December

Lobunye buntfu baJesu lobuhle kakhulu, kutsi unelikhono lekucondza tinkinga lesibhekana nato. Ngalesikhatsi alapha emhlabeni, Jesu ‘bekajabula nalabajabulako, akhala nalabakhalako.’ (Rom. 12:15) Nasi sibonelo, ngemuva kwekutsi bafundzi bakhe labangu-70 babuye nembiko lomuhle futsi lojabulisako wemsebenti wekushumayela, naJesu “wagcwala injabulo kanye nemoya longcwele.” (Luk. 10:17-21) Ngakulokunye, ngesikhatsi abona indlela labanye lebebatsintseke ngayo ngekushona kwaLazaru, “naye walila futsi wadzabuka.” (Joh. 11:33) Yini leyenta lendvodza lebeyite sono kutsi ibe nemusa futsi ibavele bantfu labanesono? Kwekucala, Jesu bekabatsandza kakhulu bantfu. (Taga 8:31) Loko kwamenta wetayelana kakhulu nendlela bantfu labacabanga ngayo. Umphostoli Johane uyichaza ngalendlela: “Abelati lingekhatsi lemuntfu.”—Joh. 2:25. w19.03 20 ¶1-2

Sathane wabangela kutsi Jobe alahlekelwe ngito tonkhe tintfo labenato, umcebo, tisebenti futsi wona lidvumela lakhe. Wahlasela umndeni wakhe futsi wabulala bantfwana bakhe labalishumi. Waphindze wahlasela Jobe ngekumbangela kutsi abe nesifo lesibuhlungu, waba nematfumba wonkhe umtimba. Umfati waJobe bekakhatsateke kakhulu futsi aselusizini kangangekutsi watjela Jobe kutsi aketfuke Nkulunkulu futsi afe. Jobe besekafisa kufa, kodvwa wachubeka acotfo kuJehova. Sathane wabese wetama kusebentisa lenye indlela kute ahlasele Jobe. Wasebentisa bangani baJobe labatsatfu. Lamadvodza bekahlale avakashela Jobe, kodvwa akazange amdvudvute, kunaloko bekanelunya futsi amsola. Bekamtjela kutsi nguNkulunkulu lobekambangela kuhlupheka futsi bekangenandzaba nebucotfo bakhe. Aphindze atsi Jobe bekahlupheka ngenca yekutsi abengumuntfu longakalungi!—Jobe 1:13-22; 2:7-11; 15:4, 5; 22:3-6; 25:4-6. w19.02 4 ¶7-8

Ngaletinye tikhatsi kukahle kwesaba. Sibonelo saloko kutsi kufanele sesabe kudvumata Jehova. Bo-Adamu na-Eva bavukela Jehova. Bebangeke bamvukele kube bebesaba kumdvumata. Ngemuva kwaloko, emehlo abo avuleka base bayabona kutsi bonile. Bendlulisela sono nekufa kubantfwana babo. Ngenca yekutsi bese bonile, baba nemahloni ngekutsi bebahamba ngcunu futsi base bayembatsa. (Gen. 3:7, 21) Ngisho noma sikwesaba kudvumata Nkulunkulu, akudzingeki sikwesabe kufa. Jehova usentele indlela yekutfola kuphila lokuphakadze. Nangabe sente sono, Jehova utasitsetselela nasiphendvuka ngebucotfo. Utasicolela ngobe sinekukholwa enhlawulweni yeNdvodzana yakhe. Lenye indlela lebalulekile lesikhombisa ngayo kutsi siyakholwa, kutsi sitinikele kuJehova futsi sibhajatiswe.—1 Phet. 3:21. w19.03 5-6 ¶12-13

Ema-Israyeli bekanetizatfu letinyenti tekukhombisa kubonga. Akhululeka ekugcilatweni baseGibhithe ngemuva kwekutsi Jehova aletse Tishayo Letilishumi. Nkulunkulu wawasindzisa enhlekeleleni ngekutsi abhubhise libutfo laseGibhithe eLwandle Lolubovu. Ema-Israyeli ajabula kakhulu aze ahlabela nengoma yekudvumisa Jehova ngenca yekuncoba kwawo. Kepha achubeka abonga yini ngetintfo Jehova labekawentele tona? Atsi nakahlangana netinkinga, ngekushesha ema-Israyeli atikhohlwa tonkhe tintfo Jehova labekawentele tona. Loko kwakhombisa kutsi ema-Israyeli abengabongi. (Hla. 106:7) Kanjani? LiBhayibheli litsi: “Sonkhe sive sema-Israyeli sakhonona sisola boMosi na-Aroni ehlane.” Ecinisweni lesive besikhonona ngaJehova. (Eks. 16:2, 8) Jehova wadvumala ngalesento sema-Israyeli. Ngemuva kwaloko, Jehova wabiketela kutsi sonkhe lesive besitawubhujiswa ehlane ngephandle kwaJoshuwa naKhalebi.—Num. 14:22-24. w19.02 17 ¶12-13

