December

Jesu wacatsanisa buhlobo lanabo nebalandzeli bakhe nebuhlobo umelusi lanabo netimvu takhe. (Joh. 10:14) Jesu wasebentisa umfanekiso lomuhle. Timvu tiyamati umelusi wato futsi tiyalilalela livi lakhe. Lenye indvodza yabona kutsi loku kuliciniso. Yatsi: “Besetama kutsatsa titfombe tetimvu, ngako setama kutenta kutsi tisondzele kitsi. Kodvwa atizange tite kitsi ngobe betingalati livi letfu. Kwabese kufika umfanyana longumelusi wato; watsi nje nakatibita tamlandzela.” Lokwabonwa ngulendvodza kusikhumbuta emavi aJesu lamayelana netimvu takhe, lokubafundzi bakhe. Watsi: “Titalilalela livi lami.” Kodvwa Jesu usezulwini. Ngako, singamlalela njani? Indlela lehamba embili lesingakhombisa ngayo kutsi siyamlalela Jesu, kutsi sikwente loko lasifundzisa kona.​—Mat. 7:24, 25. w21.12 16 ¶1-2

Umphostoli Pawula bekawaphatsa kabi kakhulu emaKhristu. Kodvwa ngekuhamba kwesikhatsi wabona kutsi loko bekakwenta bekukabi, futsi watimisela kushintja buntfu bakhe nendlela bekacabanga ngayo. (1 Thim. 1:12-16) Ngekusitwa nguJehova, Pawula waba ngulomdzala welibandla lonelutsandvo, lonesihawu nalotfobekile. Akazange achubeke acabanga ngemaphutsa akhe, kunaloko beketsemba kutsi Jehova utamcolela. (Rom. 7:21-25) Bekati kutsi utawenta emaphutsa. Wasebenta kamatima kuze atfutfukise buntfu bakhe bebuKhristu futsi wetsembela kuJehova kutsi amsite kuze akhone kufeza umsebenti wakhe. (1 Khor. 9:27; Fil. 4:13) Labadzala belibandla bayawenta emaphutsa. Kodvwa Jehova ulindzele kutsi bawavume emaphutsa abo futsi batfutfukise buntfu babo bebuKhristu. (Ef. 4:23, 24) Lomdzala welibandla kufanele atihlole asebentisa liVi laNkulunkulu bese wenta lushintjo loludzingekile. Nakenta njalo, Jehova utamsita kutsi ajabule futsi aphumelele.​—Jak. 1:25. w22.03 29-30 ¶13-15

Yini lokufanele siyente nangabe sibona kutsi sehlulele lomunye umKhristu? Kufanele sikhumbule kutsi kufanele sibatsandze bazalwane betfu. (Jak. 2:8) Ngetulu kwaloko, kufanele sithantaze, sincenge Jehova kutsi asisite siyekele kwehlulela labanye. Singenta loko lesikuthantazele ngekutsi sicitse sikhatsi naloyo lesimehlulele. Singamcela kutsi ahambe natsi nasiyoshumayela nobe simcele kutsi asivakashele sitodla naye. Njengobe simati kancono umzalwane wetfu, singetama kulingisa sibonelo saJehova naJesu ngekutsi sibuke lokuhle kuye. Nasenta njalo, sitawube siyakhombisa kutsi siyawulalela umyalo wemelusi lomuhle lotsi asiyekele kwehlulela. Njengobe timvu tililalela livi lemelusi wato, nebalandzeli baJesu bayalilalela livi lakhe. Ngisho nobe siyincenye ‘yemhlambi lomncane’ nobe ‘singuletinye timvu,’ shengatsi singachubeka sililalela livi lemelusi lomuhle.​—Luk. 12:32; Joh. 10:11, 14, 16. w21.12 19 ¶11; 21 ¶17-18

Ngesikhatsi Rehobhowamu aba yinkhosi yaka-Israyeli, bantfu lebekababusa beta kuye batokhuluma naye. Bamcela kutsi abaphatse kahle kunababe wakhe Solomoni. Rehobhowamu wenta kahle ngobe wabuta emadvodza lamadzala aka-Israyeli kutsi abaphendvule njani labantfu. Lamadvodza lamadzala amtjela kutsi akente lokufunwa ngulabantfu kuze batochubeka bamsekela. (1 Khos. 12:3-7) Kungenteka, Rehobhowamu asizange simenetise leseluleko, ngako wacela seluleko kulamanye emadvodza labekakhule nawo. Amtjela kutsi acindzetele labantfu. (1 Khos. 12:9-11) Njengobe besekaneteluleko letimbili, bekangathantaza kuJehova ambute kutsi asebentise siphi seluleko. Kunekutsi ente njalo, wasebentisa seluleko lasitsandzako, walalela lamadvodza lasemasha. Ngenca yaloko, Rehobhowamu nebantfu baka-Israyeli babhekana nemiphumela lebuhlungu. Lamuhla, singahle singasitsandzi seluleko lesiniketwa sona. Kodvwa nangabe sisekelwe eVini laNkulunkulu kufanele sisemukele. w22.02 9 ¶6

