November

Akukafaneli kuphume lulwimi lolubi emlonyeni wemKhristu. Kodvwa kunetinhlobo letibhacile tenkhulumo lehlabako lokufanele sitigweme. Sibonelo nje, kufanele sicaphele kutsi singakhulumi kabi ngebantfu labanemasiko lehlukile, beluhlanga lolwehlukile nobe bebuve lobehlukile. Ngetulu kwaloko, asifuni kuvisa labanye buhlungu ngekusebentisa emagama lahlabako. Khuluma ngendlela leyakhako. Bancome labanye kunekutsi ukhonone. Kunyenti ema-Israyeli lebekangakubonga, kodvwa bekavame kukhonona. Kukhonona kuyatselelwana. Khumbula kutsi umbiko lomubi lowaletfwa tinhloli letingu-10 wenta ‘onkhe ema-Israyeli akhonona ngaMosi.’ (Num. 13:31–14:4) Kodvwa nasincoma labanye kungenta kutsi wonkhe muntfu ajabule. Ngako hlale ufuna ematfuba ekuncoma labanye. w22.04 8 ¶16-17

Kusukela ngetikhatsi tekubhalwa kweliBhayibheli, Jehova usite labasebasha labanyenti kutsi babe bangani bakhe. Angabasita nebantfwana bakho kutsi bamtsandze, nangabe bafuna. (1 Khor. 3:6, 7) Ngisho nobe bangamkhonti Jehova ngenhlitiyo yabo yonkhe, utawuchubeka abatsandza. (Hla. 11:4) Nabakhombisa timphawu letincane tekutsi bafuna kujabulisa Jehova, utawube akulungele kubasita kutsi babe bangani bakhe. (Imis. 13:48; 2 Khr. 16:9) Angakusita kutsi usho intfo lekahle ngesikhatsi lesikahle, lokuyintfo bantfwana bakho lebebadzinga kakhulu kuyiva. (Taga 15:23) Nobe angasebentisa umzalwane nobe dzadze ebandleni kutsi abanake. Ngisho nobe sebakhulile, Jehova angabakhumbuta loko lowabafundzisa kona basebancane. (Joh. 14:26) Nawuchubeka ucecesha bantfwana bakho ngalokushoko nangalokwentako, usuke unika Jehova lokutsite langakubusisa. w22.04 21 ¶18

Ngenca yekutsi Sathane akasakhoni kubuyela ezulwini, intfukutselo yakhe uyitfululela kulabagcotjiwe labaselamhlabeni, labangemalunga eMbuso waNkulunkulu futsi “labanemsebenti wekufakaza ngaJesu.” (2 Khor. 5:20; Ef. 6:19, 20) Nga-1918, bazalwane labangu-8 lebabohola baboshwa, babekwa emacala langemanga futsi bagwetjwa sikhatsi lesidze. Bekubonakala ngatsi umsebenti walabazalwane labagcotjiwe umisiwe. (Semb. 11:3, 7-11) Kodvwa ekucaleni kwa-1919, labazalwane labagcotjiwe bakhululwa ejele futsi ngemuva kwesikhatsi, emacala abo esulwa. Ngekushesha nje, labazalwane babuyela emsebentini wabo wekuhola emsebentini wekushumayela newekufundzisa. Kodvwa loko akukamenti Sathane wayekela kuhlasela bantfu baNkulunkulu. Kusukela ngaleso sikhatsi, Sathane ubangele kutsi bantfu baNkulunkulu baphatfwe kabi kakhulu. (Semb. 12:15) Kungako ‘loku kudzinga ngamunye wetfu acinisele futsi abe nekukholwa.’​—Semb. 13:10. w22.05 5-6 ¶14-16

Embonweni, umphostoli Johane wabona emacembu lamabili alabo labasekela kubusa kwaJehova futsi atfola tibusiso letihlala kuze kube phakadze. Licembu lekucala linebantfu labangu-144 000. Batsetfwe lamhlabeni kuze bakhe hulumende nobe uMbuso wasezulwini bakanye naJesu, futsi batawubusa naye umhlaba. (Semb. 5:9, 10; 14:3, 4) Kulombono, Johane ubabona beme naJesu eNtsabeni iSiyoni lesezulwini. (Semb. 14:1) Kusukela ngesikhatsi semphostoli Johane kuze kube ngunyalo, tinkhulungwane tebantfu tikhetsiwe kutsi tibe yincenye yalo-144 000. (Luk. 12:32; Rom. 8:17) Kodvwa Johane watjelwa kutsi kutawube kusele labambalwa labatawube basaphila lamhlabeni ngemalanga ekugcina. (Semb. 12:17) Ngekuhlupheka lokukhulu, laba labasele labalamhlabeni batawutsatfwa baye ezulwini kuze babe nalaba labayincenye yalo-144 000, labafa betsembekile. Batawubusa naJesu eMbusweni waNkulunkulu.​—Mat. 24:31; Semb. 5:9, 10. w22.05 16 ¶4-5

