Tikhombo Tencwajana Yekubhalela Emhlanganweni
SEPTEMBER 7-13
UMCEBO LOSEVINI LANKULUNKULU | EKSODUSI 23-24
“Ungalandzeli Linyenti”
(Eksodusi 23:1) “Ungatandzisi tindzaba letingemanga. Ungatihlanganisi nemuntfu lomubi ngekumfakazela.
Uwati Onkhe Yini Emaciniso Endzaba?
7 Uyatsandza yini kutfumelela bangani bakho nebantfu lobetayele imilayeto? Nangabe uva ngendzaba letsite uyaye ufise kutsi bonkhe bantfu bayive ngawe yini? Noma kunjalo, ngaphambi kwekutsi uyitfumelele labanye kufanele utibute: ‘Ngiyaciniseka yini kutsi lendzaba lengitayitfumela iliciniso? Ngiyawati yini emaciniso ayo?’ Nawungaciniseki, kungenteka kutsi usakata emanga. Nangabe ungaciniseki kutsi umlayeto uliciniso, ungabatfumeleli labanye, wususe!
8 Kunalokunye lokwenta kube yingoti kutfumelela labanye imilayeto singakacabangi. Kuletinye tindzawo asikavunyelwa kutsi sishumayele. Kuletindzawo, bantfu labasiphikisako bangahle basakate imibiko lengemanga kute basente sesabe futsi singetsembani. Cabanga ngalokwenteka enhlanganweni lebeyibitwa ngekutsi yi-Soviet Union. Emaphoyisa latiwa ngekutsi yi-KGB asakata emanga latsi labanye bazalwane labatiwako babentele phasi labanye bazalwane babo. Labanyenti bawetsemba lombiko longemanga, futsi bayishiya inhlangano yaJehova. Loku kwaba buhlungu kakhulu! Lokujabulisako kutsi ngekuhamba kwesikhatsi labanye babuyela enhlanganweni, kodvwa labanye abazange, ngobe kukholwa kwabo besekubutsakatsaka. (1 Thim. 1:19) Yini lesingayenta kute loku kungenteki kitsi? Ungayisakati imilayeto lengemanga noma longaciniseki ngayo kutsi iliciniso. Akukafaneli wetsembe tonkhe tindzaba lotivako. Esikhundleni saloko, ciniseka kutsi uwati onkhe emaciniso.
(Eksodusi 23:2) Ungalilandzeli linyenti lelenta lokubi; nawenta bufakazi ecaleni, ungawephuli umtsetfo ngekuvumelana nelinyenti.
it-1-E 11 ¶3
Aroni
Akusiko kuhlakanipha kuphetsa ngekutsi Aroni nguye lowacale wephula lomtsetfo kuletimo letintsatfu, kunaloko wavumela bantfu kutsi bamcindzetele kuze ente intfo lengakalungi. Kodvwa kuleliphutsa lakhe lekucala bekufanele asebentise lesimiso lesitsi: “Ungalilandzeli linyenti lelenta lokubi.” (Eks 23:2) Nobe kunjalo, ligama lakhe lasetjentiswa ngendlela lehloniphekile eBhayibhelini, futsi iNdvodzana yaNkulunkulu, ngesikhatsi iseselapha emhlabeni yabucaphela njengalobo lobusemtsetfweni buphristi ba-Aroni.—Hl 115:10, 12; 118:3; 133:1, 2; 135:19; Mat 5:17-19; 8:4.
(Eksodusi 23:3) Ungakhetsi muntfu nakutekwa licala lalomphofu.
it-1-E 343 ¶5
Kuvaleka Emehlo
Kwehlulela ngendlela lengakalungi bekufananiswa nekuvaleka emehlo, futsi minyenti imiyalo lebeyiseMtsetfweni lebeyimelene nekufumbatsisa, kuphana tipho, nobe kubandlulula futsi letintfo leti ngito betingenta lijaji lingayehluleli kahle indzaba. “Kudizelwa kwenta bantfu bavaleke emehlo.” (Eks 23:8) “Umdizo uphumphutsekisa emehlo alabahlakaniphile.” (Dut 16:19) Ngisho nobe lijaji belibona kutsi licala belidla muphi umuntfu kuleyondzaba, kodvwa letipho betingalenta lingehluleli kahle. UMtsetfo waNkulunkulu waveta kutsi bekungasito nje tipho kuphela lebentingenta umuntfu avaleke emehlo kodvwa bekuphindze kubangwe kuba neluvelo, njengobe lomtsetfo utsi: “Ungehluleli ngekukhetsa, ngekulahla lomphofu ngelicala uvune lomkhulu.” (Lev 19:15) Ngako-ke, luvelo nobe kufuna kwemukelwa linyenti bekungakafaneli kwente lijaji lehlulele kabi ngenca yekutsi labo lelibahlulelako banjingile.—Eks 23:2, 3.
Kufunisisa Umcebo EVini LaNkulunkulu
(Eksodusi 23:9) “Ungasiphatsi kabi sihambi; nawe uyati kutsi utiva unjani nangabe usihambi, ngobe nani nake naba tihambi eGibhithe.”
“Ningakukhohlwa Kwemukela Tivakashi”
4 Kunekutsi Jehova atjele ema-Israyeli kutsi ahloniphe tihambi, wawacela kutsi atiphatse kahle. (Fundza Eksodusi 23:9.) Ema-Israyeli bekati kutsi ‘kunjani kuba sihambi.’ Ngisho nalapho asengakabi tigcila, emaHebheru bekaphatfwa kabi ngemaGibhithe ngenca yebuve babo nobe inkholo yabo. (Gen. 43:32; 46:34; Eks. 1:11-14) Ema-Israyeli bekakwati kahle kuphatfwa kabi njengetihambi, kodvwa Jehova bekalindzele kutsi tihambi batiphatse ‘njengebantfu bakubo.’—Lev. 19:33, 34.
