Chubeka Ujabulile Ngisho Sewukhulile

1-2. Jehova ubabuka njani lasebakhulile labetsembekile? (Tihlabelelo 92:12-14; buka nesitfombe.)

BANTFU emhlabeni wonkhe benta ngetindlela letingafani nababona kutsi sebayakhula. Sibonelo nje, cabanga nganaku: Uyakhumbula yini ngesikhatsi ubona lunwele lwekucala lolumhlophe enhloko yakho? Kungenteka wacabanga kulukhipha ngaphambi kwekutsi lubonwe ngulabanye. Kodvwa wabese uyabona kutsi kulukhipha ngeke kutivimbe letinye kutsi tingaveli. Lesibonelo sikhombisa kutsi bantfu labanyenti betama kamatima kanganani kungagugi.

² Nobe kunjalo, Babe wetfu wasezulwini unembono lowehlukile ngebantfu bakhe lasebakhulile. (Taga 16:31) Ubafananisa netihlahla letikhula kahle. (Fundza Tihlabelelo 92:12-14.) Yini leyenta lesifananiso sibe kahle? Tihlahla lesetineminyaka leminyenti tivame kuba tinhle ngenca yekutsi tinemacembe lamanyenti nobe timbali letinukelela kahle. Sibonelo nje, kuneluhlobo lolutsite lwesihlahla lesitfolakala eJapan futsi lesiphila iminyaka leminyenti. Letinye taletihlahla letinhle setineminyaka lengetulu kwaleyinkhulungwane. Njengaletihlahla letikhula kahle, bantfu baJehova labetsembekile lasebakhulile bahle, ikakhulukati emehlweni aNkulunkulu. Jehova ubona ngale kwaletimvu letisenhloko. Uyajabula ngebuntfu lobuhle bebantfu lasebakhulile, lobufana nekucinisela kwabo, nekuba cotfo kanye neminyaka leminyenti labayicitse bamkhonta ngekwetsembeka.

3. Niketa sibonelo sendlela Jehova lasebentisa ngayo lasebakhulile kuze afeze injongo yakhe.

³ Kukhula ngeminyaka akulehlisi lizinga umuntfu labaluleka ngalo kuJehova.a Ecinisweni, Jehova uvame kusebentisa lasebakhulile kuze afeze injongo yakhe. Sibonelo nje, Sara besekakhulile ngesikhatsi Jehova atsi utawuba ngumake wesive lesikhulu futsi abe ngukhokho waMesiya. (Gen. 17:15-19) Mosi besekakhulile ngeminyaka ngesikhatsi Jehova atsi akahole ema-Israyeli awakhiphe eGibhithe. (Eks. 7:6, 7) Nemphostoli Johane besekakhulile ngesikhatsi Jehova amphefumulela kutsi abhale tincwadzi letisihlanu teliBhayibheli.

4. Ngekusho kweTaga 15:15, yini lengasita lasebakhulile kutsi babeketelele tinkinga lababhekana nato? (Buka nesitfombe.)

⁴ Lasebakhulile babhekana netinkinga letinyenti letita nekukhula ngeminyaka. Naku lokwashiwo ngulomunye dzadze adlala, watsi: “Kukhula ngeminyaka akusiko kwabo bobo.” Kodvwa kuba nenjabulob kungasita lasebakhulile kutsi bakhone kubeketelela tinkinga letita nekukhula ngeminyaka. (Fundza Taga 15:15.) Kulesihloko, sitawucoca ngekutsi yini lasebakhulile labangayenta kuze bachubeke bajabulile. Sitawuphindze sicoce ngekutsi labanye bangabasita njani bazalwane nabodzadze lasebakhulile ebandleni. Ase sicale sicoce ngekutsi yini lengenta kube matima kuhlala sijabulile njengobe sikhula.

YINI LENGENTA KUBE MATIMA KUHLALA SIJABULILE NASIKHULA NGEMINYAKA?

5. Yini lengenta labanye lasebakhulile kutsi badvumateke?

⁵ Yini lengakwenta udvumateke? Mhlawumbe kutsi awusakhoni kwenta loko bewukhona kukwenta. Mhlawumbe ukhumbula emalanga akho ebusha futsi usephilile. (Shu. 7:10) Sibonelo nje, lomunye dzadze lokutsiwa nguRuby utsi: “Sekumatima kugcoka ngobe umtimba wami ubuhlungu wonkhe futsi angikhoni kuhamba kahle. Intfo lemelula njengekuphakamisa lunyawo ngigcoke emasokisi seyimatima. Tandla tami tindzimundzimu futsi tinesifo sematsambo, lokwenta kube matima ngisho nekwenta imisebenti lemelula.” Harold, lebekasebenta eBethel, utsi: “Angisatati nekutsi ngingubani, futsi ngihle ngitfukutsela. Nangisemusha bengicinile. Bengititsandza temidlalo. Labanye bebavame kutsi: ‘Nika Harold ibhola ngobe akageji.’ Kodvwa nyalo angiboni nekutsi ngisengakhona ngisho nekuyijika.”

