Tikhombo Tencwajana Yekubhalela Emihlanganweni
FEBRUARY 4-10
UMCEBO LOSEVINI LANKULUNKULU | ROMA 1–3
“Chubeka Ucecesha Nembeza Wakho”
(Roma 2:14, 15) Ngobe nobe nini nakutentakalela kutsi bantfu betive labete umtsetfo bente tintfo letivumelana nemtsetfo, ngisho nobe bete umtsetfo, baveta kutsi banawo etingcondvweni tabo. 15 Bona ngekwabo bakhombisa kutsi loko lokufunwa ngumtsetfo kubhaliwe etinhlitiyweni tabo, nanembeza wabo uvumelana nabo, futsi imicabango yabo iyabalahla nobe ibavumele.
lvs 18 ¶6
Nembeza Lomsulwa Lowemukelwa Nkulunkulu
6 Ngisho nebantfu labangamati Jehova bavamise kutati tintfo letilungile naletingakalungi. LiBhayibheli litsi: “Imicabango yabo iyabalahla nobe ibavumele.” (Roma 2:14, 15) Sibonelo nje, bantfu labanyenti bayati kutsi kweba nobe kubulala, kubi. Ngisho bangati, kodvwa bayamlalela nembeza wabo, lokuyintfo leyafakwa nguJehova lebenta bakubone lokulungile nalokungakalungi. Baphindze futsi balandzele timiso taNkulunkulu, nobe emaciniso lasisekelo lavela Jehova lasisita sente tincumo letihlakaniphile ekuphileni.
(Roma 2:15) Bona ngekwabo bakhombisa kutsi loko lokufunwa ngumtsetfo kubhaliwe etinhlitiyweni tabo, nanembeza wabo uvumelana nabo, futsi imicabango yabo iyabalahla nobe ibavumele.
lvs 19-20 ¶8-9
Nembeza Lomsulwa Lowemukelwa Nkulunkulu
8 Labanye bantfu bacabanga kutsi kulalela bonembeza babo kusho kwenta tintfo ngendlela labativa ngayo. Beva shengatsi bangenta nobe ngabe yini labayifunako nangabe nje bakubona kukahle emehlweni abo. Kodvwa indlela lesitiva ngayo ilawulwa sono, futsi ingasidukisa. Indlela lesitiva ngayo ingaba nemandla kakhulu, kangangekutsi ingabaphatamisa bonembeza betfu. LiBhayibheli litsi: “Inhlitiyo iyayengana ngetulu kwato tonkhe tintfo, futsi yonakele ngalokwengcile. Ngubani nje longayicondza?” (Jeremiya 17:9) Ngako singahle sititjele kutsi intfo letsite ikahle ngisho nobe kungakalungi kutsi siyente. Sibonelo kutsi ngembikwekutsi Pawula abe ngumKhristu abeneludlame, ahlupha bantfu baNkulunkulu futsi bekakholelwa kutsi loko lebekakwenta bekulungile. Ngekwembono wakhe, bekatsi unanembeza lokahle. Kodvwa ngekuhamba kwesikhatsi watsi: “Jehova nguye longiphenyako.” (1 Khorinte 4:4; Imisebenti 23:1; 2 Thimothi 1:3) Ngesikhatsi eva kutsi Jehova bekativa njani ngaloko lebekakwenta, wabona kutsi bekufanele ashintje. Kuyakhanya kutsi, ngaphambi kwekutsi sente sincumo, kufanele sitibute kutsi, ‘Jehova ufuna ngenteni?’
9 Nangabe utsandza umuntfu, angeke ufune kumvisa buhlungu. Ngesizatfu sekutsi sitsandza Jehova, asifuni kwenta nobe yini lengamvisa buhlungu. Kufanele sikwesabe kakhulu kuvisa Jehova buhlungu. Kulandzela sibonelo saNehemiya kungasisita kulendzaba. Akazange asebentise sikhundla sakhe sekuba ngumbusi kute anjinge. Leni? Nakachaza utsi ‘kungenca yekwesaba Nkulunkulu.’ (Nehemiya 5:15) Nehemiya bekangafuni kwenta tintfo letingeke timjabulise Jehova. NjengaNehemiya, natsi kufanele sikwesabe kwenta intfo lembi lengavisa Jehova buhlungu. EBhayibhelini sifundza kutsi yini lejabulisa Jehova.—Buka kwatiswa lokusekugcineni 6.
Kufunisisa Umcebo EVini LaNkulunkulu
(Roma 3:4) Cha! Kodvwa Nkulunkulu akatfolakale aneliciniso ngisho nobe bonkhe bantfu banemanga, njengobe nje kubhaliwe kutsi: “Kuze utfolakale ulungile ngemavi akho futsi uncobe nawehlulelwa.”
w08-ZU 6/15 30 ¶5
Emaphuzu Labalulekile Lasencwadzini YaRoma
3:4. Nangabe umuntfu akhuluma lokungahambisani naloko lokushiwo liBhayibheli, sikhetsa kwenta ‘Nkulunkulu atfolakale aneliciniso’ ngekutsi sikwetsembe lokuseBhayibhelini siphindze siphile ngekuvumelana nentsandvo yaKhe. Ngekuwenta ngemndlandla umsebenti wekushumayela nekwenta bafundzi, singasita bantfu labanyenti batibonele kutsi Nkulunkulu uneliciniso.
