Tikhombo Tencwajana Yekubhalela Emhlanganweni Wekuphila KwemaKhristu Nemsebenti Wawo
JULY 1-7
UMCEBO LOSEVINI LANKULUNKULU | KHOLOSE 1-4
“Khumulani Lobudzala, Nigcoke Lobusha”
(Kholose 3:5-9) Bulalani emalunga emitimba yenu asemhlabeni, ekwenteni budlundlulu, kungcola, inkhanuko, sifiso lesibi, kanye nebukhali, lokukukhonta titfombe. 6 Lulaka lwaNkulunkulu lutawufika ngenca yetintfo letinjalo. 7 Nani benitiphatsa kanjalo endleleni lebeniphila ngayo ekucaleni. 8 Kodvwa nyalo kufanele nikulahle konkhe loku: lulaka, intfukutselo, bubi, kuhlambalata, nenkhulumo leyenyanyekako emilonyeni yenu. 9 Ningakhulumi emanga kulomunye nalomunye. Khumulani buntfu lobudzala kanye nemikhuba yabo,
Yemukela Umoya WaNkulunkulu, Hhayi Welive
12 Buntfu bami buveta kutsi ngilawulwa ngumuphi umoya? (Fundza Kholose 3:8-10, 13.) Umoya welive ukhutsata imisebenti yenyama. (Gal. 5:19-21) Sikhatsi lapho sivivinyeka khona kutsi ngumuphi umoya losilawulako, kulapho tintfo tingahambi kahle khona, hhayi nangabe tihamba kahle, njengalapho umzalwane nobe dzadze angasinaki, asiphatsa kabi, nobe asona. Ngetulu kwaloko, nasisodvwa emakhaya etfu, kungase kubonakale kahle kutsi ngumuphi umoya losilawulako. Kubalulekile kutsi sitihlole. Tibute: ‘Kuletinyanga letisitfupha letengcile, buntfu bami sebufanana nebaKhristu yini, nobe sengibuyele emikhubeni yami lemibi yekukhuluma neyekutiphatsa?’
13 Umoya waNkulunkulu ungasisita ‘sikhumule buntfu lobudzala nesimilo sakucala,’ bese sembatsa ‘buntfu lobusha.’ Kwenta kanjalo kutawusisita sibe nelutsandvo kanye nemusa lomkhulu. Sitawutimisela kutsetselelana ngekukhululeka, ngisho nalapho sinesizatfu lesivakalako sekukhonona. Nangabe soniwe, angeke sisasabela ngelivi ‘lelibabako, lelulaka, lekutfukutsela, lemsindvo, nelekuhlambalata.’ Kunaloko, sitawutimisela kutsi sibe ‘ngulabahawukelanako.’—Ef. 4:31, 32.
(Kholose 3:10-14) nigcoke buntfu lobusha, lokutsi ngelwati lolungulonalona bentiwe bube busha ngekwemfanekiso waLoyo lowabudala. 11 Akekho umGriki nobe umJuda, kusoka nome kungasoki, umuntfu wetive, umSikithi, sigcili, nome umuntfu lokhululekile, kodvwa Khristu ungito tonkhe tintfo, futsi ukubo bonkhe. 12 Ngako-ke njengalabakhetsiwe baNkulunkulu, labangcwele nalabatsandzekako, gcokani luvelo, umusa, kutfobeka, umoya lophansi, nekubeketela. 13 Chubekani nibeketelelana futsi nitsetselelana ngekukhululeka ngisho nobe umuntfu anesizatfu sekukhonona ngalomunye. Njengobe Jehova anitsetselele ngekukhululeka, nani yentani kanjalo. 14 Kodvwa ngetulu kwato tonkhe letintfo, gcokani lutsandvo ngobe lusibopho lesiphelele sebunye.
Seniguculiwe Yini?
18 Kute liVi laNkulunkulu lisigucule ngendlela lefanele, kulifundza njalo kumane nje kusicalo. Bantfu labanyenti balifundza njalo liBhayibheli, ngenca yaloko sebetayelene naloko lelikushoko. Mhlawumbe uke wahlangana nebantfu labanjalo emsebentini wekushumayela. Labanye babo bayakwati kutisho ngenhloko letinye tindzaba letiseBhayibhelini. Nome kunjalo, loko kungahle kube nemtselela lomncane endleleni labacabanga ngayo nasendleleni labaphila ngayo. Yini leshodako? Kute liVi laNkulunkulu ligucule umuntfu liphindze limlawule ekwenteni tintfo, kufanele alivumele lingene ekujuleni kwenhlitiyo yakhe. Ngako-ke, sidzinga kutinika sikhatsi sicabange ngaloko lesikufandzako. Kungaba kuhle kutibuta kutsi: ‘Ngiyaciniseka yini kutsi loku kungetulu kwetimfundziso nje tenkholo? Ngibonile yini kutsi kuliciniso? Ngiyatibona yini tindlela lengingakusebentisa ngato ekuphileni kwami loko lengikufundzako ngingakutsatsi njengentfo lengingamane nje ngifundzise labanye ngayo? Ngiva shengatsi Jehova ukhuluma nami matfupha yini?’ Kucabanga nekuzindla ngemibuto lefana nalena kungasisita kutsi sijulise indlela lesitiva ngayo ngaJehova etinhlitiyweni tetfu. Lutsandvo lwetfu ngaye lutawukhula. Nangabe inhlitiyo yetfu itsintseka, sitawenta tingucuko ekuphileni kwetfu.—Taga 4:23; Luk. 6:45.
19 Kulifundza njalo liVi laNkulunkulu nekuzindla ngalo kutasikhutsata kutsi sichubeke senta loko lesesivele sikwentile: ‘Sikhumule umuntfu lomdzala kanye nemikhuba yakhe. Sembatse umuntfu lomusha, kuze sihlale sakhiwa kabusha.’ (Khol. 3:9, 10) Singachubeka sitfutfuka njengobe silicondza liVi laNkulunkulu futsi lisebenta kitsi. Umphumela webuntfu lobusha bebuKhristu utasisita ngekusivikela kuSathane nemachinga akhe.
Kufunisisa Umcebo EVini LaNkulunkulu
(Kholose 1:13, 14) Wasikhulula emandleni ebumnyama, futsi wasendlulisela eMbusweni weNdvodzana yakhe layitsandzako, 14 lesitfole ngayo kukhululwa ngenhlawulo, lokukutsetselelwa kwetono tetfu.
it-2 169 ¶3-5
Umbuso WaNkulunkulu
‘UMbuso WeNdvodzana Yakhe Layitsandzako.’ NgeliPhentekhoste la-33 C.E.,ngemuva kwemalanga lalishumi Jesu anyukele ezulwini, balandzeli bakhe besebanebufakazi bekutsi ‘uphakanyiselwe ngesekudla saNkulunkulu’ ngesikhatsi batfola umoya loyingcwele kuJesu. (Imis. 1:8, 9; 2:1-4, 29-33) “Sivumelwane lesisha” besesivele sicalile kusebenta kubo, futsi baba yincenye yekucala ‘yesive lesingcwele,’ Israyeli waNkulunkulu.—Heb. 12:22-24; 1 Phet. 2:9, 10; Gal. 6:16.
