Tikhombo Tencwajana Yekubhalela Emhlanganweni Wekuphila KwemaKhristu Nemsebenti Wawo

JULY 6-12

UMCEBO LOSEVINI LANKULUNKULU | EKSODUSI 6-7

“Utawubona-ke Nyalo Lengitakwenta KuFaro”

(Eksodusi 6:1) Simakadze watsi kuMosi: “Utawubona-ke nyalo lengitakwenta kuFaro. Utabakhulula bantfu bami bahambe ngenca yesandla lesinemandla; yebo, ngenca yesandla sami lesinemandla uyawubacosha besuke eveni lakhe.”

(Eksodusi 6:6, 7) Ngako-ke tjela ema-Israyeli utsi: ‘NginguSimakadze; ngitanikhulula kulokugcilatwa kwenu ngemaGibhithe. Ngengalo yami leyelulekile nangetento temandla lengiyawubajezisa ngato ngiyawunephula kubo. ⁷ Ngitanenta nibe sive sami, mine ngibe nguNkulunkulu wenu. Nine-ke niyawungati kutsi nginguSimakadze longuNkulunkulu wenu lowanikhipha ngaphansi kwelijoko laseGibhithe.

it-2-E 436 ¶3

Mosi

Kwaphindze kwaba nelushintjo lolukhulu emadvodzeni aka-Israyeli. Ekucaleni bamemukela Mosi kutsi kube nguye lobekatabakhulula, kodvwa ngemuva kwekutsi Faro akhiphe umyalo wekutsi basetjentiswe kamatima, bakhonona kuMosi, kangangekutsi Mosi waze wakhala kuJehova, ngenca yekudvumateka. (Eks 4:29-31; 5:19-23) Loyo Losetikwako Konkhe wamcinisa Mosi ngekutsi amvetele kutsi bekatakufeza loko Abrahama, Isaka naJakobe lebebakulangatelela, loku kuyiveta ngalokuphelele inchazelo yelibito lelitsi Jehova ngekukhulula ema-Israyeli futsi awente abe sive lesikhulu eveni lesetsembiso. (Eks 6:1-8) Nanobe kunjalo, emadvodza aka-Israyeli akazange amlalele Mosi. Kodvwa ngemuva kwesishayo sesi-9, amsekela ngalokucinile, wakhona nekusihlela kahle lesive ngemuva kwesishayo sesi-10 kute sikhone kuphuma kulelive laseGibhithe ‘njengelibutfo lemphi.’—Eks 13:18.

(Eksodusi 7:4, 5) Faro angeke anilalele, ngako-ke ngiyakwehlisela sandla sami eGibhithe, ngiyijezise kabuhlungu, ngikhiphe sive sami, bantfwana baka-Israyeli, eGibhithe. ⁵ EmaGibhithe ngulapho ayawungati khona kutsi nginguSimakadze, nase ngelule sandla sami ngikhulula ema-Israyeli emkhatsini wawo.”

it-2-E 436 ¶1-2

Mosi

Ngesikhatsi beme phambi kwaFaro waseGibhithe. BoMosi na-Aroni bebabantfu lebebabalulekile ‘emphini lebeyisemkhatsini wabonkulunkulu.’ Emkhatsini webaphristi lebebenta imilingo, bekunetikhulu boJanesi naJambresi (2Tm 3:8), futsi Faro wakhipha umyalo wekutsi bonkhe bonkulunkulu baseGibhithe bamelane naJehova. Simangaliso sekucala lesentiwa ngu-Aroni phambi kwaFaro acondziswa nguMosi saveta kutsi Jehova bekanemandla kakhulu kunabonkulunkulu baseGibhithe ngisho nobe nje inhlitiyo yaFaro yachubeka yaba lukhuni nakakhulu. (Eks 7:8-13) Ngesikhatsi kugadla sishayo sesitsatfu, ngisho nebaphristi baFaro batsi: “Ngumuno waNkulunkulu ke-lo!” Nangalesikhatsi kugadla sishayo sematfumba, bonkhe behluleka kuyokuma phambi kwaFaro kute bamelane naMosi mayelana nalesishayo.—Eks 8:16-19; 9:10-12.

Tishayo tatsambisa tinhlitiyo talabanye taphindze tenta talabanye taba lukhuni. BoMosi na-Aroni bekungibo lebebamemetela tishayo ngasinye kuletishayo letiLishumi. Letishayo lebetimenyetelwa, betikhombisa bufakazi bekutsi Mosi bekangummeleli waJehova. Libito laJehova kwakhulunywa ngalo kuyo yonkhe iGibhithe, lafeza kokubili kutsambisa tinhlitiyo talabanye bantfu nekutenta tibe lukhuni, lokusho kutsi latsambisa tinhlitiyo tema-Israyeli kanye netalamanye emaGibhithe, labese liyenta iba lukhuni inhlitiyo yaFaro nebeluleki bakhe kanye nalabo labamsekelako. (Eks 9:16; 11:10; 12:29-39) EmaGibhithe akazange akucabange kutsi bekakhube bonkulunkulu babo, kunaloko bekati kutsi nguJehova lobekehlulela bonkulunkulu babo. Nasekugadle tishayo letingu-9, naMosi besekamkhulu “kutiphatsimandla taFaro nakumaGibhithe onkhe.”—Eks 11:3.

Kufunisisa Umcebo EVini LaNkulunkulu

(Eksodusi 6:3) Ngabonakala ku-Abrahama, naku-Isaka, nakuJakobe kutsi nginguNkulunkulu Somandla, kodvwa angizange ngibatise lelibito lami lelingcwele, Simakadze.

it-1-E 78 ¶3-4

Somandla

Jehova wasebentisa lesicu lesitsi “Nkulunkulu Somandla” (ʼEl Shad·daiʹ) ngesikhatsi enta setsembiso ku-Abrahama lebesimayelana nekutalwa kwa-Isaka, futsi lesetsembiso besidzinga kutsi Abrahama abe nekukholwa lokucinile emandleni aNkulunkulu kutsi bekatasifeza. Lesicu saphindze sasetjentiswa ngesikhatsi kukhulunywa ngaNkulunkulu kutsi nguye lobekatawubusisa bo-Isaka naJakobe kutsi kube ngibo tindlalifa tesivumelwane lesentiwa ku-Abrahama.—Gen 17:1; 28:3; 35:11; 48:3.

Ngekuvumelana naloku, Jehova waphindze washo nankha emavi kuMosi, watsi: “Ngabonakala ku-Abrahama, naku-Isaka, nakuJakobe kutsi nginguNkulunkulu Somandla [beʼElʹ Shad·daiʹ], kodvwa angizange ngibatise lelibito lami lelingcwele, [Jehova].” (Eks 6:3) Kodvwa loko akusho kutsi lamadvodza lebeketsembekile bekangalati libito laJehova, ngobe bekalisebentisa tikhatsi letinyenti lokufaka ekhatsi nalabanye labaphila ngaphambi kwabo. (Gen 4:1, 26; 14:22; 27:27; 28:16) Ecinisweni, encwadzini yaGenesisi lakulandziswa khona ngekuphila kwemadvodza lebeketsembekile, ligama lelitsi “Somandla,” livela tikhatsi letingu-6, kantsi libito laJehova lona livela tikhatsi letingu-172 emibhalweni yekucala yesiHebheru. Nanobe lamadvodza lebeketsembekile bekakujabulela kubona kutsi Nkulunkulu bekumfanele kubitwa ngalesicu lesitsi “Somandla,” akazange sekalitfole litfuba lekwati ngalokuphelele inchazelo yelibito laNkulunkulu lelitsi Jehova kanye nekutsi lisho kutsini. Mayelana naloko, i-The Illustrated Bible Dictionary (Vol. 1, p. 572) yatsi: “Loko lokwembulwa kulamadvodza lebeketsembekile mayelana netetsembiso telikusasa, bekuveta kutsi bewaciniseka kutsi Yena, Yahweh, bekanguNkulunkulu (ʼel) lebebangametsemba kutsi bekatatifeza leto tetsembiso. Lesihlahla lebesivutsa besiveta emandla lamakhulu aNkulunkulu, kutisita ngekushesha tinceku takhe natidzinga lusito kanye nekuchubeka anato, konkhe loku bekuveta inchazelo yelibito lelitsi Yahweh.”—Edited by J. D. Douglas, 1980.

(Eksodusi 7:1) Simakadze wakhuluma kuMosi, watsi:” Buka la, wena ngitakwenta ufane naNkulunkulu kuFaro; Aroni, umnakenu, yena aba ngumphrofethi wakho.

it-2-E 435 ¶5

Mosi

Mosi akayekeliswanga sabelo sakhe ngenca yekungatetsembi. Kodvwa Mosi wakhombisa kungatetsembi ngekutsi atsi bekangakwati kahle kukhuluma. Kulesikhatsi lesi, Mosi besekashintjile kunasesikhatsini lebesendlulile, lapho khona atenta umkhululi wema-Israyeli eminyakeni lengu-40 lebeyengcile. Nobe kunjalo, wachubeka akhonona kuJehova, kangangekutsi wagcine sekacela Jehova kutsi amyekelise lesabelo. Nanobe loko kwamtfukutselisa Nkulunkulu kodvwa akazange amlahle Mosi. Kunaloko, wamniketa umnakabo Aroni kutsi abe ngumkhulumeli wakhe. Njengobe Mosi bekangummeleli waNkulunkulu, ngako Mosi waba “njengaNkulunkulu” ku-Aroni lobekangumkhulumeli wakhe. Ngekuchubeka ahlangana nemadvodza aka-Israyeli kanye naFaro bekubonakala kutsi Nkulunkulu nguye lobekakhipha ticondziso nemiyalo, bese Mosi utjela Aroni kutsi akhulume lemiyalo kuFaro (loyo lowangena esikhundleni saFaro, lowabalekelwa nguMosi eminyakeni lengu-40 leyendlulile). (Eks 2:23; 4:10-17) Ngekuhamba kwesikhatsi, Jehova watsi ku-Aroni ‘ungumphrofethi’ waMosi, lokusho kutsi, njengoba Mosi bekangumphrofethi waNkulunkulu futsi acondziswa nguye, kanjalo na-Aroni bekufanele acondziswe nguMosi. Mose waphindze watjelwa kutsi bekatawentiwa ‘afane naNkulunkulu kuFaro,’ lobekusho kutsi bekatawuniketwa emandla lavela kuNkulunkulu neligunya lelingetulu kwaFaro, kuze kube bete sidzingo sekwesaba lenkhosi yaseGibhithe.—Eks 7:1, 2.

Kufundvwa KweliBhayibheli

(Eksodusi 6:1-15) Simakadze watsi kuMosi: “Utawubona-ke nyalo lengitakwenta kuFaro. Utabakhulula bantfu bami bahambe ngenca yesandla lesinemandla; yebo, ngenca yesandla sami lesinemandla uyawubacosha besuke eveni lakhe.” ² Nkulunkulu wakhuluma kuMosi, watsi: “NginguSimakadze. ³ Ngabonakala ku-Abrahama, naku-Isaka, nakuJakobe kutsi nginguNkulunkulu Somandla, kodvwa angizange ngibatise lelibito lami lelingcwele, [Jehova]. ⁴ Ngaphindze ngenta sivumelwane sami kanye nabo, ngabetsembisa kutsi ngiyawubanika live laseKhenani, lapho babehlala khona njengetihambi. ⁵ Ngikuvile, futsi, kububula nekukhala kwesive sami ema-Israyeli lagcilatwe ngemaGibhithe; ngisikhumbulile sivumelwane sami. ⁶ Ngako-ke tjela ema-Israyeli utsi: ‘NginguSimakadze; ngitanikhulula kulokugcilatwa kwenu ngemaGibhithe. Ngengalo yami leyelulekile nangetento temandla lengiyawubajezisa ngato ngiyawunephula kubo. ⁷ Ngitanenta nibe sive sami, mine ngibe nguNkulunkulu wenu. Nine-ke niyawungati kutsi nginguSimakadze longuNkulunkulu wenu lowanikhipha ngaphansi kwelijoko laseGibhithe. ⁸ Ngitaningenisa eveni njengobe ngafunga ngekuphakamisa tandla kutsi ngitalinika bo-Abrahama, na-Isaka, naJakobe. Ngitanipha lona libe live lenu. NginguSimakadze.’” ⁹ Mosi wawatjela loko ema-Israyeli, kodvwa akazange amlalele, ngobe umoya wawo wawephulwe sihluku nekugcilatwa kwawo. ¹⁰ Simakadze wakhuluma kuMosi, watsi: ¹¹ “Hamba utjele Faro, inkhosi yaseGibhithe, kutsi akakhulule ema-Israyeli aphume kulelive lakhe.” ¹² Kodvwa Mosi waphendvula Simakadze, watsi: “Ingani ema-Israyeli akangilaleli; pho, Faro angangilalela kanjani? Angisilo libeka ekukhulumeni.” ¹³ Simakadze wakhuluma kuMosi na-Aroni, watsi: “Tjelani ema-Israyeli naFaro, inkhosi yaseGibhithe, kutsi nginitfume kutsi nihole ema-Israyeli aphume eGibhithe.” ¹⁴ Laba-ke baholi betive tabo: Emadvodzana aRubeni, labelitubulo la-Israyeli: bekuboHanoki, naPhalu, naHesroni, naKhami; leyo-ke bekungimindeni yakaRubeni. ¹⁵ Emadvodzana aSimeyoni bekuboJemuweli, naJamini, na-Ohadi, naJakhini, naSohari, naShawula, indvodzana yemKhenanikati; leyo-ke bekungimindeni yakaSimeyoni.

