Tikhombo Tencwajana Yekubhalela Emhlanganweni Wekuphila KwemaKhristu Nemsebenti Wawo
JUNE 3-9
UMCEBO LOSEVINI LANKULUNKULU | GALATHIYA 4-6
“Loko ‘Indzaba Lengumfanekiso’ Lekushoko Kitsi”
(Galathiya 4:24, 25) Letintfo tingatsatfwa njengendzaba lengumfanekiso; ngobe labafati basho tivumelwane letimbili, lesinye saseNtsabeni iSinayi, lesiveta bantfwana bebugcili, futsi singuHagari. 25 Hagari umelela iSinayi, lokuyintsaba lese-Arabhiya, futsi ufana neJerusalema yalamuhla, ngobe isebugcilini nebantfwabayo.
it-1-E 1018 ¶2
Hagari
Ngekusho kwempostoli Pawula, Hagari lokukhulunywa ngaye kulendzaba lengumfanekiso lomelela tive—ema-Israyeli emvelo, bebalalela Jehova ngemtsetfo wesivumelwane lowakhiwa eNtsabeni iSinayi, futsi lowenta kutsi kuvele “bantfwana bebugcili.” Ngenca yekutsi bantfu bebachubeka bona, lesive asizange sikhone kuwugcina lomtsetfo walesivumelwane. Ngaphasi kwalesivumelwane, ema-Israyeli akazange akhone kuba bantfu labakhululekile kodvwa bebatigcili tesono futsi bafanelwe kufa, ngako baba tigcili. (Joh. 8:34; Rom. 8:1-3) Ngesikhatsi saPawula, iJerusalema beyifana naHagari, lokulidolobha lelikhulu lelimelela inhlangano ya-Israyeli wemvelo, lowatitfola asasigcili nebantfwana bakhe. EmaKhristu lagcotjwe ngemoya, bantfwana ‘beJerusalema lesetulu,’ incekukati yaNkulunkulu lengekwemfanekiso. LeJerusalema, njengaSara lokhululekile, ayizange seyibe sigcili. Kodvwa njenga-Isaka lowaphatfwa kabi ngu-Ishmayeli, nebantfwana beJerusalema lesetulu labakhululwa ngeNdvodzana, nabo baphatfwa kwabi ngaphansi kwebantfwana beJerusalema lesigcili. Nanobe kunjalo, Hagari kanye nendvodzana yakhe bacoshwa, lokumelela kulahlwa kwesive sema-Israyeli emvelo nguJehova.—Gal. 4:21-31; catsanisa na-Joh. 8:31-40.
(Galathiya 4:26, 27) Kodvwa iJerusalema lesetulu ikhululekile, futsi ingumake wetfu. 27 Kubhaliwe kutsi: “Jabula wena mfati lote imbeleko, futsi longabatfoli bantfwana; memeta ngenjabulo wena mfati lote imihelo; ngobe bantfwana bemfati lolahliwe banyenti kakhulu kunebaloyo lonendvodza.”
Bani Nekukholwa Lokucinile EMbusweni
11 Nanobe sivumelwane lesentiwa na-Abrahama sagcwaliseka entalelwaneni yakhe ngesikhatsi ingena eVeni Lesetsembiso, imiBhalo iveta kutsi lesivumelwane sitawuletsa tibusiso letinkhulu kakhulu. (Gal. 4:22-25) Njengobe umphostoli Pawula asho, incenye yekucala yentalo ya-Abrahama nguKhristu futsi incenye yesibili imelela emaKhristu lagcotjiwe langu-144 000. (Gal. 3:16, 29; Semb. 5:9, 10; 14:1, 4) Lomfati loveta lentalo ‘yiJerusalema lesetulu’—lokuluhlangotsi lolusezulwini lwenhlangano yaNkulunkulu, lolwakhiwa tidalwa temoya letetsembekile. (Gal. 4:26, 31) Njengobe kwetsenjisiwe, esivumelwaneni lesentiwa na-Abrahama, lentalo yemfati itawuletsa tibusiso kubantfu.
(Galathiya 4:28-31) Natsi-ke bazalwane, sesibantfwana besetsembiso njenga-Isaka. 29 Kodvwa njengobe ngaleso sikhatsi loyo labetelwe ngendlela yenyama acala kuphatsa kabi loyo labetelwe ngendlela yemoya, kunjalo nanyalo. 30 Itsini-ke imiBhalo? Itsi: “Cosha lesigcilakati nendvodzana yaso, ngobe indvodzana yalesigcilakati ngeke ibe yindlalifa kanye nendvodzana yemfati lokhululekile.” 31 Ngako-ke bazalwane, tsine asisibo bantfwana besigcilakati kodvwa sibantfwana bemfati lokhululekile.
Kufunisisa Umcebo EVini LaNkulunkulu
(Galathiya 4:6) Ngenca yekutsi seningemadvodzana, Nkulunkulu utfumele umoya weNdvodzana yakhe etinhlitiyweni tetfu, futsi lomoya umemeta utsi: “Abha, Babe!”
w09 4/1 13
Bewati Yini?
Yini leyenta Jesu watsi “Abha, Babe” ngesikhatsi athandaza kuJehova?
Leligama lesi-Aramu lelitsi ʼabhaʼʹ lingasho “babe” nobe “O Babe.” EmiBhalweni lemitsatfu lapho lamavi avela khona, akhombisa kutsi ayincenye yemthantazo futsi asentjetiswa nakukhulunywa naBabe losezulwini, Jehova. Yini lebaluleke kangaka ngalamavi?
