Kungenteka Yini Kube Nemphi Yemhlaba Madvutane?​—Litsini LiBhayibheli?

Kuleminyaka lengu-30 leyendlulile, emave lamanyenti bewabonakala anebudlelwane lobuhle. Nobe kunjalo, tintfo letentekako muva nje tikhombisa kutsi akusesinjalo.

• “Bantfu bakhatsatekile kutsi imphi leseGaza itawutsintsa nalamanye emave ladvutane nayo njengobe live laka-Israyeli neHezbollah sewalwa ngasemnceleni waseLebanon.”​—I-Reuters, yaJanuary 6, 2024.

• “Emacembu latsite lalawulwa yi-Iran sewacale kuhlasela tindzawo letehlukahlukene, futsi i-Iran seyiphindze icale kwakha tikhali te-nuclear. Ngetulu kwaloko, live laseRussia neChina sewakhe bungani ne-Iran, lokusongela emave lasenshonalanga (western countries).”​—I-The New York Times, yaJanuary 7, 2024.

• “Kuhlasela kweRussia kuyachubeka kubanga umonakalo lomkhulu e-Ukraine.”​—I-UN News, yaJanuary 11, 2024.

• “Kudlondlobala kweChina kutemnotfo kanye nekutfutfuka kwayo kutemphi, kutigcabha kweTaiwan, kanye nekungevani kweChina neMelika, kungaholela emphini kamelula nje.”​—I-The Japan Times, yaJanuary 9, 2024.

Kukhona yini liBhayibheli lelikushoko ngako konkhe loku lokwenteka emhlabeni? Kutawuholela emphini yemhlaba yini?

LiBhayibheli laphrofetha ngetintfo letenteka lamuhla

LiBhayibheli alizange liphrofethe ngalokucondzile ngemphi lekhona emkhatsini wemave latsite lamuhla. Kunaloko, laphrofetha ngekutsi bekutawuba netimphi letinyenti esikhatsini setfu ‘lebetitawususa kuthula emhlabeni.’​—Sembulo 6:4.

Incwadzi yaDanyela yaphrofetha kutsi “esikhatsini sekuphela,” emave lanemandla ‘atawufucana’ abange kubusa umhlaba. Lombango bewutawufaka ekhatsi kutigabatisa ngekuba netikhali temphi letinemandla kanye nekuba nemali lenyenti.​—Danyela 11:40, 42, 43.

Imphi letako

LiBhayibheli liveta kutsi simo emhlabeni sitawuba sibi nakakhulu ngaphambi kwekutsi sibe ncono. Jesu waphrofetha kutsi “kutawuba nekuhlupheka lokukhulu lokungazange sekube khona kusukela kwaba khona umhlaba.” (Matewu 24:21) ‘Kuhlupheka lokukhulu’ kutawuholela emphini ye-Amagedoni, lechazwa ngekutsi yimphi “yelilanga lelikhulu laNkulunkulu Somandla.”​—Sembulo 16:14, 16.

I-Amagedoni angeke ibhubhise bantfu, kodvwa itawubasindzisa. Nkulunkulu utawusebentisa lemphi kuze acedze kubusa kwebantfu lokubangele timphi emhlabeni. Kuze utfole kutsi i-Amagedoni itakuletsa njani kuthula lokuhlala njalo, fundza letihloko letilandzelako:

• “Iyini Impi Ye-Armagedoni?,” lesitfolakala ngesiZulu.

• “I-Amagedoni Ita Nalokuhle Kodvwa!”