March

Nasifundza tehluko tekucala tencwadzi yaGenesisi, siyabona kutsi bo-Adamu na-Eva bebajabulela inkhululeko bantfu labafisa kuba nayo lamuhla. Bebakhululekile ebuphuyeni, ekwesabeni kanye nasekucindzetelweni. Bebangakhatsateki ngemsebenti, kudla, kugula kanye nekufa. (Gen. 1:27-29; 2:8, 9, 15) Nakukhulunywa ngenkhululeko, kufanele sikhumbule kutsi nguJehova Nkulunkulu kuphela lonenkhululeko lete imincele. Kungani? Kungenca yekutsi unguMdali wato tonkhe tintfo futsi unguMbusi wendalo yonkhe. (1 Thim. 1:17; Semb. 4:11) Tonkhe tidalwa letisezulwini nasemhlabeni tinenkhululeko lelinganiselwe. Kufanele tati kutsi Jehova Nkulunkulu uneligunya leliphakeme lekubeka imincele lelungile, lefanelekako kanye nalekhombisa kucabangela. Ecinisweni nguloko Jehova lakwenta ekucaleni nakadala bantfu. w18.04 4 ¶4, 6

Kulamalanga ekugcina lesiphila kuwo, sikhona kucinisela ngobe sisitwa nguJehova. (2 Khor. 4:7, 8) Kodvwa ase ucabange ngalabo labete buhlobo lobuhle naJehova. Bakutfola kumatima kuphila kulelive ngaphandle kwelusito lwakhe. NjengaJesu, natsi sibavela buhlungu futsi loko kusenta sibanike “tindzaba letimnandzi.” Ngako babeketelele labo lobafundzisako. Khumbula kutsi lamaciniso tsine lesesiwati kahle bona bebangawati. Futsi linyenti labo liyakutsandza loko labakukholelwako nyalo. Letintfo labatikholelwako batitsatsa njengetintfo letibenta basondzelane nemindeni yabo, emasiko abo kanye nabomakhelwane babo. Ngaphambi kwekutsi silahlise bantfu tinkholelo tabo “letindzala” labatitsandzako, kufanele sicale ngekubasita bafundze emaciniso lamasha futsi bawatsandze—lokutimfundziso teliBhayibheli lebebangatati. Kungaleso sikhatsi lapho bangakhona kulahla tinkholelo tabo letindzala. Kwenta tingucuko letinjalo kungatsatsa sikhatsi lesidze.—Rom. 12:2. w19.03 23 ¶10, 12; 24 ¶13

Sibonelo saJehova lesihle sekukhutsata labanye futsi sibakhombise kutsi siyabatsandza sisikhumbuta kutsi kufanele sifune ematfuba ekukhutsatana. (Joh. 5:20) Siyajabula nangabe umuntfu losikhatsalelako akhombisa kutsi uyasitsandza futsi asincoma ngetintfo letinhle lesitentako. Ngalokufanako, bazalwane betfu nabodzadze labasebandleni kanye nemalunga emindeni yetfu, badzinga sibakhombise kutsi siyabatsandza siphindze sibakhutsate. Nangabe sibancoma labanye, sicinisa kukholwa kwabo futsi sibasita bakhonte Jehova ngekwetsembeka. Batali ngalokukhetsekile kudzingeka bakhutsate bantfwana babo. Nangabe batali babancoma bantfwana babo, futsi babakhombisa kutsi bayabatsandza, basuke babasita kutsi batfutfuke. Emavi latsi: “Ngikwemukele,” akhombisa kutsi Jehova beketsemba kutsi Jesu utawuyenta ngekwetsembeka intsandvo yakhe. Ngenca yekutsi Jehova uyetsemba kakhulu iNdvodzana yakhe natsi kufanele setsembe ngalokuphelele kutsi itatifeza ngekwetsembeka tonkhe tetsembiso taJehova. (2 Khor. 1:20) Kucabanga ngesibonelo saJesu, kutasenta sitimisele kakhulu kufundza ngaye siphindze silingise sibonelo sakhe.—1 Phet. 2:21. w19.03 8 ¶3; 9 ¶5-6

Nasibona kutsi sipho sibaluleke kanganani siyakhutsateka kutsi sikhombise kubonga kuloyo losiphe sona. Ema-Israyeli akazange abonge ngenkhululeko Jehova lawanika yona ngesikhatsi awakhulula ekugcilatweni eGibhithe. Ngemuva kwetinyanga letimbalwa bakhululekile, bacala kufuna kudla kanye netinatfo lebebatitfola eGibhithe futsi bakhonona ngetintfo lebebatiniketwe nguJehova futsi baze bafuna ngisho nekubuyela eGibhithe. Kunekutsi inkhululeko yekukhonta Nkulunkulu weliciniso Jehova ite kucala, banaka kakhulu “inhlanti, emaselwa, nemajoti, nashaladi na-anyanisi, negalikhi.” Akumangalisi kutsi Jehova wabatfukutselela kakhulu bantfu bakhe. (Num. 11:5, 6, 10; 14:3, 4) Loku kusifundzisa sifundvo lesibalulekile! Umphostoli Pawula wakhutsata onkhe emaKhristu kutsi angayibukeli phasi inkhululeko Jehova lasiphe yona ngeNdvodzana yakhe Jesu Khristu.—2 Khor. 6:1. w18.04 9-10 ¶6-7