I-International Standard Bible Encyclopedia itsi: ‘Ngesikhatsi saJesu, leligama lelitsi ‘abha’ belisentjetiswa bantfwana nabacoca nabobabe babo futsi ngendlela lehloniphekile.’ Bekuyindlela lenhle kakhulu yekubita bobabe babo futsi bekumagama lebebawafundza basebancane. Jesu wawasebentisa lamavi ngesikhatsi atfulula sifuba sakhe kuBabe wakhe. Nakasengadzeni yaseGetsemane, ngaphambi kwekufa kwakhe, Jesu wathantaza kuJehova watsi “Abha, Babe.”—Makho 14:36.
I-International Standard Bible Encyclopedia ichubeka itsi: ‘Kusebentisa ligama lelitsi ‘Abha’ nawukhuluma naNkulunkulu bekungakavami etincwadzini temaJuda ngetikhatsi temaGriki nemaRoma, ngesizatfu sekutsi bekungahle kutsiwe ute inhlonipho nawubita Nkulunkulu ngalendlela.’ Nanobe kunjalo, ngekutsi Jesu asebentise lamavi nakathantaza, bekubufakazi bekutsi usondzelene kakhulu naNkulunkulu. Kuleleminye imiBhalo lemibili leyabhalwa nguPawula lapho “Abha” avela khona, isitjengisa kutsi emaKhristu elikhulu lekucala bekalisebentisa leligama nakathantaza.—Roma 8:15; Galathiya 4:6.
(Galathiya 6:17) Kusukela nyalo akubete longihluphako, ngobe emtimbeni wami nginetimphawu tekuba sigcili saJesu.
Bewati Yini?
Umpostoli Pawula bekakhuluma ngani ngesikhatsi atsi “emtimbeni wami nginetimphawu tekuba sigcili saJesu.”?—Galathiya 6:17.
▪ Kungenteka emavi aPawula bekasho tintfo letinyenti kulabo labebamlalele ngelikhulu lekucala. Nasi sibonelo, endvulo bekusentjetiswa i-ayina leshisako kute babeke luphawu kubekisa tiboshwa tasemphini, lebebagcekeza emathempelini, kanye netigcili lebetibaleke kulamanye emave. Bantfu lababekwe luphawu ngalendlela bebangatsandzeki.
Nanobe kunjalo, kubekwa luphawu bekungasiyo intfo lembi ngaso sonkhe sikhatsi. Bantfu basendvulo bebasebentisa luphawu kute kubekiswe kutsi usive sini nobe uwakuyiphi inkholo. Nasi sibonelo, ngekusho kwe-Theological Dictionary of the New Testament, ‘emaSiriya bekakhombisa kutsi atinikele kubonkulunkulu Hadadi na-Atargatis ngekubeka luphawu esandleni nobe entsanyeni. . . Lobekangumlandzeli wa-Dionysus bekaba neluphawu lelicembe lesihlahla lesinabako (i-ivy leaf).’
Basakati balamuhla bacabanga kutsi Pawula bekakhuluma ngetibati latitfola ngetindlela letehlukahlukene ngenca yekuphatfwa kabi ngesikhatsi enta umsebenti webuvangeli. (2 Khorinte 11:23-27) Kungenteka kutsi Pawula bekakhulumela indlela lebekaphila ngayo lebeyikhombisa kutsi ungumKhristu, hhayi nje letibati letibonakalako.
Kufundvwa KweliBhayibheli
(Galathiya 4:1-20) Manje ngitsi nangabe indlalifa isengumntfwana isuke ifana nesigcili, ngisho nobe iyinkhosi yato tonkhe tintfo, 2 kodvwa ingephansi kwebacondzisi nebaphatsi kudzimate kufike lilanga lelabekwa nguyise. 3 Ngalokufanako, ngesikhatsi natsi sisebantfwana, besigcilatwa tintfo letitsatfwa njengaletibalulekile eveni. 4 Kodvwa kwatsi nakufika sikhatsi lesibekiwe, Nkulunkulu watfuma iNdvodzana yakhe leyatalwa ngumfati, nalebeyingephansi kwemtsetfo, 5 kuze ikhulule labo labangephansi kwemtsetfo ngekubatsenga, khona sitewuba ngemadvodzana. 6 Ngenca yekutsi seningemadvodzana, Nkulunkulu utfumele umoya weNdvodzana yakhe etinhlitiyweni tetfu, futsi lomoya umemeta utsi: “Abha, Babe!” 7 Ngako-ke wena awusesiso sigcili kodvwa sewuyindvodzana; futsi nangabe uyindvodzana, uphindze ube yindlalifa ngaNkulunkulu. 8 Nanobe kunjalo, ngesikhatsi nisengakamati Nkulunkulu benitigcili talabo lababonkulunkulu bemanga. 9 Kodvwa njengobe senimati Nkulunkulu, nobe njengobe senatiwa nguNkulunkulu, nibuyelelani etintfweni letitsatfwa njengaletibalulekile eveni, letibutsakatsaka naletingenamsebenti, nifune kuphindze nibe tigcili tato? 10 Niwagcina ngekucophelela emalanga, tinyanga, tikhatsi, kanye neminyaka. 11 Ngineluvalo ngani, kutsi kungenteka ngatikhandlela lite ngenca yenu. 12 Ngiyanincenga bazalwane, kutsi nibe njengami, ngobe nami ngake ngaba njengani. Kute leningone ngako. 13 Kodvwa niyati kutsi kugula enyameni ngiko lokwangivulela litfuba lekucala lekutsi ngimemetele tindzaba letimnandzi kini. 14 Nanobe kungaphili kwami bekuluvivinyo kini, anizange ningedzelele nobe nikhafule ngekwenyanya; kodvwa nangemukela njengengilosi yaNkulunkulu, nanjengaKhristu Jesu. 15 Seyishonephi lenjabulo lebeninayo? Ngobe nginebufakazi bekutsi kube bekungenteka, beningawakupuluta emehlo enu niwanike mine. 16 Kodvwa-ke sengisitsa senu yini ngesizatfu sekutsi nginitjela liciniso? 17 Labanye bantfu batimisele kunizuza, hhayi ngenjongo lenhle, kodvwa bafuna kunehlukanisa nami, kuze nitewufuna kubalandzela. 18 Nanobe kunjalo bantfwabami, kuhle kutsi lotsite atimisele kunizuza ngenjongo lenhle, hhayi nje kuphela nangikhona, 19 futsi sengiphindze ngifikelwa yimihelo ngenca yenu, kuyawudzimate kube ngulapho Khristu akheka kini. 20 Ngifisa shengatsi ngingaba nani khona nyalo futsi ngikhulume nani ngendlela leyehlukile, ngobe niyangicaka.
