March

‘Letimvu’ lokukhulunywa ngato kulomfanekiso lokuMatewu 25:31-36 timelela labalungile labaphila ngemalanga ekugcina labanelitsemba lekuphila emhlabeni, lokunguletinye timvu. Tibasekela ngekwetsembeka bomnakaboKhristu labagcotjiwe labaselapha emhlabeni ngekubasita kutsi bafeze umsebenti lowentiwa emhlabeni wonkhe wekushumayela newekwenta bafundzi. (Mat. 24:14; 28:19, 20) Njalo ngemnyaka nasekusele emaviki lambalwa ngaphambi kwekutsi kufike Sikhumbuto, letinye timvu tikhombisa kutsi tiyabasekela bomnakaboKhristu ngekutsi tiwente ngemfutfo umsebenti lowentiwa emhlabeni wonkhe wekumema bantfu kutsi babe khona eSikhumbutweni. Tenta onkhe emalungiselelo kuze onkhe emabandla lasemhlabeni wonkhe akhone kugubha Sikhumbuto. Letinye timvu tiyakujabulela kusekela bomnakaboKhristu ngaletindlela. Tiyati kutsi Jesu ukutsatsa ngekutsi tikwentela yena loko letikwentela bomnakaboKhristu labagcotjiwe.​—Mat. 25:37-40. w22.01 22 ¶11-12

Sisuke silingisa Jehova nasilingisa buntfu baJesu nendlela labaphatsa ngayo labanye. Sibonelo nje, wayivela indvodza lebeyinebulephelo, namake lobekanesifo lesibi futsi wabavela nalabanye ngesikhatsi bafelwe. (Mak. 1:40, 41; 5:25-34; Joh. 11:33-35) Nangabe sichubeka setama kulingisa buntfu baJehova, sisondzela kakhulu kuye. Kulandzela tinyatselo taJesu kusisita kutsi singaphazanyiswa ngulelive lelibi. Ngebusuku bekugcina Jesu alamhlabeni, watsi: “Mine ngilincobile live.” (Joh. 16:33) Bekasho kutsi akalingisi indlela yekucabanga yebantfu balelive, imigomo yabo kanye nendlela labaphila ngayo. Jesu akazange asikhohlwe sizatfu sekutsi kungani atfunywa lamhlabeni, lokukungcweliswa kwaJehova. Kutsiwani ngatsi? Tinyenti tintfo letingasiphatamisa kulelive. Kodvwa nangabe silingisa Jesu, ngekutsi sihlale sinake kwenta intsandvo yaJehova, natsi ‘sitalincoba’ lelive.​—1 Joh. 5:5. w21.04 3-4 ¶7-8

Umphostoli Pawula bekasati setsembiso saJehova lesitsi ‘wonkhe umuntfu lokholwa nguJesu utawutfola kuphila lokuphakadze.’ (Joh. 3:16; Rom. 6:23) Pawula bekangulomunye walabo bebakholwa enhlawulweni. Bekaciniseka kutsi Jehova ufuna kutsetselela ngisho nalabo labente tono letinkhulu nangabe baphendvuka. (Hla. 86:5) Pawula bekati kutsi Nkulunkulu umtsandza kakhulu ngobe bekatfumele Jesu kuze atomfela. Naka lamavi lasicinisekisako lasekugcineni kwaKubaseGalathiya 2:20. Pawula watsi: ‘INdvodzana yaNkulunkulu yangitsandza futsi yatinikela ngenca yami.’ Akazange acabange atsi, ‘Ngiyabona kutsi kungani Jehova abatsandza labanye bazalwane, kodvwa mine angeke angitsandze.’ Pawula wakhumbuta emaKhristu aseRoma watsi: “Ngesikhatsi sisetoni Khristu wasifela.” (Rom. 5:8) Nkulunkulu usitsandza kakhulu! Pawula bekaciniseka kutsi lutsandvo lwaNkulunkulu lunemandla. Bekayati indlela Jehova lasibeketelela ngayo sive sema-Israyeli. w21.04 22 ¶8-10

Nawudadisha liBhayibheli nemuntfu, msite atsandze Jehova. Kanjani? Funa ematfuba ekufundzisa umfundzi ngebuntfu baJehova. Sita umfundzi acondze kutsi Jehova unguNkulunkulu lojabulako, nekutsi uyabasita labo labamtsandzako. (1 Thim. 1:11; Heb. 11:6) Mkhombise kutsi utawuzuza ngekusebentisa lakufundzako, umchazele nekutsi loko kukhombisa kutsi Jehova uyamtsandza. (Isa. 48:17, 18) Njengobe lutsandvo lwakhe ngaJehova lukhula, lutamsita kutsi ente lushintjo loludzingekako. Kuze umfundzi atfutfuke aze abhajatiswe, kutawudzingeka adzele lokutsite. Labanye bafundzi kungase kudzingeke badzele umcebo. Labanyenti kungahle kudzingeke bashiye bangani labangamtsandzi Jehova. Labanye bangahle balahlwe ngemalunga emindeni langabatsandzi BoFakazi BaJehova. Jesu wetsembisa kutsi labo labamlandzelako ngeke badvumateke. Jehova utababusisa ngekubanika umndeni lobatsandzako kubantfu bakhe.​—Mak. 10:29, 30. w21.06 4 ¶8-9