Jesu bekahleti ngesekudla saBabe wakhe futsi besekayiNhloko yalelibandla. (Ef. 5:23; Heb. 1:3; Fil. 2:9-11) ImiBhalo ikhombisa kutsi kusukela ngeliPhentekhoste la-33 C.E. kuchubeke, baphostoli baba licembu lekucala ekwakhiweni kwembuso wasezulwini. Ngesikhatsi umphostoli Pawula abhalela emaKhristu aseKholose, bekakhuluma ngaJesu Khristu njengalobekasavele abusa nakatsi: “Wasikhulula emandleni ebumnyama, futsi wasendlulisela eMbusweni weNdvodzana yakhe layitsandzako.”—Khol. 1:13; catsanisa na-Imis. 17:6, 7.
Kusukela nga-33 C.E. kuchubeke, umbuso waKhristu bewusolo ubusa Israyeli waNkulunkulu ngemoya longcwele, lokungemaKhristu lakhetfwa ngemoya waNkulunkulu kute babe bantfwana bakhe labagcotjiwe. (Joh. 3:3, 5, 6) EmaKristu lagcotjwe ngemoya nakatfola umvuzo wawo wasezulwini, angeke asaba bantfu basemhlabeni labatawube babuswa ngumbuso wasezulwini, kodvwa batawuba ngemakhosi kanye naKhristu ezulwini.—Semb. 5:9, 10
(Kholose 2:8) Cinisekani kutsi kubete umuntfu lonitfumba ngekuhlakanipha kwebantfu, nekuyenga lokulite ngemasiko ebantfu, ngetintfo letitsatfwa njengaletibalulekile eveni kodvwa hhayi kuKhristu;
w08 ZU 8/15 28 ¶9
Emaphuzu Lagcamile Etincwadzi Lebetiya eGalathiya, e-Efesu, eFiliphu, Kanye NaseKholose
2:8 Ngutiphi ‘tintfo letitsatfwa njengaletibalulekile eveni’ Pawula lasecwayisa ngato? Leti tintfo letiseveni lelibuswa nguSathane—kungaba tintfo umuntfu lanato letikhutsatwako eveni nobe tinfo letisekelwa ngulelive. (1 Johane 2:16) Loku kufaka ekhatsi timfundziso tebantfu, kutsandza umcebo, kanye netinkholo temanga letiseveni.
Kufundvwa KweliBhayibheli
(Kholose 1:1-20) Mine Pawula, umphostoli waKhristu Jesu ngentsandvo yaNkulunkulu, ngikanye naThimothi umzalwane wetfu, 2 ngibhalela labangcwele nebazalwane labetsembekile baseKholose labamunye naKhristu: Shengatsi ningaba nemusa nekuthula lokuvela kuNkulunkulu longuBabe wetfu. 3 Nasinithantazela, sihlale simbonga Nkulunkulu longuYise weNkhosi yetfu Jesu Khristu, 4 ngobe seva ngekukholwa kwenu kuKhristu Jesu nangelutsandvo leninalo ngabo bonkhe labangcwele, 5 ngenca yelitsemba lenibekelwe lona ezulwini. Esikhatsini lesendlulile, neva ngalelitsemba ngemlayeto weliciniso letindzaba letimnandzi 6 letefika kini. Njengobe nje tindzaba letimnandzi titsela titselo futsi tandza emhlabeni wonkhe, kunjalo nakini, kusukela ngelilanga leneva futsi nawati kahle ngalo umusa waNkulunkulu ngeliciniso. 7 Nguloko lenikufundze ku-Ephafrasi, losigcili lesitsandzekako lesikanye natsi, nesisebenti saKhristu lesetsembekile lesisimelele. 8 Wasitjela nangelutsandvo leninalo loluvetwa ngumoya. 9 Kungaleso sizatfu kusukela ngelilanga lesakuva ngalo loku, singayekelanga kunithantazela nekucela kutsi nigcwale lwati lwentsandvo yaNkulunkulu lolungulonalona, ngako konkhe kuhlakanipha nekucondza lokuvela kuye, 10 kuze nihambe ngendlela lefanele embikwaJehova, khona nitewumjabulisa ngalokuphelele njengobe nichubeka nitsela titselo kuyo yonkhe imisebenti lemihle, futsi nikhula elwatini lolungulonalona ngaNkulunkulu. 11 Shengatsi ningaciniswa ngawo onkhe emandla ngebukhulu benkhatimulo yakhe, kuze nicinisele ngalokuphelele ngekubeketela nenjabulo, 12 njengobe nibonga Babe lonente nakufanela kuhlanganyela efeni lalabangcwele labasekukhanyeni. 13 Wasikhulula emandleni ebumnyama, futsi wasendlulisela eMbusweni weNdvodzana yakhe layitsandzako, 14 lesitfole ngayo kukhululwa ngenhlawulo, lokukutsetselelwa kwetono tetfu. 15 Yona ingumfanekiso waNkulunkulu longabonakali, litibulo layo yonkhe indalo; 16 ngobe tonkhe letinye tintfo tadalwa ngayo ezulwini nasemhlabeni, tintfo letibonakalako naletingabonakali, kungaba tihlalo tebukhosi, emandla ekubusa, bohulumende nome tiphatsimandla. Tonkhe letinye tintfo tadalwa ngayo futsi tadalelwa yona. 17 Yona yekucala kuto tonkhe letinye tintfo, futsi tonkhe taba khona ngayo, 18 iyinhloko yemtimba, lokulibandla. Isicalo, yekucala kuvuswa kulabafile, kuze ibe yekucala kuto tonkhe tintfo; 19 ngobe Nkulunkulu wakujabulela kutsi tonkhe tintfo tibe kuyo ngalokuphelele, 20 nekutsi ngayo ente tonkhe letinye tintfo tibuyisane naye ngekwenta kuthula ngengati yayo leyacitseka elugodvweni, kungaba tintfo letisemhlabeni nobe letisezulwini.
JULY 8-14
UMCEBO LOSEVINI LANKULUNKULU | 1 THESALONIKA 1-5
“Chubekani Nikhutsatana Futsi Nakhana”
(1 Thesalonika 5:11-13) Ngako chubekani nikhutsatana futsi nakhana, njengobe nje nenta.12 Siyanincenga bazalwane kutsi nibahloniphe labo labasebenta kamatima emkhatsini wenu, labanengamele eNkhosini, futsi labaniyalako; 13 niphindze nibacabangele kakhulu ngelutsandvo ngenca yemsebenti labawentako. Banini nekuthula kulomunye nalomunye.
“Hloniphani Labo Labasebenta Kamatima Emkhatsini Wenu”
12 ‘Kwengamela’ libandla kusho lokungetulu kwekumane nje ufundzise. Emavi lafananako asetjentisiwe naku-1 Thimothi 3:4. Pawula watsi umbonisi kufanele abe “[ngulowengamele] kahle umuti wakhe, afundzise ngekuhlonipheka konkhe kutsi bantfwabakhe batfobeke.” Lamavi latsi ‘kwengamela’ awasho kufundzisa bantfwana nje kuphela, kodvwa asho nekuhola emndenini kanye nekwenta ‘bantfwana kutsi batfobeke.’ Labadzala bahola libandla, futsi basita bonkhe ebandleni kutsi batitfobe kuJehova.—1 Thim. 3:5.
