Kushisa Lokukhulu Kwasehlobo Langa-2023​—Litsini LiBhayibheli?

Bantfu emhlabeni wonkhe babeketelela kushisa lokungakaze kubonwe, kanye naletinye timo telitulu letimbi. Naka lemibiko lelandzelako:

• “Lo-June lesisuka kuwo bewushisa kakhulu kwendlula leminye iminyaka kusukela kwacala kubikwa kwesimo selitulu eminyakeni lengu-174 leyendlulile.”​—I-National Oceanic and Atmospheric Administration, U.S. Department of Commerce, ngaJuly 13, 2023.

• “Kushisa kakhulu e-Italy, eSpain, eFrance, eGermany kanye nasePoland futsi kulindzeleke kutsi emazinga ekushisa enyuke kakhulu afike ku-48°C esihlengeni saseSicily nesaseSardinia. Lawa ngemazinga ekushisa lasetulu kakhulu lokungenteka akakase abonwe eEurope.”​—I-European Space Agency, ngaJuly 13, 2023.

• “Njengobe emhlabeni kuchubeka kushisa, kulindzeleke kutsi kwandze timvula letinkhulu letibanga tikhukhula.”​—Stefan Uhlenbrook, umcondzisi wenhlangano yesimo selitulu i-World Meteorological Organization, ngaJuly 17, 2023.

Lemibiko lemayelana nekugucuka kwesimo selitulu iyakukhatsata yini wena? Cabanga ngaloko lokushiwo liBhayibheli ngalendzaba.

Kushintja kwesimo selitulu kugcwalisa siphrofetho seliBhayibheli yini?

Yebo. Kushisa lokukhulu emhlabeni kanye naletinye timo telitulu letimbi kuvumelana naloko lokwashiwo liBhayibheli ngesikhatsi lesiphila kuso. Sibonelo nje, Jesu waphrofetha kutsi besitawubona “tintfo letetfusako,” nobe “tintfo letingaketayeleki naletesabisako.” (Lukha 21:11; Good News Translation) Kwenyuka kwemazinga ekushisa kwenta bantfu besabe kutsi kungenteka kungasahlaleki emhlabeni.

Kutawenteka yini kungasahlaleki emhlabeni?

Cha. Nkulunkulu wadala umhlaba kutsi ube likhaya letfu kuze kube phakadze, ngako angeke avumele bantfu kutsi bawubhubhise. (Tihlabelelo 115:16; Umshumayeli 1:4) Ecinisweni, wetsembise kutsi ‘utawubhubhisa labo labalimata umhlaba.’​—Sembulo 11:18.

LiBhiyibheli letsembisa kutsi Nkulunkulu utawuvikela umhlaba kuze ungonakaliswa.

• “[Nkulunkulu] uthulisa lesivunguvungu; bese emagagasi aselwandle ayabindza.” (Tihlabelelo 107:29) Nkulunkulu unemandla ekulawula imvelo. Unawo nemandla ekulungisa tinkinga temvelo letenta bantfu bahlupheke ngenca yesimo selitulu lesibi.

• “Wena unakekela umhlaba, uwente unotse futsi ukhicite kakhulu.” (Tihlabelelo 65:9) Nkulunkulu utawubusisa umhlaba futsi awente ube lipharadisi.

Kuze utfole lokunyenti ngesetsembiso seliBhayibheli sekulungiswa kwemhlaba, fundza sihloko lesitsi “Ngubani Lotawusindzisa Umhlaba?”