Jesu akazange afune kunakwa ngalokungenasidzingo ngekutsi afune kutsi kwentiwe umkhosi loyinkimbinkimbi wekukhumbula kufa kwakhe. Esikhundleni saloko, watjela bafundzi bakhe kutsi kufanele bamkhumbule kanye ngemnyaka ngekwenta sidlo lesimelula. (Joh. 13:15; 1 Khor. 11:23-25) Loko bekufaneleka futsi kukhombisa kutsi Jesu utfobekile. Kuyasijabulisa kutsi kutfobeka kubuntfu lobuhamba embili beNkhosi yetfu yasezulwini. (Fil. 2:5-8) Singakulingisa njani kutfobeka kwaJesu? Ngekutsi sinake kakhulu tidzingo talabanye kunetetfu. (Fil. 2:3, 4) Cabanga ngebusuku bekugcina Jesu alapha emhlabeni. Jesu bekati kutsi masinyane bekatakufa kabuhlungu; nanobe kunjalo, bekakhatsateke kakhulu ngebaphostoli bakhe labatsembekile, lebebatawulila ngekufa kwakhe. Ngako ngebusuku bekugcina wabayala, wabakhutsata futsi wabacinisekisa. (Joh. 14:25-31) Ngekutfobeka, Jesu wakhombisa kutsi uyikhatsalela kakhulu inhlalakahle yalabanye kuneyakhe. Leso sibonelo lesihle kakhulu lasibekela sona. w19.01 21 ¶5-6

Kuyenteka yini ushaywe luvalo njalo nawucabanga kuphakamisa? Nangabe kunjalo, awusiwedvwa. Liciniso likutsi labanyenti betfu baba neluvalo nabaphendvula. Akusikubi kutiva ngaleyondlela. Loko kukhombisa kutsi utfobekile futsi ubona labanye njengalabakhulu kunawe. Jehova uyabatsandza bantfu labatfobekile. (Hla. 138:6; Fil. 2:3) Kodvwa ufuna kutsi umdvumise uphindze ukhutsate bazalwane nabodzadze emihlanganweni. (1 Thes. 5:11) Uyakutsandza futsi utakuniketa sibindzi losidzingako. Cabanga ngaletinye tikhumbuto letiseBhayibhelini. LiBhayibheli litsi sonkhe siyona ngaloko lesikushoko kanye nendlela lesikusho ngayo. (Jak. 3:2) Jehova uyati kutsi ngaletinye tikhatsi sitawenta emaphutsa futsi nebazalwane betfu bayakwati loko. (Hla. 103:12-14) Bangumndeni wetfu futsi bayasitsandza. (Mak. 10:29, 30; Joh. 13:35) Bayati kutsi ngaletinye tikhatsi tintfo lesitishoko sisuke singakacondzi kutisho. w19.01 8 ¶3; 10-11 ¶10-11

Loko akusimelula kulelive lesiphila kulo. Loko akusho kutsi ngeke nikhone kukwenta. Jehova ufuna nikujabulele kuphila futsi nenetiseke. Ngelusito lwaJehova, ningaphumelela hhayi nanisebasha kuphela kodvwa nasemphilweni yenu yonkhe. Kuze sikucondze loku, cabanga ngesibonelo lesingasifundza kuloko lokwasita ema-Israyeli kutsi angene eVeni Lesetsembiso. Ngesikhatsi ema-Israyeli asatawufika eVeni Lesetsembiso, Jehova akazange awatjele kutsi aceceshelwe imphi. (Dut. 28:1, 2) Kunaloko wawatjela kutsi kufanele alalele imitsetfo yakhe futsi ametsembe. (Josh. 1:7-9) Ngekwembono webantfu, leseluleko besingabonakala site ingcondvo. Kepha bekuseluleko lebesisihle kakhulu ngoba Jehova wawasita ancoba sive semaKhenani. (Josh. 24:11-13) Kuliciniso kutsi kufanele sibe nekukholwa kute silalele Jehova, futsi nasinekukholwa lokunjalo sitawuhlale siphumelela. Leliciniso alikashintji njengoba sikhatsi sihamba. Nalamuhla solo libalulekile. w18.12 25 ¶3-4

Labanye bakhutjwa lushintjo endleleni lebesicondza ngayo umBhalo lotsite. Labanye batihlanganisa netihlubuki kanye nalabanye labakhuluma emanga ngetinkholelo tetfu. Leti nguletinye tetizatfu letibenta ‘bakhweshe’ kuJehova kanye nasebandleni. (Heb. 3:12-14) Abazange balingise sibonelo semphostoli Phetro ngekutsi bachubeke banekukholwa futsi betsembe Jesu. Labanye balishiya kancane kancane liciniso bangakanaki. Umuntfu lowenta njalo ulingisa sikebhe lesikhwesha kancane kancane elusetseni lwemfula. LiBhayibheli litsi bantfu labenta njalo ‘bayaphambuka.’ (Heb. 2:1) Ngalokuvamile, umuntfu lophambukako usuke angakacondzi kwenta njalo. Kodvwa usuke avumele buhlobo bakhe naJehova bube butsakatsaka futsi ngekuhamba kwesikhatsi bungaphela. w18.11 9 ¶5-6