Umuntfu lotfobekile nalovumako kutsi kunetintfo langeke akhone kutenta, unaka emandla alabasebasha kunekunaka kutsi kusenalokunyenti lokufanele bakufundze. Ubatsatsa njengetisebenti lakanye nato kunekutsi acabange kutsi bancintisana naye. Lasebakhulile batsatsa labasebasha njengetipho letivela kuJehova futsi bayabonga ngemisebenti labayentako. Njengobe emandla ancipha, lasebakhulile bayabonga ngekutsi labasha bayafuna kusebenta futsi banawo emandla ekwenta kanjalo, basite nelibandla. LiBhayibheli likhuluma ngaNawomi losibonelo lesihle salosakhulile lowakujabulela kusitwa ngulosemusha. Ekucaleni, Nawomi wacela Ruthe lobekangumakoti wakakhe futsi angumfelokati kutsi abuyele emndenini wakubo. Kodvwa ngesikhatsi Ruthe ala kubuyela emndenini wakubo futsi afuna kuhamba naye eBetlehema, Nawomi wavuma. (Rut. 1:7, 8, 18) Loko kwabasita bobabili labafati! (Rut. 4:13-16) Kutfobeka kutawenta lasebakhulile balingise sibonelo saNawomi. w21.09 10-11 ¶9-11

Babe wetfu wasezulwini uyakwati loko ngamunye wetfu langakhona kukwenta. Mhlawumbe wena ungakhona kwenta lokunyenti kunalabo lobatiko futsi lobatsandzako. Nobe kungenteka ungakhoni kwenta lokunyenti njengalabanye mhlawumbe ngenca yekukhula, ngenca yemphilo nobe ngenca yekutsi kufanele unakekele umndeni wakho. Kungakudvumati loko. (Gal. 6:4) Jehova angeke awukhohlwe umsebenti wakho. Utawujabula nangabe wenta konkhe longakhona kukwenta futsi ukwenta ngetizatfu letinhle. Jehova uyakubona naloko lofisa kukwenta. Ufuna ujabule ngako konkhe lokhona kumentela kona. Kwanyalo sinekuthula ngobe siyati kutsi Jehova uyabasita bantfu bakhe nabanetinkinga. (Isa. 41:9, 10) Sinetizatfu letinhle tekujabula njengobe sikhonta Babe wetfu lositsandzako lokumfanele ‘kwemukela inkhatimulo neludvumo’ kuyo yonkhe indalo yakhe!​—Semb. 4:11. w22.03 24 ¶16; 25 ¶18

Sifuna kulingisa Jesu, kodvwa akukafaneli siphele emandla nangabe singakhoni kumlingisa ncamashi. (Jak. 3:2) Umfundzi lofundza kudvweba angahle angakhoni kudvweba ncamashi njengathishela wakhe. Kodvwa njengobe afundza emaphutseni lawentako, futsi etame kudvweba njengathishela wakhe, utawutfutfuka kancane kancane. Ngendlela lefanako, nangabe sikwenta loko lesikufundza nasitidadishela liBhayibheli, sente lokusemandleni etfu kuze silungise emaphutsa lesiwentako, singakhona kumlingisa Jesu. (Hla. 119:59) Bantfu labanyenti kulelive baticabangela bona. Kodvwa bantfu baJehova abafani nabo. Siyasikhutsata sibonelo saJesu sekusita labanye futsi natsi sitimisele kumlingisa. (1 Phet. 2:21) Nasilingisa sibonelo saJesu sekusita labanye, sitawujabula ngobe siyati kutsi Jehova uyasemukela. w22.02 24 ¶16; 25 ¶18

Lamuhla, Jehova ucondzisa bantfu bakhe asebentisa liVi lakhe liBhayibheli. Nangabe sitinika sikhatsi sekuzindla ngaloko Jehova lasifundzisa kona sitawukhona kusilalela sicondziso sakhe futsi sente nemsebenti wekushumayela. (1 Thim. 4:15, 16) Jehova uphindze asinikete sicondziso asebentisa ‘sisebenti lesetsembekile nalesihlakaniphile.’ (Mat. 24:45) Ngalesinye sikhatsi, lesisebenti singasinika sicondziso lesingasicondzi kahle. Sibonelo nje, singatfola ticondziso letentelwe kutsi silungele sehlakalo semvelo futsi lesicabanga kutsi angeke senteke endzaweni lesihlala kuyo. Yini lokufanele siyente nasiva shengatsi ticondziso lesititfolako atisebenti kitsi? Cabanga ngaletinye tindzaba lesitifundze eBhayibhelini. Ngaletinye tikhatsi bantfu baJehova batfole ticondziso lebetibonakala shengatsi angeke tisebente kodvwa letakusindzisa kuphila kwebantfu.​—Khu. 7:7; 8:10. w22.03 18-19 ¶15-16

