Tikhombo Tencwajana Yekubhalela Emihlanganweni
JANUARY 7-13
UMCEBO LOSEVINI LANKULUNKULU | IMISEBENTI 21–22
“Akwenteke Intsandvo YaJehova”
(Imisebenti 21:8-12) Ngakusasa sesuka saya eKhesariya, sefika endlini yaFiliphu umvangeli, labengulomunye wemadvodza lasikhombisa lakhetfwa, futsi sahlala naye. 9 Abenemadvodzakati lamane labengakashadi futsi abephrofetha. 10 Nasesihleti lapho emalanga lambalwa, kwefika lomunye umphrofethi lokutsiwa ngu-Agabusi, avela eJudiya. 11 Weta kitsi, watsatsa libhande laPawula watibopha tinyawo netandla, wase utsi: “Naku lokushiwo ngumoya longcwele: ‘EJerusalema emaJuda atambopha ngalendlela umnikati walelibhande, futsi atamnikela etandleni tebantfu betive.’” 12 Senela kuva loku, tsine kanye nebantfu balendzawo sancenga Pawula kutsi angayi eJerusalema.
bt-ZU 177-178 ¶15-16
“Akwenteke Intsandvo YaJehova”
15 Ngalesikhatsi Pawula ahlala naFiliphu, kwefika lesinye sivakashi lebesihloniphekile, Agabusi. Labo lebebasendlini yaFiliphu bebati kutsi Agabusi umphrofethi; bekaphrofethe kutsi bekutawuba nendlala lenkhulu nakubusa Klawudiyusi. (Imisebenti 11:27, 28) Mhlawumbe batibuta kutsi: ‘Agabusi ubekwa yini lapha? Ngumuphi umlayeto lawuphetse?’ Njengoba bebambuke batse njo emehlweni, watsatsa libhande laPawulu—libhande lelidze lebelakhiwe ngendvwangu, nalebeliboshwa elukhalo futsi bewungafaka imali naletinye tintfo kulo. Agabusi walitsatsa watibopha tinyawo netandla. Wabese uyakhuluma. Umlayeto wakhe bewubalulekile futsi bewutsi: “Naku lokushiwo ngumoya longcwele: ‘EJerusalema emaJuda atambopha ngalendlela umnikati walelibhande, futsi atamnikela etandleni tebantfu betive.’”—Imisebenti 21:11.
16 Lesiphrofetho besicinisekisa kutsi Pawula bekatakuya eJerusalema. Sabonisa nekutsi kushumayela kwakhe kumaJuda bekutakwenta kutsi ‘anikelwe etandleni tebantfu betive.’ Lesiphrofetho sabatsintsa kakhulu labebakhona. Lukha wabhala watsi: “Senela kuva loku, tsine kanye nebantfu balendzawo sancenga Pawula kutsi angayi eJerusalema. Kodvwa yena watsi: ‘Nikhalelani, futsi ningidzabukiselani enhlitiyweni? Cinisekani ngekutsi angikalungeli kuboshwa nje kuphela, kodvwa ngikulungele ngisho nekufa eJerusalema ngenca yelibito leNkhosi Jesu’”—Imisebenti 21:12, 13.
(Imisebenti 21:13) Kodvwa yena watsi: “Nikhalelani, futsi ningidzabukiselani enhlitiyweni? Cinisekani ngekutsi angikalungeli kuboshwa nje kuphela, kodvwa ngikulungele ngisho nekufa eJerusalema ngenca yelibito leNkhosi Jesu.”
bt-ZU 178 ¶17
“Akwenteke Intsandvo YaJehova”
17 Sibone ngeliso lengcondvo nasi simo. Bazalwane, lokufaka ekhatsi naLukha, bancenga Pawulu kutsi angahambi. Labanye bayakhala. Ngenca yekutsi bebamtsandza, ngemusa Pawulu utsi “ningidzabukiselani enhlitiyweni,” leminye imibhalo yesiGriki ihumusha lenkhulumo ngekutsi “bamphula inhlitiyo.” Nobe kunjalo, Pawula utimisele futsi ngeke akuvumele kuncengwa nobe tinyembeti kutsi timyekelise, njengoba angazange akuvumele nakubazalwane baseThire. Kunalokho, uyabachazela kutsi kungani kufanele ahambe. Lesi bekusibindzi mbamba nekutimisela sibili! Njengoba kwenta Jesu, Pawulu bekatimisele kuya eJerusalema kumnyama kubovu. (Heb. 12:2) Pawula bekangafuni kufela kukholwa kwakhe, kodvwa nangabe loko kwenteka, bekatokutsatsa njengelilungelo kufa angumlandzeli waJesu Khristu.
(Imisebenti 21:14) Satsi nasehluleka kumvimba, samyekela sase sitsi: “Akwenteke intsandvo yaJehova.”
bt-ZU 178 ¶18
“Akwenteke Intsandvo YaJehova”
18 Bazalwane benta njani? Ngelivi nje linye, nangenhlonipho. Siyafundza: “Satsi nasehluleka kumvimba, samyekela sase sitsi: ‘Akwenteke intsandvo yaJehova.’” (Imisebenti 21:14) Labo lebebatama kwenta Pawulu kutsi angayi eJerusalema abazange baphocelele imibono yabo. Bamlalela, bakwemukela loko bekakusho, babona kutsi kuhamba kwakhe bekuyintsandvo yaJehova, ngisho nobe loko kwakumatima kubo. Pawulu bekacale umsebenti lobewutogcine umholele ekufeni. Bekutawuba melula ngaye kube labo lebebamtsandza abazange betame kumvimba.
Kufunisisa Umcebo EVini LaNkulunkulu
(Imisebenti 21:23, 24) Ngako naku lokufanele ukwente: Lapha kunemadvodza lamane lente sifungo. 24 Watsatse utihlambulule kanye nawo, uwakhokhele tindleko, bese ahhula tinhloko tawo. Bonkhe bantfu batawubese bayati kutsi lamahemuhemu lebebaweva ngawe akasilo liciniso, kodvwa kutsi wena uphila ngekuvumelana neMtsetfo.
bt-ZU 184-185 ¶10-12
“Ngilaleleni Njengobe Ngichaza”
10 Noma kunjalo, Pawulu wasicondza simo salabo lebebete inkinga yekugcina emasiko latsite emaJuda, njengekungasebenti ngelilanga leliSabatha noma kungadli kudla lokutsite. (Rom 14:1-6) Akazange futsi abeke imitsetfo ngekusoka. Kuliciniso kutsi Pawula wasoka Thimothewu kuze kungakhubeki lamanye emaJuda ngobe babe waThimothewu bekangumGreki. (Imisebenti 16:3) Kusoka bekusincumo semuntfu ngamunye. Pawulu watjela bantfu baseGalathiya watsi: “Kusoka nobe kungasoki akukabaluleki kubo, kodvwa kukholwa lokusebenta ngelutsandvo ngiko lokubalulekile” (Gal 5:6) Noma kunjalo, kusoka ngesizatfu sekutsi ungephansi kwemtsetfo noma kutsi kusoka kuyadzingeka kute umuntfu amukeleke kuJehova, bekutawukhombisa kutsi ute lukholo.
