Litsini LiBhayibheli Ngenkinga Yekuswelakala Kwemanti Emhlabeni?
Sonkhe sidzinga emanti lahlobile kuze siphile. Nobe kunjalo, António Guterres, Lowengamele Inhlangano yaMhlabuhlangene, wecwayisa ngekutsi “inkinga yekuswelakala kwemanti seyinkhulu kakhulu ngenca yekukhula kwesidzingo semanti emhlabeni.” Kumatima kutsi tigidzigidzi tebantfu emhlabeni wonkhe titfole emanti lahlobile.
Strdel/AFP via Getty Images
Sitawuke sibe nawo yini emanti lenele? Nobe sitawuhlale sinenkinga yekuswelakala kwemanti? Litsini liBhayibheli?
LiBhayibheli lisetsembisani ngekutfolakala kwemanti?
LiBhayibheli lisetsembisa kutsi ngalelinye lilanga kuswelakala kwemanti kutawuphela. Ecinisweni, kutawuba nemanti lamanyenti lahlobile.
“Kuyawuphuma emanti ehlane, kube nemifudlana endzaweni lebekile lelugwadvule. Indzawo leyomiswe kushisa iyawuba sitiba lesigcwele umhlanga, nendzawo leyomile iyawuba netiyalu temanti.”—Isaya 35:6, 7.
Yini lengasenta sisikholwe lesetsembiso seliBhayibheli? Cabanga ngaloko lokushiwo liBhayibheli ngendlela umhlaba lowadalwa ngayo.
Litsini liBhayibheli ngemhlaba nangemjikeleto wemanti?
‘Nkulunkulu akazange awudalele lite nje umhlaba, kodvwa wawudalela kutsi kuhlalwe kuwo.’—Isaya 45:18.
Nkulunkulu wadala umhlaba kutsi ukhone kukhicita emanti lamanyenti lahlobile kuze bantfu bakhone kuphila.
“[Nkulunkulu] udvonsa ematfonsi emanti; Inkhungu ishintje ibe yimvula; Emafu atfululela imvula emhlabeni; Yehlele kubantfu.”—Jobe 36:27, 28.
Kalula nje, lelivesi lichaza indlela Nkulunkulu ladale ngayo umjikeleto wemanti lotawuhlala njalo. Kuba nemhwamuko wemanti emadamini naselwandle, bese kwakheka emafu labayimvula leniketa bantfu netilwane emanti lahlobile.—Umshumayeli 1:7; Amose 5:8.
“Ngiyawuniletsela imvula lenyenti ngesikhatsi lesifanele, futsi lelive liyawukhicita, netihlahla titsele titselo.”—Levithikhusi 26:4.
Njengobe ema-Israyeli asendvulo bekabantfu labalimako, Nkulunkulu wetsembisa kuwabusisa ngesivuno lesihle ngekutsi ahlale abaniketa emanti. Uyati kutsi kuze kube nekudla, kudzingeka kube nemanti lenele nangesikhatsi lesifanele.
Loko Nkulunkulu lakwentela sive sema-Israyeli asendvulo, utakwentela umhlaba wonkhe madvutane. (Isaya 30:23) Nobe kunjalo, kwanyalo inkinga yekuswelakala kwemanti iyandza etincenyeni letehlukahlukene temhlabeni, futsi nekuswelakala kwemvula kwengeta kulenkinga. Yini lenye liBhayibheli leliyishoko ngesisombululo salenkinga yekuswelakala kwemanti?
Indlela kuswelakala kwemanti lokutawucedvwa ngayo
LiBhayibheli liveta kutsi Nkulunkulu utawusebentisa uMbuso wakhe kuze acatulule tinkinga letisemhlabeni, lokufaka ekhatsi nenkinga yekuswelakala kwemanti. (Matewu 6:9, 10) UMbuso waNkulunkulu nguhulumende wasezulwini lotawubusa umhlaba wonkhe. (Danyela 2:44; Sembulo 11:15) Ngetulu kwaloko, uMbuso waNkulunkulu utawenta loko bohulumende bebantfu labehlulekako kukwenta, lokukucedza tintfo letibangela kuswelakala kwemanti.