Jesu washo lamavi lasembhalweni welusuku lwalamuhla ngekuciniseka lokukhulu. Bekati kutsi likusasa lakhe lisetandleni taJehova, futsi bekaciniseka kutsi Babe wakhe utamkhumbula. Yini lesingayifundza emavini aJesu? Hlala wetsembekile kuJehova ngisho nobe kuphila kwakho kusengotini. Kuze ukhone kukwenta loko, kudzingeka wetsembe “Jehova ngayo yonkhe inhlitiyo yakho.” (Taga 3:5) Cabanga ngesibonelo saJoshua, lobekaneminyaka lengu-15, futsi anesifo lesingelapheki. Wala kwelashwa ngendlela lebeyishayisana nemtsetfo waNkulunkulu. Ngaphambi kwekutsi afe, watjela make wakhe watsi: “Make, Jehova utanginakekela. . . . Loku ngikusho ngekuciniseka lokukhulu: Ngiyati kutsi nakanjani Jehova utangivusa ekufeni. Uyakwati lengikucabangako nendlela lengitiva ngayo, futsi ngimtsandza kakhulu.” Sonkhe kufanele sitibute, ‘Nangabe kukholwa kwami kuvivinywa ngulokutsite lokungangenta kutsi ngife, ngingahlala yini ngetsembekile kuJehova futsi ngetsembe kutsi utangikhumbula?’ w21.04 12-13 ¶15-16

Umsebenti wekushumayela ubaniketa emandla bantfu baJehova. Nasicocela labanye ngemaciniso laseBhayibhelini, siyajabula ngisho nobe bantfu basilalela nobe bangasilaleli. Ngenca yetimo labakuto, labanye bangahle beve shengatsi abakhoni kwenta lokunyenti emsebentini wekushumayela. Nawutiva ngaleyondlela, khumbula kutsi Jehova uyajabula nawenta konkhe lokusemandleni akho. Jehova uyati kutsi labanye betfu bayafuna kushumayela kodvwa abakhoni kuphuma endlini. Ngako angasisita sishumayele labo labasinakekelako nabodokotela nobe bonesi. Singadvumateka nasingacatsanisa loko besikhona kukwenta ngaphambili nalesikhona kukwenta nyalo. Kodvwa nasibona indlela Jehova lasisita ngayo nyalo, singaba nemandla lesiwadzingako kuze sibeketelele nobe nguluphi luvivinyo sibe sijabulile. Asati kutsi nguyiphi inhlanyelo yeliciniso lesiyihlanyelako letawuhluma futsi ikhule.​—Shu. 11:6. w21.05 24-25 ¶14-17

Bukhali benta iNkhosi Davide yakhohlwa ngako konkhe Jehova lebekayinike kona, lokufaka ekhatsi umcebo, ludvumo nekuncoba titsa tayo letinyenti. Davide wavuma kutsi tipho lebekatiphiwe nguNkulunkulu ‘betitinyenti kakhulu kutsi angatibala!’ (Hla. 40:5) Kodvwa ngalesinye sikhatsi, wakukhohlwa konkhe loko Jehova bekamnikete kona. Nanobe Davide bekanebafati labanyenti, kodvwa wavumela sifiso lesibi ngemfati walenye indvodza sakheka enhlitiyweni yakhe. Lomfati bekunguBhatisheba, indvodza yakhe kungu-Uriya umHethi. Davide walala naBhatisheba futsi wakhulelwa. Loko Davide lakwenta bekukubi, kodvwa wenta intfo lembi kakhulu ngobe wahlela kutsi Uriya abulawe! (2 Sam. 11:2-15) Bekacabangani Davide? Bekacabanga kutsi Jehova angeke yini abone? Nanobe bekakhonte Jehova sikhatsi lesidze, waba bukhali futsi loko kwambangela kuhlupheka lokukhulu. Kodvwa lokuhle kutsi ngekuhamba kwesikhatsi, wasivuma sono sakhe futsi waphendvuka. Wajabula kakhulu ngekutsi Jehova wamcolela!​—2 Sam. 12:7-13. w21.06 17 ¶10

Singahle sicabange kutsi angeke sikhone kudadisha liBhayibheli nemuntfu. Kungenteka sicabanga kutsi kudzingeka sibe nelwati lolunyenti nobe likhono lekufundzisa ngaphambi kwekutsi sidadishe liBhayibheli nemuntfu. Nangabe utiva ngalendlela, cabanga nganati tintfo letintsatfu letingakusita uciniseke kutsi ungakhona. Kwekucala, Jehova uyabona kutsi uyakufanela kufundzisa labanye. Kwesibili, Jesu lonalo “lonkhe ligunya ezulwini nasemhlabeni,” ukunike umyalo wekutsi ufundzise. (Mat. 28:18) Kwesitsatfu, ungetsembela kulabanye kutsi bakusite. Jesu wetsembela kuloko Babe wakhe lamfundzisa kutsi akukhulume, futsi nawe ungenta njalo. (Joh. 8:28; 12:49) Ngetulu kwaloko, ungacela umbonisi welicembu lokulo nobe lihlahlandlela lelinelikhono lekufundzisa, nobe ummemeteli kutsi akusite ucalise sifundvo seliBhayibheli futsi uchubeke ufundza naloyo muntfu. Lenye indlela longafundza ngayo kuba ngumfundzisi lokahle kutsi ube khona nangabe labamemeteli badadisha liBhayibheli nemuntfu. w21.07 6 ¶12