“Hloniphani Labo Labasebenta Kamatima Emkhatsini Wenu”
19 Yini lobewungayenta kube bewungatfola sipho lesentelwe wena ngalokukhetsekile? Bewungakuveta yini kubonga kwakho ngekutsi usisebentise? Asebentisa Jesu Khristu, Jehova ukuphe ‘tipho letibantfu.’ Lenye indlela longaveta ngayo kubonga ngalesipho, kulalelisisa tinkhulumo letetfulwa ngulabadzala bese wetama kukusebentisa loko labakushoko. Ungaphindze uvete kubonga kwakho ngekuphendvula ngendlela lezuzisako emihlanganweni. Sekela yonkhe imisebenti labadzala belibandla labasihola kuyo, lefaka ekhatsi umsebenti wekushumayela. Nangabe sikuzuzisile siyalo lositfole kulomunye walabadzala, kungani ungamtjeli? Ngetulu kwaloko, kungani ungayibongi imindeni yalabadzala belibandla? Khumbula kutsi kute lona lomdzala akwati kusebenta kamatima ebandleni, umndeni wakhe udzela sikhatsi lokufanele usicitse naye.
(1 Thesalonika 5:14) Ngakulokunye, siyanincenga bazalwane, kutsi nibecwayise labo labangalaleli, nikhulume ngendlela ledvudvutako nalabacindzetelekile, nisekele lababutsakatsaka, futsi nibeketelele bonkhe bantfu.
“Tsandza . . . Ngetento Nangeliciniso”
13 Sekela labo lababutsakatsaka. Umyalo loseBhayibhelini lotsi kufanele “nisekele lababutsakatsaka, futsi nibeketelele bonkhe bantfu” ungaluvivinya lutsandvo lwetfu. (1 Thes. 5:14) Ngisho noma labanye labebabutsakatsaka sebacinile ekukholweni, labanye badzinga kutsi sibabeketelele futsi sichubeke sibasekela. Loku singakwenta ngekutsi sibacocele tintfo letakhako letiseBhayibhelini, sibacele kutsi basebente natsi ensimini, noma sitinike sikhatsi sekubalalela. Ngetulu kwaloko, kunekutsi sicabange kutsi umzalwane noma dzadze “ucinile” ekukholweni noma “ubutsakatsaka,” kufanele sikhumbule kutsi sonkhe sinabo butsakatsaka. Ngisho nemphostoli Pawula wawavuma emaphutsa akhe. (2 Khor. 12:9, 10) Kungako sonkhe singazuza ekusekelweni bazalwane betfu.
Lingisa Jesu Ngekutfobeka Kwakhe Nangemusa Wakhe
16 Emavi etfu lanemusa. Kuba nemusa kutawenta kutsi ‘sikhulume ngendlela ledvudvutako nalabacindzetelekile.’ (1 Thes. 5:14) Yini lesingayisho kute sibadvudvute? Singabatjela kutsi sibakhatsalela mbamba. Singabancoma futsi sibasite babone buntfu babo lobuhle nemakhono labanawo. Singabakhumbuta kutsi Jehova wabasita kutsi bati liciniso, ngako baligugu kuye. (Johane 6:44) Singabacinisekisa kutsi Jehova utikhatsalela mbamba tinceku takhe ‘letinetinhlitiyo letephukile’ nobe ‘letinemoya lowephukile.’ (Hla. 34:18) Emavi etfu lanemusa angabakhutsata kakhulu labo labadzinga indvudvuto.—Tag 16:24.
Kufunisisa Umcebo EVini LaNkulunkulu
(1 Thesalonika 4:3-6) Nkulunkulu ufuna kutsi nibe ngcwele futsi nibubalekele budlundlulu. 4 Ngamunye wenu kufanele akwati kulawula umtimba wakhe ngebungcwele nangeludvumo, 5 hhayi ngekuba nenkhanuko lenemandla njengetive letingamati Nkulunkulu. 6 Kute lokufanele one nobe emuke umzalwane wakhe emalungelo lanawo kulendzaba, ngobe Jehova nguye lokhipha sijeziso kuto tonkhe letintfo njengobe nje sanitjela futsi saninika nebufakazi lobuphelele.
it-1 863-864
Kutiphatsa Kabi Ngekwelicansi
Kutiphatsa kabi ngekwelicansi licala lelingenta kutsi umuntfu acoshwe (nobe asuswe) ebandleni lebuKhristu. (1Khor. 5:9-13; Heb. 12:15, 16) Umphostoli wachaza kutsi umKhristu lotiphatsa kabi ngekwelicansi wona wakhe umtimba, asebentisa emalunga emtimba kufeza tifiso letimbi. Loku kubulimata kakhulu buhlobo bakhe naNkulunkulu, kungcolisa libandla lakhe, futsi kungavula nematfuba ekutsi atfole tifo letiyingoti letitsatselwana ngekuya ecasini. (1Khor. 6:18, 19) Umuntfu lowenta njalo usuke emuka bazalwane bakhe emalungelo labanawo (1Thes. 4:3-7) (1) ngekungcolisa futsi ahlazise libandla (Heb. 12:15, 16), (2) ngekwemuka loyo latiphatse kabi naye ngekwelicansi kutiphatsa lokuhle nekutsi angene emshadweni ahlantekile nangabe loyo muntfu bekangakashadi, (3) ngekona umlandvo lomuhle wekutiphatsa emndenini wakubo, kanye (4) nekona batali baloyo latiphatse kabi naye ngekwelicansi, loyo latsandzana naye, nobe indvondza yaloyo latiphetse kabi naye ngekwelicansi. Loyo muntfu lowedzelelako akedzeleli nje bantfu labanemitsetfo lengahle ikuvumele nobe ingakuvumeli kutiphatsa kabi ngekwelicansi kodvwa wedzelela Nkulunkulu, lotamjezisa ngesono lasentile.—1Thes. 4:8.
(1 Thesalonika 4:15-17) Naku lesinitjela kona ngelivi laJehova, kutsi tsine lesitawube sisaphila ngesikhatsi sekuba khona kweNkhosi, ngeke sibendvulele labo lesebafile; 16 ngobe iNkhosi itawukwehla ivela ezulwini ikhipha ticondziso ngelivi lengilosi lenkhulu nangelicilongo laNkulunkulu, futsi labo labafe basebunyeni naKhristu batawuvuka kucala. 17 Ngemuva kwaloko, tsine lesiphilako sitawutsatfwa ngelifu kanye nabo kuze sihlangane neNkhosi emoyeni; bese siba nayo ngaso sonkhe sikhatsi.
“Kusindziswa Kwenu Sekusedvute”!