Umphostoli Pawula wafananisa umsebenti wekwenta bafundzi nekulima, wakhombisa kutsi kufanele singagcini nje ngekuhlanyela. Wakhumbuta baseKhorinte watsi: “Mine ngahlanyela, Apholosi wanisela . . . Nine niyinsimu yaNkulunkulu lelinywako.” (1 Khor. 3:6-9) Njengobe sitisebenti ‘ensimini yaNkulunkulu,’ asifuni kugcina ngekuhlanyela, kunaloko sifuna kukunisela loko lesikuhlanyele futsi sikuhlole njalo kutsi kuyakhula yini. Ngesikhatsi lesifanako, siyacondza kutsi nguNkulunkulu lowenta kukhule. Sinelilungelo lelikhulu lekushumayela labanye nelekubafundzisa liciniso! Lomsebenti usenta sijabule mbamba. Umphostoli Pawula, lowasita labanyenti eThesalonika kutsi babe bafundzi, wachaza indlela lativa ngayo, futsi watsi: “Ngesikhatsi sekuba khona kweNkhosi Jesu, ngubani lotawuba litsemba letfu, lotawuba yinjabulo yetfu nobe umchele wetfu wekujabula? Akusini yini? Ecinisweni, nine niyinkhatimulo yetfu nenjabulo yetfu.”​—1 Thes. 2:19, 20; Imis. 17:1-4. w21.07 3 ¶5; 7 ¶17

Sonkhe Jehova usidvonsele kuye. (Joh. 6:44) Ase ucabange kutsi kusho kutsini loko. Jehova nakabukisisa tigidzigidzi tebantfu emhlabeni, wabona kutsi ucotfo nekutsi ungamtsandza, futsi loko kuligugu kuye. (1 Khr. 28:9) Jehova uyakwati, uyakucondza futsi uyakutsandza. Loko kuyasikhutsata! Jehova unendzaba mbamba nawe futsi ubakhatsalela bonkhe bazalwane bakho nabodzadze. Kuze Jesu asisite sikucondze kancono loko, wafananisa Jehova nemelusi. Yini letawentiwa ngumelusi nangabe kulahleka imvu yinye kuletingu-100? ‘Utawushiya etintsabeni leti letingu-99, ahambe ayofuna lena lelahlekile.’ Nasekayitfolile, angeke ayitfukutselele. Utawujabula. Liyini liphuzu? Imvu ngayinye ibalulekile kuJehova. Jesu watsi: ‘Babe losezulwini akafisi kutsi kubhubhe ngisho namunye kulaba labanjengebantfwana.’​—Mat. 18:12-14. w21.06 20 ¶1-2

Nasicabanga ngendlela Nkulunkulu lasitsandza ngayo, kusenta simtsandze kakhulu Jehova futsi sicinise buhlobo betfu naye. (Rom. 8:38, 39) Kusenta sifune kulingisa Jesu. (1 Phet. 2:21) Ngemalanga langaphambi kweSikhumbuto, sinaka kakhulu tindzaba letiseBhayibhelini letimayelana neliviki lekugcina Jesu asemhlabeni, kufa kwakhe nekuvuswa kwakhe. Ngelilanga leSikhumbuto, inkhulumo isikhumbuta ngendlela Jesu lasitsandza ngayo. (Ef. 5:2; 1 Joh. 3:16) Njengobe sifundza ngesibonelo saJesu sekutidzela futsi sizindla ngaso, sitiva siphocelelekile kutsi ‘sihambe ngendlela naye lebekahamba ngayo.’ (1 Joh. 2:6) Sitimisele kakhulu kutsi Nkulunkulu ahlale asitsandza. (Juda 20, 21) Nkulunkulu utawuhlale asitsandza nangabe senta konkhe lesingakwenta kuze simlalele, singcwelise libito lakhe futsi simjabulise. (Taga 27:11; Mat. 6:9; 1 Joh. 5:3) Sikhumbuto sisikhutsata kutsi sitimisele kakhulu kutsi indlela lesiphila ngayo onkhe malanga kube ngatsi sitsi kuJehova, ‘Ngifuna kuhlale ngitsandvwa nguwe!’ w22.01 23 ¶17; 25 ¶18-19

