April

Jesu ukhombisile kutsi usitsandza kakhulu ngekutsi avume kunikela ngekuphila kwakhe ngenca yetfu. (Joh. 15:13) Jehova naJesu bakhombise kutsi basitsandza kakhulu futsi asiyoze sikhone kubabuyisela ngaloko labasentele kona. Kodvwa singakhombisa kutsi siyabonga ngendlela lesiphila ngayo onkhe malanga. (Khol. 3:15) Inhlawulo iligugu kakhulu kulabagcotjiwe ngobe yenta babe nalelitsemba labanalo. (Mat. 20:28) Ngenca yekutsi bayakholwa kulomhlatjelo waKhristu, Jehova utsi balungile futsi ubafake esiswini baba bantfwana bakhe. (Rom. 5:1; 8:15-17, 23) Naletinye timvu tiyabonga ngenhlawulo. Ngenca yekutsi tiyakholwa emhlatjelweni waKhristu, tinebuhlobo lobuhle naNkulunkulu, futsi tinelitsemba lekuphuma “ekuhluphekeni lokukhulu.” (Semb. 7:13-15) Labagcotjiwe naletinye timvu bakhombisa kutsi bayabonga ngenhlawulo ngekuba khona eSikhumbutweni njalo ngemnyaka. w22.01 23 ¶14-15

Jesu bekakhatsateke kakhulu ngalelicala lebekabekwe lona. Bebamcambele emanga batsi ungumhlambalati, lokungumuntfu longamhloniphi Nkulunkulu nobe libito lakhe. (Mat. 26:64-66) Lelicala lebekabekwe lona lamvisa buhlungu kakhulu kangangekutsi waze wafisa ngatsi Babe wakhe angamenta angabhekani nalelihlazo. (Mat. 26:38, 39, 42) Kwadzingeka kutsi Jesu alengiswe elugodvweni kuze akhulule emaJuda esicalekisweni. (Gal. 3:10) Atfola lesicalekiso ngobe awazange awulalele uMtsetfo waNkulunkulu lebeketsembise kuwulalela. Ngako lesi bese kungulesinye sicalekiso lebekasitfole ngetulu kwalesi sekuba bantfwana ba-Adamu. (Rom. 5:12) UMtsetfo waNkulunkulu bewutsi umuntfu lowente sono lesimenta afanelwe kutsi afe kufanele abulawe, ngemuva kwaloko sidvumbu sakhe besingalengiswa elugodvweni. (Dut. 21:22, 23; 27:26) Ngenca yekutsi Jesu walengiswa elugodvweni, emaJuda besekangakhululeka kulesicalekiso futsi umhlatjelo wakhe bese ungawasita ngisho nobe amalile. w21.04 16 ¶5-6

Cabanga ngaloko lokwentekako ngelilanga lekugcina ngaphambi kwekutsi Jesu afe. Emasotja langemaRoma amshaya kabuhlungu. (Mat. 26:52-54; Joh. 18:3; 19:1) Amshaya ngesiswebhu lesisuka nenyama. Ngemuva kwaloko ametfwalisa lugodvo lolusindzako emhlane lovova ingati. Jesu wetama kuluhudvula lolugodvo, uya nalo lapho atawubulawelwa khona, kodvwa ngekushesha emasotja emaRoma atjela lenye indvodza kutsi iletfwale. (Mat. 27:32) Nakefika lapho atawubulawelwa khona, lamasotja ashayela tipikili etandleni takhe nasetinyaweni takhe atihlanganisa nalolugodvo. Umtimba wakhe losindzako wenta letipikili tidzabule inyama yakhe. Bangani bakhe baselusizini futsi make wakhe uyakhala, kodvwa baholi bemaJuda bahlekisa ngaye. (Luk. 23:32-38; Joh. 19:25) Li-awa ngeli-awa uselusizini. Ngenca yekutsi uyalenga, inhlitiyo yakhe nemaphaphu kusebenta kamatima, futsi akasakhoni nekuphefumula kahle. Ngaphambi nje kwekutsi afe, usho umthantazo wekugcina. Ngemuva kwaloko, ugobisa inhloko futsi unikela ngekuphila kwakhe. (Mak. 15:37; Luk. 23:46; Joh. 10:18; 19:30) Wafa kabuhlungu nangendlela lelihlazo! w21.04 16 ¶4

Jesu watjela baphostoli bakhe labetsembekile labangu-11 ngetivumelwane letimbili, sivumelwane lesisha nesivumelwane seMbuso. (Luk. 22:20, 28-30) Letivumelwane tavulela labaphostoli nalabanye litfuba lekuba ngemakhosi nebaphristi ezulwini. (Semb. 5:10; 14:1) Ngulabagcotjiwe kuphela labaselamhlabeni, labanencenye kuletivumelwane letimbili, labadla sinkhwa futsi banatse liwayini ngeSikhumbuto. Jehova ubanikete litsemba lelihle kakhulu lekuphila phakadze ezulwini, lekusebenta naJesu Khristu lokhatinyulisiwe kanye nalabanye labangu-144 000 futsi ngetulu kwako konkhe lekuba naJehova Nkulunkulu! (1 Khor. 15:51-53; 1 Joh. 3:2) Labagcotjiwe bayati kutsi kufanele bahlale betsembekile kuze kube sekufeni.​—2 Thim. 4:7, 8. w22.01 21 ¶4-5