Sonkhe siyafisa kutsandvwa nekuphatfwa kahle. Singahle sitive singasilutfo futsi site litsemba nangabe singatsandvwa futsi siphatfwa kabi. Jehova uyati kutsi sihlale sikulangatelela kutsandvwa nekuphatfwa kahle. (Hla. 33:5) Singaciniseka kutsi Nkulunkulu wetfu usitsandza kakhulu futsi ufuna siphatfwe kahle. Bufakazi baloko sibubona kahle nasihlolisisa uMtsetfo Jehova lawuniketa sive sema-Israyeli asebentisa Mosi. Nasidadisha umtsetfo waMosi sifike sibone kutsi Jehova Nkulunkulu wetfu usitsandza kangakanani. (Rom. 13:8-10) UMtsetfo waMosi bewusekelwe elutsandvweni ngobe konkhe Jehova lakwentako kusekelwe kulo. (1 Joh. 4:8) Yonkhe imitsetfo Nkulunkulu layiniketa ema-Israyeli beyisekelwe emitsetfweni lemibili leyinhloko—kutsandza Nkulunkulu kanye nekutsandza makhelwane wakho. (Lev. 19:18; Dut. 6:5; Mat. 22:36-40) Lemitsetfo lengetulu kwa-600 isifundzisa lokutsite ngendlela Jehova lasitsandza ngayo. w19.02 20-21 ¶1-4

Jobe bekayinaka indlela labekatiphatsa ngayo nakanebantfu besifazane. (Jobe 31:1) Bekati kutsi akukafaneli ambuke ngenkhanuko umuntfu wesifazane langakashadi naye. Live lesiphila kulo lamuhla ligcwele tilingo tekutiphatsa kabi ngekwelicasi. Sitamlingisa yini Jobe ngekutsi singabanaki ngendlela lengakafaneli bantfu lesingakashadi nabo? Kufanele sikubalekele kubuka titfombe letikhombisa kungcola. (Mat. 5:28) Nangabe onkhe malanga sitifundzisa kutibamba, sitawukhona kuhlala sicotfo. Jobe wakhombisa kutsi uyamlalela Nkulunkulu ngekutsi angawutsandzi umcebo. Bekati kutsi kusono lesikhulu kutsi etsembele etintfweni labenato futsi loko bekutamenta atfole sijeziso lesimatima. (Jobe 31:24, 25, 28) Lamuhla, bantfu balelive bawutsandza kakhulu umcebo. Sitawukhona kuhlale sicotfo nangabe silwela kuba nembono lofanele mayelana nemali kanye netintfo talelive njengobe liBhayibheli lisiyala.—Taga 30:8, 9; Mat. 6:19, 20. w19.02 6 ¶13-14

Kuko konkhe labekwenta, Jesu wakhombisa indlela Jehova lasitsandza ngayo. (1 Joh. 4:8-10) Ngetulu kwako konkhe, Jesu wanikela ngekuphila kwakhe ngekutitsandzela ngenca yetfu. Siyazuza kulolutsandvo Jehova naJesu labasikhombisa lona ngenhlawulo ngisho nome sigcotjiwe noma singuletinye timvu. (Joh. 10:16; 1 Joh. 2:2) Cabanga nangesinkhwa kanye neliwayini lelisetjentiswako kulomkhosi, kokubili kukhombisa lutsandvo nekucabangela Jesu labenako ngebafundzi bakhe. Kanjani? Jesu wakhombisa kutsi bekabatsandza balandzeli bakhe labagcotjwe ngemoya longcwele ngekutsi acalise umkhosi longasiyo inkimbinkimbi lobekufanele bachubeke bawugubha. Njengobe sikhatsi sichubeka, labafundzi labagcotjiwe bekufanele bagubhe Sikhumbuto, ngisho noma babhekene netimo letimatima letifaka ekhatsi kuboshwa. (Semb. 2:10) Bakhona yini kulalela umyalo waJesu? Yebo bakhona! Kusukela ekhulwini lekucala kuze kube ngumanje, emaKhristu eliciniso bekasolo enta konkhe langakwenta kute akhumbule kufa kwaJesu. w19.01 24 ¶13-15

Lenkhululeko ifaka ekhatsi kukhululeka enkholweni yemanga, ekwesweleni lwati, etimfundzisweni letingemanga kanye nakuletinye tintfo. Ekugcineni sitawutfola “inkhululeko lekhatimulako yebantfwana baNkulunkulu.” (Rom. 8:21) Ngisho nanyalo lenkhululeko ungayitfola ngekutsi ‘ugcine emavi aKhristu’ kanye netimfundziso takhe. (Joh. 8:31) Nawenta njalo ‘utawulati liciniso’ ngekutsi ulifundze uphindze uphile ngalo. Kulelive lelibi ngisho nemphilo bantfu labayijabulelako yimfisha futsi kute umuntfu lowatiko kutsi likusasa lisiphatseleni. (Jak. 4:13, 14) Ngako intfo lencono kakhulu longayenta kutsi wente tincumo letitakusita kutsi utfole kuphila “lokungukonakona” lokusho kuphila lokuphakadze. (1 Thim. 6:19) Nkulunkulu akasiphoceleli kutsi simkhonte kodvwa ngitsi lokufanele sitikhetsele. Yenta Jehova abe “sabelo” sakho. (Hla. 16:5) Bonga ngako konkhe ‘lokuhle’ Jehova lakuphe kona. (Hla. 103:5) Ciniseka kutsi Jehova angakwenta ujabule kuze kube phakadze.—Hla. 16:11. w18.12 28 ¶19, 21

