwa ngeke sitikhetsele kutsi ngumaphi emaciniso lesitawalalela nalesingeke siwalalele. Kufanele sihambe ‘kulo lonkhe liciniso.’ (Joh. 16:13) Kufanele sisebentise kahle sikhatsi setfu kute singaphambuki ecinisweni. Nangabe singakanaki singacala kucitsa sikhatsi lesinyenti etintfweni tekutijabulisa, kwenta tintfo lesititsandzako, ku-internet noma sibukela i-TV. Akusiko kubi kwenta letintfo, kepha singagcine sisebentisa sikhatsi lebesingasisebentisela kudadisha kanye netintfo letisenta sibe nebuhlobo lobuhle naJehova. w18.11 10 ¶7-8

Nangabe kuba netingucuko lesingakatilindzeli ekuphileni, siyadvumala futsi siphelelwe ngemandla. (Taga 12:25) Singaphindze sikutfole kumatima kwemukela letingucuko. Nasibhekene naletimo, yini lengasisita sibe nekuthula futsi sidvudvuteke? (Hla. 131:1-3, NW) Nanobe singabhekana netimo letibuhlungu ekuphileni, singaba nekuthula kwaNkulunkulu lokutawuvikela tingcondvo tetfu futsi kusente sidvudvuteke. (Fil. 4:6, 7) Ngako nangabe sicindzetelekile futsi sikhatsatekile, kuthula kwaNkulunkulu kungasipha emandla ekuchubeka sikhonta Jehova ngekutimisela futsi singaphelelwa litsemba. Ngetulu kwekusinika kuthula, umoya waNkulunkulu ungasicondzisa kutsi sitfole emavesi latasisita sibeke kukhonta Jehova kucala ekuphileni kwetfu.—Joh. 14:26, 27. w18.10 27 ¶2; 28 ¶5, 8

Nguyiphi intfo lesekuphele sikhatsi lesidze iyingoti kakhulu kubantfu? Ngemanga! Kucamba emanga kusho kukhuluma intfo lengasilo liciniso kute udukise lotsite. Ngubani lowakhuluma emanga ekucala? Jesu Khristu watsi ‘Develi unguyise wemanga.’ (Joh. 8:44) Sathane wacala nini kukhuluma emanga? Wacala kuwakhuluma ensimini yase-Edeni, eminyakeni letinkhulungwane leyengcile. Bo-Adamu na-Eva bebakujabulela kuphila epharadisi lebelidalwe nguNkulunkulu. Nkulunkulu bekabatjelile kutsi batakufa nangabe badla “sitselo sesihlahla sekwati lokulungile nalokungakalungi.” Ngisho noma Sathane abekwati loko, wakhuluma na-Eva asebentisa inyoka watsi: “Ningeke nife.” Lawo bekungemanga ekucala. Sathane wachubeka watsi: “Nkulunkulu uyati kutsi mhlazana nisidla, emehlo enu ayawuvuleka, bese nifanana naNkulunkulu nikwati lokuhle nalokubi.”—Gen. 2:15-17; 3:1-5. w18.10 6 ¶1-2

Kuze sihlale sihlantekile etinhlitiyweni tetfu kufanele sihlale sinemicabango netifiso letihlantekile. Kubalulekile kutsi sigcine imicabango yetfu ihlantekile nangabe sifuna kwemukelwa nguJehova. (2 Khor. 4:2; 1 Thim. 1:5) Bantfu labahlantekile enhlitiyweni ‘bangambona’ njani Nkulunkulu “ngobe kute umuntfu longabona [Nkulunkulu] abuye aphile?” (Eks. 33:20) Ligama lesiGriki lelitsi “kubona” lingasho kucabanga, kucondza, kanye nekwati. Ngako kubona Nkulunkulu kusho kumati kahle kanye nekutsandza buntfu bakhe. (Ef. 1:18) Ngetulu kwekwati buntfu baNkulunkulu, emaKhristu eliciniso ‘angambona Nkulunkulu’ ngekunaka indlela lawasita ngayo. (Jobe 42:5) Singaphindze sibone noma sihlale sinake tibusiso Jehova latetsembisa labo labahlala bahlantekile futsi betsembekile kuye. w18.09 20 ¶13, 15-16