(Roma 3:24, 25) Kunjengesipho kubo kutsi kutsiwe balungile ngemusa wakhe lomkhulu ngenca yekukhululwa yinhlawulo leyakhokhwa nguKhristu Jesu. 25 Nkulunkulu wanikela ngaye kuze abe ngumnikelo wekubuyisana ngekukholwa engatini yakhe. Loku wakwenta kuze avete kulunga kwakhe, ngobe uyabeketela futsi uyatitsetselela tono letentiwe esikhatsini lesengcile.
w08-ZU 6/15 29 ¶6
Emaphuzu Labalulekile Lasencwadzini YaRoma
3:24, 25—‘Inhlawulo leyakhokhwa nguKhristu Jesu’ itimbonya njani “tono letentiwe esikhatsini lesengcile” isengakakhokhwa? Siphrofetho sekucala lesikhuluma ngaMesiya, lesikuGenesisi 3:15, sacala kufezeka nga-33 C.E. ngesikhatsi Jesu abulawa elugodvweni. (Gal 3:13, 16) Ngako-ke, ngesikhatsi Jehova asho lesiphrofetho, ngembono wakhe besekufana nekutsi sewuvele uyikhokhile lenhlawulo, ngobe kute lokungavimba Nkulunkulu ekufezeni tinjongo takhe. Mayelana nenhlawulo yaJesu Khristu yesikhatsi lesitako, Jehova angatitsetsela tono tesitukulwane sa-Adamu lebesinekukholwa kulesetsembiso. Inhlawulo yenta nekutsi bantfu labafa ngaphambi kwetikhatsi tebuKhristu kutsi nabo bavuswe.—Imisebenti 24:15.
W06-Zu 6/1 12-13
Bhekana Namaqiniso
Ukuze sithole ukwaneliseka, kumelwe sibhekane namaqiniso ngokuqondene nokulinganiselwa kwethu nokwabanye. Lapho ebhalela abaseRoma, umphostoli uPawulu wathi: “Bonke bonile futhi bayasilela enkazimulweni kaNkulunkulu.” (Roma 3:23) Asinakuziqonda izici eziningi zenkazimulo kaJehova. Esinye isibonelo salokhu sikuGenesise 1:31: “UNkulunkulu wabona konke ayekwenzile, bheka! kwakukuhle kakhulu.” Noma nini lapho uJehova ecabanga ngezinto azenzile, angakwazi njalo ukuthi “kuhle kakhulu.” Akekho umuntu ongakusho ngaso sonke isikhathi lokho. Isinyathelo sokuqala sokuthola ukwaneliseka ukuvuma ukuthi sinokulinganiselwa. Nokho, kuhileleke nokwengeziwe. Kudingeka siqonde futhi samukele umbono kaJehova ngendaba.
Igama lesiGreki elihunyushwe ngokuthi “isono” linomsuka osho ukugeja uphawu. Nasi isibonelo: Ake ubone ngeso lengqondo umuntu ofisa ukuzuza umklomelo ngokucibishela into ethile. Uphethe imicibisholo emithathu. Ucibishela ngowokuqala, ageje ngemitha. Acibishele kangconywana kulokhu kwesibili, kodwa ageje ngamasentimitha angu-30. Usezimisele impela-ke manje, futhi uyawudedela umcibisholo wokugcina, kodwa nawo ugeja ngamasentimitha amabili. Ucishe wanemba yena, kodwa ugejile.
Sonke sifana nalo mcibisheli odumele. Ngezinye izikhathi kuba sengathi ‘silugeja kakhulu uphawu.’ Ngezinye izikhathi sicishe sinembe, kodwa empeleni sigeje. Siyadumala ngoba sisuke senze konke okusemandleni kodwa sehluleka. Ake sibuyele kuloya mcibisheli.
Uyafulathela ahambe kancane edangele ngoba ubefisa ngempela ukuzuza umklomelo. Kuthi kusenjalo, indoda ephethe lo mncintiswano imbize ithi makabuye, imnike umklomelo, ithi: “Ngifuna ukukunika lo mklomelo ngoba ngiyakuthanda, futhi ngibonile ukuthi uzame kangakanani.” Umcibisheli ujabula kakhulu!
Ujabula kakhulu! Wonke umuntu oyothola “isipho” sokuphila okuphakade nokuphelela kuNkulunkulu uyozizwa ngale ndlela. (Roma 6:23) Njengoba eyobe esephelele, yonke into ayenzayo iyoba yinhle—ngeke aphinde alugeje uphawu. Uyokwaneliseka ngokugcwele. Okwamanje, uma sihlala sikukhumbula lokhu, ngeke sizenyeze noma sibabheke kabi abanye.
