December

Lendvuna yesigodlo saseTopiya beyikulungele yini vele? Cabanga nganaku: Lendvodza lengumTopiya “beyiye eJerusalema kuze iyokhonta Nkulunkulu.” (Imis. 8:27) Ngako kungenteka beyigucukele enkholweni yebuJuda. Siyaciniseka kutsi beyifundze ngaJehova emiBhalweni Lengcwele yesiHebheru. Nanobe kunjalo, beyifuna kwati lokunyenti. Ngesikhatsi Filiphu ahlangana nayo emgwacweni, wayitfola ifundza umculu wa-Isaya. (Imis. 8:28) Beyifuna kuchubeka ifundza. Yahamba yesuka eTopiya kuze iyokhonta Jehova ethempelini lebeliseJerusalema. LomTopiya wafundza emaciniso labalulekile kuFiliphu, lafaka ekhatsi kutsi Jesu unguMesiya. (Imis. 8:34, 35) Yakhula indlela lebekamtsandza ngayo Jehova neNdvodzana yakhe. Loko kwenta kutsi ente sincumo lesibalulekile sekubhajatiswa futsi abe ngumlandzeli waJesu Khristu. Filiphu wabona kutsi lendvodza beyikulungele kubhajatiswa ngako wayibhabhatisa. w23.03 8-9 ¶3-6

Angeke simjabulise Jehova nangabe singakhulumi liciniso. (Taga 6:16, 17) Lamuhla bantfu labanyenti bacabanga kutsi akusiyo inkinga kukhuluma emanga, kodvwa tsine siyawagwema ngobe Jehova utsi mabi. (Hla. 15:1, 2) Nanobe singawakhulumi emanga, kodvwa siyakugwema nekwenta labanye kutsi bafike esiphetfweni lesingasilo liciniso. Kufanele siwema nekusakata inhlebo lelimatako. (Taga 25:23; 2 Thes. 3:11) Nangabe ubona kutsi loku lenicoca ngako sekucala kuba yinhlebo lelimatako, kuhle kucala lenye indzaba. Njengobe sihlala eveni lapho khona bantfu labanyenti balusebentisa kabi lulwimi, kufanele sente konkhe lesingakhona kukwenta kuze siciniseke kutsi indlela lesikhuluma ngayo iyamjabulisa Jehova. Utasibusisa nangabe silusebentisa kahle lulwimi lwetfu emsebentini wekushumayela, emihlanganweni yelibandla nalapho sicoca nalabanye. Nasekubhujiswe lelive lelibi, kutawuba melula kutsi sichubeke sidvumisa Jehova ngelulwimi lwetfu.​—Juda 15. w22.04 9 ¶18-20

Nasicabanga ngendlela Jehova naJesu labasitsandza ngayo, loko kwenta kutsi natsi sibatsandze. (1 Joh. 4:10) Sibatsandza kakhulu nasicabanga ngekutsi Jesu wafela ngamunye wetfu. Umphostoli Pawula wakuvuma loku futsi waveta indlela labonga ngayo ngesikhatsi abhalela baseGalathiya atsi: ‘INdvodzana yaNkulunkulu yangitsandza futsi yatinikela ngenca yami.’ (Gal. 2:20) Ngenca yekutsi Jesu wasifela, Jehova ukudvonsele kuye kuze ube ngumngani wakhe. (Joh. 6:44) Akukujabulisi yini kwati kutsi Jehova wabona lokuhle kuwe futsi wakhipha linani lelisetulu kakhulu kuze ube ngumngani wakhe? Akukwenti yini umtsandze kakhulu Jehova naJesu? Kufanele sitibute: ‘Lolutsandvo lungenta kutsi ngifune kwentani?’ Lutsandvo lesinalo ngaNkulunkulu nangaKhristu lusenta kutsi sikhombise kutsi siyabatsandza labanye.​—2 Khor. 5:14, 15; 6:1, 2. w23.01 28 ¶6-7

Jehova usebentisa kakhulu liBhayibheli kuze asite bantfu bakhe “bamkhonte bahlangene lihlombe ngelihlombe.” Jehova wenta kutsi tincenye letinyenti temiBhalo tibhalwe ngendlela yekutsi ticondvwe kuphela ngulabo labatfobekile. (Luk. 10:21) Bantfu etindzaweni letehlukahlukene bayalifundza liBhayibheli. Kodvwa licondvwa kuphela ngulabo labatfobekile nalabakwentako loko lelikushoko. (2 Khor. 3:15, 16) Siyakubona kuhlakanipha kwaJehova eBhayibhelini. Akagcini nje ngekusebentisa imiBhalo kuze asifundzise silicembu kodvwa uphindze ayisebentise kuze afundzise futsi advudvute ngamunye wetfu. Nasifundza liBhayibheli, sonkhe siyabona kutsi Jehova unendzaba natsi. (Isa. 30:21) Kukangakhi uvula liBhayibheli futsi ufundze livesi lokubonakala ngatsi libhalelwe wena? Nobe kunjalo, liBhayibheli labhalelwa kutsi licondvwe tigidzi tebantfu. Kwenteka njani kutsi loko lokubhalwe kulo kungaphelelwa sikhatsi futsi kube nguloko lokudzingako? Loku kungenca yekutsi uMbhali walo nguye kuphela lohlakaniphe kakhulu.​—2 Thim. 3:16, 17. w23.02 4-5 ¶8-10