Inkinga: Kushintjashintja kwesimo selitulu kunesandla kulenkinga yekuswelakala kwemanti. Kubangele somiso lesikhulu, tikhukhula letimatima ngenca yetimvula letinkhulu nobe kuphakama kwemanti elwandle.
Sisombululo: UMbuso waNkulunkulu utawulungisa umonakalo lowentiwe kuleplanethi. Nkulunkulu uyasetsembisa utsi: “Ngenta tonkhe tintfo tibe tinsha.” (Sembulo 21:5) Tindzawo letite emanti titawuba nemanti lamanyenti lahlobile, lokutawenta titjalo tikhule ngisho nasetindzaweni lokungahlali muntfu kuto. (Isaya 41:17-20) Nasekubusa Jesu Khristu, uMbuso waNkulunkulu utawulawula emandla emvelo emhlabeni wonkhe.
Ngesikhatsi Jesu alana emhlabeni, wathulisa siphepho lesesabekako, ngaleyondlela wasikhombisa kancane emandla Nkulunkulu lamnikete wona. (Makho 4:39, 41) Khristu nasekabusa njengeNkhosi yeMbuso waNkulunkulu, utawucedza tonkhe tehlakalo temvelo. Bantfu batawujabulela kuthula sibili kanye nekulondzeka, bangasesabi kutsi batawuvelelwa tehlakalo temvelo.
Inkinga: Bantfu labaticabangela bona kanye netinkapane letinebugovu tingcolisa imifula, emadamu kanye nemitfombo yemanti, lokubangela kuswelakala kwemanti lahlobile.
Sisombululo: Nkulunkulu utawuhlanta umhlaba abuyisele imifula, emadamu, lwandle kanye nemhlabatsi esimeni sako lesikahle. Umhlaba utawuba lipharadisi. Ngemavi lasankhondlo, liBhayibheli litsi: “Lihlane nendzawo leyomile kutawujabula, Indzawo lebekile lelugwadvule itawujabula kakhulu, ichakaze njengembali.”—Isaya 35:1.
Yini letawenteka kulabo labangenandzaba nalabanye bantfu kanye nemvelo? Nkulunkulu wetsembisa ‘kubhubhisa labo labalimata umhlaba.’—Sembulo 11:18, umbhalo longentasi; Taga 2:21, 22.
Inkinga: Bantfu bayawadlabhatisa emanti, futsi ngenca yaloko, basebentisa emanti lamanyenti kunalawo umhlaba lokhona kuwakhicita.
Sisombululo: UMbuso waNkulunkulu utawubangela kutsi kwentiwe ‘intsandvo yakhe emhlabeni,’ hhayi yebantfu labaticabangela bona. (Matewu 6:9, 10) LoMbuso utawufundzisa bantfu indlela lekahle kakhulu yekuphila. “Umhlaba uyawugcwala lwati ngaJehova,” njengobe kusho Isaya 11:9.a Bantfu nasebafundziswe nguNkulunkulu futsi sebamtsandza kakhulu yena kanye nendalo yakhe, batawunakekela kahle umhlaba kanye nemvelo.
Kuze utfole lokunyenti ngaloko lokutawufezwa nguMbuso waNkulunkulu, fundza sihloko lesitsi “Yini Letawufezwa NguMbuso WaNkulunkulu?”
Vula incwadzi yeliBhayibheli ya-Isaya sehluko 35, kuze utifundzele ngendlela umhlaba lotawuguculwa ngayo ube lipharadisi.
Bukela i-video letsi Kungani UNkulunkulu Adala Umhlaba? kuze utfole lokunyenti mayelana nekutsi Nkulunkulu wawudalelani umhlaba kanye nebantfu.
a Jehova ligama laNkulunkulu. (Tihlabelelo 83:18) Buka sihloko lesitsi “Ungubani Jehova?”