Jehova usinikete inkhululeko yekutikhetsela. Singatikhetsela kutsi yini lesifuna kuyenta ekuphileni. Nkulunkulu wetfu lonelutsandvo uyajabula nangabe sikhetsa kumkhonta. (Hla. 84:11; Taga 27:11) Inkhululeko yetfu yekutikhetsela singayisebentisa kuze sente letinye tincumo letinyenti letinhle. Singamlingisa Jesu ngekutsi sente tidzingo talabanye tite kucala kunetetfu. Ngalelinye lilanga, ngesikhatsi Jesu nebaphostoli bakhe badzinwe kakhulu, baya endzaweni lethulile kuze baphumule. Kodvwa abazange bakhone kuphumula ngobe bekunesicumbi sebantfu lebesifuna kufundziswa nguJesu. Kodvwa loko akuzange kumtfukutselise. Esikhundleni saloko, wasihawukela lesicumbi sebantfu. Ngako wenta njani Jesu? “Wase usifundzisa tintfo letinyenti.” (Mak. 6:30-34) Nangabe silingisa Jesu ngekutsi sisebentise sikhatsi setfu nemandla etfu kuze sisite labanye, sitawube sidvumisa Babe wetfu wasezulwini.​—Mat. 5:14-16. w21.08 3 ¶7-8

Jehova uyajabula nakabona tintfo letehlukahlukene nebantfu labangafani. Loku siyakubona endalweni yakhe lemangalisako, lefaka ekhatsi bantfu. Sibantfu asifani. Ngako Jehova akakucatsanisi nalabanye. Uhlola inhlitiyo, abone loko longiko ngekhatsi. (1 Sam. 16:7) Uyakwati loko longakhona kukwenta kahle, longeke ukhone kukwenta kahle, nendlela lowakhuliswa ngayo. Akakuceli kutsi wente loko longeke ukhone kukwenta. Kufanele silingise Jehova, sitibone ngendlela lasibona ngayo. Nasenta njalo, ‘sitawuticabanga ngendlela lefanele,’ singatikhandzi sincono nobe sitibukele phansi. (Rom. 12:3) Singafundza etibonelweni letinhle talabanye. Sibonelo saloko kutsi, kungenteka kunadzadze nobe umzalwane lomatiko lophumelelako emsebentini wekushumayela. (Heb. 13:7) Singafundza kuye, sibuke indlela lesingawutfutfukisa ngayo umsebenti wetfu wekushumayela. (Fil. 3:17) Kodvwa kunemehluko emkhatsini wekulingisa sibonelo lesihle salotsite nekuticatsanisa naye. w21.07 20 ¶1-2

Ungakucinisa kukholwa kwakho kuMdali ngekubuka tilwane, lokumilako kanye netinkhanyenti. (Hla. 19:1) Nawuchubeka ufundza ngaletintfo, utawuciniseka kakhulu kutsi Jehova unguMdali. Nawufundza ngendalo, nakisisa kutsi ikufundzisani ngeMdali. (Rom. 1:20) Nasi sibonelo, lilanga likhipha kushisa nekukhanya lokudzingekako kuze tintfo letikhona emhlabeni tiphile, kodvwa leminye imisebe lekhishwa lilanga ingaba yingoti. Tsine bantfu kufanele sivikeleke kulemisebe, futsi sivikelekile! Kanjani? Kuneludvwadvwasi lolutungelete umhlaba lolusivikelako kulemisebe leyingoti. Nangabe lemisebe iba nemandla, naloludvwadvwasi luyakhula. Awuvumi yini kutsi ukhona umuntfu lowente konkhe loku nekutsi unguMdali lonelutsandvo nalohlakaniphile? w21.08 17 ¶9-10

Ngemuva kwekutsi umuntfu sekabhajatisiwe, kufanele sichubeke simtsandza futsi simhlonipha. (1 Joh. 4:20) Singakwenta njani loko? Lenye indlela lesingakwenta ngayo kutsi simetsembe kutsi unetisusa letinhle. Nasi sibonelo, nangabe singacondzi kutsi kungani ente lokutsite, angeke sicabange kutsi loko lakwentile ukwente ngetizatfu tebugovu. Esikhundleni saloko, sitamhlonipha umzalwane wetfu, simtsatse njengalomkhulu kunatsi. (Rom. 12:10; Fil. 2:3) Ecinisweni, kufanele sibe nemusa kubo bonkhe bantfu. Nangabe sifuna kuba ngemalunga emndeni waJehova kuze kube phakadze, kufanele sikusebentise ekuphileni kwetfu loko lesikufundza eVini laNkulunkulu. Nasi sibonelo, Jesu wasifundzisa kutsi kufanele sibe nemusa kubo bonkhe bantfu, lokufaka ekhatsi titsa tetfu. (Luk. 6:32-36) Ngaletinye tikhatsi, kungahle kube matima kukwenta loko. Nangabe kunjalo, kufanele sifundze kucabanga njengaJesu futsi sente njengaye. Nangabe senta konkhe lokusemandleni etfu kuze silalele Jehova futsi silingise Jesu, sitawube sikhombisa Babe wetfu wasezulwini kutsi sifuna kuba ngemalunga emndeni wakhe kuze kube phakadze. w21.08 6 ¶14-15