Njengobe singemaKhristu eliciniso, simtsandza kakhulu Jehova futsi sifuna kumentela lokuncono kakhulu. Kodvwa nasifuna kwenta loko, kufanele sitibekele imigomo ekukhonteni Nkulunkulu lenjengekuba nebuntfu bebuKhristu, kufundza emakhono lalusito, nekubuka tindlela lesingasita ngayo labanye. Yini lesenta sifune kutfutfuka endleleni lesikhonta ngayo Jehova? Sizatfu lesiyinhloko kutsi sifuna kujabulisa Babe wetfu wasezulwini lositsandzako. Jehova uyajabula nakasibona sisebentisa emakhono etfu kuze sente lokunyenti emsebentini wakhe. Ngetulu kwaloko, sifuna kutfutfuka endleleni lesikhonta ngayo Jehova kuze sitawukhona kubasita kakhudlwana bazalwane betfu nabodzadze. (1 Thes. 4:9, 10) Ngisho nobe sesikhonte Jehova sikhatsi lesidze kanganani, sonkhe singatfutfuka ekumkhonteni. w22.04 22 ¶1-2

Tepolitiki titawujikela iBhabhulona Lenkhulu, lokungumbuso wemhlaba wenkholo yemanga. Loko kutawusho kucala kwekuhlupheka lokukhulu. Loko kusho kutsi bantfu labanyenti batawucala kukhonta Jehova yini? Cha. Kunaloko, Sembulo sehluko 6 sisitjela kutsi ngaleso sikhatsi lesitawube simatima, bantfu labangamkhonti Jehova batawufuna sivikelo kutepolitiki nakutekutsengiselana takulelive, letifananiswa netintsaba. Njengobe batawube bangawusekeli uMbuso waNkulunkulu, Jehova utabatsatsa ngekutsi bamelene naye. (Luk. 11:23; Semb. 6:15-17) Bantfu baJehova labetsembekile ngibo bodvwa labatawehluka ngaleso sikhatsi lesitawube simatima. Ngibo bodvwa emhlabeni labatawube bakhonta Jehova Nkulunkulu futsi labangeke basisekele ‘lesilwane sesiganga.’​—Semb. 13:14-17. w22.05 16-17 ¶8-9

Kunalomunye umlayeto lokufanele umenyetelwe bantfu baNkulunkulu ngetulu kwemlayeto ‘wetindzaba letimnandzi teMbuso.’ (Mat. 24:14) Kufanele basekele nemsebenti lowentiwa tingilosi lokukhulunywa ngato kuSembulo 8 kuya kusehluko 10. Letingilosi timemetela ngetintfo letimbi letitowehlela labo labangawemukeli uMbuso waNkulunkulu. Ngako BoFakazi BaJehova bebasolo bamemetela umlayeto lofananiswa ‘nesangcotfo nemlilo,’ loveta loko Jehova Nkulunkulu latawukwenta kulelive lelibi laSathane. (Semb. 8:7, 13) Bantfu kufanele bati kutsi kuphela sekusedvute, ngako kufanele bente lushintjo ekuphileni kwabo kuze basindze ngelilanga lentfukutselo yaJehova. (Zef. 2:2, 3) Kodvwa bantfu abawutsandzi lomlayeto. Ngako kudzingeka sibe nesibindzi kuze siwumemetele. Ngekuhlupheka lokukhulu, umlayeto wekugcina wesehlulelo utawubatfukutselisa kakhulu bantfu.​—Semb. 16:21. w22.05 7 ¶18-19

Cabanga ngalabashadile lasebatawuba nemntfwana. Kungenteka kuleminyaka leyendlulile bebativa tinkhulumo letikhuluma ngekukhulisa bantfwana. Kodvwa nyalo, letimiso titawubaluleka kakhulu kubo. Sebatawuba nemntfwana lokufanele bamkhulise. Loyo ngumsebenti lomkhulu! Ngako nakushintja timo tetfu, leminye imiBhalo ibaluleka kakhulu kitsi. Lesi ngulesinye sizatfu lesenta labo labakhonta Jehova kutsi bafundze liBhayibheli futsi bazindle ngalo ‘konkhe kuphila kwabo,’ njengobe emakhosi aka-Israyeli atjelwa kutsi ente kanjalo. (Dut. 17:19) Batali, ninelilungelo lelikhulu kakhulu umKhristu langahle abe nalo, lokulilungelo lekufundzisa bantfwana benu ngaJehova. Kodvwa anifuni nje kugcina ngekubafundzisa emaciniso ngaNkulunkulu wetfu. Nifuna nekubasita kutsi bamtsandze ngalokusuka enhlitiyweni. w22.05 26 ¶2-3