Nangabe senta tintfo lesatiko kutsi tilungile, sitawuhlakanipha futsi Jehova utasibusisa. Kuhlakanipha kufaka ekhatsi kuba nelwati, kodvwa kusho lokungetulu kwekumane wati intfo letsite. Ngisho netintfutfwane tiyakhombisa kutsi tihlakaniphile ngekutsi tilungise kudla kwato ehlobo. (Taga 30:24, 25) Khristu lobitwa ngekutsi “ukuhlakanipha kwaNkulunkulu,” uhlale enta tintfo letijabulisa Babe wakhe. (1 Khor. 1:24; Joh. 8:29) Nkulunkulu utasiniketa umvuzo nangabe sihlale sitfobekile futsi sikhombisa kutsi sihlakaniphile ngekutsi sikhetse kwenta lokulungile. (Mat. 7:21-23) Ngako chubeka usita ekwenteni libandla libe yindzawo lapho khona bonkhe bantfu bangakhonta Jehova ngekutfobeka. Sidzinga sikhatsi kanye nekubeketela kuze sente lokulungile. Loko kutawukhombisa kutsi sitfobekile, futsi nangabe sitfobekile sitawujabula nyalo kuze kube phakadze. w18.09 7 ¶18

Ngemuva kwekutsi Jehova adale bantfu bekafuna kutsi babambisane naye kuze afeze injongo yakhe. Bantfu labetsembekile bangasebenta naJehova ngisho nobe banesono. Nasi sibonelo, sisuke “sitisebenti letikanye naNkulunkulu” nangabe sishumayela tindzaba letimnandzi futsi sifundzisa bantfu. (1 Khor. 3:5-9) Cabanga kutsi kulilungelo lelikhulu kangakanani kubambisana neMdali Lophakeme ekwenteni umsebenti lobaluleke kakhulu! Nobe kunjalo, tikhona letinye tindlela lesingasebenta ngato naJehova ngaphandle kwekushumayela kanye nekwenta bafundzi. Singasebenta naJehova nasisita emalunga emindeni yetfu nemalunga elibandla, nasemukela tivakashi, nasenta imisebenti letsite enhlanganweni yaJehova kanye nalapho sikhulisa sikhatsi lesisicitsa emsebentini waJehova. (Khol. 3:23) Nobe kunjalo, ungakucatsanisi loko longakwentela Jehova kanye naloko labanye labangamentela kona. Khumbula kutsi asilingani ngeminyaka, sinemphilo lengafani, futsi timo tetfu kanye nemakhono etfu akufani. w18.08 23 ¶1-2

Jehova wacinisekisa Habakhuki kutsi utawutitfola timphendvulo temibuto yakhe. Abetawukhululeka ngekushesha kuto tonkhe tintfo lebetimkhatsata. Ecinisweni kufana nekutsi Jehova bekatsi kulomphrofethi: “Beketela, ungetsembe. Ngitakuphendvula ngisho noma kungabonakala kwephuta.” Jehova wamkhumbuta kutsi kunesikhatsi lesibekiwe sekugcwalisa tonkhe tetsembiso takhe. Weluleka Habakhuki kutsi alindzele kugcwaliseka kwetinjongo takhe. Ekugcineni lomphrofethi bekangeke advumateke. Kulindzela Jehova kanye nekulalela loko lakushoko kutawusenta simetsembe futsi sibe nekuthula ngisho noma singabhekana netimo letibuhlungu. Jesu wasicinisekisa kutsi singametsemba Jehova njengobe angumgcini wesikhatsi lomkhulu, futsi waphindze wasiyala kutsi singanaki “tikhatsi nobe emalanga labekiwe” Nkulunkulu langakasitjeli ngawo. (Imis. 1:7) Shengatsi singete salilahla litsemba, kodvwa sitfobeke, silindzele Jehova futsi sibeketele. Kufanele sisisebentise kahle sikhatsi setfu ngekutsi sente konkhe lesingakwenta kute sikhonte Jehova.—Mak. 13:35-37; Gal. 6:9. w18.11 16 ¶13-14