(Eksodusi 23:20, 21) “Ngitawutfumela ingilosi ihambe ngembili kwenu inilondvolote nisahamba, inifikise endzaweni lenginilungiselele yona. 21 Yilaleleni, niyihloniphe, ningayivukeli; ngobe ingeke initsetselele naniyivukela, ngobe libito lami likuyo nje.
it-2-E 393
Mikhayeli
1. Nguye kuphela ingilosi lengcwele ngaphandle kwaGabhriyeli lokukhulunywa ngaye eBhayibhelini, futsi nguye kuphela lobitwa ngekutsi ‘yingilosi lenkhulu.’ (Juda 9) Leligama livela kwekucala encwadzini yaDanyela sehluko 10, lapho Mikhayeli achazwa ngekutsi ‘ngulomunye wetingilosi letitikhulu’; nguye lowasita ingilosi lencane ngesikhatsi ivinjetelwe ‘yingilosi yembuso wasePheresiya.’ Mikhayeli ubitwa ngekutsi ‘yingilosi yesive sakuboDanyela,’ ‘ingilosi lenkhulu lengumvikeli wesive sakuboDanyela.’ (Dan 10:13, 20, 21; 12:1) Loku kuveta kutsi Mikhayeli nguye lebekahola ema-Israyeli ehlane. (Eks 23:20, 21, 23; 32:34; 33:2) Loku ngiko lokusenta sifike esiphetfweni sekutsi ‘Mikhayeli ingilosi lenkhulu abenekungevani naDeveli futsi waphikisana naye ngesidvumbu saMosi.’—Juda 9.
Kufundvwa KweliBhayibheli
(Eksodusi 23:1-19) “Ungatandzisi tindzaba letingemanga. Ungatihlanganisi nemuntfu lomubi ngekumfakazela. 2 Ungalilandzeli linyenti lelenta lokubi; nawenta bufakazi ecaleni, ungawephuli umtsetfo ngekuvumelana nelinyenti. 3 Ungakhetsi muntfu nakutekwa licala lalomphofu. 4 “Nawuhlangana nenkhomo nome imbongolo yesitsa sakho ilahlekile, yikhawule uyibuyisele kuso. 5 Nawubona imbongolo yemuntfu lokutondzako ipatalaliswa ngumtfwalo, ungamshiyi, kodvwa msite ekuyisukumiseni nasekuyetfwaliseni kahle. 6 “Umuntfu lomphofu ungamlahli ngelicala ngalokungasimtsetfo. 7 Ungacali kubeka licala ngemanga. Umuntfu lote licala nalolungile ungambulali, ngobe loyawukwenta njalo uyawubulawa ngimi. 8 Ungadizelwa, ngobe kudizelwa kwenta bantfu bavaleke emehlo bangete babone, kuphambukise labacotfo ekukhulumeni liciniso. 9 “Ungasiphatsi kabi sihambi; nawe uyati kutsi utiva unjani nangabe usihambi, ngobe nani nake naba tihambi eGibhithe.” 10 “Uyawulima insimi yakho uyivune iminyaka lesitfupha; 11 kodvwa ngemnyaka wesikhombisa uyawuyiphumuta ungayilimi, ungavuni lutfo loluhlume kuyo, kuze kutsi labaphuyile besive sakho badle kuyo, lokusele kuyo kudliwe tilwane tesiganga. Uyawukwenta njalo nasesivinini sakho kanye nasensimini yakho yemincumo. 12 “Uyawusebenta emalanga lasitfupha, kodvwa ngelilanga lesikhombisa ungasebenti, kuze kutsi tifuyo takho, netigcili letitalelwe kakho, kanye nebetive labasebenta kakho batewuphumula. 13 “Kulalele konkhe loku lengikushito kuwe. Ungawadvumisi emabito alabanye bonkulunkulu, ungawaphatsi ngisho nangemlomo wakho.” 14 “Uyawungidvumisa ngekugubha imikhosi lemitsatfu ngemnyaka. 15 Ubogubha uMkhosi Wesinkhwa Lesingenambiliso. Ngenyanga lengu-Abibi, lenaphuma ngayo eGibhithe, uyakudla sinkhwa lesingenambiliso kuze kuphele emalanga lasikhombisa, njengobe ngakuyala. Kufanele kubete lovela embikwami angakaphatsi lutfo etandleni. 16 “Ubogubha uMkhosi Wesivuno ngesivuno setilinga tekucala tensimi yakho. “Ubogubha uMkhosi Wekubutsa ekupheleni kwemnyaka, nase ubutsa sivuno lesititfukutfuku takho. 17 Yonkhe iminyaka, katsatfu ngemnyaka, bonkhe labadvuna bafanele bete kutewukhonta mine, iNkhosi Simakadze. 18 “Unganikeli kimi ngengati yemhlatjelo nangemnikelo nome wani lonembiliso. Emafutsa aletilwane lasele natinikelwa kulemigubho kufanele angahlali kuze kube ngungakusasa ekuseni. 19 “Tilinga letinhle tetilimo takho tekwendvulelisa ubotiletsa endlini yaSimakadze longuNkulunkulu wakho. “Ungalipheki lizinyane lemvu nome lembuti elubisini lwenina.”