Onkhe emaKhristu kufanele alwele kuwuhlonipha umshado njengoba Jehova naJesu bawuhlonipha. Nanobe kunjalo labanye bayehluleka kuwuhlonipha ngobe sibantfu labanesono. (Rom. 7:18-23) Ngako akukafaneli kusimangalise kutsi lamanye emaKhristu angelikhulu lekucala bekanetinkinga tawo. Pawula wabhala: “Umfati akukafaneli ehlukane nendvodza yakhe,” kodvwa ngaletinye tikhatsi loko bekwenteka. (1 Khor. 7:10) Pawula akazange achaze kutsi yini lebeyenta kutsi bantfu behlukane. Kodvwa siyati kutsi inkinga beyingasiko kutsi indvodza itiphetse kabi ngekwelicasi, ngobe kube beyitiphetse kabi, loko bekungaba sizatfu lesicinile sekutsi umkayo ayidivose aphindze ashade nalenye indvodza. Pawula wabhala kutsi umfati longahlali nendvodza yakhe kufanele “ahlale angakashadi nobe aphindze abuyisane nayo.” Bobabili basuke solo banyamanye emehlweni aNkulunkulu. Pawula waphindze wabakhutsata kutsi noma ngabe banatiphi tinkinga, nangabe loshade naye angakaphingi umgomo wenu kufanele ube kubuyisana. Bobabili bangacela lusito lwemiBhalo kulabadzala belibandla. w18.12 13 ¶14-15

Lamuhla Nkulunkulu ufuna kutsi bantfu babe nebuhlobo lobuhle naye baphindze bawente ngekutimisela umsebenti wakhe. (Mat. 28:19, 20; Jak. 4:8) Bantfu labanetisusa letinhle bangetama kusikhweshisa kuJehova. Nasi sibonelo, ase sitsi umphatsi wakho ukukhuphulela esikhundleni lesisetulu futsi ukhuphula nemholo wakho. Yini longayenta nangabe ubona kutsi lesikhundla singakwenta ungasakhoni kwenta tintfo letiphatselene naNkulunkulu? Noma nangabe usafundza, yini longayenta nangabe uniketwa litfuba lekuyotfola imfundvo leyengetiwe khashane nasekhaya. Kuleso simo, ungathantaza yini kuJehova umcele akusite futsi ucele lusito kulabanye, bese wenta sincumo? Kungaba kahle kakhulu kutsi ufundze nyalo kutsi yini Jehova layicabangako ngetimo letinjalo futsi wetame kucabanga ngendlela lacabanga ngayo. Nakungenteka uhlangabetane nesilingo lesifanako esikhatsini lesitako, ungakhona kusincoba. Utawube sewati kutsi yini lokufanele uyente ngoba utawube sewuncumile kutsi utawuhlale unake kukhonta Jehova. w18.11 27 ¶18

Ngesikhatsi asemusha, Solomoni waba yinkhosi yaka-Israyeli. Nakacala kubusa, Jehova watibonakalisa kuye ephusheni watsi: “Cela nome ngabe yini lofuna kutsi ngikuphe yona.” Solomoni watsi: “Mine ngisengumfanyana nje, ngimncane, angati nekwati kutsi ngitawenta kanjani umsebenti wami. . . . Ngako-ke nika inceku yakho inhlitiyo lehlakaniphile . . . kuze yehlulele kahle lesive sakho.” (1 Khos. 3:5-10) Solomoni wakhombisa kutsi abetfobekile ngekutsi acele “inhlitiyo lehlakaniphile.” Kungako Jehova bekamtsandza kakhulu Solomoni! (2 Sam. 12:24) Nkulunkulu wajabula kakhulu ngalesicelo seNkhosi Solomoni, ngako wabese uyiniketa “inhlitiyo lehlakaniphile nengcondvo lehlutekile.” (1 Khos. 3:12) Solomoni watfola tibusiso letinyenti ngesikhatsi etsembekile kuJehova. Waba nelilungelo lekwakha lithempeli lebelibitwa ngeligama laJehova “Nkulunkulu wema-Israyeli.” (1 Khos. 8:20) Bekadvumile ngenca yekuhlakanipha lebekakunikwe nguNkulunkulu. Tonkhe tintfo Nkulunkulu laphefumulela kutsi atisho, tabhalwa etincwadzini letintsatfu teliBhayibheli. Incwadzi yeTaga ingulenye yato. w19.01 14 ¶1-2