JUNE 10-16
UMCEBO LOSEVINI LANKULUNKULU | EFESU 1-3
“Luhlelo LwaJehova Kanye Nemisebenti Yalo”
(Efesu 1:8, 9) Wawenta waphuphuma kitsi ngako konkhe kuhlakanipha nekucondza, 9 ngekusenta sati imfihlo lengcwele yentsandvo yakhe. Loku kuvumelana naloko lokwemukelekako kuye, kutsi ahlose
it-2-E 837 ¶4
Imfihlo Lengcwele
Umbuso WaMesiya. Kuloko lokwabhalwa nguPawula, sembulelwa ngalokucacile imfihlo lengcwele yaKhristu. Ku-Efesu 1:9-11 Pawula ukhuluma ngaNkulunkulu kutsi wenta kwatiwe “imfihlo lengcwele” yentsandvo yakhe futsi utsi: “Loku kuvumelana naloko lokwemukelekako kuye, kutsi ahlose kucondzisa tintfo nasekufike tikhatsi letibekiwe, kuze aphindze abutsele ndzawonye tonkhe tintfo kuKhristu, lokutintfo letisezulwini netintfo letisemhlabeni. Nguye lesisebunyeni naye nalesabelwa kutsi sibe tindlalifa naye, ngobe sakhetfwa kusengaphambili ngekuvumelana nenjongo yaloyo lowenta tonkhe tintfo ngendlela lancume ngayo ngekwentsandvo yakhe.” ‘Lemfihlo lengcwele’ ifaka ekhatsi hulumende, uMbuso webuMesiya waNkulunkulu. ‘Tintfo letisezulwini’ Pawula lakhuluma ngato, ngulabo labatindlalifa teMbuso wasezulwini naKhristu. ‘Tintfo letisemhlabeni’ kutawuba ngulabo labatawube babuswa nguMbuso waMesiya. Jesu wachazela bafundzi bakhe kutsi lemfihlo lengcwele beyifaka ekhatsi lombuso nakatsi: “Nine ninikiwe kucondza imfihlo lengcwele yeMbuso waNkulunkulu.”—Mak. 4:11.
(Efesu 1:10) kucondzisa tintfo nasekufike tikhatsi letibekiwe, kuze aphindze abutsele ndzawonye tonkhe tintfo kuKhristu, lokutintfo letisezulwini netintfo letisemhlabeni. Nguye
‘Jehova Loyedvwa’ Ubutsela Ndzawonye Umndeni Wakhe
3 Naku Mosi lakutjela ema-Israyeli: “Simakadze Nkulunkulu wetfu nguye yedvwana longuSimakadze.” (Dut. 6:4) Tento taJehova kanye nenjongo yakhe kuyavumelana. Ngako-ke, “ngesikhatsi lesingiso” Nkulunkulu utawusebentisa ‘simiso’—lokuluhlelo lwekwenta tonkhe tidalwa takhe letihlakaniphile kutsi tibe nebunye. (Fundza Efesu 1:8-10, NW) Loluhlelo lutawusebenta ngetindlela letimbili. Yekucala itawulungisa libandla lalabagcotjiwe labanelitsemba lekuphila ezulwini naJesu Khristu njengeNhloko yalo. Loku kwacala ngeliPhentekhoste la-33 C.E. ngesikhatsi Jehova acala kubutsela ndzawonye labo labatawubusa naKhristu ezulwini. (Imis. 2:1-4) Njengobe emaKhristu lagcotjiwe kutsiwa alungile ngesizatfu senhlawulo yaKhristu, ayati kutsi ‘abantfwana baNkulunkulu.’—Rom. 3:23, 24; 5:1; 8:15-17.
4 Indlela yesibili ilungisa labo labatawuhlala emhlabeni loliPharadisi lotawubuswa nguMbuso waKhristu webuMesiya. Lelicembu lakhiwa “sicumbi lesikhulu.” (Semb. 7:9, 13-17; 21:1-5) Ngesikhatsi sekubusa kwaKhristu kweMinyaka leyiNkhulungwane, tigidzigidzi tebantfu labavusiwe titawuba yincenye yalelicembu. (Semb. 20:12, 13) Laba labavusiwe nabo batawuba nebunye njengatsi. Ngemuva kwekubusa kwaKhristu kweminyaka leyinkhulungwane, konkhe ‘lokusemhlabeni’ kutawuvivinywa. Labo labetsembekile batawuba ‘bantfwana baNkulunkulu’ labasemhlabeni.—Rom. 8:21; Semb. 20:7, 8.