14 Kutawentekani ngemuva kwekutsi Gogi wakaMagogi acale kuhlasela bantfu baNkulunkulu? LiBhayibheli litsi iNdvodzana yemuntfu “iyawutfumela tingilosi tayo tiphume, futsi tigcogcele ndzawonye labo labakhetsiwe, emagumbini omane emhlaba; kusukela emhlabeni kuze kube sezulwini.” (Mak. 13:27; Mat. 24:31) Lomsebenti wekugcogcela ndzawonye awusho sikhatsi emaKhristu lagcotjiwe lacala kukhetfwa ngaso. Awusho nesikhatsi sekubekwa luphawu lwekugcina kulabagcotjiwe labasesemhlabeni. (Mat. 13:37, 38) Lokubekwa luphawu kutawenteka ngaphambi nje kwekucala kwekuhlupheka lokukhulu. (Semb. 7:1-4) Ngako-ke, uyini lomsebenti wekugcogcela ndzawonye? Usikhatsi lapho labagcotjiwe labasesemhlabeni labatawutfola ngaso umvuzo wabo futsi baye ezulwini. (1 Thes. 4:15-17; Semb. 14:1) Loko kutawenteka cishe ngemuva kwekutsi Gogi wakaMagogi acale kuhlasela. (Hez. 38:11) Ngemuva kwaloko, kutawugcwaliseka emavi aJesu latsi “labalungile bayawukhanya njengelilanga eMbusweni weYise.”—Mat. 13:43.
15 Loko kusho kutsi labagcotjiwe “batawuhlwitfwa” yini? Bantfu labanyenti eTinkholweni Letitsi TebuKhristu bakholelwa kutsi emaKhristu atawutsatfwa ayiswe ezulwini anemitimba yenyama. Bacabanga nekutsi batambona ngemehlo Jesu nakabuya atewubusa lamhlabeni. Kodvwa liBhayibheli likhombisa ngalokucacile kutsi kubuya kwaJesu ngeke sikubone ngemehlo nalitsi: “Kuyawubonakala sibonakaliso seNdvodzana yemuntfu ezulwini” futsi Jesu utawuta ‘asemafini.’ (Mat. 24:30) LiBhayibheli liphindze litsi “inyama nengati ngeke kuwutfole uMbuso waNkulunkulu.” Ngako-ke labo labatawutsatfwa bayiswe ezulwini kufanele ‘baguculwe, ngekushesha nangekucwabita kweliso ngelicilongo lekugcina.’ (Fundza 1 Khorinte 15:50-53.) Asilisebentisi ligama lelitsi “kuhlwitfwa” nasichaza loko lokutawenteka, ngesizatfu sekutsi Tinkholo Letitsi TebuKhristu tilisebentisa kabi natifundzisa emanga. Ngako-ke, labagcotjiwe labasesemhlabeni batawugcogcelwa ndzawonye ngekushesha.
Kufundvwa KweliBhayibheli
(1 Thesalonika 3:1-13) Kwatsi lapho singasakhoni kubeketela, sakubona kukuhle kusala sodvwa e-Athene; 2 satfuma Thimothi umzalwane wetfu nenceku yaNkulunkulu yetindzaba letimnandzi taKhristu, kutsi anicinise futsi anidvudvute ekukholweni, 3 kuze kubete umuntfu lonyakatiswa nguletinhlupheko. Ngobe nani niyati kutsi ngeke sitibalekele. 4 Ngisho nangesikhatsi sisenani, besinitjela kutsi sitawuhlupheka, futsi nguloko vele lokwentekile njengobe nje nani nati. 5 Kungako ngesikhatsi ngingasakhoni kubeketela ngamtfuma kuze ngive ngekwetsembeka kwenu, ngobe kungenteka kutsi ngandlela tsite uMlingi abenilingile, futsi kutikhandla kwetfu kwaba lite. 6 Kodvwa Thimothi usandza kufika kitsi esuka kini, futsi usitjele tindzaba letimnandzi ngekwetsembeka nangelutsandvo lwenu, nekutsi nihlale nisikhumbula ngelutsandvo futsi nilangatelela kusibona njengobe natsi silangatelela kunibona. 7 Ngaleso sizatfu bazalwane, kuko konkhe kucindzeteleka nekuhlupheka kwetfu, sidvudvutekile ngenca yenu nangekwetsembeka kwenu. 8 Siyavuseleleka ngobe nime nicinile eNkhosini. 9 Yini lesingambonga ngayo Nkulunkulu ngenjabulo lenkhulu lesinayo embikwakhe ngenca yenu, 10 njengobe busuku nemini simncusa ngekutimisela kuze sinibone bese siyanisita lapho nisilela khona ekukholweni? 11 Shengatsi Nkulunkulu wetfu longuBabe akanye neNkhosi yetfu Jesu bangenta indlela yekutsi site kini. 12 Ngetulu kwaloko, shengatsi iNkhosi inganenta nikhule futsi niphuphume elutsandvweni leninalo kulomunye nalomunye nakubo bonkhe labanye, njengobe nje natsi senta kini; 13 kuze yente tinhlitiyo tenu ticine, ningasoleki futsi nibe ngcwele embikwaNkulunkulu wetfu longuBabe, ekubeni khona kweNkhosi yetfu Jesu ikanye nabo bonkhe labangcwele bayo.
JULY 15-21
UMCEBO LOSEVINI LANKULUNKULU | 2 THESALONIKA 1-3
‘Kwembulwa Kwemuntfu Lomubi’
(2 Thesalonika 2:6-8) Ngako nyalo seniyakwati loko lokumvimbile, lokutawumenta embulwe ngesikhatsi lesifanele. 7 Kuliciniso kutsi lobubi sebuvele busebenta ngendlela lefihlekile, kodvwa loku kutawukwenteka kudzimate kube ngulapho loyo lobuvimbile esuka endleleni. 8 Ngako-ke lomuntfu lomubi utakwembulwa futsi iNkhosi Jesu itamsusa ngemoya wemlomo wayo, imente lite ngekubonakala kwekuba khona kwayo.
it-1 972-973
Kutinikela KuNkulunkulu
Kunalokunye lokumangalisako lokwehluke kakhulu ‘emfihlweni lengcwele’ yaJehova. Loko ‘bubi lobusebenta ngendlela lefihlakele.’ Loku bekuyimfihlakalo kumaKhristu eliciniso ngesikhatsi saPawula ngobe ‘umuntfu lomubi’ bekasengakabonakali ngaleso sikhatsi. Ngisho nobe ngabe loyo ‘muntfu’ besakhona, timphawu takhe betitawuchubeka tifihlakele ebantfwini labanyenti ngobe bubi bakhe bekabenta ngetindlela letibhacile aphindze asebentise nekutinikela kuNkulunkulu. Ecinisweni, loko bekutawube kungesiko kutinikela kuNkulunkulu ngekweliciniso. Pawula watsi letento letifihlakele talomuntfu lomubi bese vele tibonakala ngesikhatsi sakhe ngobe tento takhe taba nelitfonya ebandleni lebuKhristu lokwabangela kutsi kube nalelicembu letihlubuki. Ekugcineni, Jesu Khristu utamsusa umuntfu lonjalo ekubonakalisweni kwekuba khona kwakhe. Lesihlubuki, lesingumuntfu locondziswa nguSathane sitatiphakamisa sibe ngetulu kwanobe ngumuphi ‘nkulunkulu’ noma lenye intfo lekhontwako (Gr., seʹba·sma). Kungako lomphikisi lomkhulu waNkulunkulu losebenta njengelithulusi laSathane atawuba ngumdukisi lomkhulu aphindze abaletsele kubhujiswa labo labenta imikhuba yakhe. Lomuntfu lomubi utawuphumelela ngobe lobubi bakhe ububhacise ekukhonteni Nkulunkulu kwekutentisa.—2 Thes. 2:3-12; catsanisa Mat. 7:15, 21-23.