Akukeneli kuva buhlungu ngesono lesisentile. Kufanele sente lokutsite. Lenye intfo Jehova layibukako ngaphambi kwekutsi ancume kucolela lotsite nobe kungamcoleli kutsi lomuntfu ushintjile yini. Kushintja kusho “kugucuka.” Ngalamanye emagama, lomuntfu kufanele ayekele kwenta tintfo letimbi futsi aphile ngendlela Jehova lafuna kutsi bantfu baphile ngayo. (Isa. 55:7) Lomuntfu kufanele ashintje indlela lacabanga ngayo, icondziswe yindlela Jehova lacabanga ngayo. (Rom. 12:2; Ef. 4:23) Kufanele atimisele kushintja indlela lembi lebekacabanga ngayo futsi ayekele netintfo letimbi lebekatenta. (Khol. 3:7-9) Kuliciniso kutsi kukholwa kwetfu emhlatjelweni waKhristu ngiko lokwenta Jehova akhone kusicolela futsi asuse tono tetfu. Jehova usebentisa lomhlatjelo waJesu nakabona kutsi setama mbamba kushintja indlela lebesiphila ngayo.​—1 Joh. 1:7. w22.06 6 ¶16-17

Bantfu banemlandvo lomubi wekuphatsa kabi labanye. (Shu. 8:9) Sibonelo nje, labasemagunyeni balisebentisa kabi ligunya labo, tigebengu tenta tintfo letimbi, esikolweni labanye bantfwana baphatsa kabi labanye futsi labanye bantfu baphatsa kabi ngisho nemalunga emindeni yabo. Kungako nje bantfu babesaba labanye bantfu! Sathane ukusebentisa njani loku? Sathane usebentisa kwesaba bantfu kuze etame kusenta kutsi siyekele kushumayela nekwenta letinye tintfo Jehova lacela kutsi sitente. Ngetulu kwaloko, Sathane wente labanye bohulumende bavimbela umsebenti wetfu futsi basiphatsa kabi. (Luk. 21:12) Kulelive laSathane, bantfu labanyenti basakata tindzaba letingemanga ngaBoFakazi BaJehova. Bantfu labawetsembako lamanga bangahlekisa ngatsi nobe baze basiphatse kabi. (Mat. 10:36) Kuyasimangalisa yini loku lokwentiwa nguSathane? Cha. Loku bekavele akwenta nakumaKhristu ekucala.​—Imis. 5:27, 28, 40. w22.06 16 ¶10-11

Bobani labatawuba semkhatsini walaba “labanyenti” labatawentiwa kutsi babe ngulabalungile? Kutawuba ngulabavusiwe nalabo labatawusindza ku-Amagedoni kanye nebantfwana lokungenteka batalwe eveni lelisha. Ngasekupheleni kweminyaka lengu-1 000, bonkhe bantfu emhlabeni batawube sebete sono. Kufanele sikhumbule kutsi kubabete sono akusho kutsi umuntfu utawuvele nje atfole kuphila lokuphakadze. Cabanga nga-Adamu na-Eva. Bebete sono, kodvwa bekudzingeka balalele Jehova Nkulunkulu ngaphambi kwekutsi batfole kuphila lokuphakadze futsi lokubuhlungu kutsi abazange bamlalele. (Rom. 5:12) Ngenca yekutsi bonkhe bantfu batawube sebete sono ngasekupheleni kweminyaka lengu-1 000, bonkhe labantfu labete sono batakusekela ngalokuphelele yini kubusa kwaJehova kuze kube phakadze? Labanye batawufanana na-Adamu na-Eva yini, bangetsembeki nanobe bete sono? Lemibuto itawudzinga kuphendvulwa. w22.09 22-23 ¶12-14

Nawubuka timo letikhona lamuhla emhlabeni, ukutfola kumatima yini kwetsemba kutsi timo titawuba ncono? Lutsandvo emkhatsini wemalunga emndeni seluyancipha. Bantfu sebaba nebudlova kakhulu, baticabangela bona futsi baneludlame. Labanyenti bakutfola kumatima kwetsemba labo labasemagunyeni. Kodvwa loku kungakwenta uciniseke kutsi timo titawuba ncono. Kanjani? Ngobe bantfu benta loko kanye liBhayibheli lelatsi kutakwenteka ‘emalangeni ekugcina.’ (2 Thim. 3:1-5) Kute umuntfu longaphika kutsi lesiphrofetho sesigcwalisekile, futsi kugcwaliseka kwaso kuveta kutsi Khristu Jesu sewuyiNkhosi yeMbuso waNkulunkulu. Kodvwa lesi kumane kungulesinye siphrofetho kuletinyenti letimayelana neMbuso. Tonkhe letiphrofetho tihlangana kahle, kuhle kwemdlalo wekubeka lucetu nelucetu endzaweni yalo (jigsaw puzzle) futsi tisenta sibone kutsi sikuphi nesikhatsi. w22.07 2 ¶1-2