Kufunisisa Umcebo EVini LaNkulunkulu
(Efesu 3:13) Ngako ngicela kutsi lokuhlupheka lengibhekana nako ngenca yenu kunganicedzi emandla, ngobe loku kusho kukhatinyuliswa kwenu.
Ungavumeli Lutfo Lukuvimbele Ekutfoleni Ludvumo
15 Kukhutsatela kwetfu ekwenteni intsandvo yaJehova kutawubasita labanye kutsi batfole ludvumo. Naku Pawula lakubhalela libandla lase-Efesu: “Ngiyanincenga kutsi ningadzinwa kuhlupheka kwami ngenca yenu, lokungukona kuludvumo lwenu.” (Ef. 3:13) Kuhlupheka kwaPawula kwaba njani ‘ludvumo’ kubase-Efesu? Kuchubeka kwaPawula akulungele kushumayela ngisho nobe abelingwa kwakhombisa base-Efesu kutsi emalungelo labebawajabulela njengobe bangemaKhristu abebaluleke kakhulu futsi aligugu. Kube Pawula wehluleka nakalingwa, bekungeke yini kubonakale shengatsi buhlobo babo naJehova, umsebenti wabo nelitsemba labanalo akukabaluleki kangako? Kukhutsatela kwaPawula kwakhombisa kutsi buKhristu bubalulekile nekutsi kufanele utinikele kute ube ngumfundzi.
(Efesu 3:19) nilwati nelutsandvo lwaKhristu lolulwendlula khashane lwati, khona nitewugcwaliswa ngako konkhe lokuphelele Nkulunkulu lasinika kona.
cl 299 ¶21
‘Nilwati Lutsandvo LwaKhristu’
21 Emavi esiGriki latsi “nilwati,” asho kwati ‘kwenta intfo letsite ngobe uke wayenta tikhatsi letinyenti’. Sitawube sikhombisa lutsandvo nasenta loko Jesu bekakwenta nekutsi siyayitsandza indlela bekativa ngayo nangabe singatigodli nasisita labanye, sibaniketa loko labakudzingako ngemusa, futsi sibacolela ngalokusuka enhlitiyweni. Ngendlela lefanako, ‘sitawulwati nelutsandvo lwaKhristu lolulwendlula khashane lwati.’ Futsi kufanele singakhohlwa kutsi sitawusondzela kakhulu kuJehova, Nkulunkulu wetfu lonelutsandvo, nasichubeka silingisa Khristu njengobe naye amlingisa.
Kufundvwa KweliBhayibheli
(Efesu 1:1-14) Mine Pawula, umphostoli waKhristu Jesu ngentsandvo yaNkulunkulu, ngibhalela labangcwele labase-Efesu, labetsembekile ebunyeni naKhristu Jesu: 2 Shengatsi ningaba nemusa nekuthula lokuvela kuNkulunkulu longuBabe wetfu, naseNkhosini lenguJesu Khristu. 3 Akabongwe Nkulunkulu longuYise weNkhosi yetfu Jesu Khristu, ngobe usibusise ngato tonkhe tibusiso letivela kuye ezulwini, tsine lesisebunyeni naKhristu, 4 ngobe wasikhetsa kutsi sibe munye naKhristu umhlaba usengakasekelwa, kuze ngelutsandvo sibe ngcwele futsi singasoleki embikwakhe. 5 Wasikhetsa kusengaphambili kutsi sentiwe emadvodzana akhe ngaJesu Khristu, ngekuvumelana naloko lokwemukelekako kuye nalokuyintsandvo yakhe, 6 khona kutewudvunyiswa umusa wakhe lokhatimulako lasibonisa wona ngekukhululeka asebentisa Lotsandzekako wakhe. 7 Ngaye, siyakhululwa ngenhlawulo leyentiwa ngengati yakhe, lokusho kutsetselelwa kwetiphambeko tetfu ngekuvumelana nebukhulu bemusa waNkulunkulu. 8 Wawenta waphuphuma kitsi ngako konkhe kuhlakanipha nekucondza, 9 ngekusenta sati imfihlo lengcwele yentsandvo yakhe. Loku kuvumelana naloko lokwemukelekako kuye, kutsi ahlose 10 kucondzisa tintfo nasekufike tikhatsi letibekiwe, kuze aphindze abutsele ndzawonye tonkhe tintfo kuKhristu, lokutintfo letisezulwini netintfo letisemhlabeni. Nguye 11 lesisebunyeni naye nalesabelwa kutsi sibe tindlalifa naye, ngobe sakhetfwa kusengaphambili ngekuvumelana nenjongo yaloyo lowenta tonkhe tintfo ngendlela lancume ngayo ngekwentsandvo yakhe, 12 kute tsine lesibe bekucala kwetsembela kuKhristu sisebentele kudvunyiswa nekukhatinyuliswa kwakhe. 13 Nani netsembela kuye nasenilivile livi leliciniso, lokutindzaba letimnandzi tensindziso yenu. Natsi kube nikholwe, nabekwa luphawu ngaye, ngemoya longcwele lowetsenjiswa, 14 losicinisekiso selifa letfu lesentiwa kusengaphambili, kuze ngenhlawulo kukhululwe loko lokukwaNkulunkulu, khona atewukhatinyuliswa aphindze advunyiswe.