Kufundvwa KweliBhayibheli
(Roma 1:1-17) Mine Pawula, inceku yaJesu Khristu leyabitelwa kuba ngumphostoli, naleyakhetfwa kutsi itewumemetela tindzaba letimnandzi taNkulunkulu, 2 latetsembisa kusukela ekucaleni, asebentisa baphrofethi bakhe emiBhalweni lengcwele, 3 letimayelana neNdvodzana yakhe leyatalwa ingumuntfu ivela esitukulwaneni saDavide, 4 kodvwa yavetwa njengeNdvodzana yaNkulunkulu ngemandla emoya longcwele ngesikhatsi ivuswa ekufeni. LeNdvodzana nguJesu Khristu iNkhosi yetfu. 5 Ngaye, semukela umusa waNkulunkulu nemsebenti wekuba baphostoli kuze bantfu bato tonkhe tive babonise kukholwa futsi balalele, bese bahlonipha libito lakhe. 6 Nani nabitwa kubantfu betive kuze nibe baJesu Khristu. 7 Ngibhalela bonkhe labatsandzekako baNkulunkulu labaseRoma, nalababitelwe kutsi babe ngulabangcwele: Shengatsi ningaba nemusa nekuthula lokuvela kuNkulunkulu longuBabe wetfu, naseNkhosini lenguJesu Khristu. 8 Kwekucala, ngaJesu Khristu ngibonga Nkulunkulu wami mayelana nani nonkhe, ngobe kukholwa kwenu kukhulunywa ngako eveni lonkhe. 9 Nkulunkulu lengimentela umsebenti longcwele ngenhlitiyo yonkhe, ngekumemetela tindzaba letimnandzi letimayelana neNdvodzana yakhe ungufakazi wami wekutsi njalo angiyekeli kunibeka emithantazweni yami, 10 ngimncenga kutsi nakungenteka, ngigcine ngiphumelele kufika kini nangabe nje atsandza. 11 Ngobe nginesifiso lesikhulu sekunibona kuze ngininike sipho lesivela kuNkulunkulu khona nitewucina, 12 nobe kuze sikhutsatane, nguloyo akhutsateke ngekukholwa kwalomunye, ngekwenu nekwami.13 Bazalwane, yatini kutsi bengifuna kuta kini tikhatsi letinyenti, kodvwa bengisolo ngivimbeleka kudzimate kube ngunyalo, kuze ngitfole imiphumela lemihle kini, ngisho nakuletinye tive. 14 Ngikweleta emaGriki nalabangasiwo emaGriki, labahlakaniphile nalabangakahlakaniphi. 15 Ngako ngiyakulangatelela kumemetela tindzaba letimnandzi nakini lapho eRoma. 16 Ngite emahloni ngetindzaba letimnandzi, ngobe ecinisweni tiyindlela lenemandla Nkulunkulu labasindzisa ngayo bonkhe labanekukholwa, kumJuda kucala kulandzele umGriki. 17 Ngobe kulunga kwaNkulunkulu kuvetwa ngekukholwa kwemuntfu futsi kukwenta kucine, njengobe kwabhalwa kutsi: “Lolungile utawuphila ngenca yekukholwa.”
FEBRUARY 11-17
UMCEBO LOSEVINI LANKULUNKULU | ROMA 4–6
“Nkulunkulu Ukhombisa Lutsandvo Lwakhe Kitsi”
(Roma 5:8) Nkulunkulu ukhombisa lutsandvo lwakhe kitsi, ngobe ngesikhatsi sisetoni, Khristu wasifela.
(Roma 5:12) Ngako-ke ngemuntfu munye sono sangena eveni, nekufa kwangena ngesono, ngenca yaloko kufa kwasakatekela kubo bonkhe bantfu ngobe bonkhe bonile—.
Nkulunkulu Ukhombisa Lutsandvo Lwakhe Kitsi
5 Pawula wayichaza lendzaba, wacala nganali liphuzu: “Sono sangena ngemuntfu munye emhlabeni, sangena nekufa, kufa kwase kwendlulela kubo bonkhe bantfu, njengobe bonkhe bonile.” (Rom. 5:12) Singakhona kukucondza loku, ngobe Nkulunkulu wagcina imininingwane lechaza sicalo sekuphila kwemuntfu. Wadala bantfu lababili, bo-Adamu na-Eva. Njengobe uMdali ete sono, nebatali betfu bekucala bebete sono. Nkulunkulu wabanika umyalo munye, futsi wabatjela nekutsi nabawephula bebatawutfola sigwebo sekufa. (Gen. 2:17) Nanobe kunjalo, bakhetsa kungalaleli futsi bawephula umyalo waNkulunkulu lobewucabangela, ngekwenta njalo, bamlahla Jehova njengesiShayamtsetfo kanye neMbusi.—Dut. 32:4, 5.
(Roma 5:13, 14) Ngobe sono saba khona eveni usengakabi khona uMtsetfo, kodvwa kute lokutsiwa unesono nangabe umtsetfo ungekho. 14 Nanobe kunjalo, kufa kwabusa njengenkhosi kusukela ku-Adamu kudzimate kuyewufika kuMosi, ngisho nakulabo labangonanga njenga-Adamu, lobekafana ngandlela tsite naloyo lobeketa.
Nkulunkulu Ukhombisa Lutsandvo Lwakhe Kitsi
6 Ngesizatfu sekutsi Adamu wacala kutfola bantfwana ngemuva kwekona, wendlulisela sono kanye nemiphumela yaso kubo bonkhe bantfu. Kuliciniso kutsi bantfu abazange bawephule umtsetfo waNkulunkulu lobewuniketwe bo-Adamu, ngako-ke abazange batfole sehlulelo lesifanako, futsi bebangakanikwa umtsetfo lobewuniketwe bo-Adamu. (Gen. 2:17) Nanobe kunjalo, bantfwana ba-Adamu baba nesono. Kungako sono sachubeka sibabusa kwate kwaba ngulesikhatsi Nkulunkulu anika ema-Israyeli umtsetfo, lobewuveta kahle kutsi batoni. (Fundza Roma 5:13, 14.) Imiphumela lebangelwa sono lesasitfola ku-Adamu ingafananiswa netifo umntfwana latitsatsa kumtali wakhe, njengemphelangati waseMedithera, nobe sifo sekopha (hemophilia). Kungenteka uke wafundza ngekutsi Alexis, indvodzana yemLashiya longuCzar Nicholas II kanye na-Alexandra, waba nesifo sekopha. Kuliciniso kutsi kuleminye imindeni, labanye bantfwana bangase bangaguliswa nguletifo labatitfole kubatali babo, kodvwa basengatindlulisela kubantfwana babo. Kodvwa akusinjalo ngesono. Kusukela ku-Adamu, imiphumela yesono iya ngekuba mibi kakhulu. Itsintsa bonkhe bantfu. Sono siyabulala, futsi sendlulela kubo bonkhe bantfu. Iyoke iphele yini lenkinga?