Fundza kwetsembela kuJehova. Wetsembisa kusinika tintfo letinyenti letinhle nangabe setsembela kuye futsi simnika lokuncono kakhulu. LiBhayibheli linetibonelo letinyenti tebantfu labawenta ngekutimisela umsebenti waJehova. Etikhatsini letinyenti, Jehova bekatibusisa letikhonti takhe ngemuva kwekutsi setente lokutsite lokukhombisa kutsi tiyametsemba. Nasi sibonelo, Jehova wabusisa Abrahama ngemuva kwekutsi sekashiye likhaya lakhe, “nanobe bekangati kutsi uyaphi.” (Heb. 11:8) Jakobe watfola sibusiso lesikhetsekile ngemuva kwekulwa nengilosi. (Gen. 32:24-30) Ngesikhatsi sive saka-Israyeli sesitawungena eVeni Lesetsembiso, lesive sakhona kwewela ngemuva kwekutsi baphristi bafake tinyawo tabo emantini lanemandla eMfula iJordane. (Josh. 3:14-16) Kukhona nalokunye longakufundza etibonelweni talamuhla taboFakazi labetsembele kuJehova futsi bamentela lokunyenti. w21.08 29-30 ¶12-14

Nine bazalwane nabodzadze lesenikhulile, niyati kutsi tintfo betentiwa njani esikhatsini lesendlulile, kodvwa niyasibona nesidzingo sekuvumelana netimo letinsha. Nine lesenikhulile lenisandza kubhajatiswa, kunyenti leningakufundzisa labasebasha. Labasebasha batawujabula nanibacocela ngalokwentekile ekuphileni kwenu nangaloko lenikufundzile. Jehova utanibusisa kakhulu nangabe ‘nichubeka nipha labanye,’ ngekusebentisa tifundvo lenititfolile ekuphileni kuze nibaceceshe. (Luk. 6:38) Nangabe nine lesenikhulile lesinitsandzako nisondzelana nalabasebasha, nitawukhona kusitana. (Rom. 1:12) Nonkhe ninalokutsite leningasitana ngako. Kuyo yonkhe leminyaka baphila, lasebakhulile batfole kuhlakanipha nelwati. Labasebasha banemandla. Nangabe lasebakhulile nalabasebasha basebenta kanye kanye, badvumisa Babe wetfu lonelutsandvo wasezulwini, futsi basibusiso kulo lonkhe libandla. w21.09 8 ¶3; 13 ¶17-18

Yini leyabangela emaJuda lamanyenti angamemukeli Jesu ngenca yendlela lafa ngayo? Njengobe Jesu afela elugodvweni, kumaJuda wabonakala asigebengu futsi asoni, hhayi Mesiya. (Dut. 21:22, 23) Lamanye emaJuda langazange amemukele Jesu akazange anake kutsi bekamsulwa, abekwe licala lelingemanga futsi aphetfwe kabi. Labo bebateka licala laJesu bebanganendzaba nekulunga. Behluleli benkantolo lephakeme yemaJuda bahlangana ngekushesha kuze behlulele Jesu futsi abazange bayilandzele imitsetfo. (Luk. 22:54; Joh. 18:24) Kunekutsi behlulele ngekungakhetsi ecaleni bekabekwe lona, labehluleli bafuna “bufakazi lobungemanga ngaJesu kuze bambulale.” (Mat. 26:59; Mak. 14:55-64) Ngemuva kwekutsi Jesu sekavusiwe ekufeni, labehluleli labangakalungi babhadala emasotja emaRoma lebekagadze lithuna laJesu “imali lenyenti” kuze asakate emanga ngaJesu.​—Mat. 28:11-15. w21.05 11 ¶12-13

Jehova angalibhubhisa nobe kunini lelive lelibi. Kodvwa kubeketela kwakhe kusisite kakhulu! Sonkhe situkulwane sa-Adamu na-Eva sitalwa sinesono. Nanobe kunjalo, Jehova uyasitsandza futsi uyasinakekela, wetsembisa kulibhubhisa lelive lelibi. (1 Joh. 4:19) Sewuvele usibekile sikhatsi latawucedza ngaso konkhe kuhlupheka kwebantfu. Lutsandvo lwaJehova kufanele lusente kutsi natsi sicinisele yingci nje natisekhona letinkinga. Jehova usibonelo lesihle sekucinisela. Jesu wacinisela njengaBabe wakhe. Ngesikhatsi alamhlabeni, Jesu wabeketelela inkhulumo lelimatako, lihlazo futsi wabetselwa elugodvweni ngenca yetfu. (Heb. 12:2, 3) Siyaciniseka kutsi sibonelo saJehova sekucinisela saniketa Jesu emandla ekutsi naye acinisele. Natsi singasiniketa emandla ekucinisela. w21.07 12-13 ¶15-17