11 Ngisho nobe lamahemuhemu bekangemanga laluhlata, emaJuda langemakholwa akhubeka. Ngaleso sizatfu, emadvodza lamadzala elibandla aniketa Pawula nasi sicondziso: “Lapha kunemadvodza lamane lente sifungo. Watsatse utihlambulule kanye nawo, uwakhokhele tindleko, bese ahhula tinhloko tawo. Bonkhe bantfu batawubese bayati kutsi lamahemuhemu lebebaweva ngawe akasilo liciniso, kodvwa kutsi wena uphila ngekuvumelana neMtsetfo.”—Imisebenti 21:23, 24.
12 Pawulu bekangahle atsi inkinga mbamba bekungasiwo lamahemuhemu ngaye, kodvwa beyikutsi emaJuda langemakholwa bekatsandza kakhulu uMtsetfo waMosi. Pawula bekatimisele kuvumelana netimo, yingci nje nangabe loko bekungeke kushayisane netimiso taNkulunkulu. Kusengakenteki loko, Pawula wabhala watsi: “Kulabangephansi kweMtsetfo ngaba njengalongephansi kweMtsetfo, ngisho nobe ngingekho ngephansi kweMtsetfo, kuze ngizuze labo labangephansi kweMtsetfo.” (1 Ko 9:20) Kuloku, Pawulu wabambisana nalabadzala baseJerusalema futsi waba “njengalongephansi kweMtsetfo.” Kwenta kwakhe kanjalo kusibekela sibonelo lesihle namuhla sekutsi sibambisane nalabadzala futsi singafuni tintfo tenteke ngendlela lefunwa ngitsi.—Heb 13:17.
(Imisebenti 22:16) Yini-ke lekubambile? Sukuma ubhajatiswe, futsi utihlambulule etonweni takho ngekutsi ubite libito lakhe.’
liphuzu lelicwaningiwe leMi 22:16 leliku-nwtsty
utihlambulule etonweni takho ngekutsi ubite libito lakhe: Nobe “tihlambulule etonweni takho futsi ubite libito lakhe.” Umuntfu uhlambulula tono takhe, hhayi nje ngekutsi abhajatiswe emantini kuphela, kodvwa nangekubita libito laJesu. Kwenta loku kufaka ekhatsi kukholelwa kuJesu futsi ukukhombise ngekwenta imisebenti yebuKhristu.—Imi 10:43; Jak 2:14, 18.
Kufundvwa KweliBhayibheli
(Imisebenti 21:1-19) Ngemuva kwekwehlukana nabo, sahamba ngemkhumbi sacondza eKhosi. Ngakusasa saya eRodosi, nasisuka lapho saya ePhatara. 2 Nasesitfole umkhumbi lowelela eFenisiya, sagibela sahamba ngawo. 3 Satsi nasesibona sihlenge saseSiphrosi sasendlula ngesencele saya eSiriya, safike sehla eThire ngobe umkhumbi bewutakwehlisa umtfwalo. 4 Safuna bafundzi futsi sabatfola, sase sihlala lapho emalanga lasikhombisa. Kodvwa ngekwembulelwa ngumoya, bebasolo batjela Pawula kutsi angayi eJerusalema. 5 Nasaphelile emalanga etfu ekuhlala lapho, sachubeka neluhambo lwetfu, futsi bonkhe bantfu, lokufaka ekhatsi bafati nebantfwana, basiphekeletela sate saphumela ngephandle kwelidolobha. Safike saguca elugwini sathantaza, 6 sase siyavalelisana. Ngemuva kwaloko, tsine sagibela umkhumbi, bona babuyela emakhaya. 7 Sesuka eThire ngemkhumbi sahamba sadzimate sefika ePhitolemayisi, sabingelela bazalwane futsi sahlala nabo lilanga linye. 8 Ngakusasa sesuka saya eKhesariya, sefika endlini yaFiliphu umvangeli, labengulomunye wemadvodza lasikhombisa lakhetfwa, futsi sahlala naye. 9 Abenemadvodzakati lamane labengakashadi futsi abephrofetha. 10 Nasesihleti lapho emalanga lambalwa, kwefika lomunye umphrofethi lokutsiwa ngu-Agabusi, avela eJudiya. 11 Weta kitsi, watsatsa libhande laPawula watibopha tinyawo netandla, wase utsi: “Naku lokushiwo ngumoya longcwele: ‘EJerusalema emaJuda atambopha ngalendlela umnikati walelibhande, futsi atamnikela etandleni tebantfu betive.’” 12 Senela kuva loku, tsine kanye nebantfu balendzawo sancenga Pawula kutsi angayi eJerusalema. 13 Kodvwa yena watsi: “Nikhalelani, futsi ningidzabukiselani enhlitiyweni? Cinisekani ngekutsi angikalungeli kuboshwa nje kuphela, kodvwa ngikulungele ngisho nekufa eJerusalema ngenca yelibito leNkhosi Jesu.” 14 Satsi nasehluleka kumvimba, samyekela sase sitsi: “Akwenteke intsandvo yaJehova.” 15 Ngemuva kwalawo malanga, salungiselela luhambo lwetfu, sase sikhuphukela eJerusalema. 16 Kodvwa labanye bafundzi baseKhesariya bahamba natsi basishiya emtini waMnasoni waseSiphrosi, labengulomunye wemakholwa ekucala, futsi besitawungenisa kakhe. 17 Satsi nasifika eJerusalema, bazalwane basemukela ngemusa. 18 Ngakusasa, Pawula waya natsi kuJakobe, futsi bebakhona bonkhe labadzala. 19 Wababingelela wase ubachazela tonkhe tintfo Nkulunkulu labetente ngaye etiveni.
JANUARY 14-20
UMCEBO LOSEVINI LANKULUNKULU | IMISEBENTI 23-24
“Wasolwa Ngekutsi Uluhlupho Futsi Ususa Siphitsiphitsi”
(Imisebenti 23:12) Nasekusile, emaJuda akha lisu, enta nesifungo sekutsi nakangadla nobe anatse lokutsite angakambulali Pawula, atawuba ngulacalekisiwe.
(Imisebenti 23:16) Kodvwa umshana waPawula weva ngalelisu lekumlalela endleleni, wase uyahamba uya enkambu yemasotja wayewubikela Pawula.
bt-ZU 191 ¶5-6
“Bani Nesebindzi!”