(Roma 5:18) Ngesono sinye, bantfu bato tonkhe tinhlobo balahlwa ngelicala, ngendlela lefanako, ngesento sinye sekutiveta alungile, bantfu bato tonkhe tinhlobo kutawutsiwa balungile kuze batfole kuphila.
(Roma 5:21) Ngayiphi injongo? Kuze kutsi njengobe sono kanye nekufa bekubusa njengenkhosi, ngendlela lefanako nemusa waNkulunkulu ubuse njengenkhosi ngenca yekulunga lokuholela ekuphileni lokuphakadze ngaJesu Khristu iNkhosi yetfu.
Nkulunkulu Ukhombisa Lutsandvo Lwakhe Kitsi
9 Asho kutsini emavi esiGriki latsi ‘kutsiwe balungile’ kanye nalatsi “bayakwentiwa balungelane naNkulunkulu”? Lomunye umhumushi weliBhayibheli wabhala ngaloku, watsi: “Ngumfanekiso longekwemtsetfo lokwati kuchaza liphuzu lelifanana nelemtsetfo. Lana kukhulunywa ngelushintjo lolwenteka kumuntfu macondzana nebuhlobo bakhe naNkulunkulu, hhayi lushintjo lwangekhatsi lolwenteka kuye . . . Lomfanekiso uveta Nkulunkulu anjengelijaji leselifinyelele esincumeni lesivuna ummangalelwa. Kuba shengatsi uletfwe enkantolo yaNkulunkulu ngobe anelicala, kodvwa Nkulunkulu uyamkhulula.”
10 “UMehluleli wemhlaba wonkhe” angamkhulula ngasiphi sisekelo umuntfu lowente bubi? (Gen. 18:25) Ngelutsandvo, Nkulunkulu watfumela iNdvodzana yakhe letelwe yodvwa. Jesu wenta intsandvo yaBabe wakhe ngalokuphelele nangetulu kwekulingwa, kwedzelelwa, kanye nekuphatfwa kabuhlungu. Walondvolota bucotfo bakhe kwate kwaba sekufeni, esigodvweni sekuhlushwa. (Heb. 2:10) Njengobe anikela ngekuphila kwakhe lokute sono, Jesu wenta kutsi kube nesihlengo lebesingakhulula intalo ya-Adamu esonweni nasekufeni.—Mat. 20:28; Rom. 5:6-8.
Kufunisisa Umcebo EVini LaNkulunkulu
(Roma 6:3-5) Anati yini kutsi sonkhe tsine lesabhajatiswa kuKhristu Jesu besibhajatiselwa ekufeni kwakhe? 4 Ngako sangcwatjwa naye ngekubhajatiselwa kwetfu ekufeni kwakhe, kuze kutsi njengobe naKhristu avuswa ekufeni ngenkhatimulo yeYise, natsi ngalokufanako siphile imphilo lensha. 5 Ngobe nangabe sibe munye naye ekufeni lokufana nekwakhe, nakanjani sitawuba munye naye ekuvusweni lokufana nekwakhe;
w08 6/15 29 ¶7
Emaphuzu Labalulekile Lasencwadzini YaRoma
6:3-5—Kusho kutsini kubhajatiselwa kuKhristu Jesu nasekubhajatiselwa ekufeni kwakhe? Nangabe Jehova agcoba balandzeli baKhristu ngemoya longcwele, bahlanganiswa naJesu futsi babe ngemalunga elibandla lelingumtimba waKhristu, yena abe yiNhloko yabo. (1Ko 12:12, 13, 27; Kho 1:18) Loko kusho kubhajatiselwa kuKhristu Jesu. EmaKhristu lagcotjiwe aphindze ‘abhajatiselwe nasekufeni kwakhe [Khristu]’ ngemcondvo wekutsi aphila imphilo yekutidzela neyekutimisela ngenca yelitsemba lekuphila phakadze emhlabeni. Ngako-ke kufa kwawo kuyinhlawulo njengekufa kwaJesu, ngisho nobe kwabo kufa kungahlawuleli muntfu. Lokubhajatiselwa ekufeni kwaKhristu kuyaphela nakafa futsi avuselwa ekuphileni kwasezulwini.
(Roma 6:7) Ngobe umuntfu lofile ukhululiwe esonweni sakhe.
Nguliphi Litsemba Lelikhona Ngabokhokho Bami?
Nakuvuswa bantfu labangakalungi, batawehlulelwa ngekwaloko labakwenta nabasaphila yini? Chake, ngobe umBhalo waRoma 6:7 utsi: “Ngobe umuntfu lofile ukhululiwe esonweni sakhe.” Laba labangakalungi bayobe sebatibhadele tono tabo ngekufa. Kungako bayowehlulelwa ngekwaloko labatakwenta ngemuva kwekuvuswa kwabo, hhayi ngaloko labakwenta bangati, ngaphambi kwekufa kwabo. Bayawutfola ini?
