March

Umphostoli Phetro, watjela bazalwane kutsi basebentise emakhono abo kuze bakhutsate bazalwane nabodzadze. Phetro wabhala watsi: “Ngekwelizinga umuntfu ngamunye lemukele ngalo sipho, akasisebentise kuze asite labanye njengenceku lekahle lephatsiswe umusa lomkhulu waNkulunkulu.” (1 Phet. 4:10) Kufanele sente konkhe lesingakhona kukwenta kuze sisebentise emakhono etfu futsi singakhatsateki ngekutsi labanye batawuba nemona nobe batawudvumateka. Kodvwa kufanele sicaphele singatigcabhi ngawo. (1 Khor. 4:6) Kufanele sikhumbule kutsi nobe ngumaphi emakhono lesinawo, siwaphiwe nguNkulunkulu. Ngako kufanele siwasebentisele kusita libandla, hhayi kutsi siwasebentise kuze bantfu banake tsine. (Fil. 2:3) Nasisebentisa emandla etfu nemakhono etfu kuze sente intsandvo yaNkulunkulu sitawujabula, hhayi ngobe sitawube sifuna kuba ncono yini kunalabanye, kodvwa ngobe sitawube siwasebentisela kudvumisa Jehova. w22.04 11-12 ¶7-9

Jesu bekayitsandza imiBhalo Lengcwele, futsi indlela bekativa ngayo yavetwa kahle kulamavi lasiphrofetho lakuTihlabelelo 40:8 latsi: “Awu Nkulunkulu wami, kuyangijabulisa kwenta intsandvo yakho, umtsetfo wakho usenhlitiyweni yami.” Ngenca yaloko, bekajabula futsi waphumelela ekukhonteni Jehova. Natsi singajabula futsi siphumelele nangabe sivumela liVi laNkulunkulu kutsi libe setinhlitiyweni tetfu. (Hla. 1:1-3) Shengatsi singatfutfukisa likhono letfu lekufundza liBhayibheli ngekuvumelana nemavi aJesu nesibonelo lasibekela sona. Singayitfutfukisa indlela lesilicondza ngayo liBhayibheli ngekutsi sithantaze, singajaki nasilifundza, sitibute imibuto futsi sibhale emaphuzu. Singasebentisa kucondza ngekutsi sihlatiye kahle loko lesikufundzako eBhayibhelini ngekusitwa tincwadzi letisekelwe kulo. Ngetulu kwaloko, singalivumela liVi laNkulunkulu kutsi lisibumbe ngekutsi sibe nembono lokahle nasilifundza. Nasikwenta loku, sitawusitakala nasifundza liBhayibheli futsi sitawusondzelana kakhulu naJehova.​—Hla. 119:17; Jak. 4:8. w23.02 13 ¶15-16

Tibekele umgomo lotsite bese wetama kamatima kuze uwufinyelele. Ungakwenta njani loko? Ase sitsi ufuna kutfutfukisa likhono lakho lekufundzisa. Ungadadisha bhukwana lotsi Timisele Ekufundzeni Nasekufundziseni. Nawunenkhulumo emhlanganweni losekhatsi neliviki, ungacela umzalwane lonelikhono kutsi alalele lenkhulumo yakho ngaphambi kwekutsi uyibeke futsi asho lapho ungatfutfukisa khona. Ungagcini nje ngekwatiwa ngekutsi unelikhono, kodvwa yatiwa nangekutsi uyatimisela nekutsi labanye bangakwetsemba. (2 Khor. 8:22) Kutsiwani nangabe lelikhono lofuna kuba nalo ute ngekwemvelo? Ungapheli emandla! Thimothi waba sikhulumi lesihle yini nobe waba ngumfundzisi lonelikhono? LiBhayibheli alisho. Kodvwa siyaciniseka kutsi Thimothi watfutfuka emsebentini laniketwa wona njengobe bekalalela seluleko saPawula.​—2 Thim. 3:10. w22.04 24-25 ¶8-11

Simelelani lesilwane sesiganga lesinetinhloko letingu-7? Lesikunakako kutsi lesilwane sinjengengwe kodvwa sinetinyawo telibhele nemlomo welibhubesi kanye netimphondvo letingu-10. Lesilwane sinalesifana ngako netilwane letine lokukhulunywa ngato kuDanyela sehluko 7. Kodvwa encwadzini yeSembulo, tonkhe letintfo letikuletilwane tihlanganiswe taba sesilwaneni sinye, hhayi tilwane letine letehlukene. Lesilwane asimeleli hulumende munye nobe umbuso wemhlaba. Kutsiwa sibusa “tonkhe tinhlanga, bantfu, tilwimi kanye netive.” Ngako sinemandla kunahulumende munye. (Semb. 13:7) Lesilwane sesiganga simelela bonkhe bohulumende lababuse bantfu kuze kube ngulamuhla. (Shu. 8:9) Lokunye lokukhombisa kutsi lesilwane simelela bonkhe bohulumende kutsi “sinetimphondvo letingu-10.” EBhayibhelini, 10 usho kuphelela. w22.05 9 ¶6

