Jesu Wavuswa Ngemtimba Wemoya Yini Nobe Wenyama?
Lokushiwo liBhayibheli
LiBhayibheli litsi Jesu “wabulawa ayinyama, kodvwa wavuswa angumoya.”—1 Phetro 3:18; Imisebenti 13:34; 1 KubaseKhorinte 15:45; 2 KubaseKhorinte 5:16.
Loko Jesu lakusho kwakhombisa kutsi abengeke avuswe ngemtimba wakhe wenyama. Watsi utawunikela ‘ngenyama yakhe kuze bantfu batotfola kuphila,’ ibe yinhlawulo yalabanyenti. (Johane 6:51; Matewu 20:28) Kube watsatsa umtimba wakhe wenyama nakavuswa, bekutawusho kutsi inhlawulo angeke isebente. Loko bekungeke kwenteke ngobe liBhayibheli litsi wanikela ngenyama nangengati yakhe “kwaba kanye kuphela.”—KumaHebheru 9:11, 12.
Nangabe Jesu avuswa anemtimba wemoya, pho bambona njani bafundzi bakhe?
Tidalwa letingumoya tingatishintja tibe nemitimba yenyama. Sibonelo nje, endvulo, tingilosi letakwenta loku tadla taphindze tanatsa nebantfu. (Genesisi 18:1-8; 19:1-3) Nobe kunjalo, betisolo titidalwa temoya futsi betingayishiya lemitimba yenyama.—Tikhulu 13:15-21.
Ngemuva kwekuvuswa kwakhe, Jesu wasebentisa umtimba wenyama kwesikhashana njengobe bekwente tingilosi ngaphambilini. Njengobe abesidalwa semoya, bekakhona kutenta abonakale, aphindze anyamalale ngekushesha. (Lukha 24:31; Johane 20:19, 26) Bekabonakala ngemitimba yenyama leyehlukahlukene. Ngako ngisho nebangani baJesu labasedvute bebambona kuphela nasekasho nobe ente lokutsite.—Lukha 24:30, 31, 35; Johane 20:14-16; 21:6, 7.
Ngesikhatsi avela kumphostoli Tomase, Jesu wavela ngemtimba lonetibati. Wenta loku kuze acinise kukholwa kwaTomase, ngobe abengabata kutsi Jesu uvusiwe.—Johane 20:24-29.