Jesu wafundzisa balandzeli bakhe kutsi batibone ngendlela lekahle. Ngalelinye lilanga wabacinisekisa watsi: “Kubalwe tonkhe tinwele letisetinhloko tenu.” (Mat. 10:30) Lamavi asidvudvuta kakhulu, ikakhulukati nangabe sivame kutibukela phansi. Asho kutsi Babe wetfu wasezulwini unendzaba mbamba natsi, lokusho kutsi siligugu kuye. Nangabe Jehova asivumela kutsi simkhonte futsi atsi siyakufanela kuphila phakadze emhlabeni lomusha, akukafaneli simphikise kuloko. Eminyakeni lengu-15 leyendlulile, Sicongosekulindza satsi kufanele sitibone ngendlela lekahle. Satsi: “Akukafaneli sitikhandze sibalulekile size sitigcabhe; ngesikhatsi lesifanako, akukafaneli sitibukela phansi size sive ngatsi asisilutfo. Kunaloko, kufanele setame kutibona ngendlela lekahle, lokusho kutsi kufanele sicondze kutsi kunetintfo lesitenta kahle netintfo lesingakhoni kutenta kahle.” w22.05 24-25 ¶14-16

Yini ngamunye wetfu langayenta kuze kube nebunye? Kufanele sikutsandze kuthula. (Mat. 5:9; Rom. 12:18) Ngaso sonkhe sikhatsi nasenta kube nekuthula ebandleni, sisuke senta kutsi libe lihle lelipharadisi lelingumfanekiso. Sihlale sikhumbula kutsi Jehova udvonse ngamunye walabo labakulelipharadisi lelingumfanekiso ekukhonteni lokuhlantekile. (Joh. 6:44) Cabanga nje kutsi Jehova ujabula kangakanani nakasibona sisebenta kamatima kuze kube nekuthula nebunye emkhatsini webantfu labaligugu kuye, lokutikhonti takhe! (Isa. 26:3; Hag. 2:7) Yini lesingayenta kuze sizuze kakhulu kuletibusiso letitfolwa tikhonti taNkulunkulu? Singacabangisisa ngaloko lesikufundza eVini laNkulunkulu. Kudadisha nekuzindla kutasisita kutsi sibe nebuntfu bebuKhristu, lobutasenta sitsandzane “ngelutsandvo lwebuzalwane” ebandleni.​—Rom. 12:10. w22.11 12-13 ¶16-18

Nasemukela kutsi Jehova usicolele, siba ‘netikhatsi tekuvuseleleka,’ letifaka ekhatsi kuthula kwengcondvo nanembeza lohlantekile. Intsetselelo lenjalo angeke siyitfole kubantfu kodvwa siyitfola “kuJehova” kuphela. (Imis. 3:19) Jehova nakasicolela uphindze asivumele kutsi sibe bangani bakhe, kube ngatsi asikake senta sono. Ngemuva kwekutsi Jehova sekasicolele, akayuze asisole ngesono setfu nobe asijezise ngenca yaso. (Isa. 43:25) Njengobe “imphumalanga ikhashane kakhulu nenshonalanga, naye utikhweshisa kangako-ke tono tetfu kitsi.” (Hla. 103:12) Nasicabanga ngendlela Jehova lasicolela ngayo, sijabula kakhulu futsi sisala sibambe wangentasi. (Hla. 130:4) Jehova nakancuma kucolela lotsite akayi ngekutsi lesono besisincane nobe besisikhulu. Jehova usebentisa lwati lanalo njengobe anguMdali wetfu, anguMnikimtsetfo wetfu, neMehluleli wetfu kuze ancume kutsi amcolele yini lotsite nobe angamcoleli. w22.06 5 ¶12-14

Jehova unike bonkhe labo labamtsandzako litsemba lelihle kakhulu. Ngekushesha, utawucedza kugula, buhlungu kanye nekufa. (Semb. 21:3, 4) Utawusita “labamnene” labametsembako kutsi bashintje lomhlaba ube lipharadisi. (Hla. 37:9-11) Ngetulu kwaloko, utawenta kutsi sonkhe sibe nebuhlobo lobuhle kakhulu naye, kwendlula lobu lesinabo nyalo. Leli litsemba lelihle sibili! Kodvwa yini lesenta setsembe kutsi Nkulunkulu utawutifeza tetsembiso takhe? Jehova akasephuli setsembiso. Ngako sinesizatfu lesivakalako ‘sekwetsemba Jehova.’ (Hla. 27:14) Loko sikukhombisa ngekutsi simlindzele ngesineke kutsi afeze tonkhe tetsembiso takhe futsi simlindzele sijabulile. (Isa. 55:10, 11) Shengatsi singahlala setsembekile kuJehova, futsi siciniseke kutsi utabanika umvuzo “labo labamfuna ngekutimisela.” w22.06 20 ¶1; 25 ¶18