Bobani labatawutfola letibusiso letinhle? Bekucala nje, sicumbi lesikhulu lesitawusindza nge-Amagedoni kanye nebantfwana lokungenteka batalwe emhlabeni lomusha. Kodvwa Sembulo sehluko 20 siphindze setsembise kutsi labafile batawuvuswa. (Semb. 20:11-13) Kutawuvuka “labalungile” labafa betsembekile esikhatsini lesendlulile, kanye “nalabangakalungi” labangazange balitfole litfuba lekufundza ngaJehova. (Imis. 24:15; Joh. 5:28, 29) Loko kusho kutsi bonkhe bantfu batawuvuswa yini ekufeni ngesikhatsi Sekubusa Kweminyaka Leyinkhulungwane? Cha. Labo labala kukhonta Jehova ngaphambi kwekutsi bafe angeke bavuswe. Balitfola litfuba kodvwa bakhombisa kutsi abakufaneli kuphila emhlabeni loliPharadisi.​—Mat. 25:46; 2 Thes. 1:9; Semb. 17:8; 20:15. w22.05 18 ¶16-17

Asebentisa ‘sisebenti lesetsembekile nalesihlakaniphile,’ Jesu usungule inhlangano lamhlabeni lekhutsata kukhonta lokuhlantekile. (Mat. 24:45) Utiva njani ngalenhlangano? Kungenteka utiva ngendlela umphostoli Phetro lativa ngayo nakatjela Jesu emavi embhalo welusuku lwalamuhla. Ngabe sikuphi lamuhla kube asizange sitihlanganise nenhlangano yaJehova? Asebentisa lenhlangano, Khristu uyacikelela kutsi sinako lesikudzingako kuze sihlale setsembekile kuNkulunkulu. Uphindze asiceceshe kuze siwente kahle umsebenti wetfu wekushumayela. Ngetulu kwaloko, uyasisita kutsi sigcoke ‘buntfu lobusha’ kuze sitawujabulisa Jehova. (Ef. 4:24) Jesu usinika ticondziso nasibhekene netikhatsi letimatima. Kubaluleka kwaleticondziso sikubonile ngesikhatsi kubhedvuke umkhuhlane we-COVID-19. Bantfu labanyenti emhlabeni bebadidekile kutsi bente njani, kodvwa Jesu wenta konkhe langakwenta kuze sitfole sicondziso lesicacile khona sitawuvikeleka. w22.07 12 ¶13-14

Jehova watjela ema-Israyeli kutsi kufanele ahlale afundzisa bantfwana bawo ngaye. (Dut. 6:6, 7) Kusukela ekuseni lize liyoshona, batali labangema-Israyeli bebanematfuba lamanyenti ekucoca nebantfwana babo futsi babafundzise kutsi batsandze Jehova. Sibonelo nje, umfanyana longum-Israyeli bekangacitsa ema-awa lamanyenti asita babe wakhe ngekuhlanyela nobe ngekubutsa loko labakuvunile. Sisi wakhe bekangacitsa sikhatsi lesinyenti asita make wakhe ngekutfunga, ngekuluka nangaleminye imisebenti yasekhaya. Njengobe batali nebantfwana bebasebenta kanyekanye, bebangacoca ngetintfo letinyenti letibalulekile. Sibonelo nje, bebangacoca ngebuhle baJehova nangendlela labasita ngayo bangumndeni. Emaveni lamanyenti, batali abasakhoni kucitsa lilanga lonkhe nebantfwana babo. Kungenteka batali basuke basemsebentini, kantsi bantfwana basuke basesikolweni. Ngenca yaloko, batali kufanele bafune ematfuba ekucoca nebantfwana babo.​—Ef. 5:15, 16. w22.05 28 ¶10-11

Umuntfu lowente sono lesikhulu usuke awephule kakhulu umtsetfo waNkulunkulu. Nangabe umKhristu ente sono lesikanjalo, kufanele athantaze kuJehova Nkulunkulu futsi kufanele akhulume nalabadzala belibandla. (Hla. 32:5; Jak. 5:14) Uyini umsebenti walabadzala belibandla? NguJehova kuphela lonelilungelo lekucolela tono ngalokuphelele, futsi loko ukwenta asebentisa inhlawulo. Nanobe kunjalo, Jehova unike labadzala belibandla umsebenti wekuncuma kutsi loyo lowonile uyachubeka yini ayincenye yelibandla basebentisa imiBhalo. (1 Khor. 5:12) Kuze bakhone kukwenta loko, labadzala belibandla kufanele betame kutfola timphendvulo tanayi imibuto: Lesono sentiwe ngemabomu yini? Lomuntfu wetamile yini kusifihla lesono? Lesono usente sikhatsi lesidze yini? Lokubaluleke kakhulu kutfola kutsi, bukhona yini bufakazi bekutsi sewuphendvuke mbamba? Bukhona yini bufakazi bekutsi Jehova umcolele?​—Imis. 3:19. w22.06 9 ¶4