Labanye bantfu abafuni kuvumela labanye kutsi babasite bashintje indlela labacabanga ngayo. Batsi: “Ngiticabangela mine.” Ecinisweni batentela bona tincumo futsi batsi loko kuyintfo lenhle. Abafuni kucondziswa noma kuphocelelwa kutsi bafane nalabanye bantfu. Singaciniseka nekutsi kucabanga ngendlela Jehova lacabanga ngayo akusho kutsi ngeke sisakhona kutentela tincumo. UmBhalo wa-2 Khorinte 3:17 utsi: “Lapho umoya waJehova ukhona khona, kuba nenkhululeko.” Jehova usinikete inkhululeko yekutikhetsela luhlobo lwemuntfu lesifuna kuba ngilo. Singatikhetsela tintfo lesititsandzako netintfo lesifuna kutenta. NguJehova lowasidala ngalendlela, kodvwa loko akusho kutsi sinenkhululeko lete imincele. (1 Phet. 2:16) Jehova ufuna kutsi sitfole indlela lacabanga ngayo eVini lakhe liBhayibheli kute sibone kutsi yini lelungile nalengakalungi. w18.11 19 ¶5-6

Nangabe sifuna kuchubeka sihamba ecinisweni, kufanele singatitsandzi kakhulu tintfo talelive. Nasisandza kufundza emaciniso, sabona kutsi kukhonta Jehova kubaluleke kakhulu kunetintfo talelive futsi sajabula nasitiyekela kute sifundze liciniso. Ngekuhamba kwesikhatsi, kungenteka sibone bantfu batsenga tintfo tebuchwephesha takamuva noma tintfo letinyenti talelive. Kungenteka sibone ngatsi siyashiyeka, noma singasanetiswa tintfo lesinato futsi sicale kunaka kutfola tintfo letinyenti talelive singasanaki kukhonta Jehova. Loku kusikhumbuta ngalokwenteka kuDemasi. ‘Bekatsandza kakhulu’ tintfo talelive futsi waze washiya umsebenti labewenta nemphostoli Pawula. Kungani Demasi ashiya Pawula? Kungenteka bekatsandza kakhulu tintfo talelive kunekukhonta Nkulunkulu noma abengasafuni kutidzela kute ente umsebenti labewenta naPawula. Yini lesiyifundzako? Kungenteka besititsandza tintfo talelive. Nangabe singakanaki, singaphindze sicale kutitsandza kakhulu letintfo futsi singasawatsandzi emaciniso. w18.11 10 ¶9

Sathane bekamkhohlisa Eva ngobe bekati kahle kutsi utakufa nakadla lesitselo. Bo-Adamu na-Eva abazange bamlalele Nkulunkulu futsi bagcine bafile. (Gen. 3:6; 5:5) Ngenca yalesono, “kufa kwasakatekela kubo bonkhe bantfu.” Ecinisweni, “kufa kwabusa njengenkhosi . . . , ngisho nakulabo labangonanga njenga-Adamu.” (Rom. 5:12, 14) Nyalo, esikhundleni sekutsi bantfu babe nemphilo lenhle futsi baphile phakadze njengobe kuyinjongo yaNkulunkulu, bantfu sebaphila iminyaka lengu-70 noma-80 kuphela, futsi leyo minyaka igcwele “kuhlupheka nelusizi.” (Hla. 90:10) Lona ngumphumela lobuhlungu wemanga aSathane! Nakakhuluma ngalokwentiwa nguSathane, Jesu watsi: “Akazange ahlale ecinisweni ngobe ute liciniso.” (Joh. 8:44) Sathane solo akalikhulumi liciniso futsi uyachubeka ‘adukisa umhlaba wonkhe’ ngemanga akhe. (Semb. 12:9) Asifuni kudukiswa nguSathane. w18.10 6-7 ¶1-4

Singajabula nangabe sitsatsa sinyatselo sekwakha kuthula nalabanye. Umfundzi Jakobe watsi: “Sitselo sekulunga sihlanyelwa etimeni letinekuthula kulabo labakha kuthula.” (Jak. 3:18) Nangabe singavani nalotsite ebandleni noma emndenini, singacela Jehova asisite sakhe kuthula, futsi utasipha umoya wakhe longcwele lotasisita sikhombise buntfu bebuKhristu futsi sitawujabula. Agcizelela kubaluleka kwekutsatsa sinyatselo kucala kuze sakhe kuthula, Jesu watsi: “Nangabe uletsa sipho elatini, bese uyakhumbula kutsi kukhona lomphetse kabi ngako umnakenu, sishiye khona lapho lesipho sakho, uhambe uye kuye. Cale wakhe kuthula naye, nasewente njalo sewungahamba uyewunikela ngesipho sakho.”—Mat. 5:23, 24. w18.09 21 ¶17