Njengobe kuphela kwalelive kusondzela, kufanele siyetsembe kakhulu indlela Jehova lenta ngayo tintfo. Ngasiphi sizatfu? Ngesikhatsi sekuhlupheka lokukhulu, kungenteka sitawutfola ticondziso lokutawuba matima kuticondza nobe kutilalela. Jehova angeke akhulume natsi ngalokucondzile. Kungenteka asinikete ticondziso ngalabo labammelele. Leso kutawube kungasiso sikhatsi sekungabata lesicondziso nobe sekutsi sitibute kutsi, ‘Sivela kuJehova yini nobe bazalwane labaholako benta labakufunako?’ Utawumetsemba yini Jehova nenhlangano yakhe ngaleso sikhatsi? Imphendvulo ungayitfola kuloko lokwentako nyalo nawutfola sicondziso lesivela enhlanganweni yaJehova. Nangabe usetsemba sicondziso lositfolako lamuhla futsi usilalele, manyenti ematfuba ekutsi wente lokufanako nangekuhlupheka lokukhulu. w22.02 6 ¶15

Jehova wasita Gideyoni kanye nemadvodza langu-300 lebekahamba nawo kutsi bancobe emphini futsi loko bekungabenta batigcabhe. Emadvodza aka-Efrayimu aya kuGideyoni kuze ayosusa lutfuli hhayi kutsi amncome. Bewatfukutsele ngobe Gideyoni akazange awabite kutsi baye emphini. (Khu. 8:1) Gideyoni wawakhumbuta ngendlela Jehova lawasita ngayo kuze ente tintfo letinkhulu. Ngenca yaloko, ‘ehlisa umoya.’ (Khu. 8:3) Gideyoni watitfoba kuze alondvolote kuthula emkhatsini webantfu baNkulunkulu. Emadvodzeni aka-Efrayimu, sifundza kutsi akukafaneli sinake kutifunela ludvumo kodvwa kufanele sinake kakhulu kudvumisa Jehova. Tinhloko temindeni nalabadzala belibandla bangafundza lokutsite kuGideyoni. Nangabe lotsite aphatseke kabi ngenca yalabakushito kufanele betame kutfola kutsi yini lelemphetse kabi. Bangamncoma ngalokuhle lakwentile. Kutawudzingeka batfobeke. Lokubaluleke kakhulu kutsi sibe nebuhlobo lobuhle nebazalwane betfu kunekutsi setame kukhombisa kutsi akusitsi lesente liphutsa. w21.07 16-17 ¶10-12

Jehova ukhombise kutsi sibalulekile ngekusenta sibe ngumfanekiso wakhe. Ngenca yekutsi sentiwe saba ngumfanekiso waNkulunkulu, singaba nebuntfu bakhe lobuhle lobufaka ekhatsi lutsandvo, luvelo, kwetsembeka nekulunga. (Hla. 86:15; 145:17) Njengobe setama kuba nalobuntfu, sidvumisa Jehova futsi sikhombisa kutsi siyambonga. (1 Phet. 1:14-16) Nangabe sitiphatsa ngendlela lejabulisa Babe wetfu wasezulwini, siyajabula futsi senetiseke. Ngetulu kwaloko, ngenca yekutsi sinebuntfu lobufana nebaJehova, singaba luhlobo lwebantfu lalufunako emndenini wakhe. Jehova usilungiselele likhaya lelihle. Kusesele sikhatsi lesidze ngaphambi kwekutsi Jehova adale umuntfu wekucala, walungiselela bantfu umhlaba. (Jobe 38:4-6; Jer. 10:12) Ngenca yekutsi Jehova unemusa futsi uyephana, wadala tintfo letinyenti letinhle kuze sijabule. (Hla. 104:14, 15, 24) Ngaletinye tikhatsi bekacabanga ngetintfo latentile, futsi ‘wabona kutsi tinhle.’​—Gen. 1:10, 12, 31. w21.08 3 ¶5-6

Sonkhe sinemsebenti wekushumayela newekwenta bafundzi. (Mat. 28:19, 20; Rom. 10:14) Uyafuna yini kutfutfukisa emakhono akho kulomsebenti lobaluleke nakangaka? Dadisha incwajana letsi Timisele futsi utibekele imigomo letakusita kutsi ukusebentise loko lokufundzako. Nawucabanga ngemigomo longatibekela yona, ungawukhohlwa lomunye wemigomo lebaluleke kakhulu wekuba nebuntfu lobujabulisa Nkulunkulu. (Khol. 3:12; 2 Phet. 1:5-8) Siyaciniseka kutsi sonkhe sifisa shengatsi singamentela lokunyenti kakhulu Jehova kunaloko lesikwentako nyalo. Emhlabeni lomusha waNkulunkulu, sitawukhona kumentela lokunyenti kakhulu. Kodvwa nangabe kwanyalo senta konkhe lesikhona kukwenta, sitawujabula kakhulu futsi ngeke sidvumateke kakhulu. Lokubaluleke kakhulu kutsi sitawudvumisa Jehova ‘Nkulunkulu wetfu lojabulako.’ (1 Thim. 1:11) Ngako asijabule ngemisebenti lesiyentela Nkulunkulu! w21.08 25 ¶18-20