SEPTEMBER 14-20
UMCEBO LOSEVINI LANKULUNKULU | EKSODUSI 25-26
“Intfo Lebeyibaluleke Kakhulu Ethendeni Lekukhontela”
(Eksodusi 25:9) Nawakha lendlu lengcwele nato tonkhe timphahla tayo, ubokwenta konkhe ngendlela lengitakukhombisa yona.”
it-1-E 165
Libhokisi Lesivumelwane
Indlela Yekulakha. Intfo yekucala Jehova layiniketa Mosi, nakamtjela kutsi akakhe lithende lekukhontela, kwaba yindlela yekwakha Libhokisi, ngobe beliyintfo lebaluleke kakhulu ethendeni lekukhontela nasenkambu yema-Israyeli. Lelibhokisi bekufanele libe ngu-2.5 cubits budze, 1.5 cubits bubanti, na-1.5 cubits kuphakama (c. 111 × 67 × 67 cm; 44 × 26 × 26 in.). Belakhiwe ngesigodvo semgamba, lihucwe ngeligolide ngekhatsi nangephandle. Lokuhucwa ngaleligolide, bekuyindlela yekulivikela lelibhokisi. Intfo yesibili latsi ayakhe, bekusimbonyo salelibhokisi, lebekufanele sakhiwe ngeligolide kuphela, hhayi ngesigodvo lesihucwe ngeligolide, futsi lesimbonyo bekufanele silivale kahle lelibhokisi. Ngetulu kwalesimbonyo bekunemakherubi lamabili lebeketiwe ngeligolide, ngalinye lawo belibekwe ngasekugcineni kwalesimbonyo futsi abukene, tinhloko tawo tibheke phansi netimphiko tivulekile futsi tengamele leliBhokisi. (Eks 25:10, 11, 17-22; 37:6-9) Lesimbonyo besiphindze sibitwe ngekutsi ‘sihlalo semusa’ nobe “simbonyo sekwehlulela.”—Eks 25:17; Heb 9:5; buka sihloko lesitsi PROPITIATORY COVER.
(Eksodusi 25:21) Letibhelekeca tematje letimbili ubotifaka ekhatsi kulelibhokisi, bese ulimbonya ngalesihlalo semusa.
it-1-E 166 ¶2
Libhokisi Lesivumelwane
Lelibhokisi beliyindzawo yekugcina tikhumbuto letingcwele, lebekutibhelekece letimbili lebetibhalwe iMitsetfo Lelishumi. (Eks 25:16) ‘Imbita yeligolide lebeyinemana kanye nendvuku ya-Aroni leyahluma’ beyikulelibhokisi, kodvwa ngekuhamba kwesikhatsi kwakhishwa, ngaphambi nje kwekutsi kwakhiwe lithempeli laSolomoni. (Heb 9:4; Eks 16:32-34; Num 17:10; 1Kh 8:9; 2Ti 5:10) Ngaphambi kwekutsi Mosi afe, waniketa baphristi labangemalevi incwadzi yemtsetfo lebeyitsi letintfo kufanele batibeke “eceleni kwelibhokisi lesivumelwane saSimakadze Nkulunkulu wenu, . . . ibe ngufakazi.”—Dut 31:24-26.
(Eksodusi 25:22) Ngitawuhlangana nawe lapho, ngikhulume nawe ngisetikwalesihlalo semusa emkhatsini walamakherubhi lamabili lasetikwelibhokisi. Ngulapho ngitakunika khona yonkhe imitsetfo yami yesive sema-Israyeli.”
it-1-E 166 ¶3
Libhokisi Lesivumelwane
Belihlobene nekuba khona kwaNkulunkulu. Libhokisi lesivumelwane belihlobene nekuba khona kwaNkulunkulu kuwo wonkhe umlandvo. Jehova wetsembisa watsi: “Ngitawuhlangana nawe lapho, ngikhulume nawe ngisetikwalesihlalo semusa emkhatsini walamakherubhi lamabili lasetikwelibhokisi.” ‘Ngobe ngitawuvela ngisefini lelisetikwesihlalo semusa.’ (Eks 25:22; Lev 16:2) Samuweli wabhala kutsi Jehova ‘uhlali etikwemakherubhi’ (1Sa 4:4); kungako lamakherubhi ‘bekamelela incola’ yaJehova. (1Ti 28:18) “Ngesikhatsi Mosi angena ethendeni lekuhlangana kuyawukhuluma [naJehova], weva livi likhuluma naye liphuma esihlalweni semusa lesasisetikwelibhokisi lesivumelwane emkhatsini wemakherubhi lamabili. Bakhulumisana.” (Num 7:89) Ngekuhamba kwesikhatsi, Joshuwa kanye neMphristi Lophakeme Finehasi bathantaza kuJehova baphambi kwalelibhokisi. (Jos 7:6-10; Tik 20:27, 28) Nanobe kunjalo, ngumphristi lophakeme kuphela lobekangena eNgcwelengcwele futsi abone libhokisi, hhayi kuyokhuluma naJehova, kepha bekangena kanye ngemnyaka ngeLilanga Lekubuyisana.—Lev 16:2, 3, 13, 15, 17; Heb 9:7.
Kufunisisa Umcebo EVini LaNkulunkulu
(Eksodusi 25:20) Lamakherubhi kufanele avule emaphiko awo engamele lesihlalo semusa abukane, abheke lesihlalo semusa.
it-1-E 432 ¶1
Emakherubhi
Loko lobekumelelwa ngemakherubhi kwafakwa nakumiswa lithende lekukhontela ehlane. Ngetulu kwesimbonyo salelibhokisi bekunemakherubhi lamabili lebekentiwe ngeligolide. Bekabukane futsi abhekise tinhloko phansi ngendlela lekhombisa kutsi akhonta Nkulunkulu. Omabili bekanetimphiko letimbili lebetivulekile tengamele simbonyo ngendlela yekusigadza nekusivikela. (Eks 25:10-21; 37:7-9) Kantsi futsi, lingekhatsi lendvwangu yelithende lekukhontela kanye nendvwangu lebeyehlukanisa iNgcwele neNgcwelengcwele belihlotjiswe ngemakherubhi.—Eks 26:1, 31; 36:8, 35.