Jesu watjela balandzeli bakhe kutsi bafune kulunga. (Mat. 5:6) Loku kusho kutsi umuntfu kufanele abe nesifiso lesikhulu sekwenta lokulungile, nalokuhle futsi abe ngumuntfu lohlantekile embikwaNkulunkulu. Uyalitsandza yini liciniso nekulunga? Siyaciniseka kutsi uyakutsandza. Uyawenyanya emanga nako konkhe lokubi. (Hla. 119:128, 163) Umuntfu lonemanga ulingisa Sathane, longumbusi walelive. (Joh. 8:44; 12:31) Lomunye wemigomo yaSathane kuhlambalata libito laNkulunkulu lelingcwele. Sathane bekasolo asakata emanga ngaNkulunkulu wetfu kusukela kwacala kuvukela e-Edeni. Wetame kwenta bantfu kutsi bacabange kutsi Jehova unguMbusi loticabangela yena, longaketsembeki futsi logodlela bantfu tintfo letinhle. (Gen. 3:1, 4, 5) Sathane uyachubeka nekukhohlisa bantfu kuze bacabange tintfo letimbi ngaJehova. Nakwenteka bantfu bakhetsa ‘kungalitsandzi liciniso,’ Sathane angabenta kutsi bente tonkhe tinhlobo tekungalungi kanye netintfo letimbi.​—Rom. 1:25-31. w23.03 2 ¶3

Njengobe wetama kuncoba umkhuba lomubi, ngalesinye sikhatsi ungahle ukwente loko lokubi lowetama kukuncoba. Nobe kungenteka ubebete sineke, uphatseke kabi nobe ubone ngatsi kulukhuni kufinyelela lomgomo wakho. Yini letakusita kutsi ucinisele? Kutsandza Jehova. Lutsandvo lonalo ngaJehova lubuntfu lobubalulekile. (Taga 3:3-6) Nangabe umtsandza mbamba Nkulunkulu, ungakhona kubhekana netinkinga ekuphileni. LiBhayibheli livame kutsi Jehova utsandza bantfu bakhe ngelutsandvo lolucotfo. Loku kusho kutsi akayuze atishiye tikhonti takhe nobe ayekele kutitsandza. Wentiwe ngemfanekiso waNkulunkulu. (Gen. 1:26) Ungalukhombisa njani lutsandvo lolunjalo? Cala ngekubonga. (1 Thes. 5:18) Njalo ngelilanga tibute: ‘Jehova ukhombise njani kutsi uyangitsandza?’ Ngemuva kwaloko nawuthantaza, ubobonga Jehova utisho ngalokucondzile tintfo lakwentele tona. Tsatsa tintfo Jehova lakwentele tona njengendlela lakhombisa ngayo kutsi uyakutsandza. w23.03 12 ¶17-19

Jesu wabaphatsa ngemusa nangelutsandvo bonkhe baphostoli bakhe. Yini lesiyifundzako? Lokubalulekile akusiko nje kuphela loko labanye bantfu labakwentako kodvwa ibalulekile nendlela lesenta ngayo nangabe bente emaphutsa. Nangabe siphatseke kabi ngenca yaloko lokwentiwe ngumzalwane nobe dzadze singatibuta: ‘Yini lelengiphetse kabi ngaloku lokwentiwe ngulomzalwane nobe dzadze? Indlela lengenta ngayo ikhombisa buntfu lobubi yini lokufanele ngibulungise? Kungenteka yini kutsi lomzalwane nobe lodzadze ubhekene netinkinga? Ngisho nobe nginesizatfu lesivakalako sekutfukutsela, ngingalukhombisa yini lutsandvo ngekutsi ngingakunaki loku lakwentile?’ Nasichubeka sibakhombisa lutsandvo labanye, sitawube sikhombisa kutsi sibalandzeli baJesu beliciniso. Sibonelo saJesu sisifundzisa nekutsi kufanele setame kubati kahle bazalwane betfu nabodzadze. (Taga 20:5) Kuliciniso kutsi Jesu uyakhona kufundza tinhlitiyo, tsine asikhoni. Kodvwa singakhona kuwabeketelela emaphutsa ebazalwane betfu nabodzadze. (Ef. 4:1, 2; 1 Phet. 3:8) Kungaba melula kukwenta loko nangabe sati indlela labakhule ngayo. w23.03 30 ¶14-16