Ngesikhatsi salomkhuhlane we-COVID-19, satfola ticondziso leticacile mayelana nekuba nemihlangano yelibandla kanye nendlela yekushumayela. Ngekushesha nje sacala kusebentisa i-Internet kuze sibe nemihlangano yelibandla, yesigodzi neyesifundza. Ngetulu kwaloko, sacala kushumayela ngekubhala tincwadzi nangekushaya lucingo. Jehova wayibusisa imetamo yetfu. Emagatja lamanyenti abika linani lelisetulu lebamemeteli. Kwenteka tintfo letikhutsatako kulabanye kuleso sikhatsi. Kungenteka labanye bebabona ngatsi inhlangano isinika ticondziso letinyenti kakhulu ngesikhatsi salomkhuhlane. Kodvwa ngaso sonkhe sikhatsi bekuvele kube sebaleni kutsi leticondziso betisuke tihlakaniphile. Nasizindla ngendlela Jesu lahola ngayo bantfu bakhe ngendlela lenelutsandvo, siyaciniseka kutsi ngisho kungentekani esikhatsini lesitako, Jehova neNdvodzana yakhe layitsandzako batawuhlale banatsi.​—Heb. 13:5, 6. w22.07 13 ¶15-16

Ngetulu kwekudvumisa Jehova nasithantaza, kufanele simbonge ngetintfo letinhle lasipha tona. Sibonelo nje, singambonga ngemibalabala lesiyibonako etimbalini, ngekudla lokwehlukahlukene lokumnandzi nangenjabulo lesiyitfolako ngekuba nebangani. Babe wetfu lositsandzako usiphe letintfo kanye naletinye letinyenti kuze nje asente sijabule. (Hla. 104:12-15, 24) Ngetulu kwako konkhe, siyambonga Jehova ngekutsi usiphe imfundvo lesisita sihlale sinekukholwa lokucinile, nangelitsemba lelihle lesinalo ngelikusasa. Kungahle kube melula kukhohlwa kubonga Jehova ngato tonkhe tintfo lasentele tona. Yini lengakusita kutsi ungakhohlwa? Ungabhala luhla lwetintfo loticelile kuJehova futsi uhle uluhlola kuze ubone kutsi ngutiphi lasakwentele tona. Ngemuva kwaloko ungabese uyathantaza umbonge ngaloko lakwentele kona.​—Khol. 3:15. w22.07 22 ¶8-9

Siyati kutsi akukeneli kufundza liciniso. Kuze sisitakale kakhulu, kufanele sikusebentise loko lesikufundzako ekuphileni kwetfu. Nasenta njalo, liciniso litawusenta sijabule mbamba. (Jak. 1:25) Yini lesingayenta kuze siciniseke kutsi siphila ngekuvumelana neliciniso? Lomunye umzalwane watsi singatihlola kuze sibone kutsi siyakusebentisa yini loko lesikufundzako ekuphileni kwetfu, sihlole nalapho kufanele sitfutfukise khona. Umphostoli Pawula watsi: “Ngelizinga lesesitfutfuke ngalo, asichubekeleni embili ngendlela lefanako.” (Fil. 3:16) Cabanga nje kutsi sisitakala kangakanani nasenta konkhe lesingakwenta kuze ‘sichubeke sihamba ecinisweni’! Akugcini nje ngekwenta imphilo yetfu ibe ncono, kodvwa siphindze sijabulise Jehova nebazalwane betfu nabodzadze. (Taga 27:11; 3 Joh. 4) Leti tizatfu letibalulekile tekutsandza liciniso nekuphila ngekuvumelana neliciniso. w22.08 18-19 ¶16-18

Labadzala belibandla bangakhombisa njani kutsi bayamtsandza Jehova naJesu? Indlela lehamba embili kutsi banakekele tidzingo tetimvu taJesu. (1 Phet. 5:1, 2) Jesu wakwenta kwacaca loku kumphostoli Phetro. Ngemuva kwekutsi Phetro sekaphike Jesu tikhatsi letintsatfu, kungenteka bekafisa kakhulu kukhombisa kutsi uyamtsandza. Ngemuva kwekutsi Jesu sekavusiwe, wabuta Phetro watsi: “Simoni ndvodzana yaJohane, uyangitsandza yini?” Siyaciniseka kutsi Phetro bekangenta nobe ngabe yini kuze akhombise kutsi uyayitsandza iNkhosi yakhe. Jesu watjela Phetro watsi: “Yelusa emawundlu ami.” (Joh. 21:15-17) Kuko konkhe kuphila kwakhe, Phetro watinakekela ngelutsandvo timvu teNkhosi, ngaleyo ndlela bekakhombisa kutsi uyamtsandza Jesu. Nine labadzala belibandla, ningakhombisa njani kutsi abalulekile kini emavi Jesu lawasho kuPhetro? Ningakhombisa kutsi nimtsandza kangakanani Jehova naJesu ngekutsi nitinikete sikhatsi sekukhutsata bazalwane nabodzadze nangekutsi nisite labo lasebaphelelwe ngumdlandla wekukhonta Jehova kutsi babuyele kuye.​—Hez. 34:11, 12. w23.01 29 ¶10-11