Njengalamanye emaJuda angesikhatsi sakhe, Phetro wakhula ati kutsi bantfu labangesiwo emaJuda bangcolile. Kodvwa kwenteka tintfo letashintja indlela labecabanga ngayo. Nasi sibonelo, Phetro wabona umbono. (Imis. 10:9-16) NjengaPhetro, kufanele sitfobeke futsi sivumele labanye basisite sitihlole kutsi siyababandlulula yini labanye. Yini lenye lesingayenta? Nangabe sivula tinhlitiyo tetfu, sitawuba nelutsandvo kunekutsi sibe nelubandlululo. (2 Khor. 6:11-13) Uvame kutihlanganisa nebantfu bebuve bakho kuphela yini? Nangabe kunjalo, yetama kutihlanganisa nabo bonkhe bantfu. Mema bazalwane nabodzadze labehlukahlukene kutsi basebente nawe ensimini noma ubamemele ekhaya lakho kuze udle nabo. (Imis. 16:14, 15) Nangabe wenta njalo, utabatsandza kakhulu futsi ngeke ubabandlulule. w18.08 9 ¶3, 6; 10 ¶7

Kunalokunye lokwenta kube matima kwehlukanisa lamanye emaKhristu kubantfu belive. Nasi sibonelo, lamanye emaKhristu nakasemaphathini ajayiva aphindze atiphatse ngendlela lengakhombisi kutsi akhonta Jehova. Lamanye afaka titfombe tawo etinhlelweni tekuchumana aphindze asho tintfo letikhombisa kucabanga kwalelive. Ngako angabafundzisa umkhuba lomubi bazalwane nabodzadze labetama kwehluka eveni. (1 Phet. 2:11, 12) Lelive likhutsata “sifiso senyama, sifiso semehlo kanye nekugabisa ngetintfo umuntfu lanato.” (1 Joh. 2:16) Ngesizatfu sekutsi sikhonta Jehova, sikhutsatwa kutsi “sikulahle kungamhloniphi Nkulunkulu netifiso talelive, kodvwa siphile ngengcondvo lebhadlile, ngekulunga, nangekwesaba Nkulunkulu kulelive.” (Thit. 2:12) Nasikhuluma, sidla, sinatsa, indlela lesigcoka ngayo nalesitilungisa ngayo emsebentini nako konkhe lesikwentako kufanele kukhombise kutsi sitinikele ngalokuphelele kuJehova. w18.07 25 ¶13-14

Nangabe sichubeka sinake Jehova, sitawuhlale sinebuhlobo lobuhle naye futsi angeke sikwate ngenca yetintfo letentiwa ngulabanye bantfu. Loku kubaluleke kakhulu nangabe njengaMosi sinemalungelo enhlanganweni yaJehova. Kuliciniso kutsi ngamunye wetfu kufanele asebente kamatima aphindze alalele Jehova kuze asindziswe. (Fil. 2:12) Noma kunjalo, kunyenti Jehova lakulindzele kitsi nangabe sinemalungelo lamanyenti. (Luk. 12:48) Nangabe simtsandza mbamba Jehova, kute lokutasehlukanisa nelutsandvo lwakhe. (Hla. 119:165; Rom. 8:37-39) Kuletikhatsi letimatima shengatsi singahlale sinake Jehova “lohleti esihlalweni sebukhosi” lesisezulwini kuze sente intsandvo yakhe. (Hla. 123:1) Akukafanele sivumele tento talabanye tilimate buhlobo betfu naJehova. w18.07 16 ¶19-20

Sijabula kakhulu ngekutsi tinceku taJehova tenta kukhanya kwato kukhanye emhlabeni wonkhe. Nga-2017, sichube tifundvo teliBhayibheli letingetulu kwa-10 000 000. Cabanga ngetigidzi tebantfu lebetikhona eSikhumbutweni letafundza ngenhlawulo, lokusipho lesibalulekile Jehova lasipha sona. (1 Joh. 4:9) BoFakazi BaJehova emhlabeni wonkhe bakhuluma tilwimi letehlukahlukene. Kodvwa loko akusivimbeli kutsi sidvumise Babe wetfu Jehova ngebunye. (Semb. 7:9) Ngisho noma sikhuluma luphi lulwimi, noma sihlala kuphi, singakhanya “njengetibane eveni.” (Fil. 2:15) Umsebenti wetfu wekushumayela, bunye lesinabo kanye nemuva wekuphutfuma kuletsa ludvumo kuJehova. w18.06 21 ¶1-3