Ngebusuku bakhe bekugcina, Jesu wakhuluma nebafundzi bakhe ngelutsandvo tikhatsi leticishe tibe ngu-30. Watjela bafundzi bakhe kutsi kufanele ‘batsandzane.’ (Joh. 15:12, 17) Nangabe batsandzana kakhulu, labanye bantfu bebatawubona kutsi babafundzi baKhristu sibili. (Joh. 13: 35) Bebangeke bagcine ngekusho kutsi bayatsandzana, kepha bekufanele bakhombise nangetento. Jesu watsi bekufanele babe nelutsandvo lwekutidzela. Watsi: “Kute umuntfu lonelutsandvo lolukhulu kunalolu, kutsi anganikela ngemphefumulo wakhe ngenca yebangani bakhe. Nangabe nigcina imiyalo yami nitawuba bangani bami.” (Joh. 15:13, 14) Tinceku taJehova lamuhla tatiwa ngekuba nelutsandvo sibili, lutsandvo lwekutidzela kanye nebunye. (1 Joh. 3:10, 11) Kuyajabulisa kutsi tinceku taJehova tiyatsandzana ngisho noma tinebuve lobungafani, tikhuluma tilwimi letingafani futsi tikhulele etindzaweni letehlukene. w18.09 12 ¶1-2

Jehova ulindzele kutsi tinceku takhe tiwanakekele emalunga emindeni yato. Nasi sibonelo, kungadzingeka usebente kute utfole imali yekunakekela tidzingo temndeni wakho. Bomake labanyenti bahlala emakhaya kute banakekele bantfwana babo labancane. Labanye bantfwana lesebakhulile kungadzingeka kutsi banakekele batali babo labangasakhoni kutinakekela. Loku kubalulekile. Nangabe kufanele unakekele umndeni, ungahle ungakhoni kucitsa sikhatsi lesinyenti emisebentini yekukhonta Nkulunkulu ngendlela lebewungatsandza kwenta ngayo. Kodvwa ungaphelelwa ngemandla. Jehova uyajabula nangabe uwunakekela umndeni wakho. (1 Khor. 10:31) Nangabe ute umtfwalo wekunakekela umndeni, ungabasita yini bazalwane nabodzadze labagulako, labakhulile nobe labanaletinye tidzingo? Ungabasita yini labo lababanakekelako? Ebandleni lokulo, funa labo labadzinga lusito futsi ubasite. Nawenta njalo utawube usebenta naJehova ekuphendvuleni imithantazo yetinceku takhe.—1 Khor. 10:24. w18.08 24 ¶3, 5

Cabanga ngesibonelo saJosefa. Babe wakhe bekamtsandza kakhulu kwendlula bomnakabo. Bomnakabo baba nemona ngaloko, ngako bancuma kumtsengisa nakaneminyaka lecishe ibe ngu-17. (Gen. 37:2-4, 23-28) Ngemuva kweminyaka lecishe ibe ngu-13, Josefa waba sigcili futsi ngemuva kwesikhatsi waboshwa eGibhithe. Bekakhashane kakhulu nababe wakhe lebekamtsandza. Yini leyasita Josefa kutsi angaphelelwa ngemandla futsi angatfukutseli nanobe abhekene nalesimo? Ngesikhatsi aboshiwe, kungenteka Josefa abecabangisisa ngebufakazi bekutsi Jehova bekambusisa. (Gen. 39:21; Hla. 105:17-19) Kungenteka bekacabanga nangemaphupho lebekawaphupha nakasemncane, futsi loko kwamcinisekisa kutsi Jehova unaye. (Gen. 37:5-11) Mhlawumbe bekavame kuthantaza, atfululele sifuba sakhe kuJehova. (Hla. 145:18) Jehova wayiphendvula imithantazo yaJosefa ngekutsi amcinisekise kutsi ‘utawuba naye’ kuto tonkhe tinkinga labhekana nato. w18.10 28 ¶3-4

Singabehlulela labanye ngenca yekutsi baphuyile noma banjingile. Singamehlulela njani umuntfu ngekutsi uphuyile noma unjingile? Umoya longcwele wenta Solomoni wabhala liciniso lelibuhlungu mayelana nebantfu labanesono, njengobe kuvetiwe kulombhalo walamuhla. Yini lesiyifundza kulombhalo? Nangabe singakacapheli, singafuna kuba bangani bebazalwane labanjingile, singasabanaki nekubanaka bazalwane betfu labaphuyile. Kungani kuyingoti kutsi sicatsanise labanye ngenca yetintfo labanato? Ngobe libandla lingehlukana. Loko bekwenteka emabandleni angelikhulu lekucala futsi umfundzi Jakobe wecwayisa emaKhristu ngako. (Jak. 2:1-4) Akukafaneli sente tintfo letingehlukanisa libandla lesikulo, futsi kufanele sikubalekele kwehlulela labanye ngetintfo labanato. w18.08 10 ¶8-10

Indlela lesiphatsa ngayo emaKhristu lesikanye nawo ikhombisa kutsi siyambonga Jehova ngekusivumela kutsi sibe nebuhlobo lobuhle naye. Bazalwane betfu nabo babantfu baJehova. Nangabe sihlale sikukhumbula loko, sitawuhlale sibaphatsa ngemusa bazalwane nabodzadzewetfu futsi sibatsandza. (1 Thes. 5:15) Jesu watsi kubafundzi bakhe: “Nangabe nitsandzana, bonkhe batawukwati kutsi nibafundzi bami.” (Joh. 13:35) Malakhi watsi Jehova ‘uyalalela futsi uyeva’ nangabe bantfu bakhe bakhulumisana. (Mal. 3:16) “Jehova uyabati labo lababakhe.” (2 Thim. 2:19) Ubona konkhe lesikwentako nalesikushoko. (Heb. 4:13) Jehova uyabona nangabe singabaphatsi ngemusa bazalwane nabodzadze. Nangabe sibanaka labanye, siphana, sicolela futsi sinemusa kulabanye bantfu, singaciniseka kutsi naloko Jehova uyakubona.—Heb. 13:16. w18.07 26 ¶15, 17