(2 Thesalonika 2:9-12) Kodvwa lomuntfu lomubi ukhona ngenca yekuyenga kwaSathane ngayo yonkhe imisebenti yemandla, ngetibonakaliso netimangaliso letingemanga, 10 ngako konkhe kukhohlisa lokungakalungi kwalabo lababhubhako, nanjengesijeziso, ngobe abazange balwemukele lutsandvo lweliciniso kuze basindziswe. 11 Kungako-ke Nkulunkulu avumele kutsi siphambeko sibakhohlise kute bakholwe emanga, 12 futsi bonkhe behlulelwe ngobe abazange balikholwe liciniso, kodvwa bajatjuliswa kungalungi.
it-2 245 ¶7
Emanga
Jehova Nkulunkulu ‘uvumele siphambeko sekukhohlisa’ kutsi siye kubantfu labanconota emanga ‘kute bakholwe ngiwo’ kunekutsi bakholwe tindzaba letimnandzi ngaJesu Khristu. (2 Thes. 2:9-12) Lesimiso sabonakala kuloko lokwenteka emakhulwini eminyaka ngaphambili eNkhosini yaka-Israyeli, Ahabi. Baphrofethi labakhuluma emanga bacinisekisa iNkhosi Ahabi kutsi itawuphumelela uma ingalwa neRamothi Gileyadi, kantsi umphrofethi waJehova Mikhaya yena wabiketela inhlekelele. Njengoba Jehova aveta embonweni kuMikhaya, wavumela sidalwa semoya kutsi sibe “ngumoya wemanga” emilonyeni yebaphrofethi ba-Ahabi. Loko kusho kutsi lesidalwa semoya sasebentisa emandla aso kute bakhulume emanga hhayi liciniso mayelana naloko Ahabi bekafuna kukuva kubo. Nanobe bekacwayisiwe, Ahabi wanconota kuyengwa ngulamanga futsi loko kwaba nemphumela lobuhlungu.—1Khos. 22:1-38; 2Khr. 18.
Kufunisisa Umcebo EVini LaNkulunkulu
(2 Thesalonika 1:7, 8) Kodvwa nine lenihluphekako, Nkulunkulu utawuniletsela kuphumula kanye natsi ekwembulweni kweNkhosi Jesu ivela ezulwini, ikanye netingilosi tayo letinemandla 8 emlilweni lovutsa emalangabi, njengobe Nkulunkulu aletsa imphindziselo kulabo labangamati nakulabangatilaleli tindzaba letimnandzi letimayelana neNkhosi yetfu Jesu.
it-1 834 ¶5
Umlilo
Phetro wabhala kutsi “emazulu nemhlaba lokukhona nyalo kugcinelwe umlilo.” Ngalamavi kanye naleminye imiBhalo, kuyacaca kutsi bekangakhulumi ngemlilo mbamba, kepha bekafanekisa kubhujiswa kwaphakadze. Njengoba zamcolo wangesikhatsi saNowa ungazange ubhubhise emazulu kanye nemhlaba, kepha kwaba bantfu labangamhloniphi Nkulunkulu. Ngako, kwembulwa kwaJesu Khristu kanye netingelosi takhe emlilweni lovutsa emalangabi kutawubangela kubhujiswa kwaphakadze kuphela kulabo labangamesabi Nkulunkulu kanye nalesimiso lesibi saSathane.—2 Phet. 3:5-7, 10-13; 2 Thes. 1:6-10; catsanisa na-Isa. 66:15, 16, 22, 24.
(2 Thesalonika 2:2) ningasheshi niyekele kucabanga kahle nobe niphatanyiswe tintfo letitsi lilanga laJehova selifikile, kungaba yinkhulumo lephefumulelwe, ngumlayeto lokhulunywako nobe yincwadzi lebonakala shengatsi ivela kitsi.
it-1 1206 ¶4
Kuphefumulelwa
“Tinkhulumo Letiphefumulelwe”—Liciniso Nobe Ngemanga. Ligama lesiGriki lelitsi pneuʹma (umoya) lisetjentiswa ngendlela lekhetsekile emiBhalweni yebaphostoli. Nasi sibonelo, ku-2 Thesalonika 2:2, umphostoli Pawula wecwayisa bazalwane baseThesalonika kutsi bangasheshi badvungeke etingcondvweni nobe baphatanyiswe ‘tintfo letitsi lilanga laJehova selifikile, kungaba yinkhulumo lephefumulelwe [“umoya”], umlayeto lokhulunywako nobe incwadzi lebonakala shengatsi ivela kitsi.’ Kuyacaca kutsi Pawula usebentisa leligama pneuʹma (umoya) kute achaze indlela lokukhulunywa ngayo lefaka ekhatsi ‘umlayeto lokhulunywako’ nobe ‘incwadzi.’ Kungako i-Lange’s Commentary on the Holy Scriptures (likh. 126) itsi: “Ngaloku, Umphostoli bekakhulumela intfo lekhulunywe ngumoya, lokubiketelwe, nobe lokumenyetwelwe baphrofethi.” (Ihunyushwe futsi yalungiswa ngu-Schaff, nga-1976) I-Word Studies in the New Testament ya-Vincent yona itsi: “Ngemoya. Ngebantfu labakhuluma tiphrofetho emihlanganweni yemaKhristu, labatsi banemandla ekwembulelwa nguNkulunkulu.” (1957, Umculo IV, likha. 63) Nanobe leminye imiBhalo ivele ilivete ‘njengemoya’ ligama pneuʹma, leminye imibhalo ivele itsi “umlayeto wemoya” (ku-AT), “kubiketela” (ku-JB), “kuphefumelwa” (ku-D’Ostervald; naku-Segond [ngesi-French]), “inkhulumo lephefumelwe” (ku-NW).