JULY 13-19

UMCEBO LOSEVINI LANKULUNKULU | EKSODUSI 8-9

“Ngekungati Faro Wafaka Sandla Ekufezekeni Kwenjongo YaNkulunkulu”

(Eksodusi 8:15) Kodvwa Faro watsi kube abone kutsi tigogodvolo setifile, wenta inhlitiyo yakhe yaba lukhuni, njengobe abevele ashito Simakadze. Faro akazange abalalele boMosi na-Aroni kutsi batsini.

it-2-E 1040-1041

Inkhani

Jehova solo ubabeketelele bantfu kanye netive kutsi tichubeke tiphila ngisho nobe tifanelwe kufa. (Gen 15:16; 2Pe 3:9) Nobe kunjalo labanye bayishintjile indlela labaphila ngayo kute batfole umusa wakhe (Jos 2:8-14; 6:22, 23; 9:3-15), kantsi labanye batente taba lukhuni tinhlitiyo tabo ngelizinga lelikhulu kute bamelane naJehova nebantfu bakhe. (Dut 2:30-33; Jos 11:19, 20) Ngengobe Jehova angabavimbeli bantfu kutsi babe nenkhani ngako watiwa njengaNkulunkulu ‘lovumela bantfu kutsi babe netinhlitiyo letilukhuni noma atente kutsi tibe lukhuni.’ Nasekabehlulela futsi atiphindziselela kubantfu labanenkhani, umphumela ubonakala emandleni akhe lamakhulu futsi ente libito lakhe liphakanyiswe.—Catsanisa na-Eks 4:21; Joh 12:40; Rom 9:14-18.

(Eksodusi 8:18, 19) Labalumbako benta butsi bekwenta imilingo; kodvwa behluleka kwenta timbuzulwane. Letimbuzulwane tahlasela bantfu kanye nemfuyo. ¹⁹ Labalumbako bakhuluma kuFaro batsi: “Ngumuno waNkulunkulu-ke lo!” Kodvwa inhlitiyo yaFaro yaba lukhuni; akazange akunake lokwakushiwo boMosi na-Aroni, njengobe abevele ashito Simakadze.

(Eksodusi 9:15-17) Kube sandla sami bengisiphakamisele etikwakho ngesifo lesingelapheki, ngabe seniphele nya. ¹⁶ Kodvwa noko kuze kube manje ngisakuphephisile, khona ngitekukhombisa emandla ami, nekutsi libito lami litewudvunyiswa emhlabeni wonkhe. ¹⁷ Noko nanyalo seloku usatikhukhumeta ngetulu kwebantfu bami, awukabavumeli kutsi bakhululeke bahambe.

it-2-E 1181 ¶3-5

Bubi

Ngetulu kwaloko, Jehova Nkulunkulu usebentisa tindlela takhe kute ente bantfu lababi bafeze injongo yakhe bangakahlosi. Ngisho nobe labantfu bamelene naNkulunkulu, kodvwa uyabavimba nakunesidzingo kute avikele tikhonti takhe letetsembekile, futsi angavumela kutsi tento talababi tichubeke kute ekugcineni angcwelise libito lakhe. (Rom 3:3-5, 23-26; 8:35-39; Hl 76:10) Loku kuvetwa kahle embhalweni weTaga 16:4: “Konkhe Simakadze lakwentile kunesiphetfo sako, ngisho nalomubi umentele lilanga lakhe lekubhujiswa.”

Indzaba lesikhuluma ngayo lapha nguleyaFaro lapho khona Jehova asebentisa boMosi na-Aroni amtjela kutsi akhulule ema-Israyeli ekubeni tigcili. Akusuye Nkulunkulu lowenta kutsi lombusi waseGibhithe abe nenhlitiyo lembi, kodvwa wamvumela kutsi achubeke aphila waphindze wenta tintfo lebetitokwenta Faro ativete kutsi abenenhlitiyo lembi futsi afanelwe kufa. Injongo yaJehova yekwenta loko ichazwe kahle ku-Eksodusi 9:16 lapho khona Jehova atsi: “Kuze kube manje ngisakuphephisile, khona ngitekukhombisa emandla ami, nekutsi libito lami litewudvunyiswa emhlabeni wonkhe.”

Tishayo leTilishumi letehlela emaGibhithe talandzelwa kubhujiswa kwaFaro nelibutfo lakhe eLwandle Lolubovu, takhombisa kutsi Jehova unemandla lamakhulu. (Eks 7:14–12:30; Hl 78:43-51; 136:15) Eminyakeni leyalandzela, tive betisolo tikhuluma ngako loku, futsi loko kwenta kutsi libito laNkulunkulu limenyetelwe emhlabeni wonkhe. (Jos 2:10, 11; 1Sa 4:8) Kube Jehova washeshe wambhubhisa Faro, bekangeke aze abonakale emandla akhe lamniketa ludvumo ngesikhatsi akhulula bantfu bakhe.

Kufunisisa Umcebo EVini LaNkulunkulu

(Eksodusi 8:21) Nawungabakhululi bantfu bami kutsi bahambe, ngitawutfumela libulo letibawu kuwe, nakutiphatsimandla takho, nasesiveni sakho, nasetindlini takho. Tindlu temaGibhithe tiyawugcwala tibawu, tembese ngisho nelive lawo lonkhe.

it-1-E 878

Tibawu

Akucaci kutsi bekuluhlobo luni lwesilokatane lolu lolwabhalwa etincwadzini tekucala tesiHebheru mayelana nesishayo sesine lesehlela emaGibhithe, futsi kwaba sishayo sekucala lesingazange siwatsintse ema-Israyeli lebekaseGosheni. (Eks 8:21, 22, 24, 29, 31; Hl 78:45; 105:31.

Kungenteka letibawu lebetisishayo sesine eGibhithe, kungenteka bekutilokatane lebetisutela sikhumba semuntfu nobe sesilwane kute timunye ingati. Tibawu natisesetibungu tiba semtimbeni wesilwane nobe wemuntfu kute tikhule ngekumunya ingati, futsi loko bekubangela bantfu tifo kuletinye tindzawo. Ngako-ke, lesishayo setibawu saletsa lusizi kubantfu baseGibhithe kanye nasetilwaneni lebebatifuyile, futsi kuletinye timo betize tibabulale bantfu netilwane.

(Eksodusi 8:25-27) Faro wase ubita boMosi na-Aroni; befika, watsi kubo: “Hambani niyewunikela imihlatjelo kuloNkulunkulu wenu, kodvwa ningaphumi kulo lelive.” ²⁶ Mosi wamphendvula watsi: “Cha, kungeke kulunge loko, ngobe leminikelo yetfu yemihlatjelo itawuba sikhubekiso nesicefe kubantfu baseGibhithe. Nasinikela ngemihlatjelo lesinengiso emehlweni abo, bangahlala kanjani bangasigcobi ngematje? ²⁷ Kufanele sitsatse luhambo lwemalanga lamatsatfu siye ehlane, kuze sinikele ngemihlatjelo kuSimakadze, longuNkulunkulu wetfu, njengobe yena asiyalile.”

w04 3/15 25 ¶9

Emaphuzu Lagcamile Lasencwadzini Ya-Eksodusi

8:26, 27—Kungani Mosi atsi beyitawuba sikhubekiso imihlatjelo yema-Israyeli kubantfu baseGibhithe? Tilwane letinyenti betihlonishwa kakhulu eGhibithe. Ngako, loku kwasicinisa nakakhulu sincumo saMosi sekutsi ema-Israyeli avunyelwe kutsi ayokwenta imihlatjelo kuJehova.

Kufundvwa KweliBhayibheli

(Eksodusi 8:1-19) Simakadze wakhuluma kuMosi, watsi: “Hamba uye kuFaro umtjele kutsi Simakadze utsi: ‘Khulula sive sami sihambe, khona sitekungikhonta. ² Nawala kusikhulula, live lakho lonkhe ngitalishaya ngetigogodvolo. ³ Umfula iNayili utawugcwala tigogodvolo, tize tenyukele ngisho nasesigodlweni sakho, nasekamelweni lakho lekulala, nasembhedzeni wakho, nasetindlini tetiphatsimandla takho, nakutakhamiti takho, nakubohhavini bakho, nasetitjeni tenhlama. ⁴ Letigogodvolo tiyawugcumela etikwakho, nasetikwebantfu bakho, nasetikwetiphatsimandla takho tonkhe.’” ⁵ Simakadze wakhuluma kuMosi, watsi: “Tjela Aroni utsi: ‘Yelula sandla sakho lesinendvuku usibhekise ngasemifuleni, nasemachaphotini, nasetitibeni wente tigogodvolo tiphumele ngaphandle emhlabatsini eveni laseGibhithe.’” ⁶ Ngako-ke Aroni wayengamisa etikwemanti aseGibhithe. Tigogodvolo taphuma tananabuka nalo lonkhe live laseGibhithe. ⁷ Nalabalumbi benta njalo ngemilingo yabo; tigogodvolo batikhiphela emhlabatsini eveni laseGibhithe. ⁸ Faro wabita boMosi na-Aroni; befika, watsi kubo: “Thandazani kuSimakadze nimcele kutsi esuse letigogodvolo la kimi nakulesive sami. Ngitawube sengiyabakhulula labantfu benu bahambe, khona batawunikela imihlatjelo kuSimakadze.” ⁹ Mosi waphendvula Faro watsi: “Anginike wena emandla nelilungelo lekungibekela sikhatsi lengingakuthandazela ngaso wena netiphatsimandla takho kanye nesive sakho, kutsi tiphele letigogodvolo lapha emkhatsini wenu nasetindlini tenu, tisale emfuleni iNayili kuphela.” ¹⁰ Faro wamphendvula watsi: “Kusasa.” Mosi watsi: “Kulungile, nkhosi, kutakwenteka njengobe ufuna, kuze wati kutsi kute lofanana naSimakadze longuNkulunkulu wetfu. ¹¹ Letigogodvolo titawusuka kuwe, nasetindlini takho, nasetiphatsimandleni takho, nasesiveni sakho. Titawusala emfuleni iNayili kuphela.” ¹² BoMosi na-Aroni besuka kuFaro bahamba. Mosi wafike wathandaza kuSimakadze amcela kutsi esuse letigogodvolo letase titseleke etikwaFaro. ¹³ Simakadze wenta njengesicelo saMosi. Tafa tonkhe tigogodvolo letatisetindlini, nasetibuyeni, nasemasimini. ¹⁴ EmaGibhithe atibutsisa ndzawonye taba tincumbi letinkhulu. Lonkhe live lanuka luboti. ¹⁵ Kodvwa Faro watsi kube abone kutsi tigogodvolo setifile, wenta inhlitiyo yakhe yaba lukhuni, njengobe abevele ashito Simakadze. Faro akazange abalalele boMosi na-Aroni kutsi batsini. ¹⁶ Simakadze wakhuluma kuMosi, watsi: “Khuluma ku-Aroni utsi: ‘Yelula indvuku yakho ushaye lutfuli lwemhlabatsi ngalendvuku yakho, lonkhe lutfuli lwelive laseGibhithe lutawugucuka lube timbuzulwane.’” ¹⁷ Bavele bakwenta loko. Aroni welula sandla sakhe, washaya lutfuli lwemhlabatsi ngendvuku yakhe; lonkhe lutfuli lwagucuka lwaba timbuzulwane letahlasela bantfu netilwane. Lonkhe lutfuli lwemhlabatsi eGibhithe lwagucuka lwaba timbuzulwane. ¹⁸ Labalumbako benta butsi bekwenta imilingo; kodvwa behluleka kwenta timbuzulwane. Letimbuzulwane tahlasela bantfu kanye nemfuyo. ¹⁹ Labalumbako bakhuluma kuFaro batsi: “Ngumuno waNkulunkulu-ke lo!” Kodvwa inhlitiyo yaFaro yaba lukhuni; akazange akunake lokwakushiwo boMosi na-Aroni, njengobe abevele ashito Simakadze.

JULY 20-26

UMCEBO LOSEVINI LANKULUNKULU | EKSODUSI 10-11

“BoMosi na-Aroni Bakhombisa Kutsi Bebanesibindzi”

(Eksodusi 10:3-6) Ngako-ke boMosi na-Aroni bahamba baya kuFaro, bafike kuye batsi: “Simakadze, longuNkulunkulu wemaHebheru, utsi: ‘Kutawuze kube ngunini seloku wala kutitfoba kimi? Khulula bantfu bami bahambe, khona batewungikhonta. ⁴ Nawuchubeka wala, ungabakhululi bantfu bami, ngitakuletsela sikhonyane la eveni lakho kusasa lolokusako. ⁵ Sitawuba sinyenti kangangekutsi sitawusibekela wonkhe umhlaba wakho, kungasabonakali nemhlabatsi. Sitawudla konkhe lokusindze esangcotfweni, ngisho netihlahla letisele tesiganga leticala kuhluma futsi. ⁶ Sitawugcwala etigodlweni takho, nasetindlini tetiphatsimandla takho, netebantfu bakho baseGibhithe. Ngisho nabokhokho bakho abazange basibone lesinje solomane befika kulelive kuze kube ngunyalo.’” Mosi waphuma kuFaro, wahamba.

w09-ZU 7/15 20 ¶6

Lingisa Jesu—Ushumayele Ngesibindzi

⁶ Cabanga ngesibindzi lesakhonjiswa nguMosi ngesikhatsi ayokhuluma naFaro, lobekangumbusi lobekatsatfwa njengekutsi ungunkulunkulu, hhayi ummeleli wabonkulunkulu futsi ayindvodzana yankulunkulu welilanga, Ra. Njengalabanye boFaro, kungenteka naye bakakhonta sitfombe semfanekiso wakhe. Konkhe Faro lebekakukhuluma bekuba ngumtsetfo. Njengobe Faro bekanemandla, atikhukhumeta futsi anenkhani, bekangafuni kutjelwa kutsi enteni. Kodwa Mosi lobekatfobekile, angumelusi, waya kuyokhuluma naFaro emahlandla lamanyenti ngisho nobe bekangakemukeleki futsi angakabitwa. Yini Mosi layisho kuFaro? Wamtjela ngaletishayo lebetibhubhisa. Mosi bekafuna kutsi Faro enteni? Bekafuna kutsi Faro avumele tigcili takhe kutsi tiphume kulelive laseGibhithe! Bekasidzinga yini sibindzi? Yebo!—Num. 12:3; Heb. 11:27.