5 Sikhutsato Pawula lasitfola sefika ngesikhatsi lesikahle. Ngelilanga lelilandzelako, emadvodza langetulu kwa-40 langemaJuda “akha lisu, enta nesifungo sekutsi nakangadla nobe anatse lokutsite angakambulali Pawula, atawuba ngulacalekisiwe.” Lelisu lelihambisana “nesifungo” belukhombisa indlela lamaJuda lebekatimisele ngayo kubulala lomphostoli. Bebakholelwa kutsi nabangeke baphumelele kulelisu, bebatawucalekiswa. (Imisebenti 23:12-15) Lelisu labo lebelivunyelwe baphristi labakhulu nemadvodza lamadzala belentelwe kutsi Pawula abuyiselwe eSanhedrin kute bachubeke nekumphenya ngemibuto, kube ngatsi bekunetintfo lebebasafuna kutati kahle ngaye. Kodvwa leli bekulisu lekutsi bambhacele endleni kute bambulale.
6 Nobe kunjalo, umshana waPawula weva ngalelisu, wase uyomtjela. Pawula wabese ucela lomfana kutsi lendzaba ayitjele umphatsi welibutfo laseRoma, Klawudiyusi Lisiyasi. (Imisebenti 23:16-22) Ecinisweni, Jehova uyabatsandza bantfu labasha labafana nemshana waPawula, lesingatjelwa kutsi ngubani ligama lakhe, lowaba nesibindzi sekuvikela bantfu baNkulunkulu kunekutsi aphephise lugogo lwakhe kuphela, futsi wenta konkhe langakwenta kute atfutfukise tindzaba teMbuso.
(Imisebenti 24:2) Ngesikhatsi Thethulusi abitwa, wamangalela Pawula watsi: “Mhlonishwa Feliksi, sijabulela kuthula lokukhulu ngenca yakho, futsi kunetingucuko letinyenti eveni letfu ngenca yekuhlakanipha kwakho,
(Imisebenti 24:5, 6) Sitfole kutsi lomuntfu uluhlupho futsi ususa siphitsiphitsi emkhatsini wawo onkhe emaJuda emhlabeni wonkhe, nekutsi ungumholi welicembu lelibitwa ngekutsi ngemaNazaretha. 6 Wetame nekungcolisa lithempeli, ngako sibese siyambamba.
bt-ZU 192 ¶10
“Bani Nesebindzi!”
10 Ngesikhatsi aseKhesariya, Pawula ‘bekagadvwe esigodlweni saHerodi’ alindze labo lebebammangalele lababuya eJerusalema. (Imisebenti 23:35) Befika ngemuva kwemalanga lasihlanu—bekunePhristi Lophakeme Ananiyase, Thethulusi ummeli kanye nelicembu lemadvodza lamadzala. Thethulusi wacale wabonga Feliksi ngaloko lebekakwentela emaJuda, ecinisweni bekamkhohlisa futsi atincengela. Thethulusi wabese ukhuluma ngalendzaba lebekuhlangenwe ngayo, watsi Pawula ‘uluhlupho futsi ususa siphitsiphitsi emkhatsini wawo onkhe emaJuda emhlabeni wonkhe, nekutsi ungumholi welicembu lelibitwa ngekutsi ngemaNazaretha. Wetame nekungcolisa lithempeli, ngako sibese siyambamba.’ Lamanye emaJuda “ahlanganyela kulokuhlasela, agomela atsi letintfo tiliciniso.” (Imisebenti 24:5, 6, 9) Kususa siphitsiphitsi, kuhola licembu leliyingoti nekungcolisa lithempeli bekungemacala lamabi kakhulu futsi bewutfola sigwebo sentsambo nawente wona.
(Imisebenti 24:10-21) Ngesikhatsi umbusi amkhomba ngenhloko kutsi akhulume, Pawula waphendvula watsi: “Ngati kahle kutsi bewusolo ungumehluleli walesive iminyaka leminyenti, ngako ngiyakujabulela kutsi ngitiphendvulele, 11 ngobe nawe ungakwati kutihlolela kutsi akakapheli emalanga lalishumi nakubili ngaya kuyewukhonta eJerusalema. 12 Abazange bangitfole ngiphikisana nalotsite ethempelini nobe ngisusa siphitsiphitsi emasinagogeni nasedolobheni. 13 Kantsi futsi ngeke bakwati kutifakazela letintfo labangimangalela ngato lamuhla. 14 Kodvwa ngiyavuma kutsi ngekwalendlela labayibita ngekutsi ‘lihlelo,’ ngikhonta Nkulunkulu wabokhokho bami, futsi ngiyatikholelwa tonkhe tintfo letiseMtsetfweni naletibhalwe baPhrofethi. 15 Nginelitsemba kuNkulunkulu, lokulitsemba nalabantfu labanalo, lekutsi kutawuba neluvuko lwalabalungile nalabangakalungi. 16 Ngaleso sizatfu, ngihlale ngilwela kulondvolota nembeza lomsulwa embikwaNkulunkulu nakubantfu. 17 Ngako ngemuva kweminyaka letsite, ngifike eJerusalema kuze ngiphe sive sakitsi tipho, ngiphindze ngente iminikelo. 18 Ngesikhatsi ngisenta loku, bangitfole ethempelini ngitihlambulula ngekuvumelana neMtsetfo, besingekho sicumbi sebantfu futsi bengingabangeli siphitsiphitsi. Kodvwa bekukhona lamanye emaJuda labesuka esifundzeni sase-Asiya, 19 lebekufanele ngabe akhona lapha kuze angimangalele nangabe analokutsite ngami. 20 Nalamadvodza lalapha akatikhulumele wona asho kutsi ngubuphi bubi labutfole kimi ngesikhatsi ngime embikweNkantolo YemaJuda. 21 Kuphela kwentfo lengiyishito njengobe bengime emkhatsini wawo ngunayi: ‘Lamuhla, ngehlulelwa embikwenu ngesizatfu sekutsi ngikholelwa ekuvusweni kwalabafile!’”
bt-ZU 193-194 ¶13-14
“Bani Nesibindzi!”
13 Pawula wasibekela sibonelo lesihle lokufanele sisilingise nakwenteka simikiswa kubabusi ngenca yekukhonta kwetfu, simangalelwa ngekutsi siluhlupho, sivukela umbuso nobe singemalunga ‘elicembu leliyingoti.’ Pawula akazange atente lolungile kumbusi, ngekusebentisa emavi lakhohlisako njengoba kwenta Thethulusi. Wachubeka atibambile futsi ahlonipha. Ngekuhlakanipha, waniketa bufakazi lobucacile nalobuliciniso. Watsi ‘emaJuda labesuka esifundzeni sase-Asiya,’ lebekammangelele ngekusi ungcolisa lithempeli bekangekho, kantsi ngekwemtsetfo bekufanele abe khona kuze Pawula ativele kutsi ambeka maphi emacala.—Imisebenti 24:18, 19.