Utimisele yini kutfola kuceceshwa lokwengetiwe kuze ukhonte Jehova sikhatsi lesigcwele? Mhlawumbe ungafaka sicelo sekuya eSikolweni SebaVangeli BeMbuso. Lesikolwa sicecesha bazalwane nabodzadze labavutsiwe nalabatimisele kukhonta Jehova sikhatsi sonkhe futsi inhlangano yaJehova ingabasebentisa kuze bente lokunyenti emsebentini wakhe. Labo labafaka ticelo kulesikolwa kufanele batimisele kuyokhonta nobe ngabe ngukuphi lapho batawabelwa khona nabaphotfula. Utimisele yini kusebentisa lelitfuba kuze wentele Jehova lokunyenti? (1 Khor. 9:23) Ngenca yekutsi sibantfu baJehova, siyephana, silungile, sinemusa futsi siyabatsandza labanye bantfu. Loku kusenta sibe nekuthula futsi sijabule. (Gal. 5:22, 23) Ngisho nobe uhlangabetana natiphi timo, utawuhlala ujabulile ngekutsi ulingise Jehova ngekupha labanye futsi uchubeke usisebenti lesikanye naye!—Taga 3:9, 10. w18.08 27 ¶16-18

Lomunye angahle atibute: ‘Sikhona yini sizatfu lesingenta umKhristu adivose aphindze ashade nalomunye umuntfu?’ Naka kutsi Jesu watsi: “Nobe ngubani lodivosa umkakhe bese ushada nalomunye, uyaphinga, futsi nangabe umfati adivosa indvodza yakhe bese ushada nalenye, uyaphinga.” (Mak. 10:11, 12; Luk. 16:18) Kuyacaca kutsi Jesu bekawuhlonipha umshado futsi bekafuna nalabanye bawuhloniphe. Indvodza ledivosa umkayo lowetsembekile (noma umfati lodivosa umyeni wakhe lowetsembekile) iphindze ishade nalomunye bekufana nekutsi iyaphinga. Kuliciniso loku ngoba kushiya umuntfu loshade naye akuwucedzi umshado. KuNkulunkulu bantfu labashadile solo ‘banyamanye’ ngisho noma badivosile. Kwenteka njani loko? Endvulo, umfati lodivosiwe bekangahle ative aphocelelekile kutsi aphindze ashade ngenca yetinkinga tetimali. Kwenta loko bekufanana nekuphinga. w18.12 11 ¶8-9

Kucoca naJehova kwenta Habakhuki waba nekuthula. Loko kwamenta wakhetsa kulindzela Jehova ngekuciniseka. Habakhuki wakhombisa kutsi bekatimisele ngesikhatsi atsi: “Ngiyakulilindzela ngekubeketela lilanga lesehlakalo.” (Hab. 3:16) Yini lesiyifundza kuloko Habakhuki labetimisele kukwenta? Kwekucala, sifundza kutsi kufanele singayekeli kuthantaza kuJehova ngisho noma sehlelwa ngutiphi timo. Kwesibili, kufanele silalele Jehova kuko konkhe lasitjela kona asebentisa liVi lakhe liBhayibheli kanye nenhlangano yakhe. Kwesitsatfu, kufanele silindzele Jehova ngekubeketela, setsembe kutsi utasikhulula ngesikhatsi sakhe. Nangabe sichubeka sitfululela sifuba setfu kuJehova, simlalelisisa siphindze simlindzele ngekubeketela njengobe kwenta Habakhuki, natsi sitawuba nekuthula lokutasisita kutsi sicinisele. Litsemba lesinalo litasisita sibeketele futsi loko kutawusenta sijabule noma singahlangabetana nasiphi simo. Litsemba lisenta siciniseke kutsi Babe wetfu losezulwini utasitsatsa sinyatselo.—Rom. 12:12. w18.11 15-16 ¶11-12