Njengobe Jehova ayiNhloko yalomndeni, siyaciniseka kutsi utawukwenta loko lakutjela tinhloko temindeni kutsi tikwente ku-1 KuThimothi 5:8. Nasiciniseka kutsi Jehova uyasitsandza, nekutsi uyawutsandza umndeni wetfu, sitawetsemba kutsi utasinika tintfo lesitidzingako. (Mat. 6:31-33) Jehova unguMnakekeli lowephanako nalonelutsandvo, futsi uyafuna kusipha tintfo lesitidzingako! Ngesikhatsi adala umhlaba, akagcinanga nje ngekusinika tintfo lesitidzingako kuze siphile, kodvwa wadala netintfo letinyenti letitawusenta sijabule. (Gen. 2:9) Ngisho nobe sinaloko lesikudzingako kuphela, kufanele sikhumbule kutsi sinako ngobe Jehova uyasinakekela. (Mat. 6:11) Kufanele sikhumbule nekutsi ngisho nobe singadzela ini nyalo, angeke kucatsaniswe naloko Nkulunkulu wetfu lositsandzako lasipha kona, nalatawusipha kona esikhatsini lesitako.​—Isa. 65:21, 22. w22.06 15 ¶7-8

Labafuna kufundza liciniso kufanele babe nelwati lolujulile ngaJehova nangeliBhayibheli. Kodvwa akusibo bona kuphela, natsi siyaludzinga. Umphostoli Pawula wabhala watsi kusebentisa loko lesikufundza eBhayibhelini kutasisita kutsi ‘sehlukanise lokulungile nalokungakalungi.’ Kungaba matima kakhulu kulalela ticondziso taJehova nyalo ngobe bantfu labanyenti batiphatsa kabi kakhulu. Kodvwa Jesu uyacikelela kutsi sifundza tintfo lesitidzingako kuze sihlale sinekukholwa lokucinile. Letintfo sitifundza eVini laNkulunkulu leliphefumulelwe liBhayibheli. NjengaJesu, sinike libito laNkulunkulu ludvumo lolulufanele. (Joh. 17:6, 26) Nasi sibonelo, nga-1931 sacala kusebentisa ligama lelitsi BoFakazi BaJehova lelisekelwe emiBhalweni. Ngekwenta njalo, sakhombisa kutsi libito laNkulunkulu libaluleke kakhulu kitsi futsi sifuna kubitwa ngalo. (Isa. 43:10-12) Ngetulu kwaloko, Lihumusho Lemhlaba Lomusha LemiBhalo Lengcwele labuyisela libito laNkulunkulu lapho belivela khona. w22.07 11 ¶11-12

Liciniso leliseBhayibhelini liphindze lifake ekhatsi tindzaba letimnandzi teMbuso waNkulunkulu. Jesu wafananisa leliciniso leMbuso nemcebo lofihliwe. KuMatewu 13:44 Jesu watsi: “UMbuso wemazulu ufana nemcebo lofihlwe ensimini, umuntfu lawutfola wase uyawufihla, futsi ngenca yekutsi abejabulile, wahamba watsengisa konkhe lanako wase utsenga leyo nsimu.” Naka kutsi lomuntfu bekangahambi afuna lomcebo. Kodvwa watsi nakawutfola wadzela tintfo letinyenti kuze ube wakhe. Ecinisweni watsengisa konkhe lebekanako. Ngasiphi sizatfu? Ngobe bekati kutsi lomcebo uligugu kangakanani. Loko sikusho ngobe kute lutfo kulelive lokubaluleke kakhulu kwendlula injabulo lesiyitfola ngekukhonta Jehova nyalo sinelitsemba lekuphila phakadze ngephansi kweMbuso waNkulunkulu. Buhlobo lobuhle lesinabo naJehova bubaluleke kakhulu kitsi kwendlula nobe ngabe yini lesingahle siyidzele. Sitfola injabulo lenkhulu ‘ngekumjabulisa ngalokuphelele.’​—Khol. 1:10. w22.08 15 ¶8-9; 17 ¶12