Kufundvwa KweliBhayibheli
(Roma 4:1-15) Ngako singatsini ngakhokho wetfu Abrahama lesivela kuye? 2 Kube Abrahama kwatsiwa ulungile ngenca yemisebenti, abetawuba nesizatfu sekutigabatisa, kodvwa hhayi embikwaNkulunkulu. 3 Utsini umbhalo? Utsi: “Abrahama wabonisa kukholwa kuJehova, kwatsiwa ulungile.” 4 Umuntfu losebentako utfola umvuzo wakhe, hhayi ngobe akhonjiswa umusa, kodvwa uwutfola ngobe awufanele. 5 Ngakulokunye, umuntfu longetsembeli emisebentini yakhe, kodvwa lowetsembela kuloyo lotsi bantfu lababi balungile, kutawutsiwa ulungile ngenca yekukholwa kwakhe. 6 NaDavide wakhuluma ngenjabulo letfolwa ngumuntfu Nkulunkulu latsi ulungile ngaphandle kwemisebenti, watsi: 7 “Bayajabula labo labatsetselelwe tento tabo letimbi, nalabo tono tabo letimbonyiwe; 8 uyajabula umuntfu Jehova langeke aze ambalele sono sakhe.”9 Lenjabulo itfolwa ngulabasokile kuphela yini, nobe nalabo labangakasoki bayayitfola? Ngobe sitsi: “Abrahama kwatsiwa ulungile ngenca yekukholwa kwakhe.” 10 Kwashiwo nini kutsi ulungile? Ngesikhatsi asasokile nobe ngesikhatsi asengakasoki? Kwashiwo ngesikhatsi asengakasoki. 11 Wanikwa luphawu, lolukusoka, lolwaba sicinisekiso sekutsi kutsiwe ulungile ngekukholwa labenako ngesikhatsi asengakasoki, kuze abe nguyise wabo bonkhe lababa nekukholwa ngisho bangakasoki, khona nabo kutawutsiwa balungile; 12 kute aphindze abe nguyise webantfwana labasokile, hhayi labo labasoke enyameni kuphela, kodvwa nalabo labahamba ngendlela lefanele etinyatselweni tababe wetfu Abrahama, ngekukholwa labenako ngesikhatsi asengakasoki.13 Abrahama nentalelwane yakhe abazange banikwe setsembiso sekuba tindlalifa telive ngenca yemtsetfo, kodvwa kwakungenca yekutsi kwatsiwa balungile ngekukholwa kwabo. 14 Ngobe nangabe labo labagcina uMtsetfo batindlalifa, kukholwa akusenamsebenti, nalesetsembiso sesiphelile. 15 Ecinisweni, uMtsetfo wenta umuntfu afanelwe yintfukutselo yaNkulunkulu, kodvwa nakute umtsetfo, kute nesiphambeko.
FEBRUARY 18-24
UMCEBO LOSEVINI LANKULUNKULU | ROMA 7–8
‘Ulindzele Ngekulangatelela Lokukhulu Yini’?
(Roma 8:19) Ngobe indalo ilindzele ngekulangatelela lokukhulu kubona kwembulwa kwemadvodzana aNkulunkulu.
Vumela Jehova Akuholele Enkhululekweni Sibili
17 Ngesikhatsi akhuluma ngenkhululeko Jehova latayinika tikhonti takhe letisemhlabeni, Pawula wabhala: “Indalo yonkhe ilindzele ngekulangatelela lokukhulu kutsi Nkulunkulu embule emadvodzana akhe.” Wachubeka watsi: “Indalo ngalelinye lilanga iyawukhululwa kulobugcili bekubola, ibe nesabelo kulenkhululeko nebukhosi bebantfwana baNkulunkulu.” (Rom. 8:19-21) “Indalo” imelela bantfu labanelitsemba lekuphila emhlabeni, labatawuzuza ‘ekwembulweni’ kwemadvodzana aNkulunkulu lagcotjwe ngemoya. Lokwembulwa kutawucala ngalesikhatsi ‘lamadvodzana’ avuselwa endzaweni yemoya, asebente naKhristu ekuhlanteni umhlaba logcwele bubi futsi aholele “sicumbi lesikhulu sebantfu” eveni lelisha.—Semb. 7:9, 14.
(Roma 8:20) Ngobe yentiwe kutsi iphile imphilo lelite, hhayi ngentsandvo yayo kodvwa ngentsandvo yaloyo loyentile, nalowayinika litsemba
Kujabula Ngelitsemba Letfu
11 ‘Litsemba’ lebantfu laniketwa nguJehova ngalesikhatsi etsembisa kubakhulula ‘enyokeni yasemandvulo,’ lenguSathane Develi, asebentisa ‘intalo’ letsenjisiwe. (Semb. 12:9; Gen. 3:15) ‘Lentalo’ ngalokuyinhloko yayinguJesu Khristu. (Gal. 3:16) Ngekufa nekuvuswa kwakhe, wenta kutsi bantfu babe nesisekelo selitsemba lekutsi batawukhululwa ekugcilatweni sono nekufa. Kugcwaliseka kwalesitsembiso kuhlobene ‘nekwembulwa kwemadvodzana aNkulunkulu.’ Emakhristu lagcotjiwe lakhatinyulisiwe ayincenye yesibili ‘yalentalo.’ ‘Atawembulwa’ ngalesikhatsi ahlanganyela naKhristu ekubhubhiseni live lelibuswa nguSathane. (Semb. 2:26, 27) Loko kutatiletsela insindziso letinye timvu letitawube tiphuma ekuhluphekeni lokukhulu.—Semb. 7:9, 10, 14.
(Roma 8:21) kuze ikhululwe ekugcilatweni konakala, bese itfola inkhululeko lekhatimulako yebantfwana baNkulunkulu.
