Sekutawucala Umnyaka Wesiblili Kusukela Kwacala Imphi Lese-Ukraine—Yini Leyetsenjiswa LiBhayibheli?

NgaLesihlanu, mhlaka 24 February 2023, kutawube kuhlangana umnyaka kusukela kwacala imphi lese-Ukraine. Ngekusho kwaleminye imibiko, kufe nobe kulimele emasotja ase-Ukraine newaseRussia langaba ngu-300 000 futsi kucatjangwa kutsi kufe bantfu labangaba ngu-30 000 kulemphi. Nobe kunjalo, kungenteka letinombolo tingetulu kwaloku.

Lokubuhlungu kutsi akubonakali shengatsi lemphi itawuphela madvutane.

• “Ngisho sekutawuphela umnyaka kusukela emasotja aseRussia ahlasela i-Ukraine, kute lokukhombisa kutsi lemphi itawuphela madvutane. Kubonakala shengatsi kute kulamave lamabili lelitawuncoba kulemphi, futsi kubonakala shengatsi angeke asitfole sisombululo lavumelana ngaso.”—I-NPR (National Public Radio), February 19, 2023.

Bantfu labanyenti bakhatsateke kakhulu ngebuhlungu nekuhlupheka kwebantfu labangenacala lokubangelwa ngulemphi kanye naletinye letisemhlabeni wonkhe. LiBhayibheli liniketa liphi litsemba? Tiyoke tiphele yini vele timphi?

Imphi leyocedza tonkhe timphi

LiBhayibheli likhuluma ngemphi letawukhulula bonkhe bantfu, hhayi letawubabhubhisa. Leyomphi yatiwa ngekutsi yi-Amagedoni, futsi ichazwa ngekutsi yimphi “yelilanga lelikhulu laNkulunkulu Somandla.” (Sembulo 16:14, 16) Nkulunkulu utawusebentisa lemphi kuze acedze imibuso yebantfu lebangele timphi letihlukumete bantfu emhlabeni. Kuze utfole indlela i-Amagedoni letawuletsa ngayo kuthula lokutawuhlala phakadze, fundza letihloko letilandzelako:

• “Iyini Impi Ye-Armagedoni?,” lesitfolakala ngesiZulu.

• “I-Amagedoni Ita Nalokuhle Kodvwa!”