Jesu bekabetselwe netigebengu letimbili. (Luk. 23:40, 41) Lesinye sato satsi kuJesu: “Ungikhumbule nawufika eMbusweni wakho.” (Luk. 23:42) Ngenca yekutsi bekati kutsi Babe wakhe unemusa, Jesu watjela lesigebengu emavi lasinika litsemba. (Hla. 103:8; Heb. 1:3) Jehova ufuna kusitsetselela futsi asikhombise umusa, kodvwa utasitsetselela nangabe sitisola mbamba ngetintfo letimbi lesatenta futsi sikholwa emhlatjelweni waJesu Khristu. (1 Joh. 1:7) Labanye bangakutfola kumatima kukholwa kutsi Jehova angabacolela. Nangabe uhle utiva kanjalo, cabanga nganaku: Ngaphambi nje kwekutsi Jesu afe, wasikhombisa umusa lesigebengu lebesisandza kukholwa. Ngako-ke, Jehova utatikhombisa umusa kakhulu tinceku takhe letetsembekile!​—Hla. 51:1; 1 Joh. 2:1, 2. w21.04 9 ¶5-6

Ngenca yekutsi wahlala etsembekile kwaze kwaba sekufeni, Jesu wafeza tintfo letinyenti. Kwekucala, waveta kutsi Sathane ungumcambimanga. Jesu wakhombisa kutsi umuntfu lote sono angahlala etsembekile ngisho nobe Sathane angamentani. Kwesibili, Jesu wanikela ngekuphila kwakhe kwaba yinhlawulo. Ngenca yekutsi wanikela ngekuphila kwakhe, bantfu labanesono bangaba nebuhlobo lobuhle naNkulunkulu, futsi babe nelitsemba lekuphila phakadze. Kwesitsatfu, Jesu waveta kutsi Jehova ungumbusi lolungile futsi walihlanta libito laBabe wakhe njengobe belihlanjalatiwe. Shengatsi lilanga ngalinye singalitsatsa njengelitfuba lekugcina lekuhlale sicotfo! Ngisho singafa, sitawukhona kutsi: “Jehova, ngente konkhe lokusemandleni ami kuze ngigcine bucotfo bami, ngivetile kutsi Sathane unemanga, futsi ngilingcwelisile libito lakho nebukhosi bakho!” w21.04 12 ¶13-14

Ngemuva kwekutsi Jesu abekwe licala lelingemanga futsi limulahle, kuhlekiswa ngaye, uphatfwa kabuhlungu, ngemuva kwaloko ubetselwa elugodvweni. Tipikili tibhobosa tandla takhe netinyawo. Nakadvonsa umoya nobe nakakhuluma, kubuhlungu kakhulu. Kodvwa kufanele akhulume ngobe kunetintfo letibalulekile lafuna kutisho. Sitfola tifundvo letibaluleke kakhulu emavini aJesu ekugcina! Emavi akhe asikhumbuta kutsi kufanele sitsetselele labanye futsi setsembe kutsi natsi Jehova utasitsetselela. Sinelilungelo lekuba nebazalwane nabodzadze labanyenti ebandleni labakulungele kusisita, kodvwa nangabe sidzinga lusito kufanele silucele. Siyati kutsi Jehova utasisita sicinisele ngisho singabhekana naluphi luvivinyo. Sibonile nekutsi kubalulekile kutsi lilanga ngalinye silitsatse njengelitfuba letfu lekugcina lekukhombisa kuba cotfo, siciniseka kutsi Jehova utasivusa nangabe sesifile. w21.04 8 ¶1; 13 ¶17

Kulandzela tinyatselo taJesu kuholela ekuphileni lokuphakadze. Ngesikhatsi lelinye lijaha lelinjingile libuta kutsi yini lokufanele liyente kuze litfole kuphila lokuphakadze, Jesu watsi: ‘Wota ungilandzele.’ (Mat. 19:16-21) Kulamanye emaJuda lebekangakholwa kutsi unguKhristu, Jesu watsi: “Timvu tami . . . tiyangilandzela. Ngitatinika kuphila lokuphakadze.” (Joh. 10:24-29) Sikhombisa kutsi sinekukholwa kuJesu ngekutsi sisebentise loko lakufundzisa futsi sente loko lakwenta. Nasenta njalo, sitawuhlala endleleni leya ekuphileni lokuphakadze. (Mat. 7:14) Ngaphambi kwekutsi sitilandzele edvute tinyatselo taJesu, kufanele simati. ‘Kwati’ Jesu, yintfo lokufanele sichubeke siyenta. Kufanele sichubeke sifundza ngaye, sifundze ngebuntfu bakhe, indlela lacabanga ngayo nangetimiso takhe. Ngisho nobe singakanani sikhatsi sisecinisweni, kufanele sichubeke setama kwati Jehova neNdvodzana yakhe. w21.04 4 ¶9-10