(Eksodusi 10:24-26) Faro wabita Mosi, wafike watsi kuye: “Hambani niyewukhonta Simakadze; nihambe nebafati benu nebantfwana benu. Intfo nje nishiye timvu, netimbuti, netinkhomo tenu.” ²⁵ Mosi waphendvula Faro watsi: “Kufanele usivumele sive nemihlatjelo yekushiswa lesitayentela Simakadze, longuNkulunkulu wetfu. ²⁶ Cha, kufanele sihambe netifuyo tetfu; kute nome sinye sifuyo lesitawusala ngemuva. Phela kufanele sihambe naletifuyo siyewukhonta Simakadze, ngobe asati kutsi sitamkhonta ngatiphi, siyawukwati sesifike khona le.”

(Eksodusi 10:28) Faro wakhuluma kuMosi watsi: “Suka la embikwami! Ngingaphindzi ngikubone futsi! Mhlazana ngakubona, kuyawuba kufa kwakho!”

(Eksodusi 11:4-8) Mosi wakhuluma kuFaro, watsi: “Simakadze utsi: ‘Ekhatsi nebusuku ngitawuhamba ngilidzabule ekhatsi live laseGibhithe, ⁵ onkhe ematubulo langemadvodzana alapha eGibhithe atakufa, kusukela etubulweni laFaro losesihlalweni sebukhosi kuze kube ngusetubulweni lesigcilikati lesisilako, kufe nawo onkhe ematubulo etifuyo. ⁶ Kutawuba nesililo lesikhulu lesingazange sesibe khona eveni laseGibhithe, futsi singeke siphindze sibe khona lesifana naso. ⁷ Kodvwa emkhatsini wema-Israyeli kute nasinye sifuyo nome umuntfu lokutawuhhongelwa ngisho yinja, khona utekwati kutsi mine, Simakadze, ngenta umehluko emkhatsini wemaGibhithe nema-Israyeli.’” ⁸ Mosi wephetsa inkhulumo yakhe ngekutsi: “Tonkhe tiphatsimandla takho tiyawukuta tikhotsame embikwami, tingincenge titsi: ‘Wena, nalabantfu labakulandzelako, hambani la.’ Emvakwaloko-ke ngiyawuvele ngihambe.” Mosi waphuma atfukutsele abila, washiya Faro.

it-2-E 436 ¶4

Mosi

Mosi bekadzinga sibindzi nekukholwa kute eme phambi kwaFaro. BoMosi na-Aroni basitwa ngemandla lavela kuJehova kanye nemoya wakhe longcwele kute bakhone kwenta lesabelo. Yibone ngeliso lengcondvo inkantolo lapho bekunaFaro khona, lobekayinkhosi lebeyinemandla kunabo bonkhe babusi lebebaphila ngaleso sikhatsi. Bekute inkhosi lebeyilingana naye emhlabeni, bekatikhukhumeta, angunkulunkulu, atungeletwe beluleki bakhe, anebaholi bemabutfo, anabogadzi kanye netigcili. Ngetulu kwaloko, kulenkatolo bekunebaholi benkholo, baphristi lebebenta imilingo netikhulu, futsi bonkhe laba bebamelene naMosi. Ecinisweni, lamadvodza lebekeme eceleni kwaFaro bekanemandla lamakhulu kulesigodlo. Onkhe lamadvodza bekatawusita Faro kanye nabonkulunkulu baseGibhithe. BoMosi na-Aroni bebeta batokhuluma naye emahlandla lamanyenti, futsi njengobe bebenta njalo, inhlitiyo yaFaro beyichubeka iba lukhuni kakhulu. Njengoba sikhatsi besichubeka bekatimisele kutsi achubeke abusa tigcili takhe lebetingemaHebheru. Ecinisweni, ngemuva kwekutsi boMosi na-Aroni sebamemetele sishayo sesi-8 bacoshwa embikwa kwaFaro, bayalwa kutsi bangaphindzi babuyele kuye ngobe bebatawubulawa.—Eks 10:11, 28.

Kufunisisa Umcebo EVini LaNkulunkulu

(Eksodusi 10:1, 2) Simakadze wakhuluma kuMosi, watsi: “Hamba uye kuFaro, ngobe ngiyente yaba lukhuni inhlitiyo yakhe neyetiphatsimandla takhe, kuze ngitekwenta letibonakaliso tami emkhatsini wabo, ² khona nitekwati kutjela bantfwabenu nebatukulu benu kutsi emaGibhithe ngake ngawenta tilima kanjani ngekwenta letibonakaliso tami kanjani ngekwenta letibonakaliso tami emkhatsini wawo. Nonkhe niyawungati kutsi nginguSimakadze.”

w95-ZU 9/1 11 ¶11

Bofakazi Labamelene Nabonkulunkulu Bemanga

¹¹ Ngesikhatsi ema-Israyeli aseGibhithe, Jehova watfuma Mosi kutsi aye kuFaro futsi watsi: “Hamba uye kuFaro, ngobe ngiyente yaba lukhuni inhlitiyo yakhe neyetiphatsimandla takhe, kuze ngitekwenta letibonakaliso tami emkhatsini wabo, khona nitekwati kutjela bantfwabenu nebatukulu benu kutsi emaGibhithe ngake ngawenta tilima kanjani ngekwenta letibonakaliso tami kanjani ngekwenta letibonakaliso tami emkhatsini wawo. Nonkhe niyawungati kutsi ngingu[Jehova].” (Eksodusi 10:1, 2) Ema-Israyeli latsembekile bekatawucocela bantfwana ngetento letimangalisako Nkulunkulu latenta eGibhithe. Kanjalo nebantfwana babo bacocele bantfwana babo, futsi loko bekutawukwenta kutsi titukulwane ticocele letinye titukulwane. Ngaleyondlela, tento taJehova betitawuhlale tikhunjulwa. Ngendlela lefanako nalamuhla, batali banemsebenti wekufundzisa bantfwana babo ngaJehova.—Dutheronomi 6:4-7; Taga 22:6

(Eksodusi 11:7) Kodvwa emkhatsini wema-Israyeli kute nasinye sifuyo nome umuntfu lokutawuhhongelwa ngisho yinja, khona utekwati kutsi mine, Simakadze, ngenta umehluko emkhatsini wemaGibhithe nema-Israyeli.’”

it-1-E 783 ¶5

Luhambo Lolusuka EGibhithe

Ngekuveta emandla akhe lamakhulu, Jehova waphakamisa libito lakhe ngesikhatsi akhulula ema-Israyeli. Befika baphephile elusentseni lweLwandle Lolubovu, futsi Mosi wahola emadvodza aka-Israyeli ngengoma, kanjalo nasisi waMosi Miriyamu, watsatsa umtjingo wawudlala wahlabela, wahola bonkhe besifazane lebebaphetse tigubhu bahlabela nawo onkhe emadvodza lebekalapho. (Eks 15:1, 20, 21) Ema-Israyeli ehlukaniswa ngalokuphelele netitsa tawo. Ngako-ke ngesikhatsi aphuma eGibhithe, bekungakafaneli esabe umuntfu nobe silwane sesiganga; ngisho nenja beyingeke ibahhongele. (Eks 11:7) Njengoba incwadzi ya-Eksodusi ingasho kutsi Faro waya eLwandle Lolubovu akanye nelibutfo lakhe futsi wafela lapho, kodvwa umbhalo weTihlabelelo 136:15, uyaveta kutsi Jehova wabhubhisa “Faro nemphi yakhe ngalo, ngobe umusa wakhe ume kuze kube phakadze.”

Kufundvwa KweliBhayibheli

(Eksodusi 10:1-15) Simakadze wakhuluma kuMosi, watsi: “Hamba uye kuFaro, ngobe ngiyente yaba lukhuni inhlitiyo yakhe neyetiphatsimandla takhe, kuze ngitekwenta letibonakaliso tami emkhatsini wabo, ² khona nitekwati kutjela bantfwabenu nebatukulu benu kutsi emaGibhithe ngake ngawenta tilima kanjani ngekwenta letibonakaliso tami kanjani ngekwenta letibonakaliso tami emkhatsini wawo. Nonkhe niyawungati kutsi nginguSimakadze.” ³ Ngako-ke boMosi na-Aroni bahamba baya kuFaro, bafike kuye batsi: “Simakadze, longuNkulunkulu wemaHebheru, utsi: ‘Kutawuze kube ngunini seloku wala kutitfoba kimi? Khulula bantfu bami bahambe, khona batewungikhonta. ⁴ Nawuchubeka wala, ungabakhululi bantfu bami, ngitakuletsela sikhonyane la eveni lakho kusasa lolokusako. ⁵ Sitawuba sinyenti kangangekutsi sitawusibekela wonkhe umhlaba wakho, kungasabonakali nemhlabatsi. Sitawudla konkhe lokusindze esangcotfweni, ngisho netihlahla letisele tesiganga leticala kuhluma futsi. ⁶ Sitawugcwala etigodlweni takho, nasetindlini tetiphatsimandla takho, netebantfu bakho baseGibhithe. Ngisho nabokhokho bakho abazange basibone lesinje solomane befika kulelive kuze kube ngunyalo.’” Mosi waphuma kuFaro, wahamba. ⁷ Tiphatsimandla taFaro takhuluma kuye, tatsi: “Kutawuze kube ngunini lomuntfu aluhlupho? Khulula labantfu bahambe, bayewukhonta Simakadze longuNkulunkulu wabo. Awuboni yini longuNkulunkulu wabo. Awuboni yini kutsi lelive laseGibhithe liyabhubha?” ⁸ Ngako boMosi na-Aroni baphindze babuyiswa kuFaro, wakhuluma kubo, watsi: “Hambani niyewukhonta Sinakadze longuNkulunkulu wenu. Kodvwa empeleni bobani laba lenitawuhamba nabo?” ⁹ Mosi wamphendvula watsi: “Sitawuhamba sonkhe: kutawuhamba labasha betfu nalabadzala betfu. Sitawuhamba nemadvodzana etfu, nemadvodzakati etfu, netimvu tetfu, netimbuti tetfu, netinkhomo tetfu; ngobe kufanele sibe nemkhosi wekudvumisa Simakadze.” ¹⁰ Faro wakhuluma kubo, watsi: “Ngifunga Simakadze ngitsi ngingeke nginikhulule kutsi nihambe nebafati nebantfwabenu! Kuyakhanya kutsi nine nenta lisu lebuphekula. ¹¹ Cha! Lokungenani akuhambe nine madvodza niyewukhonta loSimakadze wenu, ngobe empeleni nguloko lenikufunako.” Bakhishwa embidwaFaro. ¹² Simakadze wakhuluma kuMosi, watsi: “Phakamisa tandla takho etikwelive laseGibhithe uletse sikhonyane. Sitawufike sidle yonkhe intfo lemilako lesele kulesangcotfo.” ¹³ Ngako Mosi waphakamisa indvuku yakhe etikwelive laseGibhithe. Simakadze wakhulula umoya wasemphumalanga kutsi uphephetse eveni lonkhe lelo langa nebusuku balo. Kwatsi kusa, wabe sewusitselile sikhonyane. ¹⁴ Sefika silifu, sasibekela lonkhe live laseGibhithe. Sasingazange sesibe khona sikhonyane lesingaka, futsi sasingeyiwuphindza sibe khona. ¹⁵ Sasibekela wonkhe umhlaba, kwadzimate kwaba mnyama khwishi. Sadla konkhe lokwakusindze esangcotfweni; sadla tonkhe titselo tetihlahla. Kute lokuluhlata lokwasala etihlahleni nakuto tonkhe tilimo, eveni lonkhe laseGibhithe.