6. (a) Ngutiphi letinye tizatfu letingenta labanye lasebakhulile badvumateke? (b) Yini lengasita lasebakhulile bancume kutsi bayekele yini kushayela nobe cha? (Buka kulomagazini sihloko lesitsi “Kufanele Ngiyekele Yini Kushayela?”)

⁶ Kungenteka udvumateke ngenca yekutsi awusakhoni kutentela letinye tintfo. Loko kungenteka kakhulu nangabe kudzingeka unakekelwe ngulotsite nobe kudzingeka uyohlala nemntfwanakho. Nobe kungenteka udvumateke kakhulu ngenca yemphilo lehhohlokako nobe ngenca yekutsi awusaboni kahle emehlweni, lokwenta kutsi ungakhoni kutiyela etindzaweni letitsite nobe kushayela. Loko kungacindzetela kakhulu! Kodvwa kungasita kukhumbula kutsi kubaluleka kwetfu kuJehova nakulabanye akuyi ngekutsi siyakhona yini kutinakekela, kuhlala sodvwa nobe kushayela imoto. Ngetulu kwaloko, singaciniseka kutsi Jehova uyayicondza indlela lesitiva ngayo. Jehova uyati kutsi simtsandza kakhulu yena kanye nebazalwane betfu nabodzadze, futsi nguloko lokusenta sibaluleke kakhulu kuye.​—1 Sam. 16:7.

7. Yini lengasita labo labadvunyatwe kutsi kungenteka kuphela kwalelive kungefiki basaphila?

⁷ Mhlawumbe udvunyatwe kutsi kungenteka kuphela kwalelive angeke kufike usaphila. Yini lengakusita nangabe utiva ngaleyondlela? Khumbula kutsi Jehova ulindze ngesineke kuze acedze lelive lelibi. (Isa. 30:18) Kodvwa yini leyenta Jehova abe nesineke? Kuba nesineke kwakhe kuniketa tigidzi tebantfu sikhatsi nelitfuba lekumati nelekumkhonta. (2 Phet. 3:9) Ngako nawudvumatekile, yetama kucabanga kutsi banyenti kangakanani bantfu labatawusitakala kulesineke saJehova ngaphambi kwekutsi kufike kuphela. Kungenteka yini kutsi labanye babo ngemalunga emndeni wakho?

8. Tinkinga tekukhula ngeminyaka tingabatsintsa njani lasebakhulile?

⁸ Ngisho nobe singanani ngeminyaka, nangabe singativa kahle singahle sisho nobe sente intfo lesibese siyatisola ngayo. (Shu. 7:7; Jak. 3:2) Sibonelo nje, ngesikhatsi lenye indvodza leyetsembekile lokutsiwa nguJobe ihluphekile, emavi ‘beyiwakhuluma bekangenangcondvo.’ (Jobe 6:1-3) Ngetulu kwaloko, kugula nobe emaphilisi latsite kungenta lasebakhulile kutsi bente nobe basho intfo labangeke bayisho nobe bayente nabaphilile. Kuliciniso kutsi kute kitsi lokufanele asebentise kukhula ngeminyaka nobe kugula kube saba sekuba bete umusa nobe sekufuna tintfo ngenkhani. Nangabe sibona kutsi sikhulume kabi nalotsite, kufanele sicolise.​—Mat. 5:23, 24.

YINI LONGAYENTA KUZE UHLALE UJABULILE?

9. Kubaluleke ngani kutsi wemukele lusito lwalabanye? (Buka netitfombe.)

⁹ Yemukela lusito lwalabanye. (Gal. 6:2) Ekucaleni, ungahle ukutfole kumatima loko. Lomunye dzadze lokutsiwa nguGretl utsi: “Ngalesinye sikhatsi ngikutfola kumatima kwemukela lusito ngobe ngiva ngatsi ngitawuba ngumtfwalo. Kungitsetse sikhatsi kushintja indlela lengicabanga ngayo, futsi ngekutfobeka ngivume kutsi ngiyaludzinga lusito.” Nawemukela lusito lwalabanye, wenta kutsi babe nenjabulo letfolakala ngekupha. (Imis. 20:35) Ngetulu kwaloko, utawujabula nawubona kutsi labanye bakutsandza kanganani nekutsi bakukhatsalela kanganani.

