Imphi Lese-Ukraine Yente Kuswelakala Kwekudla Emhlabeni Kwaba Kubi Nakakhulu

Nga-May 19, 2022, bantfu labasemagunyeni labangetulu kwa-75 babikele i-United Nations Security Council kutsi “inkinga yekuswelakala kwekudla lebeyivele ikhona emhlabeni ngenca ye-COVID-19 kanye nekushintja kwesimo selitulu, seyiba yimbi nakakhulu ngenca yemphi lese-Ukraine kangangekutsi kulamanye emave sekuze kunendlala.” Ngekushesha nje ngemuva kwaloko, i-The Economist yabika kutsi ngenca “yalemphi, umhlaba lebewuvele unetinkinga letinyenti, utawuba nebantfu labanyenti lababulawa yindlala.” LiBhayibheli laphrofetha kutsi kuswelakala kwekudla lokunjengaloku bekutawuba khona kulesikhatsi lesiphila kuso. Nobe kunjalo, liphindze lisisite kutsi singabhekana kanjani nako.

LiBhayibheli laphrofetha ngenkinga yekuswelakala kwekudla

•  Jesu waphrofetha: “Sive sitawuvukela lesinye sive, nembuso uvukele lomunye umbuso, futsi kutawuba khona indlala.”—Matewu 24:7.

•  Incwadzi yeliBhayibheli yeSembulo ikhuluma ngebagibeli bemahhashi labane. Munye walabagibeli bemahhashi umelela timphi. Ulandzelwa ngulomunye lomelela indlala, lokusikhatsi lapho kudla kutawuba kuncane khona futsi kudule kakhulu. “Ngabona lihhashi lelimnyama; lobekaligibele bekaphetse sikali esandleni sakhe. Ngeva lobekunjengelivi . . . kutsi: ‘Ilitha yakolo ngadenariyo, nemalitha lamatsatfu ebhali ngadenariyo.’”—Sembulo 6:5, 6.

Letiphrofetho teliBhayibheli litimayelana nekuswelakala kwekudla tiyagcwaliseka nyalo kulesikhatsi liBhayibheli lelisibita ngekutsi ‘ngemalanga ekugcina.’ (2 KuThimothi 3:1) Kuze utfole lokunyenti ‘ngemalanga ekugcina’ kanye nangebagibeli bemahhashi labane lokukhulunywa ngabo kuSembulo, bukela i-video letsi Kusukela Nga-1914, Tintfo Tashintja Emhlabeni futsi ufundze nesihloko lesitsi “Bobani Labagibeli Bemahhashi Labane?”

Indlela liBhayibheli lelingasisita ngayo

•  LiBhayibheli lineteluleko letisebentako letingasisita sibhekane netimo leticindzetelako, letifaka ekhatsi kwenyuka kwentsengo yekudla nobe kweswelakala kwako. Buka tibonelo esihlokweni lesitsi “Indlela Ongaphila Ngayo Ngokuncane,” lesitfolakala ngesiZulu.

•  LiBhayibheli liphindze lisinikete litsemba lekutsi tintfo titawuba ncono. Lisetsembisa ngesikhatsi lapho “kutawuba nenala yekudla emhlabeni” futsi wonkhe muntfu atawuba nekudla lokwenele. (Tihlabelelo 72:16) Kuze utfole lokunyenti ngelitsemba leliseBhayibhelini ngelikusasa nangekutsi yini lengakwenta uletsembe, fundza sihloko lesitsi “Litsemba Sibili Ngelikusasa Lelihle.”