Kusono Yini Kubhema?

Lokushiwo liBhayibheli

LiBhayibheli alikhulumi ngekubhemaa nobe letinye tindlela tekusebentisa ligwayi. Kunaloko, licuketse timiso letikhombisa kutsi Nkulunkulu akayemukeli imikhuba lengcolile nalengenamphilo, kungako atsatsa kubhema njengesono.

Kuhlonipha kuphila. ‘Nkulunkulu . . . unika bonkhe bantfu kuphila nemoya.’ (Imisebenti 17:24, 25) Njengobe kuphila kusipho lesivela kuNkulunkulu, akukafanele sente nobe ngabe yini lengakunciphisa njengekubhema. Kubhema kungulenye yetimbangela letinkhulu tekufa lokungagwemeka emhlabeni wonkhe.
Lutsandvo ngamakhelwane. “Kufanele utsandze makhelwane wakho njengobe utitsandza wena.” (Matewu 22:39) Kubhema emkhatsini walabanye akukhombisi kutsi uyabatsandza. Bantfu labangabhemi kodvwa labavame kuhogela intfutfu yeligwayi basengotini lenkhulu yekutfola letinye tifo letivamise kuphatsa labo lababhemako.
Sidzingo sekubangcwele. ‘Nikelani ngemitimba yenu ibe ngumhlatjelo lophilako, longcwele nalowemukelekako kuNkulunkulu.’ (Roma 12:1) “Asitihlante kuko konkhe kungcola kwenyama nekwemoya, siphelelise bungcwele betfu ngekwesaba Nkulunkulu.” (2 Khorinte 7:1) Kubhema akuhambisani nemvelo nekubangcwele—lokusho kuhlanteka nekubamsulwa—ngobe bantfu labasebentisa ligwayi bafaka emitimbeni yabo kungcola lokulimatako ngenhloso.

LiBhayibheli liyakhuluma yini ngekusebentisa insangu nobe letinye tidzakamiva kute sitijabulise?

EBhayibheli kute ligama longalitfola letitsi insangu noma emagama aletinye tidzakamiva. Kodvwa licuketse timiso letikulahlako kuba yimilutsa yetidzakamiva ngenjongo yekutijabulisa. Ngetulu kwaletimiso, naku lokunye lesingakusebentisa:

Sidzingo sekulawula tingcondvo. LiBhayibheli litsi: “Kufanele utsandze Jehova Nkulunkulu wakho . . . nangayo yonkhe ingcondvo yakho.” (Matewu 22:37, 38) Liphindze litsi: “Nichubeke nicabangisisa kahle.” (1 Phetro 1:13) Umuntfu losebentisa kabi tidzakamiva akakhoni kuyilawula ngalokuphelele ingcondvo yakhe futsi bantfu labanyenti babe yimilutsa yato. Bahlale bacabanga ngetindlela tekutfola letidzakamiva kanye nekutisebentisa kunekutsi bacabange ngetintfo letakhako.—Filiphi 4:8.
Kulalela imitsetfo yabohulumende. ‘Lalelani babusi netiphatsimandla.’ (Thithusi 3:1) Etindzaweni letinyenti, imitsetfo yabohulumende ngiyo lelawula ngalokuphelele kusetjentiswa kwetidzakamiva. Nangabe sifuna kujabulisa Nkulunkulu kufanele silalele imitsetfo yetiphatsimandla.—Roma 13:1.

Ligwayi Nemphilo Yakho

I-World Health Organization itsi njalo ngemnyaka kunebantfu labalinganiselwa etigidzini letisitfupha lababulawa tifo letiphatselene nekubhema ligwayi, labafaka ekhatsi bantfu labangetulu kwa-600 000 labangabhemi kepha labahogela intfutfu yeligwayi kubantfu lababhemako. Cabanga indlela ligwayi leliyitsintsa ngayo imphilo yalabo labalisebentisako kanye neyalabo labasondzelene nabo labangalisebentisi.

Umdlavuza. Intfutfu yeligwayi icuketse emakhemikhali e-carcinogene langetulu kwa-50. I-Encyclopædia Britannica itsi “kukholelwa kutsi intfutfu yeligwayi ngiyo lebangela emaphesenti langu-90 ebantfu kutsi babenemdlavuza wemaphaphu.” Intfutfu yeligwayi ingabangela umdlavuza nakuletinye titfo temtimba letihlanganisa umlomo, liphayiphi lemoya, liphayiphi lekudla, umphimbo, ligilo, sibindzi, lubendze kanye nesinye.

Tifo temaphaphu. Intfutfu yeligwayi yandzisa ematfuba etifo letiba semaphashini letifaka ekhatsi i-pneumonia nemkhuhlane lomkhulu. Bantfwana labahlale bahogela intfutfu nakubhema labo labahlala nabo basematfubeni lamanyenti ekutfola i-asthma, kukhwehlela lokungapheli, futsi loku kuphindze kwehlise nelizinga emaphaphu lakhula ngayo nalasebenta ngayo.

Sifo senhlitiyo. Bantfu lababhemako basengotini lenkhulu yekushaywa stroke nobe yekuphatfwa sifo senhlitiyo. I-Carbon monoxide letfolakala entfutfwini yeligwayi yendlula melula emaphashini iye emitsanjeni yengati lapho ifike ivale khona kungena kwe-oxygen. Nangabe sekune-oxygen lencane engatini, inhlitiyo isebenta kamatima kute itfumele i-oxygen emtimbeni.

Tingoti kumuntfu lotetfwele. Bafati lababhema babe bakhulelwe benyusa tingoti tekutsi batale bantfwana sikhatsi singakafiki, nesekutsi labantfwana batalwe banesisindvo lesiphansi nobe batalwe banetici letitsite letinjenge-cleft lip. Bantfwana labanjalo bangaphindze babe netinkinga tekuphefumula nobe i-sudden infant death syndrome.

a Lapha kubhema kubhekisela ekuhosheni intfutfu yeligwayi, kungaba sitiki seligwayi, sigazo, lipipi nobe lishawulo. Nome kunjalo, letimiso lokukhulunywa ngato tisebenta ngalokufanako naselugwayini loluhlafunwako, sinefu, ligwayi lolungalayidwa lolunesidzakamiva i-nicotine, naletinye tinhlobo teligwayi.