Kungenteka betihle tiba khona tikhatsi lapho khona umphostoli Pawula bekeva buhlungu kakhulu ngetintfo latenta asengakabi ngumKhristu. Watibita ngekutsi usoni ‘lesihamba embili’ futsi loko akusimangalisi! (1 Thim. 1:15) Ngaphambi kwekutsi afundze liciniso, bekaphatsa kabi emaKhristu emadolobheni lamanyenti, avalela lamanye awo emajele, waphindze wasekela sincumo senkantolo sekubulala lamanye emaKhristu. (Imis. 26:10, 11) Ase ucabange nje kutsi Pawula bekeva buhlungu kakhulu kangakanani nakwenteka ahlangana nemKhristu losemusha lowashonelwa batali bakhe ngenca yakhe. Watisola ngemaphutsa lebekawentile, kodvwa bekati kutsi bekangeke asakushintja lebekwentekile. Bekakholwa kutsi Jesu wamfela, futsi wabhala watsi: “Ngemusa lomkhulu waNkulunkulu nginguloku lengingiko.” (1 Khor. 15:3, 10) Yini lesiyifundzako? Yemukela kutsi Khristu wakufela futsi wakuvulela indlela yekuba nebuhlobo lobuhle naJehova. (Imis. 3:19) Lokubalulekile kuNkulunkulu nguloko lesikhona kumentela kona nyalo nalesitawukwenta esikhatsini lesitako, hhayi emaphutsa lesawenta esikhatsini lesendlulile.​—Isa. 1:18. w21.04 23 ¶11

Nanobe emaJuda lamanyenti angesikhatsi saJesu bekangakalindzeli kutsi kutawudzingeka Mesiya afe, kodvwa naka naku lokwashiwo yimiBhalo: “Wanikela ngekuphila kwakhe futsi wabalwa kanye netoni; wetfwala sono sebantfu labanyenti, waphindze walamulela toni.” (Isa. 53:12) Ngako emaJuda bekete sizatfu sekungabata ngesikhatsi Jesu abulawa njengesoni. Lamuhla, kufuna onkhe emaciniso endzaba kungasisita kuze singayekeli kukhonta Jehova. ENshumayelweni yakhe yaseNtsabeni, Jesu wecwayisa labo bebamlalele kutsi labanye ‘batakusho konkhe lokubi’ ngabo. (Mat. 5:11) Umtfombo walamanga nguSathane. Wenta labo labaphikisako kutsi basakate emanga lamabi ngebantfu labatsandza liciniso. (Semb. 12:9, 10) Kufanele singawalaleli lamanga. Akukafaneli asente sesabe kukhonta Nkulunkulu nobe ente kukholwa kwetfu kube butsakatsaka. w21.05 11 ¶14; 12 ¶16

Sita umfundzi kutsi etsembele kuJehova. Jesu wacinisekisa bafundzi bakhe kutsi Jehova utawubasita ngobe uyabatsandza. (Mat. 10:19, 20, 29, 30) Khumbuta lofundza naye liBhayibheli kutsi Jehova utamsita. Ungamsita etsembele kuJehova ngekutsi uthantaze naye usho imigomo yakhe. Franciszek lohlala ePoland utsi: “Lobekangifundzisa bekavame kusho imigomo yami nakathantaza. Nangibona indlela Jehova bekayiphendvula ngayo imithantazo yakhe, ngekushesha nami ngacala kuthantaza. Bengibona kutsi Jehova uyangisita ngesikhatsi ngicela sikhatsi emsebentini wami lomusha kuze ngiye emhlanganweni welibandla newesifundza.” Jehova ubakhatsalela kakhulu labo lesifundza nabo liBhayibheli. Uyati kutsi bamemeteli basebenta kamatima kuze basite bantfu basondzelane naye, futsi ngenca yaloko uyabatsandza. (Isa. 52:7) Nangabe kusete lofundza naye liBhayibheli, ungabasita labafundzelwako kutsi batfutfuke baze babhajatiswe ngekutsi uhambe nalabanye bamemeteli nabayochuba tifundvo. w21.06 7 ¶17-18