Nangabe wakhulela emndenini waBoFakazi BaJehova, kungenteka wafundza ngaJehova kusukela usemncane. Wafundziswa kutsi unguMdali, nekutsi unebuntfu lobuhle kanye nekutsi ufuna kwenta lomhlaba ube lipharadisi. (Gen. 1:1; Imis. 17:24-27) Bantfu labanyenti abakholelwa kutsi Nkulunkulu ukhona nobe kutsi wadala tonkhe tintfo. Esikhundleni saloko, bakholelwa kutsi tintfo letiphilako tativelela, tacale taba tintfo letincane tabese tiyandza taba tintfo letehlukahlukene letiyinkimbinkimbi kakhulu. Labanye balabantfu labakholelwa loku bafundze kakhulu. Bangatsi isayensi inikete bufakazi bekutsi liBhayibheli linemanga nekutsi bantfu labangakafundzi, labangakahlakaniphi nobe labayengeka kamelula labakholelwa kutsi kuneMdali. Ngisho nobe sinesikhatsi lesingakanani siBoFakazi BaJehova, sonkhe kufanele sichubeke sicinisa kukholwa kwetfu. Nasenta njalo, angeke siyengwe bantfu labatsi loko lokushiwo liBhayibheli kungemanga.​—Khol. 2:8. w21.08 14 ¶1-3

Abela, Nowa, Abrahama naJobe bakhombisa kutsi bayamhlonipha Jehova nekutsi bayamtsandza. Loko bakukhombisa ngekumlalela, ngekuba nekukholwa kuye nangekumentela iminikelo. Benta konkhe lokusemandleni abo kuze badvumise Jehova futsi wayemukela indlela lebebamkhonta ngayo. Ngemuva kwesikhatsi Jehova wanika ema-Israyeli uMtsetfo waMosi. Lemitsetfo beyifaka ekhatsi ticondziso letimayelana nekutsi angamkhonta njani Jehova ngendlela layemukelako. Ngemuva kwekufa kwaJesu nekuvuswa kwakhe, Jehova bekangakalindzeli kutsi bantfu balalele uMtsetfo waMosi. (Rom. 10:4) EmaKhristu bekufanele alalele umtsetfo lomusha, ‘lokungumtsetfo waKhristu.’ (Gal. 6:2) ‘Lomtsetfo’ bekangawulalela ngekutsi alingise sibonelo saJesu futsi ente loko lakufundzisa. Bekungakadzingeki kutsi agcine luhla lwetintfo lokufanele atente nalebekungakafaneli atente. Nalamuhla emaKhristu enta konkhe langakwenta kute alingise Khristu khona atawujabulisa Jehova futsi ‘aphumule.’​—Mat. 11:29. w22.03 20-21 ¶4-5

Jehova uyabalalela bantfwana bakhe. Bekayiva imithantazo yeNdvodzana yakhe ngesikhatsi ilapha emhlabeni. Wamuva Jesu ngesikhatsi athantaza kuze ente tincumo letibalulekile, njengalesikhatsi akhetsa baphostoli bakhe labangu-12. (Luk. 6:12, 13) Wamuva nangalesikhatsi athantaza akhatsateke kakhulu. Ngaphambi kwekutsi Judasi amtsengise, wathantaza kuBabe wakhe mayelana naletintfo lebetitawenteka kuye ngekushesha. Jehova akagcinanga nje ngekuyiva imithantazo yakhe, kodvwa waphindze watfumela nengilosi kutsi icinise leNdvodzana yakhe layitsandzako. (Luk. 22:41-44) Lamuhla, Jehova usachubeka nekulalela imithantazo yetikhonti takhe, futsi uyiphendvula ngesikhatsi lesikahle nangendlela lekahle. (Hla. 116:1, 2) Lomunye dzadze wase-India wayibona indlela Jehova layiphendvula ngayo imithantazo yakhe. Bekahlale acindzeteleke kakhulu, ngako wathantaza kuJehova ngalendzaba. Wabhala watsi: “Wangisita kakhulu uMsakato we-JW waMay 2019, lebewukhuluma ngekutsi singabhekana njani nekucindzeteleka. Waba yimphendvulo yemithantazo yami.” w21.09 21-22 ¶6-7