Sathane usitakala ngekugula kwetfu kuze etame kusenta singetsembeki kuNkulunkulu. Bodokotela nobe emalunga emindeni yetfu langasibo boFakazi bangahle basicindzetele kutsi sivume kumpontjelwa ingati, lokuyintfo lengahambisani nemtsetfo waNkulunkulu. Nobe lomunye angahle asicindzetele kutsi semukele kwelashwa ngendlela lengahambisani netimiso teliBhayibheli. Nanobe singafuni kufa, kodvwa siyati kutsi Jehova angeke ayekele kusitsandza ngisho singafa. (Rom. 8:37-39) Nangabe bangani baJehova bafa, uhlale abakhumbula, kube ngatsi basaphila. (Luk. 20:37) Uyakulangatelela kubavusa ekufeni. (Jobe 14:15) Jehova wakhipha linani lelisetulu kuze ‘sitfole kuphila lokuphakadze.’ (Joh. 3:16) Siyati kutsi Jehova usitsandza kakhulu nekutsi unendzaba mbamba natsi. Kunekutsi simshiye nasigula nobe nasisongelwa ngekufa, kufanele setsembele kuye kuze asidvudvute, asinike kuhlakanipha futsi asiphe emandla.​—Hla. 41:3. w22.06 18 ¶16-17

LiBhayibheli litsi: “Kwesaba Jehova kusicalo sekuhlakanipha, futsi kwati Nkulunkulu Longcwele kwenta umuntfu abe nekucondza.” (Taga 9:10) Ngako nakufanele sente sincumo lesibalulekile kufanele sitfole loko Jehova lakucabangako ngaloko. Loko singakwenta ngekutsi sifundze liBhayibheli kanye netincwadzi letisekelwe eBhayibhelini. Nasenta njalo sitawukhombisa kutsi sihlakaniphe mbamba. (Taga 2:5-7) NguJehova kuphela longasinika kuhlakanipha lokungiko. (Rom. 16:27) Sisho ngani kutsi unguMtfombo wekuhlakanipha? Kwekucala, njengobe anguMdali, unelwati lolunyenti ngendalo yakhe futsi uyicondza kahle. (Hla. 104:24) Kwesibili, konkhe lakwentako kukhombisa kutsi uhlakaniphile. (Rom. 11:33) Kwesitsatfu, seluleko saJehova lesihlakaniphile sihlale sibasita labo labasisebentisako. (Taga 2:10-12) Nangabe sifuna kuhlakanipha lokungiko, kufanele siwemukele lamaciniso futsi siwavumele asicondzise nasenta tincumo nobe nasifuna kwenta lokutsite. w22.10 19 ¶3-4

Sathane wehlulwa kulemphi lokukhulunywa ngayo kuSembulo sehluko 12, futsi yena nemadimoni akhe bajikijelwa emhlabeni. Umphumela waloko kube ‘ngumaye emhlabeni’ ngenca yekutsi Sathane utfukutsele kakhulu futsi uhlasela bantfu. (Semb. 12:9-12) Tisisita njani letiphrofetho? Tintfo letentekako emhlabeni kanye nelushintjo lolukhulu endleleni bantfu labatiphatsa ngayo kusisita sibone kutsi Jesu sewuyiNkhosi. Kunekutsi sitfukutsele nasibona bantfu baticabangela bona futsi baneludlame, kufanele sikhumbule kutsi tintfo labatentako tigcwalisa siphrofetho seliBhayibheli. UMbuso waNkulunkulu sewuyabusa! (Hla. 37:1) Silindzele kutsi tintfo tibe timbi kakhulu njengobe i-Amagedoni isondzela ngekushesha. (Mak. 13:8; 2 Thim. 3:13) Simbonga kakhulu Babe wetfu wasezulwini lositsandzako ngekusisita sicondze kutsi yini leyenta kube netintfo letinyenti letimbi emhlabeni. w22.07 3-4 ¶7-8

Singamcela Jehova kutsi asite bazalwane betfu kuze bakhone kubeketelela kugula, tehlakalo temvelo, kuphatfwa kabi nobe letinye timo letimatima. Singaphindze sibathantazele bazalwane betfu nabodzadze labasebenta kamatima kuze basite labo labadzinga lusito. Kungenteka kukhona lobatiko lababhekene naletimo. Kungaba njani ubasho ngemagama nawuthantaza? Sisuke sikhombisa kutsi sibatsandza mbamba nasicela Jehova kutsi abasite bacinisele. Labo labaholako ebandleni bajabula kakhulu nasibathantazela futsi lemithantazo iyabasita. Umphostoli Pawula bekati kutsi uyayidzinga imithantazo yalabanye. Wabhala watsi: “Nami nibongithantazela, kuze kutsi nangivula umlomo wami ngikhulume ngesibindzi mayelana nemfihlo lengcwele yetindzaba letimnandzi.” (Ef. 6:19) Nalamuhla sinebazalwane labanyenti labaholako emkhatsini wetfu futsi labasebenta kamatima. Sisuke sikhombisa kutsi siyabatsandza nasicela Jehova kutsi abasekele emsebentini wabo. w22.07 23-24 ¶14-16