Sibona onkhe malanga kutsi Babe wetfu wasezulwini unesihawu. (Hla. 103:10-14) Balandzeli baJesu bebawenta emaphutsa, kodvwa wabakhombisa sihawu futsi wabatsetselela. Jesu bekakulungele ngisho nekunikela ngekuphila kwakhe kuze sitsetselelwe tono tetfu. (1 Joh. 2:1, 2) Sisondzelana kakhulu nebazalwane nabodzadze nangabe ‘sitsetselela ngekukhululeka.’ (Ef. 4:32) Kuliciniso kutsi kutsetselela labanye kungahle kube matima ngaletinye tikhatsi, kodvwa kufanele sichubeke sikwetama. Lomunye dzadze utsi wasitwa Sicongosekulindza lebesinesihloko lesitsi “Tsetselelanani Ngekukhululeka.” Wabhala watsi: “[Lesihloko] sachaza kutsi nawutsetselela labanye, akusho kutsi loku lokubi labakwentile bekukahle, nobe akukakuvisi buhlungu. Kodvwa nawubacolela ubese awusabatfukutseleli futsi uba nekuthula.” Nangabe sibatsetselela ngekukhululeka bazalwane betfu nabodzadze, sikhombisa kutsi siyabatsandza futsi silingisa Babe wetfu Jehova. w21.09 23-24 ¶15-16

Jesu bekalitsandza liciniso, lokuliciniso ngaNkulunkulu nangetinjongo takhe. Bekaphila ngekuvumelana naleliciniso, futsi walitjela nalabanye. (Joh. 18:37) Nebalandzeli bakhe bebalitsandza kakhulu liciniso. (Joh. 4:23) Ecinisweni, umphostoli Phetro watsi buKhristu ‘buyindlela yeliciniso.’ (2 Phet. 2:2) Ngenca yekutsi emaKhristu ekucala bekalitsandza kakhulu liciniso, atala timfundziso tenkholo, emasiko kanye nemibono yebantfu lebeyingavumelani neliciniso. (Khol. 2:8) Ngendlela lefanako, lamuhla emaKhristu eliciniso etama kamatima ‘kuchubeka ahamba ecinisweni,’ loko akwenta ngekusekela tinkholelo tawo kanye nendlela laphila ngayo eVini laJehova. (3 Joh. 3, 4) BoFakazi BaJehova abasho kutsi bahlale bakucondza konkhe lokuseBhayibhelini. Ngaletinye tikhatsi bawentile emaphutsa endleleni labachaza ngayo timfundziso teliBhayibheli nobe endleleni labahlela ngayo libandla. Ngemuva kwekuyicondza kahle indzaba letsite, bente lushintjo loludzingekile. w21.10 21-22 ¶11-12

Emadolobha akadzeni bekatungeletwa lubondza lebelivikela bantfu labahlala kulelo dolobha, ngako lutsandvo lwaJehova lolucotfo lufana nelubondza lolusivikela kunobe yini lengalimata buhlobo betfu naye. Ngetulu kwaloko, lutsandvo lwaJehova lolucotfo lumenta asidvonsele kuye. (Jer. 31:3) Umhlabeleli Davide wasebentisa lomunye umfanekiso kuze akhombise indlela Nkulunkulu labavikela ngayo bantfu bakhe. Wabhala watsi: ‘Nkulunkulu uyindzawo yami yekukhosela lephephile, unguNkulunkulu longikhombisa lutsandvo lolucotfo.’ Waphindze washo naku ngaJehova: “Unelutsandvo lolucotfo futsi uyindzawo yami levikelekile, uyindzawo yami yekukhosela lephephile futsi ungumkhululi wami, usihlangu sami futsi nguye lengibalekela kuye.” (Hla. 59:17, umbhalo longentasi; 144:2) Kungani Davide afananisa lutsandvo lwaJehova lolucotfo nendzawo levikelekile kanye nendzawo yekukhosela? Ngisho nobe sihlala kuphi, nangabe nje sitikhonti taJehova, utasivikela kuze silondvolote buhlobo betfu lobuligugu naye. w21.11 6 ¶14-15

Ngesikhatsi Jesu nebafundzi bakhe babhekene nesivunguvungu lesikhulu elwandle, Jesu wasebentisa leso sikhatsi kuze abasite babone lapho kudzingeka bacinise khona kukholwa kwabo. (Mat. 8:23-26) Jesu bekalele, nanobe lesivunguvungu besinemandla futsi sekugcwele emanti kulesikebhe. Ngesikhatsi labafundzi lebebesaba bamvusa futsi bamcela kutsi abasindzise, wababuta watsi: “Kungani nesaba, futsi kungani kukholwa kwenu kukuncane?” Ubhekene nenkinga lematima yini? Kungenteka ubhekene nesehlakalo semvelo. Nobe kungenteka ugula kakhulu, futsi loko kukwenta udvumateke kakhulu ungati nekutsi wenteni. Ungahle ukhatsateke ngaletinye tikhatsi, kodvwa ungakuvumeli loko kukuvimbe kutsi ungasetsembeli kuJehova. Sondzela kuye ngemthantazo. Cinisa kukholwa kwakho ngekutsi uzindle ngetikhatsi lapho Jehova akusite khona. (Hla. 77:11) Ciniseka kutsi akayuze akushiye. w21.11 22 ¶7, 10

