Umuntfu Angayekela Yini Kuba NguFakazi WaJehova?

Yebo. Umuntfu angayekela kulenhlangano yetfu asebentisa tindlela letimbili:

• Ngekwenta sicelo. Umuntfu angasho ngemlomo kutsi akasafuni kuba nguFakazi waJehova nobe akubhale phasi.

• Ngetento. Umuntfu angenta sento lesikhombisa kutsi akasafuni kuba nguFakazi waJehova. (1 Phetro 5:9) Nasi sibonelo, angatimatanisa nalenye inkholo futsi akwente kucace kutsi yena sewufuna kuba yincenye yaleyo nkholo.​—1 Johane 2:19.

Kutsiwani nangabe lomunye umuntfu angashumayeli nobe angasayi emihlanganweni yenu? Niyaye nitsi loyo muntfu sewuyekele yini kuba nguFakazi waJehova?

Cha, asisho njalo. Kuyekela nobe kutehlukanisa kwehlukile kunekuba butsakatsaka ekukholweni. Ngalokuvamile labo labehlisa lizinga lekukhonta Nkulunkulu nobe baze bayekele akusho kutsi basuke bangasakholwa kodvwa basuke badvumatekile. Kunekutsi singasabanaki bantfu labanjalo, setama kubadvudvuta futsi sibasekele. (1 Thesalonika 5:14; Juda 22) Nangabe lomuntfu adzinga lusito, bazalwane labadzala ebandleni bayamsita kuze acinise buhlobo bakhe naNkulunkulu.​—Galathiya 6:1; 1 Phetro 5:1-3.

Nobe kunjalo, labadzala bete lilungelo lekucindzetela umuntfu kutsi ahlale anguFakazi waJehova. Umuntfu ngamunye uyatentela sincumo lesimayelana nenkholo. (Joshuwa 24:15) Siyakholwa kutsi labo labakhonta Nkulunkulu kufanele bamkhonte ngalokusuka enhlitiyweni.​—Tihlabelelo 110:3; Matewu 22:37.