(Eksodusi 25:30) Etikwalelitafula kufanele ubeke sinkhwa lesinikelwe kimi, lekufanele sibesembikwami ngaso sonkhe sikhatsi.
it-2-E 936
Sinkhwa Lesinikelwe
Tinkhwa lebetingu-12 lebetibekwe etafuleni lebelisendzaweni lengcwele yelithende lekukhontela nobe ethempelini, futsi betishitjwa njalo ngeliSabatha kufakwe letinsha. (Eks 35:13; 39:36; 1Kh 7:48; 2Ti 13:11; Neh 10:32, 33) NgesiHebheru, indzawo lapho bekubekwa khona letinkhwa bekutsiwa “sinkhwa sebuso.” Ligama lelitsi “buso” ngaletinye tikhatsi lisho ‘kuba khona’ (2Kh 13:23), ngako lesinkhwa besiba phambi kwebuso baJehova njengemnikelo lobewuba phambi kwakhe njalo. (Eks 25:30) Lesinkhwa besiphindze sisho “sinkhwa lesingcwele” (2Ti 2:4), ‘tinkhwa letinikelwe’ (Mak 2:26), nobe nje ‘tinkhwa’ (Heb 9:2).
Kufundvwa KweliBhayibheli
(Eksodusi 25:23-40) “Ubenta litafula ngemapulango emgamba: budze balo bube ngemasentimitha langaba ngema-88, bubanti bube ngemasentimitha langaba ngema-44, kuphakama kube ngemasentimitha langaba ngema-66. 24 Ubolembesa ngegolide lecengekile, ulephetse ngegolide. 25 Lapha emaceleni wakhe emaphetselo lanebubanti besandla, alitungelete ndzawo tonkhe, bese uwahlobisa ngelugebhezi lwegolide. 26 Lelitafula ubolentela emajiva egolide lamane, lamajiva uwabophele emakoneni omane alemilente yalo. 27 Lamajiva ekufaka letimboko tekwetfwala kufanele abesedvute nemaphetselo alelitafula. 28 Uyakwenta timboko ngemgamba, utembese ngegolide, lelitafula liyakwetfwalwa ngato. 29 Ubenta emapulede, netindzebe, nemajeke, netindishi temnikelo wewayini; tonkhe letintfo kufanele tentiwe ngegolide lecengekile. 30 Etikwalelitafula kufanele ubeke sinkhwa lesinikelwe kimi, lekufanele sibesembikwami ngaso sonkhe sikhatsi.” 31 “Yenta lutsi lwetibane ngegolide lecengekile; sibunu salo nesicu salo nako kwentiwe ngegolide legcotjiwe. Imihlobiso yalo ibe njengetimbali letisengimidvumba nalesetichakazile, ukwente kube sikhatsa sinye nalolutsi. 32 Kuboba nemagala lasitfupha esicwini salo, lamatsatfu abe nganhlanye, nalamatsatfu abe nganhlanye. 33 Lelo nalelo gala kufanele libe nemihlobiso lemitsatfu lenesimo setimbali te-alimondi, letinye tibe nguletisengimidvumba, letinye tibe ngulesetichakazile. 34 Lolutsi lwetibane kufanele lube nemihlobiso lemine leyentiwe yaba njengetimbali te-alimondi, letisengimidvumba nalesetichakazile. 35 Ngako kusho kutsi kutawuba nalesengumdvumba ngaphansi kwemagala lamabili ekucala lesuka esicwini, kulandzele lenye lesengumdvumba ngaphansi kwemagala lamabili lalandzelako, kanjalo nakulawo lamabili ekugcina. Leto totintsatfu titawucondzana nalamagala lasitfupha. 36 Letimbali letisengimidvumba, nalamagala, nelutsi lwesibane kufanele kube sikhatsa sinye segolide lecengekile legcotjiwe. 37 Yenta tibane letisikhombisa kulesicu utimise titewukhanyisa ngembili kwalesicu. 38 Tijubantsambo netitsebe talo utente ngegolide lecengekile. 39 Ubosebentisa igolide lecengekile lengemakhilogremu langaba ngema-35, nawakha lolutsi lwetibane nako konkhe lokuhambisana nalo. 40 Ucaphele kutsi letintfo utakha ngaleyo ndlela lengakukhombisa yona entsabeni.”
SEPTEMBER 21-27
UMCEBO LOSEVINI LANKULUNKULU | EKSODUSI 27-28
“Tingasifundzisani Tembatfo TebaPhristi?”
(Eksodusi 28:30) Kulesembatfo sesifuba sekwehlulela ubofaka i-Urimu neThumimu, kubesetikwenhlitiyo ya-Aroni sonkhe sikhatsi nangena ebukhoneni baNkulunkulu. Kanjalo-ke Aroni uyawuphatsa letehlulelo tema-Israyeli etikwenhlitiyo yakhe nasembikwaNkulunkulu.”
it-2-E 1143
I-Urimu NeThumimu
Bahlatiyi beliBhayibheli labanyenti bebakholelwa kutsi i-Urimu kanye neThumimu bekutinkatho. Bekabitwa ngekutsi “tinkatho letingcwele” ehumushweni laJames Moffatt ku-Eksodusi 28:30. Labanye bakholwa kutsi belifaka ekhatsi tincetu letintsatfu, lucetu lunye beluneligama lelitsi “yebo” lolunye luna “cha” bese kutsi lolu lolunye belute lutfo. Bekabese ayakhishwa kute kutfolwe imphendvulo yembuto lobewubutiwe, nangabe kuphume lolute lutfo, etimeni letinjalo bekuba bete imphendvulo. Labanye bacabanga kutsi bekumatje lamabili lebekatibhelekece, ngalinye litje belunetihlangotsi letimbili, luhlangotsi lunye belumnyama bese lolu lolunye luba mhlophe. Bekutsi nakajikwe phansi, bese omabili aveta tinhlangotsi letimhlophe, imphendvulo bekuba ngu-“yebo,” kantsi omabili nawaveta tinhlangotsi letimnyama bekuba ngu-“cha” futsi nakuvele luhlangotsi lolumnyama nalolumhlophe bekuba bete imphendvulo. Ngesikhatsi Sawula abuta umphristi kutsi aye yini kuyohlasela emaFilisti nobe angayi, kute imphendvulo layitfola. Anemuva wekutsi bekukhona lobekonile kulamadvodza lebekahamba nawo, wathantaza kuNkulunkulu watsi: “Nginike imphendvulo lengiyona yona [iThumimu].” BoSawula naJonathani badliwa yinkatho futsi ngemuva kwaloko kwaphindze kwentiwa inkatho emkhatsini wabo bobabili. Kulendzaba, emavi latsi “Nginike imphendvulo lenguyona yona [iThumimu],” abonakala angasho kushaya inkatho, ngisho nobe avakala anemcondvo wekushaya inkatho.—1Sa 14:36-42.