JULY 27–AUGUST 2

UMCEBO LOSEVINI LANKULUNKULU | EKSODUSI 12

“Loko Lokumelelwa LiPhasika KumaKhristu”

(Eksodusi 12:5-7) Lelizinyane lenu kufanele kube ngulelite sici, libe nemnyaka munye budzala; nilehlukanise nemhlambi wetimvu nome wetimbuti. ⁶ Niyawuligcina kuze kube lilanga leli-14 kuyo lenyanga kusihlwa, mhlazana sonkhe sive sema-Israyeli sitawahlaba lamazinyane. ⁷ Lengati ibobhocwa etinsikeni temnyango nangetulu kwawo kuleyondlu lekuyawube kudlelwa kuyo.

w07-ZU 1/1 20 ¶4

“Kufanele Nijabule Nje Kuphela”

⁴ Jesu wafa ngaNisani 14, 33 C.E. Ka-Israyeli, Nisani 14 bekulilanga lelijabulisako lekugubha umkhosi weliPhasika. Minyaka yonkhe ngalelolanga, imindeni yema-Israyeli beyihlangana ndzawonye kute ijabulele sidlo lebesifaka ekhatsi lizinyane lemvu lebelite sici. Ngekwenta kanjalo, lemindeni beyikhumbula loko lokwentiwa yingati yelizinyane lemvu leyasindzisa ematibulo ema-Israyeli, ngesikhatsi ingilosi yekufa ibulala ematibulo emaGibhithe ngaNisani 14, 1513 B.C.E. (Eksodus 12:1-14) Lemvu yeliPhasika beyimelela Jesu loyo umphostoli Pawula lakhuluma ngaye nakatsi: “Khristu loliPhasika letfu sewuvele unikelwe.” (1 Khorinte 5:7) Njengengati yemvu yeliPhasika, naJesu wanikela ngengati yakhe kute asindzise bantfu labanyenti.—Johane 3:16, 36.

(Eksodusi 12:12, 13) “Ngalobo busuku ngiyawuhamba ngidzabule emkhatsini welive laseGibhithe ngishaye onkhe ematubulo lamadvuna aseGibhithe ebantfu newetifuyo, ngehlulele tonkhe tithico taseGibhithe; nginguSimakadze! ¹³ Lengati iyawuba luphawu kini, kuletindlu lenitawube ningekhatsi kwato. Nangibona lengati; ngiyakwengca, lesishayo singeke sehlele kini nangijezisa emaGibhithe.

it-2-E 583 ¶6

LiPhasika

Letinye tintfo lebetentiwa ngeliPhasika tenteka nakuJesu. Lokunye lokwenteka nguloko lokwafezwa yingati lebeyisemnyango wetindlu eGibhithe, lapho khona yasindzisa ematibulo kutsi angabulawa yingilosi yekufa. Pawula watsi emaKhristu lagcotjiwe bekangematibulo elibandla (Heb 12:23), futsi Khristu bekangumkhululi wawo ngengati yakhe. (1Te 1:10; Efe 1:7) Bekungakafaneli kuphulwe ngisho nalinye litsambo lemvu yeliPhasika. Ngendlela lefanako, kwaphrofethwa kutsi bekungakafaneli kuphulwe ngisho linye litsambo laJesu, futsi loko kwagcwaliseka ngesikhatsi abulawa. (Hl 34:20; Joh 19:36) Ngako-ke, liPhasika lebeligujwa ngemaJuda asendvulo, kanye netintfo letinyenti lebetentiwa ngalelolanga, bekusitfunti setintfo lebetiseta lebetitakwenteka kuJesu Khristu, “liWundlu laNkulunkulu.”—Heb 10:1; Joh 1:29.

(Eksodusi 12:24-27) Lemiyalo niyawuyigcina nine netitukulwane tenu kuze kube nguphakadze naphakadze. ²⁵ Lomkhosi niyawuchubeka kuwenta nome seningenile eveni Simakadze laninika lona njengobe abetsembisile. ²⁶ Nangabe bantfwana benu banibuta batsi: ‘Niwentelani lomkhosi?’ ²⁷ niyawubaphendvula nitsi: ‘Lona ngumhlatjelo weliPhasika wekudvumisa Simakadze, ngobe watengca tindlu tema-Israyeli eGibhithe, ngesikhatsi Simakadze abulala ematubulo emaGibhithe, tsine wasiphephisa.’” Ema-Israyeli aguca phansi akhotsama.

w13 12/15 20 ¶13-14

‘Loku Kuyawuba Sikhumbuto Kini’

¹³ Njengobe situkulwane lesisha sikhula, tifundvo letibalulekile betigcizelelwa, tendluliselwe kuso boyise. Lesinye sifundvo besingaba kutsi Jehova uyativikela tikhonti takhe. Bantfwana bebafundza kutsi Jehova akusho kutsi akacabangi futsi ute luvelo. Bafundza kutsi Jehova ukhona, unguNkulunkulu lophilako lonendzaba nebantfu bakhe futsi lobavikelako. Wakukhombisa loko nakavikela ematibulo ema-Israyeli “ngesikhatsi abulala . . . emaGibhithe.” Wawagcina aphila lamatibulo.

¹⁴ Batali labangemaKhristu, abayalwa kutsi batjele bantfwana babo indzaba lemayelana neliPhasika umnyaka ngamunye. Nobe kunjalo, uyabafundzisa yini bantfwana bakho lesifundvo sekutsi Nkulunkulu uvikela bantfu bakhe? Uyabacinisekisa yini kutsi Jehova nanyalo unguMvikeli webantfu bakhe? (Hla. 27:11; Isa. 12:2) Ungakwenti loko ngendlela yekutikhipha ecaleni, kodvwa bani nencociswano lejabulisako nebantfwana bakho. Yenta imetamo yekutsi ukhulume ngaletifundvo kute ukhutsate umndeni wakho kutsi utfutfuke ebuhlotjeni bawo naNkulunkulu.

Kufunisisa Umcebo EVini LaNkulunkulu

(Eksodusi 12:12) “Ngalobo busuku ngiyawuhamba ngidzabule emkhatsini welive laseGibhithe ngishaye onkhe ematubulo lamadvuna aseGibhithe ebantfu newetifuyo, ngehlulele tonkhe tithico taseGibhithe; nginguSimakadze!

it-2-E 582 ¶2

LiPhasika

Tishayo letilishumi letehlela emaGibhithe tonkhe betitehlulelo tabonkulunkulu baseGibhithe ikakhulukati lesi selishumi lesabulala ematibulo. (Eks 12:12) Imvu (lendvuna) beyingcwele kunkulunkulu Ra, ngako-ke kubhocwa kwengati yemvu yeliphasika etinsikeni temnyango bekusento lesikhombisa kungahloniphi kubantfu baseGibhithe. Kantsi futsi nenkunzi beyingcwele, ngako-ke kubulawa kwematibulo latinkunzi bekusho kwedzelela nkulunkulu Osiris. Faro bekahlonishwa njengobe ayindvodzana yankulunkulu Ra. Kufa kwelitibulo laFaro bekukhombisa kutsi Faro na Ra abakabaluleki futsi bete emandla.

(Eksodusi 12:14-16) Lelilanga liyawuba sikhumbuto kini, niyawuligcina libe lilanga lemkhosi kuSimakadze. Tonkhe titukulwane tenu tiyawulenta libe lilanga lemkhosi kuze kube ngunini nanini.” ¹⁵ Simakadze wachubeka watsi: “Sinkhwa lesinembiliso ningabosidla kuze kuphele emalanga lasikhombisa; nibodla sinkhwa lesite imbiliso kuphela. Ngelilanga lekucala niboyisusa yonkhe imbiliso etindlini tenu, ngobe lotawudla lokufakwe imbiliso emkhatsini welilanga lekucala kuze kube lilanga lesikhombisa, utawuncunywa emkhatsini wesive sema-Israyeli. ¹⁶ Ngelilanga lekucala nangelilanga lesikhombisa niyawuba nemhlangano longcwele. Kufanele kubete lowenta umsebenti kulawo malanga, kodvwa ningakulungisa kudla lenitakudla.

it-1 504 ¶1

Umhlangano

Intfo lebeyingakavami “kulemihlangano lengcwele” kutsi bantfu bekungakafaneli bente imisebenti lematima. Nasi sibonelo, lilanga lekucala nelesikhombisa lemcimbi wesinkhwa lebesite imbiliso belibitwa ngekutsi ngemalanga ‘emihlangano lengcwele,’ njengoba Jehova asho: “Kufanele kubete lowenta umsebenti kulawo malanga, kodvwa ningakulungisa kudla lenitakudla.” (Eks 12:15, 16) Nobe kunjalo, “kulemihlangano lengcwele” baphristi bebamatasa benta iminikelo kuJehova (Lev 23:37, 38), futsi ngekwenta kanjalo bekungasho kutsi baphula umtsetfo lomelene nekwenta umsebenti wamalanga onkhe. Kulamalanga lawa, bekungasiso sikhatsi sekutsi bantfu bahlale nje bangenti lutfo, kunaloko bekusikhatsi sekutsi bacinise buhlobo babo naJehova. Ngelilanga leliSabatha, bantfu bebahlangana ndzawonye kute bakhonte Nkulunkulu futsi batfole ticondziso. Bebafundziswa ngemtsetfo futsi bachazelwe kabanti ngelivi laNkulunkulu njengobe bekwentiwa emasinagogeni. (Imi 15:21) Ngako-ke, njengobe bantfu bebangasebenti ngeliSabatha noma “ngemihlangano lengcwele,” bekufanele bathantaze ngalokujulile bazindle ngemdali wabo kanye nangetinjongo takhe.—Buka nalesitsi ASSEMBLY.

Kufundvwa KweliBhayibheli

(Eksodusi 12:1-20) Simakadze wakhuluma kuMosi naku-Aroni baseseGibhithe, watsi: ² “Lenyanga kufanele ibe yinyanga yekucala emnyakeni wenu. ³ Yendlulisela lomlayeto esiveni sonkhe sema-Israyeli kutsi ngelilanga lelishumi kulenyanga, nguleyo naleyo ndvodza kufanele ikhetsele umndeni wayo lizinyane. ⁴ Nangabe umndeni umncane kakhulu kutsi ungeke ulicedze lelizinyane, ungalidla ndzawonye namakhelwane wawo, kuye ngebunyenti bebantfu balowo mndeni. ⁵ Lelizinyane lenu kufanele kube ngulelite sici, libe nemnyaka munye budzala; nilehlukanise nemhlambi wetimvu nome wetimbuti. ⁶ Niyawuligcina kuze kube lilanga leli-14 kuyo lenyanga kusihlwa, mhlazana sonkhe sive sema-Israyeli sitawahlaba lamazinyane. ⁷ Lengati ibobhocwa etinsikeni temnyango nangetulu kwawo kuleyondlu lekuyawube kudlelwa kuyo. ⁸ Kulobo busuku inyama ibokosiwa idliwe kanye nemibhidvo lebabako kanye nesinkhwa lesite imbiliso. ⁹ Lenyama ningayidli iluhlata nome iphekiwe, kodvwa niboyidla yosiwe yonkhe, kanye nenhloko yayo, nemilente yayo, nekwangekhatsi kwayo. ¹⁰ Lenyama niboyidla ningalishiyeli likusasa; nakukhona lesele, niboyishisa. ¹¹ Nibotsi niyidla, nibe tinkhalo tenu tiboshiwe, netinyawo tenu tiseticatfulweni, nendvuku ibe isesandleni; niyidle ngekushesha. Lelo-ke liPhasika lekudvumisa Simakadze. ¹² “Ngalobo busuku ngiyawuhamba ngidzabule emkhatsini welive laseGibhithe ngishaye onkhe ematubulo lamadvuna aseGibhithe ebantfu newetifuyo, ngehlulele tonkhe tithico taseGibhithe; nginguSimakadze! ¹³ Lengati iyawuba luphawu kini, kuletindlu lenitawube ningekhatsi kwato. Nangibona lengati; ngiyakwengca, lesishayo singeke sehlele kini nangijezisa emaGibhithe. ¹⁴ Lelilanga liyawuba sikhumbuto kini, niyawuligcina libe lilanga lemkhosi kuSimakadze. Tonkhe titukulwane tenu tiyawulenta libe lilanga lemkhosi kuze kube ngunini nanini.” ¹⁵ Simakadze wachubeka watsi: “Sinkhwa lesinembiliso ningabosidla kuze kuphele emalanga lasikhombisa; nibodla sinkhwa lesite imbiliso kuphela. Ngelilanga lekucala niboyisusa yonkhe imbiliso etindlini tenu, ngobe lotawudla lokufakwe imbiliso emkhatsini welilanga lekucala kuze kube lilanga lesikhombisa, utawuncunywa emkhatsini wesive sema-Israyeli. ¹⁶ Ngelilanga lekucala nangelilanga lesikhombisa niyawuba nemhlangano longcwele. Kufanele kubete lowenta umsebenti kulawo malanga, kodvwa ningakulungisa kudla lenitakudla. ¹⁷ LoMkhosi Wesinkhwa Lesingenambiliso niyawuhlala njalo niwenta, ngobe kungalo lelo langa lengakhipha ngalo tive tenu eGibhithe. Lelilanga niyawuligcina titukulwane ngetitukulwane. Kuyawuba nguwona msimeto wenu longeke uphele nome uguculwe. ¹⁸ Kusukela kusihlwa ngelilanga leli-14 lenyanga yekucala kuze kube kusihlwa ngelilanga lema-21 ningasidli sinkhwa lesinembiliso. ¹⁹ Kuyawuze kuphele emalanga lasikhombisa imbiliso ingatfolakali etindlini tenu; lowo loyawutfolakala kutsi udle lokufakwe imbiliso, uyawuncunywa esiveni sema-Israyeli, nome ngabe wekutalwa, nome ngabe wekuhamba kulelo live. ²⁰ Ningakudli lokufakwe imbiliso, yonkhe indzawo lapho nihlala khona nibodla sinkhwa lesite imbiliso.”