Lomunye umuntfu bekangatsi njengobe angayitsatsi intfo lengasiyo yakhe, ulalela lomtsetfo. Kodvwa ungatfola kutsi bekeba ngaletinye tindlela. Sibonelo nje, umtsengisi lobekasebentisa tikali netisindvo letingasito kuze akhohlise labatsengako, bekufana nekutsi uyeba. Levithikhusi 19:13 uhlobanisa kweba nekungetsembeki ebhizinisini nakatsi: “Ungamebeli umuntfu wakini.” Ngako kungetsembeki ebhizinisini kungahlotjaniswa nekweba nebugebengu. Njengobe umtsetfo wesi-8 bewutjela emaJuda kutsi angebi, lokushiwo nguLevithikhusi kusisita sibone kutsi singawusebentisa njani lomtsetfo. Kungasisita kucabanga ngembono waJehova mayelana nekungetsembeki nekweba. Singahle sitibute: ‘Nangicabanga ngalokushiwo nguLevithikhusi 19:11-13, lukhona yini lushintjo lokufanele ngilwente ekuphileni kwami? Lukhona yini lushintjo lokufanele ngilwente endleleni lengenta ngayo ibhizinisi nobe lengisebenta ngayo?’ w21.12 9-10 ¶6-8

Onkhe malanga nawutithantazela cabanga ngemaphutsa lowentile bese ucela Jehova kutsi akutsetselele. Kuliciniso kutsi nangabe wente sono lesikhulu utawudzinga kusitwa ngulabadzala belibandla. Batakulalela futsi bakunike seluleko lesinelutsandvo lesivela eVini laNkulunkulu. Batawuthantaza nawe bacele Jehova akutsetselele ‘kuze uphiliswe.’ (Jak. 5:14-16) Ngetulu kwaloko, kungasita kuzindla ngenhlawulo. Kungenteka uva buhlungu nawucabanga ngendlela iNdvodzana yaNkulunkulu leyahlupheka ngayo. Kodvwa nawuchubeka uzindla ngemhlatjelo waJesu, utamtsandza kakhulu yena naBabe wakhe. Njalo ngemnyaka sikhombisa kubonga kwetfu ngenhlawulo ngekutsi sibe khona eSikhumbutweni sekufa kwaJesu futsi simeme labanye kutsi babekhona. Jehova usinikete lilungelo lelikhulu lekufundzisa labanye ngeNdvodzana yakhe! w21.04 18-19 ¶13-16

Cabanga ngaloko Jesu lakwenta ngesikhatsi sicumbi sebantfu sita kuye entsabeni. Jesu bekacitse busuku bonkhe athantaza. Kungenteka bekadzinwe kakhulu, kodvwa watsi nakabona lesicumbi sebantfu wasivela ngobe bekunebantfu labeswele nalabagulako kuso. Akagcinanga nje ngekubelapha kodvwa wabeka lenye yetinshumayelo lenemandla kakhulu, lebitwa ngekutsi yiNshumayelo YaseNtsabeni. (Luk. 6:12-20) Jesu bekatinika nesikhatsi sekuba nalabanye bantfu ngisho nobe bekafuna kuba yedvwa. Cabanga nje kutsi Jesu wativa njani nakeva kutsi umngani wakhe Johane uMbhabhatisi ujutjwe inhloko. LiBhayibheli litsi: “Nakeva ngalendzaba [lemayelana nekufa kwaJohane], Jesu wesuka lapho wahamba ngesikebhe waya endzaweni lethulile kute abe yedvwa.” (Mat. 14:10-13) Kodvwa sicumbi lesikhulu sebantfu sefika kucala kunaye kulendzawo lebekaya kuyo. (Mak. 6:31-33) Jesu wabona kutsi besidzinga lusito nekudvudvutwa nguNkulunkulu, ngako wasisita ngekushesha.​—Luk. 9:10, 11. w22.02 21 ¶4, 6

Yini lokufanele siyente nangabe sibona kutsi simphetse kabi lesikholwa naye? Kufanele sithantaze kuJehova. Singamcela kutsi asisite sakhe kuthula nemzalwane wetfu. Kufanele sitinike sikhatsi sekucabanga ngaloko lesikwentako. Singatibuta imibuto lenjenganayi: ‘Ngitimisele yini kuvuma kutsi ngente liphutsa, ngicolise futsi ngakhe kuthula? Jehova naJesu batawutiva njani nakungimi lengiya kumzalwane wami nobe dzadze ngiyokwakha kuthula?’ Timphendvulo talemibuto tingasisita kutsi silalele Jesu futsi sititfobe siye kumzalwane wetfu nobe dzadze kuze sakhe kuthula naye. Nangabe siya kumzalwane wetfu kuze siyokwakha kuthula naye, kufanele sititfobe. (Ef. 4:2, 3) Kufanele siye kuye sinemgomo wekutsi sifuna kuphindze sibe nebuhlobo lobuhle naye. Khumbula kutsi kwakha kuthula nemzalwane wakho kubaluleke kakhulu kunekubona kutsi ngubani lowente kahle nalowente liphutsa.​—1 Khor. 6:7. w21.12 26 ¶13-16