Lisotja ligcoka sigcoko sekutivikela kuze livikele inhloko yalo. Kulemphi lesiyilwa naSathane, kufanele sivikele ingcondvo yetfu kuye. Usebentisa tintfo letinyenti kuze asilinge futsi angcolise indlela lesicabanga ngayo. Njengobe sigcoko sekutivikela sivikela inhloko yelisotja, litsemba letfu livikela indlela lesicabanga ngayo kuze sihlale setsembekile kuJehova. Nangabe litsemba letfu licala kuba butsakatsaka futsi sicale kucabanga ngaloko lesikufisako, singabese siyakhohlwa ngelitsemba lekuphila phakadze. Cabanga ngalokwenteka kulamanye emaKhristu lebekahlala eKhorinte. Abese akasasetsembi setsembiso saNkulunkulu lesibalulekile, lokusetsembiso seluvuko. (1 Khor. 15:12) Pawula watsi bantfu labete litsemba ngelikusasa baphilela lilamuhla. (1 Khor. 15:32) Bantfu labanyenti lamuhla labangatetsembi tetsembiso taNkulunkulu benta nobe ngabe yini kuze bajabule nyalo. Kodvwa tsine siyatetsemba tetsembiso taNkulunkulu telikusasa. w22.10 25-26 ¶8-9

Jehova ukucela kutsi uthantaze kuye. Uyatibona tinkinga lonato, futsi uyakucinisekisa kutsi utayilalela imithantazo yakho nobe nini nawuthantaza kuye. Uyakujabulela kulalela tikhonti takhe. (Taga 15:8) Yini longayisho emthantazweni wakho nawutiva uwedvwa? Tjela Jehova indlela lotiva ngayo. (Hla. 62:8) Mtjele ngetintfo letikukhatsatako nekutsi tikwenta utive njani. Mcele akusite ukhone kubhekana nalendlela lotiva ngayo futsi akusite akuphe sibindzi sekukhuluma. Ungamcela nekutsi akuphe kuhlakanipha kuze ukhone kutichaza kahle tinkholelo takho. (Luk. 21:14, 15) Nangabe utiva ucindzetelekile nobe udvumatekile, cela Jehova akusite ukhone kukhuluma nemKhristu lovutsiwe. Ungacela Jehova kutsi asite lona lotawube ukhuluma naye kutsi akulalelisise futsi ayicondze indlela lotiva ngayo. Buka nendlela layiphendvula ngayo imithantazo yakho futsi wemukele lusito loluvela kulabanye. Nawenta njalo, utawutiva uncono. w22.08 10 ¶6

Libandla lelisha laseThesalonika labhekana nekuphikiswa lokumatima. Sicumbi sebantfu labaneludlame sahudvula ‘labanye bazalwane sabayisa kubaphatsi belidolobha.’ (Imis. 17:6) Cabanga nje kutsi esaba kangakanani lamaKhristu lamasha! Bekanganciphisa lizinga lamkhonta ngalo Jehova, kodvwa umphostoli Pawula akazange akuvumele loko kutsi kwenteke. Wenta konkhe labengakwenta kuze lelibandla lelisha linakekelwe kahle. Pawula wakhumbuta baseThesalonika watsi: “Satfuma Thimothi umzalwane wetfu . . . , kutsi anicinise futsi anidvudvute ekukholweni, kuze kube bete umuntfu lonyakatiswa nguletinhlupheko.” (1 Thes. 3:2, 3) Thimothi bekayibonile indlela Pawula lebekacinise ngayo bazalwane baseListra. Ngenca yekutsi bekayibonile indlela Jehova lababusisa ngayo, Thimothi bekangacinisekisa labazalwane nabodzadze labasha kutsi simo sitawuba ncono.​—Imis. 14:8, 19-22; Heb. 12:2. w22.08 21 ¶4

Nga-1870, licembu lebafundzi beliBhayibheli lebeliholwa nguCharles Taze Russell, lacala kuhlolisisa imiBhalo ngekutimisela. Bebafuna kwati liciniso lekutsi isho kutsini vele inhlawulo yaJesu, nekutsi kufanele kukhunjulwe njani kufa kwakhe. Lamuhla luyasisita lolucwaningo lolwentiwa ngulamaKhristu. Lusisita njani? Sesiyacondza kutsi umhlatjelo waJesu usho kutsini, nekutsi yini lotawusentela yona. (1 Joh. 2:1, 2) Sifundzile nekutsi liBhayibheli likhuluma ngetintfo letitawutfolwa bantfu labajabulisa Nkulunkulu, labanye banelitsemba lekuphila ezulwini bangafi kantsi labanye banelitsemba lekuphila kuze kube phakadze emhlabeni. Sisondzelana naJehova nasicabanga ngekutsi usitsandza kangakanani nekutsi ngamunye wetfu usitakala njani ngemhlatjelo waJesu. (1 Phet. 3:18) Ngako njengebazalwane betfu basesikhatsini lesendlulile, natsi simema labanye kutsi babe natsi nasikhumbula kufa kwaJesu ngalendlela latsi sikukhumbule ngayo. w23.01 21 ¶6-7