Ungacabangi kutsi kute longakhona kucondza simo lobhekene naso. Kucabanga ngalendlela kungakwenteka ucabange kutsi simo lokuso angeke silunge nekutsi angeke ukhone kulwa netifiso letimbi. LiBhayibheli lisho lokwehlukile. Litsi: “Nanilingwa utawenta nendlela yekuphuma kuze nikhone kubeketela.” Ngako ngisho nobe sifiso lesibi sinemandla, singakhona kumelana naso. Sisitwa nguJehova, singakhona kungakwenti lokubi. Hlale ukhumbula naku: Ngenca yekutsi unesono, utawuhle uba nato tifiso letimbi. Kodvwa nakwenteka uba nato, kufanele umelane nato ngekushesha, ulingise Josefa lowambalekela ngekushesha umfati waPhotifari. (Gen. 39:12) Ungativumeli tifiso letimbi kutsi tikuncobe! w23.01 12-13 ¶16-17

Kulunga buntfu baJehova. (Dut. 32:4) Kulunga kuhlobene nekungakhetsi, futsi Jehova akakhetsi. (Imis. 10:34, 35) Loko kubonakala etilwimini letasetjentiswa nakubhalwa liBhayibheli. Jehova wetsembisa kutsi ngesikhatsi sekuphela, “lwati lweliciniso” lolutfolakala eBhayibhelini “lutawuba lunyenti.” Bantfu labanyenti bebatalicondza. (Dan 12:4) Kuhumusha, kushicilela kanye nekusakata emaBhayibheli kanye netincwadzi letisekelwe kulo kungulenye indlela lolwati lolube lunyenti ngayo. Kuze kube ngunyalo, bantfu baJehova bahumushe liVi laNkulunkulu liphelele nobe liyincenye ngetilwimi letingetulu kwa-240, futsi nobe ngubani angalitfola mahhala. Ngenca yaloko, bantfu labavela kuto tonkhe tive bafundza ‘tindzaba letimnandzi teMbuso’ ngaphambi kwekutsi kuphela kufike. (Mat. 24:14) Nkulunkulu wetfu lolungile ufuna kunika bantfu labanyenti kakhulu litfuba lekumati ngekutsi bafundze liVi lakhe. Loko kungenca yekutsi sonkhe usitsandza kakhulu. w23.02 5 ¶11-12

Uyakutsandza yini kulunga? Siyaciniseka kutsi uyakutsandza. Kodvwa sonkhe sinesono, futsi nasingakanaki umbono walelive ngekulunga ungahle usitsintse. (Isa. 5:20) Nabacabanga ngemuntfu lolungile, bantfu labanyenti bacabanga ngemuntfu lotigcabhako, lowehlulela labanye nobe lotibona alunge kakhulu kunalabanye. Kodvwa Nkulunkulu akabatsandzi bantfu labanjalo. Ngesikhatsi Jesu alamhlabeni, wabasola kakhulu baholi benkholo lebebabeka timiso tabo talokulungile. (Shu. 7:16; Luk. 16:15) Umuntfu lowenta loko Jehova latsi kulungile akatiboni alunge kakhulu kunalabanye. Kulunga kubuntfu lobuhle. Kusho kwenta loko Jehova Nkulunkulu latsi kulungile. EBhayibhelini, ligama lelitsi “kulunga” lisho kuphila ngetimiso letiphakeme, lokutimiso taJehova. w22.08 27 ¶3-5

Jesu bekabetsemba bafundzi bakhe nanobe bebawenta emaphutsa. (Joh. 15:16) Ngesikhatsi Jakobe naJohane bacela kutsi Jesu abanikete tikhundla eMbusweni, Jesu akazange asole tizatfu tabo tekukhonta Jehova nobe abayekelise kuba baphostoli. (Mak. 10:35-40) Ngekuhamba kwesikhatsi, bonkhe bafundzi baJesu bamshiya ngebusuku laboshwa ngabo. (Mat. 26:56) Nobe kunjalo, Jesu bekasolo abetsemba. Bekawati kahle emaphutsa abo; kodvwa “wabatsandza kwaze kwaba sekugcineni.” (Joh. 13:1) Ngemuva kwekuvuswa kwakhe, waniketa labaphostoli labetsembekile labangu-11 umsebenti lobalulekile wekuhola emsebentini wekwenta bafundzi newekutsi banakekele timvu takhe letiligugu. (Mat. 28:19, 20; Joh. 21:15-17) Akazange advumateke ngekwetsemba lamadvodza lanesono. Onkhe achubeka asebenta ngekwetsembeka kwaze kwaba lilanga lafa ngalo. Jesu wasibekela sibonelo lesihle sekwetsemba bantfu labanesono. w22.09 6 ¶12