JUNE 17-23
UMCEBO LOSEVINI LANKULUNKULU | EFESU 4-6
“Gcokani Tembatfo Temphi Letiphelele Letivela KuNkulunkulu”
(Ephesians 6:11-13) Gcokani tembatfo temphi letiphelele letivela kuNkulunkulu, kuze nitewukhona kumelana ngalokucinile nemachinga aDeveli; 12 ngobe siyalwa, kodvwa asilwi nengati nenyama, kepha silwa nabohulumende, nalabanemagunya, nebabusi balelive lebumnyama, kanye nemabutfo emimoya lemibi etindzaweni tasezulwini. 13 Ngaleso sizatfu, gcokani tembatfo temphi letiphelele letivela kuNkulunkulu, kuze nitewukhona kulwa ngelilanga lelibi, kutsi nasenicedze konkhe, nikwati kuma nicine.
Nine Labasha—Melanani NaDeveli
UMPHOSTOLI Pawula wafananisa emaKhristu nemasotja lasemphini. Asilwi nebantfu, kepha silwa naSathane nemadimoni akhe. Sebanetinkhulungwane teminyaka balwa nebantfu baNkulunkulu futsi sebanelikhono lekulwa. Kungabonakala singeke siphumelele nasilwa nabo ikakhulukati emaKhristu lasemasha. Bantfu labasha bangakhona yini kuncoba letidalwa temoya letinemandla? Ecinisweni bayakhona futsi bayaphumelela. Kungani? Kungobe ‘bachubeka batfola emandla eNkhosini.’ Kodvwa ngephandle nje kwekutfola emandla lavela kuNkulunkulu, kunalokunye labakwentako. Njengemasotja laceceshwe kahle, nabo bagcoke “tembatfo temphi letiphelele letivela kuNkulunkulu.”—Fundza Efesu 6:10-12.
(Efesu 6:14, 15) Ngako-ke manini nicine, liciniso liboshwe etinkhalo tenu njengelibhande, futsi nifake sivikelo sesifuba lesikulunga, 15 netinyawo tenu tigcokiswe kulungela kumemetela tindzaba letimnandzi tekuthula.
Nine Labasha—Melanani NaDeveli
4 Ngalokufanako, emaciniso lesiwafundza eVini laNkulunkulu ayasivikela etimfundzisweni temanga. (Joh. 8:31, 32; 1 Joh. 4:1) Nasiwatsandza emaciniso lesiwatfola eVini lakhe, kuba melula kuphila ngetimiso takhe lokufana nekugcoka “sivikelo sesifuba.” (Hla. 111:7, 8; 1 Joh. 5:3) Ngetulu kwaloko, nangabe siwacondza kahle emaciniso laseBhayibhelini, singakhona kuwamelela ngekuciniseka nabasiphikisa.—1 Phet. 3:15.
7 Timiso taJehova letilungile tifanana nesivikelo sesifuba ngoba tivikela tinhlitiyo tetfu. (Taga 4:23) Lisotja ngeke lishintjise sivikelo salo lesakhiwe ngensimbi lecinile kuze sitfole sivikelo sesifuba lesakhiwe ngensimbi lengakacini. Ngako natsi angeke singatinaki timiso taJehova letilungile kuze nje sente loko lesicabanga kutsi kulungile. Angeke sikhone kuvikela tinhlitiyo tetfu. (Taga 3:5, 6) Kungako kufanele sihlale sihlola kutsi “sivikelo sesifuba” sisetivikele yini tinhlitiyo tetfu.
10 Tincabule lebetigcokwa ngemasotja aseRoma betiwasita kutsi aphumelele emphini, ngendlela lefanako ticatfulo letingekwemfanekiso lesitigcokako tisisita kutsi ‘sishumayele tindzaba letimnandzi tekuthula.’ (Isa. 52:7; Rom. 10:15) Noma kunjalo, sidzinga sibindzi kuze sikhone kushumayela nakuvela litfuba. Bo, loneminyaka lengu-20 utsi: “Bengesaba kushumayela bantfwana lebengifundza nabo. Bengicabanga kutsi ngiyahlazeka. Kodvwa nyalo sengiyabona kutsi bengingahlazeki. Sengiyakujabulela kushumayela bontsanga yami.”
(Efesu 6:16, 17) Kuto tonkhe timo, tsatsani sihlangu lesikhulu sekukholwa, lenitawucima ngaso tonkhe tikhali letivutsako talomubi. 17 Tsatsani nesigcoko sekutivikela sensindziso, nenkemba yemoya, lokulivi laNkulunkulu,
Nine Labasha—Melanani NaDeveli
13 Lesinye ‘sikhali lesivutsako’ Sathane lasisebentisako, ngemanga latsi Jehova akakukhatsaleli futsi akakutsandzi. Ida, loneminyaka lengu-19 ulwisana nekutiva angasilutfo. Utsi: “Bengivame kuva ngatsi Jehova ukhashane nami futsi akafuni kuba ngumngani wami.” Yini layentako nakativa ngalendlela? Utsi: “Imihlangano ingisita kakhulu kutsi ngicinise kukholwa kwami. Esikhatsini lesendlulile bengingaphendvuli nangisemihlanganweni ngobe bengicabanga kutsi kute lofuna kuva loko lebengifuna kukusho. Kodvwa nyalo sengiyayilungiselela imihlangano futsi ngetama kuphendvula kabili noma katsatfu. Kona akusiko melula, kodvwa ngitiva ngincono nangikhonile kuphendvula. Bazalwane nabodzadze bangikhutsata kakhulu. Njalo nangibuya emihlanganweni ngiyaciniseka kutsi Jehova uyangitsandza.”