(Eksodusi 28:36) “Yenta ngcwengcwe wegolide lecengekile bese ubhala ngekucopha nankha emagama: ‘Kwehlukaniselwe Nkulunkulu.’
it-1-E 849 ¶3
Simongo
Umphristi Lophakeme Waka-Israyeli. Ka-Israyeli umshuculo wemphristi lophakeme bowunangcwengcwe weligolide lobewuba sesimongweni sakhe, ‘lobekungumhlobiso longcwele’ futsi kuwo bekubhalwe emavi latsi “Kwehlukaniselwa Nkulunkulu.” (Eks 28:36-38; 39:30) Njengobe lomphristi bekamelela ema-Israyeli ekukhonteni Jehova, bekubalulekile kutsi lomphristi ahlale angcwele, futsi lombhalo lobewukulongcwengcwe bewukhumbuta onkhe ema-Israyeli kutsi ahlale angcwele ekukhonteni Jehova. Bekuphindze kummelele kahle uMphristi Lophakeme Kakhulu, Jesu Khristu, kanye nekutinikela kwakhe kuteabe ngumphristi waNkulunkulu futsi amkhonte ngebungcwele.—Heb 7:26.
(Eksodusi 28:42, 43) “Kufanele ubentele imibekelo yelineni kusukela elukhalweni kuze kufike ematsangeni, khona batewufihla bungcunu babo. 43 Aroni nemadvodzana akhe kufanele batifake njalo nje nabaya ethendeni lekuhlangana nome beta kutekungikhonta elatini endzaweni lengcwele, khona bangetiwubulawa ngenca yekona ngebungcunu babo. “Lona-ke ngumyalo wa-Aroni netitukulwane takhe kuze kube phakadze naphakadze.”
w08-ZU 8/15 15 ¶17
Dvumisa Jehova Ngekutiphatsa Ngendlela Lehloniphekile
17 Kufanele siciniseke kutsi sitiphatsa ngendlela lehloniphekile nasikhonta Jehova. Umshumayela 5:1 utsi: “Caphela tinyatselo takho, nawuya endlini yaNkulunkulu.” BoMosi naJoshuwa bayalwa kutsi bakhulume tincabule tabo ngesikhatsi basendzaweni lengcwele. (Eks. 3:5; Jos. 5:15) Bekufanele bakwente loku ngendlela yekukhombisa kuhlonipha. Baphristi labangema-Israyeli bekufanele bagcoke imibekelo yelineni “khona batewufihla bungcunu babo.” (Eks. 28:42, 43) Loku bekuvikela kutsi kungembuleki bungcunu babo nabayokhonta elatini. Onkhe emalunga emndeni wemphristi bekufanele atiphatse ngendlela lehloniphekile.
Kufunisisa Umcebo EVini LaNkulunkulu
(Eksodusi 28:15-21) “Ubenta sembatfo sesifuba ngebungcweti lobukhulu, sibe ngesekwehlulela kwemPhristi Lomkhulu; njengesidziya sibe nalokuyigolide, nalokubukhwebeletane, nalokuluhlata njengesibhakabhaka, nalokubovu ngalokutopele kanye nemitiya yelineni lecolisakele. 16 Kufanele siphindvwe kabili, khona sitewuba sikhwama lesilingene ndzawo tonkhe, budze baso bube ngemasentimitha langaba ngema-22, nebubanti lobungemasentimitha langaba ngema-22. 17 Unamatsisele kuso imigca lemine yematje laligugu; emgceni wekucala unamatsisele isadiyusi, nethophazi, nerubhi; 18 emgceni wesibili unamatsisele simaragidu, nesafire, nedayimani; 19 emgceni wesitsatfu unamatsisele ihiyakinte, ne-agathe, ne-amethiste; 20 emgceni wesine unamatsisele ikhrisolithe, ne-oniksi, nejasiphi. Lamatje kufanele ephetfwe ngegolide. 21 Kufanele kube nematje lali-12, ngulelo nalelo litje libe nelibito lendvodzana ya-Israyeli; ngulelo nalelo litje libekwe luphawu ngekusikwa kwelibito lesive setive letili-12 taka-Israyeli.
w12-ZU 8/1 26 ¶1-3
Bewati Yini?
Ematje laligugu lebekasesifubeni sesembatfo semphristi longum-Israyeli bekabuyaphi?
Nasekaphumile ema-Israyeli eGibhithe futse sekasehlene, Nkulunkulu wawaniketa umyalo wekutsi ente sembatfo sesifuba. (Eksodusi 28:15-21) Lesembatfo sesifuba besinematje erubhi, thophazi, emeraldi, ethekhosi, esafire, ejasiphi, leshem, agate, amethyst, ekhrisolithe, e-oniksi, nejade. Ema-Israyeli bekanawo yini vele lamatje laligugu?
Ngetikhatsi tekubhalwa kweliBhayibheli, bantfu bebawatsengisa ematje laligugu nobe bashintjise ngawo. Sibonelo nje, emaGibhithe asendvulo bekawatfola emaveni lakhashane lamatje laligugu, lamave nyalo asatiwa ngekutsi yi-Iran, yi-Afghanistan, mhlawumbe naseNdiya. Timayini taseGibhithe betikhicita tinhlobonhlobo tematje laligugu. Emakhosi aseGibhithe bewaneligunya lekumba lamatje laligugu etindzaweni bekatibusa. Jobe indvodza lebeyetsembekile yachaza indlela bantfu lebakaphila nabo lebebawufuna ngayo umcebo emigodzini lengaphansi kwemhlaba. Letinye tetintfo lebetigujwa ngaphasi kwemhlaba, ngalokukhetsekile Jobe ukhuluma ngesafire nethophazi.—Job 28:1-11, 19.