Nangabe siciniseka kutsi Jehova uyasitsandza futsi utawuhlale asisekela, Sathane angeke asente sesabe. Sibonelo nje, umbhali weTihlabelelo 118 wabhekana netimo betimcindzetela kakhulu. Bekanetitsa letinyenti, letifaka ekhatsi labanye lebebasetikhundleni letisetulu (emavesi 9, 10). Ngaletinye tikhatsi wabhekana netimo letimatima kakhulu (livesi 13). Ngetulu kwaloko, Jehova wamjezisa kakhulu (livesi 18). Nanobe kunjalo, lomhlabeleli wahlabela watsi: “Angeke ngesabe.” Bekati kutsi nanobe Jehova amjezisile, Babe wakhe wasezulwini bekamtsandza. Umhlabeleli bekaciniseka kutsi ngisho angabhekana nasiphi simo, Nkulunkulu wakhe lomtsandzako bekatawuhlale amsita. (Hla. 118:29) Kufanele siciniseke kutsi Jehova uyasitsandza. Nasiciniseka ngaloko, sitawukhona kuncoba nati tintfo letintsatfu lesivame kutesaba, (1) kwesaba kutsi angeke sikhone kunakekela umndeni wetfu, (2) kwesaba bantfu (3) nekwesaba kufa. w22.06 15 ¶3-4

Kufanele sente konkhe lokusemandleni kuze kukhonta Jehova kute kucala ekuphileni kwetfu. Njengobe Jehova anguMdali wetfu, kufanele simkhonte. (Semb. 4:11; 14:6, 7) Ngako kumkhonta ngendlela layemukelako kufanele kubaluleke kitsi, simkhonte “ngemoya nangeliciniso.” (Joh. 4:23, 24) Sifuna umoya longcwele waNkulunkulu ucondzise indlela lesimkhonta ngayo Jehova kuze ivumelane nemaciniso latfolakala eVini lakhe. Kumkhonta kwetfu kufanele kute kucala ngisho nobe sihlala eveni lapho umsebenti wetfu uvinjelwe khona. Nyalo kunebazalwane betfu nabodzadze labangetulu kwa-100 labasemajele ngenca nje yekutsi baBoFakazi BaJehova. Nobe kunjalo, bajabulile futsi benta konkhe labangakwenta kuze bathantaze, badadishe liVi laNkulunkulu futsi batjele labanye ngaNkulunkulu wetfu nangeMbuso wakhe. Nasiphatfwa kabi, kuyasijabulisa kwati kutsi Jehova unatsi futsi utasibusisa.​—1 Phet. 4:14. w22.10 9 ¶13

Encwadzini yeTaga, Jehova usinika teluleko letingeke tiphelelwe sikhatsi letingasisita nasitisebentisa. Cabanga nganati tibonelo letimbili. Sekucala sitsi yenetiseka ngaloko lonako. Taga 23:4, 5 tiseluleka titsi: “Ungatikhandli kakhulu kuze utfole umcebo. . . . Ngobe lomcebo utawumila timphiko njengelusweti futsi undizele esibhakabhakeni.” Kodvwa bantfu labanjingile nalabeswele bakhatsateka kakhulu ngekwakha imali. Loku kuvame kwenta kutsi bente tintfo letilimata lidvumela labo, buhlobo babo nalabanye ngisho nemphilo yabo. (Taga 28:20; 1 Thim. 6:9, 10) Sesibili sitsi cabanga ngaphambi kwekutsi ukhulume. Nasingakanaki, loko lesikukhulumako kungabalimata labanye. Taga 12:18 titsi: “Emavi lakhulunywe angakacatjangwa ahlaba njengenkemba, kodvwa lulwimi lwemuntfu lohlakaniphile luyaphilisa.” Sitawuba nebuhlobo lobuhle nalabanye nangabe sikubalekela kuhleba ngemaphutsa abo.​—Taga 20:19. w22.10 21 ¶14; 22 ¶16-17

Hezekeli bekufanele awucondze kahle lomlayeto lebekatawumemetela. Bekufanele awetsembe lomlayeto kuze abe nesifiso sekushumayela. Ngemuva kwaloko, kwenteka intfo lemangalisako. Hezekeli weva kutsi lomculu “bewunongotela njengeluju.” (Hez. 3:3) Bekubangelwa yini loko? KuHezekeli, kumelela Jehova bekumnandzi nobe kumjabulisa. (Hla. 19:8-11) Bekajabula kutsi Jehova umkhetsile kutsi abe ngumphrofethi wakhe. Ngekuhamba kwesikhatsi, Jehova watjela Hezekeli watsi: “Lalela onkhe emavi lengikutjela wona futsi uwafake enhlitiyweni yakho.” (Hez. 3:10) Ngalamavi, Jehova bekatjela Hezekeli kutsi awagcine enhlitiyweni yakhe emavi alomculu futsi acabangisise ngawo. Nakakwenta loko, kukholwa kwakhe bekutawucina kakhulu. Ngetulu kwaloko, lomculu wamniketa umlayeto lonemandla lebekufanele awutjele labantfu. (Hez. 3:11) Ngesikhatsi Hezekeli sekawucondza kahle umlayeto waNkulunkulu futsi sekawetsemba, besekakulungele kucala ente umsebenti wakhe futsi achubeke awenta aze awucedze. w22.11 6 ¶12-14