Kufundvwa KweliBhayibheli
(2 Thesalonika 1:1-12) Mine Pawula ngikanye naSilvanosi naThimothi, ngibhalela libandla lebaseThesalonika lelisebunyeni naNkulunkulu longuBabe wetfu kanye neNkhosi Jesu Khristu: 2 Shengatsi ningaba nemusa nekuthula lokuvela kuNkulunkulu longuBabe wetfu, naseNkhosini Jesu Khristu. 3 Bazalwane, sihlale sinesibopho sekunibongela kuNkulunkulu. Loku kufanele ngobe kukholwa kwenu kukhula kakhulu, nelutsandvo nonkhe leninalo ngalomunye nalomunye luyakhula. 4 Ngako siyatigcabha ngani emabandleni aNkulunkulu ngenca yekubeketela nekukholwa kwenu kuko konkhe kuphatfwa kabi nekuhlupheka lenibhekana nako. 5 Loku kubufakazi bekutsi Nkulunkulu wehlulela ngekulunga, futsi kutawuholela ekutseni niwufanele uMbuso wakhe lenihlupheka ngenca yawo. 6 Ecinisweni, kulungile ngaNkulunkulu kutsi abuyisele kuhlupheka kulabo labanibangela kuhlupheka. 7 Kodvwa nine lenihluphekako, Nkulunkulu utawuniletsela kuphumula kanye natsi ekwembulweni kweNkhosi Jesu ivela ezulwini, ikanye netingilosi tayo letinemandla 8 emlilweni lovutsa emalangabi, njengobe Nkulunkulu aletsa imphindziselo kulabo labangamati nakulabangatilaleli tindzaba letimnandzi letimayelana neNkhosi yetfu Jesu. 9 Laba batawutfola sijeziso sekubhujiswa kwaphakadze basuke embikweNkhosi nasenkhatimulweni yemandla ayo, 10 naseyingcweliswa kanye nalabangcwele bayo, futsi bonkhe labanekukholwa batayibuka ngekumangala ngalelo langa, njengobe nine nabukholwa bufakazi lesaninika bona. 11 Kudzimate kube nguleso sikhatsi, sihlale sinithantazela kutsi Nkulunkulu wetfu anibale njengalabafanelwe lubito lwakhe, futsi ngemandla akwente ngalokuphelele konkhe lakufunako ngekulunga nangemsebenti wekukholwa; 12 kuze libito leNkhosi yetfu Jesu litewungcweliswa kini, nani nitewungcweliswa ebunyeni nayo, ngekwemusa waNkulunkulu wetfu neweNkhosi Jesu Khristu.
JULY 22-28
UMCEBO LOSEVINI LANKULUNKULU | 1 THIMOTHI 1-3
“Timisele Kwenta Imisebenti Lemihle”
(1 Thimothi 3:1) Etsembekile lamavi latsi: Nangabe umuntfu afisa kuba ngumbonisi, usuke afisa umsebenti lomuhle.
Uyasibona Yini Sidzingo Sekutfutfukisa Kukholwa Kwakho?
3 Fundza 1 Thimothi 3:1. Leligama lesiGriki lelihunyushwe ngekutsi ‘kufisa,’ lisho kufuna intfo lekhashane nawe, mhlawumbe intfo lokungasimelula kuyifinyelela. Ngekusebentisa lelogama, umphostoli Pawula abegcizelela kutsi kutfutfukisa buhlobo betfu naNkulunkulu kudzinga umetamo. Nasi sibonelo: Umzalwane ucabanga ngelikusasa lakhe ebandleni. Kungenteka usengakabi yingenceku lesebentako, kodvwa uyabona kutsi kufanele atfutfuke abe nebuntfu lobuhle bebuKhristu. Kwekucala, usebentela kuba yinceku lesebentako ebandleni. Ngekuhamba kwesikhatsi, uba nesifiso sekutsi abonakale avutfwe ngalokwanele kutsi angakhonta njengembonisi. Kuto totimbili letimo, lomzalwane usebenta ngekutimisela kute afinyelele letimfuneko letidzingekako kute ente umsebenti lowengetiwe ebandleni.
(1 Thimothi 3:13) Ngobe emadvodza lasebenta kahle atitfolela ligama lelihle kanye nenkhululeko lenkhulu yekukhuluma ekukholweni mayelana naKhristu Jesu.
km 9/78 4 ¶7
Labo ‘Labatitfolela Ligama Lelihle’
7 Ngako kumelula kubona kutsi kungani Pawula atsi bantfu labanjalo basuke‘batitfolela ligama lelihle.’ Loku akusho kutfola sikhundla njengasesontfweni. Kunaloko, tinceku letikhontako ‘letisebenta kahle’ tingaciniseka kutsi titawutfola tibusiso kuJehova kanye nakuJesu, futsi batawuhlonishwa libandla liphindze libasekele. Ngendlela lefanele batfola “nenkhululeko lenkhulu yekukhuluma ekukholweni mayelana naKhristu Jesu.” Ngenca yekutsi bawenta ngekwetsembeka umsebenti wabo, bayatsandvwa; baba nekukholwa lokucinile futsi bangakhona khombisa kukholwa kwabo ngaphandle kwekusaba kuhlanjalatwa.
Kufunisisa Umcebo EVini LaNkulunkulu
(1 Thimothi 1:4) futsi banganaki tindzaba letingemanga nemilandvo yetinhlu tekutalana. Tintfo letinjalo atizuzisi ngalutfo, kodvwa tibangela imibuto ledzinga kuhlolwa kunekutsi tibanike tintfo letivela kuNkulunkulu letimayelana nekukholwa.
it-1 914-915
Luhla Lwekutalana
Kudadisha ngeluhla lwekutalana kanye nekucoca ngalo bekungakabaluleki, futsi ikakhulu ngesikhatsi Pawula abhalela Thimothi. Ngaleso sizatfu besekungasiko mcoka kugcina imininingwane lephatselene netinhlu tekutalana kute wati ngemlandvo wabokhokho bakho, njengobe kuNkulunkulu bekute umehluko emkhatsini wemaJuda nebantfu beTive ebandleni lebuKhristu. (Gal. 3:28) Futsi tinhlu tekutalana besetivele tikhomba kutsi Jesu utawuvela eluhlwini lwaDavide. Lesinye sizatfu kutsi bekungeke kuphele sikhatsi lesidze Pawula abhale ngeJerusalema kutsi itawubhujiswa, futsi nemininingwane walomlandvo wemaJuda bewungeke usasebenta. NaNkulunkulu akazange awugcina lomniningwane. Ngako bekufanele kutsi Pawula akhatsateke ngekutsi Thimothi kanye nelibandla bangaphatanyiswa kuchitsa sikhatsi bacwaninga futsi baphikisana ngemvelaphi yemuntfu, lobekungakwakhi kukholwa kwemKhristu. Tinhlu letivela eBhayibhelini tiniketa bufakazi lobugcwele ngebuMesiya baKhristu, lokuluhla lolubaluleke kakhulu kumaKhristu. Leletinye tinhlu letiseBhayibhelini ticinisekisa kulandzisa lokusemiBhalweni, futsi kwenta kucace kutsi umlandvo wekutalana ushaya emhlolweni.
(1 Thimothi 1:17) Ludvumo nenkhatimulo aluye eNkhosini yaphakadze, lengabhubhi, lengabonakali, nalokungiyo kuphela lenguNkulunkulu, kuze kube phakadze naphakadze. Amen.
cl 12 ¶15
“Ngempela! Lona NguNkulunkulu Wetfu”
15 Jehova uphindze achazwe ngekutsi ‘uyiNkhosi yaphakadze.’ (1 Thimothi 1:17; Sembulo 15:3) Kusho kutsini loku? Kumatima ngebantfu kutsi bacabange ngaleyondlela ngenca yekutsi banesono, kodvwa Jehova unguNkulunkulu phakadze ngako konkhe—kusukela esikhatsini sasendvulo kanye naleso lesitako. Tihlabelelo 90:2 titsi: “Kusukela phakadze kuze kube phakadze, wena Nkulunkulu ukhona.” Ngako Jehova akazange abe nesicalo kodvwa bekasolo akhona. Kungako kutsiwa unguNkulunkulu “Lophila Phakadze Naphakadze” futsi bekavele akhona ngaphambi kwekudalwa kwanome ngubani nobe yini lekhona emhlabeni nasezulwini! (Danyela 7:9, 13, 22) Ngubani loneligunya lekumelana nelilungelo lebuKhosi Bakhe?