Cabanga nje kutsi bekumatima kanganani ngalamaKhristu kutsi ashiye tonkhe tintfo lebekanato futsi ayocala imphilo lensha kulenye indzawo? Kwadzingeka etsembe kutsi Jehova utawasita kuze atfole tintfo latidzingako. Kodvwa kukhona lebekungawasita kutsi akhone kukwenta loko. Eminyakeni lesihlanu ngaphambi kwekutsi emaRoma avimbetele iJerusalema, umphostoli Pawula waniketa emaHebheru seluleko lesibalulekile lesitsi: “Indlela leniphila ngayo ayingabi yekutsandza imali, kodvwa yenetiswani tintfo leninato. Ngobe Nkulunkulu utsite: ‘Ngeke ngize ngikushiye, futsi ngeke ngize ngikulahle.’ Ngako singakhuluma ngesibindzi sitsi: ‘Jehova ungumsiti wami; angeke ngesabe. Umuntfu angangentani nje?’” (Heb. 13:5, 6) Siyaciniseka kutsi labo labalalela seluleko saPawula ngaphambi kwekuhlasela kwemaRoma, bakutfola kumelula kuphila ngalebebanako lapho babalekela khona. Bebaciniseka kutsi Jehova utawubanika loko bebakudzinga. w22.01 4 ¶7, 9

Nasicabanga ngemuntfu lonemusa, kungenteka sicabange ngemuntfu lonesihawu, lonenhlitiyo lenhle, loneluvelo nalowephanako. Kungenteka sicabange nangendzaba yemSamariya lolungile Jesu lakhuluma ngayo. Lendvodza lebeyiyalesinye sive ‘yaba nemusa’ kulomJuda lebekashaywe tigebengu futsi tamemuka netintfo takhe. LomSamariya ‘wamhawukela’ lomJuda lebekalimele futsi wamnakekela ngelutsandvo. (Luk. 10:29-37) Lendzaba iveta buntfu lobuhle baNkulunkulu wetfu, lokungumusa. Nkulunkulu unemusa ngobe uyasitsandza futsi njalo ngelilanga usikhombisa umusa ngetindlela letehlukahlukene. Kunalenye indlela umuntfu langakhombisa ngayo kutsi unemusa. Umuntfu lonemusa angakhetsa kungamjezisi umuntfu lokufanele ajeziswe. Nasicabanga ngaloko, Jehova usikhombise umusa. Umhlabeleli watsi: “Indlela lasiphatsa ngayo, ayiyi ngendlela lesona ngayo.” (Hla. 103:10) Kodvwa ngaletinye tikhatsi, Jehova angahle amjezise umuntfu lowonile. w21.10 8 ¶1-2

Jehova ukhombisa lutsandvo lwakhe lolucotfo kuphela kulabo labanebuhlobo lobuhle naye, lokutinceku takhe. Bufakazi baloko sibubona kuloko lokwashiwo yiNkhosi Davide nemphrofethi Danyela. Nasi sibonelo, Davide watsi: “Chubeka ubakhombisa lutsandvo lolucotfo labo labakwatiko.” ‘Jehova utabakhombisa lutsandvo lolucotfo kuze kube phakadze labo labamesabako.’ NaDanyela watsi: “Awu Jehova Nkulunkulu weliciniso, . . . ubakhombisa lutsandvo lolucotfo labo labakutsandzako nalabagcina imitsetfo yakho.” (Hla. 36:10; 103:17, umbhalo longentasi; Dan. 9:4) Ngekusho kwalamavi laphefumulelwe, Jehova utikhombisa lutsandvo lolucotfo tinceku takhe ngobe tiyamati, tiyamhlonipha, tiyamtsandza futsi tigcina imitsetfo yakhe. Ukhombisa lutsandvo lwakhe lolucotfo kubantfu bakhe labetsembekile kuphela, lokutikhonti takhe teliciniso. Ngaphambi kwekutsi sicale kukhonta Jehova, salubona lutsandvo lalukhombisa bonkhe bantfu. (Hla. 104:14) Nobe kunjalo, njengobe sitikhonti takhe, uphindze asikhombise lutsandvo lwakhe lolucotfo. w21.11 4 ¶8-9

Ngisho kungentekani, sitimisele kulalela lamavi aJesu. Lamuhla, bantfu labanyenti balandzela baholi benkholo labadvumile. Babatsandza kakhulu kangangekutsi bacishe babakhonte. Bantfu labanyenti baya emasontfweni abo, batsenge tincwadzi tabo, babanikelele ngemali lenyenti nobe banikelele tinhlangano labatisekelako. Labanye bakukholwa konkhe labakushoko. Asiciniseki kutsi bangajabula kangaka yini nabangabona Jesu kunendlela labajabula ngayo nababona labaholi babo benkholo! Kodvwa labo labakhonta Nkulunkulu ngendlela lekahle ababalandzeli bantfu. Nanobe sibahlonipha labo labaholako, siyakwemukela loko Jesu lakufundzisa ngesikhatsi atsi: “Nine nibazalwane.” (Mat. 23:8-10) Asibakhonti bantfu, ngisho nobe babaholi benkholo nobe babaholi bepolitiki, futsi asibasekeli. Ngetulu kwaloko, asitingeneli tepolitiki futsi asitihlanganisi nalelive. Kuko konkhe loku, sehluke kakhulu kuto tonkhe tinkholo letitsi tebuKhristu.​—Joh. 18:36. w21.10 20 ¶6-7