[Picture on page 1]

Tikhombo Tencwajana Yekubhalela Emhlanganweni Wekuphila KwemaKhristu Nemsebenti Wawo

JULY 6-12

UMCEBO LOSEVINI LANKULUNKULU | EKSODUSI 6-7

“Utawubona-ke Nyalo Lengitakwenta KuFaro”

(Eksodusi 6:1) Simakadze watsi kuMosi: “Utawubona-ke nyalo lengitakwenta kuFaro. Utabakhulula bantfu bami bahambe ngenca yesandla lesinemandla; yebo, ngenca yesandla sami lesinemandla uyawubacosha besuke eveni lakhe.”

(Eksodusi 6:6, 7) Ngako-ke tjela ema-Israyeli utsi: ‘NginguSimakadze; ngitanikhulula kulokugcilatwa kwenu ngemaGibhithe. Ngengalo yami leyelulekile nangetento temandla lengiyawubajezisa ngato ngiyawunephula kubo. ⁷ Ngitanenta nibe sive sami, mine ngibe nguNkulunkulu wenu. Nine-ke niyawungati kutsi nginguSimakadze longuNkulunkulu wenu lowanikhipha ngaphansi kwelijoko laseGibhithe.

it-2-E 436 ¶3

Mosi

Kwaphindze kwaba nelushintjo lolukhulu emadvodzeni aka-Israyeli. Ekucaleni bamemukela Mosi kutsi kube nguye lobekatabakhulula, kodvwa ngemuva kwekutsi Faro akhiphe umyalo wekutsi basetjentiswe kamatima, bakhonona kuMosi, kangangekutsi Mosi waze wakhala kuJehova, ngenca yekudvumateka. (Eks 4:29-31; 5:19-23) Loyo Losetikwako Konkhe wamcinisa Mosi ngekutsi amvetele kutsi bekatakufeza loko Abrahama, Isaka naJakobe lebebakulangatelela, loku kuyiveta ngalokuphelele inchazelo yelibito lelitsi Jehova ngekukhulula ema-Israyeli futsi awente abe sive lesikhulu eveni lesetsembiso. (Eks 6:1-8) Nanobe kunjalo, emadvodza aka-Israyeli akazange amlalele Mosi. Kodvwa ngemuva kwesishayo sesi-9, amsekela ngalokucinile, wakhona nekusihlela kahle lesive ngemuva kwesishayo sesi-10 kute sikhone kuphuma kulelive laseGibhithe ‘njengelibutfo lemphi.’—Eks 13:18.

(Eksodusi 7:4, 5) Faro angeke anilalele, ngako-ke ngiyakwehlisela sandla sami eGibhithe, ngiyijezise kabuhlungu, ngikhiphe sive sami, bantfwana baka-Israyeli, eGibhithe. ⁵ EmaGibhithe ngulapho ayawungati khona kutsi nginguSimakadze, nase ngelule sandla sami ngikhulula ema-Israyeli emkhatsini wawo.”

it-2-E 436 ¶1-2

Mosi

Ngesikhatsi beme phambi kwaFaro waseGibhithe. BoMosi na-Aroni bebabantfu lebebabalulekile ‘emphini lebeyisemkhatsini wabonkulunkulu.’ Emkhatsini webaphristi lebebenta imilingo, bekunetikhulu boJanesi naJambresi (2Tm 3:8), futsi Faro wakhipha umyalo wekutsi bonkhe bonkulunkulu baseGibhithe bamelane naJehova. Simangaliso sekucala lesentiwa ngu-Aroni phambi kwaFaro acondziswa nguMosi saveta kutsi Jehova bekanemandla kakhulu kunabonkulunkulu baseGibhithe ngisho nobe nje inhlitiyo yaFaro yachubeka yaba lukhuni nakakhulu. (Eks 7:8-13) Ngesikhatsi kugadla sishayo sesitsatfu, ngisho nebaphristi baFaro batsi: “Ngumuno waNkulunkulu ke-lo!” Nangalesikhatsi kugadla sishayo sematfumba, bonkhe behluleka kuyokuma phambi kwaFaro kute bamelane naMosi mayelana nalesishayo.—Eks 8:16-19; 9:10-12.

Tishayo tatsambisa tinhlitiyo talabanye taphindze tenta talabanye taba lukhuni. BoMosi na-Aroni bekungibo lebebamemetela tishayo ngasinye kuletishayo letiLishumi. Letishayo lebetimenyetelwa, betikhombisa bufakazi bekutsi Mosi bekangummeleli waJehova. Libito laJehova kwakhulunywa ngalo kuyo yonkhe iGibhithe, lafeza kokubili kutsambisa tinhlitiyo talabanye bantfu nekutenta tibe lukhuni, lokusho kutsi latsambisa tinhlitiyo tema-Israyeli kanye netalamanye emaGibhithe, labese liyenta iba lukhuni inhlitiyo yaFaro nebeluleki bakhe kanye nalabo labamsekelako. (Eks 9:16; 11:10; 12:29-39) EmaGibhithe akazange akucabange kutsi bekakhube bonkulunkulu babo, kunaloko bekati kutsi nguJehova lobekehlulela bonkulunkulu babo. Nasekugadle tishayo letingu-9, naMosi besekamkhulu “kutiphatsimandla taFaro nakumaGibhithe onkhe.”—Eks 11:3.

Kufunisisa Umcebo EVini LaNkulunkulu

(Eksodusi 6:3) Ngabonakala ku-Abrahama, naku-Isaka, nakuJakobe kutsi nginguNkulunkulu Somandla, kodvwa angizange ngibatise lelibito lami lelingcwele, Simakadze.

it-1-E 78 ¶3-4

Somandla

Jehova wasebentisa lesicu lesitsi “Nkulunkulu Somandla” (ʼEl Shad·daiʹ) ngesikhatsi enta setsembiso ku-Abrahama lebesimayelana nekutalwa kwa-Isaka, futsi lesetsembiso besidzinga kutsi Abrahama abe nekukholwa lokucinile emandleni aNkulunkulu kutsi bekatasifeza. Lesicu saphindze sasetjentiswa ngesikhatsi kukhulunywa ngaNkulunkulu kutsi nguye lobekatawubusisa bo-Isaka naJakobe kutsi kube ngibo tindlalifa tesivumelwane lesentiwa ku-Abrahama.—Gen 17:1; 28:3; 35:11; 48:3.

Ngekuvumelana naloku, Jehova waphindze washo nankha emavi kuMosi, watsi: “Ngabonakala ku-Abrahama, naku-Isaka, nakuJakobe kutsi nginguNkulunkulu Somandla [beʼElʹ Shad·daiʹ], kodvwa angizange ngibatise lelibito lami lelingcwele, [Jehova].” (Eks 6:3) Kodvwa loko akusho kutsi lamadvodza lebeketsembekile bekangalati libito laJehova, ngobe bekalisebentisa tikhatsi letinyenti lokufaka ekhatsi nalabanye labaphila ngaphambi kwabo. (Gen 4:1, 26; 14:22; 27:27; 28:16) Ecinisweni, encwadzini yaGenesisi lakulandziswa khona ngekuphila kwemadvodza lebeketsembekile, ligama lelitsi “Somandla,” livela tikhatsi letingu-6, kantsi libito laJehova lona livela tikhatsi letingu-172 emibhalweni yekucala yesiHebheru. Nanobe lamadvodza lebeketsembekile bekakujabulela kubona kutsi Nkulunkulu bekumfanele kubitwa ngalesicu lesitsi “Somandla,” akazange sekalitfole litfuba lekwati ngalokuphelele inchazelo yelibito laNkulunkulu lelitsi Jehova kanye nekutsi lisho kutsini. Mayelana naloko, i-The Illustrated Bible Dictionary (Vol. 1, p. 572) yatsi: “Loko lokwembulwa kulamadvodza lebeketsembekile mayelana netetsembiso telikusasa, bekuveta kutsi bewaciniseka kutsi Yena, Yahweh, bekanguNkulunkulu (ʼel) lebebangametsemba kutsi bekatatifeza leto tetsembiso. Lesihlahla lebesivutsa besiveta emandla lamakhulu aNkulunkulu, kutisita ngekushesha tinceku takhe natidzinga lusito kanye nekuchubeka anato, konkhe loku bekuveta inchazelo yelibito lelitsi Yahweh.”—Edited by J. D. Douglas, 1980.

(Eksodusi 7:1) Simakadze wakhuluma kuMosi, watsi:” Buka la, wena ngitakwenta ufane naNkulunkulu kuFaro; Aroni, umnakenu, yena aba ngumphrofethi wakho.

it-2-E 435 ¶5

Mosi

Mosi akayekeliswanga sabelo sakhe ngenca yekungatetsembi. Kodvwa Mosi wakhombisa kungatetsembi ngekutsi atsi bekangakwati kahle kukhuluma. Kulesikhatsi lesi, Mosi besekashintjile kunasesikhatsini lebesendlulile, lapho khona atenta umkhululi wema-Israyeli eminyakeni lengu-40 lebeyengcile. Nobe kunjalo, wachubeka akhonona kuJehova, kangangekutsi wagcine sekacela Jehova kutsi amyekelise lesabelo. Nanobe loko kwamtfukutselisa Nkulunkulu kodvwa akazange amlahle Mosi. Kunaloko, wamniketa umnakabo Aroni kutsi abe ngumkhulumeli wakhe. Njengobe Mosi bekangummeleli waNkulunkulu, ngako Mosi waba “njengaNkulunkulu” ku-Aroni lobekangumkhulumeli wakhe. Ngekuchubeka ahlangana nemadvodza aka-Israyeli kanye naFaro bekubonakala kutsi Nkulunkulu nguye lobekakhipha ticondziso nemiyalo, bese Mosi utjela Aroni kutsi akhulume lemiyalo kuFaro (loyo lowangena esikhundleni saFaro, lowabalekelwa nguMosi eminyakeni lengu-40 leyendlulile). (Eks 2:23; 4:10-17) Ngekuhamba kwesikhatsi, Jehova watsi ku-Aroni ‘ungumphrofethi’ waMosi, lokusho kutsi, njengoba Mosi bekangumphrofethi waNkulunkulu futsi acondziswa nguye, kanjalo na-Aroni bekufanele acondziswe nguMosi. Mose waphindze watjelwa kutsi bekatawentiwa ‘afane naNkulunkulu kuFaro,’ lobekusho kutsi bekatawuniketwa emandla lavela kuNkulunkulu neligunya lelingetulu kwaFaro, kuze kube bete sidzingo sekwesaba lenkhosi yaseGibhithe.—Eks 7:1, 2.

Kufundvwa KweliBhayibheli

(Eksodusi 6:1-15) Simakadze watsi kuMosi: “Utawubona-ke nyalo lengitakwenta kuFaro. Utabakhulula bantfu bami bahambe ngenca yesandla lesinemandla; yebo, ngenca yesandla sami lesinemandla uyawubacosha besuke eveni lakhe.” ² Nkulunkulu wakhuluma kuMosi, watsi: “NginguSimakadze. ³ Ngabonakala ku-Abrahama, naku-Isaka, nakuJakobe kutsi nginguNkulunkulu Somandla, kodvwa angizange ngibatise lelibito lami lelingcwele, [Jehova]. ⁴ Ngaphindze ngenta sivumelwane sami kanye nabo, ngabetsembisa kutsi ngiyawubanika live laseKhenani, lapho babehlala khona njengetihambi. ⁵ Ngikuvile, futsi, kububula nekukhala kwesive sami ema-Israyeli lagcilatwe ngemaGibhithe; ngisikhumbulile sivumelwane sami. ⁶ Ngako-ke tjela ema-Israyeli utsi: ‘NginguSimakadze; ngitanikhulula kulokugcilatwa kwenu ngemaGibhithe. Ngengalo yami leyelulekile nangetento temandla lengiyawubajezisa ngato ngiyawunephula kubo. ⁷ Ngitanenta nibe sive sami, mine ngibe nguNkulunkulu wenu. Nine-ke niyawungati kutsi nginguSimakadze longuNkulunkulu wenu lowanikhipha ngaphansi kwelijoko laseGibhithe. ⁸ Ngitaningenisa eveni njengobe ngafunga ngekuphakamisa tandla kutsi ngitalinika bo-Abrahama, na-Isaka, naJakobe. Ngitanipha lona libe live lenu. NginguSimakadze.’” ⁹ Mosi wawatjela loko ema-Israyeli, kodvwa akazange amlalele, ngobe umoya wawo wawephulwe sihluku nekugcilatwa kwawo. ¹⁰ Simakadze wakhuluma kuMosi, watsi: ¹¹ “Hamba utjele Faro, inkhosi yaseGibhithe, kutsi akakhulule ema-Israyeli aphume kulelive lakhe.” ¹² Kodvwa Mosi waphendvula Simakadze, watsi: “Ingani ema-Israyeli akangilaleli; pho, Faro angangilalela kanjani? Angisilo libeka ekukhulumeni.” ¹³ Simakadze wakhuluma kuMosi na-Aroni, watsi: “Tjelani ema-Israyeli naFaro, inkhosi yaseGibhithe, kutsi nginitfume kutsi nihole ema-Israyeli aphume eGibhithe.” ¹⁴ Laba-ke baholi betive tabo: Emadvodzana aRubeni, labelitubulo la-Israyeli: bekuboHanoki, naPhalu, naHesroni, naKhami; leyo-ke bekungimindeni yakaRubeni. ¹⁵ Emadvodzana aSimeyoni bekuboJemuweli, naJamini, na-Ohadi, naJakhini, naSohari, naShawula, indvodzana yemKhenanikati; leyo-ke bekungimindeni yakaSimeyoni.