Josefa wati njani kutsi kuphinga bekuyintfo lembi kakhulu kuNkulunkulu? Ema-Israyeli atfola uMtsetfo waMosi ngemuva kweminyaka langaba ngu-200 kwentekile loku, futsi lomunye umtsetfo lebewukuwo bewutsi “ungaphingi.” (Eks. 20:14) Nobe kunjalo, Josefa bekamati kahle Jehova, futsi bekati kutsi utawutiva njani ngekutiphatsa kabi. Sibonelo nje, Josefa bekati kutsi Jehova wenta umshado kutsi ube semkhatsini wendvodza yinye nemfati munye. Kungenteka futsi weva kutsi Jehova wamvikela njani khokho wakhe Sara tikhatsi letimbili ngesikhatsi asengotini. (Gen. 2:24; 12:14-20; 20:2-7) Njengobe Josefa bekacabanga ngaloku, wabona kutsi yini lebeyilungile nalebeyingakalungi kuNkulunkulu. Ngenca yekutsi Josefa bekamtsandza Nkulunkulu wakhe futsi atitsandza netimiso takhe talokulungile, watimisela kwenta lokuhle. w22.08 26 ¶1-2

Ngaphambili, besitsi lesiphrofetho sikhuluma ngekuvuselwa ezulwini nobe ngelizinga lelisetulu umsebenti wembuso lowentiwa ngalo ngemuva kwekutsi ucishe umiswe baphikisi nga-1918. Nobe kunjalo, nyalo kucondza lokusha kutsi lamavi asho kuvuka kwalabafile lokutakwenteka eveni lelisha. Yini lesenta sisho njalo? Emavi latsi “elutfulini” aphindze atfolakale nakuJobe 17:16 futsi asho ‘lithuna.’ Loko kukhombisa kutsi Danyela 12:2 ukhuluma ngekuvuswa ekufeni lokutawenteka ngemuva kwekutsi emalanga ekugcina sekaphelile futsi nemphi ye-Amagedoni seyiphelile. Danyela 12:2 usho kutsini nawutsi labanye batawuvuselwa “ekuphileni lokuphakadze”? Usho kutsi ngeminyaka lengu-1 000, labo labatawuvuswa futsi bati Jehova naJesu, nobe bachubeke bati Jehova naJesu batawutfola kuphila lokuphakadze ekugcineni.​—Joh. 17:3. w22.09 21 ¶6-7

Loko akusho kutsi Jehova ulindzele kutsi simane nje sibetsembe labanye, kunaloko ufuna sibetsembe ngobe bakhombisile kutsi singabetsemba. Njengekuhlonishwa, kuze bantfu bakwetsembe, kudzingeka wente lokutsite futsi loko kutsatsa sikhatsi. Yini longayenta kuze ubetsembe bazalwane bakho nabodzadze? Bati kahle. Coca nabo emihlanganweni yelibandla futsi ushumayele nabo. Babeketelele, ubanikete litfuba lekutsi bakhombise kutsi ungabetsemba. Ekucaleni, ungahle ungamtjeli konkhe lokumayelana nawe umuntfu losandza kumati. Kodvwa njengobe bungani benu bukhula, ungahle utive ukhululekile kumtjela indlela lotiva ngayo. (Luk. 16:10) Kodvwa yini longayenta nangabe umzalwane nobe dzadze akwenta ungasametsembi? Ungasheshi ufune kucedza bungani benu, kunaloko tinikete sikhatsi sekutsi uphole. Ungavumi kutsi loko lokwentiwe ngulabambalwa kukwente ungasabetsembi bonkhe bazalwane bakho nabodzadze. w22.09 4 ¶7-8

Lomunye lomdzala welibandla lokutsiwa nguMiqueas wabona ngatsi uphetfwe kabi kakhulu ngulabanye bazalwane labenta imisebenti letsite enhlanganweni yaJehova. Nanobe kunjalo wahlala asangulukile futsi wasebenta kamatima kuze alawule indlela bekativa ngayo. Bekathantaza njalo, acela Jehova kutsi amuphe umoya wakhe longcwele kanye nemandla ekucinisela. Bekafundza netincwadzi tetfu kuze atfole lokutamsita. Yini lesiyifundzako? Nawubona ngatsi umzalwane nobe dzadze ukuphetse kabi, hlale unemoya lophasi futsi wetame kulawula indlela lotiva ngayo. Kusenekwenteka awati kutsi yini lemente wakhuluma nobe wenta loko lakwentile. Ngako thantaza kuJehova, umcele akusite ubone tintfo ngendlela latibona ngayo lomzalwane nobe dzadze. Cabanga kutsi umzalwane wakho nobe dzadze bekangakahlosi kukuvisa buhlungu futsi wetame kukwengcisa loko lokwentekile. (Taga 19:11) Khumbula kutsi Jehova uyasati simo lokuso futsi utakupha emandla kuze ucinisele.​—Shu. 5:8. w22.11 21 ¶5