Jesu wafundzisa bantfu ngetibusiso letitawuletfwa nguMbuso waNkulunkulu. Siyabonga ngenhlawulo ngobe isenta sibe bangani baJehova naJesu. Ngetulu kwaloko, labo labakhombisa kutsi banekukholwa kuJesu banelitsemba lekuphila phakadze, nelekuphindze babone bantfu lababatsandzako labashona. (Joh. 5:28, 29; Rom. 6:23) Kute lesikwentile lokusenta sifanelwe nguletibusiso, futsi asiyuze sikhone kubuyisela Nkulunkulu naKhristu ngaloko labasentele kona. (Rom. 5:8, 20, 21) Kodvwa singakhombisa kutsi sibonga kangakanani. Kanjani? Ngekutsi sisebentise tintfo lesinato kuze sisekele umsebenti weMbuso. Sibonelo nje, singasita ekwakhiweni kwetakhiwo tenhlangano nasekutinakekeleni. w23.01 26 ¶3; 28 ¶5

Labo labatawubusa eMbusweni waNkulunkulu batawunakekela tigidzigidzi tebantfu letitawube tihlala emhlabeni wonkhe. NjengaJesu, laba labangu-144 000 batawuba ngemakhosi nebaphristi. (Semb. 5:10) Ngephansi kweMtsetfo waMosi, umsebenti lobalulekile webaphristi bekukusita bantfu kutsi bahlale baphilile emtimbeni futsi bahlale banebuhlobo lobuhle naNkulunkulu. LoMtsetfo “usitfunti setintfo letinhle letiseta,” ngako kunengcondvo kwephetsa ngekutsi labo labatawubusa naJesu batawusita bantfu baNkulunkulu kuze bahlale baphilile emtimbeni futsi babe nebuhlobo lobuhle naJehova. (Heb. 10:1) Kwanyalo asati kutsi lamakhosi nebaphristi batawukhuluma njani nalabo labatawube babuswa nguloMbuso. Singaciniseka kutsi labo labatawube baphila ePharadisi batasitfola sicondziso labasidzingako.​—Semb. 21:3, 4. w22.12 11 ¶11-13

Lesinye sizatfu lesenta simeme labanye kutsi babe natsi eSikhumbutweni kutsi sifuna labo labete kwekucala bafundze liciniso ngaloko Jehova naJesu labasentela kona. (Joh. 3:16) Sinelitsemba lekutsi loko labatakubona eSikhumbutweni nalabatakuva kutawubenta bafune kufundza lokunyenti ngaJehova futsi bacale kumkhonta. Siphindze simeme nalabo lesebaphelelwe ngumdlandla wekukhonta Jehova. Loko sikwenta kuze sibakhumbute kutsi Nkulunkulu usabatsandza. Labanyenti babakhona eSikhumbutweni futsi sijabula kakhulu kubabona. Lokuba khona kubakhumbuta kutsi bebakujabulela kangakanani kukhonta Jehova esikhatsini lesendlulile. (Hla. 103:1-4) Ngisho nobe bantfu basemukela simemo setfu nobe bangasemukeli, siyachubeka sibamemela eSikhumbutweni, sibe sati kutsi Jehova unendzaba nemuntfu ngamunye loba khona eSikhumbutweni.​—Luk. 15:7; 1 Thim. 2:3, 4. w23.01 20 ¶1; 22-23 ¶9-11

Ngebusuku lobungaphambi kwekufa kwakhe, Jesu wacela lokutsite lokubalulekile kuBabe wakhe wasezulwini. Wacela Jehova kutsi avikele balandzeli bakhe. (Joh. 17:15, 20) Jehova bekasolo abanaka bantfu bakhe, abanakekela futsi abavikela. Nanobe kunjalo, Jesu bekati kutsi Sathane bekatawubaphatsa kabi kakhulu balandzeli bakhe. Jesu bekati nekutsi bebatawudzinga kusitwa nguJehova kuze bamelane nekuhlaselwa nguDeveli. Lelive laSathane liwacindzetela kakhulu emaKhristu eliciniso lamuhla. Sibhekana netinkinga letingasicedza emandla futsi tivivinye kwetsembeka kwetfu kuJehova. Kodvwa kufanele singesabi. Jehova usinakile, uyatibona tinkinga lesibhekana nato futsi uhlale akulungele kusisita. Liso laJehova “libuke labo labamesabako.”​—Hla. 33:18-20. w22.08 8 ¶1-2

Njalo ngemnyaka ngesikhatsi seSikhumbuto, sikhombisa kutsi siyabonga ngaloko Jesu lasentela kona ngekutsi sithantaze futsi sicabangisise ngekutsi kufa kwakhe kusho kutsini kitsi. Siphindze simeme bantfu labanyenti kutsi babe kanye natsi kulomkhosi lobalulekile. Senta konkhe lokusemandleni etfu kutsi kube bete lokusivimbelako kutsi sibe khona eSikhumbutweni. ESikhumbutweni, sifundza ngekutsi yini leyenta bonkhe bantfu badzinge inhlawulo, nekutsi kufa kwemuntfu munye kungatihlawulela njani tono tebantfu labanyenti. Siphindze sikhunjutwe kutsi sinkhwa neliwayini limelelani nekutsi bobani lokufanele badle lesinkhwa futsi banatse leliwayini. (Luk. 22:19, 20) Siphindze sicabangisise ngetibusiso letitawutfolwa ngulabo labatawuphila emhlabeni. (Isa. 35:5, 6; 65:17, 21-23) Kufanele singawatsatseli phansi lamaciniso. w23.01 20 ¶2; 21 ¶4