Singakhombisa kutsi siyabonga ngalelilungelo lesinalo lekuba neliVi laNkulunkulu ngekutsi silifundze njalo. Kufanele sibe neluhlelo lwekufundza liBhayibheli futsi silidadishe, hhayi nje kutsi silifundze nasitfola sikhatsi. Nasiciniseka kutsi silifundza njalo, kukholwa kwetfu kutawuhlale kucinile. Ngalokungafani ‘nalabahlakaniphile nalabafundzile’ balelive, tsine sinekukholwa lokucinile lokusekelwe eVini laNkulunkulu. (Mat. 11:25, 26) LiBhayibheli liyasichazela kutsi kungani timo lamhlabeni tiba timbi kakhulu nangaloko Jehova latawukwenta. Ngako asitimisele kucinisa kukholwa kwetfu nekusita labanyenti kutsi babe nekukholwa kuMdali wetfu. (1 Thim. 2:3, 4) Shengatsi sonkhe singachubeka sisibuke ngalabovu sikhatsi lapho khona bonkhe labaphilako emhlabeni batawudvumisa Jehova, futsi basho emavi lakuSembulo 4:11 latsi: “Kukufanele Jehova Nkulunkulu wetfu kwemukela inkhatimulo . . . ngobe wadala tonkhe tintfo.” w21.08 19 ¶18-20

Njengobe babelusi, labadzala belibandla banemsebenti wekuniketa labanye seluleko nakudzingekile, lokuseluleko lesilusito ‘nalesitakwenta inhlitiyo ijabule.’ (Taga 27:9) Labadzala belibandla bayabatsandza bazalwane babo nabodzadze. Ngaletinye tikhatsi, lolutsandvo balukhombisa ngekutsi beluleke lotsite losengotini yekwenta intfo lembi. (Gal. 6:1) Ngaphambi kwekutsi lomdzala welibandla akhulume nalotsite, kungaba kahle kutsi acale acabange ngaletinye tintfo Pawula latisho mayelana nelutsandvo, nakatsi: “Lutsandvo luyabeketela futsi lunemusa. . . . Lucinisela kuto tonkhe tintfo, lukholwa ngito tonkhe tintfo, lwetsemba tonkhe tintfo, lubeketelela tonkhe tintfo.” (1 Khor. 13:4, 7) Kuzindla ngalamavesi kutawusita lomdzala welibandla kutsi acabangisise ngesizatfu sakhe sekuniketa seluleko futsi akhulume nalomzalwane ngendlela lekahle. Nangabe lona lowelulekwako abona kutsi lomzalwane lomdzala welibandla uyamkhatsalela, manyenti ematfuba ekutsi asemukele leseluleko. w22.02 14 ¶3; 15 ¶5

Jehova wadala tingilosi kanye nebantfu labete sono. Kodvwa ingilosi lebitwa ngekutsi nguSathane (lokusho kutsi “uMphikisi”) yavukela Jehova futsi yayenga bo-Adamu na-Eva lebebete sono kutsi nabo bavukele Jehova. Letinye tingilosi kanye nebantfu nabo bavukela. (Juda 6) Jehova weva buhlungu, kepha solo uyacinisela futsi utawuchubeka acinisela kuze kube ngulapho ababhubhisa bonkhe labamvukelako. Ngemuva kwaloko, Jehova kanye nalabo labetsembekile kuye batawujabula kutsi sekute sidzingo sekutsi bachubeke bacinisela kulelive lelibi! Sathane wasola Jobe lobekayinceku yaJehova lecotfo kanye nato tonkhe tinceku taJehova letetsembekile kutsi tikhonta Nkulunkulu ngobe kukhona letitakutfola kuye. (Jobe 1:8-11; 2:3-5) Develi uyachubeka asola bantfu kuze kube ngulamuhla. (Semb. 12:10) Singakhombisa kutsi Sathane unemanga ngekutsi sicinicele nasibhekene netilingo futsi sihlale setsembekile kuJehova ngenca yekutsi siyamtsandza. w21.07 9 ¶7-8

Umphostoli Pawula wasebentisa umfanekiso kuze asifundzise kutsi kubaluleke kangakanani kwenta lushintjo ekuphileni kwetfu. Wabhala watsi kufanele sibetsele buntfu betfu lobudzala “elugodvweni.” (Rom. 6:6) Ngalamanye emagama, kufanele silingise sibonelo saKhristu. Kufanele siyekele kucabanga ngendlela Jehova langayitsandzi futsi siyekele nekwenta tintfo latenyanyako. Nangabe senta njalo sitawuba nanembeza lomsulwa futsi sibe nelitsemba lekuphila kuze kube phakadze. (Joh. 17:3; 1 Phet. 3:21) Jehova angeke aze ashintje timiso takhe kuze nje tivumelane naloko tsine lesikufunako. Kunaloko, kufanele sishintje buntfu betfu futsi silalele timiso takhe. (Isa. 1:17, 18; 55:9) Ngisho nangemuva kwekubhajatiswa, kutawudzingeka kutsi uchubeke ulwa netifiso letimbi. Thantaza kuJehova ucele akusite futsi wetsembele emoyeni wakhe longcwele hhayi emandleni akho. (Gal. 5:22; Fil. 4:6) Kufanele sisebente kamatima nangabe sifuna kukhumula buntfu lobudzala futsi singaphindzi sibugcoke. w22.03 6 ¶15-17