Incwadzi ya-Eksodusi ichaza kutsi ema-Israyeli aphanga emaGibhithe tintfo tawo lebetiligugu nakesuka khona. (Eksodusi 12:35, 36) Ngako kungenteka kutsi ema-Israyeli awatfola eGibhithe lamatje lenta ngawo sembatfo sesifuba semphristi lophakeme.
it-1-E 1130 ¶2
Kuba ngcwele
Tilwane Nemikhicito. Ematibulo lamadvuna etinkhomo, timvu netimbuti bewangcwele kuJehova futsi bekungakafaneli ahlawulelwe. Bekufanele kutsi abe ngumhlatjelo, futsi incenye letsite yawo bekufanele ingcweliselwe baphristi. (Num 18:17-19) Titselo tekucala kanye neminikelo bekungcwele, njengayo yonkhe imihlatjelo netipho lebetingcweliselwa imisebenti yasethempelini. (Eks 28:38) Tonkhe tintfo lebetingcwele kuJehova bekufanele tihlale tingcwele futsi bekungakafaneli titsatfwe melula nobe tisetjentiselwe tinjongo letivamile naletilihlazo. Sibonelo saloko ngumtsetfo lobewukhuluma ngeminikelo. Nangabe umuntfu lotsite abekela eceleni umnikelo wakolo, kodvwa yena noma lelinye lilunga lemndeni wakhe litsatsa incenye yalokolo lingakahlosi futsi liwupheke, loyo muntfu bekaba nelicala lekwephula umtsetfo waNkulunkulu lomayelana netintfo letingcwele. UMtsetfo bewutsi kufanele amikise ethempelini silinganiso lesifana naleso lesitsetse kanye nemaphesenti langu-20 ngetulu, ngaphandle kwekunikela ngemvu lephilile layitsetse emhlambini wakhe kutsi ibe ngumhlatjelo. Ngaleyo ndlela, tintfo letingcwele lebetita Jehova betihlonishwa kakhulu.—Lev 5:14-16.
Kufundvwa KweliBhayibheli
(Eksodusi 27:1-21) “Ubenta lilati ngemgamba, libe nemihlubulo lelinganako: budze balo libe ngemamitha langaba mabili nemasentimitha langema-20, bubanti libe ngemamitha langaba mabili nemasentimitha langema-20, nekuphakama libe ngulelingaba yimitha nemasentimitha langema-30. 2 Lamakona lamane ubowenta abe netimphondvo lapha ngetulu, tihlangane tibe yintfo yinye nelilati, konkhe loku ubokwembesa ngelitfusi. 3 Ubolentela emabhodo ekucitsa umlotsa, ulentele nemafosholo, nemigezelo, netindishi, netintsi tekuhloma inyama, nemakesi; tonkhe letitja ubotenta ngelitfusi. 4 Ubolentela umhlobiso welitfusi losasisefo, etikwawo ubokwenta emajiva lamane elitfusi emakoneni awo omane. 5 Ubowuvunulisa ngaphansi kwalomtsandvo welilati loselukhalweni lwelilati. 6 Lelilati ubolentela timboko ngemgamba, uyembese ngelitfusi. 7 Uyawutifaka emajiveni ngala nangala kwelilati njalo nje naletfwalwako. 8 Lelilati ubolenta ngemapulango libe nemhubhe, ulakhe ngaleyo ndlela lengakukhombisa yona entsabeni.” 9 “Lelithende lekukhontela ubolibiyela ngesibuya; lesibuya ubosakha ngetindvwangu telineni lecolisakele. Ngaseningizimu lesibuya kufanele sibe nebudze lobungemamitha langaba ngema-46, 10 sibe netinsika letingema-20 letimiswe emasekweni elitfusi langema-20, letinsika tibe nemahhuka nemigcala yesiliva. 11 Kufanele kwentiwe njalo futsi nangasemhlubulweni longasenyakatfo; lesibuya sibe nebudze lobungemamitha langaba ngema-46, letindvwangu tesibuya kufanele tilengiswe etinsikeni letingema-20 letimiswe emasekweni elitfusi langema-20. Letinsika tibe nemahhuka nemigcala yesiliva. 12 Ngasenshonalanga kufanele kube nesibuya setindvwangu lesingemamitha langaba ngema-23 budze, letinsika tisinyiswe emasekweni lalishumi. 13 Bubanti balesibuya ngembili kwaso, ngasemphumalanga, kufanele bube ngemamitha langaba ngema-23. 14 Kulenga kwato letindvwangu ngala kwemnyango kufanele kube ngemamitha langaba sitfupha nemasentimitha langema-60 bubanti, tihhukwe etinsikeni letintsatfu letisinyiswe emasekweni lamatsatfu. 15 Nangale kwemnyango kufanele kulenge tindvwangu letingemamitha langaba sitfupha nemasentimitha langema-60 bubanti, tihhukwe etinsikeni letintsatfu letisinyiswe emasekweni lamatsatfu. 16 Lomnyango wesibuya kufanele ube nesivalo lesentiwe ngendvwangu yelineni lecolisakele lehlotjiswe nangensontfo leluhlata njengesibhakabhaka, nalebukhwebeletane, nalebovu ngalokutopele; kube ngumsebenti wengcweti yetekuhlobisa, bubanti balendvwangu bube ngemamitha langaba yimfica. Kufanele ihhukwe etinsikeni letine letisinyiswe emasekweni lamane. 17 Tonkhe tinsika letitungelete lesibuya kufanele tibe nemigcala yesiliva nemahhuka esiliva, emaseko ato entiwe ngelitfusi. 18 Lesibuya kufanele sibe nebudze lobungemamitha langaba ngema-46, nebubanti lobungemamitha langaba ngema-23, nekuphakama kwetindvwangu lokungemamitha langaba mabili nemasentimitha langema-20. Letindvwangu kufanele tentiwe ngemitiya yelineni leyephotselwe yacolisakala, emaseko ato letinsika entiwe ngelitfusi. 19 Tonkhe timphahla letitawusetjentiswa kulelithende ekukhonteni ngisho netiphunti talelithende kanye netesibuya kufanele kwentiwe ngelitfusi.” 20 “Uyale ema-Israyeli kutsi akakuletsele emafutsa lacengekile ekukhanyisa tibane lentiwe ngemncumo. Letibane kufanele tihlale tikhanya. 21 Aroni nemadvodzana akhe kufanele balinakekele lelithende lekuhlangana ngekulikhanyisa kusukela kusihlwa kuze kube ngusekuseni; lolutsi lwetibane kufanele lubekwe ngaphandle kwendvwangu lesembikwelibhokisi lesivumelwane, lapho ngikhona khona. Lomtsetfo kufanele wentiwe ngema-Israyeli titukulwane ngetitukulwane.”