JULY 13-19

UMCEBO LOSEVINI LANKULUNKULU | EKSODUSI 8-9

“Ngekungati Faro Wafaka Sandla Ekufezekeni Kwenjongo YaNkulunkulu”

(Eksodusi 8:15) Kodvwa Faro watsi kube abone kutsi tigogodvolo setifile, wenta inhlitiyo yakhe yaba lukhuni, njengobe abevele ashito Simakadze. Faro akazange abalalele boMosi na-Aroni kutsi batsini.

it-2-E 1040-1041

Inkhani

Jehova solo ubabeketelele bantfu kanye netive kutsi tichubeke tiphila ngisho nobe tifanelwe kufa. (Gen 15:16; 2Pe 3:9) Nobe kunjalo labanye bayishintjile indlela labaphila ngayo kute batfole umusa wakhe (Jos 2:8-14; 6:22, 23; 9:3-15), kantsi labanye batente taba lukhuni tinhlitiyo tabo ngelizinga lelikhulu kute bamelane naJehova nebantfu bakhe. (Dut 2:30-33; Jos 11:19, 20) Ngengobe Jehova angabavimbeli bantfu kutsi babe nenkhani ngako watiwa njengaNkulunkulu ‘lovumela bantfu kutsi babe netinhlitiyo letilukhuni noma atente kutsi tibe lukhuni.’ Nasekabehlulela futsi atiphindziselela kubantfu labanenkhani, umphumela ubonakala emandleni akhe lamakhulu futsi ente libito lakhe liphakanyiswe.—Catsanisa na-Eks 4:21; Joh 12:40; Rom 9:14-18.

(Eksodusi 8:18, 19) Labalumbako benta butsi bekwenta imilingo; kodvwa behluleka kwenta timbuzulwane. Letimbuzulwane tahlasela bantfu kanye nemfuyo. ¹⁹ Labalumbako bakhuluma kuFaro batsi: “Ngumuno waNkulunkulu-ke lo!” Kodvwa inhlitiyo yaFaro yaba lukhuni; akazange akunake lokwakushiwo boMosi na-Aroni, njengobe abevele ashito Simakadze.

(Eksodusi 9:15-17) Kube sandla sami bengisiphakamisele etikwakho ngesifo lesingelapheki, ngabe seniphele nya. ¹⁶ Kodvwa noko kuze kube manje ngisakuphephisile, khona ngitekukhombisa emandla ami, nekutsi libito lami litewudvunyiswa emhlabeni wonkhe. ¹⁷ Noko nanyalo seloku usatikhukhumeta ngetulu kwebantfu bami, awukabavumeli kutsi bakhululeke bahambe.

it-2-E 1181 ¶3-5

Bubi

Ngetulu kwaloko, Jehova Nkulunkulu usebentisa tindlela takhe kute ente bantfu lababi bafeze injongo yakhe bangakahlosi. Ngisho nobe labantfu bamelene naNkulunkulu, kodvwa uyabavimba nakunesidzingo kute avikele tikhonti takhe letetsembekile, futsi angavumela kutsi tento talababi tichubeke kute ekugcineni angcwelise libito lakhe. (Rom 3:3-5, 23-26; 8:35-39; Hl 76:10) Loku kuvetwa kahle embhalweni weTaga 16:4: “Konkhe Simakadze lakwentile kunesiphetfo sako, ngisho nalomubi umentele lilanga lakhe lekubhujiswa.”

Indzaba lesikhuluma ngayo lapha nguleyaFaro lapho khona Jehova asebentisa boMosi na-Aroni amtjela kutsi akhulule ema-Israyeli ekubeni tigcili. Akusuye Nkulunkulu lowenta kutsi lombusi waseGibhithe abe nenhlitiyo lembi, kodvwa wamvumela kutsi achubeke aphila waphindze wenta tintfo lebetitokwenta Faro ativete kutsi abenenhlitiyo lembi futsi afanelwe kufa. Injongo yaJehova yekwenta loko ichazwe kahle ku-Eksodusi 9:16 lapho khona Jehova atsi: “Kuze kube manje ngisakuphephisile, khona ngitekukhombisa emandla ami, nekutsi libito lami litewudvunyiswa emhlabeni wonkhe.”

Tishayo leTilishumi letehlela emaGibhithe talandzelwa kubhujiswa kwaFaro nelibutfo lakhe eLwandle Lolubovu, takhombisa kutsi Jehova unemandla lamakhulu. (Eks 7:14–12:30; Hl 78:43-51; 136:15) Eminyakeni leyalandzela, tive betisolo tikhuluma ngako loku, futsi loko kwenta kutsi libito laNkulunkulu limenyetelwe emhlabeni wonkhe. (Jos 2:10, 11; 1Sa 4:8) Kube Jehova washeshe wambhubhisa Faro, bekangeke aze abonakale emandla akhe lamniketa ludvumo ngesikhatsi akhulula bantfu bakhe.

Kufunisisa Umcebo EVini LaNkulunkulu

(Eksodusi 8:21) Nawungabakhululi bantfu bami kutsi bahambe, ngitawutfumela libulo letibawu kuwe, nakutiphatsimandla takho, nasesiveni sakho, nasetindlini takho. Tindlu temaGibhithe tiyawugcwala tibawu, tembese ngisho nelive lawo lonkhe.

it-1-E 878

Tibawu

Akucaci kutsi bekuluhlobo luni lwesilokatane lolu lolwabhalwa etincwadzini tekucala tesiHebheru mayelana nesishayo sesine lesehlela emaGibhithe, futsi kwaba sishayo sekucala lesingazange siwatsintse ema-Israyeli lebekaseGosheni. (Eks 8:21, 22, 24, 29, 31; Hl 78:45; 105:31.

Kungenteka letibawu lebetisishayo sesine eGibhithe, kungenteka bekutilokatane lebetisutela sikhumba semuntfu nobe sesilwane kute timunye ingati. Tibawu natisesetibungu tiba semtimbeni wesilwane nobe wemuntfu kute tikhule ngekumunya ingati, futsi loko bekubangela bantfu tifo kuletinye tindzawo. Ngako-ke, lesishayo setibawu saletsa lusizi kubantfu baseGibhithe kanye nasetilwaneni lebebatifuyile, futsi kuletinye timo betize tibabulale bantfu netilwane.

(Eksodusi 8:25-27) Faro wase ubita boMosi na-Aroni; befika, watsi kubo: “Hambani niyewunikela imihlatjelo kuloNkulunkulu wenu, kodvwa ningaphumi kulo lelive.” ²⁶ Mosi wamphendvula watsi: “Cha, kungeke kulunge loko, ngobe leminikelo yetfu yemihlatjelo itawuba sikhubekiso nesicefe kubantfu baseGibhithe. Nasinikela ngemihlatjelo lesinengiso emehlweni abo, bangahlala kanjani bangasigcobi ngematje? ²⁷ Kufanele sitsatse luhambo lwemalanga lamatsatfu siye ehlane, kuze sinikele ngemihlatjelo kuSimakadze, longuNkulunkulu wetfu, njengobe yena asiyalile.”

w04 3/15 25 ¶9

Emaphuzu Lagcamile Lasencwadzini Ya-Eksodusi

8:26, 27—Kungani Mosi atsi beyitawuba sikhubekiso imihlatjelo yema-Israyeli kubantfu baseGibhithe? Tilwane letinyenti betihlonishwa kakhulu eGhibithe. Ngako, loku kwasicinisa nakakhulu sincumo saMosi sekutsi ema-Israyeli avunyelwe kutsi ayokwenta imihlatjelo kuJehova.

Kufundvwa KweliBhayibheli

(Eksodusi 8:1-19) Simakadze wakhuluma kuMosi, watsi: “Hamba uye kuFaro umtjele kutsi Simakadze utsi: ‘Khulula sive sami sihambe, khona sitekungikhonta. ² Nawala kusikhulula, live lakho lonkhe ngitalishaya ngetigogodvolo. ³ Umfula iNayili utawugcwala tigogodvolo, tize tenyukele ngisho nasesigodlweni sakho, nasekamelweni lakho lekulala, nasembhedzeni wakho, nasetindlini tetiphatsimandla takho, nakutakhamiti takho, nakubohhavini bakho, nasetitjeni tenhlama. ⁴ Letigogodvolo tiyawugcumela etikwakho, nasetikwebantfu bakho, nasetikwetiphatsimandla takho tonkhe.’” ⁵ Simakadze wakhuluma kuMosi, watsi: “Tjela Aroni utsi: ‘Yelula sandla sakho lesinendvuku usibhekise ngasemifuleni, nasemachaphotini, nasetitibeni wente tigogodvolo tiphumele ngaphandle emhlabatsini eveni laseGibhithe.’” ⁶ Ngako-ke Aroni wayengamisa etikwemanti aseGibhithe. Tigogodvolo taphuma tananabuka nalo lonkhe live laseGibhithe. ⁷ Nalabalumbi benta njalo ngemilingo yabo; tigogodvolo batikhiphela emhlabatsini eveni laseGibhithe. ⁸ Faro wabita boMosi na-Aroni; befika, watsi kubo: “Thandazani kuSimakadze nimcele kutsi esuse letigogodvolo la kimi nakulesive sami. Ngitawube sengiyabakhulula labantfu benu bahambe, khona batawunikela imihlatjelo kuSimakadze.” ⁹ Mosi waphendvula Faro watsi: “Anginike wena emandla nelilungelo lekungibekela sikhatsi lengingakuthandazela ngaso wena netiphatsimandla takho kanye nesive sakho, kutsi tiphele letigogodvolo lapha emkhatsini wenu nasetindlini tenu, tisale emfuleni iNayili kuphela.” ¹⁰ Faro wamphendvula watsi: “Kusasa.” Mosi watsi: “Kulungile, nkhosi, kutakwenteka njengobe ufuna, kuze wati kutsi kute lofanana naSimakadze longuNkulunkulu wetfu. ¹¹ Letigogodvolo titawusuka kuwe, nasetindlini takho, nasetiphatsimandleni takho, nasesiveni sakho. Titawusala emfuleni iNayili kuphela.” ¹² BoMosi na-Aroni besuka kuFaro bahamba. Mosi wafike wathandaza kuSimakadze amcela kutsi esuse letigogodvolo letase titseleke etikwaFaro. ¹³ Simakadze wenta njengesicelo saMosi. Tafa tonkhe tigogodvolo letatisetindlini, nasetibuyeni, nasemasimini. ¹⁴ EmaGibhithe atibutsisa ndzawonye taba tincumbi letinkhulu. Lonkhe live lanuka luboti. ¹⁵ Kodvwa Faro watsi kube abone kutsi tigogodvolo setifile, wenta inhlitiyo yakhe yaba lukhuni, njengobe abevele ashito Simakadze. Faro akazange abalalele boMosi na-Aroni kutsi batsini. ¹⁶ Simakadze wakhuluma kuMosi, watsi: “Khuluma ku-Aroni utsi: ‘Yelula indvuku yakho ushaye lutfuli lwemhlabatsi ngalendvuku yakho, lonkhe lutfuli lwelive laseGibhithe lutawugucuka lube timbuzulwane.’” ¹⁷ Bavele bakwenta loko. Aroni welula sandla sakhe, washaya lutfuli lwemhlabatsi ngendvuku yakhe; lonkhe lutfuli lwagucuka lwaba timbuzulwane letahlasela bantfu netilwane. Lonkhe lutfuli lwemhlabatsi eGibhithe lwagucuka lwaba timbuzulwane. ¹⁸ Labalumbako benta butsi bekwenta imilingo; kodvwa behluleka kwenta timbuzulwane. Letimbuzulwane tahlasela bantfu kanye nemfuyo. ¹⁹ Labalumbako bakhuluma kuFaro batsi: “Ngumuno waNkulunkulu-ke lo!” Kodvwa inhlitiyo yaFaro yaba lukhuni; akazange akunake lokwakushiwo boMosi na-Aroni, njengobe abevele ashito Simakadze.

JULY 20-26

UMCEBO LOSEVINI LANKULUNKULU | EKSODUSI 10-11

“BoMosi na-Aroni Bakhombisa Kutsi Bebanesibindzi”

(Eksodusi 10:3-6) Ngako-ke boMosi na-Aroni bahamba baya kuFaro, bafike kuye batsi: “Simakadze, longuNkulunkulu wemaHebheru, utsi: ‘Kutawuze kube ngunini seloku wala kutitfoba kimi? Khulula bantfu bami bahambe, khona batewungikhonta. ⁴ Nawuchubeka wala, ungabakhululi bantfu bami, ngitakuletsela sikhonyane la eveni lakho kusasa lolokusako. ⁵ Sitawuba sinyenti kangangekutsi sitawusibekela wonkhe umhlaba wakho, kungasabonakali nemhlabatsi. Sitawudla konkhe lokusindze esangcotfweni, ngisho netihlahla letisele tesiganga leticala kuhluma futsi. ⁶ Sitawugcwala etigodlweni takho, nasetindlini tetiphatsimandla takho, netebantfu bakho baseGibhithe. Ngisho nabokhokho bakho abazange basibone lesinje solomane befika kulelive kuze kube ngunyalo.’” Mosi waphuma kuFaro, wahamba.

w09-ZU 7/15 20 ¶6

Lingisa Jesu—Ushumayele Ngesibindzi

⁶ Cabanga ngesibindzi lesakhonjiswa nguMosi ngesikhatsi ayokhuluma naFaro, lobekangumbusi lobekatsatfwa njengekutsi ungunkulunkulu, hhayi ummeleli wabonkulunkulu futsi ayindvodzana yankulunkulu welilanga, Ra. Njengalabanye boFaro, kungenteka naye bakakhonta sitfombe semfanekiso wakhe. Konkhe Faro lebekakukhuluma bekuba ngumtsetfo. Njengobe Faro bekanemandla, atikhukhumeta futsi anenkhani, bekangafuni kutjelwa kutsi enteni. Kodwa Mosi lobekatfobekile, angumelusi, waya kuyokhuluma naFaro emahlandla lamanyenti ngisho nobe bekangakemukeleki futsi angakabitwa. Yini Mosi layisho kuFaro? Wamtjela ngaletishayo lebetibhubhisa. Mosi bekafuna kutsi Faro enteni? Bekafuna kutsi Faro avumele tigcili takhe kutsi tiphume kulelive laseGibhithe! Bekasidzinga yini sibindzi? Yebo!—Num. 12:3; Heb. 11:27.