Jehova utiva njani ngekukhuba labanye? Jesu watsi: “Nobe ngubani lowenta kutsi lomunye walaba labakholwako labanjengebantfwana akhubeke, bekungaba ncono kutsi kuboshelwe litje lelikhulu lekusila entsanyeni yakhe, lelinjengalelo leligucuguculwa yimbongolo, bese ujikwa elwandle.” (Mak. 9:42) Lamavi aveta kutsi Jesu uva buhlungu nangabe bantfu bakhuba labanye. Njengoba Jesu bekanebuntfu lobufana nebaBabe wakhe, singaciniseka kutsi naJehova utiva ngendlela lefanako ngebantfu labakhuba balandzeli baJesu. (Joh. 14:9) Sitiva ngendlela Jehova naJesu labativa ngayo yini ngekukhuba labanye? Siyawemukela yini umbono wabo? Yini levetwa nguloko lesikwentako? Nasi sibonelo, kungenteka sitsandza sitayela lesitsite sekugcoka nekutilungisa. Kodvwa yini lesingayenta nangabe sitayela lesitsite singabakhuba labanye ebandleni noma sibente babe nemicabango yekutiphatsa kabi? Kutsandza bazalwane kutasikhutsata yini kutsi sitiyekele titayela letinjalo? w18.11 25 ¶9-10

Kubaluleke ngani kutsi sonkhe sihlale sicotfo? Sidzinga kuba cotfo ngobe Sathane wabekela Jehova insayeya futsi wenta lokufanako nakitsi lamuhla. Ensimini yase-Edeni lengilosi levukelako yahlambalata Jehova ngekutsi itsi Jehova unguMbusi lomubi, lonebugovu futsi longaketsembeki. Kuyadzabukisa kutsi bo-Adamu na-Eva basekela Sathane bavukela Jehova. (Gen. 3:1-6) Njengobe bebahlala ensimini yase-Edeni, bebanematfuba lamanyenti ekucinisa buhlobo babo naJehova. Kodvwa ngesikhatsi Sathane abalinga bebangamtsandzi ngalokujulile Jehova futsi loko kusenta sitibute: Lutsandvo lungabenta yini bantfu bahlale betsembekile kuJehova? Ngalamanye emavi, bantfu bangakhona yini kukhombisa kutsi betsembekile kuNkulunkulu? Kwaphakama umbuto lofanako nasendzabeni yaJobe. (Jobe 1:8-11) Jobe bekanesono njengatsi. Bekawenta emaphutsa. Noma kunjalo, Jehova bekamtsandza Jobe ngoba bekacotfo. w19.02 3-4 ¶6-7

Jesu wabekisa ngalomtsengisi kute akhombise kutsi liciniso leMbuso waNkulunkulu liligugu kanganani kulabo labalitfolako. Lomtsengisi wahamba etindzaweni letehlukene afuna ematje laligugu futsi watfola linye. Lelitje beliligugu kakhulu kangangekutsi ‘ngekushesha watsengisa’ konkhe labenako wase uyalitsenga. (Mat. 13:45, 46) Liciniso lesalitfola ngeMbuso waNkulunkulu kanye nalamanye emaciniso laligugu lesawafundza eVini laNkulunkulu aligugu kakhulu kitsi, kungako sakhetsa kudzela tonkhe tintfo kute siwatfole. Nangabe liciniso liligugu kitsi, ngeke size silishiye. (Taga 23:23) Lokubuhlungu kutsi bantfu labanyenti balishiyile liciniso leliligugu labalitfola ngenca yekutsi alisasiyo intfo lebalulekile kubo. Shengatsi singete sakwenta loko. Kute sikhombise kutsi liciniso liligugu kitsi, kufanele singalitsengisi, kodvwa silandzele sicondziso lesiseBhayibhelini lesitsi sichubeke ‘sihamba ecinisweni.’ (3 Joh. 2-4) Kuhamba ecinisweni kusho kuphila ngekuvumelana nalokushiwo liBhayibheli. w18.11 9 ¶3

Ema-Israyeli atjelwa kutsi angayihlaseli iJerikho. Esikhundleni saloko, ayalwa kutsi atungelete lelidolobha kanye ngelilanga kuze kuphele emalanga lasitfupha, kodvwa ngelilanga lesikhombisa atjelwa kutsi alitungelete tikhatsi letisikhombisa. Lamanye emasotja kungenteka acabanga: ‘Simosha sikhatsi kanye nemandla etfu!’ Kodvwa Umholi wema-Israyeli longabonakali bekakwati kahle loko labekwenta. Kukholwa kwema-Israyeli kwacina nakalalela leticondziso, futsi akuzange kudzingeke kutsi alwe nemasotja aseJerikho. (Josh. 6:2-5) Yini lesiyifundzako? Ngaletinye tikhatsi ngeke siyicondze indlela lensha inhlangano yaJehova letsi sente ngayo tintfo. Nasi sibonelo, kungenteka ekucaleni asizange sicondze kutsi kungani kufanele sisebentise tintfo tebuchwephesha nasidadisha, nasenta umsebenti wekushumayela kanye nasemihlanganweni. Nyalo sesiyatibona tinzuzo tekusebentisa tintfo tebuchwephesha. Nasibona imiphumela lemihle yekutisebentisa, siba nekukholwa lokucinile kanye nebunye ngisho noma besingabata ekucaleni. w18.10 23 ¶8-9