Jehova wetsembisa kutsi utasipha kudla, kwekwembatsa, kanye nendzawo yekuhlala nangabe sifuna kucala uMbuso wakhe futsi siphila ngekuvumelana netimiso takhe letilungile. (Mat. 6:33) Nangabe sisetsemba lesetsembiso, angeke sicabange kutsi umcebo walelive utasivikela futsi usente sijabule. Siyati kutsi lokukuphela kwendlela lesingatfola ngayo kuthula mbamba kutsi sente intsandvo yaJehova. (Fil. 4:6, 7) Ngisho nobe singakhona kutsenga tintfo letinyenti, kufanele sicabange kutsi sinaso yini vele sikhatsi nobe emandla ekutisebentisa nekutinakekela. Kungenteka yini sititsandze kakhulu tintfo lesinato? Khumbula kutsi Nkulunkulu usinikete umsebenti lokufanele siwente emndenini wakhe. Loko kusho kutsi akukafaneli sivume kuphazamiseka. Asifuni kulingisa lendvodza leyala kukhonta Jehova futsi ibe ngulenye yemadvodzana akhe ngenca nje yekutsi beyitsandza tintfo letimbalwa talamhlabeni!​—Mak. 10:17-22. w21.08 6 ¶17

Njengobe udadisha liBhayibheli, utawufundza ngebuntfu baJehova, futsi lobu buntfu lobufanako lobufundze nawubuka indalo. Kufundza ngebuntfu baJehova kuyasicinisekisa kutsi unguMuntfu mbamba. (Eks. 34:6, 7; Hla. 145:8, 9) Njengobe umati kancono Jehova, kukholwa kwakho kuye kutawucina nendlela lomtsandza ngayo ikhule futsi nibe bangani labakhulu. Cocela labanye ngaloko lokukholelwako ngaNkulunkulu. Utawenta njani nangabe umuntfu lomshumayelako akubuta umbuto lomayelana nekutsi Nkulunkulu ukhona mbamba yini, futsi ungaciniseki ngekutsi utamphendvula njani? Yetama kufuna imphendvulo lesekelwe eBhayibhelini etincwadzini tetfu lekhuluma ngalendzaba, bese ucoca ngayo nalomuntfu. Ungaphindze ucele lomunye Fakazi akusite kutsi uphendvule lombuto. Ngisho nobe lomuntfu akwemukela loko lokushiwo liBhayibheli nobe angakwemukeli, utawuzuza kulolucwaningo. Kukholwa kwakho kutawucina. w21.08 18 ¶14-15

Kute sidzingo sekutsi sidzele tonkhe tintfo lesinato kuze sijabulise Jehova. (Shu. 5:19, 20) Nobe kunjalo, kube besingayekela kwenta lokunyenti emsebentini waJehova, ngenca nje yekutsi asifuni kudzela letinye tintfo lesititsandzako, besitawufana nalendvodza lesemfanekisweni waJesu, leyasebenta kamatima kuze ibe netintfo letinhle letinyenti kodvwa yangamnaki Nkulunkulu. (Luk. 12:16-21) Nasinetinkinga, siyathantaza sicele lusito, futsi sicabangisise ngalesitakwenta kuze sitincobe. (Taga 3:21) Jehova usibusisa ngetindlela letinyenti. Singakhombisa kutsi sibonga kakhulu ngetintfo lasentela tona ngekutsi sente konkhe lesingakhona kukwenta kuze simdvumise. (Heb. 13:15) Loko kungafaka ekhatsi kumentela tintfo letinyenti kuze simkhonte, futsi Jehova angasibusisa kakhulu ngenca yaloko. Shengatsi onkhe malanga singafuna tindlela ‘tekunambitsa futsi sibone kutsi Jehova muhle.’ (Hla. 34:8) Nasenta njalo, sitawufana naJesu lowatsi: “Kudla kwami kwenta intsandvo yaloyo longitfumile nekutsi ngicedze umsebenti wakhe.”​—Joh. 4:34. w21.08 30-31 ¶16-19