Ngesikhatsi anikela ngeNdvodzana yakhe kutsi ihlawulele kuphila kwetfu, Nkulunkulu wavula litfuba lekutsi sitfole kuphila lokuphakadze. (Mat. 20:28) Umphostoli Pawula wabhala watsi: “Njengobe kufa kwavela ngemuntfu, nekuvuswa kwalabafile nako kuvela ngemuntfu. Njengobe ku-Adamu bonkhe bayafa, nakuKhristu bonkhe batawutfola kuphila.” (1 Khor. 15:21, 22) Jesu wafundzisa balandzeli bakhe kutsi bathantazele uMbuso waNkulunkulu kutsi ute nekutsi intsandvo yaNkulunkulu yentiwe emhlabeni. (Mat. 6:9, 10) Incenye yenjongo yaNkulunkulu kutsi bantfu baphile emhlabeni kuze kube phakadze. Kuze ayifeze, Jehova ubeke iNdvodzana yakhe kutsi ibe yiNkhosi yeMbuso waMesiya. Nkulunkulu bekasolo ahlanganisa bantfu labavela emhlabeni labangu-144 000 labatawusebenta naJesu kuze bafeze injongo yakhe.​—Semb. 5:9, 10. w22.12 5 ¶11-12

Nasishonelwa ngumuntfu lesimtsandzako, siva buhlungu kakhulu! Ekucaleni, sivame kuva buhlungu ikakhulukati nangabe lona lesimtsandzako abe setinhlungwini ngaphambi kwekutsi ashone. Kodvwa ngekuhamba kwesikhatsi sibese siyajabula nasicabanga ngalokutsite lasifundzisa kona, lakwenta, lakusho kuze asikhutsate nobe lokwasenta sahleka. Ngendlela lefanako, kusivisa buhlungu kufundza ngekuhlupheka kwaJesu nangekufa kwakhe. Ngesikhatsi seSikhumbuto, sivame kutinika sikhatsi sekucabanga ngekutsi umhlatjelo waJesu uligugu kangakanani. (1 Khor. 11:24, 25) Nobe kunjalo, sijabula kakhulu nasicabanga ngato tonkhe tintfo Jesu latisho nalatenta ngesikhatsi alapha emhlabeni. Kuyasikhutsata nekucabanga ngaloko lakwentako nyalo, nalatawusentela kona esikhatsini lesitako. w23.01 26 ¶1-2

Bafundzi beva buhlungu kakhulu ngesikhatsi Jesu ashona. Abagcinanga nje ngekulahlekelwa ngumngani wabo labamtsandzako, kodvwa beva shengatsi balahlekelwe nalitsemba labo. (Luk. 24:17-21) Nobe kunjalo, ngesikhatsi Jesu abonakala kubo, wabasita bacondza indlela lasigcwalise ngayo siphrofetho seliBhayibheli. Waphindze wabaniketa umsebenti lobalulekile. (Luk. 24:26, 27, 45-48) Ngesikhatsi Jesu enyukela ezulwini, lobuhlungu lebebanabo bese bugucuke baba yinjabulo. Kwati kutsi iNkhosi yabo iyaphila nekutsi ikulungele kubasita kuze bente umsebenti lebeyibanike wona kwabajabulisa kakhulu. Lenjabulo lebebanayo yabenta kutsi bachubeke badvumisa Jehova. (Luk. 24:52, 53; Imis. 5:42) Kuze sikhone kulingisa sibonelo sebafundzi baJesu, kufanele sibeke kucala uMbuso waNkulunkulu ekuphileni kwetfu. Nanobe kudzingeka kutsi sicinisele kuze sichubeke sikhonta Jehova, yena wetsembisa kusibusisa kakhulu nangabe sibeka tintfo letiphatselene neMbuso wakhe kucala ekuphileni kwetfu.​—Taga 10:22. w23.01 30-31 ¶15-16

Asifuni kwenta liphutsa lelifanako nalelo lelentiwa ngu-Adamu na-Eva. Singakugwema loko ngekutsi sichubeke sifundza ngaJehova, sibutsandze buntfu bakhe futsi setame kucondza indlela lacabanga ngayo. Nasenta njalo, itawukhula indlela lesimtsandza ngayo Jehova. Cabanga nga-Abrahama. Bekamtsandza kakhulu Jehova. Nanobe ngalesinye sikhatsi bekangacondzi kutsi yini lebangele Jehova kutsi ente sincumo lesitsite, Abrahama akazange avukele. Kunaloko, wetama kumati kancono Jehova. Sibonelo nje, ngesikhatsi Jehova amtjela ngesincumo sakhe sekubhubhisa iSodoma neGomora, Abrahama wacale wesaba kutsi ‘uMehluleli wemhlaba wonkhe’ utawubhubhisa labalungile nalababi kanye kanye. Ku-Abrahama, loko bekubonakala kuyintfo lembi, ngako ngekutfobeka wabuta Jehova imibuto leminyenti. Jehova wamphendvula ngesineke. Ekugcineni, Abrahama wabona kutsi Jehova uhlola tinhlitiyo tabo bonkhe bantfu nekutsi akwenteki ajezise lolungile nakajezisa lonelicala.​—Gen. 18:20-32. w22.08 28 ¶9-10