Wonkhe umKhristu kufanele aciniseke kutsi kute intfo nobe umuntfu lobaluleka kakhulu kwendlula buhlobo bakhe naNkulunkulu. Njengobe siBoFakazi BaJehova, sitimisele kungenti nobe ngabe yini lengangcolisa libito laNkulunkulu longcwele. (Lev. 19:12; Isa. 57:15) Kuze ema-Israyeli akhombise kutsi ayamemukela Jehova njengaNkulunkulu wawo, bekufanele agcine imitsetfo yakhe leminyenti. Levithikhusi 18:4 utsi: “Nibolalela imitsetfo yami, nigcine nemiyalo yami futsi niyilandzele. NginguJehova Nkulunkulu wenu.” Sehluko 19 sikhuluma ngaleminye ‘yalemiyalo’ lebekufanele igcinwe ngema-Israyeli. Sibonelo saloko kutsi emavesi 5-8, 21, na-22 akhuluma ngemihlatjelo yetilwane. Indlela lemihlatjelo lebeyentiwa ngayo, bekufanele ‘ingayingcolisi intfo yaJehova lengcwele.’ Kufundza lamavesi kufanele kusente sifune kujabulisa Jehova, futsi sifune kumentela umhlatjelo wekudvumisa lowemukelekako njengobe umbhalo waKumaHebheru 13:15 usikhutsata. w21.12 5-6 ¶14-15

Labashadene labasebasha lamuhla bangafundza kulokwenteke kulabanye labetsembele kuJehova. Kungenteka sekuphele iminyaka leminyenti labanye labashadene basemsebentini wasikhatsi sonkhe. Celani seluleko sabo nanibona kunesidzingo sekucabangisisa ngemigomo lenitibekele yona. Lena yindlela leningakhombisa ngayo kutsi netsembele kuJehova. (Taga 22:17, 19) Khumbulani, umshado usipho lesivela kuJehova. (Mat. 19:5, 6) Ufuna labashadene basijabulele lesipho. Nine lenishadile lenisebasha, kungaba njani kutsi nihlolisise loko lenikwentako ekuphileni kwenu? Nenta konkhe leningakwenta yini kuze nikhombise Jehova kutsi nibonga kakhulu ngetipho laniphe tona? Thantazani kuJehova. Funani timiso letiseVini lakhe letinganisita esimeni lenikuso. Ngemuva kwaloko, sebentisani seluleko Jehova laninika sona. Ningaciniseka kutsi ningajabula ekuphileni nangabe kukhonta Jehova kuta kucala kini! w21.11 19 ¶16, 18

Jakobe bekangaticabangi ancono kunalabanye. Jakobe akazange acabange kutsi umndeni lakhulela kuwo nobe imisebenti bekayenta bekumenta abe ncono kunalabanye bazalwane nabodzadze. Nakakhuluma ngebazalwane bakhe bekatsi: “Bazalwane bami labatsandzekako.” (Jak. 1:16, 19; 2:5) Bekangenti ngatsi ute sono. Lesikufundzako: Khumbula kutsi sonkhe sinesono. Akukafaneli sicabange kutsi sincono kunalabo lesibafundzisako. Kungani? Nangabe senta lesidadisha naye liBhayibheli abone ngatsi asiwenti emaphutsa, angahle acabange kutsi angeke akhone kwenta loko Nkulunkulu lakufunako. Kodvwa nangabe sivuma kutsi akukabi melula ngaso sonkhe sikhatsi kusebentisa timiso letisemiBhalweni futsi simchazele indlela Jehova lasisite ngayo kuze sincobe tinkinga tetfu, sitawube siyamsita abone kutsi naye angakhona kukhonta Jehova. w22.01 11-12 ¶13-14

Nasichubeka sicabanga njengaJesu, sitakwenta njengaye, futsi sitabukhombisa buntfu bakhe. (Heb. 1:3) Ungahle ucabange: ‘Jesu ute sono. Angeke ngikhone kumlingisa ncamashi!’ Nangabe utiva ngaleyondlela, khumbula naku: Kwekucala, wentiwe waba ngumfanekiso waJehova newaJesu. Ngako ungakhona kumlingisa ngelizinga lelitsite. (Gen. 1:26) Kwesibili, umoya longcwele waNkulunkulu ungemandla lamakhulu kakhulu. Usitwa ngiwo, ungakhona kwenta tintfo lebewungeke ukhone kutenta ngemandla akho. Kwesitsatfu, Jehova akalindzeli kutsi sitikhombise ngalokuphelele nyalo titselo temoya. Ecinisweni, Babe wetfu lositsandzako utawunika labo labanelitsemba lekuphila emhlabeni iminyaka lengu-1 000 yekutsi bagcine bete sono. (Semb. 20:1-3) Nyalo Jehova ulindzele kutsi sente konkhe lesingakhona kukwenta futsi setsembele kuye kutsi asisite. w22.03 9 ¶5-6