(Eksodusi 10:24-26) Faro wabita Mosi, wafike watsi kuye: “Hambani niyewukhonta Simakadze; nihambe nebafati benu nebantfwana benu. Intfo nje nishiye timvu, netimbuti, netinkhomo tenu.” ²⁵ Mosi waphendvula Faro watsi: “Kufanele usivumele sive nemihlatjelo yekushiswa lesitayentela Simakadze, longuNkulunkulu wetfu. ²⁶ Cha, kufanele sihambe netifuyo tetfu; kute nome sinye sifuyo lesitawusala ngemuva. Phela kufanele sihambe naletifuyo siyewukhonta Simakadze, ngobe asati kutsi sitamkhonta ngatiphi, siyawukwati sesifike khona le.”

(Eksodusi 10:28) Faro wakhuluma kuMosi watsi: “Suka la embikwami! Ngingaphindzi ngikubone futsi! Mhlazana ngakubona, kuyawuba kufa kwakho!”

(Eksodusi 11:4-8) Mosi wakhuluma kuFaro, watsi: “Simakadze utsi: ‘Ekhatsi nebusuku ngitawuhamba ngilidzabule ekhatsi live laseGibhithe, ⁵ onkhe ematubulo langemadvodzana alapha eGibhithe atakufa, kusukela etubulweni laFaro losesihlalweni sebukhosi kuze kube ngusetubulweni lesigcilikati lesisilako, kufe nawo onkhe ematubulo etifuyo. ⁶ Kutawuba nesililo lesikhulu lesingazange sesibe khona eveni laseGibhithe, futsi singeke siphindze sibe khona lesifana naso. ⁷ Kodvwa emkhatsini wema-Israyeli kute nasinye sifuyo nome umuntfu lokutawuhhongelwa ngisho yinja, khona utekwati kutsi mine, Simakadze, ngenta umehluko emkhatsini wemaGibhithe nema-Israyeli.’” ⁸ Mosi wephetsa inkhulumo yakhe ngekutsi: “Tonkhe tiphatsimandla takho tiyawukuta tikhotsame embikwami, tingincenge titsi: ‘Wena, nalabantfu labakulandzelako, hambani la.’ Emvakwaloko-ke ngiyawuvele ngihambe.” Mosi waphuma atfukutsele abila, washiya Faro.

it-2-E 436 ¶4

Mosi

Mosi bekadzinga sibindzi nekukholwa kute eme phambi kwaFaro. BoMosi na-Aroni basitwa ngemandla lavela kuJehova kanye nemoya wakhe longcwele kute bakhone kwenta lesabelo. Yibone ngeliso lengcondvo inkantolo lapho bekunaFaro khona, lobekayinkhosi lebeyinemandla kunabo bonkhe babusi lebebaphila ngaleso sikhatsi. Bekute inkhosi lebeyilingana naye emhlabeni, bekatikhukhumeta, angunkulunkulu, atungeletwe beluleki bakhe, anebaholi bemabutfo, anabogadzi kanye netigcili. Ngetulu kwaloko, kulenkatolo bekunebaholi benkholo, baphristi lebebenta imilingo netikhulu, futsi bonkhe laba bebamelene naMosi. Ecinisweni, lamadvodza lebekeme eceleni kwaFaro bekanemandla lamakhulu kulesigodlo. Onkhe lamadvodza bekatawusita Faro kanye nabonkulunkulu baseGibhithe. BoMosi na-Aroni bebeta batokhuluma naye emahlandla lamanyenti, futsi njengobe bebenta njalo, inhlitiyo yaFaro beyichubeka iba lukhuni kakhulu. Njengoba sikhatsi besichubeka bekatimisele kutsi achubeke abusa tigcili takhe lebetingemaHebheru. Ecinisweni, ngemuva kwekutsi boMosi na-Aroni sebamemetele sishayo sesi-8 bacoshwa embikwa kwaFaro, bayalwa kutsi bangaphindzi babuyele kuye ngobe bebatawubulawa.—Eks 10:11, 28.

Kufunisisa Umcebo EVini LaNkulunkulu

(Eksodusi 10:1, 2) Simakadze wakhuluma kuMosi, watsi: “Hamba uye kuFaro, ngobe ngiyente yaba lukhuni inhlitiyo yakhe neyetiphatsimandla takhe, kuze ngitekwenta letibonakaliso tami emkhatsini wabo, ² khona nitekwati kutjela bantfwabenu nebatukulu benu kutsi emaGibhithe ngake ngawenta tilima kanjani ngekwenta letibonakaliso tami kanjani ngekwenta letibonakaliso tami emkhatsini wawo. Nonkhe niyawungati kutsi nginguSimakadze.”

w95-ZU 9/1 11 ¶11

Bofakazi Labamelene Nabonkulunkulu Bemanga

¹¹ Ngesikhatsi ema-Israyeli aseGibhithe, Jehova watfuma Mosi kutsi aye kuFaro futsi watsi: “Hamba uye kuFaro, ngobe ngiyente yaba lukhuni inhlitiyo yakhe neyetiphatsimandla takhe, kuze ngitekwenta letibonakaliso tami emkhatsini wabo, khona nitekwati kutjela bantfwabenu nebatukulu benu kutsi emaGibhithe ngake ngawenta tilima kanjani ngekwenta letibonakaliso tami kanjani ngekwenta letibonakaliso tami emkhatsini wawo. Nonkhe niyawungati kutsi ngingu[Jehova].” (Eksodusi 10:1, 2) Ema-Israyeli latsembekile bekatawucocela bantfwana ngetento letimangalisako Nkulunkulu latenta eGibhithe. Kanjalo nebantfwana babo bacocele bantfwana babo, futsi loko bekutawukwenta kutsi titukulwane ticocele letinye titukulwane. Ngaleyondlela, tento taJehova betitawuhlale tikhunjulwa. Ngendlela lefanako nalamuhla, batali banemsebenti wekufundzisa bantfwana babo ngaJehova.—Dutheronomi 6:4-7; Taga 22:6

(Eksodusi 11:7) Kodvwa emkhatsini wema-Israyeli kute nasinye sifuyo nome umuntfu lokutawuhhongelwa ngisho yinja, khona utekwati kutsi mine, Simakadze, ngenta umehluko emkhatsini wemaGibhithe nema-Israyeli.’”

it-1-E 783 ¶5

Luhambo Lolusuka EGibhithe

Ngekuveta emandla akhe lamakhulu, Jehova waphakamisa libito lakhe ngesikhatsi akhulula ema-Israyeli. Befika baphephile elusentseni lweLwandle Lolubovu, futsi Mosi wahola emadvodza aka-Israyeli ngengoma, kanjalo nasisi waMosi Miriyamu, watsatsa umtjingo wawudlala wahlabela, wahola bonkhe besifazane lebebaphetse tigubhu bahlabela nawo onkhe emadvodza lebekalapho. (Eks 15:1, 20, 21) Ema-Israyeli ehlukaniswa ngalokuphelele netitsa tawo. Ngako-ke ngesikhatsi aphuma eGibhithe, bekungakafaneli esabe umuntfu nobe silwane sesiganga; ngisho nenja beyingeke ibahhongele. (Eks 11:7) Njengoba incwadzi ya-Eksodusi ingasho kutsi Faro waya eLwandle Lolubovu akanye nelibutfo lakhe futsi wafela lapho, kodvwa umbhalo weTihlabelelo 136:15, uyaveta kutsi Jehova wabhubhisa “Faro nemphi yakhe ngalo, ngobe umusa wakhe ume kuze kube phakadze.”

Kufundvwa KweliBhayibheli

(Eksodusi 10:1-15) Simakadze wakhuluma kuMosi, watsi: “Hamba uye kuFaro, ngobe ngiyente yaba lukhuni inhlitiyo yakhe neyetiphatsimandla takhe, kuze ngitekwenta letibonakaliso tami emkhatsini wabo, ² khona nitekwati kutjela bantfwabenu nebatukulu benu kutsi emaGibhithe ngake ngawenta tilima kanjani ngekwenta letibonakaliso tami kanjani ngekwenta letibonakaliso tami emkhatsini wawo. Nonkhe niyawungati kutsi nginguSimakadze.” ³ Ngako-ke boMosi na-Aroni bahamba baya kuFaro, bafike kuye batsi: “Simakadze, longuNkulunkulu wemaHebheru, utsi: ‘Kutawuze kube ngunini seloku wala kutitfoba kimi? Khulula bantfu bami bahambe, khona batewungikhonta. ⁴ Nawuchubeka wala, ungabakhululi bantfu bami, ngitakuletsela sikhonyane la eveni lakho kusasa lolokusako. ⁵ Sitawuba sinyenti kangangekutsi sitawusibekela wonkhe umhlaba wakho, kungasabonakali nemhlabatsi. Sitawudla konkhe lokusindze esangcotfweni, ngisho netihlahla letisele tesiganga leticala kuhluma futsi. ⁶ Sitawugcwala etigodlweni takho, nasetindlini tetiphatsimandla takho, netebantfu bakho baseGibhithe. Ngisho nabokhokho bakho abazange basibone lesinje solomane befika kulelive kuze kube ngunyalo.’” Mosi waphuma kuFaro, wahamba. ⁷ Tiphatsimandla taFaro takhuluma kuye, tatsi: “Kutawuze kube ngunini lomuntfu aluhlupho? Khulula labantfu bahambe, bayewukhonta Simakadze longuNkulunkulu wabo. Awuboni yini longuNkulunkulu wabo. Awuboni yini kutsi lelive laseGibhithe liyabhubha?” ⁸ Ngako boMosi na-Aroni baphindze babuyiswa kuFaro, wakhuluma kubo, watsi: “Hambani niyewukhonta Sinakadze longuNkulunkulu wenu. Kodvwa empeleni bobani laba lenitawuhamba nabo?” ⁹ Mosi wamphendvula watsi: “Sitawuhamba sonkhe: kutawuhamba labasha betfu nalabadzala betfu. Sitawuhamba nemadvodzana etfu, nemadvodzakati etfu, netimvu tetfu, netimbuti tetfu, netinkhomo tetfu; ngobe kufanele sibe nemkhosi wekudvumisa Simakadze.” ¹⁰ Faro wakhuluma kubo, watsi: “Ngifunga Simakadze ngitsi ngingeke nginikhulule kutsi nihambe nebafati nebantfwabenu! Kuyakhanya kutsi nine nenta lisu lebuphekula. ¹¹ Cha! Lokungenani akuhambe nine madvodza niyewukhonta loSimakadze wenu, ngobe empeleni nguloko lenikufunako.” Bakhishwa embidwaFaro. ¹² Simakadze wakhuluma kuMosi, watsi: “Phakamisa tandla takho etikwelive laseGibhithe uletse sikhonyane. Sitawufike sidle yonkhe intfo lemilako lesele kulesangcotfo.” ¹³ Ngako Mosi waphakamisa indvuku yakhe etikwelive laseGibhithe. Simakadze wakhulula umoya wasemphumalanga kutsi uphephetse eveni lonkhe lelo langa nebusuku balo. Kwatsi kusa, wabe sewusitselile sikhonyane. ¹⁴ Sefika silifu, sasibekela lonkhe live laseGibhithe. Sasingazange sesibe khona sikhonyane lesingaka, futsi sasingeyiwuphindza sibe khona. ¹⁵ Sasibekela wonkhe umhlaba, kwadzimate kwaba mnyama khwishi. Sadla konkhe lokwakusindze esangcotfweni; sadla tonkhe titselo tetihlahla. Kute lokuluhlata lokwasala etihlahleni nakuto tonkhe tilimo, eveni lonkhe laseGibhithe.