Khetsa bangani labatsandza Jehova. Bangani lobakhetsako bangakusita kutsi ube ngumKhristu lovutsiwe. (Taga 13:20) Julien, nyalo longulomdzala welibandla utsi: “Ngesikhatsi ngisemncane, ngatfola bangani labakahle emsebentini wekushumayela. Labangani bami bebakhutsele futsi bangisita ngabona kutsi umnandzi umsebenti wekushumayela. . . . Ngabona kutsi sizatfu lebesenta ngibe bete bangani labakahle kutsi bengifuna bangani labalingana nami.” Yini lokufanele uyente nangabe ubona kutsi kunalotsite ebandleni longasuye umngani lokahle? Pawula bekati kutsi lamanye emalunga elibandla bekete buntfu bebuKhristu, ngako wecwayisa Thimothi kutsi angatihlanganisi nawo. (2 Thim. 2:20-22) Buhlobo betfu naJehova buligugu. Sisebente kamatima kuze sisondzelane naye ngako akukafaneli sivumele nobe ngubani kutsi alimate buhlobo betfu naBabe wetfu wasezulwini. w22.08 5-6 ¶13-15

Asifanani nalabo labatenyanyako timiso taNkulunkulu, kunaloko siyakutsandza kuphila ngetindlela taJehova letifaka ekhatsi timiso takhe tekutiphatsa. Singatitsandza kakhulu tindlela takhe nasicatsanisa umphumela wekulalela kanye nemphumela wekungalaleli. Naka tinkinga bantfu labatibangela tona ngenca yekungasemukeli seluleko saJehova lesihlakaniphile. Ngemuva kwaloko, naka kutsi kuphila kwakho kuncono kanjani ngenca yekutsi ulalela Nkulunkulu. (Hla. 32:8, 10) Jehova unika bonkhe bantfu kuhlakanipha, kodvwa akaphoceleli muntfu kutsi akwemukele. Nanobe kunjalo, uyayisho imiphumela letfolwa ngulabo labangakulaleli kuhlakanipha. (Taga 1:29-32) “Batawuvuna loko labakuhlanyele.” Ngekuhamba kwesikhatsi, indlela labaphila ngayo itawubenta bacindzeteleke, babe netinkinga futsi ekugcineni babhujiswe. Nanobe kunjalo, naku labetsenjiswa kona labo labalalela seluleko saJehova lesihlakaniphile futsi basisebentise: “Loyo longilalelako utawuhlala ngekuthula futsi angeke ayesabe inhlekelele.”​—Taga 1:33. w22.10 21 ¶11-13

Kwesaba Jehova kusho kumhlonipha kakhulu size sigweme kwenta tintfo letingamjabulisi. (Taga 16:6) Ngako sihlale senta konkhe lokusemandleni etfu kuze siphile ngetimiso taNkulunkulu talokulungile nalokungakalungi, letibhalwe eBhayibhelini. (2 Khor. 7:1) Sitawujabula nangabe senta tintfo letitsandvwa nguJehova futsi singatenti leto latenyanyako. (Hla. 37:27; 97:10; Rom. 12:9) Umuntfu kungenteka ati kutsi nguJehova loneligunya lekuncuma kutsi yini lelungile nalengakalungi, kodvwa kufanele atincumele kutsi utatilalela yini letimiso taNkulunkulu. (Rom. 12:2) Sikhombisa ngaloko lesikwentako kutsi setsemba mbamba kutsi kulalela timiso taJehova kuyindlela lencono kakhulu yekuphila. (Taga 12:28) Davide wativa ngaleyondlela, kungako atsi ngaJehova: “Uyangifundzisa indlela yekuphila. Lapho wena ukhona khona kuba nenjabulo lenkhulu; esandleni sakho sangesekudla kunenjabulo phakadze naphakadze.”​—Hla. 16:11. w22.10 8 ¶9-10

Jesu bekahlale atibona ngendlela lekahle. Ngesikhatsi asezulwini, wentela Jehova tintfo letinyenti letinhle. “Tonkhe letinye tintfo tadalwa [ngaJesu] ezulwini nasemhlabeni.” (Khol. 1:16) Ngesikhatsi Jesu abhajatiswa, wakhumbula tintfo latifeza nakanaBabe wakhe. (Mat. 3:16; Joh. 17:5) Kodvwa loko akuzange kumente atigcabhe. Akazange atibone ancono kunalabanye. Watjela bafundzi bakhe kutsi lamhlabeni ‘akazange etele kutewusetjentelwa, kodvwa wetela kutewuba yinceku nekunikela ngekuphila kwakhe kuze kube yinhlawulo yalabanyenti.’ (Mat. 20:28) Washo nekutsi akenti lokusuka kuye. Jesu bekatfobeke mbamba! Usibonelo lesihle kakhulu lesingasilingisa. w22.05 24 ¶13

