Iyini IBhabhulona Lenkhulu?

Lokushiwo liBhayibheli

Incwadzi yeSambulo ikhuluma “ngemfati” ‘loyingwadla lenkhulu’ futsi uneligama “leliyimfihlo lelitsi: ‘IBhabhulona Lenkhulu.’” (Sembulo 17:1, 3, 5) Lomfati umelela tonkhe tinkholo temanga letikhona emhlabeni, leto ‘letikhetsa kukholwa emanga kunekutsi tikholwe liciniso lelivela kuNkulunkulu.’a (KubaseRoma 1:25) Nanobe letinkholo tingafani, kodvwa tonkhe tenta bantfu bangamkhonti Nkulunkulu weliciniso, Jehova.​—Dutheronomi 4:35.

Tintfo letingasisita sibone iBhabhulona Lenkhulu

1. IBhabhulona Lenkhulu ifanekisela lokutsite. Incwadzi yeSembulo isebentisa “tibonakaliso,” ngako loko kusenta siphetse ngekutsi iBhabhulona Lenkhulu ayisuye umfati mbamba kodvwa ufanekisela lokutsite. (Sembulo 1:1) Ngetulu kwaloko lomfati ‘uhleti etikwemanti lamanyenti,’ ‘lamelela bantfu, ticumbi tebantfu, tive kanye netilwimi.’ (Sembulo 17:1, 15) Umfati longokocobo angeke aze akhone kukwenta loko.

2. IBhabhulona Lenkhulu imelela inhlangano lesemhlabeni wonkhe. Ibitwa ngekutsi “lidolobha lelikhulu lelibusa etikwemakhosi emhlaba.” (Sembulo 17:18) Loko kusho kutsi ilawula umhlaba wonkhe.

3. IBhabhulona Lenkhulu iyinhlangano yenkholo, hhayi yetepolitiki nobe yetentsengiselwano. IBhabhulona yasendvulo bekulidolobha lebelidvume kakhulu ngenkholo futsi latiwa ngekusebentisa kakhulu ‘imilingo lehambisana nemimoya lemibi’ kanye “nekutsakatsa.” (Isaya 47:1, 12, 13; Jeremiya 50:1, 2, 38) Ecinisweni, bantfu lebebahlala kulelidolobha bebasenkholweni yemanga lemelene naNkulunkulu weliciniso, Jehova. (Genesisi 10:8, 9; 11:2-4, 8) Babusi baseBhabhulona bebatiphakamisa futsi batenta labakhulu kunaJehova nekukhonta kwakhe. (Isaya 14:4, 13, 14; Danyela 5:2-4, 23) Ngendlela lefanako, IBhabhulona Lenkhulu yatiwa ‘ngekusebentelana kwayo nemimoya.’ Loko kukhombisa kutsi iyinhlangano yenkholo yemanga.​—Sembulo 18:23.

   IBhabhulona Lenkhulu ngeke ibe yinhlangano yetepolitiki ngobe “emakhosi emhlaba” ayayililela nayibhujiswa. (Sembulo 17:1, 2; 18:9) Ngetulu kwaloko, ite emandla etentsengiselwano ngobe liBhayibheli liyayehlukanisa ‘kubatsengisi bemhlaba.’​—Sembulo 18:23.



Photograph taken by courtesy of the British Museum

4. IBhabhulona Lenkhulu iyimelela kahle inkholo yemanga. Kunekutsi inkholo yemanga ifundzise bantfu kutsi basondzelane naNkulunkulu, Jehova, ibafundzisa kutsi bakhonte labanye bonkulunkulu. LiBhayibheli libita loku ngekutsi ‘kugwadlela Nkulunkulu.’ (Levithikhusi 20:6, umbhalo longentasi; Eksodusi 34:15, 16) Tinkholo temanga letinyenti tisafundzisa timfundziso lebetifundziswa eBhabhulona yakadzeni, letifaka ekhatsi mtsatfu amunye, kungafi kwemphefumulo kanye nekukhonta titfombe. Letinkholo tiphindze tihlanganise kukhonta kwato Nkulunkulu nekutsandza live. LiBhayibheli libita lokungetsembeki ngekutsi kugwadlela Nkulunkulu.​—Jakobe 4:4.

   Kunjinga kwenkholo yemanga kanye nekubukisa kwayo ngetintfo lenato kufakazela loko liBhayibheli lelikushoko ngeBhabhulona Lenkhulu, ‘legcoke ingubo lenembala lobukhwebeletane nalobovu, legabe nemihlobiso leyentiwe ngeligolide, ngelitje leliligugu nangemapharele.’ (Sembulo 17:4) IBhabhulona Lenkhulu ingumtfombo ‘wetintfo letenyanyekako tasemhlabeni,’ noma timfundziso kanye netento letikhombisa kungamhloniphi Nkulunkulu. (Sembulo 17:5) Emalunga enkholo yemanga “bantfu, ticumbi tebantfu, tive kanye netilwimi.” letisekela iBhabhulona Lenkhulu.​—Sembulo 17:15.

IBhabhulona Lenkhulu inelicala ngekufa kwabo “bonkhe lababulawa emhlabeni.” (Sembulo 18:24) Kuwo wonkhe umlandvo, inkholo yemanga yehlulekile kufundzisa bantfu ngaJehova, Nkulunkulu welutsandvo, futsi ibangele timphi, yasekela netidlamlilo. (1 Johane 4:8) Lokwehluleka kwayo kubangele kucitseka kwengati lenyenti.

Nkulunkulu uyitsatsa njani IBhabhulona Lenkhulu?

Emehlweni aNkulunkulu tono teBhabhulona Lenkhulu “setincwabelene taze tefika ezulwini.” (Sembulo 18:4, 5) Nkulunkulu uyikwatele inkholo yemanga ngekutsi immelela kabi futsi ihlupha nemalunga ayo.

Yini letokwenteka kuBhabhulona Lenkhulu?

LiBhayibheli litsi “Nkulunkulu uyehlulele” iBhabulona Lenkhulu. (Sembulo 18:20) LiBhayibheli laphrofetha kutsi Nkulunkulu utayicedza inkholo yemanga. (Sembulo 18:8) Utawusebentisa silwane sesiganga, lesimelela bohulumende labasekela Mhlabuhlangene, lesitawujikela lenkholo yemanga siyibhubhise siyicedze. (Sembulo 17:16, 17) “NeBhabhulona, lokulidolobha lelikhulu, itawujikwa phansi ngekushesha lokukhulu, futsi ngeke iphindze itfolakale.” (Sembulo 18:21) Labo labafuna kujabulisa Nkulunkulu kufanele ‘baphume kuyo,’ batehlukanise nenkholo yemanga.​—2 KubaseKhorinte 6:14-17.