Imibuto Levela Kubafundzi
Ngumuphi ‘lomcondvo’ Jehova latawufaka etinhlitiyweni tetive esikhatsini lesitako?
Nasikhuluma ngekucala kwekuhlupheka lokukhulu, Sembulo 17:16, 17 sitsi: “Letimphondvo letingu-10 lotibonile kanye nalesilwane sesiganga, titayitondza lengwadla, titsatse konkhe lenako futsi tiyingcunule, titawudla nenyama yalengwadla tiphindze tiyishise ingcongce. Ngobe Nkulunkulu ukufake etinhlitiyweni tato kutsi tente injongo yakhe, tifeze lomcondvo munye letinawo ngekutsi tinike lesilwane sesiganga umbuso wato.” Esikhatsini lesendlulile, tincwadzi tetfu betitsi ‘lomcondvo’ Jehova latawufaka etinhlitiyweni tetive kutsi ticotfule inkholo yemanga.
Kodvwa kudzingeka sente lushintjo. ‘Lomcondvo’ Jehova latawufaka etinhlitiyweni tetive kutsi “tinike lesilwane sesiganga umbuso wato.” Kuze ucondze kutsi loku kutawenteka njani, cabanga nganayi imibuto.
Bobani bosogcamile kulesiphrofetho? ‘Lengwadla’ iphindze ibitwe ngekutsi ‘yiBhabhulona Lenkhulu’; imelela umbuso wemhlaba wenkholo yemanga. ‘Lesilwane sesiganga lesibovu’ simelela inhlangano yekuthula leyasungulwa nga-1919 lebekutsiwa yi-League of Nations futsi nyalo kutsiwa nguMhlabuhlangene. (Semb. 17:3-5) “Letimphondvo letingu-10” timelela bonkhe bohulumende labasekela lesilwane sesiganga.
Ihlangene ngani lengwadla nalesilwane sesiganga lesibovu? Lengwadla beyisolo ‘ihleti’ etikwalesilwane sesiganga lesibovu, isisekela futsi yetama kusilawula nekusiphatsa.
Kutawentekani kulengwadla? Lesilwane sesiganga naletimphondvo letingu-10 letisisekelako “titayitondza lengwadla.” Tikhiphela kuyo intfukutselo yato, titawutsatsa umcebo wayo futsi tibubeke ebaleni bubi bayo. Titayibhubhisa, njengobe kunguloko Jehova latsi kutawenteka kuyo. (Semb. 17:1; 18:8) Loku kutawuba kuphela kwetinhlangano tenkholo yemanga. Kodvwa ngaphambi kwekutsi loko kwenteke, Jehova utawubangela tive kutsi tente intfo lengazange seyenteke emibusweni yebantfu.
Yini Jehova latawubangela tive kutsi tiyente? Utawufaka etinhlitiyweni talelimphondvo letingu-10 ‘umcondvo wakhe,’ wekutsi ‘tinike lesilwane sesiganga [lesibovu] emandla neligunya lato,’ lokunguMhlabuhlangene. (Semb. 17:13) Cabanga ngekutsi kusho kutsini loko. Bohulumende bebantfu batatentela bona yini lesincumo sekunika lesilwane sesiganga emandla neligunya labo? Cha! Lesiphrofetho sikhombisa kutsi nguNkulunkulu lotawubangela kutsi bente lesincumo. (Taga 21:1; catsanisa na-Isaya 44:28.) Loko kutawenteka kancane kancane yini? Cha! Kubonakala ngatsi lolushintjo lutawenteka kungakalindzeleki. Ngemuva kwaloko, lesilwane sesiganga lesitawube sesinemandla sitawubhubhisa tinhlangano tenkholo yemanga tingaphindzi tibe khona njengobe kunguloko Jehova lakufunako.
Yini-ke lesingayilindzela? Akukafaneli silindzele kubona imibiko yetindzaba letsi bohulumende sebacala kumsekela kakhulu kunakucala Mhlabuhlangene. Naku lesingakulindzela: Ngekuphatima kweliso, Jehova utakufaka etinhlitiyweni taletive kutsi tinike lesilwane sesiganga emandla ato. Nakwenteka loko, sitawati kutsi sekutawucala kuhlupheka lokukhulu. Kwanyalo, “asihlale siphapheme futsi sisangulukile etingcondvweni” ngobe ngekushesha kutawenteka tingucuko lesingakatilindzeli!—1 Thes. 5:6.