Sihloko Sebantfu Besifazane Labahlukunyetiwe
“TIGIDZI tebantfu besifazane emhlabeni wonkhe tiyahlukunyetwa, loku kufaka ekhatsi nemantfombatane lasemancane. Ungulomunye wabo yini? Fundza kutsi yini leyenta kuphepha kwakho kubaluleke kuNkulunkulu kanye nekutsi yini latawuyenta ngekuphatfwa kabi kwebantfu besifazane.”
Lawa ngemavi lasekucaleni kwesihloko lesiku jw.org lesitsi “Kuphepha Kwebantfu Besifazane—Loko Lokushiwo LiBhayibheli.” Ekugcineni kwalesihloko kune-link letakwenta ukhone kutitsatsela i-PDF yalesihloko, longakhona kuyiphrinta futsi uyigoce ibe ngemakhasi lamane. Lomunye dzadze waseMelika lokutsiwa nguStacy utsi: “Ngaphrinta emakhophi alesihloko, futsi mine nalomunye dzadze sawamikisa kulenye indzawo lesensimini yetfu lenakekela besifazane labahlukunyetiwe.”
Lomunye losebenta kulendzawo wacela lamanye emakhophi kuze awanikete labo labahlala lapho. Ngenca yaloko, baniketwa lamanye emapheshana langu-40 kanye nemakhadi e-jw.org langu-30. Nabaphindze babuyela ngemuva kwesikhatsi, umphatsi walendzawo waveta sifiso sekutsi labo labahlala kulendzawo bakhonjiswe kutsi sichutjwa njani sifundvo seliBhayibheli.
Stacy nalabanye bodzadze lababili baya kulenye indzawo lefana nalena bebayivakashele futsi bashiya emakhophi lasihlanu alelipheshana, kwacelwa nalamanye. Lomunye losebenta kulendzawo watsi: “Lamapheshana atabasita labesifazane labalana.” Wachubeka watsi: “Siyakudzinga loku.” Nabaphindze babuyela, labanye labahlala kulendzawo bahlangana kuze bakhonjiswe kutsi sichutjwa njani sifundvo seliBhayibheli, futsi lababili batsi bangatsandza kuya eHholweni leMbuso ngemphelasontfo lelandzelako.
Stacy utsi: “Iyasijabulisa indlela bantfu labasitsandza ngayo lesihloko. Lelipheshana naliphrintiwe futsi lagocwa kahle, liba yindlela lekhangako yekucocela labesifazane labahlukunyetiwe umlayeto weMbuso. Kwasitsintsa inhlitiyo kubona indlela bantfu bebajabule ngayo kwemukela lomlayeto. Sesilangatelela kubona indlela Jehova latasisita ngayo njengobe sichubeka sicocela labesifazane tindzaba letimnandzi.”