Bantfu baseGalile bebafuna kutsi Jesu abe yinkhosi yabo ngenca yaloko lebebakulindzele kuMesiya, futsi nguloko nebafundzi bakhe lebebakulindzele kuye. Kungenteka bebacabanga kutsi Jesu bekatawuba ngumholi lokahle ngobe bekasikhulumi lesihle, elapha labagulako futsi bekondla ngisho nebantfu labalambile. Ngemuva kwekutsi Jesu ondle bantfu labangetulu kwa-5 000, bantfu bamangala futsi Jesu bekakwati loko bebakucabanga. “Jesu ati kutsi besebeta batewumbamba kuze bambeke abe yinkhosi, wesuka waya entsabeni ayedvwa.” (Joh. 6:10-15) Ngelilanga lelilandzelako simo besesincono, ngako Jesu wabese uyabachazela kutsi bekangaketeli kutobanika tintfo lebebatidzinga kepha beketele kutobafundzisa ngeMbuso waNkulunkulu. Watsi kubo: “Ningabosebentela kudla lokuphelako, kodvwa sebentelani kudla lokuhlala kuze kube phakadze.”—Joh. 6:25-27. w18.06 4 ¶4-5

Jesu bekabatsandza bantfu futsi loko kwamenta wabahawukela. Bekacondza kutsi bativa njani bantfu labafanana nemhlanga lofecekile noma intsambo yesibane lebhunyako. Kungako Jesu abecabangela, anemusa futsi ababeketelela bantfu. (Mak. 10:14) Kuliciniso kutsi site kuhlakanipha kanye nelikhono lekufundzisa Jesu lebekanalo. Kodvwa kufanele sibacabangele bantfu lesibashumayelako. Loko kufaka ekhatsi indlela lesibakhulumisa ngayo, kutsi sibakhulumisa nini, kanye nekutsi sibakhulumisa sikhatsi lesingakanani. Lamuhla, tigidzigidzi tebantfu ‘tiphetfwe kabi futsi tihlakatekile’ ngenca yekukhohlakala lokukutekutsengiselana, kutepolitiki kanye nakubaholi benkholo. (Mat. 9:36) Ngesizatfu saloko, bantfu labanyenti abetsembi muntfu futsi sebalahle nelitsemba. Kungako kufanele sisebentise emagama lakahle siphindze sikhulume ngendlela letabakhombisa kutsi sinemusa futsi siyabakhatsalela. Bantfu labanyenti balalela umlayeto lesiwushumayelako hhayi ngenca yekutsi sisebentisa liBhayibheli kuphela kodvwa nangenca yekutsi sibakhatsalela mbamba futsi siyabahlonipha. w18.09 31-32 ¶13-14

Nangabe sitinakisisa tintfo letiphatselene naNkulunkulu, sitawubona kutsi kudzingeka simati Nkulunkulu nekutsi siyaludzinga lusito lwakhe nesicondziso sakhe. Singakukhombisa njani loko? Kwenta loko kutawusenta sijabule futsi sitawuba nekukholwa lokucinile etetsembisweni taJehova. (Thit. 2:13) Kute sitfole injabulo lehlala njalo, kubaluleke kakhulu kutsi sibe nebuhlobo lobucinile naJehova. Umphostoli Pawula waphefumulelwa kutsi abhale kutsi: “Hlalani nijabula eNkhosini [Jehova]. Ngiyaphindza futsi ngitsi, jabulani!” (Fil. 4:4) Kuze sibe bangani baJehova, kufanele sicele kuhlakanipha kwakhe. (Taga 3:13, 18) Kuze sihlale sijabulile, kubaluleke kakhulu kutsi sichubeke sikusebentisa lesikufundza eBhayibhelini. Jesu wagcizelela kubaluleka kwaloku ngesikhatsi atsi: “Niyajabula nanitati letintfo futsi nitenta.” (Joh. 13:17; Jak. 1:25) Loko kubaluleke kakhulu nangabe sifuna kuba nebuhlobo lobuhle naNkulunkulu futsi sihlale sijabulile. w18.09 18 ¶4-6

Ephafrasi bekabati kahle bazalwane bakhe futsi bekabakhatsalela kakhulu. Pawula watsi Ephafrasi “siboshwa lesikanye” naye, ngako naye bekahlangabetana netinkinga. (Flm. 23) Kodvwa bekakhatsateka ngalabanye futsi kukhona bekakwenta kute abasite. Ephafrasi wabathantazela bazalwane bakhe nabodzadze, futsi bekaze ababite nangemagama. Nawe ungenta lokufanako. Kubathantazela kungaba nemiphumela lemihle. (2 Khor. 1:11; Jak. 5:16) Cabanga ngebantfu longabasho ngemagama nawubathantazela. Ungacabanga ngebazalwane nabodzadze noma labanye bantfu lababhekene netinkinga. Kungenteka kufanele bente tincumo letimatima noma babhekene netilingo. Ungaphindze uthantazele labashonelwe bantfu lababatsandzako, labo labasindze etinhlekeleleni nasetimphini kanye nalabo labanetinkinga tetimali. Bazalwane labanyenti nabodzadze bayayidzinga imithantazo yetfu futsi bangazuza kuyo. w18.09 5-6 ¶12-13