16 Njengobe sigcoko besivikela ingcondvo yelisotja, “litsemba lensindziso” lingavikela likhono letfu lekucabanga. (1 Thes. 5:8; Taga 3:21) Litsemba lisisita sihlale sinake loko Nkulunkulu lasetsembisa kona futsi tinkinga lesibhekana nato tingasicedzi emandla. (Hla. 27:1, 14; Imis. 24:15) Nangabe sifuna ‘sigcoko’ setfu sisivikele, kufanele sisigcoke, singasiphatsi ngesandla.
20 Pawula wafananisa liVi laNkulunkulu nenkemba Jehova lasinikete yona. Kufanele sibe nelikhono lekuyisebentisa nasivikela tinkholelo tetfu noma nasilungisa indlela lesicabanga ngayo. (2 Khor. 10:4, 5; 2 Thim. 2:15) Singawatfutfukisa njani emakhono etfu ekusebentisa liVi laNkulunkulu? Sebastian loneminyaka lengu-21 utsi: “Njalo nangifundza sehluko lesitsite seliBhayibheli ngibhala phasi livesi lelilodvwa. Ngibese ngakha luhla lwemavesi lengiwatsandzako. Loko kungenta ngiyicondze kancono indlela Jehova lacabanga ngayo.” Daniel lesicoce ngaye utsi: “Nangifundza liBhayibheli ngikhetsa emavesi lengicabanga kutsi atawusita bantfu lengibatfola nangishumayela. Ngitfole kutsi bantfu labanyenti bayalalela nangabe babona kutsi ngiyakukholelwa lokushiwo liBhayibheli futsi ngitimisele.”
Kufunisisa Umcebo EVini LaNkulunkulu
(Efesu 4:30) Futsi ningawudzabukisi umoya longcwele waNkulunkulu, loyo lenabekwa ngawo luphawu nilungiselelwa lilanga lekukhululwa ngenhlawulo.
it-1-E 1128 ¶3
Bungcwele
Umoya longcwele. Ngemandla aJehova lasebentako, nobe umoya longcwele, locondziswa nguye futsi lohlale afeza tinjongo takhe. Uhlantekile, umsulwa, ungcwele, futsi uhlelwe kutsi wente imisebenti lemihle yaNkulunkulu. Kungako kutsiwa ‘ngumoya longcwele’ kuphindze kutsiwe “ngemandla emoya longcwele.” (Hla. 51:11; Luk. 11:13; Rom. 1:4; Ef. 1:13) Umoya longcwele losebenta kumuntfu ngemadla langcwele nobe lahlantekile. Noma ngukuphi lokungakahlanteki nobe tento letingcolile, tenta umuntfu akhweshe nobe ‘adzabukise’ umoya loyingcwele. (Ef. 4:30) Nanobe ungasiwo umuntfu, lomoya longcwele uveta buntfu lobungcwele baNkulunkulu futsi kungako lotsite ‘angawudzabukisa.’ Tento letimbi tingenta kutsi ‘ucime umlilo wemoya.’ (1 Thes. 5:19) Nangabe tento letinjalo tichubeka, tingenta kutsi umoya longcwele waNkulunkulu ‘udzabuke,’ futsi loko kungabangela kutsi Nkulunkulu abe sitsa salabo labawuvukelako. (Isa. 63:10) Umuntfu lodzabukisa umoya longcwele angahle afike esigabeni sekutsi awuhlambalate, lokusono Jesu Khristu latsi ngeke sitsetselelwe kulesikhatsi sanyalo ngisho nakuleso lesitako.—Mat. 12:31, 32; Mak. 3:28-30.
(Efesu 5:5) Ngobe niyakwati loku, futsi niyabona kutsi kute sidlundlulu, umuntfu longcolile, nobe lobukhali—lokusho kukhonta titfombe—lonelifa eMbusweni waKhristu newaNkulunkulu.