Jesu weva buhlungu ngobe bekati kutsi emaJuda lamanyenti bekangeke awemukele umlayeto weMbuso. Ngenca yaloko, iJerusalema beyitawubhujiswa futsi emaJuda lebekatawusindza bekatawutfunjwa. (Luk. 21:20-24) Lokubuhlungu kutsi kwenteka loko Jesu lakusho, bantfu labanyenti abamemukelanga. Lawuhlala khona, bantfu labanyenti bayawulalela yini umlayeto weMbuso? Nangabe babancane labalalelako, yini longayifundza kuJesu ngesikhatsi akhalela bomakhelwane bakhe? Jehova uyabakhatsalela bantfu. Tinyembeti taJesu tisikhumbuta kutsi Jehova ubakhatsalela kakhulu bantfu. “Akafisi kutsi kubhubhe ngisho namunye, kepha ufisa kutsi bonkhe bantfu baphendvuke.” (2 Phet. 3:9) Lamuhla, sikhombisa kutsi siyabatsandza bomakhelwane betfu ngekutsi sihlale setama kubasita kutsi bati tindzaba letimnandzi teMbuso.​—Mat. 22:39. w22.01 16 ¶10-12

Kukholwa kwakho kutawucina nawuzindla ngaloko Jehova lakwentele bantfu bakhe nangaloko lakwentele kona. Lokubaluleke kakhulu, kutsi utamtsandza kakhulu Jehova. Lutsandvo lutakwenta kutsi ulalele Jehova, udzele lokutsite kuze umjabulise, futsi ubeketelele nobe nguluphi luvivinyo. (Mat. 22:37-39; 1 Khor. 13:4, 7; 1 Joh. 5:3) Kute lokubaluleke kakhulu kwendlula kuba nebuhlobo lobusedvute naJehova! (Hla. 63:1-7) Khumbula kutsi kuthantaza, kudadisha nekuzindla kuyincenye yekukhonta Jehova. NjengaJesu, funa indzawo lethulile kuze ucitse sikhatsi naJehova. Gwema tintfo letingakuphazamisa. Cela Jehova akusite kutsi unake nawenta tintfo letiphatselene nekukhonta yena. Nawusebentisa kahle sikhatsi sakho nyalo, Jehova utakubusisa ngekuphila lokuphakadze emhlabeni lomusha waNkulunkulu.​—Mak. 4:24. w22.01 31 ¶18-20

Tintfo lesiticabangako tiyasifaka sandla kuloko lesikwentako. Kungako Jesu asifundzisa kutsi sikhweshise imicabango lengasenta sigcine sente sono lesikhulu. (Mat. 5:21, 22, 28, 29) Sifuna kumjabulisa Babe wetfu wasezulwini. Kungako kubalulekile kutsi sisheshe siyisuse etingcondvweni tetfu imicabango lemibi! Jesu watsi: “Tintfo letiphuma emlonyeni tivela enhlitiyweni.” (Mat. 15:18) Tintfo lesitikhulumako tiveta kutsi sibantfu labanjani. Ngako tibute: ‘Ngihlale ngikhuluma liciniso yini ngisho nobe kwenta njalo kungangifaka enkingeni? Nangabe ngishadile, angidlali yini ngelutsandvo nebantfu bebulili lobehlukile? Ngiyakubalekela yini kukhuluma tintfo letingcolile? Nangabe umuntfu angikwatisa, ngimphendvula kahle yini?’ Kutakusita kucabanga ngalemibuto. Nangabe wetama kamatima kungawakhulumi emanga, tintfo letingcolile nobe letilimatako, utakutfola kumelula kukhumula lobuntfu lobudzala. w22.03 5 ¶12-14

Labo labacela seluleko kunekutsi bamele lotsite kutsi abeluleke bavama kutfutfuka ekukhonteni Jehova kunalabo labangasiceli. Ngako akube nguwe locela seluleko. Kunini lapho singacela khona seluleko? Cabanga nganati timo letilandzelako. (1) Dzadze ucela ummemeteli losanesikhatsi ashumayela kutsi abe khona nakafundza nalotsite liBhayibheli, ngemuva kwaloko umcela ameluleke ngekutsi angawatfutfukisa njani emakhono akhe ekufundzisa. (2) Dzadze longakashadi ufuna kutsenga timphahla, ngako ubuta kulomunye dzadze lovutsiwe kutsi ucabangani ngaletimphahla latikhetsile. (3) Umzalwane wabelwe inkhulumo yakhe yekucala, ngako ucela umzalwane losanesikhatsi abeka tinkhulumo kutsi ayilalele bese uyamtjela kutsi ngukuphi langatfutfukisa khona. Ngisho nemzalwane losanesikhatsi abeka tinkhulumo, wenta kahle ngekubuta labanye labanelikhono lekubeka tinkhulumo kutsi ngukuphi lapho angatfutfukisa khona bese uyasisebentisa leseluleko labamniketa sona.​—Taga 19:20. w22.02 13 ¶15-17