Indlela Jesu laphendvula ngayo yakhombisa kutsi bekakujabulela kakhulu kucoca ngetintfo letimayelana naNkulunkulu kangangekutsi bekangayinaki indlala. Nkulunkulu bekafuna kutsi Jesu ashumayele, futsi kwenta intsandvo yaBabe wakhe lokufaka ekhatsi kushumayela umfati longumSamariya bekufana nekudla kuye. (Joh. 4:32-34) Jakobe naJohane abazange basicondze lesifundvo lesibalulekile. Nabahamba naJesu eSamariya, bafundzi bakhe base bafuna indzawo yekulala kulelidolobha. Bantfu baseSamariya abazange babemukele, ngako Jakobe naJohane batfukutsela base bacela kutsi kubitwe umlilo lovela ezulwini utobhubhisa lonkhe lelidolobha. Jesu wabekhuta kamatima. (Luk. 9:51-56) Kube bekubantfu basedolobheni lakubo eGalile labangazange babemukele, kungenteka boJakobe naJohane bebangeke bente ngendlela lefanako. Kubonakala ngatsi lubandlululo lolwabenta baba nenzondo. Ngekuhamba kwesikhatsi bakujabulela kushumayela kulelidolobha laseSamariya, futsi kungenteka umphostoli Johane watisola ngenca ngesento sakhe.—Imis. 8:14, 25. w18.06 10-11 ¶12-13

Nangabe liciniso leliseBhayibhelini liboshwe lacina etinkhalo tetfu, sitawukhutsateka kutsi siphile ngekuvumelana netimiso talo futsi sikhulume liciniso ngaso sonkhe sikhatsi. Kungani kufanele sigweme kucamba emanga? Kungoba emanga asikhali saSathane lesiphumelelako. Umuntfu locala emanga akatilimati yena kuphela, kodvwa ulimata naloyo lowakholelwako. (Joh. 8:44) Noma sinesono senta konkhe lokusemandleni etfu kutsi sigweme kucala emanga. (Ef. 4:25) Kepha loku akusimelula. Abigail loneminyaka lengu-18 utsi: “Kukhuluma liciniso kungahle kube lukhuni, ikakhulukati nangabe kucamba emanga kungakusita uphume enkingeni.” Kungani kukahle kukhuluma liciniso? Victoria loneminyaka lengu-23 utsi: “Bantfu bangakuhlupha nangabe ukhuluma liciniso futsi umelela loko lokukholelwako. Noma kunjalo, nawukhuluma liciniso utfola tinzuzo letinyenti letifaka ekhatsi kutetsemba, kusondzela kuJehova, kanye nekuhlonishwa bantfu labakutsandzako.” Kuyacaca kutsi kubaluleke kakhulu kutsi uhlale ubophe libhande leliciniso elukhalo. w18.05 28 ¶3, 5

Kubaluleke kakhulu kutsi sonkhe sihlale silindzile ngoba emalanga lesiphila kuwo aya ngekuba mabi kakhulu. Jehova utasitsatsa sinyatselo ngesikhatsi lesifanele. (Mat. 24:42-44) Njengobe sisalindze leso sikhatsi, kufanele sibeketele futsi sihlale silindzile. Fundza liVi laNkulunkulu onkhe malanga futsi ungakuyekeli kuthantaza. (1 Phet. 4:7) Lingisa tibonelo letinhle tebazalwane nabodzadze labatfola injabulo ngekuhlala balindzile nangekwenta kukhanya kwabo kukhanye. Timisele ekukhonteni Jehova, wentele labanye lokuhle futsi utinike sikhatsi sekuba nebazalwane nabodzadze. Nawenta njalo utawujabula futsi sikhatsi sitawendlula ngekushesha. (Ef. 5:16) Kwati kutsi singakhona kukhonta Jehova ngendlela leyemukelekako ngisho noma sinesono kuyakucinisa kukholwa kwetfu. Sijabula kakhulu ngekutsi Jehova usiphe “tipho letibantfu” lokungemadvodza lamadzala elibandla. (Ef. 4:8, 11, 12) Nangabe labadzala belibandla bakuvakashele, lisebentise kahle lelitfuba ubalalelisise kuze uzuze kuhlakanipha eselulekweni sabo. w18.06 24-25 ¶15-18