it-1-E 1006 ¶2
Bukhali
Bubonakala Ngetento. Bukhali bubonakala melula kangangekutsi bungenta umuntfu akhombise sifiso sakhe lesibi ngendlela lecakile. Umbhali weliBhayibheli Jakobe usitjela kutsi sifiso nasesakhekile siveta sono. (Jas 1:14, 15) Ngako, umuntfu lobukhali angabonakala ngetento takhe. Umphostoli Pawula watsi kuba ngumuntfu lobukhali kusho kukhonta tintfombe. (Ef. 5:5) Umuntfu lonjalo wenta kutsi intfo layifisako ibe ngunkulunkulu wakhe, futsi ukwenta kube ngetulu kweminikelo nekukhonta loyo lowadala konkhe.—Rom. 1:24, 25
Kufundvwa KweliBhayibheli
(Ef. 4:17-32) Ngako-ke loku ngiyakusho futsi ngiyakufakazela eNkhosini, kutsi kufanele ningasahambi ngendlela tive letihamba ngayo ekubeni bete kwato ingcondvo. 18 Tingcondvo tabo tisebumnyameni, futsi bakhashane nekuphila kwaNkulunkulu ngenca yekungati kwabo nangekuba butfuntfu kwetinhlitiyo tabo. 19 Abasadliwa ngunembeza, futsi sebatinikele ekutiphatseni lokubi kwekweyisa kuze bente yonkhe inhlobo yekungcola ngebukhali. 20 Kodvwa nine anizange nifundze kutsi Khristu unjena, 21 nangabe-ke namuva futsi nafundziswa nguye, njengobe liciniso likuJesu. 22 Ngako-ke kufanele nilahle buntfu lobudzala lobuvumelana nendlela lebenitiphatsa ngayo, naloboniwa tifiso letikhohlisako. 23 Kodvwa kufanele nichubeke nentiwe nibe basha emandleni enu ekucabanga, 24 nigcoke buntfu lobusha lobentiwa ngekuvumelana nentsandvo yaNkulunkulu ngekulunga nangebucotfo lobungibo. 25 Njengobe seniwalahlile emanga, nguloyo naloyo akakhulume liciniso kumakhelwane wakhe, ngobe singemalunga alomunye nalomunye. 26 Tfukutselani kodvwa ningoni; ningavumi kutsi lilanga lishone nisetfukutsele, 27 ningamniki Develi litfuba. 28 Lowebako akangasebi, kodvwa akasebente kamatima, ente lokuhle ngetandla takhe, kuze atewuba nalokutsite langakuhlephulela loweswele. 29 Akungaphumi ligama lelibolile emlonyeni wenu, kodvwa akuphume loko lokulungele kwakha kuye ngesidzingo, kuze kuniketwe lokulusito kulabo labalalele. 30 Futsi ningawudzabukisi umoya longcwele waNkulunkulu, loyo lenabekwa ngawo luphawu nilungiselelwa lilanga lekukhululwa ngenhlawulo. 31 Lahlani tonkhe tinhlobo tenzondo, intfukutselo, lulaka, umsindvo, nenkhulumo lehlabako, kanye nako konkhe lokulimatako. 32 Kodvwa nibophatsana ngemusa, nibe nesihawu, nitsetselelane ngekukhululeka njengobe nje naNkulunkulu anitsetselela ngekukhululeka ngaKhristu.
JUNE 24-30
UMCEBO LOSEVINI LANKULUNKULU | FILIPHI 1-4
“Ningakhatsateki Ngalutfo”
(Filiphi 4:6) Ningakhatsateki ngalutfo, kodvwa kuko konkhe ticelo tenu atatiwe nguNkulunkulu ngekuthantaza, ngekuncusa nangekubonga;
“Kuthula KwaNkulunkulu Lokwendlula Konkhe Kucondza”
10 Yini lengasisita kutsi singakhatsateki ngalutfo kodvwa sichubeke ‘sinekuthula kwaNkulunkulu’? Emavi Pawula lawabhalela baseFiliphi akhombisa kutsi likhambi letinkinga tetfu, ngumthantazo. Ngako nasikhatsatekile, kufanele sitfululele tinkinga tetfu kuNkulunkulu ngemthantazo. (Fundza 1 Phetro 5:6, 7.) Thantaza kuJehova ngekukholwa, uciniseke kutsi uyakukhatsalela. Thantaza kuye “ngekubonga,” ukhumbula loko lakubusise ngako. Sitametsemba kakhulu nangabe sihlale sikhumbula kutsi uyakwati “kwenta lokukhulu kakhulu kunato tonkhe tintfo lesiticelako nobe lesiticabangako.”—Ef. 3:20.
(Filiphi 4:7) kuthula kwaNkulunkulu lokwendlula konkhe kucondza kutawulondza tinhlitiyo netingcondvo tenu ngaKhristu Jesu.
“Kuthula KwaNkulunkulu Lokwendlula Konkhe Kucondza”
7 Asingabati kutsi labazalwane baseFiliphi nabafundza lencwadzi lebeyibuya kuPawula, bakhumbula loko bekwenteke kuye, nekutsi kute lebekagadzile kutsi Jehova bekangabakhulula ngalendlela lenta ngayo. Pawula bekabafundzisa siphi sifundvo labazalwane? Bekabafundzisa kutsi bangakhatsateki. Bekatsi abathantaze kute batfole kuthula kwaNkulunkulu. Pawula bekafuna bacondze nekutsi “kuthula kwaNkulunkulu kwendlula konkhe kucondza.” Kusho kutsini loku? Labanye bahumushi bachaza lenkhulumo ngekutsi “lokwendlula onkhe emaphupho etfu” nobe “lokwendlula konkhe loko umuntfu lakuhlelako.” Ecinisweni, Pawula bekatsi “kuthula kwaNkulunkulu” kujabulisa kakhulu. Ngako-ke, ngendlela umuntfu lacabanga ngayo, kulukhuni kubona kutsi singaphunyuka njani etinkingeni lesibhekana nato kodvwa Jehova uyabona futsi angenta intfo lebesingakagadzi kutsi angayenta.—Fundza 2 Phetro 2:9.
“Kuthula KwaNkulunkulu Lokwendlula Konkhe Kucondza”
16 Uba yini umphumela wekwemukela “kuthula kwaNkulunkulu lokwendlula konkhe kucondza”? ImiBhalo isitjela kutsi ‘kuthula kwaNkulunkulu lokwendlula konkhe kucondza kutawulondza tinhlitiyo tetfu netingcondvo tetfu ngaKhristu Jesu.’ (Fil. 4:7) Ekucaleni leligama lelitsi “kulondza,” belisetjentiswa emasotjeni lagadzako. Belibhekisela ebutfweni lemasotja lahlomile lebekabelwe kugadza emadolobha latincaba asendvulo. Lidolobha laseFiliphi belinjalo. Bantfu baseFiliphi bebalala behle butfongo ngobe bebati kutsi emasotja lahlomile bekaligadzile lelidolobha. Ngendlela lefanako, nasinekuthula kwaNkulunkulu, tinhlitiyo netingcondvo tetfu tiba nekuthula. Siyati kutsi Jehova uyasikhatsalela futsi ufuna siphumelele. (1 Phet. 5:10) Kukwati loko kutasilondza kute singancotjwa tinkhatsato tekuphila nobe kudvumateka.