Kufundvwa KweliBhayibheli
(1 Thimothi 2:1-15) Kwekucala, ngikhutsata kutsi kuncusa, imithantazo, ticelo kanye nekubonga kwentelwe tonkhe tinhlobo tebantfu, 2 emakhosi nabo bonkhe labasetikhundleni letiphakeme, kuze sitewuchubeka siphila imphilo yekuthula ngako konkhe kwetsembeka kuNkulunkulu nekutimisela. 3 Loku kuhle futsi kuyemukeleka kuMsindzisi wetfu, lokunguNkulunkulu, 4 intsandvo yakhe lekutsi tonkhe tinhlobo tebantfu tisindziswe, titfole nelwati lolungulonalona lweliciniso. 5 Ngobe kunaNkulunkulu munye, kantsi munye nemlamuleli emkhatsini waNkulunkulu nebantfu, lokunguKhristu Jesu, 6 lowatinikela waba yinhlawulo yabo bonkhe, futsi loku kufanele kufakazwe ngako ngesikhatsi lesifanele. 7 Ngobe ngenca yalobufakazi ngabekwa kutsi ngibe ngumshumayeli nemphostoli, futsi ngikhuluma liciniso hhayi emanga, ngifundzisa tive ngekukholwa nangeliciniso. 8 Ngako-ke ngifisa kutsi kuyo yonkhe indzawo labadvuna bathantaze, futsi baphakamise tandla letingcwele, hhayi ngelulaka nekuphikisana. 9 Ngendlela lefanako, ngifisa kutsi labasikati batihlobise ngetingubo letilungiswe kahle, ngekuzitsa nangekuvutfwa, hhayi ngetitayela temichino, ngeligolide, ngemapharele nobe ngetingubo letidule kakhulu, 10 kodvwa abatihlobise ngendlela lefanele labasikati labatsi bahlonipha Nkulunkulu, ngemisebenti lemihle. 11 Lomsikati akabindze nakafundziswa futsi atitfobe ngalokugcwele. 12 Angivumi kutsi afundzise nobe abe neligunya endvodzeni, kodvwa kufanele abindze. 13 Ngobe Adamu wadalwa kucala, kwaba ngukhona kudalwa Eva. 14 Kantsi futsi Adamu akazange ayengwe, kodvwa ngumfati lowayengwa wase uba soni. 15 Ngako-ke labasikati batawuphepha ngekutfola bantfwana, yingci nje nabachubeka ekukholweni, elutsandvweni, ekubeni ngcwele nasekuvutfweni.
JULY 29–AUGUST 4
UMCEBO LOSEVINI LANKULUNKULU | 1 THIMOTHI 4-6
“Kutinikela KuNkulunkulu Kanye Nekutsandza Umcebo”
(1 Thimothi 6:6-8) Liciniso, kwesaba Nkulunkulu kuzuzisa kakhulu, nangabe nje seneliswa nguloko lesinako. 7 Ngobe asiletsanga lutfo eveni, futsi kute lesitawuhamba nako. 8 Ngako kufanele seneliswe kuba nekudla, kwekwembatsa nendzawo yekuhlala.
w03 ZU 6/1 9 ¶1-2
Kufundza Imfihlo Yekweneliseka
Intfo leyinhloko leyenta Pawula wahlala ajubulile bekukwenetiswa nguloko lanako. Kodvwa kusho kutsini kwenetiswa nguloko lonako? Ngalamafisha nje, kusho kwenetiswa tintfo letisidzingako kute siphile. Mayelana naloku, Pawula watjela Thimothi, umngani wakhe labekashumayela naye kutsi: “Liciniso, kwesaba Nkulunkulu kuzuzisa kakhulu, nangabe nje seneliswa nguloko lesinako. Ngobe asiletsanga lutfo eveni, futsi kute lesitawuhamba nako. Ngako kufanele seneliswe kuba nekudla, kwekwembatsa nendzawo yekuhlala.”—1 Thimothi 6:6-8.
Naka kutsi Pawula ufananisa kwenetiseka nekwesaba Nkulunkulu. Wacondza kutsi injabulo sibili siyitfola ngekwesaba Nkulunkulu, lokusho kutsi kukhonta Nkulunkulu kuta kucala ekuphileni kwetfu, hhayi kubeka embili tintfo lesinato nobe bunjinga. ‘Kuba nekudla, kwekwembatsa nendzawo yekuhlala’ kwenta Pawula wachubeka nekwesaba Nkulunkulu kwate kwaba sekugcineni. Ngako kuPawula, imfihlo yekwenetiseka bekukwetsembela kuJehova kungakhatsaliseki kutsi ukusiphi simo.
(1 Thimothi 6:9) Kodvwa labo labatimisele ngekunjinga bawela esilingweni, elugibeni, nasetifisweni letinyenti letingenangcondvo naletilimatako, letifaka bantfu ekubhujisweni lokukhulu.
g ZU 6/07 6 ¶2
Labatimisele Ngekunjinga—Kungaba Namiphi Imiphumela
Kuliciniso kutsi bantfu labanyenti ababulawa kusebentela kunjinga. Kodvwa kuphila kwabo kungasheshe kushabalale nabasetama kufinyelela leyo migomo. Ngetulu kwaloko, kuphila kwabo kungaba sengotini nangabe bacindzetelwa ngumsebenti nobe tinkinga temali lokungabangela kuphelelwa butfongo, kwetfuka, kuphatfwa yinhloko lengapheli, ema-ulcer naletinye nje tinkinga temphilo letingenta kuphila kusheshe kushabalale. Ngisho nobe umuntfu angakhetsa kushintja kuphila kwakhe, kungenteka atikhandze sekatilimete kakhulu. Umuntfu lashade naye angahle angasametsembi, bantfwana bakhe bangeva buhlungu kakhulu, futsi nemphilo yakhe ingaphatamiseka. Mhlawumbe letinye taletinkinga tingalungiseka, kodvwa loko kungadzinga kutsi asebente kamatima. Bantfu labanjalo basuke ‘batigwaze yonkhe indzawo ngebuhlungu lobunyenti.’—1 Thimothi 6:10.