Kujabula Ngelitsemba Letfu
12 Eminyakeni leyiNkhulungwane yekuBusa kwaKhristu, bantfu batawukhululwa. Ngaleso sikhatsi, ‘emadvodzana aNkulunkulu’ lakhatinyulisiwe atawuphindze ‘embulwe’ nawasebenta njengebaphristi kanye naKhristu, akhombisa tibusiso temhlatjelo wesihlengo saJesu kubantfu. Njengetikhonti teMbuso wasezulwini, bantfu batawukhululwa esonweni nasekufeni. Kancane kancane bantfu labalungile ‘bayawukhululwa kulobugcili bekubola.’ Nabachubeka betsembekile kuJehova idzimate iphele iminyaka leyiNkhulungwane nasekuhluphekeni kwekugcina lokuyawufika ngemuva kwayo, emabito abo atawubhalwa futsi angacishwa ‘encwadzini yekuphila.’ Batawungena ‘enkhululekweni yebukhosi bebantfwana baNkulunkulu.’ (Semb. 20:7, 8, 11, 12) Leli litsemba lelijabulisako sibili!
Kufunisisa Umcebo EVini LaNkulunkulu
(Roma 8:6) Kunaka tintfo tenyama kuletsa kufa, kodvwa kunaka tintfo temoya kuletsa kuphila nekuthula;
Usakhumbula Yini?
Uyini umehluko emkhatsini ‘wekunaka tintfo tenyama’ kanye ‘nekunaka tintfo temoya’? (Rom 8:6)
Umuntfu lonaka tintfo tenyama uvamise kukhuluma ngetintfo tenyama, ente tintfo letihambisana nayo futsi ajatjuliswe tintfo letiphatselene nenyama. Umuntfu lonaka tintfo temoya unaka kakhulu tintfo letiphatselene naNkulunkulu kanye nemicabango yakhe. UmKhristu lonjalo ucondziswa ngumoya longcwele. Kunaka inyama kusho kufa, kantsi kunaka tintfo letiphatselene naNkulunkulu kusho kuphila nekuthula.—w16.12, emakh. 15-17.
(Roma 8:26, 27) Ngendlela lefanako, umoya uhlanganyela natsi ekusisiteni kulobutsakatsaka betfu; ngobe sisuke singati kutsi singathantazela ini, kepha umoya uyasincengela ngekulila kwetfu lokungekhatsi. 27 Kodvwa loyo lohlola tinhlitiyo uyati kutsi umoya usho kutsini, ngobe wona uncengela labangcwele ngekuvumelana nentsandvo yaNkulunkulu.
w09 11/15 7 ¶20
Imithantazo Yakho Ivetani Ngawe?
20 Ngaletinye tikhatsi, singase singati kutsi sitawutsini emithantazweni yetfu lesiyenta sisodvwana. Pawula wabhala watsi: “Sisuke singati kutsi singathantazela ini, kepha umoya uyasincengela ngekulila kwetfu lokungekhatsi. Kodvwa loyo lohlola tinhlitiyo uyati kutsi umoya usho kutsini.” (Rom 8:26, 27) Jehova wenta kutsi kubhalwe imithantazo leminyenti eBhayibhelini. Watemukela leticelo letiphefumulelwe letiseBhayibhelini futsi natsi tingasisita nasenta yetfu imithantazo setsemba kutsi utasiphendvula. Nkulunkulu uyasati futsi uyayati nenchazelo yetintfo lavumela kutsi umoya wakhe utisho asebentisa babhali beliBhaliyibheli. Jehova uyatiphendvula ticelo tetfu lapho umoya ‘usincengela’ nobe usikhulumela. Kodvwa njengobe siya ngekulati kancono liBhayibheli, loko lokufanele sikuthantazele kungase kutifikele engcondvweni.
Kufundvwa KweliBhayibheli
(Roma 7:13-25) Loko lokuhle ngiko yini lokwabangela kufa kimi? Cha! Sono ngiso lesenta loko ngekutsi sisebentise lokuhle kute siletse kufa kimi, sivete naloko lesingiko. NeMtsetfo wembula kutsi sono sibi kakhulu. 14 Ngobe siyati kutsi uMtsetfo uvela kuNkulunkulu, kodvwa mine ngiyinyama, futsi ngitsengiswe esonweni. 15 Angikucondzi kahle loko lengikwentako. Ngobe loko lengifisa kukwenta angikwenti, kodvwa loko lengikutondzako ngiko lengikwentako. 16 Nanobe kunjalo, nangabe loko lengingakufisi kungiko lengikwentako, ngiyavuma kutsi uMtsetfo muhle. 17 Ngobe akusasimi lengenta loko, kodvwa sono lesikimi ngiso lesikwentako. 18 Ngiyati kutsi kimi, lokusho kutsi enyameni yami, kute lokuhle lokukhona; ngobe nginaso sifiso kodvwa angikwati kwenta lokuhle. 19 Lokuhle lengikufisako angikwenti, kodvwa lokubi lengingakufisi ngiko lengikwentako. 20 Ngako-ke nangabe ngenta loko lengingakufisi, kusuke kungasimi lokwentako, kodvwa kusuke kusono lesikimi.21 Ngikhandza kutsi kimi kunalomtsetfo: Nangifisa kwenta lokulungile, kunalokubi kimi. 22 Ngiyajabula ngemtsetfo waNkulunkulu ngenca yemuntfu lenginguye ngekhatsi, 23 kodvwa ngibona lomunye umtsetfo emtimbeni wami, lolwisana nemtsetfo losengcondvweni yami, futsi ungenta sigcili semtsetfo wesono losemalungeni ami. 24 Maye mine muntfu lohluphekako! Ngubani lotangikhulula kulomtimba lofako? 25 Akabongwe Nkulunkulu ngaJesu Khristu iNkhosi yetfu! Engcondvweni yami ngisigcili semtsetfo waNkulunkulu, kodvwa enyameni ngisigcili semtsetfo wesono.