JULY 27–AUGUST 2

UMCEBO LOSEVINI LANKULUNKULU | EKSODUSI 12

“Loko Lokumelelwa LiPhasika KumaKhristu”

(Eksodusi 12:5-7) Lelizinyane lenu kufanele kube ngulelite sici, libe nemnyaka munye budzala; nilehlukanise nemhlambi wetimvu nome wetimbuti. ⁶ Niyawuligcina kuze kube lilanga leli-14 kuyo lenyanga kusihlwa, mhlazana sonkhe sive sema-Israyeli sitawahlaba lamazinyane. ⁷ Lengati ibobhocwa etinsikeni temnyango nangetulu kwawo kuleyondlu lekuyawube kudlelwa kuyo.

w07-ZU 1/1 20 ¶4

“Kufanele Nijabule Nje Kuphela”

⁴ Jesu wafa ngaNisani 14, 33 C.E. Ka-Israyeli, Nisani 14 bekulilanga lelijabulisako lekugubha umkhosi weliPhasika. Minyaka yonkhe ngalelolanga, imindeni yema-Israyeli beyihlangana ndzawonye kute ijabulele sidlo lebesifaka ekhatsi lizinyane lemvu lebelite sici. Ngekwenta kanjalo, lemindeni beyikhumbula loko lokwentiwa yingati yelizinyane lemvu leyasindzisa ematibulo ema-Israyeli, ngesikhatsi ingilosi yekufa ibulala ematibulo emaGibhithe ngaNisani 14, 1513 B.C.E. (Eksodus 12:1-14) Lemvu yeliPhasika beyimelela Jesu loyo umphostoli Pawula lakhuluma ngaye nakatsi: “Khristu loliPhasika letfu sewuvele unikelwe.” (1 Khorinte 5:7) Njengengati yemvu yeliPhasika, naJesu wanikela ngengati yakhe kute asindzise bantfu labanyenti.—Johane 3:16, 36.

(Eksodusi 12:12, 13) “Ngalobo busuku ngiyawuhamba ngidzabule emkhatsini welive laseGibhithe ngishaye onkhe ematubulo lamadvuna aseGibhithe ebantfu newetifuyo, ngehlulele tonkhe tithico taseGibhithe; nginguSimakadze! ¹³ Lengati iyawuba luphawu kini, kuletindlu lenitawube ningekhatsi kwato. Nangibona lengati; ngiyakwengca, lesishayo singeke sehlele kini nangijezisa emaGibhithe.

it-2-E 583 ¶6

LiPhasika

Letinye tintfo lebetentiwa ngeliPhasika tenteka nakuJesu. Lokunye lokwenteka nguloko lokwafezwa yingati lebeyisemnyango wetindlu eGibhithe, lapho khona yasindzisa ematibulo kutsi angabulawa yingilosi yekufa. Pawula watsi emaKhristu lagcotjiwe bekangematibulo elibandla (Heb 12:23), futsi Khristu bekangumkhululi wawo ngengati yakhe. (1Te 1:10; Efe 1:7) Bekungakafaneli kuphulwe ngisho nalinye litsambo lemvu yeliPhasika. Ngendlela lefanako, kwaphrofethwa kutsi bekungakafaneli kuphulwe ngisho linye litsambo laJesu, futsi loko kwagcwaliseka ngesikhatsi abulawa. (Hl 34:20; Joh 19:36) Ngako-ke, liPhasika lebeligujwa ngemaJuda asendvulo, kanye netintfo letinyenti lebetentiwa ngalelolanga, bekusitfunti setintfo lebetiseta lebetitakwenteka kuJesu Khristu, “liWundlu laNkulunkulu.”—Heb 10:1; Joh 1:29.

(Eksodusi 12:24-27) Lemiyalo niyawuyigcina nine netitukulwane tenu kuze kube nguphakadze naphakadze. ²⁵ Lomkhosi niyawuchubeka kuwenta nome seningenile eveni Simakadze laninika lona njengobe abetsembisile. ²⁶ Nangabe bantfwana benu banibuta batsi: ‘Niwentelani lomkhosi?’ ²⁷ niyawubaphendvula nitsi: ‘Lona ngumhlatjelo weliPhasika wekudvumisa Simakadze, ngobe watengca tindlu tema-Israyeli eGibhithe, ngesikhatsi Simakadze abulala ematubulo emaGibhithe, tsine wasiphephisa.’” Ema-Israyeli aguca phansi akhotsama.

w13 12/15 20 ¶13-14

‘Loku Kuyawuba Sikhumbuto Kini’

¹³ Njengobe situkulwane lesisha sikhula, tifundvo letibalulekile betigcizelelwa, tendluliselwe kuso boyise. Lesinye sifundvo besingaba kutsi Jehova uyativikela tikhonti takhe. Bantfwana bebafundza kutsi Jehova akusho kutsi akacabangi futsi ute luvelo. Bafundza kutsi Jehova ukhona, unguNkulunkulu lophilako lonendzaba nebantfu bakhe futsi lobavikelako. Wakukhombisa loko nakavikela ematibulo ema-Israyeli “ngesikhatsi abulala . . . emaGibhithe.” Wawagcina aphila lamatibulo.

¹⁴ Batali labangemaKhristu, abayalwa kutsi batjele bantfwana babo indzaba lemayelana neliPhasika umnyaka ngamunye. Nobe kunjalo, uyabafundzisa yini bantfwana bakho lesifundvo sekutsi Nkulunkulu uvikela bantfu bakhe? Uyabacinisekisa yini kutsi Jehova nanyalo unguMvikeli webantfu bakhe? (Hla. 27:11; Isa. 12:2) Ungakwenti loko ngendlela yekutikhipha ecaleni, kodvwa bani nencociswano lejabulisako nebantfwana bakho. Yenta imetamo yekutsi ukhulume ngaletifundvo kute ukhutsate umndeni wakho kutsi utfutfuke ebuhlotjeni bawo naNkulunkulu.

Kufunisisa Umcebo EVini LaNkulunkulu

(Eksodusi 12:12) “Ngalobo busuku ngiyawuhamba ngidzabule emkhatsini welive laseGibhithe ngishaye onkhe ematubulo lamadvuna aseGibhithe ebantfu newetifuyo, ngehlulele tonkhe tithico taseGibhithe; nginguSimakadze!

it-2-E 582 ¶2

LiPhasika

Tishayo letilishumi letehlela emaGibhithe tonkhe betitehlulelo tabonkulunkulu baseGibhithe ikakhulukati lesi selishumi lesabulala ematibulo. (Eks 12:12) Imvu (lendvuna) beyingcwele kunkulunkulu Ra, ngako-ke kubhocwa kwengati yemvu yeliphasika etinsikeni temnyango bekusento lesikhombisa kungahloniphi kubantfu baseGibhithe. Kantsi futsi nenkunzi beyingcwele, ngako-ke kubulawa kwematibulo latinkunzi bekusho kwedzelela nkulunkulu Osiris. Faro bekahlonishwa njengobe ayindvodzana yankulunkulu Ra. Kufa kwelitibulo laFaro bekukhombisa kutsi Faro na Ra abakabaluleki futsi bete emandla.

(Eksodusi 12:14-16) Lelilanga liyawuba sikhumbuto kini, niyawuligcina libe lilanga lemkhosi kuSimakadze. Tonkhe titukulwane tenu tiyawulenta libe lilanga lemkhosi kuze kube ngunini nanini.” ¹⁵ Simakadze wachubeka watsi: “Sinkhwa lesinembiliso ningabosidla kuze kuphele emalanga lasikhombisa; nibodla sinkhwa lesite imbiliso kuphela. Ngelilanga lekucala niboyisusa yonkhe imbiliso etindlini tenu, ngobe lotawudla lokufakwe imbiliso emkhatsini welilanga lekucala kuze kube lilanga lesikhombisa, utawuncunywa emkhatsini wesive sema-Israyeli. ¹⁶ Ngelilanga lekucala nangelilanga lesikhombisa niyawuba nemhlangano longcwele. Kufanele kubete lowenta umsebenti kulawo malanga, kodvwa ningakulungisa kudla lenitakudla.

it-1 504 ¶1

Umhlangano

Intfo lebeyingakavami “kulemihlangano lengcwele” kutsi bantfu bekungakafaneli bente imisebenti lematima. Nasi sibonelo, lilanga lekucala nelesikhombisa lemcimbi wesinkhwa lebesite imbiliso belibitwa ngekutsi ngemalanga ‘emihlangano lengcwele,’ njengoba Jehova asho: “Kufanele kubete lowenta umsebenti kulawo malanga, kodvwa ningakulungisa kudla lenitakudla.” (Eks 12:15, 16) Nobe kunjalo, “kulemihlangano lengcwele” baphristi bebamatasa benta iminikelo kuJehova (Lev 23:37, 38), futsi ngekwenta kanjalo bekungasho kutsi baphula umtsetfo lomelene nekwenta umsebenti wamalanga onkhe. Kulamalanga lawa, bekungasiso sikhatsi sekutsi bantfu bahlale nje bangenti lutfo, kunaloko bekusikhatsi sekutsi bacinise buhlobo babo naJehova. Ngelilanga leliSabatha, bantfu bebahlangana ndzawonye kute bakhonte Nkulunkulu futsi batfole ticondziso. Bebafundziswa ngemtsetfo futsi bachazelwe kabanti ngelivi laNkulunkulu njengobe bekwentiwa emasinagogeni. (Imi 15:21) Ngako-ke, njengobe bantfu bebangasebenti ngeliSabatha noma “ngemihlangano lengcwele,” bekufanele bathantaze ngalokujulile bazindle ngemdali wabo kanye nangetinjongo takhe.—Buka nalesitsi ASSEMBLY.

Kufundvwa KweliBhayibheli

(Eksodusi 12:1-20) Simakadze wakhuluma kuMosi naku-Aroni baseseGibhithe, watsi: ² “Lenyanga kufanele ibe yinyanga yekucala emnyakeni wenu. ³ Yendlulisela lomlayeto esiveni sonkhe sema-Israyeli kutsi ngelilanga lelishumi kulenyanga, nguleyo naleyo ndvodza kufanele ikhetsele umndeni wayo lizinyane. ⁴ Nangabe umndeni umncane kakhulu kutsi ungeke ulicedze lelizinyane, ungalidla ndzawonye namakhelwane wawo, kuye ngebunyenti bebantfu balowo mndeni. ⁵ Lelizinyane lenu kufanele kube ngulelite sici, libe nemnyaka munye budzala; nilehlukanise nemhlambi wetimvu nome wetimbuti. ⁶ Niyawuligcina kuze kube lilanga leli-14 kuyo lenyanga kusihlwa, mhlazana sonkhe sive sema-Israyeli sitawahlaba lamazinyane. ⁷ Lengati ibobhocwa etinsikeni temnyango nangetulu kwawo kuleyondlu lekuyawube kudlelwa kuyo. ⁸ Kulobo busuku inyama ibokosiwa idliwe kanye nemibhidvo lebabako kanye nesinkhwa lesite imbiliso. ⁹ Lenyama ningayidli iluhlata nome iphekiwe, kodvwa niboyidla yosiwe yonkhe, kanye nenhloko yayo, nemilente yayo, nekwangekhatsi kwayo. ¹⁰ Lenyama niboyidla ningalishiyeli likusasa; nakukhona lesele, niboyishisa. ¹¹ Nibotsi niyidla, nibe tinkhalo tenu tiboshiwe, netinyawo tenu tiseticatfulweni, nendvuku ibe isesandleni; niyidle ngekushesha. Lelo-ke liPhasika lekudvumisa Simakadze. ¹² “Ngalobo busuku ngiyawuhamba ngidzabule emkhatsini welive laseGibhithe ngishaye onkhe ematubulo lamadvuna aseGibhithe ebantfu newetifuyo, ngehlulele tonkhe tithico taseGibhithe; nginguSimakadze! ¹³ Lengati iyawuba luphawu kini, kuletindlu lenitawube ningekhatsi kwato. Nangibona lengati; ngiyakwengca, lesishayo singeke sehlele kini nangijezisa emaGibhithe. ¹⁴ Lelilanga liyawuba sikhumbuto kini, niyawuligcina libe lilanga lemkhosi kuSimakadze. Tonkhe titukulwane tenu tiyawulenta libe lilanga lemkhosi kuze kube ngunini nanini.” ¹⁵ Simakadze wachubeka watsi: “Sinkhwa lesinembiliso ningabosidla kuze kuphele emalanga lasikhombisa; nibodla sinkhwa lesite imbiliso kuphela. Ngelilanga lekucala niboyisusa yonkhe imbiliso etindlini tenu, ngobe lotawudla lokufakwe imbiliso emkhatsini welilanga lekucala kuze kube lilanga lesikhombisa, utawuncunywa emkhatsini wesive sema-Israyeli. ¹⁶ Ngelilanga lekucala nangelilanga lesikhombisa niyawuba nemhlangano longcwele. Kufanele kubete lowenta umsebenti kulawo malanga, kodvwa ningakulungisa kudla lenitakudla. ¹⁷ LoMkhosi Wesinkhwa Lesingenambiliso niyawuhlala njalo niwenta, ngobe kungalo lelo langa lengakhipha ngalo tive tenu eGibhithe. Lelilanga niyawuligcina titukulwane ngetitukulwane. Kuyawuba nguwona msimeto wenu longeke uphele nome uguculwe. ¹⁸ Kusukela kusihlwa ngelilanga leli-14 lenyanga yekucala kuze kube kusihlwa ngelilanga lema-21 ningasidli sinkhwa lesinembiliso. ¹⁹ Kuyawuze kuphele emalanga lasikhombisa imbiliso ingatfolakali etindlini tenu; lowo loyawutfolakala kutsi udle lokufakwe imbiliso, uyawuncunywa esiveni sema-Israyeli, nome ngabe wekutalwa, nome ngabe wekuhamba kulelo live. ²⁰ Ningakudli lokufakwe imbiliso, yonkhe indzawo lapho nihlala khona nibodla sinkhwa lesite imbiliso.”