Kufanele Ngiyekele Yini Kushayela?

Usesimeni lesifanako yini? Nangabe kunjalo, yini lengakusita uncume kutsi uyekele yini kushayela nobe cha?

Kulamanye emave, bashayeli lasebafike emnyakeni lotsite labafuna kuvusetela timphepha tabo tekushayela kufanele bahlolwe ngudokotela nobe banikwe nguye imvume. EmaKhristu lahlala kulamave alalela imitsetfo kanye netincumo tahulumende. (Rom. 13:1) Kodvwa ngisho nobe uhlala kuphi, tikhona tindlela tekubuka kutsi uyakhona yini kushayela ngekuphepha.

HLOLA KUTSI USHAYELA NJANI

Lenye inhlangano yebantfu lasebakhulile ikhutsata kutsi batibute nayi imibuto lelandzelako:

• Nginebulukhuni yini bekufundza timphawu temgwaco nobe bekubona ebusuku?

• Sekucala kuba matinyana yini kusuluta inhloko, lokwenta kube lukhuni kutsi ngibuke tibuko netintfo letiseceleni?

• Ngikutfola kumatima yini kwenta tintfo ngekushesha, njengalapho ngisusa lunyawo lwami emafutseni luya emabhilikini?

• Ngihamba kancane yini nangishayela kangangekutsi ngize ngivimbe timoto letinyenti?

• Sekukanyenti yini ngiphose ngishayisa, nobe imoto yami imoncokile futsi yahhudleka ngenca yekushayisa tintfo?

• Ngike ngemiswa yini liphoyisa ngenca yendlela lengishayela ngayo?

• Ngike ngetela yini ngisashayela?

• Ikhona yini imitsi lengiyinatsako lengangenta ngiphazamiseke nangishayela?

• Emalunga emndeni wami nebangani bavete kukhatsateka kwabo yini ngendlela lengishayela ngayo?

Nangabe uphendvule munye nobe mibili yalemibuto nga-yebo, loko kungasho kutsi kungenteka kudzingeka wente lushintjo. Sibonelo nje, ungetama kungavami kushayela, ikakhulukati ebusuku. Hlale utihlola kutsi injani indlela loshayela ngayo. Ungabuta lilunga lemndeni nobe umngani kutsi injani indlela loshayela ngayo. Ungatsatsa neliklasi lekufundza tindlela letiphephile tekushayela. Nobe kunjalo, nangabe uphendvule munye nobe leminye yalemibuto nga-yebo, kungaba kahle kakhulu kutsi uyekele kushayela.a

CONDZISWA TIMISO TELIBHAYIBHELI

Singahle singaboni kutsi likhono letfu lekushayela liyehla. Kungenteka ingasehli kahle indzaba yekutsi siyekele yini kushayela nobe cha. Ngako ngutiphi timiso teliBhayibheli letingakusita kutsi ucabangisise kahle ngalendzaba futsi wente sincumo lesihlakaniphile? Cabanga nganati letimbili.

Hlale utfobekile. (Taga 11:2) Njengobe sikhula, sibese asisaboni kahle, singaseva kahle, futsi emamasela abe butsakatsaka. Sibonelo nje, bantfu labanyenti bayayekela kudlala leminye imidlalo njengobe bakhula ngobe bayabona kutsi kubese kuba melula kutsi balimale. Kungulokufanako nasendzabeni yekushayela. Umuntfu lotfobekile utawuyekela kushayela nakabona kutsi akusasiyo intfo lephephile kuyenta. (Taga 22:3) Ngetulu kwaloko, nangabe labanye baveta kukhatsateka kwabo, umuntfu lotfobekile utawulalela.—Catsanisa na-2 Samuweli 21:15-17.

Gwema licala lengati. (Dut. 22:8) Imoto iyingoti nayingasetjentiswa kahle. Umuntfu lochubeka ashayela ngisho nobe angasakhoni kahle angafaka kuphila kwakhe nekwalabanye engotini. Nakungatsiwa utfola ingoti lematima, angaba nelicala lengati.

Nangabe kufanele wente lesincumo lesimatima sekutsi uyekele yini kushayela nobe cha, kugweme kucabanga kutsi utawulahlekelwa sitfunti nobe kubaluleka kwakho. Jehova uyakutsandza ngenca yebuntfu bakho lobuhle, lobufaka ekhatsi kutsi uyakwati loko longakhona kukwenta nalongeke ukukhone, kutfobeka kwakho nekutsi unendzaba nekuphepha kwalabanye. Wetsembisa kukusekela futsi akudvudvute. (Isa. 46:4) Akayuze akushiye. Ngako mcele akusite usebentise kuhlakanipha netimiso teliBhayibheli njengobe usenta lesincumo sekutsi uchubeke yini ushayela nobe cha.