FEBRUARY 25–MARCH 3
UMCEBO LOSEVINI LANKULUNKULU | ROMA 9–11
“Umfanekiso Wesihlahla Semncumo”
(Roma 11:16) Ngetulu kwaloko, nangabe litsantana lenhlama lelitsatfwa njengelekucala lingcwele, yonkhe lelenye inhlama isuke ingcwele; nangabe timphandze tingcwele, nemagala asuke angcwele.
‘Maye, Kujula Kwenhlakanipho YaNkulunkulu!’
13 Umphostoli Pawula wafananisa labo lababa yincenye yentalo ya-Abrahama nemagala esihlahla semncumo lesingekwemfanekiso. (Rom. 11:21) Lesihlahla semncumo simelela kugcwaliseka kwenjongo yaNkulunkulu lemayelana nesivumelwane lasenta na-Abrahama. Timphandze talesihlahla tingcwele futsi timelela Jehova njengaloniketa Israyeli waNkulunkulu kuphila. (Isa. 10:20; Rom. 11:16) Sicu salesihlahla simelela Jesu njengaloyincenye yekucala yentalo ya-Abrahama. Nasa onkhe lamagala amelela linani ‘leliphelele’ lalabo labayincenye yesibili yentalo ya-Abrahama.
(Roma 11:17) Kodvwa nangabe lamanye emagala ajutjwa kwase kutsi wena nanobe ungumncuma wesiganga wahlunyiswa emkhatsini walalamanye wase uhlanganyela etimphandzeni letikhuluphele temncuma,
(Roma 11:20, 21) Loko kuliciniso! kWona ajutjwa ngenca yekubate kukholwa, kepha wena usime ngenca yekukholwa. kUngatigabatisi, kodvwa yesaba. 21 Njengobe Nkulunkulu angazange awayekele emagala labevele akhona, nawe ngeke akuyekele.
‘Maye, Kujula Kwenhlakanipho YaNkulunkulu!’
15 Ngako-ke, yini Jehova layenta kute afeze injongo yakhe? Pawula watsi emagala esihlahla semncumo sesiganga ahlunyeleliswa endzaweni yalawa labejutjiwe . (Fundza Roma 11:17, 18.) Ngesizatfu saloko, emaKhristu lagcotjwe ngemoya lavela etiveni, njengalawo labekhona ebandleni laseRoma, ahlunyeleliswa kulesihlahla semncumo lesingekwemfanekiso. Ngalendlela, aba yincenye yentalo ya-Abrahama. Ekucaleni, lamaKhristu abefanana nemagala esihlahla semncumo wesiganga, futsi bekete litfuba lekuba yincenye yesivumelwane lesikhetsekile. Nanobe kunjalo, Jehova uye wawavulela indlela yekutsi abe ngemaJuda emoya.—Rom. 2:28, 29.
(Roma 11:25, 26) Bazalwane, ngifuna niyati lemfihlo lengcwele kuze ningatiboni nihlakaniphile. Lemfihlo ikutsi labanye ka-Israyeli baba lukhuni kwadzimate kwaba ngulapho sekungene linani leliphelele lebantfu betive, 26 futsi wonkhe Israyeli utawusindziswa ngalendlela. Kunjengobe nje kubhaliwe kutsi: “Umsindzisi utawuvela eSiyoni, ente bonkhe bantfwana baJakobe bashiye imikhuba yabo lemibi.
‘Maye, Kujula Kwenhlakanipho YaNkulunkulu!’
19 Injongo yaJehova lemayelana ‘nema-Israyeli aNkulunkulu’ igcwaliseka ngendlela lemangalisako. (Gal. 6:16) Njengobe Pawula asho, “onkhe ema-Israyeli ayawusindziswa.” (Rom. 11:26) Ngesikhatsi saJehova lesifanele, “onkhe ema-Israyeli”—lokulinani leliphelele la-Israyeli waNkulunkulu atawukhonta njengemakhosi kanye nebaphristi ezulwini. Kute lokungenta injongo yaJehova ingaphumeleli!
Kufunisisa Umcebo EVini LaNkulunkulu
(Roma 9:21-23) Anati yini kutsi umbumbi unemandla ekusebentisa sigadla lesifanako selubumba kute ente sitja selikhetselo aphindze ente nalesingasiso selikhetselo? 22 Kutsiwani-ke nangabe Nkulunkulu abefuna kuveta intfukutselo yakhe futsi ente nemandla akhe abonakale, kodvwa wabayekela waphindze wababeketelela labo labatitja letifanelwe yintfukutselo nekubhujiswa? 23 Kutsiwani-ke nangabe loku wakwenta kuze avete kutsi inkhatimulo yakhe yinkhulu kulabo labatitja letifanelwe sihawu, labahlelela kusengaphambili kutsi batfole inkhatimulo,
Vumela Seluleko SaJehova Sikubumbe
5 Kutsiwani-ke nangabe bantfu bala ngenkhani kubunjwa nguMbumbi Lomkhulu? Kuleso simo, Nkulunkulu uwasebentisa njani emandla akhe? Cabanga ngaloko lokwenteka ngelubumba nangabe lungasakulungeli kusetjentiselwa injongo yalo. Umbumbi angavele ente lolunye luhlobo lwesitja nobe alulahle. Nobe kunjalo, nangabe lolubumba lungasasebenti, ngalokuvamile liphutsa lisuke likumbumbi. Akusinjalo ngeMbumbi wetfu. (Dut. 32:4) Nangabe umuntfu angavumi kubunjwa nguJehova, liphutsa liba kuloyo muntfu. Jehova usebentisa emandla akhe lafana newembumbi ngekuphatsa bantfu ngekuvumelana nendlela labakusebentisa ngayo kubumba kwakhe. Labo labakusebentisa kahle, babunjwa ngendlela lezuzisako. Nasi sibonelo: EmaKhristu lagcotjiwe ‘atitja temusa’ letibunjwe taba ‘titja teludvumo, letisetjentiswa ngetikhatsi letitsite.’ Ngakulolunye luhlangotsi, labo labaphikisa Nkulunkulu ngenkhani bagcine ‘batitja telulaka lwakhe letimiselwe kubhujiswa.’—Rom. 9:19-23.