10. Kubaluleke ngani kukhombisa kutsi uyabonga? (Buka nesitfombe.)

¹⁰ Khombisa kutsi uyabonga. (Khol. 3:15; 1 Thes. 5:18) Siyajabula nangabe labanye basentela tintfo letinhle, kodvwa kungenteka siyakhohlwa kukukhombisa loko. Nobe kunjalo, nangabe simoyitela futsi sisho kutsi siyabonga, senta bangani betfu bative babalulekile futsi batsandvwa. Leah, lonakekela lasebakhulile eBethel, utsi: “Lomunye wabodzadze lengimnakekelako ungishiyela imilayeto yekubonga. Ayibi midze, kodvwa iba mnandzi. Ngiyatsandza kuyitfola, futsi kuyangijabulisa kubona kutsi uyabonga ngaloko lengimentela kona.”

11. Ungabasita njani labanye? (Buka nesitfombe.)

¹¹ Yetama kusita labanye. Nawusebentisa sikhatsi sakho nemandla akho kuze usite labanye, mancane ematfuba ekutsi unake kakhulu tinkinga takho. Lesinye saga sase-Africa sifananisa lasebakhulile nemtapo wetincwadzi lonelwati lolunyenti. Kodvwa tincwadzi letivaliwe letiseshelufini atifundzisi nobe ticoce tindzaba. Ngako njengobe ufana nalomtapo wetincwadzi, akusuke kuwe kucocela labasebasha ngelwati lonalo nangaloko lokwentekile ekuphileni kwakho. Babute imibuto bese uyabalalela. Bafundzise kutsi yini leyenta kuphila ngetimiso taJehova kuhlale kukahle kakhulu nekutsi kutabenta bajabule. Siyaciniseka kutsi utawujabula ngekudvudvuta labangani bakho labasebasha futsi ubacinise.​—Hla. 71:18.

12. Ngekusho kwa-Isaya 46:4, yini Jehova letsembisa kuyentela lasebakhulile? (Buka nesitfombe.)

¹² Thantaza kuJehova ucele emandla. Ngisho nobe ungahle utive ukhatsele nobe umoya ushona phansi, Jehova “akadzinwa futsi akakhatsali.” (Isa. 40:28) Uwasebentisa njani emandla akhe langapheli? Lenye indlela kutsi ucinisa labo lasebakhulile labetsembekile. (Isa. 40:29-31) Ecinisweni, wetsembisa kubasita. (Fundza Isaya 46:4.) Ngetulu kwaloko, Jehova uhlale atigcina tetsembiso takhe. (Josh. 23:14; Isa. 55:10, 11) Nawuthantaza kuJehova, utakunika lusito loludzingako. Utawubese uyayiva indlela lakutsandza ngayo futsi loko kutakwenta ujabule kakhulu.

13. Ngekusho kwa-2 KubaseKhorinte 4:16-18, yini lokufanele siyikhumbule? (Buka nesitfombe.)

¹³ Hlale utikhumbuta kutsi simo lobhekene naso sesikhashana. Nasikhumbula kutsi simo lesimatima lesibhekene naso sesikhashana, kungaba melula kusibeketelela. Ngetulu kwaloko, liBhayibheli liyasicinisekisa kutsi kukhula ngeminyaka nekugula kwesikhashana. (Jobe 33:25; Isa. 33:24) Ngako ungatfola injabulo ngekwati kutsi tikhatsi letimnandzi nguleto letiseta, hhayi leto letengcile. (Fundza 2 KubaseKhorinte 4:16-18.) Kodvwa yini labanye labangayenta kuze basite?

INDLELA LABANYE LABANGASITA NGAYO

14. Kubaluleke ngani kuvakashela lasebakhulile futsi sibashayele?

¹⁴ Hlale uvakashela bazalwane nabodzadze lasebakhulile futsi ubashayele lucingo. (Heb. 13:16) Lasebakhulile bangativa babodvwa. Lomunye umzalwane lokutsiwa nguCamille longakhoni kuphuma endlini utsi: “Kudzingeka ngihlale endlini kusukela ekuseni lize liyoshona. Ngako ngiba nesitunge kakhulu. Ngaletinye tikhatsi ngiva ngatsi ngifana nelibhubesi lelidzala lelivalelwe. Ngitiva ngesaba futsi ngiyatfukutsela.” Nasivakashela lasebakhulile, siyabacinisekisa kutsi babalulekile kitsi futsi siyabatsandza. Kungenteka sonkhe siyasikhumbula sikhatsi lapho besitsi sitawushayela losakhulile losebandleni nobe simvakashele kodvwa sakhohlwa. Sonkhe simatasatasa. Ngako yini lengasisita kutsi ‘siciniseke ngetintfo letibaluleke kakhulu,’ lokufaka ekhatsi kuvakashela lasebakhulile? (Fil. 1:10) Kungakusita kubhala phansi kukhalenda yakho kuze ukhumbule kutfumelela losakhulile losebandleni umlayeto nobe kumshayela. Ungaphindze uhlele sikhatsi sekubavakashela, kungabi nje kutsi umane watfola litfuba.