SEPTEMBER 28–OCTOBER 4
UMCEBO LOSEVINI LANKULUNKULU | EKSODUSI 29-30
“Umnikelo Loya KuJehova”
(Eksodusi 30:11, 12) Simakadze wakhuluma kuMosi, watsi: 12 “Nawenta lubalo lwema-Israyeli, ngulowo nalowo kufanele akhiphe inhlawulo yemphilo yakhe ngesikhatsi ubabala, khona angetikwehlelwa sishayo, nasangene elubalweni.
it-2-E 764-765
Kubhaliswa
ESinayi. Kubhaliswa kwekucala Jehova layala kutsi kwentiwa, kwenteka ngesikhatsi ema-Israyeli aseSinayi ngenyanga yesibili emnyakeni wesibili ema-Israyeli aphumile eGibhithe. Kute kusitwe Mosi kulomsebenti, kwakhetfwa baholi emndenini ngamunye lebebatawuhola kulomsebenti wekubhalisa. Akusiwo emadvodza lebekaneminyaka lengu-20 kuya etulu kuphela, lebekufanele akhokhe umnikelo lobewuyihhafu yelishekeli, kodvwa wonkhe umuntfu lobekabhalisile bekufanele awukhiphe kute kwentiwe umsebenti ethendeni lekukhontela. (Eks 30:11-16; Nu 1:1-16, 18, 19) Linani lalabo lababhaliswa belingu-603,550, ngaphandle kwemaLevi lebekete lifa kulelive. Bekungakafaneli akhokhe umtselo futsi abengayi emphini.—Nu 1:44-47; 2:32, 33; 18:20, 24.
(Eksodusi 30:13-15) Ngulowo nalowo muntfu lowewelela kulabo lesebabaliwe kufanele akhiphe imali lekalwe nalejutjwe ngalokusemtsetfweni, lowo mnikelo awukhiphe kimi. 14 Wonkhe longenile kulolubalo losukela eminyakeni lengema-20 budzala kuye etulu kufanele awukhiphe lomnikelo waSimakadze. 15 Lonjingile akufanele akhokhiswe ngetulu, nalophuyile akukafaneli akhokhiswe ngaphansi kwalemali, lekuyinhlawulo yetimphilo tenu kuSimakadze.
it-1-E 502
Umnikelo
UMtsetfo bewudzinga kutsi kwentiwe iminikelo letsite. Ngesikhatsi Mosi enta lubalo lwema-Israyeli, indvodza ngayinye leneminyaka lengu-20 budzala kuya etulu bekufanele ikhiphe inhlawulo yemphilo yayo, “lobekuyihhafu yelishekeli [lokungenteka bekungu-E19.86] lasendzaweni lengcwele.” Bekungumnikelo loya kuJehova kuze kuhlengwe timphilo tabo kanye nekwenta umsebenti ‘ethendeni lekuhlangana.’ (Eks 30:11-16) Josephus lobekasati mlandvo semaJuda watsi (The Jewish War, VII, 218 [vi, 6]), ‘lemitselo lengcwele’ beyentiwa njalo ngemnyaka.—2Ti 24:6-10; Mat 17:24; buka sihloko lesitsi TAXATION.
(Eksodusi 30:16) Lemali leyinhlawulo uboyibutsa kuma-Israyeli, uyisebentise ekuchubeni nasekusekeleni inkonzo yelithende lekuhlangana. Lemali ngeyekuhlenga timphilo tabo, khona mine, Simakadze, ngitabokhumbula kuphephisa sive saka-Israyeli.”
w11-ZU 11/1 12 ¶1-2
Bewati Yini?
Imisebenti yasethempelini laJehova eJerusalema beyisekelwa njani ngetimali?
Imisebenti leyehlukahlukene lebeyentiwa ethempelini beyentiwa ngemali yemtselo, ngalokuyinhlo bekungumnikelo wekukhokha kwelishumi. Kodvwa betikhona naletinye tinhlobo tekunikela. Sibonelo nje, ngesikhatsi kwakhiwa lithende lekukhontela, Jehova wayala Mosi kutsi abutse imali lengangehhafu yelishekeli kuwo wonkhe ema-Israyeli lebekabhalisile kute kwentiwe ‘umnikelo kuJehova.’—Eksodusi 30:12-16.
Kubonakala shengatsi bekuvamile kutsi umJuda ngamunye akhokhe linani lelingashintji lemtselo welithempeli njalo ngemnyaka. Ngiwo lomtselo Jesu layala Phetro kutsi awubhadale asebentisa luhlavu lebekalutsetse emlonyeni wenhlanti.—Matthew 17:24-27.