Sathane ufuna kutsi sitigcabhe. Uyati kutsi nangabe sitigcabha sitawufanana naye, futsi singakutfoli kuphila lokuphakadze. Ngako umphostoli Pawula wecwayisa kutsi kungenteka umuntfu “agcwale umgcabho bese utfola sehlulelo lesatfolwa nguDeveli.” (1 Thim. 3:6, 7) Loko kungenteka kunobe ngubani kitsi, ngisho nobe sisandza kucala kukhonta Jehova nobe sesimkhonte iminyaka leminyenti. Umuntfu lotigcabhako uticabangela yena. Sathane wetama kusenta kutsi siticabangele tsine kunekucabanga ngaJehova, ikakhulukati nangabe sinetinkinga. Nasi sibonelo, uke wasolwa yini ngentfo longakayenti? Uke waphatfwa yini kabi? Sathane angajabula kukubona usola Jehova nobe bazalwane bakho. Develi ufuna ucabange kutsi indlela yekucatulula lenkinga kutsi wente tintfo ngendlela yakho kunekulandzela sicondziso Jehova lakuniketa sona eVini lakhe.​—Shu. 7:16, 20. w21.06 15 ¶4-5

Jehova waniketa umphrofethi Hagayi umsebenti lobalulekile kutsi awente. Kungenteka Hagayi bekasemkhatsini walabo lababuyela eJerusalema nga-537 B.C.E., babuya ekutfunjweni eBhabhulona. Ngekushesha nje ngemuva kwekutsi letikhonti letetsembekile tifike eJerusalema, tacala kwakha indlu yaJehova, nobe lithempeli. (Ezra 3:8, 10) Kodvwa kwatsi kungakapheli sikhatsi lesingakanani, kwenteka lokutsite lokwaticedza emandla. Tadvumateka futsi tayekela kwakha ngenca yekuphikiswa. (Ezra 4:4; Hag. 1:1, 2) Ngako nga-520 B.C.E., Jehova watfuma Hagayi kulamaJuda kutsi awasite aphindze abe nemdlandla futsi awakhutsate kuze acedze kwakha lelithempeli. (Ezra 6:14, 15) Injongo yalomlayeto waHagayi bekukucinisa kukholwa kwemaJuda kuJehova. Kungenteka lamavi latsi “Jehova wemabutfo” awacinisa lamaJuda. Jehova unelibutfo lelikhulu letingilosi, ngako emaJuda bekufanele etsembele kuye kuze aphumelele. w21.09 15 ¶4-5

Lamuhla, BoFakazi BaJehova emhlabeni wonkhe bayatsandzana futsi banebunye. Asifani naletinye tinkholo ngobe sinjengemndeni, ngisho nobe sivela emaveni lehlukene futsi sinemasiko langafani. Loku sikubona emihlanganweni yetfu yelibandla, yesigodzi neyesifundza. Lobufakazi buyasicinisekisa kutsi sikhonta Jehova ngendlela layemukelako. (Joh. 13:34) ImiBhalo isikhutsata kutsi ‘sitsandzane kakhulu.’ (1 Phet. 4:8) Lenye indlela lesikhombisa ngayo kutsi siyatsandzana kutsi sicolelane futsi sibeketelelane. Siphindze sifune ematfuba ekupha labanye ebandleni futsi sibemukele emakhaya etfu, loko sikwenta ngisho nakulabo labasiphetse kabi. (Khol. 3:12-14) Nangabe sitsandzana ngalendlela, sikhombisa kutsi singemaKhristu eliciniso. w21.10 22 ¶13-14

Kuyekelisa umuntfu kuba nguFakazi kungamsita yini kutsi aphendvuke? Yebo. Labanyenti labente sono lesikhulu batfole kutsi sincumo lesicinile salabadzala belibandla sibasitile kuze basanguluke, bashintje tento tabo futsi babuyele kuJehova. (Heb. 12:5, 6) Cabanga nganangu umfanekiso. Asesitsi umelusi ubona lenye imvu yakhe kutsi iyagula. Uyati kutsi kuze ayelaphe lokugula kufanele ayehlukanise nemhlambi. Nanobe kunjalo, timvu tiyakutsandza kuba naletinye timvu. Tiyakutsandza kuba nemhlambi, futsi atijabuli natehlukaniswe nawo. Kodvwa njengobe umelusi ayehlukanisa naletinye timvu, loku kusho kutsi ute yini luvelo? Unalo. Uyati kutsi nakayivumela ibe naletinye timvu, lokugula kutawutfolwa nanguleti letinye. Ngako, usuke avikela umhlambi nakayehlukanisa nawo. w21.10 10 ¶9-10

Sibonga kakhulu ngekutsi sinemndeni webazalwane nabodzadze labasemhlabeni wonkhe futsi labatsandzanako. Sifuna kutsi bantfu labanyenti bakhonte Nkulunkulu wetfu kanye natsi. Sinaloko engcondvweni, asifuni kwenta intfo letawenta bantfu labanyenti bacabange lokubi ngebantfu baJehova nobe ngaBabe wetfu wasezulwini. Setama kutiphatsa ngendela letawenta kutsi bantfu batitsandze tindzaba letimnandzi. Ngaletinye tikhatsi, kungenteka labanye basibukele phansi nobe basiphatse kabi ngobe silalela Babe wetfu wasezulwini. Nasicocela labanye ngaloko lesikukholelwako, yini lesingayenta nangabe sesaba? Singaciniseka kutsi Jehova kanye neNdvodzana yakhe batasisita. Jesu watjela bafundzi bakhe kutsi bangakhatsateki ngekutsi batawukhuluma kanjani nobe batsini. Kungani? Watsi: “Loko leniyawukusho niyawunikwa kona ngaleso sikhatsi, ngobe akusini leniyawukhuluma, kodvwa ngumoya waBabe wenu lotanisita kutsi nikhulume.”​—Mat. 10:19, 20. w21.09 24 ¶17-18