Pawula bekangasho kupha ngetintfo letibonakalako kuphela, kodvwa bekasho nekukhutsata, kucondzisa kanye nekusita labo labadzinga lusito. (Imis. 20:31-35) Pawula wasifundzisa ngemavi nangetento kutsi kubalulekile kupha labanye sikhatsi setfu, emandla etfu, sibanake siphindze sibatsandze. Bacwaningi batfole kutsi kupha kwenta bantfu bajabule. Lesinye sihloko satsi bantfu bajabula kakhulu nangabe bentela labanye tintfo letinhle. Bacwaningi batsi kuphila kwetfu kuba nenjongo nasisita labanye. Tati titsi bantfu benta umsebenti wekuvolontiya kute bative baphilile futsi bajabulile. Loko akumangalisi ngoba Jehova uMdali wetfu lositsandzako utsi kupha kukwenta ujabule.—2 Thim. 3:16, 17. w18.08 22 ¶17-18

Siphrofetho sa-Isaya lesimayelana neNkhosi yetfu Jesu Khristu siyasikhutsata futsi sisiniketa litsemba. Isaya watsi Jesu “angeke ehlulele ngalakubona ngemehlo akhe, nome ente sincumo ngalakuve ngetindlebe takhe kodvwa labeswele uyawubehlulela ngekwemtsetfocotfo.” (Isa. 11:3, 4) Kungani loku kusikhutsata? Kungobe siphila eveni leligcwele lubandlululo futsi bantfu behlulela labanye ngaloko labakubonako. Sonkhe silangatelela kuba nemehluleli lote sono, longeke asehlulele ngalakubona ngemehlo. Onkhe malanga, siba nemibono letsite ngalabanye. Kodvwa njengoba sinesono, asikhoni kuba nemibono lekahle ngebantfu njengobe kwenta Jesu. Tintfo lesitibonako tingasenta sehlulele labanye. Ngesikhatsi Jesu alamhlabeni, wasiyala kutsi singehluleli ‘ngalesikubona ngaphandle,’ kodvwa sehlulele “ngendlela lelungile.” Kuyacaca kutsi Jesu ufuna sifane naye, singabehluleli labanye ngalesikubonako. w18.08 8 ¶1-2

Kuliciniso kutsi asiliva livi laJehova lelivela ezulwini. Nobe kunjalo, Jehova usinikete liVi lakhe liBhayibheli kute asicondzise. Ngetulu kwaloko, umoya waJehova ukhutsata “sisebenti lesitsembekile” kutsi sinikete tinceku takhe imfundvo levela kuye. (Luk. 12:42) Tinyenti kakhulu tincwadzi letishicilelwe naletitfolakala ku-website yetfu, ema-video, kanye netincwadzi letitsetjuliwe letisisita sibe nekukholwa lokucinile. Shengatsi singahlale siwakhumbula emavi Jehova lawatjela iNdvodzana yakhe ngesikhatsi isemhlabeni. Emavi aJehova laseBhayibhelini kufanele asicinisekise kutsi Jehova unemandla futsi utawulungisa umonakalo lobangelwe nguSathane kanye nebantfu balelive lelibi. Shengatsi singatimisela kuhlale sililalela liVi laJehova. Nasenta njalo, sitawukhona kubeketelela noma ngutiphi tinkinga lesinato kanye naleto lesitawubhekana nato esikhatsini lesitako. Naku liBhayibheli lelisikhumbuta kona: “Kudzingeka nicinisele khona kutewutsi nasenente intsandvo yaNkulunkulu, nitfole kugcwaliseka kwesetsembiso.”—Heb. 10:36. w19.03 13 ¶17-18

Ngenca yekutsi Mosi besekahole sive sema-Israyeli sikhatsi lesidze, kungenteka Joshuwa bekatibuta kutsi batamemukela yini yena kutsi abe ngumholi wabo. (Dut. 34:8, 10-12) Nayikhuluma ngembhalo waJoshuwa 1:1, 2, lenye incwadzi itsi: “Lenye yetintfo letimatima kakhulu naletiyingoti kubantfu kungesikhatsi kubekwa umholi lomusha.” Kungenteka Joshuwa wesaba kakhulu nakanikwa lesabelo, kodvwa ngemuva kwemalanga lambalwa wenta loko Jehova lakusho. (Josh. 1:9-11) Bekametsemba kakhulu Jehova. Njengobe liBhayibheli lisho, Jehova wamcondzisa Joshuwa kanye nesive sema-Israyeli asebentisa ingilosi. Kunengcondvo kucabanga kutsi lengilosi bekunguliVi, loyiNdvodzana yaNkulunkulu lelitibulo. (Eks. 23:20-23; Joh. 1:1) Jehova wasita sive sema-Israyeli kutsi sivumelane nalolushintjo njengobe besekunguJoshuwa umholi waso lomusha. w18.10 22-23 ¶1-4