Kufunisisa Umcebo EVini LaNkulunkulu
(Filiphi 2:17) Kodvwa ngisho nobe ngingatfululwa njengemnikelo walokunatfwako emhlatjelweni nasemsebentini kukholwa kwenu lokuniholele kuwo, ngiyajabula futsi ngitfokota nani nonkhe.
it-2-E 528 ¶5
Iminikelo
Iminikelo yalokunatfwako. Iminikelo yalokunatfwako beyinikelwa cishe kanye nayo yonkhe leleminye iminikelo, ikakhulu ngesikhatsi ema-Israyeli asangene eVeni Lesetsembiso. (Num. 15:2, 5, 8-10) Loku bekufaka ekhatsi liwayini (“sinatfo lesidzakanako”) futsi belitselwa elatini. (Num. 28:7, 14; catsanisa na-Eks. 30:9; Num. 15:10.) Umphostoli Pawula wabhalela emakhristu aseFilipi watsi: “ngisho nobe ngingatfululwa njengemnikelo walokunatfwako emhlatjelweni nasemsebentini kukholwa kwenu lokuniholele kuwo, ngiyajabula.” KulomBhalo, Pawula wasebentisa umfanekiso wemnikelo walokunatfwako, kute avete kutsi bekatinikela ekusiteni emaKhristu labekanye nawo. (Fil. 2:17) Ngaphambi kwekutsi afe, wabhalela Thimothi watsi: “sengivele ngitfululwa njengemnikelo walokunatfwako, kantsi nesikhatsi sekutsi ngikhululwe sesisedvute.”—2 Thim. 4:6.
(Filiphi 3:11) ngibone nekutsi ngingakhona yini kutfola kuvuswa kwekucala.
w07 1/1 26-27 ¶5
“Luvuko Lwekucala”—Selusedvute!
5 Ngemuva kwaloko, emalunga lagcotjiwe ‘a-Israyeli waNkulunkulu’ kufanele ahlangane neNkhosi Jesu Khristu ezulwin, lapho ‘batawuba nayo ngaso sonkhe sikhatsi.’ (Galathiya 6:16; 1 Thesalonika 4:17) Loku kutsiwa “kuvuswa kwekucala” nobe ‘luvuko lwekucala.’ (Filiphi 3:10, 11; Sembulo 20:6) Naseluphelile loluvuko, kutawube sekusikhatsi sekutsi kuvuswe tigidzi tebantfu kute titfole kuphila lokuphakadze emhlabeni loliPharadisi. Ngako, sonkhe siyalulangatelela ‘loluvuko lwekucala’ nobe ngabe sinelitsemba lekuphila emhlabaeni nobe ezulwini. Hlobo luni lweluvuko lolu? Lwenteka nini?
Kufundvwa KweliBhayibheli
(Filiphi 4:10-23) Ngijabula kakhulu eNkhosini ngekutsi nyalo seniyangikhatsalela futsi. Nanobe benicabanga ngami, benehluleka kungikhombisa loko. 11 Hhayi kutsi loku ngikusho ngenca yekutsi ngeswele, ngobe ngifundze kwenetiseka kunobe ngutiphi timo lengikuto. 12 Ngikwati kokubili kutsi kunjani kuba nalokuncane nekuba nalokunyenti. Kuto tonkhe tintfo nakuto tonkhe timo ngifundze imfihlo yekutsi kunjani kwesutsa nekulamba, kuba nalokunyenti nekuba bete lutfo. 13 Ngobe nginemandla kuto tonkhe tintfo ngenca yaloyo longipha emandla. 14 Nente kahle ngekuhlanganyela nami ekuhluphekeni kwami. 15 Ecinisweni, nine baseFiliphi nati kahle kutsi ngemuva kwekutsi nive tindzaba letimnandzi kwekucala, ngesikhatsi ngisuka eMasedoniya, kute libandla lelahlanganyela nami endzabeni yekupha nekwemukela ngaphandle kwenu; 16 ngobe ngisho nangesikhatsi ngiseThesalonika nangitfumelela lokutsite, hhayi kanye nje kuphela kodvwa kabili. 17 Akusiko kutsi ngifuna kuphiwa, kodvwa ngifuna titselo letandzisa inzuzo yenu. 18 Nanobe kunjalo, nginako konkhe lengikudzingako futsi kunyenti kakhulu. Ngenetisekile njengobe sengitfole loko lenikuphatsise Ephafrodithu, kungemakha lamnandzi, umhlatjelo lowemukelekako nalojabulisako kuNkulunkulu. 19 Ngetulu kwaloko, ngaKhristu Jesu, Nkulunkulu wami utawutenetisa ngalokugcwele tidzingo tenu ngebukhulu benkhatimulo yakhe. 20 Nkulunkulu longuBabe wetfu akadvunyiswe phakadze naphakadze. Amen. 21 Vuselani bonkhe labangcwele labamunye naKhristu Jesu. Bazalwane labakanye nami nabo bayanivusela. 22 Bonkhe labangcwele, ikakhulukati labo labangephansi kwendlu yaKhesari nabo bayanivusela. 23 Shengatsi umusa weNkhosi Jesu Khristu ungaba nemoya leniwubonisako.