Jesu watjela balandzeli bakhe kutsi bangagcini nje ngekuba selutsandvweni lwakhe, kepha ‘bachubeke babantfu labatsandvwa nguye.’ Leni? Kudzingeka sicinisele kuze sibe balandzeli baKhristu beliciniso. Jesu wagcizelela sidzingo sekucinisela ngekutsi alisebentise kanyenti ligama lelitsi “chubekani” embhalweni waJohane 15:4-10. Singakhombisa njani kutsi sifuna kuhlale sitsandvwa nguKhristu futsi achubeke asemukela? Ngekutsi sigcine imiyalo yakhe. Jesu usicela kutsi simlalele futsi sente loko naye lakwenta, waze watsi: “Njengobe nami ngiyigcinile imiyalo yaBabe futsi wachubeka angitsandza.” Jesu wasibekela sibonelo lokufanele sisilingise. (Joh. 13:15) Nangabe silalela umyalo waKhristu ngekutsi sishumayele, sikhombisa kutsi siyamtsandza Jehova ngobe imiyalo yaJesu ivela kuNkulunkulu. (Mat. 17:5; Joh. 8:28) Jehova naJesu batawuhlale basitsandza nangabe sikhombisa kutsi siyabatsandza. w18.05 18 ¶5-7

Kunetincumo letinyenti bantfu labasebasha lokufanele batente, lokufaka ekhatsi kukhetsa imfundvo, umsebenti kanye naletinye tintfo. Kuba melula kwenta tincumo nangabe uyati imigomo yakho. Utawusheshe uphumelele nangabe ushesha kutibekela imigomo. Tinkhulungwane tebantfu labasha emabandleni lasemhlabeni wonkhe bayakufanela kunconywa ngalokusuka enhlitiyweni. Batinikele kuJehova futsi banake imigomo yekumkhonta. Bakujabulela kakhulu kuphila futsi ngesikhatsi lesifanako bafundza kulalela sicondziso saJehova kuko konkhe labakwentako. Loko kufaka ekhatsi nekutsi batawushada yini futsi babe nebantfwana. Solomoni wabhala watsi: “Tsemba Simakadze ngayo yonkhe inhlitiyo yakho, ungeyami ekwatini kwakho. Matise kuko konkhe lokwentako, yena uyakucondzisa tindlela takho.” (Taga 3:5, 6) Bantfu labasha labasebandleni lebuKhristu babaluleke kakhulu kuJehova, ubatsandza kakhulu, uyabavikela, abacondzise futsi ababusise. w18.04 26 ¶7; 27 ¶9

Umphostoli Johane bekahola ebandleni lebuKhristu langelikhulu lekucala. Indzaba lemnandzi layibhala mayelana nemsebenti waJesu wekushumayela yawakhutsata kakhulu emaKhristu angelikhulu lekucala, futsi isasikhutsata nalamuhla. LiVangeli laJohane kuphela lelinemavi aJesu latsi lutsandvo luluphawu lwemaKhristu eliciniso. (Joh. 13:35) Tincwadzi taJohane letintsatfu tinalamanye emaciniso laligugu. Nangabe sidvumala ngenca yemaphutsa lesiwentile, asijabuli yini ngekwati kutsi “ingati yaJesu . . . isihlanta kuto tonkhe tono?” (1 Joh. 1:7) Nangabe bonembeza betfu basilahla, akusicinisi lidvolo yini kwati kutsi “Nkulunkulu mkhulu kakhulu kunetinhlitiyo tetfu”? (1 Joh. 3:20) NguJohane kuphela lowabhala kutsi “Nkulunkulu ulutsandvo.” (1 Joh. 4:8, 16) Encwadzini yakhe yesibili neyesitsatfu, Johane wancoma emaKhristu lachubeka “ahamba ecinisweni.”—2 Joh. 4; 3 Joh. 3, 4. w18.04 18 ¶14-15