Jehova uyabati labo labamkhonta ngenhlitiyo yonkhe futsi ubhala emagama abo ‘encwadzini yesikhumbuto.’ Kukhona lokufanele sikwente nangabe sifuna emagama etfu ahlale ‘asencwadzini yesikhumbuto’ yaJehova. Malakhi watsi kufanele sesabe Jehova siphindze sihloniphe libito lakhe. Nangabe sikhonta lomunye umuntfu noma letinye tintfo, emabito etfu atawususwa kulencwadzi yaJehova. (Eks. 32:33; Hla. 69:28) Akukeneli nje kutsi setsembise kwenta intsandvo yaJehova futsi sibhajatiswe emantini. Loku sikwenta kanye kuphela, kodvwa Jehova simkhonta ngaso sonkhe sikhatsi. Tento tetfu kufanele tikhombise kutsi sikhonta Jehova, yingci nje nasisaphila.—1 Phet. 4:1, 2. w18.07 23-24 ¶7-9

Loku angeke nje kumane kutentakalele. Kufanele “sichubekele ekuvutfweni,” lokusho kutsi sisebente kamatima. Kuvutfwa kufaka ekhatsi kuba nelwati lolunyenti kanye nekucondza. Kungako sihlale sikhutsatwa kutsi sifundze liBhayibheli onkhe malanga. (Hla. 1:1-3) Utibekele yini umgomo wekulifundza onkhe malanga? Kwenta njalo kutakusita kutsi uyicondze kancono imitsetfo netimiso taJehova, futsi ulati kahle liVi laNkulunkulu. Umyalo lobalulekile emaKhristu lanawo kutsi kufanele atsandzane. Jesu watjela bafundzi bakhe kutsi: “Nangabe nitsandzana, bonkhe batawukwati kutsi nibafundzi bami.” (Joh. 13:35) Jakobe umnakabo Jesu watsi lutsandvo ‘ngumtsetfo webukhosi.’ (Jak. 2:8) Pawula watsi: “Lutsandvo lukugcwaliseka kweMtsetfo.” (Rom. 13:10) “Nkulunkulu ulutsandvo,” ngako akumangalisi kutsi kungani imibhalo ikugcizelela kangaka kutsi kufanele sitsandzane.—1 Joh. 4:8. w18.06 19 ¶14-15

Ngisho noma ema-Israyeli avukela Jehova, nguMosi lowatfukutsela. Kwehluleka kutibamba kwamenta wangayinaki imiphumela yemavi akhe. Mosi wavumela tento talabanye kutsi timente angatilandzeli ticondziso taJehova. Mosi wenta kahle ngesikhatsi ema-Israyeli avukela kwekucala. (Eks. 7:6) Kodvwa kungenteka besekadziniwe futsi besekacasukile ngoba besekuphele sikhatsi lesidze ema-Israyeli avukela. Kungenteka Mosi besekanake kakhulu indlela lativa ngayo kunekutsi anake kutsi angamdvumisa njani Jehova. Nangabe umphrofethi lowetsembekile njengaMosi aphatamiseka futsi wona, nakitsi loko kungenteka melula. Mosi besekayongena eVeni Lesetsembiso futsi natsi sesitawungena eveni lelisha. (2 Phet. 3:13) Kute kitsi lofuna kulahlekelwa ngulelilungelo lelibalulekile. Kuze singene eveni lelisha kufanele sihlale setsembele kuJehova futsi sifune kwenta intsandvo yakhe ngaso sonkhe sikhatsi.—1 Joh. 2:17. w18.07 15 ¶14-16

Sathane ngeke akhone kwenta bantfu bente tintfo labangafuni kutenta. (Jak. 1:14) Bantfu labanyenti ababoni kutsi basekela Sathane. Ngemuva kwekufundza emaciniso, umuntfu ngamunye kufanele atikhetsele kutsi ufuna kukhonta bani. (Imis. 3:17; 17:30) Kute Sathane langakwenta kuze asente singetsembeki nangabe sitimisele kwenta intsandvo yaNkulunkulu. (Jobe 2:3; 27:5) Kunaletinye tintfo Sathane nemadimoni akhe labangakhoni kutenta. Nasi sibonelo, kute imibhalo letsi bayakhona kufundza tingcondvo kanye netinhlitiyo tebantfu. LiBhayibheli litsi nguJehova naJesu kuphela labanelikhono lekwenta njalo. (1 Sam. 16:7; Mak. 2:8) Nangabe senta konkhe lokusemandleni etfu kute lesikushoko nalesikwentako kuhambisane nentsandvo yaNkulunkulu, singaciniseka kutsi Jehova ngeke avumele Develi asilimate ngalokuphelele. (Hla. 34:7) Kufanele sisati sitsa setfu, kodvwa akukafaneli sisesabe. Ngekusitwa nguJehova, ngisho nebantfu labanesono bangakhona kuncoba Sathane. Nangabe simelana naye, utasibalekela.—Jak. 4:7; 1 Phet. 5:9. w18.05 26 ¶15-17