15. Yini labasebasha nalasebakhulile labangayenta kanye kanye?

¹⁵ Nangabe usemusha ngeminyaka, kungenteka utibute kutsi yini longayicoca nobe uyente nalasebakhulile. Kodvwa yetama kungacabangi kakhulu ngaloko. Bani nje ngumngani lokahle. (Taga 17:17) Coca nalasebakhulile ngaphambi kwemihlangano yelibandla nobe ngemuva kwayo. Mhlawumbe ungacela bakucocele ngelivesi labalitsandzako nobe ngentfo lehlekisako leyenteka kubo nabasebancane. Ungaphindze ubacele kutsi batewubukela nawe luhlelo lweMsakato We-JW. Ungabasita nangaletinye tindlela. Sibonelo nje, ungabasita kutsi bagcine tintfo tabo tebuchwephesha tisebenta kahle, nobe ubatsatsele (download) tincwadzi takamuva. Lomunye dzadze lokutsiwa nguCarol utsi: “Cela kwenta nalosakhulile tintfo lotsandza kutenta. Nanobe sengikhulile, solo ngisakufuna kujabulela kuphila. Ngiyakutsandza kuya etitolo, kutikhipha ngiyokudla ngaphandle, nekuphuma ngiyobona indalo.” Lomunye dzadze lokutsiwa nguMaira utsi: “Lomunye webangani bami uneminyaka lengu-90. Sishiyana ngeminyaka lengu-57. Kodvwa ngivame kukukhohlwa loko ngobe sihleka ndzawonye futsi sibukele ema-movie ndzawonye. Nasinetinkinga, siyelulekana.”

16. Kusita ngani kuphekeletela lasebakhulile nabaya esibhedlela?

¹⁶ Baphekeletele nabaya esibhedlela. Ngetulu kwekusita lasebakhulile ngekwekuhamba, ungacinisekisa kutsi bodokotela nobe bonesi babaphatsa kahle esibhedlela futsi bayabanaka. (Isa. 1:17) Ungabasita ngekutsi ukubhale phansi loko lokushiwo ngudokotela. Lomunye dzadze losakhulile lokutsiwa nguRuth utsi: “Ngalokuvamile, nangiya ngedvwa esibhedlela, dokotela akanginaki ngendlela lefanele. Bodokotela bahle bakhuluma tintfo letinjengekutsi: ‘Wena awuguli; inkinga yakho nje isengcondvweni.’ Kodvwa nangihamba nalotsite, kuba nemehluko endleleni dokotela langiphatsa ngayo. Ngiyababonga bazalwane bami nabodzadze labatinika sikhatsi sekungiphekeletela.”

17. Ngutiphi tindlela tekushumayela lesingatisebentisa nalasebakhulile?

¹⁷ Shumayela nabo. Labanye lasebakhulile sebete emandla ekushumayela emtini ngemuti. Ungakhona yini kumema dzadze losakhulile kutsi ashumayele nawe ngencola? Ungaze umphatsele ngisho nesitulo kuze ahlale eceleni kwayo. Nobe ungahamba yini nemzalwane losakhulile nawuyodadisha liBhayibheli nalotsite, nobe nifundzele ekhaya lakhe? Labadzala belibandla bangakucabangela kuba nemihlangano yangaphambi kwekuyoshumayela ekhaya lalosakhulile kuze kube melula kutsi naye abe khona. Jehova uyajabula nasenta loko lesingakhona kukwenta kuze sikhombise kutsi siyabatsandza futsi siyabahlonipha lasebakhulile.​—Taga 3:27; Rom. 12:10.

18. Sitawucoca ngani esihlokweni lesilandzelako?

¹⁸ Kulesihloko, sikhunjutiwe kutsi Jehova uyabatsandza lasebakhulile futsi baligugu kuye. Sonkhe ebandleni sitiva ngendlela lefanako! Kukhula ngeminyaka kuta netinkinga letinyenti, kodvwa ngelusito lwaJehova, ungachubeka ujabulile. (Hla. 37:25) Kukhutsata kakhulu kwati kutsi tikhatsi letimnandzi nguleto letiseta, hhayi leto letengcile! Kodvwa labanye bazalwane nabodzadze banenkinga leyehlukile. Banakekela lilunga lemndeni leselikhulile, umntfwana nobe umngani logulako. Yini labangayenta kuze bachubeke bajabulile? Sihloko lesilandzelako sitawucoca ngemphendvulo yalombuto.