14 Lokubaluleke kakhulu kutsi Pawula akazange athule, wafakaza ngaloko lakukholelwako. Ngesibindzi, waphindze wakhuluma ngekukholelwa kwakhe eluvukweni lwalabafile, indzaba lebeyisuse umsindvo ngesikhatsi eme embikwe-Sanhedrini. (Imisebenti 23:6-10) Atiphendvulela, wagcizelela litsemba lweluvuko. Kungani? Ngoba bekafaza ngaJesu kanye nekuvuswa kwakhe kulabafile—intfo lebebangayikholelwa labo lebebaphikisa. (Imisebenti 26:6-8, 22, 23) Yebo, bekuyindzaba lephatselene neluvuko—ecinisweni bebangakholelwa kuJesu nasekuvusweni kwakhe.
Kufunisisa Umcebo EVini LaNkulunkulu
(Imisebenti 23:6) Ngesikhatsi Pawula abona kutsi bebehlukene kabili, labanye babaSadusi kantsi labanye babaFarisi, wakhuluma ngelivi leliphakeme embikwaleNkantolo watsi: “Banaketfu, mine ngingumFarisi, indvodzana yebaFarisi. Ngehlulelwa ngesizatfu sekutsi ngikholelwa ekuvusweni kwalabafile.”
liphuzu lelicwaningiwe leMi 23:6 leliku-nwtsty
mine ngingumFarisi: Labanye kulabantfu bebamati Pawula. (Imi 22:5) Bebatawubona kutsi utibita ngekutsi uyindvodzana yebaFarisi, ngoba avuma kutsi usesikhundleni lesifana nesabo. Babona kutsi Pawula bekangacambi emanga, ngoba baFarisi lebebaseNkantolo Lephakeme YemaJuda bebati kutsi besekangumKhristu lokhutsele. Kodvwa kulendzaba le, emavi aPawula latsi yena ungumFarisi, kufanele acondvwe ngalenye indlela; Pawula watibita ngekutsi ungumFarisi kunekutsi atibite ngekutsi ungumSadusi ngoba bekakholelwa entfweni yinye nebaFarisi, lukuluvuko lwalabafile. Ngekwenta kanjalo, bekativumelanisa nemabaFarisi lebabakhona lapho. Bekanelitsemba lekutsi ngekuphakamisa lendzaba lebeyibangela kuphikisana bekutakwenta lamanye emalunga eNkantolo Lephakeme YemaJuda abe neluvelo kuloko lebekakusho, futsi lelisu lakhe lasebenta. (Imi 23:7-9) Emavi aPawula lakuMis 23:6 ahambisana kahle nendlela latichaza ngayo nakatiphendvulela embikweNkhosi Agripha. (Imi 26:5) NakaseRoma, abhalela emaKhristu aseFiliphi, Pawula waphindze watibita ngekutsi bekangumFarisi. (Flp 3:5) Kubalulekile kutsi sinake indlela lokukhulunywa ngayo ngalamanye emaKhristu lebekabaFarisi kuMis 15:5.—Buka liphuzu lelicwaningiwe leMis 15:5.
(Imisebenti 24:24) Ngemuva kwemalangana, Feliksi wefika nemkakhe Drusila, lobekangumJuda, futsi watsi akubitwe Pawula, wase uyamlalela nakakhuluma ngekukholwa kwakhe kuKhristu Jesu.
(Imisebenti 24:27) Kodvwa kwatsi nasekwendlule iminyaka lemibili, kwangena Phokhiyusi Festusi esikhundleni saFeliksi. Ngenca yekutsi Feliksi abefuna kutsandvwa ngemaJuda, akazange amkhiphe Pawula ejele.
liphuzu lelicwaningiwe leMis 24:24 leliku-nwtsty
Drusila: Bekayindvodzakati yesitsatfu yaHerodi lokukhulunywa ngaye kuMis 12:1, Herodi Agripha 1. Watalwa cishe ngemnyaka wa-38 C.E. futsi bekangusisi wa-Agripha II kanye naBhenise. (Fundza liphuzu lelicwaningiwe leMis 25:13 kanye neGlossary, “Herodi.”) Umbusi Feliksi bekayindvodza yakhe yesibili. Wacale washada neNkhosi yaseSiriya, Azizus wase-Emesa, wamdivosa, wabese ushada naFeliksi cishe ngemnyaka wa-54 C.E., nakaneminyaka lengu-16. Kusenekwenteka kutsi bekakhona ngesikhatsi Pawula akhuluma naFeliksi “mayelana nekulunga, kutibamba, kanye nekwehlulelwa lebekutawufika.” (Imi 24:25) Ngesikhatsi Feliksi aniketa Festusi bukhosi, washiya Pawula ejele ‘ngenca yekutsi abefuna kutsandvwa ngemaJuda,’ labanye bebacabanga kutsi wakwenta loko ngobe afuna kujabulisa umfati wakhe labesemncane, labengumJuda.—Imi 24:27.
Kufundvwa kweliBhayibheli
(Imisebenti 23:1-15) Pawula wawabukisisa lamalunga eNkantolo YemaJuda, wase utsi: “Banaketfu, mine bengisolo ngiphila nginanembeza lomsulwa embikwaNkulunkulu kuze kube ngulamuhla.” 2 Nakeva loku, Ananiyase umphristi lophakeme watjela labo lebebeme ngakuPawula kutsi bamshaye emlonyeni. 3 Ngako Pawula watsi kuye: “Nkulunkulu utakushaya wena mtentisi. Ufuna kungehlulela ngekuvumelana neMtsetfo, kodvwa ngesikhatsi lesifanako ube uwephula ngekutsi utjele labantfu kutsi bangishaye?” 4 Labo lebebeme edvute batsi: “Umetfukelani umphristi lophakeme waNkulunkulu?” 5 Pawula watsi: “Banaketfu, bengingati kutsi ungumphristi lophakeme. Ngobe kubhaliwe kutsi: ‘Ungakhulumi kabi ngemholi webantfu bakini.’” 6 Ngesikhatsi Pawula abona kutsi bebehlukene kabili, labanye babaSadusi kantsi labanye babaFarisi, wakhuluma ngelivi leliphakeme embikwaleNkantolo watsi: “Banaketfu, mine ngingumFarisi, indvodzana yebaFarisi. Ngehlulelwa ngesizatfu sekutsi ngikholelwa ekuvusweni kwalabafile.” 7 Nakasho loku, kwaba nekuphikisana emkhatsini webaFarisi nebaSadusi, base behlukana ekhatsi. 8 Ngobe baSadusi bebatsi labafile ngeke bavuswe, batsi kute tingilosi, futsi kute netidalwa temoya, kodvwa baFarisi bebatikholelwa tonkhe letintfo. 9 Ngako bamemeta kakhulu, futsi letinye tati temtsetfo telicembu lebaFarisi tasukuma taphikisa ngelulaka, tatsi: “Asitfoli lutfo lolubi kulomuntfu, ngobe kungenteka kutsi sidalwa semoya nobe ingilosi ikhulume naye.” 10 Njengobe lokuphikisana bekuba kukhulu, umkhuzeli wemphi wesaba kutsi labantfu batambulala Pawula, ngako wayala emasotja kutsi ehle amsuse kubo, ammikise enkambu yemasotja. 11 Ngakusasa ebusuku, iNkhosi yema ngakuye yatsi: “Bani nesibindzi! Ngobe njengobe ufakaze ngalokuphelele ngami eJerusalema, kufanele wente lokufanako naseRoma.” 12 Nasekusile, emaJuda akha lisu, enta nesifungo sekutsi nakangadla nobe anatse lokutsite angakambulali Pawula, atawuba ngulacalekisiwe. 13 Emadvodza lenta lesifungo bekangetulu kwemashumi lamane. 14 Aya kubaphristi labakhulu nasemadvodzeni lamadzala, afike atsi: “Sente sifungo sekutsi sitawuba ngulabacalekisiwe nasingadla lokutsite singakambulali Pawula. 15 Ngako nine kanye nemalunga eNkantolo YemaJuda kufanele nitjele umkhuzeli wemphi kutsi amletse lapha kini, kube shengatsi nisafuna kuphenyisisa licala lakhe. Utawutsi angakasondzeli nekusondzela, sitawube sesikulungele kumbulala.”