Asesitsi uhlela kuya emkhosini lobalulekile edolobheni lelikhashane futsi kufanele uhambe ngebhasi. Nawufika esiteshini semabhasi, ukhandza kunemabhasi lamanyenti. Kufanele ugibele ibhasi leya lapho uyakhona. Ngoba nawungagibela noma nguyiphi ibhasi ungalahleka. Lamuhla, bantfu labasha bangabhekana nesimo lesifanako, bangahle badideke nakufanele bente tincumo ekuphileni. Nine labasha, kutawuba melula kwenta tincumo ekuphileni nangabe nitibekele imigomo. Nitawunaka imigomo yekufeza sifiso senu sekujabulisa Jehova yini? Loko ningakwenta ngekutsi nilalele seluleko saJehova endzabeni yemfundvo, umsebenti, kushada nekuba nebantfwana kanye nalokunye. Loku kusho kutsi labasha kufanele batimisele kufinyelela imigomo yekukhonta Nkulunkulu. Bantfu labasha labatimisele kukhonta Jehova bangaciniseka kutsi batawuphumelela ekuphileni futsi utababusisa. w18.04 25 ¶1-3

Jeftha weva buhlungu kakhulu, kodvwa wasifeza sifungo sakhe, futsi watfumela indvodzakati yakhe kutsi iyokhonta ethempelini kuphila kwayo konkhe. (Khu. 11:30-35) Loko bekumatima kuJeftha, futsi kungenteka kwaba matima kakhulu endvodzakatini yakhe. Kepha lendvodzakati yasisekela ngekutitsandzela sincumo sababe wayo. (Khu. 11:36, 37) Yalahlekelwa lilungelo lekushada, lekuba nebantfwana kanye nelekuchubekisela luhla lwekutalwa lwemndeni wakubo. Ngako beyikudzinga kakhulu kudvudvutwa kanye nekukhutsatwa. LiBhayibheli litsi: “Njalo nje ngemnyaka emantfombatana langema-Israyeli ahamba emalanga lamane ayekwenta umkhosi wekukhumbula indvodzakati yaJeftha wakaGileyadi.” (Khu. 11:39, 40) EmaKhristu langakashadi lanaka “tintfo teNkhosi” ayakudzinga kunconywa kanye nekukhutsatwa.—1 Khor. 7:32-35. w18.04 17 ¶10-11

Ngaphambi kwaZamcolo, Sathane walinga letinye tingilosi kutsi tiye ecasini nebantfu besifazane emhlabeni. Nyalo, Sathane ulawula tonkhe tingilosi letavukela. LiBhayibheli liyakufakazela loko nalifananisa Sathane nadrago lodvonsa incenye yesitsatfu yetinkhanyeti tasezulwini. (Gen. 6:1-4; Semb. 12:3, 4) Ngesikhatsi letingilosi tishiya umndeni waNkulunkulu, taba taSathane. Akukafaneli sicabange kutsi letingilosi tilicembu lelingakahleleki. Endzaweni lengabonakali, Sathane utentele umbuso lofana neMbuso waNkulunkulu futsi nguye inkhosi yawo. Sathane unikete emadimoni emandla ekubusa umhlaba. (Ef. 6:12) Sathane usebentisa inhlangano yakhe kute anikete bonkhe bohulumende bebantfu emandla ekubusa. w18.05 23 ¶5-6

Ngaletinye tikhatsi Nkulunkulu ukhombisa kutsi uyasitsandza ngekutsi asicondzise njengoba babe amcondzisa umntfwana wakhe lamtsandzako. Davide wasemukela lesicondziso. Wazindla futsi wacabanga ngendlela yaNkulunkulu, waphindze wamvumela kutsi ambumbe. Nangabe uvumela kukholwa kutsi kukwente wente lokufanako, utamtsandza kakhulu Jehova futsi utawulwela kumlalela. Utawuphindze ube nebuhlobo lobuhle nalobucinile naye. Dzadze Christin utsi: “Nangicwaninga futsi ngizindla ngetintfo lengitifundzako, ngiva ngatsi Jehova usuke atibhalele mine letintfo.” Nangabe ucabanga ngendlela yaNkulunkulu, utawuba nembono waNkulunkulu ngalelive nelikusasa. Kungani Jehova akuniketa lolwati kanye nekucondza? Kungoba ufuna kutsi utati tintfo letibalulekile ekuphileni, wente tincumo letinhle, uphindze ulibuke ngalabovu likusasa futsi ube nelitsemba.—Isa. 26:3. w18.12 26 ¶9-10