Mosi wasebentisa umfanekiso lofanako lokhuluma ngendzawo yekukhosela lephephile. (Hla. 90:1, umbhalo longentasi) Ngetulu kwaloko, ngesikhatsi Mosi sekatawufa, washo nawa emavi latsintsa inhlitiyo. Wabhala watsi: “Nkulunkulu usiphephelo lebesisolo sikhona kusukela endvulo, tandla takhe letihlala njalo tingephansi kwakho.” (Dut. 33:27) Emavi latsi “tandla takhe letihlala njalo tingephansi kwakho” asitjelani ngaJehova? Sitiva sivikelekile nangabe Jehova aSiphephelo setfu. Kodvwa ngaletinye tikhatsi sihle sitiva sidvumatekile, singakhoni ngisho nekwentani. Etikhatsini letinjalo, yini Jehova latasentela yona? (Hla. 136:23) Utawufaka tandla takhe ngephansi kwetfu, asiphakamise futsi asisite sikhone kuphindze sitimele. (Hla. 28:9; 94:18) Siyati kutsi singahlala setsembele kuNkulunkulu. Loko kusisita ngetindlela letimbili. Kwekucala, sinendzawo levikelekile lesingaphephela kuyo ngisho nobe sihlala kuphi. Kwesibili, Babe wetfu wasezulwini lositsandzako usikhatsalela mbamba. w21.11 6 ¶15-16

Jesu bekati kutsi kuphatfwa kabi bekutakuvivinya kukholwa kwebafundzi bakhe. Kuze abasite bakhone kubhekana nako, washo umfanekiso lobhalwe encwadzini yaLukha. Jesu wabatjela ngendzaba yemfelokati lobekachubeka ancenga umehluleli longakalungi kutsi ayehlulele kahle indzaba yakhe. Bekaciniseka kutsi lomehluleli bekatawugcine amsitile. Ekugcineni, lomehluleli wamsita. Yini lesiyifundzako? Jehova ulungile. Ngako Jesu watsi: “Nkulunkulu ngeke yini abentele lokulungile labakhetsiwe bakhe, labakhala kuye busuku nemini?” (Luk. 18:1-8) Wachubeka watsi: “Nayifika iNdvodzana yemuntfu, itakutfola yini kukholwa lokunjengaloku emhlabeni?” Nangabe siphatfwa kabi, singakhombisa kutsi sinekukholwa lokucinile njengalokwalomfelokati ngekutsi sibeketele futsi sicinisele. Nasinekukholwa lokunjengaloku, singaciniseka kutsi ngekushesha Jehova utasisita. Kufanele sikholwe nekutsi umthantazo unemandla. w21.11 23 ¶12; 24 ¶14

Nine labasha, nihle niva shengatsi timiso taJehova tinivimbela kutsi nente tintfo lenitifunako yini? Sathane ufuna nicabange kanjalo. Ufuna ninake loko lokwentiwa ngulabo labahamba endleleni levulekile, nibone shengatsi bayakujabulela kuphila. Angahle asebentise loko lokubona kwentiwa ngulofundza nabo esikolweni, nobe loko lokubona ku-Internet kuze akwente uve shengatsi uyashiyeka. Sathane ufuna ucabange kutsi timiso taJehova tikuvimbela kutsi ukujabulele kuphila. Kodvwa khumbula naku: Sathane akafuni kutsi labo labahamba endleleni yakhe babone kutsi lendlela ibaholela kuphi. (Mat. 7:13, 14) Kodvwa Jehova ukwente kwacaca kutsi yini letawutfolwa ngulabo labahamba ngalendlela leya ekuphileni.​—Hla. 37:29; Isa. 35:5, 6; 65:21-23. w21.12 23 ¶6-7