JANUARY 21-27
UMCEBO LOSEVINI LANKULUNKULU | IMISEBENTI 25-26
“Pawula Wendlulisela Licala KuKhesari Wabese Uniketa Bufakazi Enkhosini Herodi Agripha”
(Imisebenti 25:11) Nangabe vele nginelicala futsi ngente lokutsite lokungenta ngifanelwe kufa, ngeke ngikubalekele loko; kodvwa nangabe letintfo labangimangalela ngato tingasilo liciniso, kute umuntfu longanginikela kubo. Ngako-ke ngendlulisela licala kuKhesari!”
bt-ZU 198 ¶6
“Ngendlulisela licala kuKhesari!”
6 Sifiso saFestusi sekujabulisa emaJuda besitawufaka Pawula engotini. Ngako-ke, Pawula wasebentisa lilungelo lakhe njengesakhamuti saseRoma. Watjela Festusi watsi: “Ngime embikwesihlalo sekwehlulela saKhesari, futsi ngulapho lakufanele ngehlulelwe khona. Kute lutfo lolubi lengilwente kumaJuda njengobe nje nawe ubona. . . . Ngendlulisela licala kuKhesari!” Nasesentiwe leso sicelo bekute lokungasijikisa. Festusi wakugcizelela loko nakatsi: “Licala lakho ulendlulisele kuKhesari, ngaleso sizatfu utakuya kuye.” (Imisebenti 25:10-12) Ngekwendlulisela licala lakhe kuloyo losesikhundleni lesiphakeme, Pawula bekawabekela sibonelo emaKhristu eliciniso alamuhla. Nangabe baphikisi betama kwenta lokubi “kube shengatsi ngumtsetfo,” BoFakazi BaJehova basebentisa emalungelo lasemtsetfweni kute bavikele tindzaba letimnandzi.—Hla 94:20.
(Imisebenti 26:1-3) Agripha watsi kuPawula: “Uvumelekile kutsi utikhulumele kuze utivikele.” Ngako Pawula welula sandla sakhe wase uyatikhulumela utsi: 2 “Nkhosi Agripha, nangetulu kwato tonkhe tintfo emaJuda langimangalela ngato, mine ngiyajabula ngekutsi ngisembikwakho kuze ngitivikele lamuhla, 3 ikakhulukati njengobe uwati kahle onkhe emasiko kanye nekuphikisana lokukhona kumaJuda. Ngako ngiyakucela kutsi ungilalele ngesineke.
bt-ZU 198-201 ¶10-16
“Ngendlulisela licala kuKhesari!”
10 Pawula wayibonga ngenhlonipho iNkosi Agripha ngelitfuba lamniketa lona lekutikhulumela, wavuma kutsi lenkhosi beyisati sawo onkhe emasiko nekungevani lobekusemkhatsini wemaJuda. Pawula wabese uchaza imphilo yakhe lebekayiphila watsi: “Bengiphila njengemFarisi ngekuvumelana netimfundziso leticinile tenkholo yetfu.” (Imisebenti 26:5) NjengemFarisi, Pawula bekanelitsemba lekutsi Mesiya utawubuya. Kodvwa njengoba besekangumKhristu, washo ngesibindzi kutsi Jesu Khristu bekanguloMesiya lebesekusikhatsi lesidze bamulindzele. Inkholelo lebebavumelana ngayo nebamangaleli bakhe bekulitsemba nekufezeka kwesetsembiso saNkulunkulu lasenta kubokhokho babo—ngiso lesenta kutsi atekiswe licala ngalelolanga. Lesimo ngiso lesenta kutsi Agripha afune kuva lokunyenti lobekushiwo nguPawula.
11 Akhumbula indlela lebekawahlukumeta ngayo emaKhristu, Pawula watsi: “Nami bengiciniseka kutsi kufanele ngente konkhe lokusemandleni ami kuze ngimelane nelibito laJesu waseNazaretha . . . Njengobe bengibatfukutselele kakhulu, bengize ngibaphatse kabi ngisho nakulamanye emadolobha.” (Imisebenti 26:9-11) Pawula bekangecisi nakasho kanje. Bantfu labaningi babeyati indlela lebekawahlukumeta ngayo emaKhristu. (Gal 1:13, 23) Kungenteka kutsi Agripha bekatibuta, ‘Yini leyenta lendvodza yashintja?’
12 Emavi aPawula lalandzelako ayawuphendvula lombuto, atsi: “Ngangiya eDamaseko kuze nakhona ngente lokufanako njengobe ngangitfunywe baphristi labakhulu, kwatsi emini ngabona kukhanya lokukhatimula kwengca kwelilanga kumanyata kuvela ezulwini, kwatungeleta mine nalabo lengangihamba nabo. Sonkhe sawa, ngase ngiva livi likhuluma nami ngelulwimi lwesiHebheru litsi: ‘Sawula, Sawula, ungihluphelani? Lokuchubeka ukhahlela tindvuku leticijile kutakulimata.’ Kodvwa mine ngatsi: ‘Ungubani wena Nkhosi?’ Lona latsi: ‘NginguJesu, loyo lomhluphako’”—Imisebenti 26:12-15.