(1 Thimothi 6:10) Ngobe kutsandza imali kuyimphandze yato tonkhe tinhlobo tetintfo letilimatako, kantsi ngekulwela kuba nalolutsandvo, labanye badukile ekukholweni, batigwaza yonkhe indzawo ngebuhlungu lobunyenti.
g ZU 11/08 6 ¶4-6
Tintfo Letisitfupha Letenta Umuntfu Aphumelele
Njengobe sibonile esihlokweni sekucala, lesinetihlokwana letichubekako, bantfu labahlale bafuna kunjinga ngenjongo yekuphumelela basuke bacosha umoya. Ngaphandle kwekudvumateka, batiletsela buhlungu lobukhulu. Nasi sibonelo, bantfu labatimisele ngekunjinga badzela buhlobo lobuhle nemindeni yabo kanye nebangani. Labanye bakhetsa kungalali ngenca yekusebenta kakhulu nobe ngenca yekukhatseteka. Umshumayeli 5:12 utsi: “Maye, butfongo besisebenti bumnandzi, lite nome sidle kancane nome sidle sesutsa; kodvwa inala yemuntfu lonjingile angeke imnike butfongo.”—Hebrew Names Version.
Imali ayigcini nje ngekuba yinkhosi lenelunya kuphela kodvwa iyakhohlisa. Jesu wakhuluma ‘ngekuyenga kwemcebo.’ (Makho 4:19) Ngalamanye emavi, bunjinga butsembisa injabulo kodvwa abuyiletsi. Kunaloko, bantfu bachubeka bafuna lokwengetiwe. Umshumayeli 5:10 utsi: “Umuntfu lotsandza imali angeke aze aneliseke ngayo.”—The New English Bible.
Ngalamafisha nje, umuntfu lotsandza imali usuke atilimata yena futsi loko kungabangela kutsi advumateke, akhatsateka, nobe aze akhohlakale. (Taga 28:20) Ngalokwehlukile, lokuletsa injabulo nemphumelelo kwephana, kucolelana, kucabanga lokuhlantekile, lutsandvo, kanye nekuba nebuhlobo lobuhle naNkulunkulu.
Kufunisisa Umcebo EVini LaNkulunkulu
(1 Thimothi 4:2) ngekutentisa kwebantfu labakhuluma emanga, labanabonembeza labashile shengatsi bashiswe yinsimbi yekubeka luphawu.
Ungamlondvolota Njani Nembeza Lomsulwa?
17 Umphostoli Phetro wabhala watsi: “Nibe nanembeza lomsulwa.” (1 Phetro 3:16) Nembeza lomsulwa emehlweni aNkulunkulu Jehova usibusiso lesikhulu. Awufanani nanembeza webantfu labanyenti lamuhla. Pawula wakhuluma ngalabo ‘labananembeza loshiswe ngensimbi yekubeka luphawu.’ (1 Thimothi 4:2) Insimbi yekubeka luphawu iyayishisa inyama, iyishiye inetibati futsi indzikindziki. Linyenti lebantfu linanembeza lofile—lonetibati futsi londzikindziki, longasabecwayisi, ubavikele, nobe ubente babe nemahloni, futsi bative banelicala ngesento lesibi. Kepha bona, abanandzaba naloko.
(1 Thimothi 4:13) Kudzimate kube ngulapho ngifika, chubeka utimisela ekufundzeleni linyenti, ekukhutsateni, nasekufundziseni.
it-2 714 ¶1-2
Kufundzela Linyenti
Ebandleni LebuKhristu. Ngelikhulu lekucala, bebambalwa bantfu lebebanemiculu yeliBhayibheli, ngako bekunesidzingo sekutsi kufundzelwe linyenti. Umphostoli Pawula bekakukhutsata kufundzela linyenti emihlanganweni yelibandla lebuKhristu futsi watsi nasebatifundzile letinye tincwadzi, bekufanele bahlele kutsi tiyofundvwa nakulamanye emabandla baphindze nabo bafundze letichamuka kulamanye emabandla. (Khol. 4:16; 1Thes. 5:27) Pawula waphindze weluleka Thimothi lebekangumbonisi kutsi ‘achubeke atimisela ekufundzeleni linyenti, ekukhutsateni, nasekufundziseni.’—1Thim. 4:13.
Kufundzela linyenti kufanele kucace. (Hab. 2:2) Njengoba kufundzela linyenti kusuke kukufundzisa labanye, lofundzako kufanele akucondze lalakufundzako futsi kukhanye kahle engcondvweni yakhe ngaloko umbhali bekafuna kukuveta, aphindze anake kutsi nakafundza angasho intfo lengekho nobe letawuniketa umcondvo lowehlukile kulabalalele. Sembulo 1:3, sitsi bayajabula labo labafudza ngelivi lelivakalako nalabo lebeva emavi alesiphrofetho futsi bagcine tintfo letibhalwe kuso.
Kufundvwa KweliBhayibheli
(1 Thimothi 4:1-16) Livi leliphefumulelwe lisho ngalokucacile kutsi etikhatsini letitako labanye batawukuwa ekukholweni, banake tinkhulumo letiphefumulelwe letidukisako kanye netimfundziso temadimoni, 2 ngekutentisa kwebantfu labakhuluma emanga, labanabonembeza labashile shengatsi bashiswe yinsimbi yekubeka luphawu. 3 Batawukwalela bantfu kutsi bashade futsi babayale kutsi bangakudli kudla Nkulunkulu lakudalele kutsi kudliwe ngekubonga ngulabo labanekukholwa nalabalati kahle liciniso. 4 Yonkhe indalo yaNkulunkulu yinhle, futsi kute lokufanele kwaliwe nangabe kwemukelwa ngekubonga, 5 ngobe kungcweliswe ngelivi laNkulunkulu nangekuthantazelwa. 6 Nawunika bazalwane leseluleko utawuba sisebenti lesihle saKhristu Jesu, lesondliwe ngemavi ekukholwa newemfundziso lenhle loyilandzele edvute. 7 Ungatemukeli tindzaba letingemanga tekungamhloniphi Nkulunkulu, njengaleto letikhulunywa talukati. Kunaloko ticeceshe unemgomo wekwetsembeka kuNkulunkulu. 8 Ngobe kucecesha umtimba kuzuzisa kancane, kodvwa kwetsembeka kuNkulunkulu kuzuzisa kuto tonkhe tintfo, njengobe kunika litsemba lekuphila kwanyalo nekwesikhatsi lesitako. 9 Lamavi etsembekile futsi kufanele emukelwe ngalokuphelele. 10 Kungaleso sizatfu sisebenta kamatima futsi sitikhandla, ngobe litsemba letfu silibeke kuNkulunkulu lophilako, longuMsindzisi wato tonkhe tinhlobo tebantfu, ikakhulukati labo labetsembekile. 11 Chubeka ukhipha lemiyalo futsi ufundzisa ngayo. 12 Ungavumeli muntfu kutsi edzelele busha bakho. Kodvwa ngekukhuluma, ngekutiphatsa, ngelutsandvo, ngekukholwa nangekuba msulwa, bani sibonelo kulabetsembekile. 13 Kudzimate kube ngulapho ngifika, chubeka utimisela ekufundzeleni linyenti, ekukhutsateni, nasekufundziseni. 14 Sinake sipho lowanikwa sona ngesiphrofetho lesakhishwa ngesikhatsi sigungu salabadzala sikubeka tandla. 15 Zindla ngaletintfo, utinikele kuto, kuze intfutfuko yakho itewubonakala kahle kubo bonkhe bantfu. 16 Hlale utinaka wena nekufundzisa kwakho. Phikelela kuletintfo, ngobe nawenta njalo utawutisindzisa wena nalabo labakulalelako.