Lokunye Jehova lakubukako kutsi lona lowonile bekati yini kutsi loko lakwentako kubi. Jesu wakwenta kwacaca loko kuLukha 12:47, 48. Umuntfu lohlela kwenta lokubi abe ati kahle kutsi kutamtfukutselisa Jehova, wenta sono lesikhulu. Umuntfu lonjalo utibeka engotini yekungacolelwa nguJehova. (Mak. 3:29; Joh. 9:41) Singacolelwa yini esimeni lesinjalo? Yebo! Lokunye Jehova lakubukako ngaphambi kwekutsi acolele lotsite kutsi lesoni siphendvuke mbamba yini. Kuphendvuka kusho “kushintja indlela locabanga ngayo naloko lokuhlosile.” Kufaka ekhatsi kutisola nebuhlungu lobukhulu lobuviwa ngulomuntfu ngenca yetintfo letimbi latentile nobe ngetintfo letikahle lokufanele ngabe utentile. Umuntfu lophendvukile akagcini nje ngekuva buhlungu ngenca yalesono lasentile, kodvwa uva buhlungu nangekutsi uvumele buhlobo bakhe naJehova baba butsakatsaka, lokumbangele kutsi ente lesono. w22.06 5-6 ¶15-17

Titsa tetfu tingasebentisa betindzaba netinhlelo tekuchumana kuze tisakate emanga ngebazalwane labaholako enhlanganweni yaJehova. (Hla. 31:13) Labanye bazalwane baboshiwe futsi kwatsiwa batigebengu. EmaKhristu ekucala abhekana nesimo lesifanako ngesikhatsi umphostoli Pawula abekwa licala lelingemanga futsi aboshwa. Lamanye ayekela kusekela umphostoli Pawula ngesikhatsi aboshiwe eRoma. (2 Thim. 1:8, 15; 2:8, 9) Cabanga nje kutsi Pawula bekativa njani. Bekabeketelele tinkinga letinyenti futsi bekabeke kuphila kwakhe engotini ngenca yabo. (Imis. 20:18-21; 2 Khor. 1:8) Shengatsi singete safana nalabo labashiya Pawula! Ngako akukafaneli simangale nangabe Sathane ahlasela kakhulu bazalwane labaholako. Ufuna kutsi labazalwane bayekele kuba cotfo kuNkulunkulu futsi ufuna kusesabisa. (1 Phet. 5:8) Chubeka usita bazalwane bakho, ungabalahli.​—2 Thim. 1:16-18. w22.11 16-17 ¶8-11

Kungenteka lesigebengu lesaphendvuka lebesiseceleni kwakhe ngaphambi kwekutsi afe besingumJuda. EmaJuda bekakhonta Nkulunkulu munye, kodvwa bantfu bakuletinye tive bebakhonta bonkulunkulu labanyenti. (Eks. 20:2, 3; 1 Khor. 8:5, 6) Kube lesigebengu besisakuletinye tive, kungenteka lombuto lokulombhalo welusuku lwalamuhla bewungatsi: “Awubesabi yini bonkulunkulu?” Ngetulu kwaloko, Jesu bekangakatfunywa kubantfu bakuletinye tive, kodvwa bekatfunywe “kubantfu baka-Israyeli labanjengetimvu letilahlekile.” (Mat. 15:24) Nkulunkulu bekavetile kuma-Israyeli kutsi utabavusa labafile. Kungenteka lesigebengu lesaphendvuka besikwati loku, futsi loko lesakusho kukhombisa kutsi besicabanga kutsi Jehova utawuvusa Jesu kuze ayobusa eMbusweni waNkulunkulu. Kungenteka lesigebengu besicabanga kutsi Nkulunkulu utasivusa naso. Njengobe kusenekwenteka kutsi lesigebengu besingumJuda, kungenteka besati nga-Adamu na-Eva. Ngako kungenteka sabona kutsi leliPharadisi lebekakhuluma ngalo Jesu kuLukha 23:43 belitawuba yindzawo lenhle lebeyitawubakhona lamhlabeni.​—Gen. 2:15. w22.12 8-9 ¶2-3

Singakhona kuwenta lomsebenti wekushumayela nangabe nje sisitwa ngumoya waNkulunkulu. Sisho ngani? Ngobe Sathane ulwa natsi futsi ufuna kuwumisa lomsebenti wekushumayela. (Semb. 12:17) Bantfu labanyenti bacabanga kutsi Sathane angakhona kukwenta loko ngobe unemandla kakhulu. Kodvwa siyamncoba sisebentisa umsebenti wekushumayela! (Semb. 12:9-11) Kanjani? Nasishumayela, sisuke sikhombisa kutsi asimesabi Sathane. Ngaso sonkhe sikhatsi nasishumayela sisuke sincoba Sathane. Ngako singaphetsa ngekutsi Jehova usipha emandla asebentisa umoya wakhe longcwele futsi uyasemukela. (Mat. 5:10-12; 1 Phet. 4:14) Umoya waNkulunkulu ungasiniketa emandla lesiwadzingako kuze sikhone kubhekana nanobe nguyiphi inkinga emsebentini wekushumayela. (2 Khor. 4:7-9) Yini lesingayenta kuze sichubeke sitfola umoya waNkulunkulu? Kufanele sichubeke siwucela, siciniseka kutsi Jehova utayiva imithantazo yetfu. w22.11 5 ¶10-11