Yini longayenta nangabe lushintjo lolwentiwako enhlanganweni luvivinya kwetsembeka kwakho? Lusekele ngalokugcwele lushintjo lolwentiwako enhlanganweni. Ngesikhatsi ema-Israyeli asehlane, emaKhohati beketfwala libhokisi lesivumelwane futsi ahambe ambikwaso sonkhe lesive. (Num. 3:29, 31; 10:33; Josh. 3:2-4) Loyo bekungumsebenti lobaluleke kakhulu! Nanobe kunjalo, tintfo tashintja ngesikhatsi ema-Israyeli sekaseVeni Lesetsembiso. Bekungasadzingeki kutsi leLibhokisi lihlale litfutfwa. Ngako emaKhohati anikwa leminye imisebenti. (1 Khr. 6:31-33; 26:1, 24) Kute lasitfola khona kutsi emaKhohati akhonona nobe afuna kunikwa imisebenti lebalulekile ngenca nje yekutsi bekenta umsebenti lokhetsekile ngaphambili. Yini lesiyifundzako? Lusekele ngenhlitiyo yakho yonkhe lushintjo lolwentiwako enhlanganweni yaJehova, lolufaka ekhatsi lolutsintsa sabelo sakho. Jabula nganobe ngumuphi umsebenti lonikwa wona enhlanganweni yaJehova. Khumbula kutsi umsebenti lowentako enhlanganweni akusiwo lokwenta ube ligugu kuJehova. Kunaloko, Jehova ujatjuliswa kutsi uyalalela. w22.11 23 ¶10-11

Onesiforusi wafuna Pawula, futsi watsi nakamtfola wetama kumsita ngetintfo lebekatidzinga. Ngekwenta njalo, Onesiforusi wabeka kuphila kwakhe engotini. Yini lesiyifundzako? Kufanele singakuvumeli kwesaba bantfu kutsi kusesabise nobe kusivimbe kutsi sisite bazalwane betfu labaphatfwa kabi. Kunaloko, kufanele sibavikele futsi sente konkhe lesingakwenta kuze sibasite. (Taga 17:17) Bayaludzinga lutsandvo lwetfu nekutsi sibasekele. Cabanga ngendlela bazalwane betfu nabodzadze baseRussia lababasite ngayo labanye bazalwane ngesikhatsi baboshiwe. Labanye bazalwane nabatekiswa licala, bazalwane nabodzadze labanyenti babakhona enkantolo kuze babasekele. Yini lesiyifundzako? Nangabe bazalwane labaholako banyundzelwa, baboshwa nobe baphatfwa kabi, ungesabi. Bathantazele, unakekele emalunga emindeni yabo futsi ufune letinye tindlela longabasita ngato.​—Imis. 12:5; 2 Khor. 1:10, 11. w22.11 17 ¶11-12

Labadzala belibandla banemsebenti wekuniketa bazalwane nabodzadze sikhutsato lesivela eBhayibhelini futsi basite nalabo labacindzetelekile. (1 Phet. 5:2) Nakunesehlakalo, kufanele baciniseke kutsi umzalwane nobe dzadze ngamunye uphephile, unekudla nekwekwembatsa kanye nendzawo yekufihla inhloko. Kodvwa ngemuva kwetinyanga, labazalwane batawube solo basidzinga sikhutsato lesivela eBhayibhelini. (Joh. 21:15) Harold, lolilunga leKomidi Yeligatja, losekabonene nebazalwane nabodzadze labanyenti labehlelwe tehlakalo utsi: “Kutsatsa sikhatsi kutsi babuyele esimeni. Bangahle bacale kwemukela simo, kodvwa kungenteka bakhumbule labo lababatsandzako labashone kulesehlakalo, tintfo tabo letiligugu letibalahlekele nobe bakhumbule kutsi basindze ngekulambisa. Loko kungabenta baphindze beve buhlungu, futsi akusho kutsi bete kukholwa kodvwa kukhombisa kutsi babantfu.” Labadzala belibandla bayasisebentisa seluleko lesitsi: “Nikhale nalabakhalako.”​—Rom. 12:15. w22.12 22 ¶1; 24-25 ¶10-11

