Anna Moneymaker/Getty Images
HLALANI NILINDZILE!
Bososayensi Batsi Lilanga Lembubhiso Selisondzele Kakhulu—Litsini LiBhayibheli?
Mhlaka 24 January 2023, bososayensi batsite sikhatsi sembubhiso (Doomsday Clock)a sesisondzele kakhulu, lokusho kubhubha kwemhlaba.
“NgaLesibili, bososayensi batsite imbubhiso, lesho kuphela kwabo bonkhe bantfu emhlabeni, seyisondzele kakhulu ngenca yemphi lese-Ukraine, kusongelana ngetikhali te-nuclear kanye netinkinga letibangelwa kushintja kwesimo selitulu.”—I-AFP International Text Wire.
“NgaLesibili, bososayensi bavete kutsi imbubhiso seyisondzele kakhulu kunanini ngaphambili.”—I-ABC News.
“Licembu labososayensi labavela emhlabeni wonkhe becwayise ngekutsi bantfu sebalengela kakhulu engotini yekutibhubhisa kunanini ngaphambili.”—I-The Guardian.
Sekuyasondzela yini vele kuphela kwebantfu kanye nekweplanethi yetfu? Kufanele silesabe yini likusasa? Litsini liBhayibheli?
Lisiphatseleni likusasa?
Ngekusho kweliBhayibheli, “umhlaba utawuhlala ukhona kuze kube phakadze,” futsi bantfu batawuhlala “kuwo kuze kube phakadze.” (Umshumayeli 1:4; Tihlabelelo 37:29) Ngako bantfu angeke bawubhubhise umhlaba nobe bente kungasahlaleki kuwo.
Nobe kunjalo, liBhayibheli liyakhuluma ngekuphela. Sibonelo nje, litsi “live liyendlula.”—1 Johane 2:17.
Kuze utfole kutsi lisho kutsini liBhayibheli nalikhuluma ngekubhubha kwemhlaba, fundza sihloko lesitsi “Ingabe Umhlaba Usuzogoqwa? Ingabe IBhayibheli Lithi Konke Kuzobhujiswa?,” lesitfolakala ngesiZulu.
Kuze utfole kutsi liBhayibheli litsi tentakalo letitsite titakwenteka nini, fundza sihloko lesitsi “Uzobhubha Nini Umhlaba?,” lesitfolakala ngesiZulu.
Hlale unembono lokahle
LiBhayibheli lingasisita kutsi sihlale sinembono lokahle ngisho nangetulu kwetinkinga letikhona emhlabeni. Kanjani?
LiBhayibheli lisiniketa seluleko lesisebentisekako. (2 KuThimothi 3:16, 17) Sibonelo nje, fundza sihloko lesitsi “Indlela Yekulawula Kukhatsateka” kuze utfole indlela liBhayibheli lelingakusita ngayo uhlale unembono lokahle ngisho ubhekene netinkinga.
LiBhayibheli lisiniketa litsemba lelicinisekile ngelikusasa. (KubaseRoma 15:4) Lisitjela loko lokufanele sikulindzele nyalo nasesikhatsini lesitako, lokusisita singesabi ngisho kwentekani emhlabeni.
Kuze ufundze lokunyenti eBhayibhelini, sikumema kutsi wetame kufundza natsi liBhayibheli mahhala.
a “I-Doomsday Clock liwashi lelingumfanekiso lelentelwe kwecwayisa bantfu ngekusondzela kwembubhiso letawubangelwa tintfo tebuchwephesha letiyingoti letentiwe bantfu. Lifanekisela tinkinga letiyingoti lokufanele tilungiswe nangabe sifuna umhlaba ungabhubhi.”—Bulletin of the Atomic Scientists.