Sikhombisa kutsi siyabatsandza bazalwane betfu nabodzadze ngekutsi sente konkhe lesingakwenta kuze sihlale sinekuthula nabo. Siyatimisela kulingisa sibonelo saJehova sekucolela. Nangabe Jehova avuma kutsi iNdvodzana yakhe ifele tono tetfu, natsi kufanele sikulungele kucolela bazalwane betfu nabodzadze nabasivisa buhlungu. Asifuni kufana nalesisebenti lesibi lokukhulunywa ngaso emfanekisweni waJesu. Ngisho nangemuva kwekutsi umphatsi waso sekasesulile sikweleti saso lesikhulu, lesisebenti asizange sisesule sikweleti lesincane salesinye sisebenti. (Mat. 18:23-35) Nangabe ukhona longevani naye ebandleni, kungaba njani kutsi uye kuye kuze nakhe kuthula ngaphambi kwekutsi niye eSikhumbutweni? (Mat. 5:23, 24) Nawenta njalo, utawube uyakhombisa kutsi umtsandza kakhulu Jehova naJesu. w23.01 29 ¶8-9

Lenye indlela longati ngayo kutsi yini bazalwane bakho nabodzadze labayidzingako, kubabuta imibuto lengeke ibahlaze. (Taga 20:5) Banako yini kudla lokwenele, imitsi kanye naletinye tintfo? Basengotini yekuphelelwa ngumsebenti yini nobe yekulahlekelwa ngemakhaya abo? Bayaludzinga yini lusito kuze bacele lusito kuhulumende? Jehova ufuna kutsi sonkhe sibakhutsate labanye futsi sibasite. (Gal. 6:10) Ngisho nobe singentela logulako intfo lencane, loko kungasho lukhulwini kuye. Umntfwana angatfumelela umzalwane likhadi nobe amdvwebele sitfombe. Losemusha angacela kuyotsengela dzadze tintfo latidzingako etitolo nobe amsite ngalokunye. Labanye ebandleni bangaphekela lotsite logulako. Labanye boFakazi batfumelele labadzala belibandla imilayeto yekubabonga njengobe bavame kuba matasa kakhulu nakubhedvuke sifo. Sijabula kakhulu ‘nasichubeka sikhutsatana futsi sakhana’!​—1 Thes. 5:11. w22.12 22 ¶2; 23 ¶5-6

BaSadusi bebatati kahle tincwadzi tekucala letisihlanu letisemiBhalweni yesiHebheru, kodvwa bebangawanaki emaciniso labalulekile lakuletincwadzi letiphefumulelwe. Sibonelo nje, cabanga ngaloko Jesu lakusho ngesikhatsi baSadusi bambuta ngekuvuswa kwalabafile. Wababuta watsi: “Anifundzanga yini encwadzini yaMosi, endzabeni yesihlahla lesivutsako, kutsi Nkulunkulu watsi kuye: ‘Mine nginguNkulunkulu wa-Abrahama, wa-Isaka newaJakobe’?” (Mak. 12:18, 26) Nanobe baSadusi bebayifundze tikhatsi letinyenti lendzaba, umbuto waJesu wakhombisa kutsi bebangalinaki leliciniso lelibalulekile lelisemiBhalweni lelimayelana nemfundziso yekuvuswa kwebantfu labafile. (Luk. 20:38) Yini lesiyifundzako? Nasifundza, sifuna kunaka kutsi yini lesiyifundzako evesini nobe endzabeni leseBhayibhelini. Asifuni nje kugcina ngekucondza timfundziso letisisekelo, kodvwa sifuna nekucondza emaciniso netimiso letijulile. w23.02 11 ¶9-10