Jehova uyasitsandza futsi uyasinakekela, njengobe nje bekamtsandza naJesu futsi amnakekela ngesikhatsi alapha emhlabeni. (Joh. 5:20) Wasita Jesu kutsi ahlale anekukholwa lokucinile, wamkhutsata nakacindzetelekile, waciniseka nekutsi unetintfo latidzingako kuze aphile. Jehova wayitjela iNdvodzana yakhe kutsi uyayitsandza nekutsi uyajabula ngayo. (Mat. 3:16, 17) Ngenca yekutsi Jesu bekati kutsi Babe wakhe lomtsandzako losezulwini utawuhlale anaye futsi amsite, akazange ative ayedvwa. NjengaJesu, sonkhe siyibonile indlela Jehova lasitsandza ngayo. Cabanga ngaloku: Jehova usivumele kutsi sibe bangani bakhe, wasinika bazalwane nabodzadze labanyenti labasitsandzako, labasenta sijabule futsi labasikhutsatako nasicindzetelekile. (Joh. 6:44) Jehova uphindze asinikete konkhe lesikudzingako kuze sichubeke sicinisa kukholwa kwetfu. Uphindze asisite sitfole tintfo lesitidzingako kuze siphile. (Mat. 6:31, 32) Simtsandza kakhulu Jehova nasicabanga ngendlela lasitsandza ngayo. w21.09 22 ¶8-9

Bekunjani kuphila kwakho ngaphambi kwekutsi ucale kudadisha liBhayibheli naBoFakazi BaJehova? Labanyenti betfu abajabuli nabacabanga ngaloku. Kungenteka umbono walelive ngalokubi nalokuhle boyitsintsa kakhulu indlela lebesicabanga ngayo kanye nebuntfu betfu. Nangabe kunjalo, ‘besihlala eveni sibe site litsemba, singamati naNkulunkulu.’ (Ef. 2:12) Kodvwa njengobe udadisha liBhayibheli, wabona kutsi unaBabe losezulwini lokutsandza kakhulu. Wabona kutsi nangabe ufuna kujabulisa Jehova futsi ube yincenye yemndeni wakhe kudzingeka wente lushintjo lolukhulu endleleni lophila ngayo nalocabanga ngayo. Wabona nekutsi kudzingeka uphile ngekuvumelana netimiso takhe letiphakeme. (Ef. 5:3-5) Jehova, longuMdali wetfu naBabe wetfu wasezulwini, unelilungelo lekuncuma kutsi emalunga emndeni wakhe kufanele atiphatse njani. Ulindzele kutsi ngaphambi kwekutsi sibhajatiswe, setame ‘kukhumula buntfu lobudzala kanye nemikhuba yabo.’ w22.03 2 ¶1-3

Letinye timvu tiyakujabulela kuba khona eSikhumbutweni futsi ticabange ngelitsemba lato. Tiyayilangatelela inkhulumo yeSikhumbuto ngobe ikhuluma kakhulu ngaloko Khristu nalabangu-144 000 labatawubusa naye labatawukwentela bantfu labetsembekile ngesikhatsi Sekubusa Kweminyaka Lengu-1 000. Njengobe Jesu Khristu atawube ayiNkhosi, labo labatawubusa naye ezulwini, batawusita ekushintjeni lomhlaba ube lipharadisi, basite nebantfu labalalelako kutsi babe bete sono. Tigidzi tebantfu letiba khona eSikhumbutweni tijabula kakhulu naticabanga ngesikhatsi lesitako nasekugcwaliseka tiphrofetho teliBhayibheli, njengaleto letiku-Isaya 35:5, 6; 65:21-23; neSembulo 21:3, 4. Kuticabanga baseveni lelisha banebantfu lababatsandzako, kubenta baciniseke kakhulu ngelitsemba labo lesikhatsi lesitako futsi kubenta batimisele kakhulu kuchubeka bakhonta Jehova.​—Mat. 24:13; Gal. 6:9. w22.01 21 ¶5-7

Iyini inhlawulo? Inhlawulo linani Jesu lalibhadala kuze atsenge loko Adamu lakulahla. (1 Khor. 15:22) Kungani siyidzinga inhlawulo? Kungobe timiso taJehova letilungile letitfolakala eMtsetfweni betitsi kuphila kufanele kwenanwe ngekuphila. (Eks. 21:23, 24) Adamu walahlekelwa kuphila lokute sono. Jesu wanikela ngekuphila kwakhe lokute sono kuze kuhlonishwe tindlela taNkulunkulu letilungile. (Rom. 5:17) Ngako, waba ‘nguBabe Waphakadze’ kubo bonkhe labakhombisa kukholwa enhlawulweni. (Isa. 9:6; Rom. 3:23, 24) Jesu wanikela ngekuphila kwakhe ngobe bekamtsandza kakhulu Babe wakhe wasezulwini futsi abatsandza kakhulu nebantfu. (Joh. 14:31; 15:13) Ngako bekatimisele kuhlala etsembekile kuphila kwakhe konkhe futsi afeze intsandvo yaBabe wakhe. Jesu wahlala etsembekile kwaze kwaba sekufeni. Ngenca yaloko injongo yaJehova ngebantfu nangemhlaba itawugcwaliseka. w21.04 14 ¶2-3