I-COVID-19 Ibulele Bantfu Labangu-6 Million—Litsini LiBhayibheli?

Ngekusho kwe-World Health Organization (WHO), kusukela i-COVID-19 yacala kuze kube ngu-May 23, 2022, ibulele bantfu labangu-6.27 million. Nobe kunjalo, embikweni wetindzaba wanga-May 5, 2022, i-WHO ivete kutsi kucatjangwa kutsi linani lebantfu lababulewe ngulomkhuhlane likhulu kakhulu kunaloku. Yaveta nekutsi nga-2020 nanga-2021, “naselilonkhe linani lebantfu lababulewe yi-COVID-19 ngalokucondzile nobe lababulewe tifo lebebavele banato letabese tibacindzetela kakhulu nabatfola lomkhuhlane . . . lilinganiselwa ku-14.9 million.” Kukhona yini liBhayibheli lelikushoko ngaletintfo letisivisa buhlungu?

LiBhayibheli laphrofetha ngetifo letingumshayabhuce

•  Jesu waphrofetha kutsi bekutawuba “netifo letingumshayabhuce” ngesikhatsi ‘semalanga ekugcina.’—Lukha 21:11, 2 KuThimothi 3:1.

Siphrofetho saJesu siyagcwaliseka lamuhla. Kuze utfole lokunyenti, fundza sihloko lesitsi “Zibonakala Ngani ‘Izinsuku Zokugcina,’ Noma ‘Isikhathi Sokuphela’?” lesitfolakala ngesiZulu.

LiBhayibheli liniketa indvudvuto

•  Nkulunkulu “wayo yonkhe indvudvuto losidvudvuta kuko konkhe kuhlupheka kwetfu.”—2 KubaseKhorinte 1:3, 4.

Bantfu labanyenti labafelwe tihlobo tabo batfole indvudvuto kuloko lokushiwo liBhayibheli. Fundza lokunyenti esihlokweni lesitsi “Ukubhekana Nosizi Lokushonelwa—Ongakwenza,” nalesitsi “Usizo Olungcono Kakhulu Kulabo Abashonelwe,” letitfolakala ngesiZulu.

LiBhayibheli liveta sisombululo lesitawuhlala phakadze

•  “UMbuso wakho awute. Intsandvo yakho ayentiwe emhlabeni njengasezulwini.”—Matewu 6:10.

Madvutane ‘uMbuso waNkulunkulu’ utawucinisekisa kutsi “kute lohlala khona [emhlabeni] loyawutsi: ‘Ngiyagula.’” (Makho 1:14, 15; Isaya 33:24) Bukela i-video letsi Uyini UMbuso WaNkulunkulu? kuze ufundze ngalohulumende wasezulwini nekutsi yini lotawuyenta.

Sikumema kutsi ufundze lokunyenti ngaloko liBhayibheli lelikushoko kuze wena nemndeni wakho nitozuza kuleteluleko talo letihlakaniphile kanye nasetetsembisweni talo letijabulisako.