Siyati kutsi kufanele sicolele; futsi yintfo lekahle kutsi siyente. Kodvwa kungahle kube matima kwenta njalo. Kungenteka ngaletinye tikhatsi umphostoli Phetro bekativa ngalendlela. (Mat. 18:21, 22) Yini lengasisita? Kwekucala, zindla ngekutsi kukanyenti kangakanani Jehova akucolela. (Mat. 18:32, 33) Kute lokusenta sifanelwe kutsetselelwa nguye, kodvwa usitsetselela ngalokukhululekile. (Hla. 103:8-10) Ngesikhatsi lesifanako, “natsi sibophekile kutsi sitsandzane.” Ngako kutsetselela akusiyo intfo lesingakhetsa kuyenta nobe kungayenti. Kufanele sibatsetselele bazalwane nabodzadze. (1 Joh. 4:11) Kwesibili, zindla ngaloko lokwentekako nasitsetselela. Singamsita lomuntfu losonile, sente libandla libe nebunye, sihlale sibangani baJehova futsi sijabule. (2 Khor. 2:7; Khol. 3:14) Kwekugcina, thantaza kuLoyo losicela kutsi sicolele. Ungamvumeli Sathane aphazamise kuthula lonako nebazalwane bakho. (Ef. 4:26, 27) Sidzinga kusitwa nguJehova kuze sibe nekuthula ebandleni. w21.06 22 ¶11; 23 ¶14

Davide bekabaleka kuze asindzise kuphila kwakhe. Inkhosi lenemandla yaka-Israyeli lokutsiwa nguSawula beyifuna kumbulala. Ngesikhatsi Davide adzinga kudla, wafike wema edolobheni lokutsiwa yiNobi, wacela tinkhwa letisihlanu. (1 Sam. 21:1, 3) Ngekuhamba kwesikhatsi, yena nemadvodza lebekahamba nawo bakhosela emhumeni. (1 Sam. 22:1) Yini leyenta Davide waba kulesimo? Sawula bekamdlela umona kakhulu Davide ngenca yekutsi bekatsandvwa bantfu futsi ancoba etimphini. Bekati nekutsi kungalaleli kwakhe lokwenta Jehova wangasamemukeli kutsi abe yinkhosi yaka-Israyeli futsi wakhetsa Davide kutsi abe yinkhosi. (1 Sam. 23:16, 17) Nobe kunjalo, Sawula bekasolo ayinkhosi, anelibutfo lelikhulu nebalandzeli labanyenti, ngako kwadzingeka kutsi Davide abaleke kuze asindzise kuphila kwakhe. Sawula bekacabanga kutsi vele kukhona yini lokungavimba Nkulunkulu angambeki Davide kutsi abe yinkhosi? (Isa. 55:11) LiBhayibheli alisho, kodvwa kunye lesingaciniseka ngako: Kutsi Sawula bekatibeka engotini. Labo labalwa naNkulunkulu abaphumeleli! w22.01 2 ¶1-2

Jesu watikhandla emsebentini wekushumayela. Wakhombisa kutsi uyabatsandza bantfu ngekutsi asebentise lonkhe litfuba lelivelako kuze abashumayele. (Luk. 19:47, 48) Yini leyamenta kutsi ente njalo? Bekabavela bantfu. Ngaletinye tikhatsi labo bebafuna kuva loko Jesu lakushoko bebaba banyenti kangangekutsi yena nebafundzi bakhe ‘bebangalitfoli ngisho nelitfuba lekudla.’ (Mak. 3:20) Lenye indvodza lebekacoca nayo beyitfolakala ebusuku futsi bekakulungele kucoca nayo ngaleso sikhatsi. Linyenti lalabo labalalela Jesu, alizange libe bafundzi bakhe. Kodvwa bonkhe labo labamuva, bashunyayelwa. Lamuhla sifuna kuniketa bonkhe bantfu litfuba lekuva tindzaba letimnandzi. (Imis. 10:42) Kuze sikhone kukwenta loko, kungahle kudzingeke sente lushintjo endleleni lesiwenta ngayo umsebenti wekushumayela. Kunekutsi sishumayele ngesikhatsi lesitawulungela tsine, kufanele sikulungele kushumayela ngesikhatsi lapho sitawutfola khona bantfu labanyenti. Nasenta njalo, singaciniseka kutsi Jehova utawujabula. w22.01 17 ¶13-14

Bantfu labanyenti bakutfola kumatima kwetsemba labo labasemagunyeni. Babonile kutsi bohulumende labanyenti nemitsetfo leminyenti kuvame kuvikela labanjingile nalabadvumile kodvwa kungabasiti kangako labaphuyile. Ngetulu kwaloko, labanye baholi benkholo benta tintfo letimbi. Loko kwente kutsi labanye bantfu bangasametsembi Nkulunkulu. Ngako nasidadisha liBhayibheli nemuntfu, kufanele simsite etsembe Jehova nalabo labammelelako emhlabeni. Akusibo lesidadisha nabo liBhayibheli kuphela lokufanele bafundze kwetsemba Jehova nenhlangano yakhe. Ngisho nobe sekuphele iminyaka leminyenti sikhonta Jehova, natsi kufanele sihlale setsemba kutsi wenta tintfo ngendlela lelungile. Kodvwa ngaletinye tikhatsi kwenteka intfo letsite lengasivivinya kutsi simetsemba kangakanani Jehova. w22.02 2 ¶1-2