Kukuhlakanipha kubambelela kuJehova. Kute lomunye lonemandla lamakhulu kunewaJehova, lohlakaniphile kunaye nalositsandza ngendlela yena lasitsandza ngayo. Ngubani kitsi longafuni kuba seluhlangotsini lwaJehova? (Hla. 96:4-6) Letinye tinceku taJehova tehluleka kuchubeka tiseluhlangotsini lwakhe. Cabanga ngalokwenteka kuKhayini. Bekakhonta Jehova hhayi labanye bonkulunkulu, kepha Jehova akazange amemukele. Enhlitiyweni yakhe bekunemicabango lemibi. (1 Joh. 3:12) Jehova watsi kuKhayini: “Nawenta lokulungile, angeke yini utfole umusa? Kepha nawenta lokubi, sono siyakucatsamela ngasemnyango. Sifuna wena, kodvwa wena kufanele usincobe.” (Gen. 4:6, 7, NW) Ecinisweni, Jehova bekatsi kuKhayini: “Nangabe uphendvuka futsi uba ngakimi, nami ngitawuba seluhlangotsini lwakho.” Kodvwa Khayini akazange asilalele siyalo sakhe. w18.07 17 ¶1, 3; 18 ¶4

Lenye indlela yekwenta kukhanya kwetfu kukhanye kutsi sishumayele tindzaba letimnandzi futsi sente bantfu babe bafundzi. (Mat. 28:19, 20) Ngetulu kwaloko singadvumisa Jehova ngendlela lesitiphatsa ngayo njengemaKhristu. Bantfu lesibashumayelako bayayinaka indlela lesitiphatsa ngayo. Kumoyitela kanye nekubavusela kahle kwenta bantfu basemukele. Jesu watsi kubaphostoli bakhe: “Naningena emtini, babingeleleni labakulowo muti.” (Mat. 10:12) Endzaweni Jesu nebaphostoli bakhe lebebashumayela kuyo, bekuvamile kutsi bantfu babemukele bantfu labangabati emakhaya abo, kodvwa lamuhla sekushintjile. Bantfu bayesaba futsi bayenyanya nangabe bavakashelwa ngumuntfu labangamati, kodvwa bangasemukela kahle nangabe sinebungani futsi sinemusa. Loko kubonakale kubasebentela bazalwane nabodzadze labashumayela etindzaweni letiphitsitelako basebentisa tincola. Ungakhandza kutsi bantfu bangasemukela nangabe simoyitela siphindze sibabingelela kahle. w18.06 22 ¶4-5

Umphostoli Phetro bekavame kutihlanganisa nemaJuda kuphela. Kodvwa ngemuva kwekutsi Jehova asho ngalokucacile kutsi emaKhristu kufanele angakhetsi, Phetro washumayela Khoneliyu lobekalisotja lelingumRoma. (Imis. 10:28, 35) Ngemuva kwaloko, Phetro besekadla futsi atihlanganisa nebantfu betive labangemaKhristu. Kodvwa ngekuhamba kwesikhatsi Phetro wayekela kudla nemaKhristu langasiwo emaJuda, edolobheni lase-Antiyokhi. (Gal. 2:11-14) Pawula waniketa Phetro seluleko lesifanele, futsi Phetro wasemukela. Sikwati njani loko? Ngesikhatsi Phetro abhala incwadzi yakhe yekucala leya e-Asia Minor kumaKhristu langemaJuda nalangesiwo, watsi kubalulekile kutsi sitsandze bonkhe bazalwane betfu. (1 Phet. 1:1; 2:17) Kuyacaca kutsi baphostoli bafundza lokunyenti esibonelweni saJesu sekutsandza “tonkhe tinhlobo tebantfu.” (Joh. 12:32; 1 Thim. 4:10) Bakhona kushintja indlela labebacabanga ngayo ngisho noma loko kwatsatsa sikhatsi. EmaKhristu asendvulo akhona kubona bantfu ngendlela Jehova labebabuka ngayo, ngobe abegcoke “buntfu lobusha.”—Khol. 3:10, 11. w18.06 11 ¶15-16