Akusiwo umthantazo kuphela longacinisa buhlobo betfu naJehova. Kudadisha liVi laNkulunkulu nekuba khona emihlanganweni yelibandla nako kungasisita sisondzelane naNkulunkulu. Kukhona yini longakwenta kuze usisebentise kahle sikhatsi losicitsa udadisha, nalosicitsa usemihlanganweni yelibandla? Tibute, ‘Yini lengiphazamisako nangisemihlanganweni yelibandla nobe nangidadisha?’ Kungenteka yini kutsi uphazanyiswa kubamba lucingo, ngema-email, nobe imilayeto lengena ecingweni lwakho nobe kulenye intfo yebuchwephesha? Nawubona kutsi ingcondvo yakho iyazula nawudadisha nobe nawusemhlanganweni welibandla, cela Jehova akusite. Kubalulekile kunaka liVi laNkulunkulu ngisho nobe kumatima kuyekela kucabanga ngetintfo letisikhatsatako. Thantazela kuthula lokungeke kugcine ngekulondvolota inhlitiyo yakho kodvwa lokutawulondvolota ‘nengcondvo’ yakho.​—Fil. 4:6, 7. w22.01 29-30 ¶12-14

INkhosi Uziya ayizange isemukele seluleko. Yangena ethempelini laJehova lakungena khona baphristi kuphela futsi yashisa imphepho. Baphristi batsi kuye: “Ye-Uziya, akukafaneli kutsi wena ushisele Jehova imphepho! Baphristi kuphela lokufanele bashise imphepho.” Wenta njani Uziya? Kube wasemukela seluleko futsi waphuma ngaleso sikhatsi ethempelini, kungenteka Jehova bekatamcolela. Kunaloko, “Uziya . . . watfukutsela kakhulu.” Yini leyamenta wangasemukeli leseluleko? Ngenca yekutsi bekayinkhosi, bekacabanga kutsi angenta nobe ngabe yini layifunako. Kodvwa Jehova akazange abone kanjalo. Ngenca yekutsi wenta intfo lebekungakafaneli ayente ‘waba nebulephelo kwaze kwaba lilanga lafa ngalo.’ (2 Khr. 26:16-21) Sibonelo sa-Uziya sisifundzisa kutsi ngisho nobe sibobani, nangabe singasemukeli seluleko lesisekelwe eBhayibhelini, Jehova angeke aze asemukele. w22.02 9 ¶7

Umuntfu logcoke “buntfu lobudzala” uvame kucabanga futsi ente tintfo ngendlela lecondziswa yinyama. (Khol. 3:9) Uvame kuticabangela yena, asheshe atfukutsele, angabongi futsi atigcabhe. Kungenteka uyakutsandza kubuka tintfo letikhombisa kungcola nekubukela ema-movie lanekutiphatsa kabi nobe budlova. Unebuntfu lobuhle futsi kungenteka uyatisola ngetintfo letimbi latentako nobe latikhulumako. Kodvwa akatimiseli kushintja indlela lacabanga ngayo kanye nendlela lenta ngayo tintfo. (Gal. 5:19-21; 2 Thim. 3:2-5) Sonkhe sinesono, angeke sikhone kuyisusa yonkhe imicabango lemibi etingcondvweni tetfu netifiso letimbi etinhlitiyweni tetfu. Ngaletinye tikhatsi sitawenta lokutsite nobe sisho lokutsite lesitawutisola ngako. (Jer. 17:9; Jak. 3:2) Kodvwa nasikhumula buntfu lobudzala sibese asisacondziswa yimicabango kanye netento lokulawulwa yinyama. Sibese siyashintja kuloko besingiko.​—Isa. 55:7. w22.03 3 ¶4-5

Nine labadzala belibandla, bukani buntfu lobuhle kubazalwane benu nakubodzadze. Bonkhe bayawenta emaphutsa, kodvwa bonkhe banebuntfu lobuhle. Nobe kunjalo, kuhle kudzingeka kutsi labadzala belibandla beluleke umzalwane nobe dzadze. Kodvwa njengemphostoli Pawula, labadzala belibandla kufanele banganaki tintfo letishiwo bazalwane babo nabodzadze lokungenteka tibatfukutselise nobe tintfo labatentako lokungenteka tibakwatise. Kunaloko, kufanele banake kutsi umzalwane wabo nobe dzadze uyamtsandza Jehova, uyachubeka amkhonta, nekutsi usengachubeka enta lokuhle. Labadzala belibandla labanaka lokuhle kulabanye benta kutsi bazalwane nabodzadze bative batsandvwa ebandleni. Khumbulani kutsi Jehova akaniceli kutsi ningawenti emaphutsa; ucela nje kutsi netsembeke. (1 Khor. 4:2) Ningaciniseka kutsi Nkulunkulu uyawujabulela umsebenti lenimentela wona. Jehova “ngeke awukhohlwe umsebenti wenu nelutsandvo lenibe nalo ngelibito lakhe, ngekutsi benibasita labangcwele futsi niyachubeka nibasita.”​—Heb. 6:10. w22.03 31 ¶19, 21