(Roma 10:2) Ngobe ngiyabafakazela kutsi banenshisekelo ngaNkulunkulu, kodvwa beswele lwati lolungulonalona.
it-1 1260 ¶2
Umona lomkhulu
Kusebentisa Kabi Inshisekelo. Umuntfu angaba nenshiseko nobe umona ngesizatfu lesitsite lesihle, kodvwa angamukeleki kuNkulunkulu futsi angamjabulisi. Loko kwenteka kumaJuda lamanyenti angelikhulu lekucala. Bebafuna kwenteke kulunga kubo ngenca yemisebenti yabo labayentile ngephansi kweMtsetfo waMosi. Kodvwa Pawula wabakhombisa kutsi inshisekelo yabo bebayisebentisa kabi ngobe bebeswele lwati lolungulonalona. Ngako-ke abazange bakutfole kulunga lokungiko lokuvela kuNkulunkulu. Bekufanele balibone liphutsa labo bese babuyela kuNkulunkulu ngaKhristu kute batfole kulunga nenkhululeko levela esehlulelweni seMtsetfo. (Rom 10:1-10) Sawula waseThasusi, bekashisekela kakhulu inkholo yebuJuda kangangekutsi ‘walihlupha kamatima libandla laNkulunkulu.’ Bekawugcina ngekucophelela uMtsetfo ativeta njengemuntfu ‘longasoleki.’ (Gal 1:13, 14; Flp 3:6) Kodvwa bekasisebentisa kabi sikhwele lebekanaso ngenkholo yemaJuda. Bekacotfo enhlitiyweni, kungaleso sizatfu Jehova wambonisa umusa ngaKhristu ngekutsi amtjengise indlela yekukhonta kweliciniso.—1Tm 1:12, 13.
Kufundvwa KweliBhayibheli
(Roma 10:1-15) Bazalwane, lengikufisako enhlitiyweni yami nalengibancusela kona kuNkulunkulu kutsi basindziswe. 2 Ngobe ngiyabafakazela kutsi banenshisekelo ngaNkulunkulu, kodvwa beswele lwati lolungulonalona; 3 ngobe abati kutsi yini leyenta Nkulunkulu atsi umuntfu ulungile, kodvwa bafuna kutiveta balungile ngendlela yabo, abafuni kulandzela loko Nkulunkulu latsi kulungile. 4 Khristu usiphetfo seMtsetfo, kuze wonkhe umuntfu lokholwako kutewutsiwa ulungile.5 Ngobe Mosi wabhala kutsi umuntfu lowenta lokufunwa nguMtsetfo utawuphila ngako. 6 Kodvwa mayelana nekulunga lokuletfwa kukholwa, kwatsiwa: “Ungasho enhlitiyweni yakho kutsi: ‘Ngubani lotakwenyukela ezulwini?’ lokusho kutsi aletse Khristu emhlabeni; 7 nobe utsi: ‘Ngubani lotakwehlela ethuneni?’ lokusho kutsi avuse Khristu ekufeni.” 8 Kodvwa utsini umBhalo? Utsi: “Livi lisedvute nawe, futsi lisemlonyeni nasenhlitiyweni yakho”; ‘lokulivi’ lekukholwa lesilishumayelako. 9 Ngobe nawulimemetela kubantfu ‘lelivi lelisemlonyeni wakho,’ lekutsi Jesu uyiNkhosi, futsi ukholwa enhlitiyweni kutsi Nkulunkulu wamvusa ekufeni, utawusindziswa. 10 Ngobe ngenhlitiyo umuntfu ubonisa kukholwa bese kutsiwa ulungile, kodvwa ngemlomo umuntfu uvuma embikwebantfu bese uyasindziswa.11 UmBhalo utsi: “Kute umuntfu lokholwa nguye lotawudvumateka.” 12 Ngobe kute umehluko emkhatsini wemJuda nemGriki, ngenca yekutsi bonkhe baneNkhosi yinye lebapha ngalokuphuphumako bonkhe labayibitako. 13 “Wonkhe umuntfu lobita libito laJehova utawusindziswa.” 14 Kodvwa-ke batambita njani loyo labangazange bakholwe nguye? Batawukholwa njani kuloyo labangevanga ngaye? Batakuva njani nakute loshumayelako? 15 Batawushumayela njani nangabe bangakatfunywa? Kunjengobe nje kubhaliwe kutsi: “Maye tinhle tinyawo talabo labamemetela tindzaba letimnandzi talokuhle!”