Kuze Jehova asisite kutsi sente lokulungile, usipha umoya wakhe longcwele. Nasidadisha liVi laNkulunkulu, sisuke sivumela umoya wakhe kutsi usisite. Siphindze sitfole umoya longcwele nasiya emihlanganweni yelibandla. Kulemihlangano, siyakhona kucitsa sikhatsi nebazalwane betfu nabodzadze, nabo labetama kamatima kwenta lokulungile, futsi loko kuyasikhutsata. (Heb. 10:24, 25; 13:7) Nasithantaza kuJehova ngalokusuka enhlitiyweni, simcele kutsi asisite silwe nebutsakatsaka betfu, utasipha umoya wakhe longcwele lotasinika emandla kuze sikhone kuchubeka silwa. Nanobe letintfo tingeke titicedze tifiso letimbi, kodvwa titasisita kutsi singakwenti lokubi lesikufisako. Nasesitakhele luhlelo loluhle lolutasisita kutsi sibe nebuhlobo lobuhle naJehova, kufanele sinamatsele kulo futsi sichubeke setama kuba netifiso letinhle. w23.01 11 ¶13-14

Nanobe liBhayibheli lingasiyo incwadzi yemphilo nobe lesitjela kutsi sidle kanjani, kodvwa liyayiveta indlela Jehova lacabanga ngayo ngaletintfo. Sibonelo nje, uyasecwayisa kutsi ‘sitibalekele tintfo letiyingoti’ letingalimata imitimba yetfu. (Shu. 11:10) Kudla ngalokwecile nekudzakwa kungabeka kuphila kwetfu engotini, kungako liBhayibheli litsi singakwenti. (Taga 23:20) Jehova ulindzele kutsi sitibambe nasincuma kutsi sitawudla ini, siyidle kangakanani nobe sitawunatsa ini, siyinatse kangakanani. (1 Khor. 9:25) Singatenta tincumo letikhombisa kutsi sibonga kakhulu ngesipho saNkulunkulu lesikuphila ngekutsi sisebentise kahle ingcondvo. (Hla. 119:99, 100; Taga 2:11) Sibonelo nje, sitawucabanga ngaloko lesikudlako. Nangabe sitsandza kudla lokutsite kodvwa sibe sati kutsi kuyasigulisa, kusebentisa kahle ingcondvo kutawusenta kutsi singakudli. Siphindze sikhombise kutsi sihlakaniphile ngekutsi silale ngalokwenele, sijime njalo, sihlale sihlobile futsi nemakhaya etfu ahlale ahlobile. w23.02 21 ¶6-7

Ungawutfola njani umcebo nawufundza liBhayibheli? Cabanga ngaloko lokushiwo ngu-2 KuThimothi 3:16, 17. Naka kutsi “yonkhe imiBhalo . . . ilusito” (1) ekufundziseni, (2) ekwekhuteni, (3) ekulungiseni tintfo (4) nasekuyaleni ngekulunga. Ungasitakala ngaletindlela letine ngisho ufundza tincwadzi teliBhayibheli longakavami kutisebentisa. Hlatiya lendzaba loyifundzako kuze ubone kutsi ikufundzisani ngaJehova, ngenjongo yakhe, nobe ngetimiso teliBhayibheli. Cabanga ngekutsi ikwekhuta njani. Loko ungakwenta ngekubuka kutsi ikusita njani kuze ubone imikhuba lemibi nobe imicabango lemibi futsi uyigweme nekutsi ikusita njani kuze uhlale wetsembekile kuJehova. Naka kutsi lendzaba ikusita njani kuze ulungise tintfo, nobe ulungise umbono longasiwo lokungenteka uvetwe ngulotsite nawushumayela. Ngetulu kwaloko, buka siyalo kulamavesi lesingakusita kutsi ubuke tintfo ngendlela Jehova latibuka ngayo. Nawuhlale ukhumbula letintfo letine, utawutfola umcebo eVini laNkulunkulu lotakusita kutsi usitakale kakhulu nawulifundza. w23.02 11 ¶11

Lesinye siphrofetho lesisencwadzini yaDanyela, siveta kutsi Jesu bekatawucala kubusa ekupheleni kwetikhatsi letingu-7. Singabona njani kutsi Jesu wacala nini kuba yiNkhosi? (Dan. 4:10-17) “Tikhatsi letingu-7” timelela iminyaka lengu-2 520. Lesikhatsi sacala nga-607 B.C.E. ngesikhatsi iBhabhulona isusa inkhosi yekugcina esihlalweni sebukhosi saJehova lebesiseJerusalema. Saphela nga-1914 C.E. ngesikhatsi Jehova abeka Jesu esihlalweni sebukhosi, lokunguye “lonelilungelo lelisemtsetfweni,” lekuba yiNkhosi yeMbuso waNkulunkulu. (Hez. 21:25-27) Sisisita njani lesiphrofetho? Kwati lesiphrofetho lesimayelana ‘netikhatsi letingu-7’ kuyasicinisekisa kutsi Jehova utigcwalisa ngesikhatsi lesifanele tetsembiso takhe. Njengobe bekasibekile sikhatsi sekutsi uMbuso wakhe utawucala nini kubusa, utawuciniseka kutsi tonkhe leletinye tiphrofetho tigcwaliseka ngesikhatsi sakhe lesifanele. Lilanga laJehova ‘angeke lephute!’​—Hab. 2:3. w22.07 3 ¶3-5