Lolunye luhlobo lwesivikelo sesifuba lebesigcokwa ngemasotja aseRoma besakhiwe ngensimbi. Lesivikelo sesifuba besenta kudzingeke lihlale lihlola kutsi sisendzaweni yaso yini kuze livikele inhlitiyo yalo kanye naletinye titfo temtimba letibalulekile. Timiso taJehova letilungile tifanana nesivikelo sesifuba ngoba tivikela tinhlitiyo tetfu. (Taga 4:23) Lisotja ngeke lishintjise sivikelo salo lesakhiwe ngensimbi lecinile kuze sitfole sivikelo sesifuba lesakhiwe ngensimbi lengakacini. Ngako natsi angeke singatinaki timiso taJehova letilungile kuze nje sente loko lesicabanga kutsi kulungile. Angeke sikhone kuvikela tinhlitiyo tetfu. (Taga 3:5, 6) Kungako kufanele sihlale sihlola kutsi “sivikelo sesifuba” sisetivikele yini tinhlitiyo tetfu. Nasiwatsandza emaciniso lesiwatfola eVini lakhe, kuba melula kuphila ngetimiso takhe lokufana nekugcoka “sivikelo sesifuba.”—Hla. 111:7, 8; 1 Joh. 5:3. w18.05 28 ¶3-4, 6-7

Ngisho nobe besekuphele sikhatsi lesidze Mosi abahola kahle bantfu baJehova, bachubeka bakhonona, hhayi ngekuba bete emanti, kodvwa baphindze bakhonona ngaMosi, kwaba ngatsi nguye lowente kutsi kube bete emanti. (Num. 20:1-5, 9-11) Mosi watfukutsela kakhulu futsi akazange abe nemusa. Ngisho noma Jehova bekamyale kutsi akhulume nelidvwala, Mosi watsetsisa ema-Israyeli futsi watsi utawenta simangaliso. Wabese ushaya lelidvwala kabili, futsi kwaphuma emanti lamanyenti kakhulu. Wenta liphutsa lelikhulu ngobe bekatigcabha futsi atfukutsele. (Hla. 106:32, 33) Ngenca yekutsi akazange atfobeke kwesikhashana, Mosi akavunyelwanga kutsi angene eVeni Lesetsembiso. (Num. 20:12) Kulesibonelo sitfola tifundvo letibalulekile. Kwekucala, kufanele silwe kamatima kute sihlale sitfobekile. Nangabe singakatfobeki, ngekushesha singatigcabha futsi loko kungasenta sikhulume kabi noma sente tintfo letimbi. Kwesibili, kungahle kube matima kuhlala sitfobekile nangabe sicindzetelekile, ngako kufanele sitimisele kuhlala sitfobekile. w19.02 12-13 ¶19-21

Kulalela umyalo waJesu wekutsi sishumayele kutawuba ngumtfwalo yini? Cha. Ngemuva kwekucoca ngemfanekiso wemvini Jesu watsi njengebamemeteli beMbuso sitawutfola injabulo. (Joh. 15:11) Wasicinisekisa kutsi sitawutfola injabulo naye lanayo. Kanjani? Jesu watifananisa nemvini, futsi bafundzi bakhe wabafananisa nemagala. (Joh. 15:5) Umvini usekela emagala. Emagala atfola kudla nemanti kuphela nangabe anamatsele kulomvini. Ngalokufanako natsi sitawutfola injabulo lefana naleyo Jesu lanayo ngekwenta intsandvo yaBabe wakhe nangabe sihlala simunye ngekutsi silandzele tinyatselo takhe edvute. (Joh. 4:34; 17:13; 1 Phet. 2:21) Hanne losabe lihlahlandlela ngetulu kweminyaka lengu-40 utsi: “Injabulo lengiba nayo nangabe ngibuya emsebentini wekushumayela iyangikhutsata kutsi ngichubeke ngenta umsebenti waJehova.” Ngalokucinisekile injabulo yetfu lesuka ngekhatsi isiniketa emandla ekuchubeka senta umsebenti wekushumayela nangaphasi kwetimo letimatima.—Mat. 5:10-12. w18.05 17 ¶2; 20 ¶14

Kungenteka ngumphostoli Pawula lowabakhutsata kakhulu bazalwane bangelikhulu lekucala. Watfunywa ngumoya longcwele kutsi ayoshumayela kumaJuda, kumaRoma, kumaGriki kanye nakuletinye tive lebetikhonta bonkulunkulu labanyenti. (Gal. 2:7-9) Pawula waya endzaweni leseyibitwa ngekutsi yiTurkey, eGreece kanye nase-Italy kuze acalise emabandla ebuKhristu kubantfu lebebangasiwo emaJuda. LamaKhristu lasemasha bekadzinga kukhutsatwa ngobe ‘bekahlushwa bantfu belive lakubo.’ (1 Thes. 2:14) Umphostoli Pawula wabhalela libandla laseThesalonika cishe nga-50 C.E. watsi: “Ngaso sonkhe sikhatsi siyambonga Nkulunkulu nasinibeka emithantazweni yetfu, ngobe asiwukhohlwa umsebenti wenu wekwetsembeka, kutikhandla kwenu ngelutsandvo, kanye nekucinisela kwenu.” (1 Thes. 1:2, 3) Waphindze watsi: “Chubekani nikhutsatana futsi nakhana.”—1 Thes. 5:11. w18.04 18-19 ¶16-17