Kufunisisa Umcebo EVini LaNkulunkulu
(Eksodusi 29:10) “Ubobe sewuletsa lenkunzana embikwalelithende lekuhlangana, Aroni nemadvodzana akhe bayawube sebabeka tandla tabo etikwenhloko yayo.
it-1-E 1029 ¶4
Sandla
Kubeka Tandla. Ngaphandle nje kwekuphatsa tintfo letitsite, tandla betibekwa kumuntfu nobe entfweni letsite ngetizatfu letehlukahlukene. Ngalokuvamile lesento besisetjentiswa nakukhetfwa nobe nakubekwa umuntfu lotsite nobe nakwemukelwa intfo letsite. Ngesikhatsi semkhosi wekubekwa kwemphristi, Aroni nemadvodzana akhe bebabeka tandla tabo enhloko yenkunzi nasenhloko yetimvu letimbili lebekutawentiwa ngato umnikelo, ngaleyondlela bekuvunywa kutsi letilwane tinikelwe ngenca yekuba kwabo baphristi baJehova Nkulunkulu. (Eks 29:10, 15, 19; Lev 8:14, 18, 22) Ngesikhatsi Joshuwa akhetfwa kutsi angane esikhundleni saMosi, ngekuyalwa nguNkulunkulu Mosi wabeka tandla takhe kuJoshuwa, lowabese ugcwala umoya wekuhlakanipha futsi lomoya wamsita wakhona kuhola ema-Israyeli. (Dut 34:9) Tandla betibekwa kumuntfu nangabe abusiswa. (Gen 48:14; Mak 10:16) Jesu Khristu bekatsintsa nobe abeke tandla takhe kubantfu lebekabaphilisa. (Mat 8:3; Mak 6:5; Luk 13:13) Labanye bantfu bebatfola umoya longcwele ngekutsi baphostoli sebababeke tandla.—Imi 8:14-20; 19:6.
(Eksodusi 30:31-33) Ubokhuluma kuma-Israyeli utsi: ‘Lamafutsa ami langcwele emgcobo niyakuwasebentisa kuto tonkhe titukulwane tenu. 32 Akukafaneli atselwe emitimbeni yebantfu nje, futsi kufanele ningawakhi lamanye ngaletilinganiso talawa; angcwele, futsi nibowatsatsa ngekutsi vele angcwele. 33 Nangabe kungaba khona lowakha lafana nawo nome awasebentise kulomunye longesiye umphristi, uyawuncunywa esiveni sakubo.’”
it-1-E 114 ¶1
Logcotjiwe, Kugcoba
EMtsetfweni Jehova lawunika Mosi, wamtjela indlela yekwenta emafutsa ekugcoba. Nakwentiwa lamafutsa bekuhlanganiswa tintfo lebetikhetsekile letifaka ekhatsi imure, isinamoni lenuka kamnandzi, ikalamu, ikhasiya nemafutsa emncumo. (Eks 30:22-25) Bekulicala lelikhulu kakhulu kutsi umuntfu atentele lamafutsa ekugcoba, kuze awasebentise ngendlela levamile nobe ngetinjongo letingakafaneli.
Kufundvwa KweliBhayibheli
(Eksodusi 29:31-46) “Ubotsatsa lenyama yesihhanca semgcobo wa-Aroni nemadvodzana akhe uyiphekele endzaweni lengcwele. 32 Bo-Aroni nemadvodzana akhe baboyidla kanye nesinkhwa lesisesitjeni, ekungeneni kwelithende lekuhlangana. 33 Loko bekukwemsimeto wenhlawulo nabagcotjwa, banikelwa, kubodliwa ngibo bodvwana; longesiye umphristi angakudli, ngobe kungcwele. 34 Nakwenteka lenyama yemgcobo, nome sinkhwa kusala kuze kube ngakusasa ekuseni, ubobe sewukushisa ngemlilo loku lokulibhadlela. Akukafaneli kudliwe, ngobe kungcwele. 35 “Lemisimeto yemgcobo uboyenta ku-Aroni nakumadvodzana akhe njengobe ngikuyalile, iyawutsatsa emalanga lasikhombisa. 36 Onkhe emalanga ubonikela ngenkunzi ibe ngumnikelo wetono, khona titawutsetselelwa; ngekwenta njalo utawuhlambulula lilati, uligcobe ngemafutsa ulingcwelise bese uyalinikela. 37 Loku ubokwenta onkhe lamalanga lasikhombisa. Lelilati litawuba ngcwele ngalokuphelele; lowo nome loko lokulitsintsako kutawulinyatwa ngemandla ebungcwele balo.” 38 “Naku-ke lotawunikela ngako elatini njalo ngemalanga onkhe. Uyawunikela emazinyane etimvu lamabili lanemnyaka munye budzala. 39 Lizinyane lelinye utabolinikela ekuseni, lelinye ulinikele entsambama nakushona lilanga. 40 Lelizinyane lelitabonikelwa ekuseni libohambisana nemphuphu yakolo locolisakele leyikhilogremu yinye, lebhicwe nelitha yinye yemafutsa emncumo. Utsele ilitha yinye yeliwayini ibe ngumnikelo wesinatfo. 41 Niyawunikela leli lelinye lizinyane entsambana kanye nalowo mnikelo walokutinhlavu nemnikelo wawo wesinatfo njengasekuseni. Lelo liphunga lelinuka lusi lolumnandzi kuSimakadze, umnikelo lowentiwa ngemlilo kuSimakadze. 42 “Kuyawuhlala kungumnikelo wekushiswa titukulwane ngetitukulwane, wentiwe ekungeneni kwelithende lekuhlangana embikwaSimakadze; kulapho ngitabohlangana khona nebantfu bami, ngikhulume kuwe. 43 Ngitabohlangana lapho nema-Israyeli; lendzawo bese ingcweliswa yinkhatimulo yami. 44 “Lelithende lekuhlangana nelilati ngitawukungcwelisa; bo-Aroni nemadvodzana akhe ngitabehlukanisela inkonzo yekuba baphristi. 45 Ngitawuhlala emkhatsini wema-Israyeli, ngibe nguNkulunkulu wabo. 46 Bayawukwati kutsi nginguSimakadze longuNkulunkulu wabo, lowabakhipha eveni laseGibhithe, ngentela kuhlala emkhatsini wabo. NginguSimakadze longuNkulunkulu wabo.”