Nga-455 B.C.E., ngemuva kwekutsi uMbusi Nehemiya sekalwakhe kabusha lubondza lwaseJerusalema, wafuna emadvodza letsembekile langanakekela lelidolobha. Emkhatsini wemadvodza lawakhetsa bekunendvuna yeNdzawo Levikelekile lokutsiwa nguHanani. LiBhayibheli litsi Hanani “bekayindvodza leyetsembekile futsi leyesaba Nkulunkulu weliciniso kwendlula bantfu labanyenti.” (Neh. 7:2) Ngenca yekutsi Hanani bekamtsandza Jehova futsi esaba kumvisa buhlungu loko kwamenta wawutsatsa njengalobalulekile wonkhe umsebenti lebekanikwa wona. Lobuntfu bungasisita natsi kutsi satiwe njengebantfu labetsembekile nasenta umsebenti waNkulunkulu. Cabanga ngesibonelo saThikhikhusi lebekangumzalwane lobeketsenjwa ngumphostoli Pawula. Pawula wetsembela kuThikhikhusi lambita ngekutsi ‘yinceku leyetsembekile.’ (Ef. 6:21, 22) Pawula bekangagcini nje ngekwetsembela kuye kuze anikete bazalwane base-Efesu nebaKholose tincwadzi, kodvwa bekaphindze etsembela kuye kutsi abakhutsate futsi abadvudvute. Thikhikhusi usikhumbuta ngebazalwane labetsembekile futsi lesingabetsemba labasisitako kuze sibe nebuhlobo lobuhle naNkulunkulu lamuhla.​—Khol. 4:7-9. w22.09 9-10 ¶5-6

Kwaphela iminyaka lengaba ngu-13 Josefa solo anetinkinga. Josefa bekangatibuta kutsi Jehova umtsandza mbamba yini vele? Bekangahle acabange kutsi Jehova umshiye ngesikhatsi lebekamdzinga ngaso kakhulu. Kodvwa Josefa akazange ahlale atfukutsele. Kunaloko, wahlala asangulukile ngekutsi ahlale anemoya lophasi. Ngesikhatsi atfola litfuba lekutiphindziselela kubobhuti bakhe, akazange akwente loko, kodvwa wakhombisa kutsi uyabatsandza futsi wabacolela. (Gen. 45:4, 5) Josefa wakwenta loko ngobe bekacabanga ngendlela lebhadlile. Kunekutsi ahlale anake tinkinga takhe, abecabanga ngaloko bekufunwa nguJehova. (Gen. 50:19-21) Yini lesiyifundzako? Nangabe uphatfwa kabi, ungamtfukutseleli Jehova nobe utibute kutsi sewukulahlile yini. Kunaloko, cabangisisa ngendlela lakusita ngayo kutsi ubeketelele lenkinga. Ngetulu kwaloko, nangabe labanye bakuphatsa kabi vumela lutsandvo lumbonye emaphutsa abo. w22.11 21 ¶4

Umphrofethi Danyela wabona imibono lebeyiveta ngalokucacile kutsi Jehova uphakeme ngetulu kwato tonkhe letinye tiphatsimandla. Danyela wacale wabona tilwane letinkhulu tesiganga letine lebetimelela imibuso yemhlaba leseyengcile nalekhona lamuhla, lefaka ekhatsi iBhabhulona, emaMede nemaPheresiya, iGrisi, iRoma kanye nembuso wemaNgisi nemaMelika lobusako lamuhla. (Dan. 7:1-3, 17) Danyela wabese ubona Jehova Nkulunkulu ahleti enkantolo, esihlalweni sakhe sebukhosi lesisezulwini. (Dan. 7:9, 10) Nkulunkulu utsatsa lonkhe ligunya kubohulumende bebantfu futsi ulinika labanye labalifanele kakhulu kunabo nalabanemandla kakhulu. Ulinika bobani? Ulinika ‘lotsite lofana nendvodzana yemuntfu,’ lokunguJesu Khristu, kanye ‘nebantfu labangcwele baNkulunkulu Lophakeme,’ lokungulabangu-144 000 labatawubusa “kuze kube phakadze.” (Dan. 7:13, 14, 18) Ngako kuyacaca kutsi Jehova ‘unguNkulunkulu Lophakeme.’ Letintfo letabonwa nguDanyela embonweni tiyavumelana naloko bekakushito ngaphambili. Danyela watsi “Nkulunkulu welizulu” ‘ubeka emakhosi futsi awehlise.’​—Dan. 2:19-21. w22.10 14-15 ¶9-11