Umuntfu lomusha lonaka kakhulu kujabulisa Jehova ucitsa sikhatsi lesinyenti ashumayela. Umsebenti wekushumayela kufanele siwubeke kucala ekuphileni kwetfu ngoba uyaphutfuma. Ungatibekela yini umgomo wekuya njalo ensimini? Ungaba yini lihlahlandlela? Kutsiwani nangabe ungakujabuleli kakhulu kushumayela? Yini lengakusita ukhone kukuchaza kahle loko lokukholelwako? Naku lokubalulekile lokufanele ukwente: Lungiselela kahle futsi ungaphelelwa ngemandla ekucocela labanye loko lokwatiko. Ungatfola injabulo Iemangalisako nawushumayela. Ungacala ngekulungiselela imphendvulo yembuto lovame kubutwa bantfwana lofundza nabo. Kungaba ngulotsi: “Yini lekwenta ukholelwe kuNkulunkulu?” I-website yetfu letsi jw.org inetihloko letentelwe kusita bantfu labasha batitfolele indlela lekahle yekuphendvula lombuto. Utawutfola lishadi lelinesihloko lesitsi “Kungani Ngikholelwa KuNkulunkulu?” Lelishadi litakusita nawulungiselela imphendvulo. w18.04 27 ¶10-11

Ngisho nobe bo-Adamu na-Eva bebakhululekile, bebanayo imingcele. Leminye yayo beyingokwemvelo. Nasi sibonelo, batali betfu bekucala bebati kutsi kute baphile bekumele baphefumule, badle, balale futsi bente naletinye tintfo. Nabenta letintfo, abazange balahlekelwe yinkhululeko ngoba Jehova wabona kutsi nabatenta bebangajabula futsi benetiseke. (Hla. 104:14, 15; Shu. 3:12, 13) Jehova wayala bo-Adamu na-Eva kutsi batalane, bandze, bagcwalise umhlaba futsi bawunakekele. Lomyalo wabancisha inkhululeko yabo yini? Cha, awuzange. Lomyalo bewuniketwe bantfu kute babe nencenye ekugcwalisekeni kwenjongo yeMdali wabo yekwenta umhlaba lolipharadisi ube likhaya lebantfu labete sono futsi labatawuphila kuze kube phakadze. (Hla. 127:3; Isa. 45:18) Kushada kanye nekuba nemndeni bekutabajabulisa kakhulu bo-Adamu na-Eva kuze kube phakadze. w18.04 4-5 ¶7-8

Nangabe sibabeketelela bantfu lesibashumayelako, angeke silindzele kutsi emaciniso eliBhayibheli bawacondze ngalelilanga labaweva ngalo. Cabanga ngendlela lesingabonisana ngayo nemuntfu ngelitsemba lekuphila phakadze epharadisi emhlabeni. Labanyenti bacabanga kutsi kufa kusiphetfo sako konkhe, nobe bacabanga kutsi bonkhe bantfu labalungile baya ezulwini. Lomunye umzalwane usho indlela lemsebentelako. Kwekucala, ufundza Genesisi 1:28. Bese ubuta umnikati welikhaya kutsi Nkulunkulu ufuna kutsi bantfu baphile kuphi futsi etimeni letinjani. Bantfu labanyenti baphendvula batsi, “Ufuna baphile kamnandzi emhlabeni.” Ngemuva kwaloko, lomzalwane ufundza Isaya 55:11, bese ubuta kutsi injongo yaNkulunkulu ishintjile yini. Esikhatsini lesinyenti umnikati welikhaya utsi cha. Ekugcineni lomzalwane ufundza Tihlabelelo 37:10, 11 bese ubuta kutsi likusasa libaphatseleni bantfu. Asebentisa lendlela yekubonisana nebantfu ngemibhalo usite bantfu labanyenti bakucondza kutsi Nkulunkulu solo ufuna kutsi bantfu labalungile baphile phakadze emhlabeni loliPharadisi. w19.03 24 ¶14-15; 25 ¶19

Jehova wakwenta kwacaca kutsi ufuna siyilalele iNdvodzana yakhe futsi sikwente loko lekushoko. Ngelutsandvo, Jesu wafundzisa balandzeli bakhe kutsi kufanele bawente njani umsebenti wekushumayela tindzaba letimnandzi, waphindze wabakhumbuta tikhatsi letinyenti kutsi kufanele bahlale balindzile. (Mat. 24:42; 28:19, 20) Waphindze wabakhutsata kutsi batimisele kakhulu futsi bangaphelelwa ngemandla. (Luk. 13:24) Jesu wabatjela kutsi kubalulekile kutsi batsandzane, bahlale banebunye baphindze balalele imiyalo yakhe. (Joh. 15:10, 12, 13) Jesu waniketa balandzeli bakhe seluleko lesilusito futsi leseluleko sisasebenta nasesikhatsini salamuhla. Jesu watsi: “Wonkhe umuntfu lophila ngeliciniso, uyalilalela livi lami.” (Joh. 18:37) Sikhombisa kutsi siyamlalela nangabe ‘sichubeka sibeketelelana futsi sitsetselelana ngekukhululeka.’ (Khol. 3:13; Luk. 17:3, 4) Siphindze sikhombise kutsi siyamlalela nangabe sishumayela tindzaba letimnandzi ngekutimisela “ngetikhatsi letivumako naletimatima.”—2 Thim. 4:2. w19.03 10 ¶9-10