13 Asengakawuboni lombono longakavami, ngekwemfanekiso Pawula ‘bekakhahlele tindvuku leticijile.’ Njengoba nenkunzi ingatilimata nayikhahlela indvuku lecijile leyentelwe kuyichuba nekuyicondzisa, naPawula bekabulimatile buhlobo bakhe naNkulunkulu ngekumelana nentsandvo yaNkulunkulu. Ngekutiveta kuPawulu endleleni leya eDamaseku, Jesu lobekavusiwe wenta kutsi lendvodza letfobekile, kodvwa lebeyidukisiwe, ishintje indlela lebeyicabanga ngayo.—Johane 16:1, 2.
14 Pawula wakushintja mbamba kuphila kwakhe. Watsi ku-Agripha: “Ngakwenta loko lengatjelwa kona kulombono lovela ezulwini, futsi ngacale ngaya kubantfu baseDamaseko, kwalandzela labo labaseJerusalema nalabasetindzaweni taseJudiya kanye nakubetive, ngimemetela umlayeto wekutsi kufanele baphendvuke babuyele kuNkulunkulu ngekutsi bente imisebenti lefanela kuphendvuka.” (Imisebenti 26:19, 20) Kwaphela iminyaka leminyenti Pawula enta umsebenti Jesu Khristu lamtfuma wona nakativeta kuye embonweni wasemini. Waba yini umphumela? Bantfu labatilalela tindzaba letimnandzi lebetishunyayelwa nguPawulu baphendvuka etentweni tabo letimbi netekungatsembeki, futsi babuyela kuNkulunkulu. Labantfu baba takhamuti letinhle naletihlonipha umtsetfo neticondziso.
15 Kuba kwabo takhamuti letinhle bekungasho lutfo kubaphikisi baPawula labangemaJuda. Pawula watsi: “Kungaleso sizatfu-ke emaJuda angibamba ethempelini, afuna kungibulala. Kodvwa ngesizatfu sekutsi bengitfola lusito loluvela kuNkulunkulu, kuze kube ngulamuhla ngisachubeka ngifakaza kulabo lababonakala baphansi nakulabanemagunya.”—Imisebenti 26:21, 22.
16 NjengemaKhristu eliciniso, kufanele ‘sihlale sikulungele kutiphendvulela’ ngelitsemba lesinalo. (1Ph 3:15) Nasikhuluma nemajaji nebabusi ngetinkholelo tetfu, kungasisita kulingisa sibonelo saPawula ngendlela lakhuluma ngayo ku-Agripha nakuFestusi. Ngekubatjela ngenhlonipho indlela emaciniso laseBhayibhelini lakushintje ngayo kuphila kwetfu—kuphila kwetfu nekwalabo labalalela umlayeto wetfu lesiwushumayelako kungatsintsa tinhlitiyo talabo labasetikhundleni letiphakeme.
(Imisebenti 26:28) Kodvwa Agripha watsi kuPawula: “Kulesikhashana nje utawungenta umKhristu.”
bt-ZU 202 ¶18
“Ngendlulisela licala kuKhesari!”
18 Kodvwa Pawula wamphendvula lombusi watsi: “Angihlanyi Mhlonishwa Festusi, kodvwa ngikhuluma emavi laliciniso nalanengcondvo. Ecinisweni, nalenkhosi lengikhuluma nayo ngekukhululeka itati kahle letintfo . . . Nkhosi Agripha, uyakholelwa yini kubaPhrofethi? Ngiyati kutsi uyakholelwa.” Kodvwa Agripha watsi kuPawula: “Kulesikhashana nje utawungenta umKhristu.” (Imisebenti 26:25-28) Nobe ngabe lamavi bekasuka enhlitiyweni nobe cha, kodvwa akhombisa kutsi kufakaza kwaPawula kwayitsintsa mbamba lenkhosi.
Kufunisisa Umcebo Evini Lankulunkulu
(Imisebenti 26:14) Sonkhe sawa, ngase ngiva livi likhuluma nami ngelulwimi lwesiHebheru litsi: ‘Sawula, Sawula, ungihluphelani? Lokuchubeka ukhahlela tindvuku leticijile kutakulimata.’
liphuzu lelicwaningiwe leMis 26:14 leliku-nwtsty
ukhahlela tindvuku leticijile: Indvuku lecijile, bekuyindvuku lebeyisetjentiswa nakuchutjwa silwane endvulo. (Khu 3:31) Inkhulumo letsi “ukhahlela tindvuku leticijile” isisho lesitfolakala etincwadzini tesiGriki. Sisuselwa enkhomeni lebeyinenkhani, lebeyingafuni kuchutjwa ngalendvuku lecijile ngekutsi iyikhahlele, lobekwenta kutsi ilimale. NaSawula wenta intfo lefanako ngaphambi kwekutsi abe ngumKhristu. Ngekulwa nebalandzeli baJesu lebebavikelwa nguNkulunkulu Jehova, Pawula bekatifaka engotini yekulimala. (Catsanisa neMis 5: 38, 39; 1Tm 1:13, 14.) EmBhalweni weMshumayeli 12:11, ‘tintjumentju’ tisetjentiswe kulomBhalo ngemcondvo wekufanekisa emavi lahlakaniphile emuntfu lokhutsata loyo lolalele kutsi alandzele seluleko.
ku-nwt glossary
Indvuku lecijile. Bekuyindvuku lendze lebeyinensimbi lecijile ngembili, lebeyisetjentiswa bafuyi nabachuba tilwane. Lendvuku lecijile ifananiswa nemavi emuntfu lohlakaniphile lokhutsata loyo lolalele kutsi anake seluleko. ‘Kukhahlela tindvuku leticijile’ kususelwa esentweni senkhomo lenenkhani lebeyingafuni kuchutjwa ngalendvuku lecijile ngekutsi iyikhahlele, lobekwenta kutsi ilimale.—Imi 26:14; Khu 3:31.
(Imisebenti 26:27) Nkhosi Agripha, uyakholelwa yini kubaPhrofethi? Ngiyati kutsi uyakholelwa.”
w03-ZU 11/15 16-17 ¶14
Sita Labanye Kutsi Bemukele Umlayeto WeMbuso
14 Pawula bekati kutsi Agripha bekangumJuda ngeligama. Asebentisa lwati lwa-Agripha lwenkholo yebuJuda, Pawula wakhombisa kutsi loko lebekakushumayela ecinisweni ‘bekutintfo baPhrofethi kanye naMosi lebebatsite titawukwenteka’ mayelana nekufa kanye nekuvuswa kwaMesiya. (Imisebenti 26:22, 23) Pawula wabuta Agripha watsi: “Nkhosi Agripha, uyakholelwa yini kubaPhrofethi?” Agripha waba senkingeni. Kube watsi akabati baphrofethi, belitawonakala lidvumela lakhe njengoba bekalikholwa lelingumJuda. Kodvwa kube wavumelana nekucabanga kwaPawula, bekutawusho kutsi uyahambisana nalomphostoli futsi bekatawuba senkingeni yekubitwa ngekutsi ungumKhristu. Ngekuhlakanipha, Pawulu wawuphendvula yena lombuto wakhe, watsi: “Ngiyati kutsi uyakholelwa.” Inhlitiyo ya-Agripha yamenta kutsi aphendvule njani? Watsi: “Kulesikhashana nje utawungenta umKhristu.” (Imisebenti 26:27, 28) Nanobe Agripha angazange abe ngumKhristu, kodvwa kuyakhanya kutsi ngelizinga lelelitsite umlayeto waPawula wayitsintsa inhlitiyo yakhe.—Hebheru 4:12.
