Kudutjulwa Kwebantfu Lokwetfusako Lokwenteka Emhlabeni—Litsini LiBhayibheli?

Nga-July 2022, kube nekudutjulwa kwebantfu lokwetfusako emhlabeni wonkhe:

• “Kubulawa kwasopolitiki lowatiwako e-Japan [Shinzo Abe lobekanguNdvunankhulu] kunyakatise lelive futsi kwetfusa umhlaba wonkhe, ikakhulukati ngobe kute bugebengu lobunyenti eJapan futsi kunemitsetfo lecinile lemayelana nekusetjentiswa kwetibhamu.”—I-The Japan Times yanga-July 10, 2022.

• “I-Denmark yetfuke kakhulu ngemuva kwekutsi indvodza lehlome ngesibhamu idubule futsi ibulale bantfu labatsatfu e-Copenhagen mall.”—I-Reuters yanga-July 4, 2022.

• “E-South Africa kufe bantfu labangu 15 eSoweto ngesikhatsi emadvodza lahlome ngetibhamu adubula ebhareni.”—I-The Guardian yanga-July 10, 2022.

• “Kudutjulwe kwabulawa bantfu labangetulu kwa-220 eMelika ngemphelasontfo yangaJuly 4.”—I-CBS News yanga-July 5, 2022.

Likhona yini litsemba lekutsi lobudlova buyoke buphele? Litsini liBhayibheli?

Kuphela Kwebudlova

LiBhayibheli lichaza sikhatsi lesiphila kuso ngekutsi ‘ngemalanga ekugcina,’ sikhatsi lapho bantfu batawuba nelulaka, babe nelunya futsi babe nebulwane. (2 KuThimothi 3:1, 3) Letento tebudlova tenta bantfu baphile ngekwesaba. (Lukha 21:11) Nobe kunjalo, liBhayibheli letsembisa kutsi kutawufika sikhatsi lapho budlova butawuphela khona, futsi bantfu “batawuhlala endzaweni lenekuthula kwaphakadze, [futsi] batawuhlala etindzaweni letiphephile nasetindzaweni tekuphumula letinekuthula.” (Isaya 32:18) Butawuphela njani budlova?

Nkulunkulu utawususa bantfu lababi aphindze abhubhise tonkhe tikhali

• “Kodvwa lababi batawucedvwa emhlabeni.”—Taga 2:22.

• “[Nkulunkulu] Ucedza timphi emhlabeni wonkhe. Wephula butjoki, ephule nesikhali sibe ticucu; futsi ushisa tincola temphi ngemlilo.”—Tihlabelelo 46:9.

Nkulunkulu utawucedza imbangela yebudlova ngekutsi afundzise bantfu kuphila ngekuthula.

• “Angeke tilimate lutfo futsi angeke tibangele umonakalo kuyo yonkhe intsaba yami lengcwele, ngobe umhlaba uyawugcwala lwati ngaJehova njengobe nemanti agcwalisa lwandle.”—Isaya 11:9.

• Ngisho kwamanje, Nkulunkulu ufundzisa bantfu emhlabeni wonkhe kutsi batondze budlova kanye nekusebentisa tikhali futsi ‘bagucule tinkemba tabo batente tibe ngemakhuba futsi tikhali tabo batente tikelo tekutsena tihlahla.’—Mikha 4:3.

Kuze utfole lokunyenti ngetetsembiso teliBhayibheli temhlaba lote kwesaba, fundza sihloko lesitsi “Ingabe Ungakhululeka Ekwesabeni?” lesitfolakala ngesiZulu.

Kuze utfole lokunyenti ngesisombululo lesingeke siphele sebudlova, fundza sihloko lesitsi “Ukuthula Emhlabeni Ekugcineni!” lesitfolakala ngesiZulu.