Bonkhe labofakazi lokukhulunywa ngabo kulombhalo welusuku lwalamuhla babhekana netimo letimatima kakhulu, kodvwa bahlala betsembekile kuko konkhe kuphila kwabo. (Heb. 11:36-40) Kucinisela kwalabantfu baNkulunkulu nekusebenta kwabo kamatima bekungakabaluleki yini? Bekubalulekile! Nanobe bangazange bakubone kugcwaliseka kwato tonkhe tetsembiso taNkulunkulu, bachubeka betsemba Jehova. Ngenca yekutsi bebaciniseka kutsi Jehova uyabemukela, bebetsemba kutsi batatibona tetsembiso takhe tigcwaliseka. (Heb. 11:4, 5) Sibonelo sabo singasisita kutsi sichubeke setsemba Jehova. Siphila eveni lapho khona tintfo tisuka kulokubi tiya kulokubi kakhulu. (2 Thim. 3:13) Sathane usengakacedzi kuvivinya bantfu baNkulunkulu. Ngisho nobe singabhekana nani esikhatsini lesitako, shengatsi singatimisela kwenta konkhe lokusemandleni etfu kuze sijabulise Jehova, sibe siciniseka kutsi “litsemba letfu silibeke kuNkulunkulu lophilako.”​—1 Thim. 4:10. w22.06 25 ¶17-18

Lesinye sizatfu lesisenta setame kutsi singaguli kutsi sifuna kukhonta Jehova ngendlela lencono kakhulu. (Mak. 12:30) Ngako siyakugwema kwenta tintfo lesatiko kutsi tingasigulisa. (Rom. 12:1) Kuliciniso kutsi ngisho singetama kangakanani, angeke sisho kutsi angeke size sigule. Nobe kunjalo, senta konkhe lesingakwenta ngobe sifuna kukhombisa Babe wetfu wasezulwini kutsi siyabonga ngesipho sekuphila. Kugula kanye nekukhula ngeminyaka kungenta kutsi singasakhoni kwenta tintfo letinyenti lebesikhona kutenta. Ngenca yaloko, singahle sikhatsateke futsi sive buhlungu. Kodvwa loko akukafaneli kusente singasayinaki imphilo yetfu. Sisho ngani? Ngobe ngisho sikhule kakhulu nobe sigula kakhulu, sisengamdvumisa Jehova njengobe kwenta iNkhosi Davide. Kuyasidvudvuta kwati kutsi siligugu kakhulu kuNkulunkulu wetfu ngisho nobe sigula nobe sikhulile ngeminyaka! (Mat. 10:29-31) Ngisho nobe singafa, uyakulangatelela kusivusa. (Jobe 14:14, 15) Nasisaphila, sifuna kwenta konkhe lesingakhona kukwenta kuze sitigcine siphilile. w23.02 20-21 ¶3-5

Emagama emalunga esicumbi lesikhulu saletinye timvu atawuchubeka akhona yini encwadzini yekuphila ngemuva kwekutsi asindze ku-Amagedoni? Yebo. (Semb. 7:14) Jesu watsi laba labanjengetimvu batawutfola “kuphila lokuphakadze.” (Mat. 25:46) Kodvwa labo labatawusindza nge-Amagedoni ngeke bakutfole kuphila lokuphakadze ngaleso sikhatsi. Ngesikhatsi Sekubusa Kweminyaka Leyinkhulungwane, Jesu ‘utawubelusa, abaholele emitfonjeni yemanti ekuphila.’ Labo labatawulalela sicondziso saKhristu futsi ekugcineni labatawutfolakala betsembekile kuJehova, emagama abo atawubhalwa angacishwa kulencwadzi yekuphila. (Semb. 7:16, 17) Nobe kunjalo, timbuti titawubhujiswa nge-Amagedoni. Jesu watsi ‘titawubhujiswa ngalokuphelele.’ (Mat. 25:46) Aphefumulelwe, umphostoli Pawula watsi “laba batawutfola sijeziso sekubhujiswa kwaphakadze.”​—2 Thes. 1:9; 2 Phet. 2:9. w22.09 16 ¶7-8

Indalo yaJehova inganiketa imindeni litfuba lekutsi iphumule futsi ijabule ndzawonye, ngaleyondlela icinise budlelwane bayo. Jehova udale tindzawo letinhle emhlabeni lasingakhona khona kwenta tintfo lesititsandzako. Imindeni leminyenti iyakutsandza kuba ndzawonye etindzaweni lakugcinwa khona tilwane, etindzaweni letisemakhaya nobe elwandle. Emhlabeni lomusha, batali nebantfwana batayijabulela kakhulu indalo kunanyalo. Ngaleso sikhatsi, angeke sitesabe tilwane, futsi nato ngeke tisesabe. (Isa. 11:6-9) Sitayijabulela kuze kube phakadze indalo yaJehova. (Hla. 22:26) Kodvwa batali, ningalindzi kuze kube nguleso sikhatsi ngaphambi kwekutsi nisite bantfwana benu bajabulele indalo. Njengobe nisebentisa indalo kuze nifundzise bantfwana benu ngaJehova, kungenteka bavumelane naloko lokwashiwo yiNkhosi Davide nayitsi: “Awu Jehova . . . kute imisebenti lefana neyakho.”​—Hla. 86:8. w23.03 25 ¶16-17