Kufundvwa KweliBhayibheli
(Imisebenti 25:1-12) Ngako ngemuva kwemalanga lamatsatfu Festusi afike kulesifundza futsi acale kubusa, waya eJerusalema esuka eKhesariya. 2 Baphristi labakhulu nebaholi bemaJuda bamnika kwatiswa lokumelene naPawula. Base bayamncenga, 3 batsi akabentele umusa ngekutsi atfumele kutsi ayiswe eJerusalema, ngobe bebente lisu lekumlalela endleleni kuze bambulale. 4 Kodvwa Festusi watsi Pawula akagcinwe eKhesariya njengobe naye abesatawubuyela khona masinyane. 5 Watsi: “Tiphatsimandla tenu atehle nami tiyewummangalela nangabe vele kukhona lokubi lomuntfu lakwentile.” 6 Ngemuva kwekucitsa emalanga langaba siphohlongo nobe lalishumi lapho, wabuyela eKhesariya, kwatsi ngakusasa wahlala esihlalweni sekwehlulela watsi Pawula akaletfwe kuye. 7 Nakefika, emaJuda labesuka eJerusalema amkaka, ambeka emacala lamanyenti futsi lamabi, kodvwa bekete ngisho nebufakazi bawo. 8 Kepha Pawula watikhulumela watsi: “Kute lokubi lengikwentile lokushayisana neMtsetfo wemaJuda, nelithempeli, nobe naKhesari.” 9 Ngenca yekutsi Festusi abefuna kutsandvwa ngemaJuda, waphendvula Pawula watsi: “Uyafuna yini kuya eJerusalema kuze wehlulelwe ngaletintfo embikwami?” 10 Kodvwa Pawula watsi: “Ngime embikwesihlalo sekwehlulela saKhesari, futsi ngulapho lakufanele ngehlulelwe khona. Kute lutfo lolubi lengilwente kumaJuda njengobe nje nawe ubona. 11 Nangabe vele nginelicala futsi ngente lokutsite lokungenta ngifanelwe kufa, ngeke ngikubalekele loko; kodvwa nangabe letintfo labangimangalela ngato tingasilo liciniso, kute umuntfu longanginikela kubo. Ngako-ke ngendlulisela licala kuKhesari!” 12 Nasakhulume nebeluleki, Festusi watsi: “Licala lakho ulendlulisele kuKhesari, ngaleso sizatfu utakuya kuye.”
JANUARY 28–FEBRUARY 3
UMCEBO LOSEVINI LANKULUNKULU | IMISEBENTI 27-28
“Pawula Wahamba Ngemkhumbi Waya eRoma”
(Imisebenti 27:23, 24) Ngobe ebusuku ingilosi yaNkulunkulu lengimkhontako nalengimkhotsamelako ifike yema eceleni kwami, 24 yatsi: ‘Ungesabi Pawula. Wena kufanele ume embikwaKhesari, futsi Nkulunkulu utabasindzisa bonkhe laba lohamba nabo.’
bt-ZU 208 ¶15
“Kute Ngisho Namunye Kini Lotawulimala”
15 Kungenteka kutsi Pawula bekafakaza emkhunjini ‘ngelitsemba labekanalo esetsembisweni Nkulunkulu lasenta.’ (Imisebenti 26:6; Kho 1:5) Kodvwa njengobe besebasenkingeni yekuphukelwa ngumkhumbi, Pawula bekangakhona kufakaza ngelitsemba lelinesisekelo lesicinile. Watsi: “Ngobe ebusuku ingilosi . . . . ifike yema eceleni kwami, yatsi: ‘Ungesabi Pawula. Wena kufanele ume embikwaKhesari, futsi Nkulunkulu utabasindzisa bonkhe laba lohamba nabo.’” Pawula wabakhutsata watsi: “Ngako-ke, banini nesibindzi ngobe ngiyetsemba kutsi Nkulunkulu utawukwenta njengobe angitjelile. Nanobe kunjalo, sitawuphukelwa ngumkhumbi kulesinye sihlenge.”—Imi 27:23-26.
(Imisebenti 28:1, 2) Satsi nasesifike ngekuphepha elugwini, satfola kutsi lesihlenge bekutsiwa yiMaltha. 2 Bantfu bakhona basiphatsa kahle kakhulu. Basibasela umlilo baphindze basemukela ngetandla letifutfumele njengobe litulu belina futsi kubandza.
bt-ZU 209 ¶18
“Kute Ngisho Namunye Kini Lotawulimala”
18 Labo labasindza batitfola sebasesihlengeni saseMaltha, eningizimu yeSicily. (Buka nelibhokisi lelitsi “Ikuphi IMelitha?”) Bantfu labahlala kulesihlenge ‘babaphatsa kahle kakhulu.’ (Imisebenti 28:2) Bababasela umlilo labantfu lebebangabati lebebafike elusentseni lebebakulo bamanti nte futsi bachucha. Umlilo wabasita kutsi bafutfumale. Wenta nekutsi kwenteke simangaliso.
Bt-ZU 210 ¶21
“Kute Ngisho Namunye Kini Lotawulimala”
21 Kulendzawo, bekuhlala Phupliyuse, lobekanjinge ngekuba netindzawo letinyenti. Kungenteka bekasikhulu lebesingumRoma lesatiwako eMaltha. Lukha wayichaza ngekutsi “beyingumholi kulesihlenge,” asebentisa sicu lebesifana nalebesitfolwe emibhalweni lemibili yaseMaltha. Wabaphatsa kahle boPawula kanye nalabo lebekahamba nabo emalanga lamatsatfu. Nobe kunjalo, babe waPhupliyuse bekagula. Nakuloku Lukha wasichaza kahle simo lebekakuso. Watsi lendvodza ‘beyilele phansi, iphetfwe ngumkhuhlane futsi ihanjiswa sisu,’ akuchaza ngendlela lecondzile loko bekuyigulisa. Pawula wathantaza futhi wayibeka tandla, futsi waphila. Basejatjuliswe ngulesimangaliso, takhamuti taletsa nalabanye bantfu lebebagula kuze nabo batowelashwa, taletsa netipho kuze anakekele tidzingo taPawula netalabo lebebahamba naye.—Imisebenti 28:7-10.
(Imisebenti 28:16, 17) Nasesifikile eRoma, Pawula wavunyelwa kutsi ahlale yedvwa agadvwe lisotja. 17 Nanobe kunjalo, ngemuva kwemalanga lamatsatfu wabitela ndzawonye baholi bemaJuda. Nasebahlangene, watsi kubo: “Banaketfu, nanobe kute lokubi lengikwentile kubantfu nobe emasikweni abokhokho betfu, ngasuswa eJerusalema njengesiboshwa nganikelwa etandleni temaRoma.
bt-ZU 213 ¶10
“Anikete Bufakazi Lobuphelele”
10 Ngalesikhatsi lelicembu letivakashi lifika eRoma, “Pawula wavunyelwa kutsi ahlale yedvwa agadvwe lisotja.” (Imisebenti 28:16) Kute tingabaleki letiboshwa lebetiboshelwe endlini, ngalokuvamile tinketane letatiboshwa ngato betiboshelwa kugadzi wato. Nangalesikhatsi naye aboshwe kanjalo, Pawula bekangumshumayeli wetindzaba teMbuso, futsi luketane aluzange lumente athule. Ngemuva kwekuphumula emalanga lamatsatfu, wahlanganisa ndzawonye emadvodza labaholi bemaJuda aseRoma kuze atetfule kuwo futsi anikete bufakazi.
Kufunisisa Umcebo Evini LaNkulunkulu
(Imisebenti 27:9) Kwase kwendlule sikhatsi lesidze, sekuyingoti nekuhamba, ngobe ngisho nekuzila kudla lobekwentiwa ngelilanga lekubuyisana besekwendlulile. Ngako Pawula waveta umbono wakhe
liphuzu lelicwaningiwe leMis 27:9 leliku-nwtsty
kuzila kudla lobekwentiwa ngelilanga lekubuyisana: Nobe “kuzila lobekwentiwa ngelikwindla.” Lokusho “kuzila kudla.” Ligama lelitsi “kuzila” ngesiGriki belisho umyalo wekuzila lobewungaphansi kweMtsetfo waMosi, lokukuzila lokuhlobene nemnyaka welilanga lekubuyisana, leliphindze libitwe ngekutsi i-Yom Kippur (ngesiHebheru i-yohm hak·kip·pu·rimʹ, “lilanga lekuvunula”). (Lev 16:29-31; 23:26-32; Nu 29:7; buka i-Glossary, “Lilanga Lekubuyisana.”) Leligama lelitsi “kuzila,” lelihambisana neLilanga Lekubuyisana, lingasho kungayenti imisebenti letsite lefaka ekhatsi kuzila. (Lev 16:29.) Kusetjentiswa kwaleligama “kuzila” kumBhalo weMi 27:9, kugcizelela kutsi imisebenti letsite beyingentiwa ngeLilanga lekubuyisana futsi bangadli. Kuzila lobekwentiwa ngeLilanga lekubuyisana bekuphela ekugcineni kwa-September noma ekucaleni kwa-October.
(Imisebenti 28:11) Ngemuva kwetinyanga letintsatfu sagibela umkhumbi lowawuneluphawu lolutsi “Emadvodzana AZeyusi.” Lomkhumbi wawuchamuke e-Alekzandriya futsi wawucitse busika kulesihlenge.
liphuzu lelicwaningiwe leMi 28:11 leliku-nwtsty
Emadvodzana AZeyusi: Ngekusho kwemasiko esiGriki newesiRoma, “Emadvodzana AZeyusi” (NgesiGriki, Di·oʹskou·roi) bekubo-Castor na-Pollux, lebekungemaphahla ankulunkulu Zeyusi (Jupiter) kanye neNdlovukati Leda yase-Sparta. Kuletinye tintfo lebebatenta, bebavikela bashayeli bemikhumbi baphindze basindzise nalabo lebebawugibele, ikakhulukati nasewucwila. Lemininingwane lemayelana neluphawu lolungembili kwalomkhumbi, ingulobunye bebufazi bekutsi lendzaba yabhalwa ngumuntfu lowatibonela yena lombhalo lokulomkhumbi.
Kufundvwa KweliBhayibheli
(Imisebenti 27:1-12) Njengobe kwakuncunywe kutsi sihambe ngemkhumbi siye eTaliyane, Pawula naletinye tiboshwa bendluliselwa endvuneni yemasotja yelibutfo la-Agustusi, lokutsiwa nguJuliyusi. 2 Sagibela umkhumbi lobewusuka e-Adramithiyamu uya etindzaweni letingaselugwini lwase-Asiya, sase siyahamba; Aristakhusi labewaseMasedoniya esuka eThesalonika abehamba natsi. 3 Ngakusasa sefika eSidoni, futsi Juliyusi wamphatsa kahle Pawula, wamvumela nekutsi aye kubangani bakhe kuze bamnakekele. 4 Nasisuka lapho sahamba ngemkhumbi sagudla eSiphrosi, lapho umoya bewungeke usitfole khona njengobe bewuphambana natsi. 5 Sahamba elwandle ngaseSilisiya nasePhamfiliya, safike sema esikhumulweni saseMira leseLisiya. 6 Kodvwa nasesilapho, indvuna yemasotja yatfola umkhumbi lobewusuka e-Alekzandriya uya eTaliyane, yasigibelisa kuwo. 7 Ngemuva kwekuhamba kancane emalangana, sefika kalukhuni eKhinidusi, futsi ngobe umoya bewusivimbela, sagudla ngaseKhrethe leseSalmone lapho bewungeke usitfole khona. 8 Sahamba kamatima sadzimate sefika endzaweni lokutsiwa Sikhumulo Sekuphepha, lesedvute nelidolobha laseLaseya. 9 Kwase kwendlule sikhatsi lesidze, sekuyingoti nekuhamba, ngobe ngisho nekuzila kudla lobekwentiwa ngelilanga lekubuyisana besekwendlulile. Ngako Pawula waveta umbono wakhe, 10 watsi kubo: “Madvodza, ngiyabona kutsi loluhambo lutawuba yingoti futsi kutawuba nemonakalo lomkhulu, hhayi nje kulomkhumbi nemtfwalo lokuwo kuphela, kodvwa nasemiphefumulweni yetfu.” 11 Nanobe kunjalo, indvuna yemasotja yalalela sikhulu semkhumbi nemnikati wawo esikhundleni sekulalela loko lokwakushiwo nguPawula. 12 Njengobe kwakuyingoti kucitsa busika kulesikhumulo semikhumbi, labanyenti batsi akuchutjekwe nendlela kuze babone kutsi bangefika yini eFeniksi, lokusikhumulo semikhumbi lesiseKhrethe lesivulekela ngasenyakatfo lesemphumalanga nangaseningizimu lesemphumalanga, bese bacitsa busika lapho.